____________Milli Kitabxana____________
9
Şah İsmayıl Xətainin yaratdığı Səfəvilər dövləti və
Ağaməhəmməd şah Qacarın hakimiyyəti, Janna-d-Arkın
mübarizəsi və fransız burjua inqilabı, Amerikanın kəşfi və
orada yeni dövlətin yaranması, Napoleonun parlaq qələbələri və
faciəsi, Şimali Azərbaycanın Rusiya imperiyasının tərkibinə
qatılması və Avropada kapitalizmin bərqərar olması kimi
hadisələrlə zəngin olan əsrlər onlar üçün necə maraqlıdırsa, XX
əsr də iki dünya müharibəsi, bolşevizmin və faşizmin təşəkkülü,
Oktyabr (1917-ci il) inqilabı, müstəmləkə sisteminin dağılması,
vətəndaş müharibələri və kollektivləşmə, atomun və kosmosun
kəşfi kimi hadisələri ilə yaddaşda yer tutur və beləliklə, XX əsr
də özündən əvvəlki əsrlərin, minilliklərin cərgəsinə qatılır.
Yeni nəsillər siyasi və ideoloji çevrədən xilas olmaqla,
ötən əsrin bədii məhsullarına sırf oxucu marağı dairəsində
yanaşmaq, o dövr sənətkarlarının necə yazdıqları və
düşündükləri, əsərlərin cazibədarlığı, dövrün mənzərəsini və
gerçəkliyinin bədii əksini, insan obrazlarını görmək
istəyindədirlər. Yeni nəsillər üçün, tutalım ki, XVIII əsrdə baş
verən fransız burjua inqilabı kimi XX əsrin əvvəllərindəki
Oktyabr “inqilabı” da eyni dərəcədə maraqlıdır və onlar hər iki
hadisəyə tarixin olmuş və bir çox dəyişikliklər yaratmış,
dünyanın nizamını silkələmiş bir hadisəsi kimi baxırlar. Onlar
____________Milli Kitabxana____________
10
müraciət etdikləri bədii nümunənin hansı ədəbi metoda –
tənqidi realizmə, romantizmə, sosialist realizminə, yaxud
modernizmə, postmodernizmə söykəndiyinin də fərqində
deyillər. Yeni nəsillər üçün “inqilabçılar” da, sahibkar
kapitalistlər də, yaxud kəndlilər də, bəylər də, burjua sinfinin
nümayəndəsi kimi qələmə verilənlər də eyni dərəcədə
maraqlıdırlar. Artıq bu nəsil və yəqin ki, sonrakı nəsillər də
tutalım ki, müəllifinin kimliyi hələ mübahisəli olaraq qalan “Əli
və Nino” romanına “Komsomol poeması”, “Dumanlı Təbriz”,
“Bir gəncin manifesti”, “Gələcək gün” əsərləri ilə bir baxış
bucağından yanaşacaq, bədii nümunənin estetikası, gerçəkliyin
inikası, süjetin cazibəliliyi, müxtəlif obrazların dünyası,
inandırıcılıq əsas meyar olacaqdır. Şekspirin, yaxud Balzakın,
Hüqonun, M.F.Axundovun, L.Tolstoyun,
C.Məmmədquluzadənin, M.Şoloxovun
əsərlərinə olan
münasibət kimi.
Düzdür, bəzən 1930-1950-ci illər sovet dövrü
yazıçılarının əsərlərini inkar edib, “Əli və Nino”nu onlara qarşı
qoymaq cəhdləri də özünü göstərir. Fikrimizcə, bu, bir ideoloji
mövqeni rədd edib, digər ideoloji mövqeyə tapınmaq kimi başa
düşülə bilər. “Əli və Nino” oxucuya almancadan tərcümədə
təqdim olunur. Romanda ekzotikaya meyl güclü olsa da, bir çox
____________Milli Kitabxana____________
11
bədii məziyyətləri, maraqlı bədii obrazları ilə, poetikasının
özəllikləri ilə seçilir. Lakin “Şamo” da, yaxud “Bir gəncin
manifesti” də ana dilimizin zənginliyi və gözəlliyi, milli kaloriti
ilə, Azərbaycan təbiətinin ekzotikadan uzaq təsviri və s.
məziyyətləri ilə oxucu üçün cəlbedicidir. “Əli və Nino”
xüsusilə milli idealların yüksək ifadəsinə görə dəyərlidirsə,
adlarını çəkdiyimiz və çəkmədiyimiz digər romanlarda da
zamanın mənzərəsinin, ab-havasının real və canlı bədii əksinin
verildiyi inkar oluna bilməz.
Tədqiqat XX əsr Azərbaycan ədəbiyyatının 1930-1950-ci
illər (1955-ci ilədək) dövründə yeni Azərbaycan romanının
təşəkkülü və inkişafı ilə bağlı məsələləri özündə ehtiva edir.
Yeni Azərbaycan romanının yaranması, şübhəsiz, təkcə
ədəbiyyatımızda deyil, bütövlükdə Azərbaycan
mədəniyyətində, Azərbaycan xalqının həyatında mühüm
ictimai-bədii hadisə hesab oluna bilər. Tədqiqatın əhatə etdiyi
dövr özünün ziddiyyətləri və çətinliyi ilə seçilir. Siyasi-ideoloji
təzyiqin bədii sənətə güclü təsir göstərdiyi belə bir dövrün
ədəbiyyatı üzərindən bəzən xətt çəkmək meylləri olsa da, yeni
düşüncəyə dayaqlanan araşdırmamızda bunları əsassız və
yolverilməz hesab edir və həmin dövr ədəbiyyatının, o
____________Milli Kitabxana____________
12
cümlədən romanlarının iç məziyyətlərini çağdaş ədəbi məfkurə
kontekstində tədqiq obyektinə çeviririk.
Müstəqilliyə qovuşandan sonra Azərbaycan
ədəbiyyatının sovet dövrü mərhələsinin yenidən
qiymətləndirilməsi zərurəti yaranmışdır. İctimai-siyasi düşüncə
tərzində, estetik prinsiplərin dəyərləndirilməsində stereotiplər
dağılmışdır. Keçilən yolun səhvləri, naqislikləri götür-qoy
edilir, ədəbi-bədii irsə, mənəvi sərvətlərə - mənəviyyat və əxlaq
məsələlərinə milli müstəqillik təfəkkürü səviyyəsində yeni
baxış formalaşır. Odur ki, ədəbiyyatşünaslıq yeni elmi-
metodoloji prinsiplər, təhlil üsulları, qiymətləndirmə meyarları
axtarışlarını öz tarixi təcrübəsinin nəticələrindən bəhrələnərək
davam etdirir.
Sovet dövrü ədəbiyyatının tarixində mürəkkəb,
ziddiyyətli məqamlar çoxdur, siyasi-ideoloji təfəkkürün aparıcı
prinsiplərinin bədii yaradıcılığa, ədəbiyyata mənfi təsiri özünü
göstərmişdir. Bununla belə ədəbi fikirdə belə bir fikir
formalaşmaqdadır ki, sovet dövrü Azərbaycan ədəbiyyatı
“bəzən postmodernistcəsinə düşünüldüyü kimi, milli ədəbiyyat
olaraq öz simasını itirməmiş, bəlkə daha da qüvvətləndirmişdir.
Ədəbiyyatda müasir ədəbiyyatlara məxsus bütün janrlar, ən
yeni üslub və formalar yaranmış, özünü təsdiq edə bilmişdir”
Dostları ilə paylaş: |