qərarına tabe oldular və 1979-1980-ci illərdə hakimiyyəti qara dərili çoxluğa verməyə
məcbur oldular. Portuqaliya hakimiyyətləri isə əksinə, Anqolada, Mozambikdə və
Qvineya-Bisauda azadlıq hərəkatının təzyiqinə müqavimət göstərməkdə davam edirdilər.
Bu ölkələrdə milli qüvvələrin rəhbərliyi altında Sovet İttifaqının və Kubanın dəstəklədiyi
partizan mübarizəsi gedirdi. 1974-cü ildə Portuqaliyada diktator rejimi süqut etdikdən
sonra onun müstəmləkələri müstəqillik qazandılar.
Düzgün qiymətləndirilməyən xadimlər və qəribə hadisələr
Tarixdə şəxsiyyətlərə, adətən düzgün, obyektiv qiymət verilir, onların cəsarəti,
igidliyi, sərkərdəlik və ya dövlət xadimi istedadları ilə yanaşı, qəddarlığı, şərə qulluq
etmələri ört-basdır edilmir, malalanmır. Tarix mahir rəssam kimi, təkcə zahiri parıltı,
görünüşlə kifayətlənməyib, portretdə insanın daxili aləmini də təsvir etmək qayğısına
qaldığı kimi, şöhrət haləsinin arxasında gizlədilən qüsurlu cəhətləri də xatırlatmağı
unutmur. Ümumiyyətlə, bu elm mifoloji təsəvvürün təsiri altına düşmür, reallığı, real
cizgiləri əsasən sadə xalqın dilində meydana gələn və getdikcə genişlənib, şişirdilən
mifoloji retuşdan, əslində saxtalıqdan xilas etməyə çalışır. Tarixçilərin bəzən hansısa bir
təsir altında bir şəxsiyyəti, ya qədim xalqı hansısa bir döyüşdə fərqləndiyinə görə
şişirtməsi, onlara fantastik çalarlar verməsi sonralar bundan sui-istifadəyə şərait yaradır.
Qədim Romanın böyük tarixçisi Tatsit German tayfalarının b.e. 9-cü ilində sərkərdə
Arminiinn başçılığı altında Roma sərkərdəsi Varı ağır məğlubiyyətə uğratmasını qələmə
alarkən, həm də germanların igidliyini xeyli şişirtməsi sonralar Natsist partiyasının,
almanları – guya təmiz qanlı ariləri qalibiyyət təcəssümü simvolu kimi qələmə vermək
üçün əsas rolunu oynadı. SS-in başçısı Henrix Himmler almanları birbaşa germanların
törəmələri kimi qəbul edilməsini sübut etmək üçün dərindən-qabıqdan çıxır, tarixçinin
əsərinin orijinalını tapmağa cəhd edirdi. Nə Himmler, nə də alman natsistləri germanların
almanların birbaşa əcdadları olmadıqlarını qətiyyən nəzərə almırdılar. Axı almanlar
qədimdə və sonralar mövcud olmuş bir çox tayfaların qanlarının qarışığından meydana
gəlmişdilər, onlar heç də qədim germanların sadəcə varisləri deyildilər.
Tarixçilər bu məsələlərdə az günah işlədirlər. Yazıçılar, dramaturqlar isə öz mənfi
və ya müsbət qəhrəmanını təsvir etdikdə, heç də ölçü hissinə məhəl qoymurlar. Şekspir
şotland kralı Makbeti və onun kraliçasını qaniçən kimi təsvir edir, tarixi şəxsiyyət kimi isə
Makbet əslində belə olmamışdır. Yaxud III Riçard pyesinin baş qəhrəmanını bütöv
qüsurlar simvolu kimi təqdim edir, onu cəllad kimi qələmə verir, tarixi faktlar isə bunu
həqiqət kimi təsdiq etmir. Aleksandr Dyuma – ata isə məşhur «Üç muşketyor» romanında
Fransa kralı XIII Luinin yanında Birinci naziri olan kardinal, hersoq Rişelyeni mənfilik
təcəssümü, intriqalar ustası, könlü mənfiliyin çürük saplarından hörülmüş bir şəxs kimi
təqdim edir. Romanın təsiri altında Rişelyenin həqiqətdən uzaq olan mənfur siması
formalaşmışdır, kitabı oxuyan və ya onun əsasında çəkilmiş filmə tamaşa edənlər kardinal
Rişelyeni başqa cür təsəvvur etməyə hətta cəsarət etməzlər.
Arman Jan dyu Plessi, hersoq Rişelye cəmi 57 il ömür sürmüş, 1642-ci ildə, 30 illik
müharibənin son mərhələsində vəfat etmişdi. O, 38 yaşında Roma papası tərəfindən
kardinal rütbəsinə yiyələndirilmiş, iki il sonra isə Fransada hökumətin Birinci naziri
vəzifəsini tutmuşdu. 18 il ərzində Fransanın daxili və xarici siyasətini müəyyən etmiş, həm
də mütləqiyyətin möhkəmləndirilməsi üçün əlindən gələni etmişdi. Bu kardinalın
dövründə mütləqiyyətin «Bir kral, bir din, bir qanun» formulu meydana gəlmişdi.
Birinci nazir müxalif yönlü əyanlardan olan öz əleyhdarlarını qəddarcasına təqib
edirdi, onların nəsil qəsrlərini və malikanələrini dağıtmağı əmr edirdi. O, protestantların
müstəqilliyi ilə barışa bilmirdi, ona görə də katolik qoşunu fransız huqenotlarının başlıca
dayağı olan La-Roşel qalasını mühasirəyə aldı, qala 1628-ci ili oktyabrında təslim oldu.
Hersoq ölkənin tam mərkəzləşdirilməsinə çalışdı. Onun dövründə əyalətlər bütünlüklə
Parisə tabe edildi, əvvəllər aristokratların tutduqları qubernator vəzifələrinə varlı olmayan
dvoryanların nümayəndələri olan kral məmurları təyin edilirdi və onlara fövqəladə
səlahiyyətlər verilirdi. İctimai həyatın bütün sahələrini qaydaya salmağa çalışaraq, Rişelye,
1635-ci ildə Fransa akademiyasını yaratdı. Onun üzvlərinə ədəbi dilin vahid normasını
yaratmağı tapşırdı.
Xarici siyasətdə öz başlıca vəzifəsini Rişelye, Habsburqların Avropa hegemonluğu
ilə mübarizə olduğunu hesab edirdi. Müqəddəs Roma imperiyasını zəiflətmək üçün
Fransa Otuz illik müharibədə imperiyanın protestant knyazlarını, həmçinin İsveçi
dəstəkləyirdi. İsveçlə ittifaq müharibənin son mərhələsində onun gedişinə güclü təsir
göstərdi. Katolik dininin böyük müdafiəçisi olan Rişelye öz dini mənafeyini Fransanın
dövlət mənafeyinə qurban verdi. Müqəddəs Roma imperiyasının güclənməsi Fransanın
həm qərbdən İspaniya tərəfindən, həm də şərqdən Avstriya və Almaniya vasitəsilə
mühasirəyə alınıbb, onun taleyini məhvə aparan yola sala bilərdi. Ona görə də Rişelye
hətta katolik dininə xəyanət etməyə getdi ki, protestantlarla birləşib Müqəddəs Roma
imperiyasını ciddi surətdə zəiflədə bilsin. Həqiqətən də Rişelyenin ölümündən sonra başa
çatan müharibənin Vestfaliya sülh müqaviləsindən Fransa, kardinalın arzu etdiyi kimi, ən
böyük faydanı götürdü. Fransa öz sərhədini xeyli genişləndirə və Reyn üzərində
Habsburqlar hakimiyyətini çox zəiflədə bildi. Bu müharibədə daha bir uduzan isə Roma
katolik kilsəsi oldu. Müqəddəs Roma imperiyasının ərazisi 1624-cü il sərhədləri ilə
müəyyən olunmuşdur və belə bir məsələ ilə razılaşmalı oldu ki, imperiya daxilindəki
knyazlar öz təbəələrinin dinlərini özlərinin müəyyən etməsini davam etdirsinlər.
Bütövlükdə Myunsterdə və Osnabryükda imzalanmış müqavilələr protestantların
qələbəsi demək idi. Almaniyada islahata uğramış kilsə tanındı. İki dinin yayılması
vilayətlərinin sərhədləri Vestfaliya sülh müqaviləsində nəzərdə tutulmuşdu, XX əsrdə də
bu qayda praktiki olaraq dəyişilməmişdir. Digər hadisələrlə yanaşı, Vestfaliya sülhü yeni
dövrün Avropa tarixinə xeyli təsir göstərdi. Kardinal Rişelyenin uzaqgörənliyi, əsrlər keçsə
də, öz təsdiqini tapdı.
Rişelyenin Fransaya göstərdiyi böyük xidməti ondan sonra gələn az sayda tarixi
şəxsiyyətlər davam etdirdilər. Onların sırasına, nə qədər təəccüblü görünsə də, Taleyranı,
daha böyük mənada isə Şarl de Qollu aid etmək olar. Rişelyedən Fransanın indiki
sərhədləri, həm də Fransa Akademiyası xatirəsi qaldı, heç bir kral öz ölkəsinə sonrakı
dövrdə bu xidməti göstərə bilmədi. Rişelye olmasaydı, kralın arvadı Anna Avstriyalının
niyyətləri baş tuta, Fransa ərazisi isə İspaniyanın xeyrinə xeyli kiçilə bilərdi. Rişelye isə
onun və kralın qardaşının xəyanətindən xəbər tutduqda, hətta ölüm yatağından qalxaraq,
bu xəyanətin baş tutmasına imkan verməmişdi. Ona görə də Rişelyeyə qiymət verərkən
Dyuma prizmasından istifadəyə üstünlük verilməməli, Fransanın, fransız xalqının ümdə
mənafeləri prizması yada salınmalıdır.
Fransanın ümumi rəydə obyektiv qiymətləndirilməyən digər görkəmli xadimi Şarl
Moris de Taleyrandır. O, 1781-ci ildə kilsədən təcrid edilənə qədər Otten yepiskopu olmuş,
1789-cu ildə Baş ştatların və Milli Məclisin deputatı olmuş, 1797-ci ildə mühacirətdən
qayıtdıqdan sonra Fransa xarici işlər naziri olmuş, bu vəzifəni 1807-ci ilə kimi daşımışdır.
Sonralar, 1814-1815-ci illərdə də yenə də həmin yüksək diplomatik vəzifəyə qayıtmışdır. O,
1838-ci ildə 84 yaşında Parisdə vəfat etmişdir.
Taleyran, Benevent hersoqu diplomatiyanın dünya tarixindəki ən məşhur
simalarından biridir. Onun əcdadları hələ Karolinqlərə xidmət etmişdi. Dəyişən
hökumətlərin xarici işlər naziri timsalında (O, Direktoriyada, I Napoleonun, XVIII Luinin
hökumətlərində) Fransanın taleyini müəyyən etmiş və onun qüdrətinin artması üçün az iş
görməmişdi.
Taleyran fəaliyyətinə yepiskop kimi başlamışdı. 1789-cu il Fransa inqilabı dövründə
isə siyasətə qoşulmuşdu. O, royalistlərə hüsn-rəğbət bəsləməkdə ittiham edildiyinə görə
1792-ci ildə mühacirətə getməyə məcbur olmuşdu. O, I Napoleonun hakimiyyətə
gəlməsinə köməklik göstərmişdi. 1814-cü ildə siyasi kursu dəyişərək, Burbonların
hakimiyyətə qayıtmasını dəstəkləmişdi.
Napoleon Taleyranı xəyanətdə ittihamlandırmışdı. Lakin Taleyran Napoleondan
fərqli olaraq, eyforiyaya qapılmaqdan uzaq idi, daim Fransanın taleyini, onun təhlükəsiz
gələcəyini düşünürdü. Rusiya çarı I Aleksandrın 1807-ci ildə Tilzitdə görüşdükləri vaxt
imperator Napoleona vurulduğunu, onunla ittifaqla öyündüyünü görən Taleyran Rusiya
imperatorunu xəbərdar etmişdi ki, Napoleonla deyil, Fransa ilə ittifaqa üstünlük vermək
lazımdır. Taleyranın sözləri heç beş il keçməmiş öz təsdiqini tapdı, Napoleon Rusiyaya
yürüş etdi və biabırçı məğlubiyyətlə üzləşməli oldu. I Aleksandr da çox inandığı
Napoleonun məkrinin acısını dadmalı oldu.
Taleyran 1914-cü ildəki Vyana beynəlxalq konqressində Fransanı təmsil etməklə,
məğlub edilmiş ölkəsinin maraqlarını böyük ustalıqla müdafiə etmişdi. Vyana
konqressinin qərarına görə, Fransa 1792-ci ilə qədər olan öz sərhədlərini bərpa etməli idi.
Fransaya qarşı ərazi iddialarına, Taleyran öz «irs» formulu ilə cavab verib, bunu nəzərə
almağı təkid etdiyinə görə, Fransanın əvvəlki ərazilərinə toxunulmamışdı, onun Napoleon
müharibələri ilə işğal edilmiş əraziləri isə müstəqil qaydada öz talelərini həll etməli idi.
Taleyran Napoleona xəyanət edə bilərdi, axı Napoleon da özünü imperator etmək
üçün respublikaya xəyanət etmişdi. Napoleon Fransanın şöhrətini yüksəltsə də, bir
müddətə onu, demək olar ki, bütün Avropanın ağası etsə də, sonrakı üç ağır məğlubiyyəti
ilə bu dövləti daha acınacaqlı dərdlərə düçar etmişdi. Taleyran isə Fransaya heç bir
bədbəxtlik gətirməmişdi. Əksinə, daim onun xeyrinə fəaliyyət göstərmişdi. Taleyran
diplomatiya sənətinə böyük töhfələr vermişdir. Napoleonun hərbi istedadına heç kəs
şübhə etmir və o, tarixin ən görkəmli hərbi xadimlərindən biri sayılır. Lakin onun özünün
dediyi kimi, bir məğlubiyyəti onun qırx qələbəsinin üstündən xətt çəkəcək, yalnız onun
Mülki Kodeksi qalacaqdır. Doğrudan da, Napoleonun məğlubiyyəti Fransaya böyük
problemlər yaratdı. Taleyran isə daim çalışırdı ki, Fransanın qarşılaşdığı problemləri həll
etsin və buna əsasən nail olurdu.
Qəribə hadisələrə gəldikdə, Böyük Aleksandr Baktriyanı işğal edərkən, yerli
adamların orada ölmüş öz valideynlərini itin yeməsi üçün onun qabağına atmalarından
hiddətlənərək, bu eybəcər qaydanı qadağan etmişdi. Yəqin ki, baktriyalılar zoroastrizm
dininə sitayiş edənlər kimi, nə ölülərini dəfn edir, nə də yandırırdılar. İndi də bu dinin
nümayəndələri olan parslar Hindistanda ölünün cəsədini uca qüllə üzərinə qoyurlar və
orada quzğunlar bu cəsədləri yeyirlər. Təəssüf ki, insanlar pis adətlərdən və ənənələrdən
çətinliklə uzaqlaşırlar. Onlardan vidalaşmaq isə vacib bir vəzifə hesab edilməlidir. 1868-ci
ildə baş verən Meyci inqilabından sonra gənc imperator Mutsihito (Meyci) öz xalqına dörd
çağırışdan ibarət müraciət etdikdə, onlardan biri pis adətlərdən əl çəkmək çağırışı idi.
Qərbi Afrika regionunda inkişafın həlledici faktoru islamın yayılması idi. Lakin
onun təsiri bu regionun dənizkənarı və dağ vilayətlərinə toxunmadı. İslamın yolu üstündə
dərin meşələr dayanmışdı, ona görə də XVI əsrə qədər bu rayonların tarixi barədə yalnız
şifahi rəvayətlər, bol miflər danışır. Bu vilayətlərdə Yoruba xalqının ən qədim şəhəri və
siyasi mərkəzi, Laqosdan 180 km şimalda olan Oyo şəhəri idi. Rəvayətə görə, Yorubanın
ən görkəmli hökmdarı Oluaşo özünün 320 illik hökmranlığı dövründə dünyaya 1480-ə
qədər uşaq gətirmişdi. «Alafinlərin» (sarayların sahiblərinin) əksəriyyəti nisbətən tez
ölürdü. Onları həyat qüvvəsinin daşıyıcısı sayır və onlara allah kimi sitayiş edirdilər. Lakin
xalqın maddi rifahı aşağı düşdükdə və ya hökmdar bədəni və könülü ilə qocaldıqda, onun
idarə etməsi sadə şəkildə başa çatırdı. Ağsaqqallar şurası ona tutuquşu yumurtası ilə
qədəh göndərirdi və bu, özünü intihar etmə əmri idi. Əgər hökmdar tabe olmasa, onu
öldürürdülər. Əlbəttə, bu, türk sultanlarının öz qardaşlarını və oğullarını öldürməsinə
bənzəməsə də, çünki onlar taxt-taca bir namizəddən başqa iddiaçının qalmasını
istəmirdilər, hakimiyyətin rotasiyasının daha bir qanlı forması idi.
XII əsrin ortalarında Yoruba prinsi Eveka,o, İfedə doğulmuşdu, Benin şəhər-
dövlətini yaratdı. Beninə gəlib çıxmış bir holland səyyahı hökmdarın sarayını təsvir
edəndə onun ölçülərini Niderlanddakı bütöv Xarlem şəhəri ilə müqayisə etmişdi.
Böyük fransız yazıçısı Onore de Balzak özünün «İnsan komediyası» adlı toplusunda
yaratdığı üç min obrazla yanaşı Balanda adlı fransız dustaqxanası nəzarətçisinin başına
gələn əhvalatı da qeyd edir. Balanda çox qəddar adam idi, yeri gəldi-gəlmədi, dustaqları
təhqir edir, döyür, ələ salırdı. O, məhbusların ləyaqətini tapdalamaqdan həzz alırdı və
uzun müddət belə davrandığından, bir gün nəsə bir kəskin cavabla qarşılaşacağını nəzərə
almırdı. Dustaqların ondan qorxması, çəkinməsi bu mərhəmətsiz adamda ən alçaq hissləri
inkişaf etdirmişdi. O, nümayişkaranə şəkildə məhbuslardan qorxmadığını bildirirdi, axı
onların hamısı onun hüdudsuz hakimiyyəti altında idi.
Cana doyan dustaqlar sözü bir yerə qoyub, bir dəfə onlar üçün horra bişirilən iri
qazanın yanında dayanmışdılar. Yaxınlaşan Balanda onları söyərək, nəyə görə burada
dayandıqlarını hirslə soruşduqda, dustaqlar onu əllərinə götürüb iri qaynar qazanın içinə
atdılar. Nəzarətçinin bədəni əriyib horraya qarışdı və dustaqlar heç nə olmamış kimi, bu
duru xörəyi iştahayla yeməyə başladılar. Axı onun iri inqrediyentlərindən biri onların qatı
düşməni idi. O vaxtdan etibarən dustaqlar üçün məhbəsdə hazırlanan xörək «balanda»
adlanmağa başladı. Bu söz dünyanın başqa dustaqlarına çatdı və indi də, azı iki əsr
keçdikdən sonra hər kəs dustaqxana xörəyini başqa adla deyil, məhz qəddar fransız
nəzarətçisinin «şərəfinə» «balanda» kimi tələffüz edir. “Balanda” sözü dustaqxana
mühitinin beynəlxalq bir simvoluna çevrildi.
Hindistanda isə XIX əsrin ortalarınadək dəfn tonqalında onun dul qalan arvadını da
yandırırdılar. Axı hindlilər əsasən ölülərini tonqalda yandırırlar. İmkanı olanlar isə ölü
cəsədini Varanasidə (Beranesdə) tonqalda yandırıb, meyitin qalıqlarını Qanq çayına
tökürlər. Bəzi böyük adamların cəsədinin külü Hindistan ərazisinə səpilir. Dul arvadların
yandırılması – «sati» ritualı öz kökləri ilə allah Şivanın arvadı Sati haqqındakı qədim hind
mifinə gedib çıxır. Bu eybəcər ənənəni ingilislər qadağan etdilər. 1833-cü ildə Uilyam
Henri Kavendiş – Bentinka general-qubernator təyin edildikdən sonnra Hindistandakı
Britaniya siyasətinin yeni mərhələsi başlandı. Qubernator Madrasda, Bombeydə və
Benqaliyada qanunverici orqanı ələ keçirdi və geniş miqyaslı mərkəzləşmə siyasətinə start
verdi. O, İngiltərəyə düşmən münasibəti bəsləyən hind dini sektalarına qarşı sərt mübarizə
apardı. O, arzu olunmayan uşaqların öldürülməsi, ərinin dəfn tonqalında onun dul qalan
arvadının yandırılması kimi eybəcər köhnə hind adətləri ilə barışmırdı. Ona görə də dul
qadınların diri-diri dəfn tonqalında yandırılmasını qadağan etdi.
Bentikanın dövründə Avropa təhsil proqramları ilə işləyən ilk orta məktəblər açıldı.
Britaniyalılar müxtəlif yollarla hindlilərin kifayət dərəcədə güclü Qərb meyilli təbəqəsini
yaratmaq məqsədini güdürdülər və güman edirdilər ki, gələcəkdə onlar «dərisinin rənginə
və damarlarında axan qana görə hindli kimi qalacaqlar, ancaq öz təfəkkürlərinə, hisslərinə
və zövqlərinə görə ingilis olacaqlar». Bu ideya əslində hindliləri ingilislərə çevirmək kimi
ağılsız bir məqsədə əsaslanırdı. Fantastik xarakterli bu ideya həyata keçmədi. Hindli öz
həyat tərzini müəyyən dərəcədə dəyişsə də, düşüncə tərzində millətinə xas olan
xüsusiyyətləri əsasən qoruyub saxladı.
Epiloq
Tarix dənizinin sularına baş vurduqda, onun dərinliklərində yuva tapan, gizlənən
hadisələri və adamları müşahidə edirik. Bu dənizin suyunun alt qatlarının müşahidəsi
təbiətə məxsus olan nəhəng cənub su hövzələrində rəngbərəng balıqlar, digər canlılar
dünyasının seyrinə dalmağa bənzəyir. Tarix ümmanlarında da heyranlıq obyektinə rast
gəlmək mümkündür. Burada ağıla, könülə təsir edən hadisələr, öz istedadı və dühası ilə
təkcə müasirlərindən deyil, hətta sonrakı əsrlərdə, minilliklərdə də yaşayanlardan ciddi
surətdə fərqlənən şəxsiyyətlər diqqəti cəlb etməmiş qalmır.
Elmi tədqiqatlar müəyyən etmişdir ki, dünyada ən uca dağ zirvəsi dənizin sularının
altında gizlənir, həmin dağ hətta Comolunqmadan da hündürdür. Əgər Sakit okean
Havay adaları yaxınlığında belə möcüzəli geoloji süxura məkan rolunu oynayırsa, Tarix
okeanı daha müəmmalı, sirrli, sehrli mənzərələrlə doludur. Onların məzmun və mahiyyət
ölçüsü bəzən uca zirvələrin hündürlüyünü də kölgədə qoya bilir. Bu okeanda mərcan
təpələri isə təbiətin sərəncamında olan böyük sulardakından heç də az deyildir.
Tarix panoramasında biz göylərə baş vuran qartalları da, qorxaq pinqvinləri də,
torpaqda sürünənləri də seyr edə bilirik. Müqayisəsiz istedada və igidliyə malik olanların
mövcud olması ilə yanaşı, məkrliliyi və hiyləgərliliyi ilə bütün canlıları arxada qoya
bilənlər istənilən dövrün sosial taxçasında tarakanlar kimi özlərinə yuva tapa bilirlər.
Tarixin qəhrəmanının parıltısı altında belə varlıqlar da diqqətdən kənarda qalmamalıdır.
Ümumiyyətlə, tarixçi bütöv şahmat taxtasının üzərindəkiləri nəzərdən qaçırmamalıdır.
Tarixçi kiməsə və nəyəsə qulluq göstərməkdən bütövlükdə azad olmalıdır, bu sərbəstlik
ona istənilən hava şəraitində göyə baş vuran quşlar kimi öz qüvvəsinə inam yaradacaq,
ağıl gözlərinin qüvvədən düşməsinə imkan verməyəcəkdir. Tarixi saxtalaşdırmağa
girişənlər isə hansı məqsədi güdmələrindən asılı olmayaraq, elmə, həqiqətə xəyanət etmiş
olurlar, onların sərəncamında olan böyük imkandan düzgün istifadə etmək kimi halal
fəaliyyətdən yayınırlar.
Qədim Çində yarımqiymətli daş olan nefritdən hazırlanan əşyalar dəbə düşdükdə,
saraya ayaq açdı. Sonralar nefritdən hazırlanan hər şeyə müqəddəslik simvolu kimi
baxırdılar. Konfutsinin müsbət rəyi də nefritin müqəddəslik haləsini böyütdü. Tarixi
şəxsiyyətləri də saxta, boğazdan yuxarı tərif hesabına əlçatmazlara çevirmək, onlara iri
pyedestallar düzəltmək tarixi təhrif etməkdən başqa bir şey deyildir. Ona görə də tarixi bu
və ya digər dərəcədə bəzəyənlərə münasibət vurğunluq, heyranlıq səviyyəsinə keçməməli,
zaman və məkan fövqündə onlara real, obyektiv qiymət verilməsinə cəhd edilməlidir. Bu
prinsip əsasında tarixi öyrənmək, keçmişin salnaməsinə maraq göstərmək bizim
dünyagörüşümüzü genişləndirməklə yanaşı, həm də bizi xəbərdar etməklə səhvlərdən
çəkindirir. Seyr etdiyimiz adi bir mənzərəni qövsü-qüzehə çevirməməliyik, Xeyirə və Şərə
düzgün qiymət verməklə ictimai həyatda naşılıq girdabına düşməkdən, onun girovuna
çevrilməkdən qaçmalıyıq.
SON
Dostları ilə paylaş: |