Assalawma aleykum Minara kesh jarıq bolsın!

Assalawma aleykum Minara kesh jarıq bolsın!
Tún jaqsı
Jasıl baģda, tún jasırģan oy-qırın,
Egiz júrek shertti ıshqınıń jırın,
Uyıp tıńlap ashıqlardıń jan sırın,
Ùnsiz mawjıraģan maqpal tún jaqsı.

Maqpal tún mawjırap ıshqı jırına,

Tallar guwa boldı júrek sırına,
Baģ samalı baģdıń oyı-qırına,
Gúl átirin jelpip esken tún jaqsı.

Jipek samal jelpip esse sıbırlap,

Japıraqlar baxıt tiler sıldırlap,
Kókte ķórimlikke kókke san mıńlap,
Juldızlardan shashıw shashqan tún jaqsı.

Mehrińdi iydirgen yardıń qushaģı,

Bul jerden artıqpa jànnettiń baģı,
Ánekey, aq tańģa hámiledar taģı,
Baxıt tańın inám etken tún jaqsı.
OTAR JIYEMURATOV
(Óz dóretpemnen)


Ósek sóz

Dumanday tez tarqap shadlıq bazarı,

Sál nàrseden kewildiń bar sazarı,
Qulazıtıp keń dunyańdı tar etip,
Janģa batar ósek sózdiń azarı.

Ósek sózdiń qanatı bar desedi,

Qanatı sol òsek gewlep esedi,
Shalģayıńnan tartıp qayda barsańda,
El ishinde biyabıray etedi.

Esitkende ótetuģın súyekten,

Men qorqaman gúwildegen ósekten,
Sol ushın da ósekshiden qashaman,
Waz keshin shekpennen, tutsa etekten.

OTAR JIYEMURATOV

(Óz dóretpemnen)