Azərbaycan elmlər akademiyasi I. NƏSİMİ adina diLÇİLİK İnstitutu



Yüklə 3,43 Mb.
səhifə1/19
tarix14.01.2018
ölçüsü3,43 Mb.
#20715
  1   2   3   4   5   6   7   8   9   ...   19


AZƏRBAYCAN ELMLƏR AKADEMİYASI

İ. NƏSİMİ ADINA DİLÇİLİK İNSTİTUTU
İSMAYIL ORUC OĞLU MƏMMƏDOV
AZƏRBAYCAN DİLİNİN

ETNOQRAFİK LEKSİKASI

M O N O Q R A F İ Y A


BAKI - «ELM» - 2008
Nəslimizə dayaq olmuş ilk müəllimim, özümü hər zaman borclu bildiyim ağbirçək anama – Züleyxa Allahverdi qızına ithaf edirəm.

Monoqrafiya AMEA Nəsimi adına Dilçilik İnstitutunun Elmi Şurasının 26 noyabr 2008-ci il tarixli qərarı ilə çap olunur.


İsmayıl Oruc oğlu Məmmədov, filologiya elmləri doktoru, professor. Azərbaycan dilinin etnoqrafik leksikası. «Elm», 2008.
Elmi redaktoru: Azərbaycan MEA-nın həqiqi üzvü, filologiya elmləri doktoru, professor Ağamusa Axundov

Rəyçilər: Filologiya elmləri doktoru, pro­fessor Qəzənfər Kazımov

Filologiya elmləri doktoru, profes­sor Bayram Əhmədov

Fil.e.d., professor İsmayıl Oruc oğlu Məmmədovun bu əsərə qədər bir çox monoqrafiya, lüğət və dərs vəsaitləri nəşr olunmuşdur.

«Azərbaycan dilinin etnoqrafik leksikası» onun 12-ci kitabıdır.

Dilçi və etnoqraflar ümumən azərbaycanşünaslar üçün gərəkli ola biləcək bu monoqrafiya Azərbaycan dilinin ən qədim leksikologiyanın etnoqrafik söz və ifadələrinin yaranması və inkişaf tarixi, xalqımızın soykökü, maddi və mənəvi mədəniyyət tarixinə həsr olunur. Onun xalqımızın dili, tarixi, etnoqrafiyası ilə maraqlananlar üçün də faydalı olacağına inanırıq.

Ö N S Ö Z
Hər bir dilin leksikası müəyyən sahə leksikalarından ibarətdir. Doğrudur, bütün sahə leksikaları dilin ümumi leksikası əsasında formalaşıb inkişaf edir. Lakin hər bir sahənin özünəməxsus xüsusiyyətləri də var. Ayrı-ayrı sahə lek­sikalarının tədqiqi ümumilikdə dilin leksik sisteminin öyrə­nilməsinə böyük xidmət göstərir. Buna görə də dilçilikdə, o cümlədən də türkologiyada bu problemin şərhinə dair çoxlu əsərlər, dissertasiyalar yazılmışdır. Sahə leksikaları arasında etnoqrafik leksika mərkəzi yer tutur. Etnoqrafik leksikanın öyrənilməsi xalqın mədəniyyətinin, onun adət və ənənələrinin, muəyyən mərasimlərinin izahına xidmət edir. Bu əsərdə Azərbaycan dilində işlənən etnoqrafik leksikaya aid sözlər tədqiqata cəlb olunmuş, onlar müəyyən mahələr üzrə qrup­laşdırılmış, yaranma üsulları qeyd olunmuşdur. Monoqrafiyada nəzər- diqqəti cəlb edən əsas cəhət budur ki, etnoqrafik leksikaya aid sözlərin təhlilini vermək üçün bu sözlərin arxasında duran varlıqlar, hərəkətlər də izah edilmişdir.

Azərbaycan xalqının maddi və mənəvi mədəniyyəti, məişəti ilə əlaqədar tarixi və müasir planda yazılmış bir çox əsərlərin tarixi, etnoqrafik araşdırmalar kimi əhəmiyyəti böyükdür. Lakin Azərbaycan dilçiliyində etnoqrafiya terminləri hələ də indiyə kimi tədqiq olunmamışdır. Məhz buna görə də. Həmin mə­sələnin həlli leksikologiyanın sahələr üzrə öyrənilməsi, həm də termin yaradıcılığının dilimizin imkanlarına əsasən aparılması baxımından təqdirəlayiqdir. Heç də təsadüfi deyil ki, türko­logiyada terminoloji leksikanın da tədqiqinə böyük diqqət yetirilmiş, xüsusən də etnik- mədəni tarixi aspekt haqqında, ictimai- siyasi terminologiyanın formalaşması və inkişafı, daha sonra isə terminoliji lüğətlərin tərtibi prinsipləri barədə geniş bəhs edilmişdir.

Azərbaycan dilinin etnoqrafik leksikasının sahələrinin araşdırılması, bu leksika əsasında söz yaradıcılığının / termin yaradıcılığının/ apa­rıcı mövqeyinin öyrənilməsi və etnoqrafik leksikanın tematik, struktur- semantik, funksional- üslubi sinxron / qismən diaxron/, habelə etnik- mədəni tarixi planda da linqvistik təhlili monoqrafiyanın əsas məqsədi olmuşdur.

Leksikologiya və terminologiya sahəsində etnoqrafik lek­sikanın tədqiqat obyekti kimi seçilməsi, şübhəsiz ki, dilçi­liyimizin bəzi məsələlərinin həlli üçün faydalı ola bilər.

- Dilin müasir və tarixi leksikologiyasının, termi­nolo­giya­sı­nın öyrənilməsində;

- Azərbaycan dilinin qohum və qohum olmayan dillər ilə əlaqəsini aşkar etməkdə;

- Azərbaycan xalqının tarixi/ maddi və mənəvi mədəniyyəti və etnoqrafiyası/, dili haqqında qiymətli materialların aşkara çıxarılmasında;

- Azərbaycan dilinin orfoqrafiya, izahlı, etnoqrafik, dialek­toltji, tarixi, etimoloji, frazeoloji və s. lüğətlərinin tərtibində;

- Türk dilləri leksikasının konkret və ümumi-nəzəri məsə­lə­lərinin şərhində;

- Türk xalqlarının maddm və mənəvi mədəniyyətlərindəki eyni, yaxın və oxşar cəhətlərin aşkarlanmasında;

- Azçrbaycan ədəbi dilinin bədii üslubunun, təbiətinin ümumən açılmasında, səciyyələndirilmsində;

- Söz yaradıcılığında dilimizin milli imkanlarını fəal­laş­dır­maqda, aşkarlamaqda.

Etnoqrafiya xalqımızın tarixinin, dilinin özgünlunlüyünü, qə­dimliyini əks etdirən bir güzgüdür. Maddi və mənəvi mədə­niyyət leksikasının öyrənilməsi, iəqdimi tarixşünaslıq, /soykök, folklorşünaslıq və dilçiliyə aid bəzi məsələlərin həllində vacibdir. Etnoqrafik leksikanın tədqiqi həmçinin Azərbaycan xalqının mənəvi dünyası ilə maddi mədəniyyəti, məişəti ara­sındakı vəhdəti, təbii mühitin və yaşayış tərzinin mənəvi var­lığımızda əksini, dünyabaxışı və təfəkkür tərzinə münasibət məsələlərini açıb göstərməyə imkan verir.

Tədqiqat zamanı araşdırıcı aşağıdakı məsələlərə də diqqət yetirmişdir:

- Etnoqrafik leksikaya aid söz və terminləri müəyyən­ləş­dir­mək, müxtəlif mənbə və məxəzlərdən / habelə ayrı- ayrı böl­gələrdən/ toplamaq;

- Etnoqrafik leksikanı ayrı- ayrı sahələrə, tematik qruplara bölmək, təsnifat aparmaq;

- Leksik materialı qohum türk dilləri ilə, habelə başqa sis­temli qonşu dillərin lüğət materialları ilə müqayisə etmək;

- Etnoqrafik sözlərin izahlı, etnoqrafik, habelə ikidilli lüğət­lərdə verilməsinin pritnsip və üsullarını müəyyənləşdirmək;

- Bütövlükdə dilin leksik sistemində müxtəlif nitq hissə­lə­rinə məxsus etnoqrafik mahiyyətli sözlərin, lüğəvi vahidlərin müəy­yənləşdirilməsi;

- Klassik və müasir bədii ədəbiyyatda, folklor nümunə­lərin­də etnoqrafik leksikanın neytral və üslubi mövqeyini göstərmək;

- Etnoqrafizmlərin leksik, morfoloji, orfoqrafik normalar möv­qeyindən təsbit olunması / kodifikasiyası/;

- Etnoqrafik sözlərin terminoloji sözyaratma prosesində mən­zərəsini göstərmək;

- Etnoqrafizmlərin yaradılmasının üsul və yollarını / leksik, morfo­loji, sintaktik/ tədqiq etmək.

Əsərin tədqiqi zamanı dilçiliyin nəzəri və təcrübəsi, ümumi və konkret sahə­lərinə aid elmi nailiyyət və təcrübələrdən geniş şəkildə istifadə olunmuşdur. Araşdırmanın nəzəri əsasını dil və dil­çilik ba­rə­də mülahizələr, sinxronik və diaxronik aspektə əsas­lanan müqayisəli- tarixi metod təşkil edir. Müəllif monoq­rafiyada tematik, təsviri, müqayisəli metoddan, təsnifat, sis­tem­ləşdirmə, qarşılaşdırma üsullarından istifadə etmişdir.

Monoqrafiyanın nəzəri əsası kimi Ə. Dəmirçizadə, M.Ş. Şi­rə­­liyev, S.Cəfərov, M.Hüseynzadə, Ə.Ə.Orucov, C.V. Qəh­rə­ma­nov, A.M.Qurbanov, A.A.Axundov, T.İ. Ha­cı­yev, V.İ. Aslanov, Ə.M.Cavadov, Ə.Z.Abdullayev, A.Q.Ələkbərov, M.İ.İs­la­mov, R.C.Məhərrəmova, M.Ş.Qasımov, M.İ.Adilov, Z.Əlizadə, K.N. Vəliyev, H.Ə.Həsənov, E.İ.Əzizov, N.M. Xudiyev, Q.İ. Mə­­şə­diyev, N.Q.Cəfərov və b. Azərbaycan dil­çilərinin, V.V. Radlov, N.K.Dmitriyev, N.A.Baskakov, A.N. Kononov, V.A. Qord­levski, A.M.Şerbak, E.R.Tenişev, A.A.Yuldaşev, N.Z. Ha­cıyeva, K.M.Musayev, R.Q.Axmet­yanov kimi türkoloqların əsərləri, mülahizələri tədqiqatçının diqqət mərkəzində olmuş­dur.

Azərbaycan dilinin etnoqrafik leksikası bu günə qədər monoqrafik yolla Azərbaycan dilçiliyində araşdırılmamışdır. Müəllifin müşahidələrindən belə bir qənaət hasil olur ki, hər bir xalqın varlığını, təbiətini onun dili, adət-ənənələri maddi və mənəvi mədəniyyəti, həyat tərzi və məişəti, peşə və təsərüffat məşğuliyyəti sahələri ilə də ölçməliyik. Əsərdə sənət, peşə və məşğuliyyət növlərinə, mənəvi mədəniyyət / mərasim və adət-ənənələrə, folklora, oyun adlarına/ toxunulmaqla bərabər, həmçinin xalçaçılıq, papaqçılıq, dərzilik və s. sənətlərin xalqın mənəvi dünyası, təfəkkürü, estetik-etik dünyagörüşləri ilə əla­qəsi el-ulusumuzun mənəviyyatının, zövqünün burada əksi kimi məsələlərdən də bəhs edilmiş, bu sahslsrls bağlı bir çox ifadələrin, terminlərin yaranış təcrübəsinə. Yeri gəldikcə eti­mo­logiyasına da səy edilmişdir. Etnoqrafik leksika dilin lüğət tərkibində ən çox etnik milli cəhətləri əks etdir­məkdə vacib qədim leksik təbəqələrdən biridir. Bu leksikanın toplanılıb təhlil olunması ən təxirəsalınmaz elmi problem kimi dilçiliyimizdə öz tədqiqini gözləyir. Araşdırmada geyim , ye­mək, oyun, mərasim adları, məişət, xalq təbabəti leksikası təhlil edilir və habelə etnoqrafiyanın başqa sahələrinə də müraciət olunur. Təbii haldır ki. Müəllif Azərbaycan xal­qı­nın mənəvi dünyasından - adət – ənənələrindən, mövsüm və mərasimlərindən danış­maq­la onların ictimai, xəlqi, bədii ma­hiy­yətinə, xalqımızın qədim tarixli inamlarına, tapınışlarına geniş yer vermiş, maddi və mənəvi mədəniyyət leksikasının Azərbaycan xalqının soykökünün, bu gün yaşadığımız əra­zidə və tarixi Azərbaycan torpaqlarında da aborigenlər ol­ma­ğımızı öyrənmək, qətiləşdirib təsdiqləmək işində ölçü­yəgəlməz faktlar kimi rolunu göstərmişdir. Tədqiqatda nə­zər-diqqəti cəlb edən cəhətlərdən biri də söz yaradıcılığı pro­sesində etnoqrafik leksikanın bütünlükdə lüğət tərkibini zən­ginləşdirmə işində mərkəzi yer tutması faktının aydınlıığı ilə, incəlikləri ilə çatdırılmasıdır. Əsərdə toy və yas məra­simlərinə aid leksika, oyun, geyim, yemək adlarını bil­di­rən sözlər, həmçinin maddi mədəniyyətin toxuculuq, xalçaçılıq, çörəkçilik, atçılıq kimi peşə və sənət. Təsərrüfat növlərinin adlarına aid bəzi leksik vahidlər, terminlər əsasında Azər­bay­can dilinin leksikologiyasından tematik söz qrupları şək­lində bəhs edilir.

Etnoqraflar və dilçilər üçün gərəkli ola biləcək bu əsər Azərbaycan xalqının soykökü ilə, qədim maddi və mənəvi mədəniyyəti ilə, eləcə də ana dilimizin lüğət tərkibinin milli cəhətdən mənzərəsi ilə maraqlanan mütə­xəs­sis­lər üçün də faydalıdır. Tədqiqat Azərbaycan dilinin leksiko­lo­giya­sına aid xüsusi kurs kimi universitet və başqa ali mək­təblərdə dərs vəsaiti funksiyasını da yerinə yetirə bilər.

Müəllif Azərbaycan dilinin etnoqrafik sözlərinin tədqiqi ilə 15 ilə yaxındır ki, səmərəli şəkildə məşğuldur.

Müəllif uzun illərdir ki, Azərbaycan MEA Nəsimi adına Dilçilik İnstitutunda leksikologiyap. Lüğət və terminologiya, üsldubiyyat sahəsində tədqiqat işləri aparır. Araşdırmanın ob­yekti Azərbaycan dilinin etnoqrafik leksikasıdır. Bu leksikaya aid sözlər, ifadələr. Terminlər etnoqrafiyaya / eləcə də tarix və arxeologiyaya/ aid elmi və bədii ədəbiyyatdan, folklor nümu­nə­lərindən, dialektoloji, orfoqrafiya, izahlı və ikidilli lüğətlərdən, başqa türk dillərinə aid elmi əsərlərdən, Azərbaycanın ayrı-ayrı mahallarından / Şəki-Qax-Zaqatala, Lənkəran, Qarabağ, Gəncə-Qazax, Göyçə, Naxçıvan və s./ bölgələrindən toplanmış etnoqrafik faktlar və arxiv və muzey materiallarından götürülmüşdür.

Müəllif tədqiqat zamanı tematik, təsviri, müqayisəli me­tod­dan istifadə entmiş, elmi cəhətdən dolğun bir əsər yazmışdır.



G İ R İ Ş
Bu gün bizə həll olunmuş kimi görünən problemlərə, məsələn, elə leksikaya aid bir çox araşdırmalar yazılmışsa da, buna qayıtmağa yenə də ehtiyac yaranır. Bir həqiqət də şəksizdir ki, dilçilik elmi özünün bütün nəzəri- elmi probleslərinin tam mənada tədqiqat edib qurtarmayınca həm ana dilinin tədrisində, həm də elə bu elmin özündə çətinliklər aradan qalxmayacaq. Bəllidir ki, leksika dilin ən mütəhərrik, dəyişən, dinamik sahəsidir. « Dilin leksik sistemində dəyişkənlik tez müşahidə olunur»- desək yanılmarıq. Leksika dilin lüğət tərkibinin barometridir. Bu mənada da Azərbaycan dilinin müxtəlif amillərlə bağlı leksikasındakı dəyişiklikləri, yeniləşməni izləmək vacibdir. Dəyişmə deyərkən biz burada lüğət tərkibində yeni- yeni mənalar qazanan sözləri, yəni mənaca inkişaf, məna daralmasını, yaxud ictimai- siyasi quruluşla, eləcə də başqa amillərlə bağlı müəyyən sözlərin köhnəlməsi, passiv lüğət fonduna keçməsi kimi məsələləri nəzərdə tuturuq. Ümumən leksikaya aid edə bildiyimiz mənaca inkişaf problemini, söz yaradıcılığı və b. problemləri etnoqrafik leksika əsasında da izləməyə böyük ehtiyac duyulur.

Etnoqrafiya xalqın tarixi, soykökü, məişəti, təsərrüfat, peşə-sənət, fəaliyyət və məşğuliyyət sahələri ilə, onun mənəviyyatı, yaradıcı zəkası, təxəyyülü və s. ilə bağlı bir elm sahəsi olduğu üçün təbiidir ki, bu sahə etnoqraflar, tarixşünaslar, flok­lorşünaslar, dilçilər, musiqişünaslar, dilçilər, musiqişünaslar və sənətşünasların müştərək tədqiqat obyekti sayılır. Bir cəhəti də nəzərə almış olsaq ki, etnoqrafiya elminin sahələri olduqca zəngin, geniş və çoxşaxəlidir, onda biz konkret məsələlər əsasında daha çox söz deyə bilərik.



Etnoqrafiya tarix elminin xalqları / etnosları/, onların məişəti, adət ənənələrini, etnik birliklərin yaranması inkişafı prosesini, xalqın etnogenezini etnik tarixini, ən qədim ictimai həyat mədəniyyət formalarını, mədəni sərvətlər xalq yaradıcılığı sahəsindəki mütərəqqi ənənələri öyrənən bölməsidir. Bu baxımdan Azərbaycan xalqının etnoqrafiyası çox zəngindir. Dünyada ilk yaşayış məskənlərindən olmuş qədim doğma diyarımızın yaşı minilliklərlə ölçülür. Ellərimizin mənəvi və maddi dünyasını, mədənqiyyətini, peşə və sənət, məşğuliyyət, həyat tərzi və fəaliyyət sahələrini öyrənən etnoqrafiya elminin sirlərinə varmaq, əlbəttə, bu gün mütəxəssislərin, eləcə də bütün ziyalıların ürəkdən gələn arzusudur.

Azərbaycan xalqının maddi və mənəvi mədəniyyətinin təməl daşları ən geci Mezolit dövründən qoyulmuşdur. Azərbaycanda əkinçiliyin, maldarlığın, bağçılığın, sənətkarlığın və s. sahələrin çoxəsrlik tarixi var. Qobustan, Gəmiqaya, Dəlidağ və dicər qayaüstü rəsmlər də həmin dövrün canlı şahidləridir. Qobustan qayaüstü təsvirlərində ovçuluq, maldarlıq, xalq yaradıcılığı / yallı rəsminin təsviri, qavaldaş və s./ və digər sahələr böyük əksəriyyət təşkil edirsə, Dəlidağ qayaüstü rəsmləri, təsvirləri bitkiçiliklə əkinçiliyiə də onun ayrı-ayrı sahələrinə həsr edil­mişdir. Neolit, xüsusilə eneolit dövründə Azərbaycan xalqının məşğuliyyət sahələri genişlənmiş, oturaq həyat tərzinə keçmiş azərbaycanlıların təsərrüfatında əkinçilik maldarlıqla yanaşı, bağçılın və üzümçülük də əsas yer tutmaba başlamışdır. «Azərbaycan etnoqrafik baxımdan ölkəmizin / burada söhbət keçmiş SSRİ ərazisindən getmişdir, daha dəqiqi isə dünyanın –İ.M./ ən zəngin və maraqlı guşələrindən biridir. Xalqımız minilliklər boyu Qafqaz və qədim Şərq xalqları ilə iqtisadi və mədəni əlaqədə olmuşdur. Yaranan böu qarşılıqlı təmasda xalqımız çox şey əxz etmiş və faydalanmışdır. Xalqımız də öz növbəsində həmin xalqların tükənməz təsərrüfat həyatına, maddi və mənəvi mədəniyyətinə çox şeylər bəxş etmiş, onu daha da zənginləşdirmişdir.1

Rus alimi P.M.Jukovski məşhur « Kulğturnıe rassteniə i ix sorodoçi» əsərində bildirir ki, hələ Xett konfederasiyası zamanı / yəni təxminən 4500 il öncə- İ.M./ Azərbaycanın sarı heyvası Kiçik və Ön Asiya ölkələrinə ixrac edilirdi.2 Bəhs olunan həmin dövrdə artıq inək, öküz, qoyun. Keçi, it və toyuqdan başqa, əcdadlarımızın həyatında ev atı da xüsusi rol oynayırdı. Axı Azərbaycan dünyada yalnız sarı heyvanın deyil, eləcə də ən qədim atçılığın vətənlərindən biridir. Bu dəyərli faktlar isə özlüyündə Azərbaycan xalqının həyat və məişətinin özəyini təşkil etmiş göstərilən gərəkli etnoqrafik amillər kimi, ayrı-ayrı etnoqrafiya terminlərinin yaranması taritxini xatırladan minil­liklərin və yüzilliklərin məhsulu olmasına etibarlı dəlillərdir.

Azərbaycan xalqının qədim maddi və mənəvi mədəniyyəti, həyat tərzi, geniş mənada tarixi, etnoqrafiyası barədə verdiyimiz giriş xarakterli məlumatlar ana dilimizin lüğət tərkibinin qiymətli qədim bir layı olan xüsusi adların-onomastik adların da zənginliyi və özünəxaslığı kimi keyfiyyətlərini təsdiq edir. Onomatik adlar təkcə xüsusi adlar olaraq qalmır, onlar Azər­baycan xalqının və onun etnoqrafiyasının qədim tarixi salna­məsinin ən maraqlı səhifələridir, «toxunulmaz müqəddəsləri»dir /B.Budaqov/. Belə sözlər Azərbaycan dilinin lüğət tərkibinin qızıl fondunu yaratmış və qədim söz yatırlarıdır. Tarixin xoş, əmin-aman çağlarında da, dolanbac yollarında da xalqımızın ictimai- siyasi, iqtisadi-mədəni, ədəbi əlaqə və münasibətləri öz qüvvəsini saxlamışdır. Şübhəsiz ki, dilin lüğətində bu müna­sibətlə sözlər milli tərkibcə, formaca, sayca artmış, büllurlaşmış, müəyyən tematik qruplar halında sabitləşmiş və hər sahənin özünə uyğun lüğət materialı yaranmışdır. Etnoqrafizmləri toplamaq üçün mənbə, qaynaq rolunu aşıq yaradıcılığı, ümumən folklor, elmi-tarixi mənbələr, bədii ədəbiyyat, dialekt və şivələr, arxeoloji qazıntılar oynamışdır.

Etnoqrafik leksika dilin lüğət tərkibində daha çox etnik milli cəhətləri. Keyfiyyət və göstəriciləri əks etdirən əsas qədim leksik təbəqələrdən biridir. Etnoqrafik leksikanın araşdırılması, top­lanıb təhlil olunması ən təxirəsalınmaz elmi problem kimi dilçiliyimizdə öz tədqiqini gözləyir.

Əlbəttə, bəlli həqiqətdir ki, etnoqrafik leksika üçün ən qiy­mətli qaynaqlar, mənbələr folklor materialları, qayaüstü, qəbir­üstü yazılar, rəsmlər, şifahi xalq yaradıcılığı, elmi-tarixi, ədəbi-bədii mənbələr, şivə materialları, arxeoloji qazıntılar sayılır.

Bir cəhəti də əlavə etmək istərdik ki, orta əsrlərə aid hekayə janrında olan bir çox ədəbi mənbələr /məxəzlər/-qaynaqlar da tarixi- etnoqrafik məlumatlar da bu günümüz üçün etnoqrafiya baxımından az əhəmiyyət daşımır: « Narədu s arxivnım materialom bolğşoe znaçenie dlə vsəkoqo roda Kav­kazo­ved­çeskix issledovanii imeöt povestvovatelğnıe literaturnıe istoçniki. U nas inoqda nedooüenivaöt gti istoçniki, sçi­taöt, çto-esli istoçniki opublikovanı, to oni uje kak bı terəöt svoe znaçenie, svoö noviznu i stanovətsə vsem izvestnı. Gto, odnako, doleko ne tak literaturnıe povest­vo­va­telğnıe istoçniki / burada həmçinin – İsvestiə inostran­nıx evropeiskix pisatelei zanimaöt qlavnoe mesto/ bıli i budut odnim iz osnovnıx vidov istoçnikov dlə istoriçeskix i gtnoqrafiçeskix issledovanii. Priçem v rəde sluçaev gti istoçniki əvləötsə ne zamenimımi. Oni osobenno vajnı dlə izuçeniə tex istoriçeskix periodov, kotorıe slabo osveşenı dokumentalğnımi i inımi materialami, xranəşimsə v arxi­vax, ili sovsem ne otrajenı v nix».1

Təbiidir ki, etnoqrafiya elmi hər bir xalqa məxsus özümlü cəhətləri, məişəti, həyat tərzini, maddi və mənəvi mədəniyyət, adət-ənənə və s.-ni öyrəndiyi üçün, araşdırdığı üçün burada lüğət tərkibindən söhbət gedərkən birinci növbədə həmin xalqın qədim milli söz və deyimləri, onomastik ad sistemi nəzərdə tutulmalıdır. Lüğət fondu milli tərtib cəhətdən, əsasən, Azər­baycan dilinin sözləri əsasında yaranır.

Azərbaycan xalqının tarixinin, soykökünün və eləcə də dilinin tarixinin əsaslı şəkildə, sistemli öyrənilməsini bu günədək ləngidən səbəbləri araşdıranda etnoqrafiyamızın, həmçinin ədəbi dil tariximizin lazımi qədər tədqiq olunmaması da yada düşür. Bu fikrə eynilə etnoqrafiya ilə bağlı bir çox sahələri hələ lpyiqincə aşkar­lan­mamasını da aid etmək olar. Etnoqrafik leksikanın bütövlükdə müasir tədqiqatlar içərisində hələ də tamam-kamal öyrənil­mə­məsi, təsnif edilməməsi, etnoqrafik materialların tam halda cəmlənməməsi hələ bu sahədə görməli olacağımız işlərin vacibliyini xatırladır.
Heç şübhəsiz, «Azərbaycan etnoqrafiyası»nın /Azərbaycan etnoqrafiyası» adlanan 3 cildlik etnoqrafiya kitabı nəzərdə tutu­lur – İ.M./ meydana çıxması çoxcildlik Azərbaycan tarixi, ədəbiyyatı, memarlıq və incəsənət tarixi, dil tarixi, habelə xalq təsərrüfatı tarixinin yazılmasına xeyli kömək edəcək, həmin əsərlərin daha da dolğunlaşmasına və zənginləşməsinə səbəb olacaqdır.1

Belə bir acı həqiqəti etiraf etməliyik ki, etnoqrafik leksi­kanın, etnoqrafiya terminlərinin dilçilik baxımından tədqiq olunmaması bir yana dursun, bu günə qədər Azərbaycan etnoqrafiya elmi bütövlükdə /özü də ən vacib sahələri – etnoqrafik və etnik tarix problemləri nəzərdə tutulur/ araşdırıb son söz deyilməmişdir. Təsadüfi deyil ki, etnoqrafik-tarixi tədqiqatlarda dönə-dönə bu məsələyə işarə olunur: «Etnoqrafiya elmi münasibətlərin öyrənilməsində, xalqların etnogenezinin, etnik psixologiyanın tədqiqində xüsusi əhəmiyyət kəsb edir. Təəssüf ki, tarixşünaslığımızda Azərbaycan xalqının etno­gene­zisinin və etnik tarixinin sistemli şəkildə və xüsusi problem kimi öyrənilməsinə hələ də başlanmamışdır.1 (Əlbəttə, son 10-15 ildə müstəqillik qazandığımız dövrdə ürəkaçan araşdırmalar yazılıb nəşr olunmaqdadır).

Milli zəmində termin yaradıcılığı da prinsip etibarilə ayrı-ayrı fəaliyyət sahələrindən kənarda olan proses deyildir. Belə termin yaradıcılığının əsasını təşkil edən fəaliyyət sahələri, hər şeydən əvvəl, etnik təfəkkürün məhsulu kimi meydana çıxır. Etnik təfəkkür qaynaqlarından qidalanan fəaliyyət sahələri isə hər hansı bir xalqın özünün həyatından, həyat tərzindən doğur. Hər bir xalqın həyatı nə qədər qədimdirsə, onun fəaliyyət sahələri də bi o qədər qədimlərə gedib çıxır. Müəyyən fəaliyyət sahəsinin for­malaşmasında ən zəruri şərtlərdən biri yeni informasiyadan ibarətdir. Məhz yeni informasiya sayəsində fəaliyyət sahələrinin fərqləndirici əlamətləri meydana çıxır. Bu fərqləndiricilik, hər şeydən əvvəl, fəaliyyət sahələrinə məxsus sözlərdə özünü göstərir. İnformasiya intensivliyi həmin sözlərin mənasını xüsusiləşdirir, konkretləşdirir. Beləliklə, hər bir fəaliyyət sahəsində özünəxas informasiya prosesinə uyğun ola­raq, xüsusi terminlər for­malaş­mağa başlayır. Terminologiyada intensiv informasiya zəiflədikdə onun sahə hüdudları da dağılır. Başqa sözlə. Xüsusi sahə təşkil edən terminlər öz semantika və anlayış xüsusiyyətlərinə görə ümumişlək leksikaya qarışır. Bu cəhətdən milli mənşəli terminlərlə əcnəbi dillərə məxsus ter­minlərin öz funksionallıqları var. Belə ki, intensiv infor­ma­siyanın zəifləməsi nəticəsində xalqın etnik təfəkkürü və məişət həyatı ilə bağlı olan milli terminlər etnoqrafik leksikaya çevrilir, əcnəbi terminlər isə ümumişlək leksika tərkibində alınma sözlər layı təşkil edir. Məsələn, milli mənşəli həvəngdəstə, ilmə, arğac, əriş kimi xalçaçılıq, cəhrə, daraq, iy, pilə, dükcə, iplik kimi qədim əyiricilik terminləri etnoqrafik leksikaya daxil olan vahidlərdəndir.

Etnoqrafik leksika dilin lüğət tərkibində daha çox etnik milli cəhətləri, keyfiyyət və göstəriciləri əks etdirməkdə əsas qədim leksik təbəqələrdən biridir. Etnoqrafik leksikanın araşdlırılması, toplanıb təhlil olunması və təxirəsalınmaz elmi problem kimi dilçiliyimizin qarşısında durur.

Bu mövzunun genişliyini, əhatəliyini, çoxşaxəliliyini nəzərə alıb biz ancaq maddi mədəniyyət leksikasının müəyyən bir qismini təşkil edən yemək, geyim, ev avadanlıqlarının, mətbəx əşyalarının /qab-qacaq adlarının/ adlarını, mənəvi mədəniyyət leksikasını /oyun adları, mərasim leksikası – toy, yas, sünnət mərasiminə aid sözlər, mifoloji. Dini leksika/, xalq təbabətinə aid leksikanı, habelə xalqımızın adət-ənənəsi, təfəkkür və mənəviyyatını, etiqad, inam və tapınışlarını özündə yaşadan, onu daha çox səciyyələndirən bəzi peşə-sənət növlərinə, təsərrüfat məşğuliyyətinin daha xarakterik sahələrinə aid termin və sözlərin bir hissəsini tədqiqatımıza cəlb etmişik. Bütünlüklə etnoqrafiya elmini təmsil edən maddi və mənəvi mədəniyyət, sosial münasibətlər sahələrinin, bütün peşə-sənət, təsərrüfat məşğuliyyəti sahələrini bildirən leksikanı əks etdirmək üçün təbiidir ki, neçə-neçə ciddi, cild-cild elmi-tədqiqat əsərləri, eitablar yazılmalıdır ki, bu da gələcək araşdırıcılarını gözləyir.

* * *

Biz dissertasiyanın ilk səhifələrində göstərdik ki, leksikanın ayrı-ayrı sahələr üzrə tematik qruplara ayırmaqla tədqqt işi son dərəcə perspektiv li bir elmi istiqamət kimi qiymətlidir. Heç də təsadüfi deyil ki, son zamanlar türkologiyada da ayrı-ayrı sahələr üzrə terminoloji leksikanın tədqiqinə böyük diqqət yeti­rilmiş, xü­su­sən də etnik-mədəni- tarixi aspekt haqqında, ictimai-siyasi termi­nologiyanın formalaşması və inkişafı, daha sonra isə ter­minoloji lüğətlərin tərtibi prinsipləri barədə geniş bəhs edilmişdir.1 Bundan başqa özbək dilçiliyində şivə mate­rial­ları əsasında adət-ənənə ilə bağlı sözlər, birləşmələr onomasioloji tədqiqata cəlb olunmuşdur.2

Dilçilikdə, xüsusən də türkoloji əsərlərdə etnoqrafik leksika və etnoqrafiya terminologiyası terminləri paralel işlənir. Etnoq­rafik sözlərin lüğətlərə. O cümlədən, Türk-rusca lüğətlərə daxil edilməsi zərurətini A.A.Yuldaşev də vacib hesab etmiş, maddi-mənəvi leksikanın/ etnoqrafik leksikanın/ işlənmə incəliyini. Bu leksik təbəqənin türk dilləri materialları əsasında demək olar ki, heç araşdırılmamasını da göstərmişdir. Tədqiqatçı yazır: «…bi­rin­cisi, bu sözlər /etnoqrafik sözlər – İ.M. /Həmin dildəki/ tərcümə olunan dil nəzərdə tutulur – İ.M./ başqa məna bil­dir­məyən realiyaları ifadə edir. İkincisi, xalqın maddi və mənəvi mədəniyyətini əks etdirir, üçüncüsü, bu terminlərin sırasında daha çox tarixi dəyəri olan, nadir, əvvəllər qeydə alınmamış sözlərə təsadüf olunur, dördüncxüsü. Ən əsaslısı isə bu leksika istər öz tərkibi və xarakteri etibarilə, istərsə də ədəbi normaya mənsubluğu baxımından, demək olar ki, bütün türk dillərində hələ az öyrənilmişdir».3


Yüklə 3,43 Mb.

Dostları ilə paylaş:
  1   2   3   4   5   6   7   8   9   ...   19




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə