özgə nitqi və onun verilməsi üsullarına həsr olunmuşdur.
Müəllifin orijinal elmi düşüncələrinin və araşdırmalarının nəticəsi
kimi meydana gələn həmin bölmələrdə mətnin struktur-semantik
xüsusiyyətləri, onun daxili vahidləri, qurulma texnikası, sintaktik
bütövlərin quruluşu, sərhədləri, məna yükü, komponentləri,
onların məntiqi- sintaktik əlaqə üsulları barədə aydın və bitkin
məlumat verilir. Bu məlumat təkcə dilçilik – mətn sintaksisi
baxımından deyil, ədəbiyyatşünaslıq – mətnin poetikası
baxımından da ciddi maraq doğurur və çox əhəmiyyətli görünür.
Kitabın sonunda Azərbaycan yazısında işlənən durğu işarələri
barədə müəllifin söylədikləri həm nəzəri, həm də praktik
əhəmiyyət daşıyır.
Bütün dərslik boyu irəli sürülən elmi-nəzəri fikir və
mülahizələr Azərbaycan klassik və müasir ədəbiyyatından –
C.Məmmədquluzadə, M.Ə.Sabir, Ə.Haqverdiyev, M.S.Ordubadi,
S.Vurğun, S.Rüstəm, R.Rza, M.İbrahimov, İ.Əfəndiyev, F.Kə-
rimzadə, Y.Səmədoğlu, Ə.Əylisli və b. sənətkarların bədii əsərlə-
rindən, habelə şifahi xalq ədəbiyyatından seçilmiş nümunələrlə
sübuta yetirilir. Dərsliyin quruluşu da elmidir. Müəllifin təhlil-şərh
mədəniyyəti, alim-dilçi duyumu xoş təsir bağışlayır. Hər bir
böyük bölmənin sonunda elmi ədəbiyyatın, istifadə olunmuş
mənbələrin göstərilməsi, habelə mövzuların daxilində “Məlumat
üçün” bölmələrinin, yığcam qeydlərin verilməsi kitabın elmi-
informativ çəkisini daha da çoxaldır.
Bütün bu keyfiyyətlərinə görə dərslik elmi-pedaqoji
ictimaiyyət tərəfindən böyük rəğbətlə qarşılanmış və sürətlə
yayılaraq, az vaxtda üç dəfə nəşr olunmuşdur.
***
Q.Kazımovun elmi tədqiqat sahələrindən biri də
Azərbaycan aşıq şerinin babası sayılan Qurbaninin poetik irsinin
toplanması, tədqiqi və təhlilidir. O, aşığın əsərlərini toplayıb
çapa hazırlamış, həm doğma Azərbaycan, həm də rus dillərində
geniş ön söz və qeydlərlə çap etdirmişdir. Aşığın həyat və yara-
dıcılığına dair 10-dan artıq elmi-kütləvi məqalənin müəllifidir:
«Aşıq Qurbani və məzarı», «Diri kəndi və Qurbani», «Qurbani
46
ənənələri», «Qurbani sənətkarlığı», «Qurbani» təxəllüsü»,
«Qurbani və Xətai» və s.
Aşığın həyat və yaradıcılığına dair araşdırmalarını
Q.Kazımov «Qurbani və poetikası» (1996) monoqrafiyasında
ümumiləşdirmişdir. O, Qurbani sənətinin ideya-estetik, bədii-
fəlsəfi qaynaqları, aşığın sələfləri haqqında söhbət açmış, bu
sənətin inkişaf və təkmilləşməsində onun xidmətlərini və möv-
qeyini müəyyənləşdirməyə çalışmışdır. Aşıq sənətinin kökləri,
qaynaqları barədə düşünərkən alimin onu ən qədim çağlarla,
qam-şaman dövrü ilə bağlaması maraqlıdır. Doğrudan, aşığın
tarixi çox qədim zamanlarla bağlıdır. Bəlkə də qam, şaman, ata,
dədə, varsaq, ozan ad-titulları aşığın varisləridir. Aşıq –
söyləyən, deyən, tanrı sözünü yerdəkilərə – insanlara çatdıran
baş qamın adıdır. O, əlinə qopuz-saz götürənə qədər
peyğəmbərlik funksiyasını yerinə yetirmişdir. Sivilizasiyanın son-
rakı mərhələsində müxtəlif türk tayfaları içərisində ata, dədə,
varsaq, ozan adlanaraq, tamam unudulmuş, islamda təriqətlərin
inkişafı dövründə yenidən meydana gəlmişdir.
Azərbaycan folklorşünaslarının ənənəvi fikirlərinə istinadən
Q.Kazımov aşıq sənətinin ozan sənətindən intişarı barədə
konsepsiyanın tərəfdarı kimi çıxış edir: «VIII-IX əsrlərdən
müxtəlif təriqətlərin meydana çıxması, xüsusən sufilik ideyaları
ozan sənətinin yeni keyfiyyətlər qazanmasına səbəb olur… Sufi-
lərin tapındığı «vəhdəti-vücud» fəlsəfəsini təbliğ edən və özü də
ilahi eşq uğrunda fədaiyə çevrilən ozan əvvəllər yerinə yetirdiyi
vəzifələrin bir çoxundan uzaqlaşmalı olur. Düşdüyü mühitdəki
fəlsəfi-irfani axınların təsiri nəticəsində o, güclü şəkildə təriqət
yolu tutaraq, ilahi eşqin aşiqi, «haqq aşiqi» kimi çıxış edir və bu
vaxtdan etibarən də «aşıq» ad-titulu altında gəzib dolanır».
(
Q.Kazımov. «Qurbani və poetikası», Bakı, 1996, s.14
)
Bunları Q.Kazımov ona görə xatırladır ki, haqq aşığı
Qurbaninin bədii yaradıcılığının ideya-fəlsəfi qaynaqlarını, onun
klassik ədəbiyyatdan bəhrələnmə dərəcəsini düzgün
müəyyənləşdirsin. Və çəkinmədən demək olar ki, o öz
məqsədinə nail ola bilir. Kitabda Qurbaninin yaradıcılığı ilə Yunis
Əmrə, Mola Qasım Şirvanlı, Qazi Bürhanəddin, İmadəddin
Nəsimi, Cahan şah Həqiqi kimi sənətkarların yaradıcılığı
47
arasındakı tipoloji səsləşmələrin səbəbləri, bu səsləşmələrin eyni
mənbədən – təsəvvüfçülükdən mayalanması inandırıcı faktlar və
paralellər əsasında sübuta yetirilir.
Monoqrafiyada Qurbaninin Şah İsmayıl Xətai ilə
münasibətləri barədə daha geniş məlumat verilir. Aşıq barədə
söylənən rəvayətləri, onun əldə olan şeirlərini, «Qurbani»
dastanının müxtəlif variantlarını elmi düşüncə süzgəcindən
keçirən tədqiqatçı onları tarixi faktlarla müqayisə edib, bu el sə-
nətkarının kiçik bir ömürlüyünü meydana qoymuş, Qurbaninin
əsərlərinin toplanması və nəşri barədə yığcam və konkret
məlumat vermişdir. Müəllif 1920-ci illərdən üzü bəri bu sahədə
xeyirxah işlər görmüş Salman Mümtaz, Hümmət Əlizadə,
Əhliman Axundov, Araz Dadaşzadə kimi alimlərin zəhmətini qə-
dirşünaslıqla yada salır, özünün nəşr etdirdiyi kitabın tərtib
prinsipləri, mətnşünaslıq işləri barədə oxucunu məlumatlandırır,
aşığın şeirlərinin qorunub saxlandığı cünglərin yerini nişan verir,
həmin cünglərdəki əsərlərin köçürülmə tarixini, nüsxə fərqini
göstərir və hansı nüsxənin daha etibarlı olması haqda
mülahizələr yürüdür. O, Qurbani lirikasının məzmunca təsnifini
verir, aşığın məhəbbət, gözəllik və təbiətin tərənnümünə həsr
olunmuş «Bənövşə», «Sevinsin», «Qızların», «Ləblərin»,
«Vermərəm səni», «Nədəndi», «Dilbər», «Pəri» kimi onlarca
qoşma və gəraylısını təhlil edərək, obrazların real, həyati
məzmun daşıdığı barədə konsepsiyanı möhkəmləndirir.
Qurbani yaradıcılığına dair tədqiqatları Q.Kazımova
Azərbaycan milli ədəbi dilinin
başlanğıc dövrünü
müəyyənləşdirmək üçün imkan yaradır. Bu dövrü XVIII, yaxud
XIX əsrə şamil edən alimlərdən fərqli olaraq, o, Azərbaycan
ədəbi dilinin XVI əsrdən milliləşmə prosesi keçirməyə başladığını
bildirir. Bu prosesi şərtləndirən ictimai-siyasi və ədəbi-mədəni
amillər sırasına tədqiqatçı ilk növbədə vahid dövlətin
yaranmasını, sosial-iqtisadi və siyasi birliyin mövcudluğunu daxil
edir. Doğrudan da, Səfəvilər dövründə ünsiyyət vasitəsi kimi
Azərbaycan türk dilinin işlənmə dairəsi olduqca genişlənir.
Xalqın, demək olar, bütün təbəqələri: kəndli və şəhərli də, ziyalı
və əmələ də, məmur və dövlət xadimi də, divan işçisi və tacir
də Azərbaycan-türk dilində danışır.
48
Dostları ilə paylaş: |