Mərkəzi Bank və İqtisadiyyat – N2, 2014
4
edilmədiyindən, Houthakker və Magee “tapmacası” kimi qeyd olunur. Sonrakı
aparılan tədqiqatların böyük əksəriyyətində idxal və ixracın tələbə olan yüksək
elastikliyi təsdiq edilmişdir.
Real məzənnə dəyişikliklərinin ticarət balansına təsiri də müasir iqtisadi
ədəbiyyatda aktual mövzulardandır. Bu sahədə iqtisadçıların əldə etdiyi nəticələri
iki qrupa bölmək olar. Bir qrup tədqiqatçılar real məzənnənin ucuzlaşmasının ticarət
balansını yaxşılaşdırdığını sübut etməyə çalışsalar da, digər qrup iqtisadçılar real
məzənnənin ticarət balansının determinantı olmadığı fikrindədirlər.
Buna misal olaraq, Rose (1990, 1991), Rose və Ostri (1992) məzənnənin
devalvasiyasının real olaraq ticarət balansına təsir etmədiyini müəyyən etmişlər.
Marquez və MkNeilli (1988), Reinhart (1995) bunun əksinə olaraq, devalvasiyanın
ticarət balansını yaxşılaşdırdığını aşkarlamışlar. Öz tədqiqatlarında Helkie və
Hooper (1987), Kruqman və Baldvin (1987) Amerika Birləşmiş Ştatlarının (ABŞ)
ticarət kəsirinin əsas səbəblərindən biri kimi dolların möhkəmlənməsini
göstərmişdilər. Digər qrup alimlər isə, Bersten və Kline (1985), Mundell (1987)
ABŞ-da sözügedən kəsirin real məzənnə dəyişikliklərindən deyil, ölkədə yığım və
investisiya arasında olan fərqdən yarandığını qeyd etmişlər. Sukar (1998) ABŞ
iqtisadiyyatında real effektiv məzənnə ilə ixrac arasında olan qısamüddətli və
uzunmüddətli əlaqələri araşdırmışdır. O, dəyişənlər arasında kointeqrasiya əlaqələri
və statistik əhəmiyyətli nəticələr almış və göstərmişdir ki, ixracın xarici tələbə
elastikliyi müsbət, real effektiv məzənnəyə isə mənfidir. Həmçinin, real effektiv
məzənnə ilə ixrac səviyyəsi arasında əlaqə qısamüddətli dövrdə statistik əhəmiyyətli
deyil.
Nəzəri olaraq milli valyutanın ucuzlaşması ixracı ucuzlaşdırır, idxalı isə
bahalaşdırır. Qısa müddətdə bahalaşan idxal “qiymət effekti” ilə ticarət balansına
mənfi təsir edir. Lakin, uzunmüddətli dövrdə artan ixracın “kəmiyyət effekti” ticarət
balansını yaxşılaşdırır. Qeyd edilən iqtisadi fenomen Marşalın tələbin qiymət
elastikliyi nəzəriyyəsinin genişləndirilmiş variantı olduğundan, Marşal-Lerner şərti
adlanır. Ticarət balansının qısa müddətdə pisləşməsi və sonra uzunmüddətli dövrdə
yaxşılaşması J-ə oxşar xətt olduğundan, iqtisadi ədəbiyyatda J-əyrisi adlanır. J-
əyrisinə bənzər nəticəni Magee 1973-cü ildə öz tədqiqatında aşkarlamış və Dornbuş
və Kruqman (1976) öz məqalələrində Marşal-Lerner şərtinin ödəndiyini qeyd
etmişlər. Cəmilov (2011) Azərbaycanın əsas ticarət tərəfdaşı olan Avropa ilə
ümumi və qeyri-neft ticarət balansını tədqiq etmiş və hər iki model üçün J-əyrisinə
bənzər dinamika aşkarlamışdır. Onun nəticələrinə görə, yerli məzənnənin
ucuzlaşması qısamüddətli dövrdə ticarət balansına mənfi təsir etsə də, uzunmüddətli
Mərkəzi Bank və İqtisadiyyat – N2, 2014
5
dövrdə ixracın artımı hesabına balans yaxşılaşır. Rodrik (2009) real məzənnənin
bahalaşmasının iqtisadi artımı stimullaşdırdığını müəyyən etmişdir. O, bu
stimullaşdırıcı təsirin ticarət balansı kanalı ilə baş verdiyini vurğulamışdır.
Eiçenqrin və Qupta (2013) qeyd edirlər ki, real məzənnənin dəyişməsi əmtəə və
xidmət sektorunda ənənəvi xidmətlərin ixracını daha çox sürətləndirir.
Senhadji və Monteneqro (1999) bir şox inkişaf etməkdə olan və qabaqcıl ölkələr
üçün ixracın tələb və qiymət elastikliyini müvafiq olaraq 1.5 və -1
qiymətləndirmişlər. Onlar müxtəlif regionlarda fərqli elastikliklərin (Afrikada aşağı,
Asiyada isə yuxarı) olduğunu aşkarlamışlar. Kee, Nikita və Olarreaqa (2008) əksər
ölkələr üçün idxal tələbinin qiymətə elastikliyini və ticarət baryeri indeksini
hesablamışlar. Bu tədqiqat işi qiymətləndirmələrin həcminə görə ən böyük
tədqiqatlardan biri hesab olunur. Onlar 117 ölkə üçün 4900 məhsul növü üzrə
təxminən 370000 tənlik qiymətləndiriblər. Bütün ölkələr və məhsullar üzrə orta
elastiklik -3.12 olmuşdur. Stefen Tokarik (2010) bir çox aşağı, orta və yuxarı gəlirli
ölkələr üçün idxalın tələb və ixracın təklif elastikliyini hesablamışdır. Metodologiya
kimi, beynəlxalq ticarət nəzəriyyəsindən standart ümumi tarazlıq modelindən
istifadə edilmişdir. Şərqi Asiya ölkələri üçün Villem Thorbeke (2010) idxalın
valyuta məzənnəsinə nəzərən elastikliyinə baxmışdır. Bu region ölkələrinin bir
çoxunda idxal olunan məhsullar təkrar ixrac üçün istehsal prosesinin bir hissəsini
təşkil edir. Məzənnənin bahalaşması ixracı azaldır, bu isə aralıq məhsulların
idxalına tələbin azalmasını şərtləndirir. Bu meyilliyi aradan qaldırmaq üçün idxal
olunan istehlak mallarının elastikliyinə baxılmışdır. Çünki, bu məhsullar birbaşa
olaraq daxili bazar üçün nəzərdə tutulmuşdur. Bir neçə spesifikasiya üzrə əldə
olunmuş nəticələr məzənnəsinin bahalaşmasının və gəlirin artımının istehlak
mallarının idxalını əhəmiyyətli artırdığını müəyyən etmişdir.
Ə
mtəələrin təsnifatı
Tədqiqat işində 2001-2012-ci illər üçün Azərbaycanın ixrac sektorunda 37, idxal
sektorunda isə 29 ölkə ilə əməliyyatları araşdırılmışdır. İxrac sektoru göstəriciləri
qeyri-neft sektorunun ixracını əks etdirir. İdxal və ixrac sektorunda əmtəələr həm
aqreqat, həm də istehlak, aralıq və kapital əmtəələri kimi qruplaşdırılmışdır. Milli
hesablar sistemində əks olunduğu kimi, istehlak malları birbaşa olaraq son istehlaka
yönələn, aralıq məhsullar son istehlakla yanaşı, həm də sonrakı istehsalda istifadə
olunan, kapital əmtəələri isə birbaşa istehsal prosesində istifadə olunan məhsulları
əhatə edir.
Əmtəələrin bu cür qruplaşdırılması ticarət balansının qeyd etdiyimiz əmtəə qrupları
üzrə də elastikliklərinin hesablanmasına imkan verəcək.