- 1 -
“Nikah müqaviləsi anlayışı, onun məzmunu və
bağlanma qaydası”
İ.O.Quliyev, Z.Z.Xəlilov
Məqalədə nikah müqaviləsinin hüquq institutu kimi nəzəri əsasları, müasir ailə
hüquq nəzəriyyəsində nikah müqaviləsinin rolu, müxtəlif ölkələrin ailə
qanunvericiliyində nikah müqaviləsinin müqayisəli cəhətləri, nikah müqaviləsi ilə
bağlı hüquqşünas alimlərin fikirlərinin təhlili, milli ailə qanunvericiliyimizin izahı
və bunlarla bağlı ziddiyyətlər göstərilərək müəyyən təkliflər verilmişdir.
Məqalənin mövzusu: “Nikah müqaviləsi anlayışı, onun məzmunu və bağlanma
qaydası” kimi təsadüfən seçilməmişdir. Nikah müqaviləsi institutu respublikamız
üçün yeni institut hesab olunur. XX əsrin 90-cı illərindən etibarən respublikamızda
nikah-ailə münasibətləri dövlət siyasəti çərçivəsində və qanunvericiliklə tənzim-
lənərək əsaslı surətdə formalaşmışdır. Əgər keçmiş SSRİ ailə qanunvericiliyi ər-
arvad arasında əmlak münasibətlərini imperativ normalar ilə nizama salırdısa,
hazırda isə bu münasibətləri nizama salan normalar dispozitiv xarakter daşıyır və
nikaha müqavilə kimi, hüquqi əqd kimi baxmaq imkanı verir. Keçmiş
qanunvericilik ilk növbədə ana və uşağın maraqlarını müdafiə edirdi. Həmçinin,
ər-arvad boşanarkən nikah müddətində əldə olunmuş əmlakları yarıbayarı
bölünürdü. Əgər ailədə bir uşaq da var idisə, bu zaman əmlak 3 nəfərə çatırdı.
1995-ci il 12 noyabr tarixindən etibarən Azərbaycan Respublikası Konstitusi-
yasının qəbulu ilə xüsusi mülkiyyətin yaranması və bütövlükdə bazar iqtisadiy-
yatının inkişafı nəticədə ər-arvadın əmlak münasibətlərinin dispozitiv əsaslarla ailə
qanunvericiliyində tənzimlənməsinə gətirib çıxardı. Nikah müqaviləsi Azərbaycan
qanunvericiliyində və hüquqtətbiqetmə praktikasında Azərbaycan Respublikası
Mülki Məcəlləsi və Ailə Məcəlləsinin 2000-ci ildə qüvvəyə minməsi ilə müəyyən
olunmuşdur. Hal-hazırda nikaha daxil olan şəxslər arasında boşanma baş verdiyi
halda onların əmlaklarının bölünməsinə görə mübahisələr baş verir. Belə əmlak
mübahisələrinin qarşısının alınması üçün ən yaxşı vasitə məhz nikah
müqaviləsidir. Nikah müqaviləsi vasitəsilə ər və arvad əldə etdikləri əmlaklarının
hüquqi rejimini müəyyən edirlər. Mövzunun aktuallığı məhz bununla ön plana
çıxır. Yeni Ailə Məcəlləsi qəbul olunana qədər ancaq xarici ölkələrin ailə hüquq
nəzəriyyəsini xarakterizə edərək nikah müqaviləsindən danışmaq olardı.
Ümumiyyətlə nikah müqaviləsinin cəlbediciliyi onun azadlıq ideyası ilə ifadə
olunur. Nikah müqaviləsi o şəxslər üçün aktualdır ki, onların xüsusi biznesi,
müntəzəm gəliri, xüsusi yaşayış evi və digər mülkləri olsun. Bununla bərabər həm
də, maddi durumlarında əhəmiyyətli fərq olan şəxslərarası nikah münasibətləri
üçün nikah müqaviləsi aktual hesab oluna bilər. Nikah müqaviləsinin anlayışı Qərb
ailə hüquq nəzəriyyəsində müxtəlif cür şərh olunur. Əksər xarici ölkələrdə xüsusən
də ABŞ-da nikah müqaviləsi və nikah eyni mənanı kəsb edir. Ancaq Azərbaycan
hüquq ədəbiyyatında bu iki anlayış tamamilə fərqli mənanı özündə ehtiva edir.
Maraqlısı odur ki, Azərbaycan Respublikasında müasir ailə qanunvericiliyinin
tələblərinə əsasən nikah müqaviləsinin predmetinə yalnız ər-arvad arasında
- 2 -
mövcud olan əmlak münasibətləri daxildir. Lakin əksər ölkələrdə qeyri-əmlak
münasibətləri nikah müqaviləsinin predmeti kimi qəbul olunur. (Məsələn, İtaliya,
Fransa, Almaniya və s.) Bütövlükdə “Nikah müqaviləsinin anlayışı, məzmunu və
bağlanma qaydası” çox vacib və günümüzün aktual mövularından biri hesab
olunur.
Nikah müqaviləsinin ailə hüququ sistemində hüquqi tənzimlənmə xüsusiy-
yətlərinin kompleks tədqiqi, nikah müqaviləsinin hüquqi təbiətinin şərhi,
praktikada nikah müqaviləsi ilə əlaqədar yaranan problemlərin aşkara çıxarılması
məqalənin əsas məqsədi hesab olunur.
Bu məqsədə nail olmaq üçün aşağıda göstərilən məsələlərin həlli xüsusilə
vacibdir:
- nikah hüquq institutunun tarixi aspektlərini aydınlaşdırmaq;
- ailə hüquq nəzəriyyəsində və xarici ölkələrin qanunvericilik praktikasında ər
-arvadın əmlakının qanuni rejiminin müasir əsaslarının şərhi;
- nikah müqaviləsinin ümumi hüquqi təbiətini izah etmək;
- nikah müqaviləsinin anlayışı, məzmununu müəyyənləşdirmək;
- müxtəlif ölkələrin ailə qanunvericiliyində nikah müqaviləsinin müqayisəli
cəhətləri və bu məsələlərin Azərbaycan qanunvericiliyində təsbiti;
- Azərbaycan Respublikasının müasir hüquqtətbiqetmə praktikasında nikah
müqaviləsi ilə bağlı ziddiyyətlərin, problemlərin aşkarlanması və milli ailə
qanunvericiliyimizdə olan boşluqların aradan qaldırılması;
Məqalənin metodoloji əsasını dialektik dərketmə metodu, ümumelmi metod və
problemin aydınlaşdırılması üçün kompleks-tarixi, müqayisəli kimi metodlar təş-
kil edir.
Nikah müqaviləsi ingilis dilindəki “marriage contract” sözündən götürülərək
anlayışın azərbaycan dilində olan analoqudur.
1
Ümumiyyətlə hüquq institutu kimi
nikah müqaviləsinin mahiyyəti barədə müxtəlif hüquqşünas alimlərin fikirləri
mövcuddur. Mülahizələrə görə əsasən nikaha 3 nöqteyi-nəzərdən: nikah
müqaviləsi, nikah statusu və nikah əməkdaşlığı (partnyorluğu) kimi baxılır. Daha
geniş yayılmış konsepsiyalardan biri də qanuni nikahın bağlanması qaydalarına,
onun həqiqiliyinin şərtlərinə, tərəfin nikahının pozulması nəticəsində təzminatın
ödənilməsi imkanının əldə edilməsinə qanun tərəfindən tələblərin artmasına
əsaslanan müqavilə konsepsiyasıdır. Bütün bu tələblər onu deməyə əsas verir ki, bu
daha çox ər-arvadın əmlakının müqavilə rejiminin istifadəsinə yönəldilib. Bununla
razılaşmaq lazımdır. Lakin ərlə-arvadın əmlakının müqavilə rejiminin ideyasını
şübhə altına almayaraq, özlüyündə rejim anlayışını və nikah anlayışını
fərqləndirmək lazımdır. A.İ.Zaqarovski qeyd etmişdir ki, həm nikahın məzmunu,
həm də ki, onun pozulması ərlə-arvadın istəyindən asılı deyil. Ona görə də nikah
institutunu müqavilə hüququnun sahəsinə aid etməkdənsə xüsusi kateqoriyalı
institutların sırasına aid etmək daha dəqiq olardı. Q.F.Şerşeneviç nikahın müqavilə
əsasında yaranmasını nikah-hüquq münasibətindən dəqiq ayırır. O, hesab edir ki,
həm nikahın, həm də vətəndaş öhdəçiliyinin yaranmasının əsası müqavilədir.
1
А.М.Нечаева, «Семейное право актуальные проблемы теории и практики» “Юрайт-издат” 2007.
с. 116.;
- 3 -
Lakin, nikah-hüquq münasibətləri mülki öhdəçilik sayılmır. Q.F.Şerşeneviç yazır
ki, nikahın məqsədi tək fiziki yox, həm də ki əxlaqi birgəyaşayışdır. Bu nöqteyi-
nəzərdən hər ikisi müqaviləyə əsaslana bilən nikah və öhdəçilik arasında fərq
ortaya çıxır. Əgər müqavilə bir və ya bir neçə hərəkətin icrasına yönəlibsə bunun
nəticəsi öhdəçilik münasibətləridir. Nikah birgəyaşayışı müəyyənləşmiş hərəkətləri
nəzərdə tutmur. Bu birgəyaşayış bütün həyatı boyu əlaqəni nizamlayır və ən əsası
iqtisadi məzmun deyil, əxlaqi ideya kəsb edir. Bunun nəticəsində Q.F.Şerşeneviç
nikah hüquq münasibətlərindən yaranan hüquqi faktı, müqaviləni qəbul edir. Qeyd
etmək lazımdır ki, hüquqşünas alim bunun əsasında yaranan münasibətləri isə
xüsusi növlü instituta aid edir. Nəticə etibarilə
XIX əsrin sonunda əksər
hüquqşünas alimlər kimi həm A.İ.Zaqarovski, həm də Q.F.Şerşeneviç ailə
hüququnu mülki hüququn bir sahəsi kimi və nikahı isə xüsusi növlü mülki hüquq
institutu olaraq qəbul edirdilər. Ailə hüququ XX əsrdən başlayaraq haqlı olaraq
hüququn müstəqil sahəsinə çevrildi. Ailə hüququ mülki hüquqla sıx əlaqəli olsa da,
müstəqil hüquq sahəsidir. Müstəqil hüquq sahəsi kimi, ailə hüququ ictimai
münasibətlərin müəyyən növünü – ailə münasibətlərini, yəni nikah faktından
meydana gələn və ailəyə mənsub olan münasibətləri tənzim edir.
Növbəti konsepsiya nikah bağlayan şəxslərin bütövlükdə hüquqi və qeyri-
hüquqi nəticələrin əldə edilməsinə yönəlmiş iradə ifadəsini ehtiva edir. Bu birinci
növbədə qanuni ər-arvadın ictimai və hüquqi status almasına əsaslanır. Nikah
statusu ilk növbədə ər-arvadın hüquq və vəzifələr əldə etməsinə səbəb olur. Nikah
bağlamaqla ərlə arvad əvvəlcədən böyük hissəsi qanunla imperativ qaydada
müəyyənləşdirilən münasibətlərə daxil olmağa razılıq verirlər. Bunun nəticəsində
nikahın hüquqi təbiəti nikahı müqavilə kimi xarakterizə etməyə imkan verir.
Mütləq şəkildə nikahı və əsasını nikahdan götürən hüquqi nəticələri fərqləndirmək
lazımdır.
Son illərdə geniş yayılmış bir konsepsiya da mövcuddur. Bu konsepsiyanın
mahiyyəti nikah əməkdaşlığına (partnyorluğa) imkan verir. Əksər müəlliflər bu
ideyanın yaranmasını qadınların hüquq bərabərliyi uğrunda inkişaf hərəkatı,
onların müstəqil vəziyyəti və təbii ki, ərlə arvadın nikahdakı bərabərliyi ilə
əlaqələndirirlər. Qeyd olunan konsepsiya sayəsində nikahdakı ərlə arvad əməkdaşa
(partnyora) çevrilirlər. Belə bir halda bunun praktiki nikah hüquq münasibətlərinə
tətbiqi nikahdakı ərlə arvadın – partnyorların hüquq və vəzifələrini dəqiq
müəyyənləşdirməyi çətinləşdirir. Bu da onun qanunla rəsmiləşdirilməsini qeyri-
mümkün edir. Məhz buna görə də nikah partnyorluğuna ərlə arvadın qarşılıqlı
münasibətlərinin hüquqi forması deyil, arzu olunan forması kimi baxmaq lazımdır.
Yuxarıda deyilənlərə əsasən bu nəticəyə gəlmək olar ki, nikah kimi belə spesfik
instituta hüquqi təbiəti baxımından nikah statusu daha yaxın hesab olunur.
2
Onu da qeyd etmək lazımdır ki, hələ Qədim Roma və Yunanıstanda qadınlar
və kişilər ailə qurmazdan əvvəl əmlak münasibətlərini tənzimləyən müqaviləni
rəsmiləşdirirdilər. XVIII əsrin sonu XIX əsrin əvvəllərində Fransa, İngiltərə,
2
Л.Ю.Грудцына, Как заключить брачный договор (контракт)?: Советы адвоката,
“ЮРКОМПАНИ” 2009, c. 77.;
- 4 -
Almaniya və Avstriyada nikah müqaviləsi institutu yenidən bərpa olundu. Məhz bu
dövrdən etibarən nikah müqaviləsi hüquqi qüvvə qazanır.
Müasir dövrdə isə ailə hüquq nəzəriyyəsində ər-arvadın əmlakının qanuni
rejimi 3 növdə ola bilər:
-
Ümumi rejimli (Azərbaycan, Fransa, İsveçrə, ABŞ-nın bəzi ştatları)
-
Bölünmə rejimi (İngiltərə, ABŞ-nın əksər ştatları, Almaniya)
-
Ər-arvad əmlakının ümumiliyinin ayrılması rejimi (İsveç, Norveç,
Danimarka)
Ümumi rejimdə nikah müddətində ərlə arvadın əldə etdikləri və qazandıqları
əmlak və ondan gəlirlər onların ümumi birgə mülkiyyəti sayılır. Ər-arvadın birgə
mülkiyyətinə onların hər birinin qanunla qadağan edilməyən fəaliyyət (əmək,
sahibkarlıq və ya intellektual fəaliyyət) nəticəsində əldə etdikləri gəlirlər, aldıqları
pensiya və müavinətlər, onların ümumi gəlirləri hesabına əldə edilən əşyalar,
qiymətli kağızlar, kredit idarələrinə qoyulmuş paylar, əmanətlər və nikah dövründə
ər-arvadın qazandığı hər hansı sair əmlak daxil ola bilər. Qeyd olunan məsələlər
Azərbaycan Respublikasının Mülki Məcəlləsinin 225-ci və Ailə Məcəlləsinin 31-
37-ci maddələri ilə müəyyən edilir.
Bölünmə rejimində ərlə arvada nikaha qədər mülkiyyətçisi olduğu əmlakla
yanaşı, nikah dövründə öz puluna əldə olunmuş əmlak da məxsus olur. Əgər qadın
işləmirsə, evdarlıqla məşğuldursa evlilik dövründə o heç nə əldə etmir. Bunun
nəticəsində qeyd edək ki, ərlə arvadın əmlakının bölünmə rejimi nikahda olan
qadının maraqlarını müdafiə etmir. İngiltərədə və ABŞ-da beynəlxalq qadın
hərəkatının səyləri nəticəsində ənənəvi bölünmə rejiminə ümumilik elementləri
daxil edilib:
-
Ərlə arvadın mülkiyyət hüququna görə konkret əmlakın onlara məxsusluğu
deyil, məhkəmə ilə müəyyənləşmiş paya hüququ tanına bilər.
-
Daha vacib əmlak növlərində məsələn, yaşayış evlərində və binalarda
ümumilik rejimi tətbiq olunur.
Bəzi ölkələrdə nikahda olan qadının fəaliyyət qabiliyyətsizliyi qəbul olunan
halda əmlakın idarə olunması hüququ ərə məxsusdur. Lakin vurğulamaq lazımdır
ki, Argentina, Braziliya, İspaniya kimi ölkələrdə nikahda olan qadının fəaliyyət
qabiliyyətli olduğu halda belə əmlakın idarə olunması və nikahda olan maddi
məsələlərin həllində mühüm üstünlükləri kişi həyata keçirir. Bu baxımdan Fransa
qanunvericiliyində ərlə arvadın ümumi əmlakının təkbaşına idarə olunmasının
özünəməxsus variantı təsbit edilib. Yəni, kişi birgə mülkiyyətə ümumi idarəçiliyi
həyata keçirir, ancaq vacib sazişləri qadının razılığı ilə bağlaya bilər. Qadın isə öz
qazancı hesabına əldə edilmiş və ailənin zəruri tələbatının ödənilməsinə aid
olmayan (ehtiyat) əmlakı idarə edir.
3
Hələ 35 il öncə ABŞ-da bağlanan kəbinlərin yalnız 1 faizi nikah
müqavilələriylə müşayiət olunurdu. İndi isə Birləşmiş Ştatlarda belə kontraktlar
üzrə göstəricilər 60 faiz təşkil edir. Müasir dövrdə Fransa və Almaniya kimi
ölkələrin statistikası göstərir ki, ilk dəfə nikaha daxil olanların 5%-i, ikinci dəfə
3
Под ред. П. В. Алексия, И. В. Петрова, А. Н. Кузбагарова “Семейное право” : учебник для
вузов; Издательское объединение "ЮНИТИ" 2009, c. 147.;
- 5 -
nikaha daxil olanların 60%-i nikah müqaviləsi bağlayırlar. Artıq 10 ildir ki, nikah
kontraktı Azərbaycanda hüquqi reallığa çevrilərək nikah müqaviləsi adı ilə ailə
qanunvericiliyinə daxil edilmişdir. Yeni Ailə Məcəlləsi əmlakı ər-arvadın ürəyi
necə istəyirsə, o cür də bölməyə şərait yaradır.
Hüquqşünas alim İ.M.Kuznetsovanın fikrincə, nikah müqaviləsi - kişi və
qadının nikah və boşanma dövründə əmlak hüquqlarını müəyyənləşdirən sazişdir.
M.V.Antokolskaya düşünür ki, ərlə arvadın əmlakının hüquqi rejimini və
gələcəkdəki digər əmlak münasibətlərini müəyyənləşdirmək nikah müqaviləsinin
əsas hüquqi məqsədidir.
4
Azərbaycan Respublikası Ali Məhkəməsinin hakimi
Əsəd Mirzəliyevin fikrincə nikah müqaviləsi hər qadının özünün və uşaqlarının
sosial müdafiəsi deməkdir. Bu səbəbdən insan hələ ailə münasibətlərini müəyyən-
ləşdirməmişdən öncə özünün sosial müdafiəsini hüquqi baxımdan təşkil etməlidir.
Azərbaycan Respublikası Mülki Məcəlləsinin 225.1-ci maddəsində ərlə arvadın
nikah dövründə qazandıqları əmlakın onların nikah kontraktında ayrı qayda
nəzərdə tutulmadığı halda ümumi mülkiyyəti hesab edilməsi haqqında göstəriş
mövcuddur. Ancaq nikah müqaviləsinin bağlanmasını mümkün edən müddəalar
1 iyun 2000-ci ildən qüvvəyə minən yeni Ailə Məcəlləsində nəzərdə tutulmuşdur.
Nikah müqaviləsinin anlayışı ailə qanunvericiliyimizin 38.1-ci maddəsində öz
əksini tapıb: “Nikah müqaviləsi nikaha daxil olan şəxslər arasında bağlanan, nikah
dövründə və (və ya) nikah pozulduqda ər-arvadın əmlak hüquqlarını və vəzifələrini
müəyyən edən sazişdir.” Nikah müqaviləsi müqavilə tərəfləri arasında əksər
mübahisələrin məhkəmə istintaqına müraciət etmədən həllinə imkan verir.
Azərbaycan Respublikasının müasir Ailə Məcəlləsində nikah müqaviləsinə
həcmi böyük olmayan 3 maddə (38-40-cı maddələr) həsr olunub. Müqayisə üçün
qeyd edək ki, 1896-cı il tarixli Almaniya Mülki Qanunnaməsində isə nikah
müqaviləsinin hüquqi xarakteristikasını müəyyən edən yüzlərlə paraqraf
mövcuddur. Hesab edirik ki, bu Respublikamızda hüquqi təbliğatın zəif olması,
mental dəyərlər və nikaha daxil olan şəxslərdə olan psixoloji faktorlarla bağlıdır.
Əksər hallarda nikah müqaviləsi məzmun etibarilə əmlak bölgüsü və bu kimi
digər münasibətlərə aid olsa da, bir çox hüquqşünas alimlərin fikrincə bu müqavilə
ərlə arvad arasında münasibətlərin tənzimlənməsinə də yönələ bilər. Məsələn,
Hollivud ulduzları Tom Krus və Nikol Kidman arasında imzalanmış nikah
müqaviləsində ər-arvad həyatının xırdalıqları da nəzərə alınaraq müqavilədə öz
əksini tapıb. Müqavilə üzrə ayaqyolu çanağı oturacağının istifadə edildikdən sonra
yerinə qaytarılması ilə bağlı Tomun üzərinə xüsusi öhdəlik qoyulmuşdur.
5
Digər
bir misal: ABŞ-ın eks-prezidenti Con Kennedinin keçmiş həyat yoldaşı Jaklin
Buvye Kennedi və yunan multimilioner Aristotel Onassis arasındakı nikah
müqaviləsinə əsasən ər öz arvadını atıb gedərdisə, o zaman onunla birgə yaşadığı
hər ilə görə 10 milyon dollar həcmində kompensassiya ödəməli idi. Əgər əksinə
hal baş verərdisə, belə olduqda ər nikahın ən azı 5 il davam etməsi şərtilə ümumi
məbləğin 18,7 milyon dollarını ala bilərdi. Belə görünür ki, bu bizim hüquqi
4
Под ред. П. В. Алексия, И. В. Петрова, А. Н. Кузбагарова “Семейное право” : учебник для
вузов; Издательское объединение "ЮНИТИ" 2009, с. 145.;
5
В.Р.Дворецкий, “Все о брачном договоре” “ГроссМедиа” 2008 c. 54.;
- 6 -
ənənələrimiz üçün qeyri-adi şərt kimi qəbul oluna bilər. Eyni zamanda bu səpkili
şərtlər milli ailə qanunvericiliyimizin ümumi ruhuna zidd deyil.
6
Həmçinin yuxarıda qeyd olunan müqavilədə belə bir şərt də mövcud idi ki,
nikah dövründə arvad (Jaklin Buvye Kennedi) bütün katolik bayramları və yay
istirahətini əri (Aristotel Onassis) ilə birgə keçirməlidir. Göründüyü kimi amerika
qanunvericiliyi nikah müqaviləsinə daha geniş azadlıq verir. ABŞ-da nəinki əmlak,
həm də ər-arvad arasındakı digər münasibətlər nikah müqaviləsinin predmeti hesab
olunur. Bu kimi öhdəliklərin məcburi icrası fikrimizcə yolverilməzdir.
Konstitusion hüquqların məhdudlaşdırılması ilə bağlı olan şərtlər qeyri-əmlak
münasibətlərinə aid olduğu üçün onlar nikah müqaviləsinin predmeti ola bilməz.
Bununla yanaşı mübahisə zamanı məhkəmə bu şərtləri nəzərə almır. Azərbaycan
Respublikasının Konstitusiyasının 28-ci maddəsinə əsasən hər kəsin azadlıq
hüququ vardır. Azadlıq hüququ yalnız qanunla nəzərdə tutulmuş qaydada tutulma,
həbsəalma və ya azadlıqdan məhrumetmə yolu ilə məhudlaşdırıla bilər. Yəni, bu o
deməkdir ki, qeyd olunanlardan savayı heç bir halda vətəndaşın əsas konstitusion
hüququ olan şəxsi azadlığı məhdudlaşdırıla bilməz. Hesab edirik ki, nikah
müqaviləsi ancaq ərlə arvadın əmlak münasibətlərini tənzimləməlidir. Nikah
müqaviləsi nəinki ərlə arvad arasındakı şəxsi münasibətləri tənzimləməməlidir, ən
əsası onların hüquqlarını məhdudlaşdırmamalıdır. Mütləq şəkildə qeyd etməliyik
ki, Azərbaycan Respublikasında müasir ailə qanunvericiliyinin tələblərinə əsasən
nikah müqaviləsinin predmeti dedikdə, burada ər-arvad arasında mövcud olan
əmlak münasibətləri başa düşülür, hər hansı bir başqa ailə münasibətləri nikah
müqaviləsi ilə tənzimlənə bilməz.
Azərbaycan Respublikasının Ailə Məcəlləsinin “Nikah müqaviləsi və onun
məzmunu” adlı 38.5.-ci maddəsinə görə: “Nikah müqaviləsində nəzərdə tutulmuş
hüquq və vəzifələr müəyyən müddətlərlə məhdudlaşa bilər, müxtəlif şəraitin
yaranıb-yaranmamasından asılı ola bilər.” Məsələn, ər arvad razılığa gələ bilərlər
ki, nikah müqaviləsi 1 yanvar 2010-cu il tarixdə qüvvəyə minsin və 10 aprel 2010-
cu ildə qüvvədən düşsün. Belə şərtlər nikah müqaviləsində notariat qaydada təsdiq
olunmaqla öz təsbitini tapır. Bu halda boşanma faktı nikah müqaviləsinin xitam
olunmasına səbəb olmur. Lakin nəzərə almaq lazımdır ki, əgər göstərilən müddətə
qədər boşanma olubsa, məhz Qeydiyyat idarəsində boşanma qeydə alındıqdan
sonra nikah müqaviləsi hüquqi qüvvəsini itirəcək.
Mütləq mənada vurğulanmalıdır ki, “Nikah müqaviləsi” kateqoriyası “Ər və
arvadın mülkiyyətinin müqavilə rejiminə” nisbətən daha geniş anlayışdır.
Azərbaycan Respublikasının Ailə Məcəlləsinin 38.2 və 38.4-cü maddələri birbaşa
olaraq nikah müqaviləsinin məzmununda qanunun icazə verdiyi hansı əmlak hüquq
və öhdəliklərinin müəyyənləşdirilə biləcəyini ifadə edir. Birinci növbədə nikah
müqaviləsi ilə ər-arvad birgə mülkiyyətin qanunla müəyyən olunmuş rejimini
dəyişərək, ümumi əmlaka, onun ayrı-ayrı növlərinə və ya ər-arvadın hər birinin
əmlakına birgə, paylı və ya ayrıca mülkiyyət rejimi tətbiq edə bilərlər. Qeyd
olunmalıdır ki, təkcə bu müddəa ilə nikah müqaviləsinin məzmunu tamamlanmır.
6
Л.Ю.Грудцына, Как заключить брачный договор (контракт)?: Советы адвоката,
“ЮРКОМПАНИ” 2009, с. 78.;
- 7 -
Həm də ər-arvad Ailə Məcəlləsinin 38.4.-cü maddəsinə əsasən nikah
müqaviləsində bir-birinin qarşılıqlı saxlanması, bir-birinin gəlirlərində iştirak
üsulları, hər birinin ailə xərclərində iştirakı qaydası ilə bağlı hüquq və vəzifələrini,
nikah pozulduqda hər birinə düşəcək əmlakı və ər-arvadın əmlak münasibətlərinə
dair hər hansı başqa müddəanı müəyyənləşdirmək hüququna malikdirlər. Bununla
yanaşı nikah müqaviləsi əmlakın müqavilə rejimi ilə bağlı müddəaları
ümumiyyətlə nəzərdə tutmaya da bilər. Yuxarıda qeyd olunanları nəzərə alaraq
hesab edirik ki, Azərbaycan Respublikası Ailə Məcəlləsinin 8-ci fəslinin (“Ər və
arvadın mülkiyyətinin müqavilə rejimi”) “Nikah müqaviləsi” kimi adlandırılması
daha məqsədəmüvafiqdir. Bu fəsilin belə adlandırılması bilavasitə onun faktiki
məzmununa uyğunlaşdırılacaqdır.
Azərbaycan Respublikası Ailə Məcəlləsində (maddə 38.6) nikah müqaviləsinə
daxil olunması qadağan edilmiş şərtlərin siyahısı verilmişdir. Bu normaya görə
nikah müqaviləsində aşağıdakı şərtlər nəzərdə tutula bilməz:
a)
ər-arvadın hüquq və fəaliyyət qabiliyyətini məhdudlaşdıran;
b)
ər-arvadın öz hüquqlarının müdafiəsi üçün məhkəməyə müraciət etmək
hüququnu məhdudlaşdıran;
c)
uşaqlara münasibətdə hüquq və vəzifələrini, eləcə də ər-arvad arasındakı
şəxsi qeyri-əmlak münasibətlərini tənzimləyən;
d)
ehtiyacı olan və əmək qabiliyyəti olmayan ərin (arvadın) saxlanılması üçün
vəsait almaq hüququnu məhdudlaşdıran;
e)
ər-arvaddan birini çox əlverişsiz vəziyyətə salan və ailə qanunvericiliyinin
əsaslarına zidd olan;
Nikah müqaviləsi ər-arvadın mövcud olan və gələcəkdə əldə edəcəkləri
əmlaka dair bağlana bilər. Nikah müqaviləsi nikaha qədər və nikahdan sonra da
bağlana bilər. Müqavilə nikaha qədər bağlansa da, bu nikah qeydə alındığı gündən
qüvvəyə minir. Nikah müqaviləsi şəxsən bağlana bilən hüquqi əqdlərə aiddir. Yəni
nikah müqaviləsi müəyyən mülki hüquqi müqavilələr kimi etibarnamə ilə bağlana
bilməz. Xarici ölkələrdə də, nikah müqaviləsinin bağlanma qaydasına görə bu
müqavilə yazılı formada bağlanmalı və tərəflər müqaviləyə şəxsən imza
etməlidirlər.
7
Bununla yanaşı nikah müqaviləsi üçüncü şəxslərin, hətta yetkinlik
yaşına çatmayanların xeyrinə bağlana bilməz. Çünki uşaq şəxsiyyət kimi xüsusi
hüquq və azadlıqlara malikdir. Milli qanunvericiliklə bərabər belə vəziyyət
beynəlxalq aktlarda da təsbit olunub. Məsələn, İnsan hüquqlarının və əsas
azadlıqlarının müdafiəsi haqqında konvensiyada insanın azadlıq hüququ, ədalət
mühakiməsi hüququ, bərabərlik hüququ və ayrı-seçkiliyin bütün formalarının
qadağan edilməsi öz əksini tapmışdır. Qeyd etmək lazımdır ki, qanuna görə, nikah
müqaviləsində başqa qayda nəzərdə tutulmayıbsa, ər-arvadın nikah dövründə əldə
etdikləri mülkiyyət onların birgə mülkiyyətidir. Amma nikah müqaviləsində
qabaqcadan bundan fərqli məsələlər müəyyən oluna bilər. Məsələn, nikah
7
Z.Məmmədov, “Nikah müqaviləsi” məqalə 2002 // Keçid dövründə Azərbaycan Respublikasında Dövlət
və hüquq quruculuğunun aktual problemləri, 2-ci buraxılış
- 8 -
müddətində əldə olunan mülkiyyətin üçdə birinin ərin, qalan hissəsinin isə arvadın,
ya da əksinə, mülkiyyətində olması göstərilə bilər. Vəkil Qurban Məmmədov
boşanmalar zamanı məhkəmələrin qadınlarla bərabər uşaqların da hüquqlarını
pozduğunu iddia edir. “Boşanma zamanı oğlan qıza evdən istifadə hüququ
verməyə bilər. Amma uşağa evdən istifadə hüququ mütləq verilməlidir.
Məhkəmələr belə mübahisələr yaranan zaman “Uşaq hüquqları haqqında” qanunun
20-ci maddəsini tətbiq etmək əvəzinə Mülki Məcəllənin 228-ci maddəsini tətbiq
edir. 20-ci maddədə nəzərdə tutulub ki, uşaq doğulduğu yerdə başqa ailə üzvləri ilə
birgə qaydada istifadə hüququna malikdir. Məhkəmələr “yaşayış yeri” ilə “istifadə
hüququ” anlayışlarını qarışdırır. Məhkəmələr uşaqların istifadə hüququnu nəzərə
almır. Deyirlər ki, uşaq anası ilə olduğu üçün onunla yaşamalıdır”, -deyə vəkil
bildirib.
Azərbaycanda nikah üçün ərizə verənlərin hamısına nikah müqaviləsi
bağlanması təklif olunur. Sadəcə olaraq ölkəmizdə mental dəyərlər tərəflərin nikah
müqaviləsi bağlamasına mane olur. Azərbaycanda müəyyən hüquqşünas alimlər
mentalitetimizin qüsurlu olduğunu deyirlər və nikah müqaviləsinin icbariləşdiril-
məsinin tərəfdarıdırlar. Onların fikrincə, nikah müqaviləsinin bağlanması
ənənəsinin yaradılması üçün qanunvericilikdə dəyişiklik olmalıdır. Səbəbi bununla
izah edirlər ki, qanunun müddəasının könüllü xarakter daşıması onun formal olaraq
qalmasına rəvac verəcək. Hesab edirik ki, nikah müqaviləsinin məcburi bağlanması
yolverilməzdir. Çünki, qanunvericilik şəxsin müqavilə azadlığını nəzərdə tutub.
Belə bir hal müəyyən olunarsa, müqavilə etibarsız sayılır. Bununla yanaşı nikahın
bağlanmasının özündə də məcburiyyət müəyyən olunsa, nikah etibarsız
sayılmalıdır.
Ailə Məcəlləsinin 39.3-cü maddəsinə əsasən nikah müqaviləsi yazılı formada
bağlanır və notariat qaydada təsdiq olunur. Nikah müqaviləsi nikahın
bağlanmasının dövlət qeydiyyatına qədər, eləcə də nikah dövründə istənilən vaxtda
bağlana bilər. (Ailə Məcəlləsinin 39.1-ci maddəsi) Buna uyğun olaraq müqavilənin
qüvvəyə minmə vaxtı müəyyən edilir. Nikah müqaviləsinin qüvvəyə minməsi
dedikdə müqavilə ilə nəzərdə tutulan ər-arvadın əmlak hüquq və vəzifələrinin
yaranması başa düşülməlidir. Məsələn, nikah müqaviləsində qüvvəyə minmə tarixi
kimi 20 noyabr 2010-cu il göstərilib. Məhz bu tarixdən etibarən ər-arvadın əldə
etdikləri gəlirlər onların hər birinin şəxsi əmlakına çevrilir və onlar qazandıqları
vəsaitlərin mülkiyyətçisi olurlar. Lakin 20 noyabr 2010-cu il tarixdən əvvəl isə ər-
arvadın gəlirləri onların birgə mülkiyyəti hesab olunurdu. Ailə Məcəlləsinin
39.2-ci maddəsinə görə nikahın bağlanmasının dövlət qeydiyyatına qədər
bağlanmış nikah müqaviləsi nikahın bağlanmasının dövlət qeydiyyatına alındığı
gündən qüvvəyə minir. Bu o deməkdir ki, Qeydiyyat şöbəsində nikah qeydə
alınana kimi nikah müqaviləsi əsasında tərəflərin heç bir hüquq və vəzifələri
yaranmır. Əgər tərəflər nikah bağlamaqdan imtina edərlərsə, nikahdan qabaq
bağlanmış nikah müqaviləsi ləğv edilir. Beləliklə nikahın bağlanmasının dövlət
qeydiyyatına qədər bağlanmış nikah müqaviləsini müqavilənin qüvvəyə minməsini
təxirə salmaq şərti ilə bağlanmış müqavilə hesab etmək olar.
- 9 -
Aparılmış tədqiqatlar nəticəsində aşağıdakı elmi nəticələrə gəlinmişdir:
- Əvvəllər mülki hüququn sahəsi olan ailə hüququ mütərəqqi haldır ki, hazırda
müstəqil hüquq sahəsinə çevrilmişdir.
- Xarici ölkələrin praktikası ilə müqayisədə ər-arvad arasında mövcud olan
əmlak münasibətlərindən başqa hər hansı bir başqa ailə münasibətlərinin nikah
müqaviləsinin predmeti kimi çıxış edə bilməsi Respublikamızın qanunvericiliyinə
uyğun deyil.
- Məqalədə qeyd olunanları nəzərə alaraq hesab edirik ki, Azərbaycan
Respublikası Ailə Məcəlləsinin 8-ci fəslinin (“Ər və arvadın mülkiyyətinin
müqavilə
rejimi”)
“Nikah
müqaviləsi”
kimi
adlandırılması
daha
məqsədəmüvafiqdir. Bu fəsilin belə adlandırılması bilavasitə onun faktiki
məzmununa uyğunlaşdırılacaqdır.
- Nikah müqaviləsinin icbariləşdirilməsi mülki hüquq prinsipinə və
Azərbaycan reallığına uyğun olmadığı üçün məqsədəuyğun deyil.
İstifadə edilmiş ədəbiyyat siyahısı:
1. Azərbaycan Respublikasının Ailə Məcəlləsi; Qanun - 2009;
2. Məhəbbət Dəmirçiyeva. “Azərbaycan Respublikasının Ailə hüququ” dərslik,
Qanun-2008;
3. Z.Məmmədov, “Nikah müqaviləsi” məqalə 2002 // Keçid dövründə Azərbaycan
Respublikasında Dövlət və hüquq quruculuğunun aktual problemləri, 2-ci buraxılış
4. B. Əsədov, V. Mirkamal, Ə. Hacıbəyli, İ. Əliyev, R. Hacılı, K. Abbasov “Ailə
Məcəlləsinin yozumu”, “QAPP-POLİQRAF”, 2005;
5. Под ред. П. В. Алексия, И. В. Петрова, А. Н. Кузбагарова “Семейное
право” : учебник для вузов; Издательское объединение "ЮНИТИ" 2009;
6. Любовь Герасимова, “Семейное право : конспект лекций” “Юрайт
Издательство” 2009;
7. Л.Ю.Грудцына, Как заключить брачный договор (контракт)?: Советы
адвоката, “ЮРКОМПАНИ” 2009;
8. А.М.Нечаева, «Семейное право актуальные проблемы теории и практики»
“Юрайт-издат” 2007;
9. В.Р.Дворецкий, “Все о брачном договоре” “ГроссМедиа” 2008;
- 10 -
“Nikah müqaviləsi anlayışı, onun məzmunu və
bağlanma qaydası”
Annotasiya
İ.O.Quliyev,
Z.Z.Xəlilov
Artıq 10 ildir ki, nikah kontraktı Azərbaycanda hüquqi reallığa çevrilərək
nikah müqaviləsi adı ilə ailə qanunvericiliyinə daxil edilmişdir. Nikah müqaviləsi
ingilis dilindəki
"marriage contract" sözündən götürülərək anlayışın azərbaycan
dilində olan analoqudur. Nikah müqaviləsinin anlayışı ailə qanunvericiliyimizin
38.1-ci maddəsində öz əksini tapıb: “Nikah müqaviləsi nikaha daxil olan şəxslər
arasında bağlanan, nikah dövründə və (və ya) nikah pozulduqda ər-arvadın əmlak
hüquqlarını və vəzifələrini müəyyən edən sazişdir.” Məqalədə nikah müqaviləsinin
hüquq institutu kimi nəzəri əsasları, müasir ailə hüquq nəzəriyyəsində nikah
müqaviləsinin rolu, müxtəlif ölkələrin ailə qanunvericiliyində nikah müqaviləsinin
müqayisəli cəhətləri, nikah müqaviləsi ilə bağlı hüquqşünas alimlərin fikirlərinin
təhlili və milli ailə qanunvericiliyimizin izahı dolğun şəkildə şərh edilmişdir.
«Понятие, содержание и заключение брачного
договора»
Аннотация
Кулиев И.О., Халилов З.З.
Уже 10 лет, как брачный контракт стал правовой реальностью в
Азербайджане, получив в законодательстве название брачного договора, что,
впрочем, является дословным переводом английского "marriage contract" и
азербайджанским аналогом этого понятия. Согласно ст. 38.1 Семейного
кодекса Азербайджанской Республики брачным договором признается
соглашение лиц, вступающих в брак, или соглашение супругов,
определяющее их имущественные права и обязанности в браке и (или) в
случае его расторжения. В статье полностью отражены правовые основы
брачного договора как института права, роль брачного договора в
современной семейно-правовой теории, сравнительные черты брачного
договора в семейном праве различных стран, анализ мнений учёных-юристов
относительно брачного договора и комментарии нашего национального
семейного законодательства.
- 11 -
“The conception of marriage contract, its content
and the rule of conclusion of the marriage contract”
Annotation
İ.O. Kuliyev, Z.Z
.
Khalilov
The marriage contract has become a reality for more than 10 years and has
been included on the family laws (legislation) of Azerbaijan. The following is the
quotation from the family laws (legislation) (issue 38.1) “The marriage contract is
a contract which is concluded between the marrying sides and defines the rights
and duties of both sides throughout the marriage and (or) in the case of divorce”.
The following aspects have thoroughly explained in the article: theoretical bases of
the marriage contract, the role of the marriage contract in the modern family laws
theory, the comparative points of the marriage contract in the family laws
(legislation) of different countries, the analyses of the opinions of the scientist-
lawyers on the marriage contract and the explanation of our national family laws
(legislation).
Dostları ilə paylaş: |