73
Bu hadisədən sonra Daxi zahirən Hacıağanın yaxın adamına çevrilmişdir.
Hətta ona sırf milis işçisinin funksiyalarına aid tapşırıqlar da verilirdi.
Günlərin bir günü Daxiya cırtdan Süleyman adlı dustağı Bakıya müşayiət
etməyi tapşırırlar. Dustaq təhvil verilərək gözlənilmədən o həbs olunur. Əlbəttə, bu
əvvəldən düşünülmüş əməliyyat planı idi. Görünür, Daxiya sona qədər etibar
etməmişdilər. Həsənbala da törətdiyi cinayətin qurbanı oldu.
Qardaş itkisindən irəli gələn kədərlə qatilə sonsuz nifrəti qəlbində yanaşı
gəzdirən Yunusun bacısı Hacıağa ilə görüşərək Həsənbalanın məhvi müqabilində
ona xeyli qızıl pul təklif edir. Bu təklif enkevedeçi üçün göydən düşmə olur.
Həsənbalanı sıradan çıxarmaqla o cinayət xarakterli əməllərindən xəbərdar olan
şahiddən yaxa qurtarmaqla yanaşı, həm də xeyli qazanc əldə etmiş olurdu.
Həsənbala arvadı ilə birlikdə Babaratma kəndində qohum toyunda iştirak
edərkən öldürülür.
Bolşevik rejiminin qaçaqlara qarşı olan cilovlanmaz qəzəb və nifrəti qeyd
olunduğu kimi onlarla hər hansı təmas yaratmış insanlara faciələr gətirirdi. Şəkinin
Oxud kəndindən olan qaçaq Atakişini və samuxlu Qaçaq Ələşi evində qəbul edən
Köndələn kəndinin sakini Əlfətin ailəsi də belə bir müsibətə tuş gəldi.
Dağ, meşə həyatının yorğunluğunu qismən canlarından çıxarmaq üçün
qaçaqların bu evə sığınması milisə bəlli olur. Onları qəfil yaxalamaq cəhdi baş
tutmur. Atışma zamanı Əlfətin arvadı və övladı həlak olurlar. Qaçaqlar isə
mühasirə həlqəsini yarıb hadisə yerindən uzaqlaşa bilirlər.
Şəki qaçaqlarından Abbas fitri cəsarəti və mərdliyi ilə diqqəti daha çox
cəlb edirdi. O bir müddət milis işçisi kimi əlində silah Sovet hökumətinin
qulluğunda durmuşdur. Amma NKVD sistemində mövcud olan iyrənc mənəvi-
psixoloji mühit onun təbiətinə olduqca yabançı idi. Abbas bu mühitə heç cürə
uyğunlaşa bilmirdi. Xüsusən yurddaşlarına qarşı irəli sürülən ittihamların motivləri
ilə barışmaq istəmirdi. Kim beş, on qoyun sahibidirsə demək həmin şəxs
qolçomaqdır və istismarçı kimi ifşa edilməlidir. Kim quran oxuyur, namaz qılırsa
şübhəli şəxs kimi nəzarətə götürülməlidir. Kolxoz quruluşunun üstünlüklərinə
şəkk-şübhə gətirən şəxs haqqında yerli-yataqlı danos hazırlanmalıdır və s. Bütün
bunlar milis işçilərinin qarşısına qoyulan vəzifələrin bir qismi idi. Dayısı Hidayətin
həbs olunması üçün verilən göstəriş onun səbir kasasını daşdırdı.
DSİ-dən Abbasın dayısı Andın oğlu Hidayət haqqında məlumat gəlmişdi.
Həmin məlumatda o Sovet hökuməti üçün təhlükəli bir qolçomaq kimi xarakterizə
olunurdu. Bundan sonra Hidayəti həbs etmək qərara alınır. Bu göstərişi yerinə
yetirmək kimə tapşırılsa yaxşıdır? Onun bacısı oğlu, milis işçisi Abbasa.
Rəzalətin, alçaqlığın hansı həddə çatdığına diqqət yetirin. Adamı öz
doğma dayısını, həm də günahsız bir insanı həbs etməyə təhrik edirlər.
Kənd, rayon səviyyəli enkevede işçilərinin bu bəd əməlləri təsadüfi
olmayıb rejimin mahiyyətindən irəli gəlirdi.
74
Ali hakimiyyət eşalonunda qərar tutmuş Əliheydər Qarayev tribunadan
bəyan edirdi ki, ağsaqqal kəndə bağlıdır, kəndlinin əmisi oğlu, ya dayısı, ya əmisi
və ya atasıdır. Muzdurları, yoxsulları elə hazırlamalıyıq ki, onların əli ilə
qolçomağa zərbə endirək.
Abbas ruhunu sarsıdan bu təklifdən sonra hakimiyyətlə bütün əlaqələri
kəsib, ona qarşı mübarizə aparmaq qərarına gəlir. Çox keçmir ki, Hidayət rejim
nümayəndələrinin göstərişi ilə enkevede agenti Baxış tərəfindən öldürülür.
Abbas dostu Xudu İbrahimlə birgə qaçaqçılığa başlayır.
Tezliklə Qaçaq Abbasın adı dillərdə əzbər olur. Onu aradan götürmək
üçün sınaqdan çıxarılmış bədnam xəyanət üsulundan dəfələrlə istifadə etmək
cəhdləri olmuşdur.
Qaçaq Abbası öldürməyə real imkanları olan şəxslərdən biri hökumət
nümayəndələrinə onun dostları Yusif və Abdulla qardaşlarının qisasından
qorxduğunu bildirir. Belə olduğu halda əvvəlcə Yusif və Abdulla qardaşlarını
məhv etmək qərara alınır.
El-oba mənafeyini həmişə uca tutan Yusiflə Abdulla əxlaqi keyfiyyətləri,
igidlikləri ilə hələ gənc yaşlarında elin etibarnaməsi kimi bir haqda qovuşmuşdular.
Şəkinin Giləhli məhəlləsi məhz onların nüfuzu hesabına yeni sovet qaydalarının
təsir dairəsindən kənarda qalan azadlıq adası təsiri bağışlayırdı. Onlar qətiyyətlə
bildirmişdilər ki, nə qədər ki, biz sağ-salamatıq, bu allahsızlar bu məhəllədə at
oynada bilməyəcəklər.
1930-cu ilin aprelində üsyan hərəkatı başlanarkən qardaşlar üsyançıların
sıralarında idilər. Hərəkat yatırıldıqdan sonra onlar təbii ki, gizli həyat tərzi
keçirmək zərurəti qarşısında qaldılar.
Onlara özünü dost kimi göstərən xəyanətkar bir dəfə Qaçaq Abbasın
qardaşlarla görüşmək istəyini bildirir. Çoxdan üzünü görmədikləri dostları ilə
görüşmək imkanı əldə edəcəklərinə sevinən Yusif və Abdulla dərhal razılıq
verdilər.
İnsanın öz taleyinə doğru gedişini tənzimləyən ilahi qüvvə hər şeyi
incəliklərinə qədər nəzərə alır. Tezliklə qardaşların ruhlarının əbədiyyətə
pərvazlanacağını əvvəlcədən müəyyən edən o böyük qüvvə ruhun təmiz bədəndən
ayrılması qayğısına qalaraq həmin axşam onları çimməyə, əyin başlarını
təzələməyə sövq etmişdir.
Xəbis niyyət sahibi isə öz işində idi. Qardaşların hətta silahlarını ona etibar
etməsindən istifadə edərək onlara məxsus tüfənglərin el dilində iynə adlanan
hissəsini çıxararaq gizlətmiş və Yusiflə Abdullanı tərksilah etməyi belə
unutmamışdı.
Səhər dan yeri sökülərkən yolçular nəhəng dağları öz qoynunda görünməz
edən duman ümmanına qovuşdular. Tezliklə bu duman-çən arxasından iki igid
ömrünə son qoyan atəş səsləri eşidildi. Bir neçə gündən sonra Yusif və Abdullanın