Snorri Sturluson í framtíðinni

Ritunarverkefni 1

Snorri Sturluson í framtíðinni

Snorri Sturluson vaknar einn fagran fimmtudagsmorgun í líkama þínum. Hann þarf að gera allt sem þú ert vanur/vön að gera á fimmtudögum. Hann þarf s.s. að fara á fætur, klæða sig, borða morgunmat, tannbursta sig, fara í skólann og sækja þær tómstundir sem þú stundar eftir skóla (t.d. íþróttir, tónlistartíma, dans o.s.frv.). Lýstu deginum hjá Snorra, ritaðu hvað kom honum á óvart, hvernig allt kom honum fyrir sjónir, hvað hann gat heimfært yfir á sinn tíma og hvað hann hafði aldrei í lífinu gert áður. Þú matt vinna textann í tölvu eða skrifa hann á blað en hann þarf að ná yfir 2 handskrifaðar blaðsíður. Góða skemmtun.

Ritunarverkefni 2

Hver var persónuleiki Snorra Sturlusonar?

Hvers konar maður haldið þið að Snorri Sturluson hafi verið? Haldið þið að hann hafi verið friðarsinni þar sem hann forðaðist átök ef svo bar undir? Var hann kannski tækifærissinni þar sem hann kom sér nú stundum undan þegar til átaka kom og nýtti sér sum tækifæri sem gáfust sér til góðs eða haldið þið að hann hafi kannski bara verið hugleysingi sem þorði ekki að taka á þeim vandamálum sem komu upp? Nú skuluð þið reyna að búa til ykkar eigin hugmynd um persónuleika Snorra Sturlusonar. Hafið í huga hverjum hann var giftur, hvar hann bjó og hvernig hann eignaðist landssvæði sín. Það er nokkuð ljóst að við vitum ekki beinlínis hvernig persónuleiki Snorra var en við vitum þó að hann er eitt frægasta skáld Íslendinga. Skrifið stutta ritgerð um efnið eða c.a. 1½ blaðsíðu A4. Munið að vanda frágang.

 

Ritunarverkefni 3

Bréf til foreldra

Nú skuluð þið ímynda ykkur að þið hafið verið fjarri foreldrum ykkar um lengri eða skemmri tíma. Þið ætlið að skrifa þeim bréf þar sem þið ætlið að segja þeim frá líðan ykkar. Einnig ætlið þið að láta koma fram hvað þið eruð að gera dagsdaglega. Þið skuluð líka segja frá aðstæðum ykkar, hvar þið eruð og af hverju þið eruð þar. Nú er um að gera að láta hugmyndaflugið ráða ferðinni. Munið að öll bréf eru dagsett og ártal er látið fylgja með. Vandið málfar ykkar og frágang. Bréfið á að vera ein til tvær blaðsíður handskrifaðar.

Ritunarverkefni 4

Aðrar valdaættir á Sturlungaöld

Áður en nemendur hefjast handa við þetta verkefni þurfa þeir að hafa aðgang að textum úr Íslenska söguatlasnum um valdaættirnar. Það færi vel á því að kennari hreinlega ljósritaði textana upp úr bókinni svo nemendur hefðu allir aðgang að þeim þar sem fáar atlasbækur eru til afnota hverju sinni. Það sem þarf að koma fram í ritgerð nemenda eru eftirfarandi atriði: - Hvað heita þeir sem ráða mest innan ættarinnar - Eru þeir menn sem vilja frið eða vilja þeir ráða meiru - Hvar búa þeir og yfir hve miklu svæði ráða þeir - Eiga þeir fjölskyldu - Önnur atriði sem þér finnst skipta máli við ritunina. Gera verður nemendum grein fyrir því að þeir eiga ekki að endurrita textann úr söguatlasnum heldur að nota sinn skilning og sitt orðalag í rituninni. Æskileg lengd er það sem kennari telur henta hverju sinni.

Ritunarverkefni 5

Hópverkefni - Hvernig eignaðist Snorri fleiri goðorð?

Til kennara: Til þess að nemendur geti leyst eftirfarandi verkefni þurfa þeir að hafa aðgang að bókinni Sjálfstæði Íslendinga 1, veggspjald eða langan renning, skriffæri og tússliti. Skipta þarf nemendum upp í hópa áður en vinnan hefst. Til nemenda: Snorri komst til valda á Íslandi á þjóðveldisöld með því að safna að sér goðorðum. Því fleiri sem goðorðin voru því valdameiri voru höfðingjarnir. Nú á hópurinn að lesa bls: 60-63 í Sjálfstæði Íslendinga og ræða síðan um það hvernig Snorri eignaðist goðorðin. Skrifið síðan á spjaldið hverjar þessar leiðir voru. Þegar því er lokið skuluð þið skrifa upplýsingarnar niður á A4 blað sem fer í vinnumöppuna ykkar. Munið að leyfa öllum að koma sínum skoðunum á framfæri í hópastarfinu. Vandið frágang ykkar – spjaldið verður hengt upp á vegg. Gangi ykkur vel.