Vinnuhópur um fullorðinsfræðslu

Menntamál á Skagaströnd

Starfshópur um menntamál var skipaður af hreppsnefnd Höfðahrepps þann 20. nóvember 2002. Hópinn skipa:

• 
  Jensína Lýðsdóttir
  
• 
  Birna Sveinsdóttir
  
• 
  Bryndís Björk Guðjónsdóttir
  

Hlutverk hans var að komast að niðurstöðu um hvort, hvernig og hvar koma eigi á fót aðstöðu fyrir framhaldsmenntun á Skagaströnd. Var honum gert að skila niðurstöðu til hreppsnefndar fyrir 1. febrúar 2003.

Tillaga

Lagt er til að komið verði upp aðstöðu til að stunda fjarnám á Skagaströnd.

Tilgangur

Tilgangur starfseminnar væri fyrst og fremst sá að hvetja íbúa Skagastrandar til náms og athafna. Jafnframt að bæta þjónustu við íbúana, jafna möguleika til náms, stuðla að uppbyggingu samfélagsins og draga úr fólksfækkun.
Að mati vinnuhópsins hefur framhaldsmenntun veruleg áhrif á búsetu fólks. Þegar aldursskipting á Skagaströnd er borin saman við aldursskiptingu í Austur Húnavatnssýslu kemur í ljós að hærra hlutfall af ungu fólki býr á Skagastönd¹. Samkvæmt skýringarmyndum um aldursgreiningu í Austur Húnavatnssýslu er sérstaða Skagastrandar sú að minni skortur er á ungu fólki miðað við önnur byggðalög í sýslunni. Fólk undir fertugu er fjölmennt þó skortur sé á fólki frá 30-34 ára eins og víðast hvar á Norðurlandi vestra. Þetta hlutfall ætti að vera hvatning fyrir sveitarstjórn Höfðahrepps til að auka þjónustu við ungt fólk og leitast þannig við að halda í eða bæta við hlut ungs fólks í samfélaginu .

Í bókinni Byggðir og búseta² stendur m.a. “Menntun kann að vera tvíbent byggðastefna fyrir smærri byggðalög, líkt og samgöngubætur, ef nær öruggt er að fólk sem menntast flytur burt. Hins vegar er þó ekki allt sem sýnist að þessu leyti. Hagsmunir einstaklinganna sjálfra skipta vitanlega mestu þegar byggðastefna er mótuð. Sú stefnumörkun sem eykur tekjumöguleika fólks, jafnvel þótt það þurfi að flytja sig um set til þess að njóta tekjuaukningarinnar, er mun betri en sú sem dæmir fólk til fátæktar kyrrt á sínum stað. Það ætti að vera metnaðarmál fyrir stjórnvöld að fjárhagsleg aðstaða og aðgangur til menntunar sé hinn sami, óháð búsetu.” Þetta tekur hópurinn heilshugar undir og telur að það að hvetja íbúana til menntunar feli í sér mun fleiri tækifæri fyrir samfélagið heldur en ógnanir.

Rekstrarform

Lagt er til að stofnunin verði rekin í tilraunaskyni í 2 til 3 ár. Í viðræðum við Önnu Kristínu forstöðumann farskóla Norðurlands vestra kom fram að hún teldi auðveldara að leita eftir utanaðkomandi fjármagni ef um tilraunaverkefni væri að ræða.

Hópurinn telur nauðsynlegt að ráðinn verði starfsmaður³ að stofnuninni. Starfsmaðurinn þyrfti að hafa menntun á háskólastigi t.d. kennaramenntaður aðili. Hlutverk hans yrði m.a. að:

• 
  móta stofnunina
  
• 
  annast kynninu til íbúa
  
• 
  aðstoða nemendur
  
• 
  skipulagning sérverkefna
  
• 
  umsjón með starfsaðstöðu
  

Höfðahreppur reki aðstöðuna og beri fjárhagslega ábyrgð á rekstrinum. Farskóli Norðurlands vestra er símenntunarmiðstöð fyrir Norðurland vestra styrkt af ríkissjóði til þess m.a. að sinna fjarnámi á svæðinu. Hópurinn leggur því mikla áherslu á að haft verði náið samstarf við farskólann enda skarast hlutverk hans við stofnunina. Hann telur möguleika á að fá utanaðkomandi fjármagn til rekstrarnis m.a. í samráði við farskólann.

Húsnæði og aðstaða

Húsnæði sem hentað gæti undir starfsemina hefur verið kannað lítillega. Það er mat hópsins að staðsetning aðstöðunnar skipti töluverðu máli, húsnæðið þurfi að gefa möguleika á að notalegu andrúmslofti og þurfi að hafa a.m.k. tvö stór herbergi.

Kjallari Bogabrautar 10 var skoðaður, fram hafa komið hugmyndir um gamla kaupfélagshúsið, gamla skólann, heilsugæslustöðina (ef ráðist verður í byggingu nýrrar) efstu hæð Bogabrautar 9 og eina af stærri íbúðum Höfðahrepps.
Talið er skynsamlegt að gera ráð fyrir fjórum til átta starfstöðvum við tölvur til að byrja með og nægjanlegt rými sé fyrir átta til tólf manna fjarfundi.

Lágmarks aðstaða:

• 
  rúmgott herbergi fyrir fjarfundabúnað
  
• 
  rúmgott herbergi fyrir tölvu- og vinnuaðstöðu
  
• 
  starfsaðstaða fyrir umsjónarmann
  
• 
  kaffiaðstaða
  
• 
  salerni
  

Búnaður:

• 
  fjarfundabúnaður
  
• 
  stólar með litlu áföstu borði
  
• 
  tölvur og búnaður
  
• 
  skrifborð
  
• 
  stólar
  
• 
  búnaður fyrir umsjónarmann
  
• 
  búnaður í kaffiaðstöðu
  

Greinargerð

Haldnir voru fimm fundir⁴:

27. 
    nóvember 2002 á skrifstofu Höfðahrepps
    

3. desember 2002 á skrifstofu Höfðahrepps

23. janúar 2003 á skrifstofu Höfðahrepps

3. febrúar 2003 að Hólabraut 28 á Skagaströnd

17. febrúar 2003 að Hólabraut 28 á Skagaströnd

og haft samband við eftirtalda aðila:

Farskóla Norðurlands vestra / Símenntunarmiðstöð Norðurlands vestra

Fundað var með Önnu Kristínu forstöðumanni farskólans. Fram kom mikill áhugi hjá henni fyrir verkefninu. Farskólinn er styrktur af menntamálaráðuneytinu og honum ætlað að sinna öllu Norðurlandi vestra. Rætt var um hvort farskólinn mundi koma að rekstri starfseminnar. Viðbrögð voru jákvæð en ljóst er að farskólinn hefur ekki úr mikilu fjármagni að spila. Fram kom að farskólinn gæti aðstoðað starfsemina t.d. við leit að fjármagni til sérverkefna, leit að upplýsingum o.fl.

Menntamálaráðuneytið

Rætt var við Karl Kristjánsson, deildarstjóra framhalds- og fullorðinsfræðslu. Spurt var um stefnu stjórnvalda varðandi aðgengi íbúa landsbyggðarinnar að framhaldsmenntun. Karl vísaði til símenntunarmiðstöðvanna (Farskóli Norðurlands vestra), sem ríkið styrkir. Að öðru leyti styrkir ríkið ekki fjarnám. Fram kom hjá Karli að hann teldi þörf á slíkri starfsemi en því miður væri ekki nægjanlegu fjármagni veitt til menntamálaráðuneytisins til þess að sinna málinu betur, þrátt fyrir að það sé óumdeilt að framhaldsmenntun sé verkefni ríkissjóðs og að réttur allra til að stunda nám sé skýr í lögunum.

Björg Ágústsdóttir bæjarstjóri Grundarfjarðar

Á Grundarfirði er rekin aðstaða til fjarnáms. Þar er lögð megináhersla á aldurinn 16 til 20 ára sem stunda nám í VMA. Nú eru 13 unglingar í námi við stofnunina. Umsjónarmaður sem er hagfræðingur að mennt sinnir stofnuninni, hann er styrktur af ríkinu að hluta.

Húsnæði er rúmgott, aðstaða fyrir fjarfundabúnað, tölvur, kaffiaðstöðu og salerni. Björg taldi starfsemina vera mikla lyftistöng fyrir bæinn.

Aðstaðan var styrkt fyrstu tvö árin af menntamálaráðuneytinu en nú hafa styrkirnir verið felldir niður.
Háskólinn á Akureyri, Háskóli Íslands, Háskólinn í Reykjavík, VMA og Fjölbrautarskóli Norðurlands vestra

Eftir að hafa rætt við forstöðumenn fjarnáms í viðkomandi skólum komst hópurinn að þeirri niðurstöðu að VMA og Háskólinn á Akureyri væru lengst komnir í þróun fjarnáms.

Ljóst er að fjarnám færist í vöxt og fjöldi skóla sem bjóða uppá slíka möguleika eykst stöðugt. Allmiklir möguleikar eru á fjarnámi á framhalds- og háskólastigi ásamt námskeiðum.

Fram kom hjá öllum skólunum að mikilvægt væri að starfsmaður sinni aðstöðu sem þessari.

Sigurður Sigurðarson atvinnuráðgjafi hjá INVEST

Sigurður var fenginn til að lesa skýrsluna og gera athugasemdir.

Guðjón Ólafsson forstöðumaður Skólaþjónustu Austur Húnvetninga

Guðjón var fenginn til að lesa skýrsluna og gera athugasemdir.

Könnun meðal íbúa

Hópurinn velti fyrir sér hvort rétt væri að gera skoðanakönnun meðal íbúa en komst að þeirri niðurstöðu að slík könnun gæfi frekar mynd af stöðunni í dag heldur en hvernig staðan yrði ef vel tækist til við rekstur starfseminnar.

Skagaströnd 17. febrúar 2003

Birna Sveinsdóttir

Bryndís Björk Guðjónsdóttir

Jensína Lýðsdóttir

Höfðahreppur

Starfshópur um menntamál
Fyrsti fundur starfshóps um menntamál var haldinn 27. nóvember 2002 kl. 17:00 á skrifstofu Höfðahrepps. Mætt voru: Bryndís Björk Guðjónsdóttir, Birna Sveinsdóttir, Jensína Lýðsdóttir og Magnús B. Jónsson sveitarstjóri.
Magnús skýrði hlutverk vinnuhópsins sem er í stuttu máli að komast að niðurstöðu um hvort, hvernig og hvar eigi að koma á fót aðstöðu fyrir framhaldsmenntun fullorðinna á Skagaströnd. Nefndin á að skila niðurstöðu sinni til hreppsnefndar fyrir 1. febrúar 2003.
Bryndís Björk Guðjónsdóttir var kosin formaður.
Umræður urðu um hvernig best væri að haga vinnu hópsins. Samþykkt að leita upplýsinga hjá skólum sem bjóða uppá fjarnám, Farskóla Norðurlands vestra, menntamálaráðuneytinu og í Grundarfirði þar sem aðstaða til framhaldsmenntunar hefur verið í boði um nokkurn tíma.
Samþykkt að halda næsta fund þann 3. desember n.k. kl. 17:00 á skrifstofu Höfðahrepps.
Fleira ekki gert, fundi slitið kl. 18:00

Höfðahreppur

Starfshópur um menntamál
Annar fundur starfshóps um menntamál var haldinn 3. desember 2002 kl. 17:00 á skrifstofu Höfðahrepps. Mætt voru: Bryndís Björk Guðjónsdóttir, Birna Sveinsdóttir og Jensína Lýðsdóttir.
Á fundinum fóru nefndarmenn yfir upplýsingar sem aflað hefur verið frá síðasta fundi. Jafnframt var rætt um hugsanlegt húsnæði, rekstrarform og rekstarkostnað.
Samþykkt að óska eftir fundi með Önnu Kristínu forstöðumanni símenntunarmiðstövar Norðurlands vestra.
Fleira ekki gert, fundi slitið kl. 18:00


Höfðahreppur

Starfshópur um menntamál
Þriðji fundur starfshóps um menntamál var haldinn 23. janúar 2003 kl. 10:00 á skrifstofu Höfðahrepps. Mætt voru: Bryndís Björk Guðjónsdóttir, Birna Sveinsdóttir, Magnús B. Jónsson og Anna Kristín forstöðumanns.
Rætt var um hvernig rekstrarumhverfi og skipulag mögulegrar aðstöðu væri best fyrir komið. Jafnframt var rætt um ýmiss verkefni sem hægt væri að tengja við starfsemina, möguleika á fjármagni til starfseminnar o.fl.
Í lok fundarins fóru Bryndís, Magnús og Birna og skoðuðu kjallara hússins að Bogabraut 10 með það fyrir augum hvort húsnæðið gæti nýst undir slíka starfsemi.
Fleira ekki gert, fundi slitið kl. 12:00
Höfðahreppur

Starfshópur um menntamál
Fjórði fundur starfshóps um menntamál var haldinn 3. febrúar 2003 kl. 20:30 að Hólabraut 28 á Skagaströnd. Mætt voru: Bryndís Björk Guðjónsdóttir, Birna Sveinsdóttir og Jensína Lýðsdóttir.

Fundurinn var vinnufundur þar sem hópurinn vann að tillögugerð til sveitarstjórnar.

Fleira ekki gert, fundi slitið kl. 10:30

Höfðahreppur

Starfshópur um menntamál
Fimmti fundur vinnuhóps um fullorðinsfræðslu var haldinn 17. febrúar 2003 kl. 20:30 að Hólabraut 28 á Skagaströnd. Mættar voru: Bryndís Björk Guðjónsdóttir, Birna Sveinsdóttir og Jensína Lýðsdóttir.

Fundurinn var vinnufundur þar sem hópurinn vann að tillögugerð til sveitarstjórnar.

Fleira ekki gert, fundi slitið kl. 10:30

1 Sjá súlurit á bls. 5

2 Gefin út af Hagfræðistofnun HÍ fyrir skömmu

3 Innan hópsins komu upp hugmyndir um að hægt væri að fela sama aðila umsjón með félagsstarfi unglinga.

4 Fundargerðir fylgja á bls. 6 - 10