Xunların Umumi Tarixi-Qan Lin-Çev-Tursunjan Hezim Yavuz-Uyğur-Latin-New-York-1986



Yüklə 0,96 Mb.
səhifə8/20
tarix15.03.2018
ölçüsü0,96 Mb.
#32396
1   ...   4   5   6   7   8   9   10   11   ...   20
Miladiyidin burunqi 74- yili hunlar chégigha bir nechche qétim tajawuz qildi hem qush bilen birliship uysunlargha huj’um qildi. Kéyinki yili (miladiyidin burunqi 73- yili) zor qoshun bashlap uysunlarning yerliridin cheyan we ushni tartiwélip, xelqni esir qildi hem uysun xanikisini (jyé yü melikini) sorap, «xanikini tézdin ewetip bérish» ni telep qilip, qoralliq tehdit arqiliq uysunlarning xen sulalisi bilen bolghan ittipaqdashliq munasiwitini buzmaqchi boldi. Uysun künbégi we melike ilgiri- kéyin bolup mektup sunup yardem telep qildi. Shuning bilen xen sulalisi besh yol qoshun teshkillep, uysunlar bilen birliship 200 ming kishlik zor qoshun bilen miladiyidin burunqi 71- yili kölimi zor bir qétimliq urushni qozghidi.
Etiyazning tunji éyida yol qoshun yolgha chiqti. Hunlar xen sulalisining zor qoshunlirining atlan’ghanliqini anglap, qéri- chörilirini egeshtürüp, mal- charwilirini heydep yiraqqa köchüp ketkenliktin, bu besh qoshun köp netije qazinalmidi. Liyaw shüydin ötkürchi san’ghun fen mingyü jangyédin yolgha chiqip 1200 chaqirimdin artuq yol yürüp pulixu deryasi (hazirqi ichki mongghuldiki éjina deryasi) gha yétip bardi. Aldichi san’ghun xjen zéng yünjungdin yolgha chiqip 1200 chaqirimdin artuq yol yürüp wuyüen’giche (hazirqi ichki mongghulidiki qarqun deryasining shimaliy qisimidiki qona xalxa chong xoshunining shimalida) bardi.Bariköl san’ghuni jawchunggo jyüchünedin yolgha chiqip 1800 chaqirimdin atuq yol yürüp, gherbtiki xushen’giche (hazirqi orni éniq emes) yétip bardi. Chilyen (tilen) san’ghuni tyen guangming shixédin yolgha chiqip 1600 chaqirimdin artuq yol yürüp jiji téghigha (hazirqi orni éniq emes) yétip bardi. Bars san’ghun tyen shün wuyüendin (hazirqi ichki mongghuldiki bawtu shehri) yolgha chiqip 800 chaqirimdin artuq yol yürüp, deynüwü deryasi (yüwu deryasi) ghiche yétip bardi. Hemmisi peqet nechche yüz yaki nechche mingdinla kiishni öltürdi yaki esir élip qaytip keldi.
Uysunlar shanliq ghelbige érishti. Uysun künbégi 50 ming kishlik atliq esker we xen sulalisining chérikchi bégi ordisighiche yétip bérip, tengriqutning taghisi, yenggisi, melikisi, ataqliq xanliri, kahbégisi, ming béshi, serkerdiliridin bolup 39 mingdin artuq ademni esri élip, 700 ming tuyaqtin artuq at, kala, qoy, xéchir we töge olja aldi. Hun ahaliliri we mal- charwiliridin ölgen, pitrap ketkenliri san- sanaqsiz boldi.
Bu gherbiy xen sulalisidin buyanqi xen- hun urushliri ichidiki eng axirqi bir qétimliq chong urush idi. Bu qétimqi urushni pütünley hun quldarlirining tajawuzchiliqi keltürüp chiqarghan bolup, xen sulalisi bilen uysunlarning qoshun chiqirishi bir qétimliq qayturma zerbe bérish idi. Netijide hunlar qattiq meghlup bolup ajizliship, qudilishishni téximu bek oylaydighan boldi. Shimaliy chégrimu bara- bara tinjidi[31].
Xen sulalsiining deslepki mezgilidin bashlapla xen sulalisining hökümranliq qatlimida «hun quldarlirining tajawuzigha zerbe bérish kérekmu- yok» dégen mesilini chöridigen halda urushpereslik we tinchliqperesliklerdin ibaret ikki goruhning körishi uzaq muddetkiche dawamlashti. Buning ichide wudi we jawdi dewridiki küresh eng keskin boldi. «xenname» ning aptori ben guning «hunlar heqqide qisse» de’eyni chaghdiki küresh ehwalini bayan qilishiche, her ikki terep öz pikiride ching turup, oxshashliq we perqlerni ayrip chiqqan. Tinchliqperes kungzichilar qudilishishni yaqlighan. Urushperes emeldarlar jaza yürüshi qilishni telep qilishqa. «tuz we tömür heqqide» dégen eserdimu bu ikki guruhning hunlargha jaza yürüshi qilishning payda- ziyini heqqidiki bes- munazirsi tepsiliy bayan qilighan. Kéyinkisi emeliyet ispatlidiki, miladiyidin burunqi 133- yili xen wudi urush qozghighandin bashlap miladiyidin burunqi 71- yili chong urushqiche bolghan 60 yildek waqit ichide xen sulalisi «dölet gheznisi» qurup ketken. Nopusning yérimi aziyip ketken» [32] liktek zor bedel töligen bolsimu, eng axirida hunlarning tehditini tel- töküs yoq qildi. Eger bu 50 ~ 60 yilliq tajawuzchiliqqa qarishi urush we uning ghelbisi bolmighan bolsa, xen sulalisining shimalining xatirjemliki, xelqning ishlepchiqirish we turmushning bixeterliki, millet we döletning teqdiri, fé’odalliq ijtima’iy, iqtisad medeniyitining tereqqiyatini tesewwur qilghili bolmaytti. Shunga, gherbiy xen sulalisi dewridiki hunlar bilen xenzular ottursidiki urush mahiyette fé’odalliq tüzüm bilen qulluq tüzüm ottursidiki urushning heqiqiy xaraktérini we ilghar rolini mushuningdin körüwélishqa bolidu.
Wudi dewridiki we uningdin kéynki hunlargha qarishi urushning ilghar roli hun quldarlirining xenzulargha qilghan tajawuz chiliqini chekligenlikide ipadilinip qalmay, yene oghan, dingling, shirwi, uysun we gherbiy turttiki herqaysi milletlerni hun quldarlirining qul qilishidin we ékspilatatsiye qilishidin qutuldurup (gerche bu wudining qoshun tartishtiki meqsiti bolmisimu) , ularni hunlarning qalaq quldarliq tüzümining asaritidin qutquzup, xenzularning ilghar fé’odalliq iqtisadiy medeniyiti bilen uchrashturghanliqidinmu ipadilinidu, bu eyni chaghdiki tarixiy shara’itta ilghar ehmiyetke ige idi.
3. Gherbiy xen sulalisining axirida qoghshar tengriqutning xen sulalisige el bolushi we shimal bilen ottura tüzlenglikning birlikke kélishi
Hun quldar hökümranlar gorohining gherbiy xen sulalisining shimaliy chégrisigha qilghan tajawuzlchiliqi keltürüp chiqarghan urush hun millitige éghir aqiwetlerni élip keldi, bolupmu hun xelqi uchrighan aqiwet eng éghir boldi.
Birinchidin, hunlarning ahalisi we charwa-malliri zor türkümde olja élindi we öldi. Miladiydin burunqi 127-yilidiki urushtila hunlardin üch mingdin artuq adem esirge chüshüp, milyon tuyaqtin artuq qoy kala olja élindi[33]. Miladiydin burunqi 121- we 119-yilliridiki ikki qétimliq urushta hun jengchiliridin öltürülgen we esir élin’ghanliri téximu köp bolup, 130 mingdin éship ketti[34] (qunsharxanning qowmidin esirge chüshken we öltürülgen nechche tümen adem we xen sulalisige el bolghan 40 ming adem buning sirtida). Buning bilen batur tengriqut dewridiki 300 ming oqyachi chewendazning yérimi aziyip ketti. Miladydin burunqi 71-yilidiki urushta ong qol xanning qowmidin 39 mingdin artuq adem esir élinip, 700 ming tuyaqtin artuq charwa-mal olja élindi. Qélip qalghan ahalilerdin ölgen, chéchilip ketkenliri we charwilardin ölgen, pitirap ketkenlirining heddi-hésabi yoq[35] bolup, bu hunlarni qattiq ajizlashturuwetti.
Ikkinchidin, hunlar urushta meghlup bolghandin kéyin, charwichiliqqa bab kélidighan rayonlardin chékinip chiqip (meslen, aloban xan, bayan xan qowmi, hazirqi ichki mungghuldiki xétawdin, qunsharxan qowmi hazirqi gensu ölkisidiki xéshi karidoridin chékinip chiqqan) chöllükning shimalidiki su we ot-chöp yoq rayonlargha köchüshke mejbur boldi. Buning bilen charwichiliq ishlepchiqirishigha tesir yetküzüshi teb’iy idi. Buning ichide xéshidiki chilyen (tilen) téghi, alchi téghi (hazirqi gensudiki shenden nahiyisining sherqiy jenubida) xétawning shimaldiki choghay téghidin chékinip chiqishning tesiri bir qeder zor boldi. Chünki, chilyen téghi we alchi téghi qarighaylar köp, ot-süyi mol, qishta illiq, yazda salqin bolup, charwichiliq qilishqa nahayiti bab kéletti hem hun xelqning tirikchiliki bilen bolghan munasiwiti nahayiti zor idi. Shunga, hunlar bu ikki taghdin ayrilip qalghandin kéyin:
Ayrilip qalghanda tilen téghidin,
Awumas bolup qaldi charwa-mélimiz.
Ayrilip qalghanda alchi téghidin,
Munglinip sarghaydi qiz-ayalimiz[36] .
Dep qoshaq toqushti. Choghay téghidimu ot-chöp, del-derexler qoyuq, yawayi haywanlar köp bolup, charwichiliq we owchiliqqa bab kélipla qalmastin, yene zor miqdardiki yaghach matériyalliridin herbiy ishlarda paydilinishqa (oqya yasashqa) bolatti. Bu yer batur tengriqutning arqa sep ambiri we jenubqa yürüsh qilishtiki muhim bazisi idi[37]. Hunlar choghatay téghining shimaligha chékinip ketkendin kéyin, taghning shimalidiki, sherqtin gherbkiche nechche ming chaqirim, jenubtin shimalghimu nechche ming chaqirim kélidighan chong qumluqta ot-su bolmighachqa, charwichiliq qilalmidi[38]. Bu charwichiliq ishlepchiqirishi we bayliq menbesini zor derijide cheklep qoydi. Uning üstige xen sulalisi choghay téghini ishghal qilghandin kéyin bu yerde qel’e-qorullarni qurup, turlarni sélip, tashqi sépilni yasap, esker turghuzup mudapi’e körgechke, hunlar jenubqa kélelmeydighan bolup qaldi. Shunga, «hunlardin choghay téghini qoldin bérip qoyghandin kéyin ah urmighan héchkim qalmidi»[39]. Kéyin xen sulalisi yene ghuzlarni yoqatquchi san’ghun gochang we yawayilarni tutquchi töre jawponuni sufangning sherqide turghuzup boz yer échishqa ewetip, hun küchlirining sherqqe kéngiyishining aldini alghachqa, ushlu tengriqut textte olturghandin (miladiydin burunqi 105-yili) kéyin, hunlar barghanséri gherbiy shimalgha yötkilip, sol terepte yünjung aymiqigha, ong terepte jyuchüen, dunxuang aymaqlirigha udul kélidighan bolup qaldi (eslide hunlarning sol terpi shanggu aymiqigha, ong terpi shangjün aymiqigha udul kéletti). Buning bilen charwichiliq rayonliri téximu tariyip ketti. Adem we charwilarning köplep ölüp kétishi, charwichiliq rayonlirining zor kölemde tariyishi ishlepchiqirishni chékindürüwetti, uning üstige qar apiti (miladiydin burunqi 104-, 89-, 71-yilliri) tüpeylidin miladiydin burunqi 68-yili hunlarda zor qehetchilik yüz bérip xelqning ondin alte-yettisi ölüp, ijtima’iy igilik weyran bolup, milletning mewjudluqi zor tehditke duch keldi[40].
Üchinchidin, qaram eller bölündi. Batur tengriqut dewridin buyan boysundurulghan nurghunlighan qebile we qowmilar hun quldar hökümranlar gorohining éghir bésimi we ékspilatatsiyige chidimay bes-beste isyan kötürdi. Hunlarning ajizlashqanliqidin paydilinip dinglinglar shimaldin, oghanlar, uysunlar gherbtin, sherqtin hujum qildi, sol tereptiki shirwi qebilisi jenubqa bérip xen sulalisige el boldi, gherbiy yürttiki her qaysi milletlermu birlikte hunlargha hujum qozghidi[41]. Buning bilen ghayet zor hun quldarliq hakimiyiti bir mehel bölünüsh we niza halitige chüshüp qaldi.
Tötinchidin, hun hökümranlar gorohining ichki qisimidimu bölünüsh peyda boldi. Hun yuqiri qatlam aqsöngekler gurohining ichki qisimda eslidimu hoquq talishish, bolupmu «tengriqut» luqtin ibaret bu eng aliy hökümranliq huquqini talishish yüzisidin nurghun ziddiyet yoshurun’ghan bolup, da’im dégüdek texit talishish küreshliri bolup turatti[42]. Bu chaghda hökumranliq da’irisining tariyishi, ijtima’iy ishlepchiqirishning chékinishi, qowmining ajizlishishi we qaram ellerning bölünishi bilen yoqiri qatlam hökümranlar guruhi ichidiki ziddiyet téximu keskinlishishke bashlidi. Miladiyidin burunqi 60-yilidin bashlap tengriqutluq textige warsliq qilish mesilisi tüpeylidin hökümranlarning ichki qisimidiki parchilinish téximu éghirliship, miladiyidin burunqi 57-yilgha kelgende «besh tengriqutning hakimiyet talishishi» kélip chiqiip, hunlarning ichki qismi qalaymiqanliship ketti. Bu hon qowmi, jem’iyiti we hakimiyitini halaket girdabigha ittirdi. Mushundaq weziyet aldida qoghushar tengriqut tarix sehnisige chiqip, hunlarni burulush pursitige ige qildi.
Qoghushar tengriqutning esli ismi jixushan bolup, tümen tengriqutning 7-ewladi, shüruchanchu tengriqutning oghli idi. U yuqiri tebiqidiki aqsöngek a’ilisidin kélip chiqqan bolup, hunlarning eng aliy hökümranlar guruhi ichidiki shexis idi. Miladiyidin burunqi 60-yili shüruchanchu tengriqut ölgendin kéyin, tengriqutluqiqa warisliq qilish qa’idisige asasen u atisining tengriqutluq hoquqigha warisliq qilishi kérek idi. Halbuki shüruchanchu tengriqutning hoquqluq weziri xusur xan shinwiyan her qayisi jaylargha adem ewetip her qayisi uruq aqsaqallirini kéngeshke chaqirip, tengriqutning warisini meslihetliship qarar qilmaqchi bolghanda, shüruchanchu tengriqutning ayali- jüenchu alchi inisi sol qol jorchi durunchi bilen meslihetliship, uruq aqsaqallirining téxi kélip bolalmighan pursitidin paydilinip, özning ashinisi ong qol bilik xan tughtanni uyanjut tengriqut qilip tiklidi. Uyanjut tengriqut intayin yawuz tebi’etlik bolghachqa shinwiyanni öltürwétip, durunchini etiwarlap ishletti hem shüruchanchu tengriqutning perzentliri, inisi we yéqinlirini wezipisidin qaldurup, ularning ornigha özning perzentliri we inilirini qoydi. Textike warisliq qilalmighan we chetke qéqilghan jixushan amalsiz hunlarning sol teripidiki qéynatisi ujanmuning yénigha panahliq tilep kétishke mejbur boldi.
Jixushan nahayiti qabiliyetlik bolghanliqi hem tengriqut ewladi bolghanliqtin, gerche sol panahliq tilgüchi süpitide qéchip barghan bolsimu, yenila sol tereptiki hun aqsöngeklirining hörmiti we qoghdishigha érishti. Halbuki, uyanjut tengriqut zorawanliq qilip qalaymiqan adem öltürgenliktin, xelqning naraziliqi we qarshiliqini qozghidi.
Miladiyidin burunqi 58-yili sol tereptiki aqsöngekler ujanmu pursettin paydilinip jixushanni qoghushar tengriqut qilip tiklep, arqidinla sol tereptiki leshkerler bilen uyanjut tengriqutqa hujum qildi. Uyanjut tengriqut ichki jehette xeliqning neziridin qalghanliqi, tashqi jehette yardemge érshmigenliki uchun, qarshiliq körsitelmey özini ölturüwaldi, uning qowmi pütünley qoghushar tengriqutqa el boldi. Qoghushar tengriqut uyanjut tengriqutni yenggendin kéyin tengriqut ordisigha qaytip bérip, tengriqutqa biwaste qarashliq yerlerni tertipke sélip, her qaysi jaylarni muqimlashturup ishlepchiqirishni téz sür’ette eslige keltürüsh we hakimiyetni muqimlashturush uchun, bir nechche aydin kéyinla qoshunlarni qisqartip, aqsöngeklerni eslidiki yerlirige qaytishqa buyruq qildi. Lékin, bu chaghda ong qol bilik xanning yénigha qéchip barghan dorunchi ong qol bilik xan bilen birliship uyanjutning inisi batisxan boshtanni tugh tengriqut qilip tiklep, qoshun tartip qoghushar tengriqutqa hujum qildi. Qoghushar tengriqut yéngilip chékindi. Tugh tengriqut ikki oghlini tengriqut ordisini saqlashqa buyrup, sherq terepte nurghun qoshun turghuzup qoghushar tengriquttin mudapi’e kördi. Emma, tugh tengriqut iqtidarsiz bolghanliqi, pitne-pasatqa ishinip adem öltürgenliki üchün, her qaysi aqsöngekler uningdin yüz örüp, bes-bes bilen özlirini tengriqut dep atashti. Gherbte oghuz tengriqut, sherqte cheli tengriqut we üje tengriqut bash kötürüp chiqip, ular tugh tengriqut we qoghushar tengriqut qoshulup tarixta «besh tengriqutning hakimiyet talishishi» dep ataldi (miladiyidin burunqi 57-yili). Besh tengriqut qalayimqan urush qilish jeryanida yaki meghlup bolup el bolup, yaki özini oltürüwélip, eng axiri ghelibe qoghushar tengriqutqa mensup boldi. Shuning bilen qoghushar tengriqut tengriqut ordisigha yene qaytip keldi. Lékin , bu qétimqi qalayimqan urush tüpeylidin ahale zor derijide aziyip, peqet nechche tümen ademla qaldi. Bir tümendin artuq adem urushta ölüp, charwilarning ondin sekkiz-toqquzi ziyan’gha uchrap, xelq acharchiliqta qélip, bulangchiliq ewej aldi[43]. Qoghushar tengriqut intayin tes kün’ge qalghanliqtin qalaymiqanchiliqtin kéyinki éghir weziyetni ongshimaqchi boldi, emma bu chaghda oylimighan yerdin tugh tengriqutning bir newre inisi shüshün xan gherbte özini runjin tengriqut dep atidi, qoghushar tengriqutning akisi sol qol bilik xan quti’ushmu sherqte özini quti’ush tengriqut dep atidi. (miladiyidin burunqi 56-yili) aridin uzun ötmey quti’ush runjinni öltürüp, qoghushargha hujum qilip, uning qoshunlirini meghlup qilip tengriqut ordisini igilwaldi.
Qoghushar yene bir qétim qéchishqa mejbur boldi. Bundaq weziyet we ehwal aldida u xen sulalisi merkiziy hakimiyitige el bolup, xen sulalisi merkiziy hakimiytining bir tutash rehberlikini qubul qilip, xen sulalisining yardimi we qollishi bilen özining zawalliqqa yüzlen’gen hökümranliqini saqlap we eslige keltürüp, quti’ushni tinchitip hunlar rayonini birlikke keltürüp, hunlarni xeterlik weziyettin qutquzush oyigha keldi.
Hunlar batur tengriquttin bashlap 150yil jeryanida (miladiydin burunqi 209~ 56-yillar) shimalida seltenet sürüp, chong chöllükning jen – shimalidiki herqayisi milletlerge hökümranliq qilip kelgenliktin, özlirini «tengrining erke oghli» déyiship xen sulalisi hakimiyiti bilen put tépiship turghanidi. Arida qudilishish bolghan bolsimu, peqet xen sulalisi melikilirini bérip, her yili shayi-kimxap, kiyim-kéchek ewetip bérip turghachiqila, waqitliq halda chégrigha parakendichilik salmighan idi. Kéyin xen sulalisining herbi jehettiki qattiq zerbisi bilen hun quldarliri chöchüp qudilishishni oylighan bolismu, xen sulalisige béqinishni xiyaligha kelturmigenidi. Bu chaghda qoghushar tengriqut küch – maghduridin ketkechke, weziyetning qistishi arqisida oghlini barimtayliqqa ewetip özini qaram dep tonup, merkezning bir tutash rehberlikini qobul qilmaqchi boldi. Xen sulalisi bilen bolghan munasiwettiki bundaq tup özgirish hergizmu adettiki ish emes idi. Bu yuqiri qatlam hökümranlarning siyasiy nopuzi we ornighilar chétilip qalmay, yene menpe’etigimu munasiwetlik idi. Shunga, qoghushar tengriqut «xen sulalisige el bolush kérekmu-yoq» dégen mesilini uruq aqsaqallirining aliy kéngishige qoyghanda qollighuchilar we qarshi turghuchilardin ibaret ikki guruh barliqqa kélip, «wezirler nahayiti uzun bes-munazire qilishti». Qarshi turghuchilar: «hunlarning aditide ezeldin küchlüklük etiwarlinip, qolluq pes körülidu. Néme üchün ejdadlirimizning qa’ide –tüzümlirini buzup, xen sulalisige el bolghudekmiz? Undaq qilisaq ötken dewirlerdiki tengriqutlarning shenige dagh tekküzüp qoymamduq? Bundaq qilip eminlikke érishkinimiz bilen yat qowmlarni qandaq bashqurimiz» déyishese, sol ijiz xan bashchiliqidiki qollighuchilar: «hazir xen sulalisi küchlük, uysunlar we gherbiy yurttiki begliklerning hemmisi uninggha béqindi. Chetqu tengriquttin (miladidin burunqi 101~96-yillar) buyan hunlar kündin-künige ajizliship ketti, demalliqqa eslige kélishi mumkin emse, bundaq tersaliq qilghinimiz bilen bir künmu eminlik tapalmaymiz, xen sulalisige béqinsaq tinch-aman yashaymiz, eger béqinmisaq dölet halak bolidu»[44] déyishti.
Wehalenki, eyni chaghda shimalda qut’ush bash kötürgen, jenubta xen sulalisi tehdit sélip turghan, gherb-sherqtiki béqindi ellermu bölün’gen, ehwal nahayiti roshen bolghachqa, eger qoghushar tengriqut xen sulalisige el bolmisa ikki tereptin (quti’ush bilen xen sulalisidin) hujumgha uchrash xewpidin saqlinalmaytti. Nawada teshebbuskarliq bilen xen sulalisige el bolsa, xen sulalisi merkiziy hakimiyitining küchidin paydilinip quti’ush bilen qarshiliship, özni eslige keltüreleytti. Yene kélip qut’ushtin ibaret qoghushar tengriqutmu we xen sulalisigimu düshmen bolghan küch chöllükning shimalida turiwatqachqa, qoghushar tengriqut xen sulalisining özini qarishi aldighanliqini mölcherligen idi. Shunga, u eng axirida sol ijiz xanning pikirini qollap qowmini bashlap jenubqa bérip, xen sulalisi chégrisigha yéqinlashti hem miladiydin burunqi 53-yili ilgiri-kéyin bolup oghli ong qol bilik xan julqutan we inisi sol qol bilik xanni xen sulalisige ewetip, bu arqiliq xen sulalisining pozitsiyisi we inkasini bilip baqmaqchi boldi. Xen sulalisining qarishi élish semimiyitini bilgendin kéyin, u miladiydin burunqi 51-yili etiyazning 1-éyida özi xen sulalisi padishahi bilen körüshkili bérip, yenimu ilgiriligen halda özining merkiziy hakimyetke el bolush semimiyiti we xen hökümranigha bolghan hörmitini ipadilidi.
Xen sulalisi qoghushar tengriqutning el bolushini intayin qizghin qarshi aldi. Chünki, xen sulalisi ezeldin hunlarni boysundurush bek tes dep qarighan, shunga gawdidin bashlap hunlar bilen ehdiliship, hunlar shimalgha parakendichilik salmisila, yenggillik bilen ulargha qoral ishletmigenidi. Wudi dewridin bashlap ghelbilik mudapi’e urushi qilin’ghan bolsimu, buning üchün zor bedel töligenidi. Emdilikte hunlarning ichki malimanchiliqi tüpeylidin qoghusharning özlükidin béqinip, xen ordisigha kélishi elwette xushallinarliq ish idi. Yene kélip quti’ush shimalda bolghachqa, qoghushar arqiliq quti’ushni cheklesh xen sulalisining shimalini tinjitishtiki tüp siyasiti idi.
Xen sulalisi tengriqutni qarshi alidighanliqini bildürüsh, shuning bilen bille uningdin mudapi’e körüsh üchün,u kélishtin awwal harwa-atliqlar san’ghuni xen changni mexsus elchi qilip wuyüen qoruligha qarshi élishqa ewetti hem wuyüen, sufang, shixé, shangjün,béydi we féngshiyang aymaqliridin chang’en’giche bolghan yol boyigha eskerleni orunlashturup hörmet qarawulliri qildi. U kelgende yene tentenilik murasim ötküzüp, uning ornini herqayisi beg- törilerning ornidin yuqiri qildi. U xen padishahi körshüshte özini «e’iyaningiz»dep atap, namini atimidi. Uninggha altundin yasalghan «hun tengriqut möhüri» we yéshil möhür béghi in’am qilinip, uning hunlarning eng aliy rehbiri ikenlikini étirap qilindi. Buning bilen qanuniy jehettin (yazma bolmisimu) padishah- puqraliq munasiwiti tilendi, shuning bilen bille qoghushar tengriqut hakimiyiti- hunlarning yerlik hakimiyiti bilen xen sulalisi merkiziy hakimyitining béqindiliq siyasiy ornimu tiklendi[45]. Buningdin bashqa xen sulalisi yene zor miqdaridiki qimmetlik sowghilarni, yeni kemer, ton, yan xenjer, oqya, yalman, harwa-at, altun- kümüsh, kimxap- tawar qatarliqlarni sowgha qildi. Qoghushar tengriqut shimalgha qaytidighan chaghda özning küchining ajiz ikenlikini oylap, quti’ushning pursettin paydilinip hujum qilishidin ensirep, xen sulalisi merkiziy hökümitning küchige tayinish hem öz sadaqtini bildürüsh üchün, özi iltimas qilip guanglyu qorulida (hazirqi bawtu shehirining gherbiy jenubida) turushni telep qilip, jiddiy peyitlerde xen sulalisining teslimchilerni qubul qilish shehirini qoghdaydighanliqini bildüridi. Xen sulalisimu uni obdan cheklesh üchün, uning telipini qubul qilip gawchang törisi dung jung we harwa-atliqlar san’ghuni xen chang qatarliqlargha qoshun bashlap uni sofangning jilu qurulighiche (hazirqi ichki mungghuldiki kangjin arqa xoshunining gherbide) qoghdap uzutup qoyushni hem qoshunlarni qurulning sirtigha orunlashturup tengriqutqa boysunmighanlarni bashturushni buyridi. Yene hunlarning ijtima’iy ishlepchiqirishning weyran bolghanliqi, xelqning ach-yalingachliqta qalghanliqini bilip, ilgiri-kéyin bolup 34 ming patman ashliq yetküzüp bérip qiyinchiliqtin qutuldurdi.[46].
Bu chaghda qut’ush qoghushar tengriqutning xen sulalisige el bolghanliqi hem xen sulalisining uni zor küch bilen qollighanliqini körüp, qoghushar tengriqutning xen sulalisi bilen birliship hujum qilishidin qorqti, shunga umu xen sulalisige elchi ewetip sowgha teqdim qilip (miladiydin burunqi50~51-yillarda), oghlini barimtayliqqa ewetip dostaniliqini bildüridi. Xen sulalisi qoghushar tengriqut bilen qut’ushning nizasigha nisbeten otturdin payda élishni közlimey, belki her ikkilisini keng qorsaqliq bilen qubul qilish pozitsiyiside boldi, shunga qut’ushning elchisinimu katta kütwaldi. Qoghushar qut’ushning herikitige yéqindin diqqet qilip turdi. U miladiydin burunqi 50-yili xen sulalisige elchi ewetip sowgha teqdim qildi. Kéyinki yili (miladiydin burunqi 49-yili) shexsen özi ordigha bérip xen sulalisi bilen bolghan munasiwetni kücheytmekchi boldi. Miladiydin burunqi 48-yili xen sulalisi qoghushar tengriqutning telipige asasen yene 20 ming patman ashliq yardem qildi. Miladiyidin burunqi 43-yili yene uning shimaldiki tengriqut ordisigha qaytishiqa ruxset qildi. Qughushar tengriqut bilen xen sulalisining munasiwiti bashtin- axir dostane we mustehkem bolghachqa, quti’ush buzghudek yuchuq tapalmidi.
Quti’ush deslepte qughushar xen sulalisige teslim boldi, herbiy küchi ajiz, shimalgha qaytip kélelmeydu dep oylap, gherbke qoshun tartip uning ong terep zéminini igiliwalmaqchi bolghanidi. Shu chaghda tugh tengriqutning kichik inisi qoghushar tengriquttin yüz örüp[47], ong terepke bérip ikki akisining ademlirini yighéwélip özini ilim tengriqut dep atiwaldi.
Quti’ush uninggha hujum qilip uni öltürüp, 50 mingdin artuq eskirini qushuwaldi. Kéyin xen sulalisining qughushar tengriqutqa esker we ashliq yardem bériwatqanliqini anglap, ong terep zéminida turup qaldi hem özining hunlarni birlikke keltürüshke ajizliq qildighanliqigha közi yétip, gherbke köchüp uysunlargha yéqiniliship, ular bilen birlishishni oylap uysunlarning kichik künbégi ujutqa elchi ewetti. Quti’ushning qéchip yürgenlikini bilgen ujut uning elchisini öltürüp, kallisini gherbiy yurt qoruqchibégige ewetip bérip, sekkiz ming chewendaz chiqirip, yalghandin chichini qarshi almaqchi bolghandek qiyapetke kiriwaldi. Quti’ush uning suyqestini sézip qélip, uni meghlüp qildi. Arqidinla shimalgha hujum qilip oghuzlarni, dinglinglarni (gherbiy dinglinglarni)[48], qirghizlarni yéngip, bu uch milletning yerlirini özige qoshuwélip, qirghizlar yéride paytext qurdi, küchimu xélila kücheydi.
Kéyin, quti’ush özining turghan yérini xen sulalisidin yiraqta dep qarap, xen sulalisining qoghushar tengriqutni qollap özini qollimighanliqidin narazi bolup, xen sulalisi elchisi jang neyshi qatarliqlarni haqaretlidi hem barimtayliqta turwatqan oghlini qayturup bérishini telep qilip, oghlini ekélip quyushqa kelgen gujini öltürüwetti. Arqidin özining xen sulalisining chishigha tégip qoyghanliqini bilip he qoghushar tengriqutning küchiyip ketkenlikini anglap, uning hujum qilishidin qorqup téximu yiraqqa köchüp ketti. Kan’giye xani (kan’giye hazirqi qazaqistanning sherqiy jenubida) ilgiri uysunlardin köp qétim yéngilgenidi. Emdilikte u quti’ushning qéchip yurgenlikini uqup, uni kan’giyening sherqige jaylashturup, uning bilen birliship birlikte esker chiqirip uysunlarning yérini tartiwélip, andin uni shu yerge jaylashturush gherizide qirghizlargha elchi ewetip, buni quti’ushqa yetküzüp qoyushni éytti. Quti’ush buni anglap nahayiti xosh bolup eskerlirini bashlap gherbke yurush qildi, lékin yol üstide köp adimi tonglap ölgechke, kan’giyege kelgende aran 3000 adimi qaldi. Kan’giye xani qizini quti’ushqa yatliq qildi, quti’ushmu qizini kan’giye xanigha yatliq qildi. Kan’giye xani quti’ushni nahayiti hörmetlep, uning küchige tayinip etraptiki ellerge tehdit saldi, quti’ush kan’giyening qoshunidin paydilinip uysunlargha zerbe bérip, uysunlarning paytexti qizil qorghan shehirigiche bésip bérip, puqralarni öltürüp, charwa we mal-mülüklerni bulap ketti. Uysunlar qoghlap zerbe bérishke pétinalmighachqa, gherbte ming chaqirimdek ariliq bosh qaldi. Shu waqit texminen miladiyidin burunqi 44-yili idi.

Yüklə 0,96 Mb.

Dostları ilə paylaş:
1   ...   4   5   6   7   8   9   10   11   ...   20




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə