Türkdilli Dövlətlərin Əməkdaşlıq Şurasının Baş Katibi Halil Akıncının
Bakı Beynəlxalq Humanitar Forumunda çıxışı
(10-11 Oktyabr 2011)
Hörmətli Dövlət Başçıları, Əziz Forum iştirakçıları,
Dünyanın qloballaşdığı, məsafələrin qısaldığı, millətlərin dövlətlərin
önünə keçərək yaxınlaşdığı bir dövrdə Azərbaycan Respublikasının və Rusiya
Federasiyasının Prezidentləri cənab İlham Əliyev və cənab Dimitri
Medevedevin sədrliyi ilə Bakı Beynəlxalq Humanitar Forumunun keçirilməsi
çox təqdirəlayiq haldır. Bu münasibətlə hər iki prezidentə öz təşəkkürümü
bildirirəm.
Hazırkı dövrdə heç bir dövlət və ya millət dünyada baş verən proseslərdən
kənarda qala bilməz. Prezidentlər tərəfindən irəli sürülən bu təşəbbüs
alqışalayiqdir və digər ölkə başçılarının da bu təşəbbüsə qoşulmalarını vacib
hesab edirəm.
21-ci əsrdə
regional
beynəlxalq
təşkilatlar ümumi
maraqların
müəyyənləşdirilməsi, rifahın yaxşılaşdırılması, regional sülh və sabitliyin
qorunmasında rolu artmaqdadır və ölkələr üçün humanitar standartlar
yaratmaqdadırlar.
Bizim təşkilat yeni yaranmış bir təşkilatdır, yaranmasının bir ili hələ
tamam olmamışdır. Təşkilatımız ortaq mədəniyyət və qardaşlıq bağlarına
əsaslanaraq türk dövlətlərini özündə birləşdirir. Hal-hazırda 6 türk dövlətindən
4-ü - Azərbaycan, Qazaxıstan, Qırğızıstan və Türkiyə qurumun üzvüdür və əsas
məqsədimiz üzv ölkələr arasında qarşılıqlı etimad, dostluq və xoşqonşuluğun
möhkəmləndirilməsi, region və ümumilikdə dünyada sülhün qorunmasına töhfə,
siyasi, ticari-iqtisadi, mədəni, təhsil, enerji və ümumi maraq kəsb edən digər
sahələrdə səmərəli regional və ikitərəfli əməkdaşlığın təşviqi, tərəflərin
xalqlarının həyat səviyyəsinin daim yüksəldilməsi və həyat şəraitinin
yaxşlılaşdırılması məqsədilə bərabərhüquqlu tərəfdaşlıq əsasında birgə fəaliyyət
vasitəsilə regionda hərtərəfli və balanslaşdırılmış iqtisadi yüksəlişə, sosial və
mədəni inkişafa səy göstərilməsindən ibarətdir.
Digər 2 türk dövləti - Özbəkistan və Türkmənistanın da təşkilatımıza üzv
olmasını istəyirik. Onların üzvlüyü ilə təşkilat bütün türk dövlətlərini əhatə
etmiş olacaq və bu da qurumumuzun tam şəkildə fəaliyyət göstərməsinə gətirib
çıxaracaqdır. Bununla, təşkilatımız böyük bir coğrafiyanı əhatə etmiş olacaqdır
– bu da böyük iqtisadi əməkdaşlıq sahəsi deməkdir.
Cari ilin 20-21 oktyabr tarixində Almatıda, Qazaxıstanda Dövlət
Başçılarının iştirakı ilə təşkilatımızın birinci Zirvə Toplantısı keçiriləcəkdir.
Zirvə toplantısının bəyannaməsində dünyada baş verən proseslərin və humanitar
məsələlərin də əks olunması nəzərdə tutulmuşdur.
Birinci Zirvə Toplantısının mövzusu “İqtisadi Əməkdaşlıq” olduğu üçün
13 oktyabr tarixində Astanada təşkilatımıza üzv olan ölkələrin İqtisadiyyat
Nazirlərinin ilk iclası keçiriləcəkdir. Bu iqtisadi tərəqqinin humanitar təməldə də
artırılması üçün mühüm tədbir olacaqdır.
Bununla yanaşı, təşkilatımızın çərçivəsində özəl sektorla dövlət arasında
əməkdaşlığın inkişafına xidmət edəcək “Türk İş Şurası” (Turkic Business
Council) yaradılacaqdır. Şuranın 2 oktyabrda Ankarada ilk hazırlıq toplantısı
keçirilmişdir. Birinci Zirvə Toplantısı çərçivəsində “Türk İş Şurası” 4 üzv
ölkənin iş adamlarının biznes forumunu təşkil edəcəkdir.
Türk Dövlətlərinin qonşu ölkələrlə münasibətləri strateji tərəfdaşlıq
səviyyəsindədir. Təşkilatımız qonşu dövlətlərlə münasibətlərə mühüm önəm
verir və xoş qonşuluq siyasətinə prioritet istiqamətlərdən biri kimi baxır.
Bakı Beynəlxalq Humanitar forumunun 11 oktyabrda keçiriləcək dəyirmi
masalarının mövzuları da reallıqla tam ayaqlaşır və mən də “İnkişafın iqtisadi
modelinin humanitar aspektləri” mövzusundakı dəyirmi masaya böyük
məmnuniyyətlə qatılacağam.
Türkdilli Dövlətlərin Əməkdaşlıq Şurası bir sıra layihələri həyata
keçirməyi planlaşdırır. Həmin layihələr arasında humanitar sahələri də əks
etdirəcək layihələr də mövcuddur. Təşkilatımızın bu sahədə hər cür əməkdaşlığa
hazır olduğunu bəyan edirəm.
Sonda bir daha Azərbaycan Respublikasının və Rusiya Federasiyasının
Prezidentləri cənab İlham Əliyev və cənab Dimitri Medevedevə bu təşəbbüsə
görə minnətdarlığımı bildirir, bir çox dövlət başçılarının da töhfəsi ilə bunun
davamlı olacağına ümid edirəm.
Diqqətinizə görə təşəkkür edirəm.