6 kant və SÜHRƏVƏRDİ



Yüklə 168,03 Kb.
tarix05.02.2018
ölçüsü168,03 Kb.
#24847



6-3. KANT VƏ SÜHRƏVƏRDİ
Kantın idrak nəzəriyyəsində ən əsas məqamlardan biri aprior biliklər haqqında təlimdir.

Biliklərin heç də hadisələr dünyasından intixab olunmaması, düşüncənin məhsulu kimi or­taya çıxması haqqında mülahizələr Kanta qədər də olmuşdur. Lakin əvvəlki fəlsəfələrdə bir qay­­da olaraq iki kənar mövqedən biri seçilmişdir. Materialistlər maddi dünyanı, obyektiv ger­çək­liyi ilkin götürməklə biliklərin hamısını törəmə hesab etdikləri kimi, idealistlər də maddi dün­­yanı, materi­ya­nı bir varlıq forması kimi tamamən inkar etməklə həqiqəti an­caq insana nə­zə­rən kənarda olan ideya dünyasında və ya insanın öz duyğu aləmində axtarmışlar. Kant Qərb fəl­səfəsində ilk dəfə olaraq idrak prosesində hər iki təməlin iştirakını qəbul etmiş və bilikləri təc­rübədən gəlməklə (aposterior) və xalis zəkanın məhsulu olmaqla (aprior) iki yerə bölmüşdür.

Biz hələlik aprior biliklər ideyasına toxunmadan, aposterior biliklərin mənbəyi mə­sə­lə­si­nə baxaq. Məsələ burasındadır ki, Kantın aposterior bilik haqqındakı təlimi də ənənəvi ma­te­ri­a­list təlimlərdən çox fərqlidir. Kanta görə təcrübə heç də materialist­lə­rin iddia etdiyi kimi mad­di dünyanın inikası kimi başa düşülmür. «Özlüyündə şey» idrak üçün əlçatmazdır. Yəni, dərk olu­nan əslin­də materiya deyil. Bəs onda dərk olunan nədir? Kanta görə bu – «özlüyündə şeyin» bi­zimlə münasibətdə (təcrübədə) təzahür etdiyi, üzə çıxdığı, bizim üçün açıqlandığı formadır. Baş­qa sözlə, biz ma­te­riyanı – «özlüyündə şeyi» yox, onun təzahür edən müəyyən əla­mət­lərini dərk edi­rik. Lakin təzahür edən və gizli qalan əlamətlər nə ilə müəyyən olunur?

«Kar könlündəki anlayar». Yəni, insan ilə şeyin kontaktı zamanı insan əvvəlcədən özün­də olmayan, yəni özünün genetik və ya sosial-intellektual genetik bilik dünyasında heç vaxt kod­­laşmış olmayan bir əlaməti tanıya bilməz. Başqa sözlə, əşyadakı, hadi­sədəki o əlamət bizim üçün aşkarlanır ki, o formanı biz görürük, o səsi biz eşidirik ki, bizim özümüz (bey­nimiz, sinir sistemimiz, mentalitetimiz) həmin əlamətin (onun ideyasının, bazis for­ma­sı­nın) daşıyıcısıyıq. Məsələn, elektromaqnit dalğaları spektrində biz ancaq 4-8 anqstrem in­ter­va­lın­dakı dalğaları görə bilirik. Dalğa uzunluğu ondan kiçik – ultrabənövşəyi və dalğa uzunluğu on­dan böyük – infraqırmızı şüalar bizim görmə zonamızdan kənarda qalır. Eləcə də ya­ra­sa­la­rın eşitdiyini biz eşidə bilmirik. Bizim səs dalğalarını qəbul etmək – eşitmək imkanımız da qa­baq­cadan müəy­yənləşmişdir. Deməli, insan qarşılaşdığı hadisədən infor­ma­si­ya­nı ancaq öz tə­bii imkanları çərçivəsində götürür. Bu fikri for­ma­ya da aid etmək olar. Bizə qabaqcadan mə­lum olan, «doğma» olan hər hansı bir forma obyektdə müşahidə edilmirsə, biz onu amorf he­sab edirik. Bu fikirləri davam etdirərək, belə nəticəyə gəlmək olar ki, insan eqoizmindən kə­na­ra çıxsaq; insanla obyektin qarşı­lıq­lı təsir prosesini, bu prosesdəki rezonans (tanıma, idrak mə­qa­mı) məqamlarını obyektlə eyniləşdirmək və obyekti məhz bu mə­qam­lardan ibarət hesab et­mək iddiasına düşməsək, biz maddi var­lı­ğı deyil, maddə ilə, şeylə təmas prosesini, onun bizim üçün açıl­mış qədərini dərk etdiyimizdən danışarıq.

«Özlüyündə şeyin» «bizim üçün şeyə» çevrilməsindən yox, bizim «özlüyündə şeydən» «bizim üçün şeyi» intixab etməyimizdən söhbət getməlidir. Hər bir «özlüyündə şey» son­­suz əlamətlərə malikdir, tükənməz və əbədidir. Daha doğrusu, qeyri-müəyyən olduğu də­rə­­cədə sonsuzdur. Bütün qeyri-müəyyənliklər isə bir-birinə bərabərdir. (Sadəcə ona görə ki, biz on­ları fərqləndirmək imkanından məhrumuq).

Beləliklə, təcrübə əslində iki qeyri-müəyyənliyin – insanla (mənlə) materiyanın qar­­şılıqlı əlaqəsi, daha doğrusu, eyniyyəti məqamıdır. İnsanın ideya dünyası ilə maddi dünya ara­sındakı eyniyyət məqamı! Bu məqam sonsuzluqdan intixab edilmiş sonludur. Xüsusən dillə ifadə olunan bilik artıq ancaq sonlu, müəy­yən və riyaziləşdirilə bilən, məntiq formaları əsasında qurulan, bir sözlə, formal bilikdir – informasiyadır. Canlı bilik isə hələ varlıqla əlaqələrdən tam məhrum olmamış, qoparılıb ayrılmamış, dil qəli­bi­nə salınmamış, «konservləşməmiş» bilikdir. İnsanın ideyalar aləmin­dəki passiv mövcudluqdan «özlüyündə şe­yin» təsiri ilə fəal möv­cudluq formasına keçən, dirilən, canlanan ideya – bax budur, id­rak! Em­pi­rik idrak… (Sonra isə o, formal məntiqin prokrust çər­çi­vəsinə, dil qəlibinə salınır və saxlanma üçün yararlı hala gətirilir, «konservləşir» (yanar idrakdan kənarda – maddi üsullarla).

Nəzəri idrak isə insanın kənara, maddi dünyaya, «özlüyündə şeyə» deyil, öz daxilinə, ideya alə­minə yönəldilmiş düşüncəsinin məhsuludur.

Kantın idrak nəzəriyyəsi fəlsəfədə Kopernik çevrilişi hesab olunur. Lakin Ş.Sührəvərdi tə­limi ilə tanışlıq göstərir ki, bu nəzəriyyənin bir çox məqamları hələ xeyli əvvəl, XII əsrdə bö­yük Azərbaycan filosofunun əsərlərində irəli sürülmüşdür.



Ş.Sührəvərdinin sufizmlə peripatetizm arasında ikili mövqe­yi, daha doğrusu, sintetik möv­qedən çıxış etməsi Aristotelin idrak nəzəriyyəsinin bir sıra yeni müddəalarla zən­gin­ləş­mə­sinə gətirmiş­dir. Digər tərəfdən, qnoseoloji problemlərin «işıq» anlayışı vasitə­si­lə izah cəhd­lə­ri qədim yunan fəlsəfəsinə də bəlli idi. Aristotelin naməlum filosofa istinadən söylədiyi bir fi­kir­də «intellekti (naus) ilahi tərəfindən insan qəlbində şölələndirilən işıqla»1 müqayisə etməsi, göstərir ki, işığın insan düşüncəsinin ilahi mənşəyi ilə bağ­lan­ması vəcd və vəhy məqamlarının qnoseologiyaya daxil edilməsi heç də yalnız orta əsrlər is­lam fəlsəfəsinə aid deyildir. Bununla belə, Aristoteldə söhbət bütövlükdə intellekt feno­me­nin­dən gedir, obyektlə onun haqqındakı bilik arasında əlaqədən bu kontekstdə danışılmır. Ş.Süh­rə­vərdi məhz bu məsələdə bir addım irəli gedərək, id­rak prosesinin mexanizmini açmaq təşəb­bü­sü göstərir. Əhəmiy­yət­­­li olan informasiyanın ilkin daşıyıcısının müəyyənləşdiril­mə­si­dir. Yə­ni, cisim obyekt bizim biliklərə nəzərən nə dərəcədə ilkindir və nə dərəcədə həqiqət daşı­yı­cı­sı­dır. Yoxsa, həqiqət insana fitrən bəxş edilmiş, ilahi ünsiyyətin işığında ortaya çıxan və əslində cis­mə, obyektə nəzərən tam müstəqil bir fenomendir. Əgər belədirsə, onda cismin daşıdığı in­for­masiya ilə bizim biliyimiz arasındakı adekvatlıq heç də sadəcə hissi təcrübənin nəticəsi olmayıb, onların hər ikisinin eyni ilahi başlanğıcdan törəməsi, eyni ideyanın həm insan məninə, həm də cisimlərə (for­ma şəklində) eyni başlanğıcdan transfer olması nəticəsidir.

İran tədqiqatçısı Mehdi Amin Razavinin yazdığına görə, Ş.Sührəvərdi materiyanı elə sa­də şey hesab edir ki, o, müxtəlif ci­sim­lərin formasını ala bilir. Yəni cisimlər forma və mate­ri­ya­nın bir­ləşməsindən yaranır.1 Sührəvərdi be­lə hesab edir ki, insan ob­yekti ancaq o zaman görə bilər ki, o, işıqlanmış olsun. Lakin insa­nın obyekti dərk etməsi üçün onun İşıqlar işığının sayəsində nail olduğu işıq emanasiyası, nəf­sin işıqlanması (əl-işraq) gərəkdir.2 Be­ləliklə, söhbət obyektlə subyektin qar­şı­lıq­lı əlaqəsinə, onların hər ikisinə aid olan işıqlanmadan gedir. Obyekt insan şüurunda ini­kas olun­mur. Onun təsiri ilə insan daxilində işıqlanma gedir və əs­lində insan özündə olanı dərk edir. Burada Kant təli­min­də «öz­lü­yündə şey»in rolu yada düşür. İşığın mənbəyi də obyekt deyil, Ali işıq - Nur əl-ənvərdir. «İşıq heykəlləri» əsərində Ş.Süh­rəvərdi yazır: «Sən bir şeyi yalnız onun səndəki surətinin hasil olması ilə dərk edirsən. Dərk etdiyin həmin şyein ona müta­biq­liyi lazım gəlir, əks halda onu olduğu kimi dərk etməzdin».3 Göründüyü kimi, Ş.Sührəvərdi Kantdan fərqli ola­raq, şeyin, cismin dərk olunan­lığını qəbul edir, çünki «şey»lə «surət» arasında mütabiqlikdən (adekvatlıqdan) danışılır. İlk baxışda belə təsəvvür yarana bilər ki, bu mövqe sensualist idrak nəzəriyyəsinə uyğundur. Lakin bu fikrə Sührəvərdi təliminin kontekstində baxdıqda, başa dü­şü­lür ki, burada heç də insanda yox, insandakı («səndəki») «surə­tin hasil olmasından» danışılır. Di­gər tərəfdən, «surət» duy­ğu­lar kompleksi kimi başa düşülmür. Söhbət «düşüncəli nəfs»dən – əql­dən gedir. Ş.Sührəvərdi yazır: «Sənin nəfsin nə cisim, nə cismani, nə də müəyyən cəhətdən aş­kara çıxarılması üçün işarə ediləndir. O, hissələrə ayrılmayan təkdir, aramsız daimi möv­cud­dur, təsəvvürlər onu əsla bölə bilməz».1 Əsəri bütövlükdə oxuduq­da məlum olur ki, söhbət hissi obrazdan daha çox ideyadan gedir. Əksinə, hissi obraz ideyanın məhsulu kimi or­taya çıxır: «Bəzən elə olur ki, nəfs əqli bir şeyi daxilən müşahidə edir, hər hansı cəhətdən mü­na­sib surətdə xəyalən onu yamsılayır və həmin surət hiss alə­mi­nə daxil olur. Bu (əqli şeydən) tə­xəyyül yatağına əks olan (surət) ki­midir».2 Bu məsələdə Kant Sührəvərdiyə nisbətən daha çox materialistdir. İde­ya ilə hissi obraz və hissi predmet arasında mü­na­sibətdən danı­şar­kən, o, predmeti ideyadan törəmə kimi, surət kimi götürmür: «Xa­lis zəkanın tənqidi kifayət qədər aydınlıqla göstərdi ki, hissi pred­metlərdən kənarda hər-hansı bir nəzəri idrak, habelə, hər hansı nəzəri-ehkamçı idrak ola bilməz. Belə ki, bu halda hər şey apriori anlayışlar vasitəsilə dərk olunmalı idi. Bu belə sadə səbəbdən mümkün deyil ki, obyektiv reallığın ifadəsi üçün is­tənilən anlayış hansı isə seyrə mütabiq olmalıdır; seyr də bildiyimiz kimi hissi­dir».3 Düzdür, idrak prosesində hissi predmetlərin işti­ra­kı­nı və rolunu Sührəvərdi də inkar etmir, lakin onun təlimində nəfs pred­metə nəzərən daha həlledicidir. Yəni, işıqlanma birinci nəfsdə getməlidir ki, predmet də görünən olsun. Təbii elmi nəzə­riy­yə­lərə görə isə işıq (söhbət nurdan deyil, optik hadisədən gedir) pred­metə düşüb ondan əks olunduqdan sonra duyğu üzvlərinə tə­sir edərək müəyyən hissi obrazın yaranmasında iştirakçı olur. Bu­ra­da «işıq» ümumiləşdirici bir məfhum olmayıb, digər fiziki kə­miy­yətlərlə (səs, istilik və s.) yanaşı adi bir ötürücüdür. Əlbəttə, gör­mənin digər duy­ğulardan üstünlüyü, prioritetliyi vardır; o, pred­metin, hadisə­nin bütöv təsəvvür olunmasında daha böyük rol oy­nayır. Lakin bütöv hissi obraz sadəcə duyğuların top­lan­ma­sın­dan əmələ gələ bilməz. Mahiyyət isə məhz bütövlükdə təzahür edir. Bütövlük (ey­dos, forma) isə adi işığın yox, məhz nurlan­ma­nın sayəsində aşkar olur. Yəni, hissi yox, əqli prosesin məhsuludur.

Ş.Sührəvərdinin idrak nəzəriyyəsi ilk baxışda Aristotel və İbn Sina təlimlərindən bir o qədər də fərqlənmir. Bu doğrudur ki, Sührəvərdi müəyyən mənada Aristotelin formalar və Platonun ide­ya­lar təlimini ortaq məxrəcə gətirmiş və bu zaman öz termi­no­lo­gi­ya­sından isti­fa­də etmişdir. Lakin bizcə, fərq ancaq terminlərdə de­yil. Təhlil göstərir ki, Ş. əs-Sührəvərdi məhz Kant qnoseologi­ya­sı­na daha çox yaxınlaşmış, daha doğrusu, onu qabaqlamışdır. Rus şərq­­şü­nas filosofu A.Smirnov Sührəvərdinin «Hikmət əl-işraq» ki­ta­bını təhlil edərək yazır ki, əs-Süh­rə­vərdi də İbn Sina kimi həqiqi idrakın iki növündən danışır: bilavasitə, intuitiv idrak və bila­vasitə, mən­tiqi idrak. Həqiqətin bilavasitə əldə olunmasını «mən»in dərk olunması ilə əlaqələndirən Süh­rəvərdi ikinci növ id­rakı tədqiqatla (bəhs) əlaqələndirir.1 Fikir verin. Həqiqətin tədqiqatla vasitələn­mə­si Kan­­tın «təcrübə» anlayışına uyğun gəlmirmi? İdrakın birinci forması isə yenə də, Kantda oldu­ğu kimi, intuitiv idrak hesab olunur. Maraqlıdır ki, Sührəvərdi bununla kifayətlənmir və bilik­lə­ri də iki yerə bölür: «İnsan bilikləri anadan gəlmə (fitri) və son­ra­dan əldə edilmiş şəkildə olur».2 Bu isə artıq aprior və aposterior biliklər böl­gü­sünün başqa terminlərlə ifadəsidir. Əlbəttə, biz əsla bu fikirdə deyilik ki, Kant öz ide­ya­la­rın­da Sührəvərdidən istifadə etmişdir. Xeyr. Kantın orijinallığına heç kim şübhə etmir. Lakin hə­­min böyük ideyanın rüşeymlərini altı əsr əvvəl yaşamış Azər­bay­can filosofunun əsərində gör­mək və qürrələnməmək mümkün deyil.

Ş.Sührəvərdinin təliminə görə, insan bilik almaq, hər hansı bir obyekti dərk etmək üçün əv­vəlcə özünü dərk etməlidir.3 Əlbət­tə, bu fikri Sokratın məşhur «özü­ dərk et» tezisi kontekstində də nəzərdən keçirmək olar. Lakin burada vurğu «mən»ə yox, obyektə yönəlmişdir. Yəni söhbət sadəcə olaraq insanın özünü anlamasın­dan, öz daxili alə­mi­nə, istəklərinə, duyğularına bələd olmasından get­mir. Söhbət kənarda olan obyektin dərki üçün «mən»ə müra­ciət­dən gedir. İşıqlanma, kəşf o zaman baş verir ki, insan obyektdə ola­nı özündə ta­pa bilir. Yəni dərk prosesi «mən»də olanla kənarda olan arasında adekvatlıq (Sührəvərdinin ter­­mini ilə desək – müta­biqliq) sayəsində mümkün olur.

Ş.Sührəvərdi «İşıq heykəlləri» əsərinin son bölməsində (yed­din­ci heykəl) yazır: «… nəfs (söhbət düşüncəli nəfsdən gedir – S.X.) hərdən qüts aləminə xilas olur, müqəddəs atasına qo­vu­şur, on­dan biliklər alır, öz hərəkətlərindən və hərəkətlərinin lazımi xas­sə­lə­rindən xəbərdar göy nəfslərinə qovuşur, özlərinin yuxuluğunda və oyaqlığında naxışlı bir şeyin qarşısında na­xı­şı əks etdirən güzgü kimi onlardan qeybi məlumatlar alır».1 Burada biz Sührəvərdinin ilk baxışda fərqli görünən iki mövqeyi ilə rastlaşırıq. Biliklərin mənbəyini bir tərəfdən insanın özündə axtaran Sührəvərdi, digər tərəfdən «göy nəfslər»ində axtarır. La­kin məhz daxilin işıqlanması «göy nəfs»lərini görməyə, onlara qovuşmağa imkan yaradır.

Burada belə bir sual ortaya çıxır: İnsanın obyekti dərk etmək üçün özünə müraciət et­mə­si, onun ilkin mənbəyini özündə axtar­ması aprior biliklərə işarə deyilmi? (Düzdür, Sührəvərdi ap­riori terminini işlətmir, lakin biliyin mənbəyini obyektən öncə insanın özündə axtarır). Bu­ra­da insanın özünə müraciətini də iki mərhə­lə­yə ayırmaq olar. Belə ki, insan hər hansı obyekti əvvəlki təcrübə­lərdən əldə etdiyi biliklərlə müqayisədə dərk edə bilər. Bu zaman həmin bilik ap­rior yox, aposterior olacaq. Kant özü bu barədə yazır: «Sonrakı tədqiqatlarımızda biz o bilikləri aprior bilik ad­lan­dı­racağıq ki, onlar konkret olaraq məhz hansı isə təcrübədən deyil, ümu­miyyətlə hər hansı bir təcrübədən asılı deyillər».2

İ.Kant təcrübə ilə əldə oluna bilməyən biliklərə (aprior bilik) misal olaraq ilk növbədə məkan, zaman və səbəbiyyəti göstərir. Məkanın hissi təcrübənin məhsulu olmaması, ancaq əqlin sayəsin­də dərk olunması Ş.Sührəvərdi tərəfindən də göstərilmişdir. O, «İşıq heykəlləri» əsərində yazır: «(Şeylərin) səndəki surəti ölçülü de­yildir… Onların tutduğu yer də səndə ölçü­süz­dür. O, sənin dü­şün­­cə­li nəfsindir».3 Burada diqqəti belə bir cə­hə­tə yönəltmək la­zım­dır ki, söhbət cismə xas olan ölçü ilə, bu ölçünün konkretliyi ilə cismin tut­du­ğu yerin ölçüyə sığmazlığı, bütövlüyü və sürəkliliyi arasındakı fərqdən gedir. Yəni, söhbət əs­lində ancaq fikirdə hasil olan «məkan» anlayışından gedir. Cisimlərin tutduğu yerin öl­çü­süz­lü­yü düşüncəli nəfslə, zəka ilə əlaqələndirilir. Sührəvərdi yazır: «Onlar aləmə nə daxil, nə də on­dan xaricdir, nə birləşmiş, nə də ayrı düşmüşdür. Bütün bunlar cismin hallarıdır».1 Materializmin məşhur «materiyanın mövcudluq formaları» ifadəsi yada düşür. … Düzdür, Sührəvərdidə məhz bu kontekstdə düşüncəli nəfsin özü ilə onun məkan duyumu arasında fərq qoyulmur. Amma hər halda məkan məhz düşüncə ilə əlaqələndirilir. Burada əq­lin məkan duyumu və onun sonsuzluğuna da toxunulur: «… Cisimlər aləmini tərk edən və in­tə­­hasız dünyanı istəyən bu qüdsi mahiyyəti insan cisim kimi necə təsəvvür edə bilər?».2

Sührəvərdi başqa bir yerdə məkanla yanaşı zaman anlayışını da bu kontekstdə işlədir: «(Nəfslər) əzəldə bir-birindən necə fərq­lən­mişdir. …Bədəndən qabaq nə yertutum, nə məkan, nə təsir, nə təsirlənmə, nə də bədəndən sonra mövcud olan sayaq qazanıl­mış tərkiblər vardır».3

Sührəvərdiyə görə, aləmlər üçdür: birincisi, əql aləmi, ikinci­si, nəfs aləmi: düşüncəli nəfs cismani və hər hansı cəhətə malik ol­ma­sa da, cisimlər aləmini idarə edir… üçüncüsü, cisim aləmi. O, efi­rə və ünsürə bölünür.4 İşraq fəlsəfəsində bölünmə ancaq cismani aləmə aiddir…


Sührəvərdinin səbəbiyyət təlimi də əqllə bağlıdır. «Əqli cəhət­lər üçdür: vacib, mümkün, qey­ri-mümkün… Mümkün odur ki, onun nə varlığına, nə də yoxluğuna zərurət vardır… Sə­bəb o şey­dir ki, başqasının varlığı ona görə vacibdir».5 «Mümkün özü-özü­nə vücuda gəl­mir, o, özü üçün varlığı tələb etsəydi, mümkün yox, vacib olardı. Deməli, onun varlığını yox­luqdan üstün tutan bir səbəb labüddür. Səbəb əgər bitkindirsə, nəticənin varlığı ondan geri qalmır».6 Göründüyü kimi, səbəb və nəticə müxtəlif zaman­la­ra deyil, eyni zamana müncər edilir ki, bu da zamanın kəsilməz­li­yi­ni ifadə edir. Bir tərəfdən, səbəb əvvəl gəlir, digər tərəfdən, səbəb ilə nəticənin arasında hansı isə zaman intervalının mövcudluğu qəbul edilmir.

Kantda olduğu kimi, Sührəvərdidə də məkan, zaman və səbəbiyyət kateqoriyalarına materializmin ənənəvi münasibətindən fərqli, olduqca dərin, konseptual bir baxış vardır. Məlum olduğu kimi, materializm (o cümlədən, dialektik materializm) zaman və məkanı materiyanın mövcudluq formaları kimi təqdim edir. Halbuki, əvvəlki tədqiqatlarımızda göstərdiyimiz kimi, materiya zaman və məkan müəyyənliyindən məhrumdur.1 Zaman və məkan müəyyənliyi materiya müəyyən bir forma aldıqda, deməli, müəy­yən bir ideyanın iştirakı ilə yaranır. Müəyyən formaya malik olan, fenomenə çevrilən materiya daha artıq materiya olduğu üçün yox, məhz bir hadisə, bir fenomen olmaqla müəyyənlik kəsb edir…

Hadisə bütöv olmasa, yəni, müəyyən bir ideyanın ifadəsi olmasa, ideyalar qarışsa, formalar qarışsa, strukturda aydınlıq itsə onun haradan başlayıb, harada itdiyi, nə vaxt yaranıb, nə vaxt yox olduğu və ya başqa hadisəyə çevrildiyi haqqında dəqiq fikir yürütmək çətin olur (daha doğrusu, qeyri-mümkündür).

Səbəbiyyət iki (və ya daha çox) hadisənin, fenomenin əla­qə­sin­dən yeni hadisənin, fenomenin yaranmasını ifadə edir. Bir feno­me­nin öz-özünə başqa bir fenomenə çevrilməsi mümkün deyil. Baş­qa sözlə, yalnız o halda mümkündür ki, bu fenomen daxilində on­dan fərqli bir mahiyyət, fərqli bir fenomen peyda olur və ha­di­sə­ni sanki içəridən dəyişir. Lakin bu halda əslində yenə də iki müx­təlif fenomendən söhbət gedir. Biri o birisinin daxilində və ya xaricində olması isə nisbi məsələdir, şərtilikdir.

Zaman ancaq hadisələr, fenomenlər arasındakı əlaqənin və bu əlaqədən doğan dəyişikliyin ifadəsidir. Yəni, səbəbiyyət və za­man eyni bir mahiyyətin ifadəsidir. Əsas məsələ fenomenlərin bir-birindən ayrıla bilməsidir. (Əsas məsələ ideyanın, onun surətinin konturlarının tapılmasıdır).

Lakin ideyanın konturları yoxdur. Mütləq mənada materiya kimi mütləq mənada ideya da zaman və məkan müəyyənliyindən məhrumdur. Mütləq işıq, işıqlar işığı (nur-əl-ənvər) da zaman və məkana sığmır. İdraka sığmır.

Əslində idrak, dərk etmək zaman və məkan müəyyənliyinə gəlib çıxmaqdır. Dünyanı fenomenlərə ayırmaq və fenomenlər arasındakı əlaqəni görməkdir. Məhz bu mənada zaman da, məkan da, səbəbiyyət də idrakın məhsuludur. Lakin digər tərəfdən, idrak özü zaman, məkan və səbəbiyyət müəyyənliyi şəklində ortaya çıxır. Söhbət hissi idrakdan yox, zəkadan gedir. Xalis zəkadan. Bu kontekstdə zaman da, məkan da, səbəbiyyət də məhz aprior biliyin formalarıdır (məhsullarıdır).

Mütləq işıq və mütləq qaranlıq dərkedilməzdir. Yaşadığımız dünya, duyduğumuz dünya yarıqaranlıqdır. Mütləq ideya – işıqlar işığı dərkedilməzdir. Ondan daha işıqlı olmaq mümkün olma­dı­ğı­na görə, onu görmək olmur. «İşıqlar işığı… öz aşkarlığının şiddəti üzündən görünməzdir».1


* * *
Miqyaslar dəyişir, mahiyyətlər müxtəlif miqyaslarda təkrar olunur. Mahiyyət zamana və məkana sığmır.

Dünyanın mahiyyətini də cisimlərin, fenomenlərin mahiyyə­tin­dən çıxış edərək anlamaq olarmı? Axı, «cisimlər aləmini tərk edib, intəhasız dünyanı istəyən qüdsi mahiyyət» fərdi şüurun təsəv­vür imkanı xaricindədir. Lakin təsəvvürlə dərk oluna bilməyənlər əqllə dərk olunurlar. Sührəvərdidə nəfs anlayışı heyvani nəfsdən tut­muş düşüncəli nəfsə qədər çox böyük bir diapazonu əhatə edir. Bu mənada «nəfs» «şüur» anlayışına daha çox mütabiq olsa da, on­dan da genişdir. Fərdi nəfsdən kənarda onun hüdudlarına sığ­ma­yan, təkcə miqyasca yox, ehtirasın gücü baxımından da yük­sək­də duran nəfslər var imiş. «Filosofların fikrincə, bədənlərimizin düşüncəli nəfsi olduğu kimi, göylərin də diri, bilici, öz yaradıcısına aşiq, əbədi ehtirasla sevən düşüncəli nəfsləri vardır ki, onlar həmişə daimi vəcd, aramsız həzz içindədir. Onların həzzləri öz bədənlərinə sirayət edir…».1

İlk baxışda idrak nəzəriyyəsi ilə əlaqəsi olmayan, bəşəriyyətin taleyi ilə bağlı yazdığı bir əsərdə Kant da fərdi miqyaslı şüurdan kainat miqyaslı, təbiət miqyaslı şüura keçərək bir növ göylərin məqsədindən yazır: «Ayrıca insanlar və hətta bütöv xalqlar hərə bir tərzdə və çox vaxt başqalarının zi­ya­nına olaraq öz məqsədlərini güdərkən, özləri də bilmədən sanki aparıcı ipin dalınca təbiətin məq­sədi (kursiv bizimdir – S.X.) istiqamətində gedir və bu məqsə­din əldə olunmasına xidmət edirlər…».2

Burada Kant təbiətin məqsədindən söhbət açır. Hətta ayrı-ayrı şeylərin və insanların öz plan­la­rı olmasa da, təbiətin ümumi bir planı olduğu üçün onlar bir-birilə əlaqəlidir.3 «Özü-özlüyündə təzələşməni vacib edən şey hərəkətdir. Kə­sil­mə­mə­si gerçək, yeni şeylər üçün bir səbəb olmağa yarayan aramsız, mütəmadi dövri hərəkətlər göy­lərə məxsusdur. Onlar bizim aləmdə yeniliklərin (hadisələrin) səbəbidir. Birinci təsiredici də­yişmirsə, deməli, o, yeni şeylərin hərəkətləri üçün bir səbəb deyildir. Əgər göylərin hə­rə­kət­lə­ri olmasaydı, yeni şeyin meydana çıxmasını nə gerçəkləşdirərdi? … (Göyün) hərəkəti yalnız ira­di­dir».4

Süh­rə­vər­didə göyün hərəkətinin onun nəfsi ilə izah olunması hilozoizmdən daha çox Kantdakı «məq­səd» və Şopenhauerdəki «iradə» anlayışına uyğun gəlir. «Göyün hərəkətini cərəyan etdirən onun nəfsidir».5 Sührəvərdiyə görə, kainatda baş verən proseslər bizim aləm­də­ki yeniliklərin səbəbidir. Yəni, böyük miqyaslı hadi­sə­lərlə kiçik miqyaslı hadisələr arasında əla­qə böyük məqsədlə ki­çik məqsəd, kainat nəfsi ilə fərdi nəfs arasındakı əlaqədən irəli gə­lir. Kant yazır: «İn­sanlarda onların əməllərinin yekununda hansı isə ağlabatan məxsusi məqsədin varlığının ­bul edilməsi mümkün olmadığından təbiətin məqsədini insan işlərinin bu məzmunsuz ge­di­şa­tında tapmağa çalışmaq lazımdır; bunun sayəsində şəxsi planı olmadan fəaliyyət gös­­rən­­rin təbiətin müəyyən planına uyğun tarixləri mümkün olardı...1 Kantın bu fik­ri, bir tərəfdən, siner­ge­tikanın başlıca ideyasını əks etdirirsə, digər tərəfdən, xaosda niza­mın al­ternativi olan qaranlıqda parıltı (Ş.Y.Sührəvərdi) ideyasına mütabiqdir.

Necə olur ki, amorf sistemlərdə ilk baxışda nizamsız, qaydasız, qarışıq hərəkətlər fo­nun­da birdən-birə nizam, ahəng, «məqsədli hadisə» yaranır? Yaxud necə ola bilər ki, ucsuz-bu­caq­sız qaranlıqda, onun öz daxilində, müəyyən bir hissəsində daxili işıq yansın, nurlanma getsin?

Həm Sührəvərdidə, həm də Kantda böyük və kiçik sistemlər arasındakı əlaqə, kainatla in­san, makrokosmla mikrokosm ara­sın­da­kı əlaqə bir növ astrologiyanı xatırlatsa da, mü­kəmməl bir fəl­sə­fi sistemin tərkib hissəsi olaraq, əksinə, astrologiya üçün də meto­do­loji baza ro­lunu oynaya bilər.

Hadisələr arasında əlaqədən ümumilər arasında əlaqəyə. Dün­yanın maddi vəhdəti.

Məqsədlər arasında əlaqə. Nəfslər arasında əlaqə. Dünyanın maddi vəhdətindən fərqli olaraq, ideya vəhdəti, məqsəd vəhdəti, nəfs vəhdəti ! Dünyəvi şüur (dünya şüuru) və fərdi şüur.

Hissənin tama, fərdi şüurun dünya şüuruna qatılması.



Dünya zəkası və göylərin nəfsi! Dünya şüuru! Kantdan Süh­rə­vərdiyə və Sührəvərdidən fenomenologiyaya gedən yol! İdeya­la­rın düzülüşündə xronologiyanın dəyərsizləşməsi!

1 Aristotel, «Rito­ri­ka», 1411, b 12.

1 Bax: Великие мыслители Востока. М. 1998, стр. 606.

2 Yenə orada.

3 «Şərq fəlsəfəsi». (IX-XII əsrlər). Tər­tib­çi Z.C.Məmmədov. Bakı, 1999, səh. 217.

1 Yenə orada.

2 «Şərq fəlsəfəsi». (IX-XII əsrlər). Tər­tib­çi Z.C.Məmmədov. Bakı, 1999, səh. 229.

3 Кант. Соч. Том 5. М., 1966, стр. 221-222.

1 Средневековая арабская фило­со­фия. Проблемы и решения. М. 1998, стр. 57.

2 Sührəvərdi. «Hikmət əl-işraq». – Yenə orada.

3 Yenə orada, səh. 607.

1 Şərq fəlsəfəsi, səh. 229.

2 Кант. «Критика чистого разума». Собр. со­ч. в восьми томах. М., 1994, том 3, стр. 41.

3 Şərq fəlsəfəsi, səh. 217.

1 Yenə orada, səh. 217.

2 Yenə orada, səh. 217.

3 Yenə orada, səh. 219.

4 Filosofların görüşləri. – Yenə orada, səh. 213.

5 Yenə orada, səh. 219.

6 Yenə orada, səh. 219.

1 S.Xəlilov. «İdeya və maddi təcəssüm». – Fəlsəfə jurnalı, 2003, № 1-2.

1 Sührəvərdi. «İşıq heykəlləri». – «Şərq fəlsəfəsi», səh. 221.

1 Filosofların görüş­lə­ri. – Şərq fəlsəfəsi, səh. 213.

2 Кант. Соч., том 8, М., 1994, стр. 12-13.

3 Yenə orada, səh. 13.

4 İşıq heykəlləri. Beşinci heykəl. – Şərq fəlsəfəsi., səh. 223.

5 Yenə orada, səh. 223.

1 Yenə orada, səh. 13.



Yüklə 168,03 Kb.

Dostları ilə paylaş:




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə