70
əvvəl də Şəkidə qaçaqlar mövcud idi. Ancaq onların sayı barmaqla sayılacaq qədər
az olmuşdur. Qaçaqlardan biri Abbas, digəri Xudu İbrahim, üçüncüsü Vartaşenin
Muxas kəndinin sakini Tapdıq, dördüncüsü bideyizli Cəfər və nəhayət üsyan
ərəfəsində DSİ-nin Şəki şöbəsinin müvəkkili Qasımovun hədə qorxusundan sonra
qaçaq düşmüş göynüklülər Yunus və Kərim idilər.
Üsyan hərəkatının məğlubiyyətindən sonra qaçaqların sayı dəfələrlə
artmış, fəaliyyətləri isə daha çox siyasi məzmun kəsb etmişdir. Hüquq mühafizə
orqanlarının tərtib etdikləri sənədlərdə tez-tez işlədilən «siyasi quldur» ifadəsi də
sübut edir ki, onların əməllərində ölçülü-biçili siyasi xarakterli fəaliyyət üstünlük
təşkil etmişdir.
Qaçaqlar hətta bir sıra kəndləri yenidən nəzarət altına almağa müvəffəq ola
bilmişdilər. Bu isə rejim nümayəndələrini xeyli əndişələndirmişdir.
L. Beriyanın Tiflisdən teleqraf vasitəsilə M.C.Bağırova verdiyi göstərişlər
hakimiyyət yetkililərinin keçirdiyi təşviş hissini təsdiq edir. «Gələn məlumatlardan
bəlli olur ki, Zaqatala-Nuxa dairəsində üsyançılar partizan hərəkatına keçərək
hərəkət edən hərbi hissələrin arxasından şəhər və kəndləri ələ keçirirlər.
Üsyançıların partizan hərəkatı formasında fəaliyyəti ona görə mümkün olur ki,
onlardan geri alınan kəndlər möhkəmləndirilmir və ordu getdikdən sonra
müdafiəsiz qalır.
Hesab
edirəm ki, üsyançılardan təmizlənmiş rayonlarda yerli
kommunardan, aşağı sovet aktivlərindən ibarət döyüşə qabil dəstələr
yaradılmalıdır. Onlar üsyançılardan alınan və əhalidən müsadirə edilən silahlarla
təchiz edilməlidirlər”.
61
Qısa müddətə üsyançıların nəzarəti altına keçən yaşayış məntəqələrindən
biri də Dəhnə kəndi idi. Ora daxil olan dəstə əsasən qaçaqlardan ibarət olmuşdur.
Qonağı açıq qabaqla, gülər üzlə qarşılamağa adət etmiş kişilər Qaçaq Abbası,
Samuxlu Məmmədqasımı, Harunu, Hidayəti Əşrəfi, İsmayılı, Sarı Laçını, Xudu
İbrahimi və digərlərini xalq adət-ənənələrinə uyğun şəkildə qəbul etmişdilər.
Az sonra kəndə gələn cəza dəstəsi bu kişiləri amansızcasına cəzalandırdı.
1930-cu il aprelin 17-də Mola Sübhan Yusif oğlu, Hacı Məhəmməd Sadiq
oğlu, Həbillah Mustafa oğlu, Hacı Hümmət Hacı Qasım oğlu, Məmmədhəsən Cəlil
oğlu, Hacı İbrahim, Mustafa Salman oğlu və Osman Cəlil oğlu - cəmi 8 nəfər elə
kənddəcə güllələndilər. Onların gorgahı əvvəldən qazılmış bir çala oldu. Bu
qardaşlıq qəbri az sonra ziyarətgaha çevrildi. Canı ağrıyan, dərdlə üzləşən, fəlakətə
tuş gələn bu ziyarətgaha pənah gətirirdi. İyirmi üç nəfər Dəhnə sakini isə həbs
edilib gedər-gəlməz sürgünlərə göndərildi. Budur o kişilərin adları:
1. Məhəmməd Mikayıl oğlu
61
Baş Arxivlər idarəsi. f. 1, s. 231, iş 52, v. 2
71
2. Zülqədər Musa oğlu
3. Əli Hacı Qasım oğlu
4. Hüseyn Süleyman oğlu
5. Zəkəriyyə Kazım oğlu
6. İsgəndər Kazım oğlu
7. Hacı Quzu Sadiq oğlu
8. Mahmud Hacı Quzu oğlu
9. Məhəmməd Musa oğlu
10. Abdurahman Abdulla oğlu
11. Qaffar Löyman uğlu
12. İsaq Löyman oğlu
13. Muxtar Məmməd oğlu
14. Yusif Məmməd oğlu
15. Əliəşrəf İbadullah oğlu
16. Camal İbadullah oğlu
17. Əyri İbadulla oğlu
18. Ziyad Cəlal oğlu
19. Hacı Yusif Kümcüzadə
20. Hamil Cəmaləddin oğlu
21. Nəsrullah Məmməd oğlu
22. Maqsud Qədir oğlu
23. Əziz Cəmil oğlu
O zamandan etibarən şübhəli şəxslər kimi daim nəzarətdə saxlanılan
Məmməd Müttəlib oğlu, Ağasəf İbadullah oğlu, Həbillah Musa oğlu, Musa
Həbillah oğlu və İsmayıl Məmmədhasil oğlu 1937-ci ildə həbs edildilər.
Bəli, qaçaqla hər hansı təmas hakimiyyət orqanlarının xəbər tutduğu
təqdirdə qeyd-şərtsiz ölüm demək idi.
Xalq şairi Bəxtiyar Vahabzadə «Şənbə gecəsinə gedən yol» kitabında bu
mətləbdən bəhs edərək yazırdı: «Üsyan yatırıldı, üsyançıların bir hissəsi həbs
edilib dərhal güllələndi, bir hissəsi isə dağlara çəkilib qaçaq oldular.
Bizim evimiz şəhərin «Yuxarı baş» məhəlləsində, dağın döşündə, meşənin
içində yerləşdiyindən qaçaqlar gecələr qapımızı döyür, bizə və yaxud
qonşularımıza pənah gətirirdilər. Səhər açılana qədər xurcunlarını ərzaqla doldurub
yenidən dağlara, meşələrə çəkilirdilər. Qaçaqlara yardım edən düşmən elan edilib
dərhal cəzalandırılırdı.
O zaman Şəkidə milis rəisi Zahidov adında bir qan içən idi. Onun hər şeyə
səlahiyyəti çatırdı. Qaçağa çörək verdiyinə görə Zahidov neçə-neçə kəndlini
məhkəməsiz, sübutsuz güllələmişdir. Onlardan ikisi atamın yaxın dostları idi.
Qaçağa yardım göstərmək üstündə güllələnənlərdən biri də şəhərin ən hörmətli
ağsaqqallarından Hacı Yusif Əfəndi idi. Atam onun haqqında danışırdı ki, üzünə
72
güllələnmə oxuyanda o Zahidovdan bir rükət namaz qılmağa icazə istəmişdir.
Torpaqla dəstəmaz alıb üzünü Zahidova tutmuşdur:
- Bir xahişim var, Məni sinəmdən vurun.
Dediyi kimi eləyirlər.
Qaçağa yardım bəhanəsi ilə həbs olunanlardan biri də atam Mahmudağa
oldu...”.
62
Qorxulu zamanın məntiqi bu idi ki, başını sağ salamat saxlamaq
istəyirsənsə onlardan gen gəzməlisən. Nəinki uzaq olmalısan, hətta o zaman
deyildiyi kimi «banditizm qalıqları»nın ləğv edilməsinə hakimiyyət orqanlarına
yardım göstərməlisən.
Üsyan yatırıldıqdan sonra DSİ-nin təlimat xarakterli sənədlərindən birində
qaçaqlara qarşı mübarizənin gücləndirilməsi üçün zəruri hesab edilən tədbirlərdən
bəhs olunurdu.
«Banditizm qalıqları və onların köməkçiləri ilə mübarizənin gecikdirilməsi
yol verilməzdir, üsyançılara və onların himayədarlarına qarşı fövqəladə tədbirlər
görmək yolu ilə cəza siyasətinin yüksəldilməsi zəruridir.
DSİ-nin
Nuxa-Zaqatala
şöbəsinin bütün aparatı təzələnməlidir.
Azərbaycan DSİ-nin mərkəzi aparatının işçilərindən seçmə yolu ilə iki mahal
şöbəsinin - Nuxa və Zaqatala şöbələrinin yaradılması üçün dərhal təşkilati
tədbirlər görülməlidir».
63
Bolşevik rejiminin xüsusi xidmət orqanları qaçaqları ləğv etmək üçün cəza
tədbirləri ilə yanaşı bir sıra məkrli əməliyyat planları hazırlayıb həyata keçirirdilər.
Xüsusi xidmət sistemi bu işdə qaçaqlarla dostluq, qohumluq əlaqələri olan
adamlara daha çox önəm verirdi. Onları öz yaxınlarına, doğmalarına xəyanətə
təhrik etməklə insanı hisslərdən, mənəvi dəyərlərdən imtina həddinə qədər bir
heçliyə yuvarlayırdılar.
Qaçaq
həyatının əzab-əziyyətlərindən cana doyub hakimiyyət
nümayəndələrinin vədlərinə sadəlövhcəsinə inanan qaçaqlardan da ipə-sapa
yatmayanlara qarşı istifadə halları mövcud olmuşdur.
İxtiyar yaşlı kişilərin bir çoxunun üst-üstə düşən söhbətlərindən bəlli olur
ki, Daxi adlanan qaçaq da Aşağı Göynük kəndinin milis rəisi (indiki anlamda sahə
müvəkkili) Hacıağanın toruna düşür. O üzə çıxmış Daxinin vasitəsi ilə Yunus və
Kərimi də qaçaq həyatından imtina etməyə razı sala bilir. Hacıağanın qurduğu
əməliyyat planına uyğun olaraq Daxi, Yunus, Kərim və Babaratma kəndindən olan
milis işçisi Həsənbala Qudula kəndində dəllək Adıgözəlin evinə düşürlər. Burada
əməliyyatın son mərhələsi həyata keçirilir. Yunus və Kərim öldürülürlər.
62
Bəxtiyar Vahabzadə. Şənbə gecəsinə gedən yol. Bakı, Azərnəşr, 1991, s. 258-259
63
C. Qasımov. Yaddaşın bərpası. Bakı, «Mütərcim», 1999, səh. 123