27
A Z Ə R B A Y C A N V Ə K İ L İ ‐ III nömrə
Əgər dövlət ittihamçı məhkəmədə özünü passiv aparırsa (sübutların araşdırılmasında iştirak
etmirsə, zəruri vəsatətlər vermirsə və s.) prokurorun belə hərəkətləri onun üzərinə qoyulan
vəzifələrin pozulması kimi qiymətləndirilməlidir. Belə halda əgər dövlət ittihamçısı öz üzərinə
qoyulan vəzifələri lazımi qaydada həyata keçirmirsə, məhkəmə həmin prokuror barədə xüsusi
qərar çıxara bilər. Prokurorun ittihamedici nitqi onun sübutetmədə iştirakını sona çatdırır.
Prokurorun işin apellyasiya və ya kassasiya qaydasında aparılması üzrə sübutetmədə iştirakı
nəzarət funksiyalarının həyata keçirilməsi formasıdır.
Sübutetmə vəzifəsi
Cinayət prosesində sübutetmə vəzifəsi problemi 2 məsələni ortaya çıxarır: a) hansı şəxslər və
orqanlar hansı həcmdə bu vəzifəni daşıyır? b) prosesin hansı subyektləri sübutetmə vəzifəsi
subyektləri deyil?
Sübutetmə vəzifəsi nöqteyi‐nəzərindən sübutetmənin bütün subyektlərini aşağıdakı kateqoriyalara
bölmək olar:
1. Cinayət prosesini həyata keçirən orqanlar. Bu orqanlar cinayət prosesinin müvafiq
mərhələlərində sübutları toplama, yoxlama və qiymətləndirməklə sübutetmə vəzifəsini həyata
keçirir;
2. Cinayət prosesi üzrə üzərinə sübutetmə vəzifəsi qoyulmayan təqsirləndirilən şəxs;
3. Cinayət prosesində öz maraqlarını qoruyan şəxslər. Onlar da 2 qrupa bölünür: a) maraqlarını
şəxsən qoruyan şəxslər –zərərçəkən şəxs, mülki iddiaçı və cavabdeh. Onlar cinayət işi üzrə nəyi
isə sübut edə bilər, lakin buna məcbur deyillər. b) təqsirləndirilən şəxsi qorumaq və ya prosesin
digər iştirakçılarının (zərərçəkən, mülki iddiaçı və cavabdehin nümayəndəsi) qanuni maraqlarını
təmsil etmək vəzifəsini həyata keçirən şəxslər. Bu şəxslər təqsirləndirilən şəxsin təqsirliliyini və
ya məsuliyyətini yüngülləşdirən halları sübut edir və ya təmsil etdikləri şəxslərin maraqlarına
uyğun olan vəzifələri həyata keçirir.
Göründüyü kimi, yuxarıda qeyd edilən şəxslərdən, orqanlardan yalnız cinayət prosesini həyata
keçirən orqan sübutetmə vəzifəsini həyata keçirir. Onlar heç bir halda sübutetmə vəzifəsini
təqsirləndirilən şəxsin üzərinə qoya bilməz. Məhz cinayət prosesində sübutetmə vəzifəsinin
mahiyyəti budur. Cinayətin törədilməsi, kim tərəfindən törədilməsini aşkara çıxarmaq cinayət işi
üzrə məsuliyyət daşıyan orqanların vəzifəsini təşkil edir. Bu fəaliyyət: a) toplanmış sübutların
məcmusu üzrə təqsirləndirilən şəxsin təqsirliliyinin əsaslandırılması deyil, həmçinin ibtidai
istintaq və məhkəmədə sübutların toplanması, yoxlanması və qiymətləndirilməsidir; b) təkcə
təqsirlilik və ya təqsirsizlik məsələsi deyil, həm də sübutetmə predmetinin digər elementlərinin
müəyyən edilməsinə yönəlir; c) təqsirləndirilən şəxsin və prosesin digər iştirakçılarının qanuni
mənafelərinin qorunmasına yönəlir. Beləliklə, cinayət prosesini həyata keçirən orqanın üzərinə
qoyulan sübutetmə vəzifəsi mahiyyətcə bu orqanların iş üzrə halların tam, hərtərəfli və obyektiv
araşdırılması vəzifəsi ilə üst‐üstə düşür.
Dövlət ittihamçısı‐prokuror təqsirləndirilən şəxsinr təqsirliliyini sübuta yetirmək vəzifəsi daşısa
da bu bütün hallarda baş vermir. Əgər o, qanunla ona verilən imkanlardan istifadə etmirsə,
sübutetmə vəzifəsini pozur. Məhkəmədə ittiham təsdiq edilmirsə və prokuror ondan imtina edirsə,
onda prokuror tərəfindən yerinə yetirilən sübutetmə vəzifəsinin xarakteri dəyişir: bu halda o,
ittihamdan imtinanı əsaslandırmalıdır. Əgər o, bunu etmirsə, yenə də sübutetmə vəzifəsini pozmuş
olur.
Sübutetmə vəzifəsi prokurora həvalə edildiyindən təqsirləndirilən şəxs ifadə verməkdən imtina
etmək hüququna malikdir. Buna görə də onun ifadə verməkdən imtina etməsi onun təqsirliliyini
göstərən sübut kimi istifadə oluna bilməz. Eyni zamanda təqsirləndirilən şəxsi fadə verməyə
məcbur etmək olmaz. Onun ifadə verməkdən imtina etməsinə görə hər hansı cinayət və ya
28
A Z Ə R B A Y C A N V Ə K İ L İ ‐ III nömrə
inzibati hüquq məsuliyyəti nəzərdə tutulmayıb. Cinayət prosesinin başqa iştirakçılarından fərqli
olaraq, ifadə vermək təqsirləndirilən şəxsin vəzifəsi deyil, hüququdur. O, bu hüquqdan istədiyi kimi
istifadə edə bilər. Əgər zorakılıq, hədə‐qorxu, aldatma yolu ilə təqsirləndirilən şəxsdən ifadə
alındıqda, belə qaydada əldə olunmuş materiallardan sübut kimi istifadə oluna bilməz.
Təqsirləndirilən şəxs sübutların əldə edilməsinə yönələn müstəntiq və məhkəmənin qanuni
tələblərini yerinə yetirməyə borcludur. (axtarış, götürmə, ekspertiza zamanı) Lakin bu halda da
təqsirləndirilən şəxs sübutetmə vəzifəsi daşımır, bu vəzifəni müstəntiq və məhkəmə həyata keçirir,
təqsirləndirilən şəxs isə bu vəzifələrin həyata keçirilməsində onlara mane olmamalıdır.
Müdafiə tərəfinin sübutetmədə yeri
CPM‐də çəkişmə prinsipinin əks olunması cinayət prosesində iştirak edən ittiham və müdafiə
tərəfinin məhkəmə qarşısında bərabər olmasına gətirib çıxarır. Bu da onların fəaliyyətində
aktivliyin artmasını tələb edir.
Sübutetmədə təqsirləndirilən şəxsin və onun müdafiəçisinin iştirak etməsi onun qanuni
maraqlarının müdafiəsini təmin edir və eyni zamanda iş üzrə halların tam və hərtərəfli
araşdırılmasını, həqiqətin müəyyən edilməsini tələb edir. Cinayət törətməyən təqsirləndirilən şəxs
öz təqsirsizliyini sübut etmək üçün müstəntiq və məhkəməyə sübutetmədə aktiv iştirakı ilə kömək
edir. Cinayət törədən təqsirləndirilən şəxs sübutetmədə öz aktiv fəaliyyəti ilə məsuliyyəti
yüngülləşdirən halların müəyyən edilməsi üçün işin hallarının hərtərəfli və obyektiv
araşdırılmasında yaxından iştirak edir. Sübutetmədə təqsirləndirilən şəxsin iştirakı onun qanuni
hüquqlarının izah olunması ilə həyata keçirilir. (CPM‐nin 91‐ci mad.)
Təqsirləndirilən şəxs qanunla müəyyən edilmiş qaydada prosessual hərəkətlərin həyata
keçirilməsində iştirak etmək hüququna malikdir. Bəzi prosessual hərəkətlər təqsirləndirilən şəxsin
iştirakı olmadan həyata keçirilə bilməz. (dindirmə, üzləşdirmə, tanınma və s.) Digər hallarda
təqsirləndirilən şəxsin istintaq hərəkətində iştirakı müstəntiq və prokurordan asılıdır. Məhkəmə
baxışında isə təqsirləndirilən şəxs bütün iclaslarda iştirak edir. Bu halda CPM‐nin 311.2‐ci
maddəsində göstərilmiş əsaslar istisna təşkil edir. Belə ki, Azərbaycan Respublikasının
hüdudlarından kənarda olan təqsirləndirilən şəxs məhkəməyə gəlməkdən qəsdən boyun
qaçırdıqda, cinayət təqibi ilə bağlı bütün halların hərtərəfli, tam və obyektiv təsdiq edilməsinə mane
olmamaq şərtilə böyük ictimai təhlükə törətməyən cinayətdə təqsirləndirilən şəxs ona qarşı irəli
sürülən ittihama məhkəmədə onun iştirakı olmadan baxılması barədə vəsatət qaldırdıqda məhkəmə
baxışı təqsirləndirilən şəxsin iştirakı olmadan aparıla bilər. Məhkəmə baxışında təqsirləndirilən
şəxs əldə etdiyi məlumatları bildirmək, vəsatət vermək və digər hüquqlara malikdir.
Sübutetmədə müdafiəçinin iştirakı təqsirləndirilən şəxsin vəziyyətinin yaxşılaşdırılması və onun
hüquqlarının tam həyata keçirilməsinə şərait yaratmaq məqsədilə nəzərdə tutulub. Müdafiəçi
təqsirləndirilən şəxsin hüquqları pozulduğu halda pozuntunun qarşısının alınmasını müstəntiq və
hakimdən tələb edə bilər. O, irəli sürülən ittihamı rədd edərək və ya məsuliyyəti yüngülləşdirən
halları aşkar edərək sübutetmənin qanunla müəyyən edilmiş üsullarından istifadə edir. Müdafiəçi
müstəntiq və hakim kimi öz daxili inamına əsasən iş üzrə toplanmış sübutları qiymətləndirir. Belə
qiymətləndirmə zamanı müdafiəçi məhz daxili inamına əsasən müdafiə nöqteyi‐nəzərindən
sübutları qiymətləndirir. Əgər bu daxili inam təqsirləndirilən şəxsin təqsirsiz olmasını sübuta
yetirmədikdə, bu üstünlük yaratmır: müdafiəçi öz mövqeyini müəyyənləşdirir və məhkəmədə onu
müdafiə edir. Bəzən elə olur ki, təqsirləndirilən şəxs öz təqsirini etiraf edir, lakin onun müdafiəçisi
əmindir ki, təqsirləndirilən şəxs təqsirsizdir. Təbii ki, müdafiəçinin məhkəmədə təqsirləndirilən
şəxslə eyni fikir və mövqedə dayanması onların sübutetmədə daha aktiv iştirak etməsinə səbəb
olur. Digər tərəfdən, təqsirləndirilən şəxs öz təqsirini inkar edirsə, müdafiəçi onun təqsirli olması
mövqeyində durmalı deyil. Bu halda, müdafiə hüququ pozulmuş olur və müdafiəçinin mövqeyi
ittihamedici mövqeyə çevrilmiş olur. Müdafiəçinin belə fəaliyyəti müdafiədən faktiki olaraq imtina
etməsi deməkdir ki, bu da qanunla qadağan edilir. Bu qadağalar CPM‐nin 92.10‐cu maddəsində öz