Toshkent pediatriya tibbiyot instituti

GISTOLOGIYA FANI TARIXI HAQIDA 
 
Biz avval yozganimizdek, gistologiya fani sitologiya, embriologiya 
va  gistologiya  fanlarini  o‘z  ichiga  oladi.  Lekin  bu  fanlarni  bir-biridan 
ajralgan  holda  o‘rganish  tibbiyot  instntutlarida  mumkin  emas,  chunki 
tibbiyotda  pirovard  natijada  butun  inson  organizmi  o‘rganiladi.  Inson 
a’zolari  (aslida  ular  xujayra  va  to‘qimalar  yig‘indisidan  iborat, 
embrional  taraqqiyot  davomida  shakllanadi)  ga  baho  berib,  uning 
salomatligi  aniqlanadi.  Bas,  shunday  ekan,  gistologiyani  bilish  uchun 
uning  tarkibiga  kirgan  sitologiya  va  embriologiyani  ham  bilish  talab 
etiladi.  
Albatta  biz  o‘quvchilarga  tushunarli  bo‘lsin  uchun  bu  fan  tarixini 
davrlarga  va  qismlarga  bo‘lib  o‘rganamiz.  Eng  asosiysi  gistologiya 
fanini  o‘rganuvchi  usul  mikroskop  bo‘lgani  uchun,  biz  bu  fan  tarixini 
mikroskopga bog‘liq holda uch davrga bo‘lib o‘rganamiz. Bu fan tarixi 
butun  dunyoda  ham  shunday  uch  davrga  bo‘lib  o‘rganiladi;