yəhəri üstünə düşdü. Qazax atlısı, nə qədər çalışdısa, Tanabayın əlindən
qurtulub qaça bilmədi. Gülsarının cəldliyi sayəsində o şığıyıb qara kəhərin
lap boynundan asıldı. Nəhayət, Tanabay keçinin ayağından yapışdı, onu özünə
tərəf çəkməyə başladı. Ova sağdan həmlə eləmək Tanabay üçün əlverişli
idi, üstəlik, o, cilovu da buraxmışdı, hər iki əli boş idi. Buna görə də,
Tanabay keçini dartıb yarıyacan ələ keçirə bildi.
– İndi möhkəm dur, qazax
qardaş!
– Qələt eləyirsən, qonşu, verməyəcəyəm!
Onlar əlbəyaxa oldular. Bir ovun üstünə şığımış iki qartal kimi tutaşdılar.
Atlılar söyüşdülər,
fısıldadılar, bir-birini qorxutmaq üçün vəhşi kimi nərə çəkdilər; əllər bir-
birinə sarıldı, dırnaqların qanı axdı. Adamların bu dəli savaşına
qoşulmuş atlar da qəzəblə kişnədilər, bir-birinə aman vermədən batan al-
qırmızı günəşə doğru səyirtdilər.
Bizim üçün belə qorxmaz oyunlar qoyub gedən
atalarımıza min rəhmət!
Yenə keçi hər iki atlının əlində idi və yenə atlar günəşə doğru çapırdılar.
Savaşın son həddi yaxınlaşırdı. Var gücünü
səfərbər eləmiş atlılar dişlərini qıcayıb səssiz-səmirsiz çarpışırdılar,
onların hər ikisi keçinin cəmdəyini öz ayaqlarının arasına almaq istəyirdi,
onların hər ikisi bu savaşda qalib gəlmək istəyirdi. Qazax güclü idi. Onun
yoğun və möhkəm biləkləri vardı, üstəlik, o, Tanabaydan çox-çox cavan idi.
Ancaq təcrübə də az iş deyil, o hər addımbaşı Tanabayın dadına çatırdı. Heç
gözlənilmədən Tanabay sağ ayağını üzəngidən çıxartdı, onu kəhər atın
böyrünə dirədi. İndi, ovu özünə tərəf çəkə-çəkə, Tanabay ayağı ilə rəqibin
atını itələyirdi və qazağın əlləri yavaş-yavaş boşalırdı.
Məğlub olan rəqib
son vasitəyə əl atdı.
– Bərk dur! – deyib elə bir təkan verdi ki, Tanabay az qaldı top kimi
yəhərdən sıçrasın. Ancaq o, yəhərin üstündə bərk dayandı.
Qalib sevinci ilə nərə çəkib, atın başını döndərdi. Tanabay, zəhmətlə
qazandığı qəniməti ayaqları arasında sıxaraq, qaçmağa üz qoydu. Bu yandansa
böyük bir atlı dəstəsi onun üstünə gəlirdi.
– Gülsarı! Gülsarı! Tutun, qoymayın! Qazaxlar hər tərəfdən qışqırışırdılar:
– Oybay, Tanabay qoyma qaçdı!
İndi əsas məsələ qaçıb qazaxlardan uzaqlaşmaq idi, indi gərək öz həmyerliləri
tezliklə Tanabayı əhatə edəydilər.
Səmtini qazaxlardan o yana salmaq
üçün Tanabay cilovu bərk-bərk çəkib bir daha atın başını çöndərdi. At onun ən
adi hərəkətlərini də başa düşürdü. Qovanların əlindən xilas olmaq üçün
o, gah o yana, gah bu yana səyirdir, ən çətin vəziyyətlərdən çıxış tapırdı.
Atın üstündə çapa-çapa Tanabay ürəyində Gülsarıya təşəkkür eləyirdi: “Sağ
ol, Gülsarı, sağ ol, mənim qəşəng atım, ağıllı atım!..”
Gülsarı az qala qarnı üstdə sürünüb çox çətin bir maneəni dəf elədi və birbaş
qaçmağa üz
qoydu. Bu vaxt Tanabayın həmyerliləri tez özlərini yetirdilər, yanlardan atın
dövrəsinə çəpər çəkdilər, sıxlaşıb arxa tərəfi möhkəmlətdilər və böyük
bir dəstə ilə onlar hay vurub irəli axışdılar. Ancaq qazaxların dəstəsi yenə
də onların qarşısına çıxdı. Qırğızlar atların başını bir daha döndərməli
oldular, yenidən geriyə çəkilib, yenidən irəli cumdular. Havada uça-uça
qanadlarını dəyişən bir dəstə quş kimi onlar gah o səmtə, gah bu səmtə
səyirdərək, geniş çöldə at çapdılar. Qovanlar qovdu, qaçanlar qaçdı. Yenə toz
havaya qalxdı. Yenə səsdən qulaq batdı. Öz atı ilə birgə yerə dəyən
kim, yəhərdən qopub atın başından aşan kim... adamlar yıxılırdılar da,
dururdular da, ancaq bu maraqlı oyundan heç kəs əl çəkmək istəmirdi, oyun
hamını vəcdə gətirmişdi, hamını valeh eləmişdi. Belə yerdə heç kəs heç kəs
üçün cavabdeh deyildir. Cəsarət və qorxmazlıq eyni anadan doğulmuşdur.
Günəş öz son şüalarını üfüqlərdən yığışdırıb getməkdə idi. Düzlər boz rəngə
bürünmüşdü, ancaq axşamın mavi sərinliyində atlar hələ də çapırdılar,
oyun hələ də davam eləyirdi. Daha heç kəs hay verib qışqırmırdı, heç kəs heç
kəsi qovmurdu, atlılar çapmaqdan həzz alırdılar və səssiz-səmirsiz çapıb
gedirdilər. Sonu görünməyən atlı dəstəsi bir qara dalğa kimi bu təpədən-o
təpəyə aşdıqca atların ayağı altında torpaq səslənirdi. Bəlkə, bu səsdəki
musiqini dinləmək üçün atlılar belə səssiz-səmirsiz çapırdılar? Kim bilir,
qazax dombrasının və qırğız komuzunun gur səsi də, bəlkə, bu səsdən
yaranmışdır!
Atlılar çaya yaxınlaşırdılar. Qabaqda, axşam toranına bürünmüş kolluqlar
arasında, çay bozara-bozara axırdı. Daha bir şey qalmamışdı.
Çayın o tayında oyun qurtaracaqdı – kənd orada idi. Tanabay və onu əhatə
eləyən atlılar hələ də çiyin-çiyinə çapırdılar. Hələ dəstə dağılmamışdı.
Ortalıqda Gülsarı gedirdi, atlılar onu, qiymətli yük aparan gəmi kimi,
müşayiət eləyirdilər.
Gülsarı yorulmuşdu, yaman yorulmuşdu. Bugünkü oyun onu
bərk incitmişdi, lap haldan-halətdən salmışdı. Yanınca at sürən iki nəfər
Gülsarının cilovundan yapışmışdı, onlar Gülsarını yıxılmağa qoymurdular.
Qalan atlılar Tanabayı üzük qaşı kimi araya almışdılar. Tanabaysa keçini
yəhərin qabaq tərəfinə qoyub, döşü ilə hələ də mühafizə eləyirdi. Tanabayın
başı hərlənirdi, o özünü birtəhər yəhərin üstündə saxlamışdı. Yaxında adamlar
olmasaydılar, bəlkə, Tanabayın özü də, atı da yıxılardı. Bir vaxt ata-
babalar da, yəqin ki, əldə etdikləri qəniməti belə qaçırtmışdılar, yəqin ki,
bu yolla onlar igid pəhləvanları əsirlikdən qurtarmışdılar...
Bu da çay,
bu da çəmən, bu da çay keçidi. Çaydakı keçid yeri qaranlıqda zorla seçilirdi.
Atlılar dəstə ilə suya tökülüşdülər, çay kükrədi, coşub-daşdı. Suyun
xışıltısı və at nallarının çıqqıltısı altında onlar Gülsarını dartıb o biri
sahilə çıxartdılar. Vəssalam! Qələbə çalındı!
Atlıların biri keçini
Tanabaydan alıb sürətlə kəndə sarı çapdı. Qazaxlar çayın o tayında qaldılar.
Qırğızlar onlara əl eləyib:
– Sağ olun! – dedilər. – Belə şən oyunlara
həmişə siz gələsiz!
– Sağlıqla qalın! – deyə qazaxlar o biri sahildən səsləndilər. – İnşallah,
payızda görüşərik!
Sonra axşam idi, şər qarışmışdı,
Tanabay qonaqlıqda əyləşmişdi, Gülsarını həyətdə başqa atların yanına
bağlamışdılar. Gülsarı heç vaxt bu qədər yorulmamışdı, onun bugünkü
yorğunluğu
ilk dəfə yəhər altda gəzdiyi o günün yorğunluğunu xatırladırdı. Ancaq, indiki
ilə müqayisədə, o vaxtkı Gülsarı söyüd çubuğu kimi namnazik bir şey
idi. Evdə Gülsarının söhbətini eləyirdilər.
– İçək Gülsarının sağlığına, Tanabay, o olmasaydı, oyun əldən getmişdi.
– O qara kəhər də az aşın duzu
deyildi ha, şir kimi bir şey idi. Hələ yiyəsini demirəm. O gədə çox uzağa
gedəcək!
– Onu düz deyirsən. Ancaq bir şey mənim gözümün qabağından çəkilib
getmir: əlbəyaxadan sonra gördünmü Gülsarı neçə əyilib keçdi, az qaldı ki,
qarnı yerə dəysin. Yadıma salıram – tüklərim biz-biz olur.
– Ba! Buna söz
ola bilməz ki! Keçmişlərdə bu cür atların üstündə batırlar gəzərdi. At deyil,
görsətmə şeydir!
– Tanabay, madyanların yanına bunu nə vaxt
buraxacaqsan?
– Elə hərdən indi də qaçır, ancaq mən bilən, tezdir hələ. Gələn yaz əsil
vaxtı olacaq. Fikrim var payızda qatım ilxıya, yesin, bir az
əmələ gəlsin...
O axşam kişilər çox oturdular, oyunu təpədən-dırnağacan təhlil eləyib, atı
təriflədilər, Gülsarısa həyətdə dayandı, cilovunu gəmirə-
gəmirə tərini soyutdu. Bu gecə o, səhərəcən ac-susuz ayaq üstdə qalmalı idi.
Ancaq Gülsarıya əzab verən aclıq deyildi. Onun beli ağrıyırdı, qıçları
özünün deyildi, dırnaqları od tutub yanırdı, bayaqkı oyunun hay-küyü hələ də
atın qulaqlarında səslənirdi. Gülsarı arabir diksinirdi, fısıldayıb
Dostları ilə paylaş: |