3. Sığorta müqaviləsinin şərtlərində sığorta ödənişinin
verilməsindən imtina üçün
qanunvericiliyə zidd olmayan başqa əsaslar da göstərilə bilər.
4. Sığorta ödənişinin verilməsindən imtina edilməsi barəsində qərar sığortalıya yazılı şəkildə
verilir və burada imtinanın səbəbləri əsaslandırılır.
5. Sığortalı sığortaçının sığorta ödənişini verməkdən imtina etməsi barədə məhkəməyə
şikayət edə bilər.
Maddə 33. Tələb olunmamış sığorta məbləği
Sığortalının müəyyən yaşınadək sağ qalması və ya ölümü şərti ilə həyat sığortası üzrə sığorta
məbləği sığortalı və ya onun qanuni vərəsəsi tərəfindən ödəniş vaxtı çatandan etibarən 10 (on) il
ərzində tələb edilməzsə, onuncu il başa çatdıqda sığortalıların siyahısı müvafiq icra hakimiyyəti
orqanına verilməklə dövlət büdcəsinə köçürülür.
Maddə 34. Sığortalının vəzifələri
Sığortalının vəzifələri aşağıdakılardır:
1.1. sığorta haqqını vaxtında ödəmək;
1.2. sığortalanmış obyektə dair qüvvədə olan digər sığorta müqavilələri barədə sığortaçıya
məlumat vermək;
1.3. sığorta hadisəsi baş verdikdə, bu barədə sığorta müqaviləsində müəyyən edilmiş
müddətdə sığortaçını xəbərdar etmək;
1.4. ziyanın qarşısının alınması və azaldılması üçün tədbirlər görmək;
1.5. sığorta müqaviləsi bağlanarkən riskin qiymətləndirilməsi üçün əhəmiyyəti olan hallar və
riskin sonradan dəyişilməsi barədə sığortaçıya məlumat vermək.
2. Sığorta müqaviləsində sığortalının başqa vəzifələri də nəzərdə tutula bilər.
Maddə 35. Sığortaçının vəzifələri
1. Sığortaçı:
1.1. sığortalını sığorta qaydaları ilə tanış etməli;
1.2. sığortalı sığorta hadisəsinin baş verməsi riskini və sığortalanmış əmlaka dəyə biləcək
zərərin miqdarını azaldan tədbirlər gördükdə, yaxud əmlakın həqiqi dəyəri artdıqda sığortalının
ərizəsi üzrə bu halları nəzərə almaqla sığorta müqaviləsini yenidən bağlamalı;
1.3. sığorta ödənişini müqavilədə və ya qanunda müəyyən edilmiş müddətdə verməli, əks
halda, sığortalıya hər gecikdirilmiş gün üçün sığorta ödənişinin 0,2 faizi miqdarında dəbbə pulu
(cərimə) ödəməli;
1.4. sığorta hadisəsi nəticəsində sığortalanmış əmlaka dəyə bilən zərərin qarşısının alınması
və ya azaldılması üçün sığortalının xərclərini ödəməli, bir şərtlə ki, bu, sığorta qaydalarında nəzərdə
tutulsun, həm də dəyən zərərin miqdarından artıq olan xərclərin əvəzi ödənilməməli;
1.5. sığortalı və onun əmlak vəziyyəti barədə məlumatı, o cümlədən kommersiya sirri olan
məlumatı yaymamalıdır.
2. Sığorta müqaviləsində sığortaçının başqa vəzifələri də nəzərdə tutula bilər.
3. Təkrar sığorta müqaviləsi bağlamış sığortaçı sığortalı qarşısında öz öhdəlikləri üzrə tam
məsuliyyət daşıyır. Təkrar sığortaçı sığortaçı qarşısında götürdüyü öhdəliklər üzrə məsuliyyət
daşıyır. Təkrar sığorta müqaviləsi sığortaçı ilə sığortalı arasında bağlanan müqavilə ilə eyni vaxtda
qüvvədən düşür.
4. Azərbaycan Respublikası ərazisində fəaliyyət göstərən sığortaçıların yalnız xüsusi razılıq
aldığı sığorta növü üzrə riskləri təkrar sığortaya qəbul etmək hüququ vardır.
5. İcbari sığorta növləri üzrə təkrar sığortaya verilən risklərin Azərbaycan Respublikası
ərazisində fəaliyyət göstərən sığortaçılarda saxlama payının həcmi və onun saxlama qaydası qanunla
müəyyən edilir.
6. Könüllü sığorta növləri üzrə risklər təkrar sığortaya verilərkən sığortaçı bir müqavilə üzrə
sığorta haqlarının azı 15 faizini (frontiq sazişləri üzrə azı 5 faizi) özündə saxlamalıdır, bir şərtlə ki,
riskin məbləği bu qanunun 46-cı maddəsinin 1.2-ci yarımbəndində müəyyən edilmiş normativə
uyğun olsun.
7. Sığortaçı bir müqavilə üzrə qəbul etdiyi riskin qanunvericiliklə müəyyən edilmiş
nizamnamə kapitalının minimum məbləğinin 50 faizindən artıq olan hissəsini xarici təkrar
sığortaçılarda təkrar sığortalaya bilər.
8. Əgər bir müqavilə üzrə qəbul edilən riskin məbləği Azərbaycan Respublikasında fəaliyyət
göstərən sığortaçıların nizamnamə kapitalının minimum məbləğinin 50 faizindən azdırsa, belə risklər
üzrə təkrar sığorta haqlarının 70 faizindən çox olmayan hissəsi xarici təkrar sığortaçılara ödənilə
bilər.
9. Xarici təkrar sığortaçı ilə bağlanan mütənasib təkrar sığorta
müqavilələri üzrə komisyon
mükafatı hesablanmış sığorta haqqının 10 faizindən az olmamalıdır.
10. Beynəlxalq reytinq təşkilatları tərəfindən müəyyən edilən reytinqlərdən müvafiq icra
hakimiyyəti orqanının göstərdiyi və ya göstərdiyindən yuxarı reytinqə malik olan xarici təkrar
sığortaçılarla əqdlər bağlayan sığortaçılara bu maddənin 10-cu bəndi şamil edilmir.
Maddə 36. Sığorta müqaviləsində sığortalının əvəz edilməsi
1. Əmlak sığortası müqaviləsini bağlamış sığortalı vəfat etdikdə onun hüquq və vəzifələri
vərəsəlik qaydasında bu əmlakı qəbul edən şəxsə keçir. Sığorta obyekti olan əmlak satıldıqda,
dəyişdirildikdə, bağışlandıqda, icarəyə verildikdə sığortalının hüquq və vəzifələri sığortaçının
razılığı ilə, müqavilədə və ya qanunda başqa şərtlər müəyyən edilməmişdirsə, həmin əmlakı qəbul
edən şəxsə onun razılığı ilə keçir.
2. Üçüncü şəxsin xeyrinə həyat sığortası müqaviləsi bağlamış sığortalı vəfat etdikdə, onun
hüquq və vəzifələri həmin şəxsin razılığı ilə ona keçir. Bu şəxs sığorta müqaviləsi üzrə vəzifələrini
yerinə yetirə bilmədikdə, onun hüquq və vəzifələri Azərbaycan Respublikasının qanunvericiliyinə
müvafiq surətdə onun hüquqlarının və mənafelərinin qorunması vəzifələrini yerinə yetirən şəxslərə
keçə bilər.
3. Əgər müqavilənin qüvvədə olduğu dövrdə sığortalı məhkəmə tərəfindən fəaliyyət
qabiliyyəti olmayan sayılmışdırsa, yaxud onun fəaliyyət qabiliyyəti məhdudlaşmışdırsa, belə
sığortalının hüquq və vəzifələrini onun qəyyumu və ya himayəçisi həyata keçirir. Bu zaman mülki
məsuliyyət sığortası sığortalının fəaliyyət qabiliyyətinin olmadığı hesab edildiyi və ya
məhdudlaşdırıldığı andan bitir.
4. Sığortalı olan hüquqi şəxs sığorta müqaviləsinin qüvvədə olduğu dövrdə yenidən təşkil
edildikdə, onun bu müqavilə üzrə hüquq və vəzifələri sığortaçının razılığı ilə qanunvericiliyə uyğun
olaraq müvafiq hüquqi varisinə keçir.