Azərbaycanda həmişə qadına hörmət və ehtiramla yanaşıblar. Çox vaxt kişinin sözü
keçməyən yerdə qadının səsi daha güclü çıxır. Mənim yeganə problemim vaxt
məhdudluğudur. Rəhbərlik etmək çox böyük məsuliyyət tələb edir. Amma mən bunun
öhdəsindən gəlməyə çalışıram. Məndə ailə
və karyera məsələsi dəqiq
müəyyənləşdirilib.
Nərminə xanımın həyat yoldaşı Gündüz bəy də biznes fəaliyyəti ilə məşğul olur.
ʺMən səhərlər işə tələsirəm, çünki işimi sevirəm, ondan zövq alıram, axşam isə evə
tələsirəm. Bilirəm ki, məni gözləyən və mənə ehtiyacı olan ailəm var. Məncə bu əsil
insan səadətidirʺ.
Rəna Bağırova
ʺBİOMED - SPECTRʺ Tibb Mərkəzinin direktoru
Onunla görüşəndə keçdiyi yolla fəxr edən, zirvəyə çatmış bir qadınla
rastlaşacağımı zənn edirdim. Bu gözəl və məlahətli qadınla söhbətdən sonra hiss etdim
ki, o, özünü hələ böyük həyat yolunun başlanğıcında hiss edir, yeni planlar qurur,
layihələr fikirləşir. Həkimlik yeganə peşədir ki, ona yiyələnəndə and içirsən, and içirsən
ki, bu müqəddəs ada xəyanət etməyəcəksən, bu adın ləyaqətini qoruyacaqsan. Buna
ʺHippokrat andıʺ deyirlər. Bu andı içmiş və ömrü boyu ona sadiq qalmış şərəfli peşə
sahiblərindən biri -Rəna xanım haqqında danışacağam.
Rəna Bağırova 1950-ci il mart ayının 21-də həkim ailəsində anadan olub.
Ailə ənənəsini davam etdirərək həkim olmağı arzulayıb və Azərbaycan Dövlət
Tibb İnstitutunun pediatriya fakültəsininə daxil olub.
1974-cü ildə Rəna xanım ali məktəbi bitirdikdən sonra 12 №-li Bakı şəhər Uşaq
poliklinikasında sahə həkimi kimi fəaliyyətə başlayır. 1980-ci ildə həmin poliklinikanın
baş həkimi təyin edilir. Səhiyyə sahəsindəki əvəzsiz xidmətlərini nəzərə alaraq onu
1982-ci ildə Bakı şəhər Nəsimi rayon Səhiyyə Şöbəsinin müdiri təyin edirlər və o, 1994-
cü ilə kimi bu vəzifədə çalışır.
1994-cü ildən isə Bakı Soveti Sədrinin səhiyyə məsələləri üzrə məsləhətçisi olur.
Bu dövrdə Azərbaycanda baş verən məlum ictimai-siyasi hadisələrlə bağlı
soveilərin fəaliyyəti dayandırılır. Ömrü boyu rəhbər vəzifələrdə çalışmış, gözəl
idarəçilik vərdişləri və bacarığı olan Rəna xanım sərbəst fəaliyyət göstərmək və azad
sahibkarlıqla məşğul olmaq üçün fürsət qazanır. 1996-cı ildə o, ʺFəxriʺ Kiçik
Müəssisəsini yaradır. Müəssisə dərman və tibbi ləvazimatlarını Rusiya və Türkiyədən
Azərbaycana gətirilməsi və satışı ilə məşğul idi.
Müəyyən qədər vəsait əldə etdikdən sonra o, fəaliyyətini genişləndirir və 2003-cü
ildə ʺBİOMED - SPECTRʺ Tibb Mərkəzini açır.
Mərkəz Bakının mərkəzi küçələrindən birində 200 kv. metrlik bir ərazidə yerləşir.
Burada daimi və müqavilə əsasında 300 nəfərə qədər insan çalışır.
Müasir ABŞ və Yaponiya cihazları ilə təchiz edilmiş ʺBİOMED - SPECTRʺ Tibb
Mərkəzi biokimyəvi, immunoferment və bakterioloji laboratoriya, ultrasəs müayinəsi:
daxili orqanların müayinəsi, ginekoloji müayinələr, refleksoterapiya, lazeroterapiya,
ginekoloji xəstəliklərin diaqnozu və müalicəsi, qadın və kişi sonsuzluğunun müalicəsi,
xroniki prostatit, uroloji, dəri zöhrəvi xəstəliklərin müalicəsi, şərq təbabəti, alkoqolizm,
narkomaniya, toksikomaniyaya düçar olmuş xəstələrin müayinəsi və müalicəsi və s.
tibb xidmətlər təqdim edir.
Tibb Mərkəzinin xidmətlərinin səviyyəsi yüksək və qiymətləri münasib
olduğundan hər gün 100-ə qədər insan şəfa tapmaq məqsədilə mərkəzin
xidmətlərindən istifadə edir.
Rəna xanım
deyir ki, tibbi xidmət bazarında rəqabət çox böyükdür. Bakı
Şəhərində onlarla belə mərkəz fəaliyyət göstərir. Təşkilatçılıq xüsusiyyətlərinə malik
olan Rəna xanım bunun öhdəsindən gəlməyə, rəqabətə tab gətirməyə, mərkəzin işini
beynəlxalq standartlara uyğun səviyyədə qurmağa çalışır. O, tez-tez özü rayonlara
gedir, mərkəzin menecerləri müxtəlif xəstəxanalarla işləyir, texniki avadanlıqlar daima
yeniləşdirilir, işə daha savadlı mütəxəssislər cəlb edilir, güclü reklam kampaniyası
aparılır.
Onun maliyyə imkanları artdıqca müəssisəni genişləndirəcək, yeni istiqamətlər -
plastik cərahiyyə əməliyyatları və dogum şöbəsi yaradacaqdır. Bundan əlavə o,
Sumqayıt və Gəncə şəhərlərində belə mərkəzlər açmağı planlaşdırır.
Rəna xanımın həyat yoldaşı da tibb işçisidir və bu sahədə sahibkarlıq fəaliyyəti ilə
məşğuldur. İki övladı var.
O, çox prinsipial, özünə inamı olan və hörmət edən bir insandır. Rəna xanım
sahibkarlıq fəaliyyətini çox şərəfli bir iş sayır və deyir ki, ʺBiznes elə bir sahədir ki,
burada halal zəhmətlə çoxlu pul qazanmaq mümkündür. Burada heç kimdən asılı
deyilsən, ancaq özünə hesabat verirsən, qadın üçün isə sahibkarlıq çox təbii bir işdir,
çünki qadın daha məsuliyyətli və həssas, daha mərd olurʺ.
ʺKamillik - zahiri və daxili gözəlliyin vəhdətidirʺ-deyiblər. Rəna xanım isə kamil
bir insandır. ʺQazandığım pulu xərcləməyi, özü də xeyriyyə məqsədlərinə sərf etməyi
sevirəm. İlk növbədə imkansız adamları düşünürəm, axı dünyada ehtiyacı olanlar
çoxdurʺ - deyir. Onun 2000-ci ildə yaratdığı ʺSabahʺ Beynəlxalq Humanitar Təşkilatının
əsas məqsədi qaçqın, məcburi köçkün, əlil və az təminatlı ailələrə yardım etməkdir.
Təşkilatın işçiləri rayonlara gedir, qaçqın düşərgələrində olur, kasıb ailələri arayıb tapır,
onlara həm tibbi, həm də ərzaq və başqa tələbat malları cəhətdən köməklik göstərirlər.
Tanınmış iş adamı və xeyriyyəçi insan olan Rəna xanıma məqsədlərinə çatmaqda
uğurlar arzulayırıq!
Zemfira Ağayeva
Gəncə Modalar Evi, ʺQızıl əllərʺ müəssisəsi, Sahibkar Qadınlar Birliyinin rəhbəri
Yeni mülkiyyət münasibətlərinin ən müsbət xüsusiyyətlərindən bir də odur ki, o,
insana sərbəstlik verir, ona inamlı və etibarlı münasibət formalaşdırır. Belə münasibət
isə insanın cəmiyyət qarşısındakı məsuliyyətini artırır, onun hərtərəfli inkişafı üçün
əlverişli şərait yaradır. Öz vicdanı qarşısında borcunu dərk edən insanlardan biri Gəncə
şəhərinin ilk sahibkar qadınlarından biri Zemfira Ağayevadır.
Zemfira Ağayeva 1950-ci il dekabrın 30-da Goranboy rayonunun Qurbanzadə
kəndində anadan olub.