Fəsil II. Ayri-Ayri Ölkələrdə Özəlləşdirmə Təcrübələri və Onun Xüsusiyyətləri
2.1. İnkişaf etmiş ölkələrdə özəlləşdirmə
Özəlləşdirmə ötən əsrin 70-90-cı illərinin ümumbəşəri hadisəsi hesab olunur. Bu dövr ərzində
inkişaf etmiş Qərb dövlətləri ilə yanaşı Latın Amerikası dövlətləri və Cənub-Şərqi Asiya ölkələri
də daxil olmaqla dünyanın 100-dək ölkəsi dövlət bölməsinin ixtisarı proqramını qəbul etmişdir.
İnkişaf etməkdə olan, eləcə də inkişaf etmiş sənaye ölkələrində, xüsusilə Qərbi və Şərqi Avropa
ölkələrində gedən
bu prosesin təhlili, həmin ölkələr üzrə toplanmış zəngin özəlləşdirmə
təcrübəsindən Azərbaycanda da istifadəyə imkan yaradır ki, bu da buraxılmış səhvlərin
təkrarlanmasının qarşısını almaq şansını artırır. Eyni zamanda, xarici ölkələrin mövcud təcrübəsinin
geniş təhlili və tədqiqi, onun bizim ölkəmizdə hazırda qərarlaşmış gerçək tendensiyaları, yerli,
regional müstəvidə pisixoloji, sosioloji və siyasi-iqtisadi reallıqları
nəzərə almadan şablon
formasında avtomatik surətdə tətbiqi məsələlərinə imkan vermir. Qərbi Avropa ölkələrinin
təcrübəsi bizə necə örnək ola bilər və biz ondan necə istifadə etməliyik ki, qarşımızda duran
taleyüklü özəlləşdirmə islahatlarında uğur qazana bilək.
Sosial və mədəni sferalarda, siyasi və iqtisadi müstəvidə start şəraitimizin müxtəlifliyinə
baxmayaraq, Azərbaycana münasibətdə Qərb dövlətlərinin özəlləşdirmədə təcrübəsində bəzi
ümumi cəhətləri aşkarlamaq mümkündür. Belə ki, onların da bu istiqamətdə fəaliyyətinin məqsədi
bazarı inhisarsızlaşdırmadan, normal iqtisadi şəraitdə müxtəlif təsərrüfat subyektlərinə bərabər
rəqabət imkanları yaratmaqdan, dövləti izafi xərclərdən azad etməkdən və istehsalçının deyil,
istehlakçının diktəsi ilə formalaşan bazar münasibətlərinin inkişafına nail olmaqdan ibarətdir.
Beləliklə, özəlləşdirmə siyasəti inzibati məhdudiyyətlər və reqlamentasiyalar əsasında deyil,
istehsalın daha effektiv kommersiyalaşdırılması, bazar qanunlarına
uyğun olaraq təsərrüfat
həyatının sərbəst və müstəqil surətdə təşkili ideyasına söykənir. Bu zaman bazara sosial iqtisadi
tərəqqinin mənbəyi və "bərabər imkanlar, lakin müxtəlif nəticələr" prinsipi ilə əhalinin daha geniş
təbəqəsi üçün maddi istehsalı və səmərəli xidməti təmin edən rəqabəti stimullaşdırmaq vasitəsi
olaraq baxılır. Ötən əsrin sonlarında bir çox inkişafda olan ölkələrin ardıcıl surətdə bazar
mexanizmlərinə müraciət etmələrinin başlıca səbəblərindən biri Qərbdə "dövlət rifahında" yaranmış
böhranı digər vasitələrlə dəf etmək cəhdinin mümkünsüzlüyü ilə izah olunur.*
Şübhəsiz ki, Azərbaycanında təmsil olunduğu postsosialist məkanında özəlləşdirmənin vacibliyini
şərtləndirən başlıca amillərindən biri də dövlətin dominant rol oynadığı
uzunmüddətli durğunluq
dövründə təsərrüfat subyektlərinin məruz qaldığı böhranlı vəziyyətdən çıxış yollarının ənənəvi
müstəvidə köhnə üsullarla deyil, yeni şəraitdə mütərəqqi vasitələrlə dəf etmək istəyi ilə
əsaslandırılır. Bu baxımdan Qərbdə özəlləşdirmənin start götürdüyü dövrdəki sosial-iqtisadi, bəzən
isə siyasi şəraitin oxşar cizgiləri ilə 15 il sonra Şərqdəki - Azərbaycandakı mövcud vəziyyət
arasında bəzi paralellər aparmaq mümkünüdür. 1974-75-ci illərdə dünyada qlobal enerji
böhranının yaratdığı
problemlər, iqtisadi həyata daxil etdiyi maliyyə çətinlikləri, inflyasiya
elementlərinin impuls verdiyi kəskin tənəzzül görüntüləri, nəinki inkişaf etməkdə olan və hətta
inkişaf etmiş sənaye dövlətlərində də xüsusilə ciddi sosial gərginliklər yaratmışdı. ABŞ və
Yaponiya kimi qüdrətli sənaye dövlətlərini tətillər, nümayişlər bürümüş,
əmək münaqişələri
nəticəsində iş vaxtının kütləvi itkisi ənənəvi hal almışdır. Belə ki, 1974-cü ildə müşahidə olunmuş
tətil və nümayişlərin növbəti dalğasından Yaponiya 9663 min adam - gün, ABŞ 47991 min adam -
gün, Britaniya 14750 min adam - gün itirmişdir.*
Təəssüflə qeyd etməliyik ki, "neft böhranın"dan ötən 5-7 il ərzində inkişaf etmiş sənaye
dövlətlərinin əksəriyyəti dövlət müəssisələrindəki böhranı dəf etmək məqsədilə Keyns modelinə
söykənən
iqtisadi kursu əsas götürməklə, qlobal tələbi müdafiə edərək vəziyyəti xeyli
gərginləşdirmişdilər.*
İqtisadi kursun yeni oriyentasiyası böhrandan sonra dövlətin iqtisadiyyatın idarə edilməsində
rolunu artırdığından məhsuldar qüvvələrin inkişafında baş verən keyfiyyət dəyişikliyi ilə
müqayisədə onun təsərrüfat funksiyası üzrə yükü çoxalmış, inkişaf sürəti isə azalmışdır. Praktiki
olaraq bütün təsərrüfat sahələrində istehsalat prosesinin təşkilində yeniləşmə zərurəti, mürəkkəb
texniki-iqtisadi və sosial - iqtisadi struktur çərçivəsində isə aktiv
idarəetmə qabiliyyəti tələb
olunurdu. "Büdcə məkanında" dövlətin iqtisadi funksiyalarının genişlənməsi maliyyə sferasında
valyuta-kredit məhdudiyyətlərini şərtləndirirdi. Nəticədə, dövlət tənzimlənməsinin məqsədləri ilə
onun metodları arasında ziddiyyət yaranmış, dövlətin milli gəlirin bölüşdürülməsində iştirakı
iqtisadiyyatın azad inkişafına əngəl törətməyə başlamışdı. Bütün bunlar hökumətdən dövlət
mülkiyyətinin yerinə və roluna yenidən baxmağı tələb edir və mövcud vəziyyətdən təxirəsalınmaz
çıxış yolları axtarmaq üçün iqtisadi siyasətindəki kursu dəyişmək zərurətini artırırdı.
Bu dövr dövlət müəssisələrinin iqtisadi və maliyyə vəziyyətini xarakterizə edən ayrı-ayrı
göstəricilərin xüsusi bölmənin uyğun parametrləri ilə müqayiəsi ilə zəngindir. 1974-1986-cı illərdə
yalnız Portuqaliyada sənayedə dövlət bölməsinin zərərinin məbləği bir il ərzində ölkədə istehsal
olunmuş ümumi milli məhsulun (ÜMM) 1/3 -nə bərabər idi. 80-cı illərin ortalarında İspaniyada
dövlət müəssisələrinin fəaliyyətində yaranmış illik zərər 1 mlrd. dolları ötmüş, İtaliyada təkcə
1984-cü ildə iri dövlət holdinqi olan İRİ-nin itkisi 500 min nəfər işçinin hər birinə orta hesabla 4,5
milyon lirə təşkil edirdi. Məsələn, Böyük Britaniyada kütləvi özəlləşdirmə ərəfəsində dövlət
bölməsində sahibkarlıq elə vəziyyətə düşmüşdü ki, milliləşdirilmiş
sahələrin məcmuu mənfəəti
sıfıra yaxınlaşmış, özünü maliyyələşdirmə səviyyəsi cəmisi 10 faizi təşkil etmiş, istehsal olunmuş
məhsulun maya dəyərindəki əmək haqqı xərcləri isə orta ölkə səviyyəsindən və əmək
məhsuldarlığından üstün surətlə artmağa başlamışdır.*
Bu dövr ərzində dövlət bölməsiin ÜMM-də yüksək xüsusi çəkisi, dövlət bölməsində çalışanların
sayının çoxluğu Avstriya, Fransa, İtaliya və Böyük Britaniya üçün xarakterik idi. Aşağıdakı cədvəl
məlumatları ilə tanışlıq yuxarıda deyilənləri əyani surətdə təsdiq edə bilər.
ÜMM-də dövlət bölməsinin payı, faizlə (1979-1982)
Fransa - 28%
İtaliya - 20%
Britaniya - 11%
AFR - 10.4%
İspaniya - 6.4%
Ötən əsrin 70-80-ci illərdə Britaniya milli gəlirin və sənaye məhsulunun artım tempi üzrə aparıcı
sənaye dövlətlərilə müqayisədə axırıncı yeri tuturdu.