UNIVERSITETI I TIRANËS
FAKULTETI I DREJTËSISË
DEPARTAMENTI I SË DREJTËS CIVILE
ELEMENTË TË SË DREJTËS SË AUTORIT NË
MJEDISIN DIGJITAL
DISERTACION PËR MBROJTJEN E GRADËS SHKENCORE
“DOKTOR”
Punoi
Udhëheqës
OLTION SPIRO
Prof. KUDRET ÇELA
Shtator 2016
ii
iii
MIRËNJOHJE
Ky punim është fryt i një pune shumëvjeçare të filluar në Francë, pranë Fakultetit të Drejtëisë
të Universitetit të Limoges dhe i vijuar dhe përfunduar pranë Fakultetit të Drejtësisë të
Universitetit të Tiranës. Rrjedhimisht nëpërmjet këtyre rreshtave, dua të shpreh mirënjohjen
për kolegët dhe pedagogët e mi pranë Fakultetit të Drejtësisë në Limoges, të cilët më
orientuan drejt kësaj teme si dhe më ndihmuan në përgatitjen fillestare të saj, pavarësisht se
tema e përzgjedhur ishte relativisht e re.
Ky punim nuk do të kishte marrë formën e tij përfundimtare dhe do të vuante disa mangësi të
dëmshme pa vërejtjet dhe sugjerimet e Prof. Kudret Çelës, drejtues shkencor të këtij punimi.
Pa përvojën e tij shkencore disa vjeçare dhe pa ndihmën e tij të pakursyer, ky punim do të
kishte mbetur në kalendat greke. Gjej këtu rastin ta falenderoj përzemërsisht.
Gjithashtu falenderoj Prof. Dr. Zhaklina Peto, për ndihmën që më ka dhënë dhe vlerësimin që
ka patur tërë këto vite, duke më përkrahur pakursim si në fushën e mësimdhënies ashtu dhe në
fushën e kërkimit shkencor në lëmin e të drejtës së autorit. Ka qenë privilegj të jem një
bashkëpunëtor i saj, sado modest. Shpresoj që këtë privilegj ta kem dhe në të ardhmen.
Falenderoj ish Dekanin e Fakultetit të Drejtësisë, Prof. Altin Sheganin, i cili më ka ndihmuar
dhe vlerësuar gjatë viteve të Shkollës Doktorale. I jam shumë mirënjohës.
Dëshiroj të falenderoj stafin e Fakultetit të Drejtësisë dhe të Shkollës Doktorale. Ndihma e
tyre, edhe pse ndonjëherë e padukshme, kërkon nga ne më shumë mirënjohje dhe respekt për
punën e tyre të palodhur.
Të fundit, por më të rëndësishmit, dëshiroj të falenderoj bashkëudhëtaren e jetës, e cila ka
treguar shumë durim dhe dashuri tërë këto vite përgatitjeje të këtij punimi, pavarësisht
vështirësive. Si dhe falenderoj motrën dhe prindërit e mi, në mënyrë të veçantë babain tim, të
cilit ky punim i dedikohet, pa përkrahjen dhe dashurinë të cilëve, ky punim nuk do të ishte.
iv
LISTA E SHKURTIMEVE
CJEU – Gjykata Evropiane e Drejtësisë
C.Cass. – Gjykata franceze e Kasacionit
Gj.L. – Gjykata e Lartë
US S.C. – Gjykata Supreme e Shteteve të Bashkuara
D. – Direktivë
Gj.Rr.Gj. – Gjykata e Rrethit Gjyqësor
P2P – Peer 2 Peer (shih përkufizimin)
KP – Kodi Penal
KC – Kodi Civil
KPC – Kodi i Procedurës Civile
DMCA – Digital Millenium Copyright Act
DDA – Drejtoria për të Drejtën e Autorit
ZSHDA – Zyra Shqiptare të Drejtës së Autorit
KKDA – Këshilli Kombëtar i të Drejtës së Autorit
AAK (ose AKD) – Agjencitë e Administrimit Kolektiv (Agjencitë Kolektive të të Drejtave)
ISP – Internet Service Provider
VKM – Vendim i Këshillit të Ministrave
v
METODAT SHKENCORE
Metodat shkencore të përdorura në këtë punim mund të përmblidhen në tre shtylla
kryesore:
Shtylla e parë është metoda e konsultimit me literaturën. Së pari, ajo lidhet me gjetjen
e materialeve studimore hulumtuese të burimit normativ. Një punim shkencor nuk mund të
konsiderohet i tillë nëse nuk hulumton aspektet bazë të pyetjeve që ngrihen në të. Leximi i
Konventave bazë të të drejtës së autorit, tashme gati 150 vjeçare, si dhe i teksteve themelorë
të të drejtës së autorit, mundëson një vizion më të plotë të lëndës dhe në mënyrë të veçantë të
temës që do të trajtohet. Pavarësisht risisë të pakontestueshme të lëndës, e drejta e autorit ka
qenë një risi për kohën, jo vetëm si e drejtë por edhe për shkak të fushës që mbulonte. Një e
drejtë e mësuar të merret me risi, nuk ka sesi t’i mbyllë derën risive të tjera në kohë. Së dyti,
pasi është gjetur ky material, është e pashmangshme shtrimi i pyetjes së çfarë është bërë më
tej në kohë, çfarë ndryshimesh dhe çfarë risish ka njohur e drejta për shkak të zhvillimeve
teknologjike. Në këtë kuptim, përveç konsultimit të burimit normativ, ka qenë e nevojshme
konsultimi me burimet normative të mëtejme. Direktivat evropiane, ligjet evropiane dhe
amerikane mbi të drejtën e autorit, ashtu si dhe ligjet shqiptarë ndër vite, na bëjnë të kemi një
pamje shumë të qartë të situatës normative të të drejtave të autorit. Së treti, konsultimi me
literaturën doktrinare është një proces i pashmangshëm dhe që mpreh vështrimin kritik mbi
aktet normative. Burimet doktrinare të të drejtës së autorit janë të shumta, ato që lidhen me të
drejtën e autorit në shoqërinë e informacionit po lulëzojnë këto vite. Pavarësisht se burimet
kanë qenë pak më të rralla, doktrina botërore interesohet gjithmonë e më shumë për të
drejtën e autorit në mjedisin digjital.
Shtylla e dytë është metoda krahasuese. Metoda krahasuese mundëson gjetjen e
ngjashmërive dhe ndryshimeve mes teksteve të ndryshme dhe praktikave të ndryshme. Metoda
krahasimore mbart një rëndësi shumë të madhe për shkak se e drejta e autorit në Shqipëri
është një lëndë mjaft e re, më doktrinë të pakët dhe me një jurisprudencë në hapat e saj të
parë. Rrjedhimisht edhe e drejta e autorit në mjedisin digjital vuan nga këto mangësi. Në këtë
kuptim, krahasimi me të drejtën dhe praktikën e jashtme kryesisht evropiane dhe amerikane,
për të kuptuar sesi mund të zhvillohet më tej kjo e drejtë në Shqipëri.
Dostları ilə paylaş: |