zülmətin qoynuna axışdılar. Onlar uçurumdan qopan daş kimi bir-birinə
dəydilər, bir-birlərini hərəkətə gətirdilər – bu gedişin qarşısını saxlamaq
mümkün deyildi. Gülsarı heç nə anlamadan qaçır, təri dabanından süzülürdü.
Birdən haradasa güllə açıldı, sonra ikinci güllənin səsi dağlara düşdü.
Qaça-qaça atlar ilxıçının qəzəbli çığırtısını eşitdilər. O tanış səs əvvəl
haradansa yan tərəfdən gəlirdi, get-gedə yavuqlaşdı, sonra lap irəlidən
eşidildi. Nəhayət, öz səsi ilə Tanabay sel kimi baş alıb gedən at sürüsünü
haqladı, səs ilxını arxasınca apardı. Gecə idi. Qaranlıq idi. Yenə də
əvvəlkitək qar yağırdı. Ancaq hava nə qədər qaranlıq olsa da, o tanış səsin
dalınca getmək bayaqkı kimi qorxulu deyildi. İndi baxıcı burada idi. O
qabaqda, durmadan at çapırdı, halbuki hər addımda dərin yarğanlar vardı,
qorxunc uçurumlar vardı. O durmadan çağırırdı: “Qayıt, qayıt, qayıt-a-ayt!”
Səsi tükənsə də, sinəsi xırıldasa da çağırırdı və o qorxunc qaraltıdan hifz
olunmaq üçün atlar bu tanış xırıltılı səsin dalınca qaçırdılar.
Dan
sökülənə yaxın Tanabay atları qovub əvvəlki yerlərinə gətirdi. Atlar, nəhayət
ki, dayandılar. Tərləmiş ilxıdan buxar qalxdı, buxar duman kimi göyə
ucaldı. Bellərini zorla tərpədən atlar əvvəlki qorxunun təsirindən bir müddət
burada da titrəşdilər. Onlar qar yedilər. Tanabay da qar yedi. O,
çömbəlib bir tərəfdə oturdu, qarı ovuc-ovuc ağzına doldurdu. Sonra Tanabay
üzünü əlləri ilə örtüb xeyli vaxt hərəkətsiz qaldı. Qarsa hələ də yağırdı.
Atların isti çiyinlərində qar əlbəəl əriyirdi, çiyinlərindən damcılar
süzülürdü – bulanıq, sarı damcılar...
Dağların qalın qarı əriyib getdi, hər
tərəf yaşıl ota büründü. Gülsarı günbəgün kökəldi, ətə-qana doldu. İlxı
tükünü dəyişib təzələndi, dağın-daşın görkəmi də başqalaşdı. Atlar qışın
soyuğunu da, aclığını da unutdular, ancaq insan unutmadı. İnsan dəhşətli
şaxtaları unutmadı, canavar ulaşan gecələri unutmadı; üşüyüb yəhər üstdə
donmasını, keyiyib taxtaya dönmüş əl-ayağını qızdırarkən ağlamamaq üçün
ocağın qırağında dodağını dişlədiyi dəqiqələri insan unuda bilmədi. O yazın
qurtarmaq bilməyən şaxtaları, donub qurğuşun qabıq qoyan torpağı yaddan
çıxmadı. İlxıya tələfat düşdü, zəif atlar qırıldı və bir gün dağdan enib
kolxoz idarəsində tələfat aktına gözüyumulu qol çəkəndən sonra birdən-birə
içindən necə odlanıb qışqırmağını, yumruğunu sədrin stoluna necə
çırpmağını da insan unuda bilmədi:
– Sən mənə belə baxma! Mən sənin üçün faşist deyiləm! Hanı sənin töylən?
Otun, yulafın, duzun hanı sənin? Quruca
havanın ümidinə qalmışıq! Heç belə təsərrüfatçılıq olarmı?! Sən bir mənim
əyin-başıma bax! Evimə-eşiyimə, günümə-güzəranıma bax! Doyunca çörək də
tapıb yeyə bilmirik. Dava ki davadır, orda da bundan min pay yaxşı idi. Hələ
bir tərs-tərs üzümə də baxırsan, elə baxırsan ki, elə bil mən o atları
əlimlə boğub öldürmüşəm!
O, bu sözləri deyərkən sədrin necə susub durmağı, onun bomboz bozarmağı da
Tanabayın yadında idi. Tanabay dediyi sözlərdən
utanmışdı. Tanabay kolxoz sədrindən üzr istəmişdi:
– Bağışla, Çoro, bağışla məni, hirsləndim, artıq-əskik danışdım.
Rəngi bomboz bozarmış Çoro:
– Gərək
sən məni bağışlayasan, – demişdi və bu vaxt onun anbardarı çağırmağı Tanabayı
daha da utandırmışdı.
– Buna beş kilo un ver.
– Bəs uşaq bağçası necə
olsun?
– Nə uşaq bağçası, canım? Yenə nə dolaşıq salmısan! Ver dedim, ver getsin.
Artıq söz lazım deyil!
Tanabay undan imtina etmək istəmişdi, çünki
süd vaxtına bir şey qalmamışdı, tezliklə kumıs olacaqdı. Ancaq sədrin yazıq
görkəmi və onun belə hirsli-hirsli anbardara təpinməyi Tanabayın əl-
ayağını soyutmuşdu. O, susmağa məcbur olmuşdu. Sonra o unun əriştəsindən
xörək yeyəndə hər dəfə Tanabay boğazını yandırıb, arvadının üstünə
qışqırmışdı:
– Bu nədir? Məni yandırmaqmı istəyirsən?
Arvad isə hər dəfə sakitcə cavab vermişdi:
– Qoy soyusun, uşaq deyilsən ki.
Bəli, o heç nəyi
unutmamışdı. Hər şey, hər şey yadında idi...
Sonra may gəlmişdi, isti may! O mayı necə unutmaq olardı?! Qızmış ayğırların
səsi dağı-daşı ağzına
almışdı, onlar kişnəyirdilər, tək-təkə döyüşürdülər, başqa ilxılardakı
madyanların dalına düşürdülər.
O qızğın ayğırları qovmaqdan zara gəlmiş
ilxıçılar öz aralarında tez-tez söyüşürdülər, hətta bəzən tutaşmaq da olurdu,
qamçı da işə düşürdü. Ancaq bunlar Gülsarıya aid deyildi. O yaz Gülsarı
özgə bir həyat başlamışdı. O yaz gah gün düşür, gah da yağış yağırdı – örüşdə
ot dizə çıxırdı. Ayağı altında yamyaşıl çəmənlər, başı üstdə dağların
ağappaq qarı – o çağlar Gülsarı üçün unudulmaz çağlar idi, əsil gənclik dövrü
idi. Gülsarı böyüyür, qüvvətlənirdi; daha o, yaş yarımlıq day deyildi.
Arxadan nazilib, çiyindən enlənmişdi – üçbucaq şəklinə düşmüşdü. Gülsarının
başı da əsil kəhər atların başına oxşayırdı – əyri burnu, geniş açılmış
iri gözləri, qalın və bərk dodaqları vardı. Gülsarı gözəl at olmuşdu. Lakin
özü bundan xəbərsiz idi. Gülsarı hər şeydən xəbərsiz idi. O, yalnız
qaçmaq istəyirdi, qaçırdı, ilxıçını zara gətirirdi. Qaçıb özü kimi cavan
atları da dalınca aparanda yaşıdlarının içində Gülsarı bir sarı ulduz kimi
axırdı. O, daşlı cığırlardan keçirdi, sıldırım qayalardan aşırdı. Bir naməlum
qüvvə Gülsarını dağların başına qaldırırdı, dibsiz dərələrə endirirdi.
Gecələr ulduzların altında yatarkən gündüz qaçdığı yerlər Gülsarının yuxusuna
girirdi. Gündüzlər ayağı altında beşik kimi yırğalanan torpağı,
qulağında səslənən küləyi, hətta dırnaqlarının taqqıltısını da Gülsarı
təkrar-təkrar yuxuda görürdü.
Həmişə atların üstündə olan ilxıçı da Gülsarı
üçün hər gün gördüyü şeylərdən biri idi – nə artıq, nə də əskik. Demək olmaz
ki, Gülsarı onu sevirdi, ancaq atın öz sahibinə heç bir nifrəti də yox
idi, çünki Tanabay Gülsarını incitmirdi. Gülsarı çox uzağa qaçanda hərdən
ilxıçı söyüş söyürdü, hərdən də, fürsət tapıb, kəməndin ucunu bir-iki dəfə
ona ilişdirə bilirdi. Belə vaxtlarda Gülsarı bərk diksinirdi, ağrıdan yox,
qorxudan diksinirdi və addımlarını daha da yeyinlədirdi. İlxının yanına
qayıdanda o, nə qədər bərk qaçırdısa, bir elə sahibinin xoşuna gəlirdi,
Tanabayın necə xoşlandığını Gülsarı onun səsindən hiss eləyirdi. Hərdən
Tanabay atın üstündə oxuyurdu, bu vaxtlar Gülsarının ondan xoşu gəlirdi; həm
qaçmaq, həm də mahnı eşitmək ata ləzzət verirdi. O mahnıları Gülsarı
sonralar da çox eşitdi və yaxşı-yaxşı yadında saxladı – cürbəcür mahnılar
idi, şən mahnılar, qəmli mahnılar, bəzisi qısa, bəzisi uzun, sözlüsü də,
sözsüzü də vardı. İlxıçı mahnı oxuyanda Gülsarı həmişə xoşlanırdı. Bir də
ilxı duz yeyən vaxtlar atın öz sahibindən çox xoşu gəlirdi. İri-iri daş
duzu ilxıçı payaların üstündəki təknələrə atırdı. Atlar yan-yana
düzülürdülər, duzu ləzzətlə yalayırdılar. Elə bu duzun üstündə də Gülsarı ələ
keçdi.
Günlərin bir günündə ilxıçı boş vedrəni dınqıldadıb atları çağırdı: “Po, po,
po!” Atlar qaçıb gəldilər. Dayanıb atlarla birgə duz yalayanda
Gülsarı nə baxıcının başqa birisi ilə gəlib yaxında hərlənməyinə fikir verdi,
nə də onun əlindəki kəmənddən qorxub ehtiyat elədi. Bunun Gülsarıya
dəxli yox idi. Kəməndlə minik atlarını, sağmal madyanları tuturdular, Gülsarı
kimiləri tutmurdular. Gülsarı azad idi. Birdən necə oldusa, qəzil onun
başına atıldı, sürüşüb boynuna düşdü. Başqa atlar belə vaxtlarda
dartınırdılar, dikəlib şahə qalxırdılar, ancaq Gülsarı heç yerindən də
tərpənmədi.
Onun heç nədən xəbəri yox idi, hələ ip Gülsarını qorxutmurdu, o, sakitcə
dayanıb duz yalayırdı. Sonra Gülsarının çaya qaçıb su içməyi gəldi. Ancaq
boynundakı ip dartıldı, onu hərəkət etməyə qoymadı. Gülsarı ömründə belə şey
görməmişdi. O sıçradı, fısıldadı, gözlərini bərəldib şahə qalxdı. Atlar
Dostları ilə paylaş: |