AZƏRBAYCAN RESPUBLİKASININ KƏND TƏSƏRRÜFATI NAZİRLİYİ
Q Ə R A R
№ 16-Q
Bakı şəhəri 30
mart 2015-ci il
Azərbaycan Respublikası Kənd Təsərrüfatı Nazirliyinin rayon (şəhər)
kənd təsərrüfatı idarəsinin əsasnaməsinin təsdiq edilməsi haqqında
Azərbaycan Respublikası Prezidentinin 2005-ci il 20 aprel tarixli 226
nömrəli Fərmanı ilə təsdiq edilmiş “Azərbaycan Respublikasının Kənd
Təsərrüfatı Nazirliyi haqqında Əsasnamə”nin 18.5-ci bəndini rəhbər tutaraq
QƏRARA ALIRAM:
1. Azərbaycan Respublikası Kənd Təsərrüfatı Nazirliyinin rayon (şəhər)
kənd təsərrüfatı idarəsinin əsasnaməsi təsdiq edilsin (əlavə olunur).
2. Hüquq, kadr və yerli orqanlarla iş şöbəsi (Xudayət Həsənli) bu
qərarın Hüquqi Aktların Dövlət Reyestrinə daxil edilməsi üçün 3 gün
müddətində Azərbaycan Respublikasının Ədliyyə Nazirliyinə təqdim
olunmasını təmin etsin.
Əsas: Hüquq, kadr və yerli orqanlarla iş şöbəsinin müdiri Xudayət
Həsənlinin nazir müavinləri İlham Quliyev və Seyfəddin Talıbovla
razılaşdırılmış 2015-ci il 13 mart tarixli 12/M-18 nömrəli Təhriri məruzəsi.
Nazir
Heydər Əsədov
Azərbaycan Respublikası kənd təsərrüfatı
Nazirinin 2015-ci il 30 mart tarixli 16-Q
nömrəli qərarı ilə təsdiq edilmişdir.
Azərbaycan Respublikası Kənd Təsərrüfatı Nazirliyinin Rayon (Şəhər)
Kənd Təsərrüfatı İdarəsi haqqında
Ə S A S N A M Ə
I. Ümumi müddəalar
1. Azərbaycan Respublikası Kənd Təsərrüfatı Nazirliyinin (bundan sonra
- Nazirlik) Rayon (Şəhər)Kənd Təsərrüfatı İdarəsi (bundan sonra-Kənd
Təsərrüfatı İdarəsi) “Aqrar sahədə idarəetmənin təkmilləşdirilməsi və
institusional islahatların sürətləndirilməsi ilə bağlı tədbirlər haqqında”
Azərbaycan Respublikası Prezidentinin 2014-cü il 16 aprel tarixli 152 nömrəli
Fərmanının 1-ci hissəsinə uyğun olaraq yaradılmışdır və Nazirliyin müstəqil
struktur qurumudur.
2. Kənd Təsərrüfatı İdarəsi öz fəaliyyətində Azərbaycan Respublikasının
Konstitusiyasını, Azərbaycan Respublikasının qanunlarını, Azərbaycan
Respublikası Prezidentinin fərman və sərəncamlarını, Azərbaycan
Respublikası Nazirlər Kabinetinin qərar və sərəncamlarını və digər normativ
hüquqi aktları, Nazirliyin Əsasnaməsini və Kollegiyasının qərarlarını,
Azərbaycan Respublikası kənd təsərrüfatı nazirinin (bundan sonra-Nazir)
əmr və qərarlarını, habelə bu Əsasnaməni rəhbər tutur.
3. Kənd Təsərrüfatı İdarəsi öz vəzifələrini yerinə yetirərkən və
hüquqlarını həyata keçirərkən Nazirliyin aparatının struktur bölmələri,
strukturuna daxil olan qurumlar və tabeliyindəki təşkilatlar (bundan sonra -
Nazirliyin qurumları), hüquqi şəxslər, yerli icra hakimiyyəti və yerli
özünüidarəetmə orqanları, habelə qeyri-hökumət təşkilatları ilə qarşılıqlı
əlaqədə fəaliyyət göstərir.
4. Kənd Təsərrüfatı İdarəsi müstəqil balansa, qanunvericiliyə uyğun
olaraq sərəncamında olan dövlət əmlakına, xəzinə hesablarına, üzərində
Azərbaycan Respublikasının dövlət gerbinin təsviri, Nazirliyin və öz adı həkk
olunmuş möhürə, müvafiq ştamplara və blanklara malikdir.
5. Kənd Təsərrüfatı İdarəsinin saxlanılması xərcləri və fəaliyyəti
Azərbaycan Respublikasının dövlət büdcəsinin vəsaiti və qanunvericilikdə
nəzərdə tutulan digər mənbələr hesabına maliyyələşdirilir.
II. Kənd təsərrüfatı idarəsinin fəaliyyətinin istiqamətləri
6. Kənd Təsərrüfatı İdarəsinin fəaliyyət istiqamətləri aşağıdakılardır:
6.1. rayonda (şəhərdə) aqrar siyasətin həyata keçirilməsini təmin edir;
6.2. bitkiçilik və heyvandarlıq sahələrinin intensiv inkişafının təmin
edilməsi üçün həyata keçirilən tədbirlərdə iştirak edir, yeni texnika və
texnologiyaların, innovativ inkişaf üsullarının tətbiq edilməsi barədə
Nazirliyə təkliflər verir;
6.3. kənd təsərrüfatı məhsullarının istehsalı və emalı üzrə müəssisələrin
yaradılması və yenidən qurulması barədə təkliflər verir, onların fəaliyyətinin
dəstəklənməsi üzrə səlahiyyətləri çərçivəsində tədbirlər görür;
6.4. yerli icra və özünüidarəetmə orqanları ilə birlikdə rayon (şəhər)
ərazisində kənd təsərrüfatı təyinatlı torpaqlardan, o cümlədən yay və qış
otlaq sahələrindən səmərəli istifadə edilməsinə, onların keyfiyyətinin
yaxşılaşdırılmasına nəzarətin həyata keçirilməsində iştirak edir, torpaqların
münbitliyinin bərpası və mühafizəsi üçün tədbirlər görür və bu sahədə
Nazirliyə təkliflər verir;
6.5. rayonda (şəhərdə) kənd təsərrüfatına dövlət dəstəyi tədbirlərini
təşkil edir, kənd təsərrüfatı məhsulları istehsalçılarına subsidiyaların
verilməsi, onların mineral gübrələrə, kənd təsərrüfatı texnikalarına, habelə
qüvvəli və şirəli yemlərə olan ehtiyaclarının ödənilməsi və bu sahədə
qanunvericiliklə müəyyən edilmiş güzəştlərdən istifadə edə bilmələri üçün
Nazirliyin digər qurumları ilə birlikdə tədbirlər həyata keçirir;
6.6. rayonda (şəhərdə) aqrar sahə ilə bağlı problemlərin həllində
mərkəzi icra hakimiyyəti orqanlarının yerli struktur bölmələri ilə səmərəli
əməkdaşlıq qurur;
6.7. aqrar bölmədə yerli istehsalçıların dəstəklənməsi üçün tədbirlər
görür, kənd təsərrüfatı məhsullarının istehsalçılarına və emalçılarına
aqroservis, aqrokimyəvi, informasiya-məsləhət və digər xidmətlərin
göstərilməsinə köməklik edir;
6.8. Nazirliyin rayonda (şəhərdə) fəaliyyət göstərən yerli qurumlarının
fəaliyyətini əlaqələndirir;
6.9. Qanunvericiliklə müəyyən edilmiş digər istiqamətlərdə fəaliyyət
göstərir.
III. Kənd təsərrüfatı idarəsinin vəzifələri
7. Kənd Təsərrüfatı İdarəsi bu Əsasnamə ilə müəyyən edilmiş fəaliyyət
istiqamətlərinə uyğun olaraq aşağıdakı vəzifələri yerinə yetirir:
7.1. torpaqların münbitliyinin bərpası və mühafizəsi sahəsində, səmərəli
aqrotexniki, fitosanitar və eroziyaya qarşı mübarizə tədbirlərinə dair təkliflər
vermək, onların həyata keçirilməsində iştirak etmək;
7.2. kənd təsərrüfatına yararlı torpaqlardan yüksək məhsul əldə
olunması və həmin torpaqların mühafizəsinin təmin edilməsi məqsədilə
mütərəqqi torpaqbecərmə işlərinin aparılması, texnika və texnologiyaların
tətbiqi ilə bağlı tədbirlərdə, habelə kənd təsərrüfatı təyinatlı torpaq
sahələrinin identifikasiyası əməliyyatlarının aparılmasında iştirak etmək;
7.3. kənd təsərrüfatı məhsulları istehsalçılarına torpağın münbitliyinin
bərpa edilməsi, gübrə və digər kimyəvi preparatlardan düzgün və səmərəli
istifadə edilməsi, habelə aqrokimyəvi xidmətin təşkili ilə bağlı qabaqcıl
təcrübə barədə məlumat (bilgilər) vermək, bunları kitabçalar formasında
nəşr etdirərək onlara pulsuz çatdırmaq;
7.4. rayon (şəhər) üzrə kənd təsərrüfatı ilə bağlı məlumat bazası
yaratmaq, o cümlədən müvafiq informasiya sistemi və proqram təminatları
texnologiyalarından istifadə etməklə kənd təsərrüfatı təyinatlı torpaqlar,
torpaqların keyfiyyət və kəmiyyət göstəriciləri, uqodiyası, torpaq və bitki
örtüyü və digər kateqoriyadan olan torpaqlar haqqında coğrafi məlumatlar,
kənd təsərrüfatı məhsullarının istehsal və satış qiymətləri haqqında məlumat
bazası yaratmaq, məlumatların yenilənməsi, müvafiq təhlillərin aparılması və
hesabatların hazırlanması üçün tədbirlər görmək;
7.5. kənd təsərrüfatı sahəsində rayonda (şəhərdə) investisiya
layihələrinin həyata keçirilməsi barədə Nazirliyə təkliflər vermək;
7.6. rayonda (şəhərdə) genetik modifikasiya olunmuş bitkilər istisna
olmaqlayeni bitki sortlarının yetişdirilməsi və yayılması üçün tədbirlər
görmək;
7.7. kənd yerlərində infrastrukturun inkişafı və sosial problemlərlə bağlı
məsələlərin həllində, o cümlədən müvafiq dövlət proqramlarının həyata
keçirilməsində iştirak etmək;
7.8. əkinə yararlı torpaqların aqrokimyəvi tədqiqatların aparılmasına, su
təchizatının yaxşılaşdırılmasına dair tədbirlər həyata keçirmək, torpaqların
meliorativ cəhətdən yaxşılaşdırılmasında iştirak etmək;
7.9. heyvanların xüsusi təhlükəli xəstəliklərinin profilaktikası,
diaqnostikası, epizootiya əleyhinə tədbirlərin həyata keçirilməsində, dövlət
sərhədinin
buraxılış
məntəqələrində
nəqliyyat
vasitələrinin
dezinfeksiyasında, baytarlıq preparatlarının ehtiyatının yaradılmasında iştirak
etmək;
7.10. heyvanların və əhalinin sağlamlığı üçün xüsusi təhlükə yaradan
heyvanların, heyvan mənşəli məhsulların və xammalın müəyyən edilməsi,
götürülməsi və məhv edilməsi ilə bağlı həyata keçirilən tədbirlərdə iştirak
etmək;
7.11. rayonda (şəhərdə) bitki mühafizəsi və karantini sahəsində
tədbirlərin, pestisidlərin ehtiyatının yaradılması və saxlanması ilə bağı
tədbirlərin həyata keçirilməsində iştirak etmək;
7.12. rayonda (şəhərdə) aqrar sahədə yeni istehsal və emal sahələrinin
yaradılması ilə bağlı araşdırmalar aparmaq və bununla əlaqədar təkliflər
hazırlayıb Nazirliyə təqdim etmək;
7.13. yerli icra hakimiyyəti orqanları ilə birlikdə kənd təsərrüfatı
məhsullarının satış yarmarkalarının daha səmərəli təşkili, onların fəaliyyətinə
normal şəraitin yaradılması, əhali və fermerlər üçün əlverişli ticarət mühitinin
formalaşdırılması, yarmarkalarda sui-istifadə hallarının aradan qaldırılması
üçün tədbirlər görmək və bu barədə Nazirliyə təkliflər vermək;
7.14. rayonda (şəhərdə) ailə kəndli təsərrüfatlarının və aqrar sahədə
fəaliyyət göstərən sahibkarlıq subyektlərinin inkişafını dəstəkləmək;
7.15. Azərbaycan Respublikasının digər rayon(şəhər)kənd təsərrüfatı
idarələri ilə əməkdaşlıq etmək, təcrübə mübadiləsi aparmaq, qabaqcıl
təcrübənin öyrənilməsi və rayonda tətbiqi üçün tədbirlər görmək;
7.16. rayonda(şəhərdə) kənd təsərrüfatı informasiya-məsləhət
xidmətinin fəaliyyətinin təşkilində iştirak etmək və bu sahədə xidmətlərin
təkmilləşdirilməsi üçün Nazirliyə təkliflər vermək;
7.17. rayonda (şəhərdə) kənd təsərrüfatı kooperativlərinin, iri fermer
təsərrüfatlarının yaradılmasını və inkişafını təşviq etmək;
7.18. aqrar sahədə rayon (şəhər) əhalisinin məlumatlandırılması üçün
idarənin elektron informasiya ehtiyatının (internet saytının) yaradılmasını və
onun daimi yenilənməsini təmin etmək;
7.19. Nazirliyin strukturuna daxil olan dövlət xidmətlərinin və
tabeliyindəki təşkilatların yerli bölmələrində işin təşkili ilə bağlı vəziyyəti
öyrənmək, ümumiləşdirmək və nəticələr üzrə Nazirliyə təkliflər vermək;
7.20. kənd təsərrüfatı məsələləri üzrə vətəndaşların qəbulunu aparmaq,
onların müraciətlərinə baxmaq və nəticələr barədə Nazirliyə məlumat
vermək;
7.21. hüquqi maarifləndirmə işini həyata keçirmək, idarənin fəaliyyəti
haqqında ictimai maraq kəsb edən məlumatları kütləvi informasiya
vasitələrində yaymaq;
7.22. “elektron kənd təsərrüfatı” informasiya sistemlərinin tətbiqi üzrə
tədbirlər görmək, o cümlədən Nazirliyin təqdim etdiyi elektron xidmətlərin
təşviq edilməsi və onlardan istifadə sahəsində kənd təsərrüfatı məhsulları
istehsalçıları
və
emalçılarının
bacarıqlarının
artırılması,
onların
təlimatlandırılması məqsədi ilə fəaliyyət istiqamətlərinə uyğun olaraq
tədbirlər görmək;
7.23. fəaliyyət istiqamətlərinə uyğun olaraq qanunvericiliklə nəzərdə
tutulmuş digər vəzifələri həyata keçirmək.
IV. Kənd təsərrüfatı idarəsinin hüquqları
8. Kənd Təsərrüfatı İdarəsi bu Əsasnamə ilə müəyyən edilmiş vəzifələrini
yerinə yetirmək üçün aşağıdakı hüquqlara malikdir:
8.1. rayonda (şəhərdə) kənd təsərrüfatının inkişaf etdirilməsinə dair
Nazirliyə təkliflər vermək və Nazirliklə razılaşdırmaqla rayonun aidiyyəti
orqanları qarşısında məsələ qaldırmaq;
8.2. rayonda (şəhərdə) aqrar sahənin inkişafına dövlət dəstəyi
mexanizmlərinin hazırlanmasında və həyata keçirilməsində iştirak etmək;
8.3. rayonda (şəhərdə) kənd təsərrüfatının davamlı inkişafının təmin
edilməsi üçün dövlət orqanlarının yerli bölmələri ilə birlikdə tədbirlər həyata
keçirmək;
8.4. müvafiq sahədə mütəxəssislərin hazırlanması, peşəkarlığının və
ixtisasının artırılması, habelə İdarənin strukturunun və fəaliyyətinin
təkmilləşdirilməsi barədə Nazirliyə təkliflər vermək;
8.5. səlahiyyətlərinin həyata keçirilməsi ilə bağlı məhkəmələrdə iddiaçı
və cavabdeh qismində iştirak etmək;
8.6. fəaliyyət istiqamətlərinə uyğun məsələlərlə bağlı dövlət orqanlarının
yerli bölmələri, özünüidarəetmə qurumları, aqrar sahədə fəaliyyət göstərən
hüquqi və fiziki şəxslərə sorğular göndərmək, təhlillər və ümumiləşdirmələr,
habelə tədqiqatlar aparmaq, analitik materiallar hazırlamaq, onların
nəticələrinə uyğun olaraq Nazirliyə məlumatlar və təkliflər vermək;
8.7. yığıncaqlar, seminarlar və digər tədbirlər keçirmək, sərgilər təşkil
etmək;
8.8. müstəqil ekspertləri və mütəxəssisləri öz fəaliyyətinə cəlb etmək;
8.9. fəaliyyət istiqamətlərinə uyğun olaraq qanunvericiliklə nəzərdə
tutulmuş digər hüquqları həyata keçirmək.
V. Kənd təsərrüfatı idarəsinin fəaliyyətinin təşkili
9. İdarənin strukturu və ştat vahidlərinin sayı Nazir tərəfindən müəyyən
edilir və təsdiq olunur.
10. İdarənin fəaliyyətinə “Dövlət qulluğu haqqında” Azərbaycan
Respublikasının Qanunu ilə müəyyən edilmiş qaydada Nazir tərəfindən
vəzifəyə təyin edilən və vəzifədən azad edilən rəis rəhbərlik edir.
Rəis bu Əsasnamə ilə müəyyən edilmiş vəzifələrin yerinə yetirilməsinə
və hüquqların həyata keçirilməsinə şəxsən məsuliyyət daşıyır.
11. Rəisin “Dövlət qulluğu haqqında” Azərbaycan Respublikasının
Qanunu ilə müəyyən edilmiş qaydada Nazir tərəfindən vəzifəyə təyin edilən
və vəzifədən azad edilən bir müavini vardır.
12. İdarə rəisi məzuniyyətdə və ya ezamiyyətdə olduqda, yaxud digər
üzürlü səbəblərdən öz vəzifəsini icra edə bilmədikdə onun səlahiyyətlərini
müəyyən olunmuş qaydada rəisin müavini həyata keçirir.
13. Kənd Təsərrüfatı İdarəsinin rəisi:
13.1. İdarənin fəaliyyətini təşkil edir və ona rəhbərlik edir;
13.2. Kənd Təsərrüfatı İdarəsinin işçilərini (rəis müavini istisna olmaqla)
“Dövlət qulluğu haqqında” Azərbaycan Respublikasının Qanununa və
Azərbaycan Respublikasının Əmək Məcəlləsinə uyğun olaraq Nazirliklə
razılaşdırılmaqla vəzifəyə təyin edir və vəzifədən azad edir.
13.3. idarənin işçiləri arasında vəzifə və iş bölgüsü aparır;
13.4. İdarə üzrə Nazirliyin Kollegiyasında müzakirə olunmalı məsələləri
müəyyənləşdirərək, bu barədə təkliflərini Nazirliyin rəhbərliyinə təqdim edir,
bu Əsasnamənin 2-ci bəndində göstərilən qanunvericilik aktlarının və
təşkilati-sərəncamverici sənədlərin icrasını təmin edir;
13.5. İdarədə çalışan işçilər (rəis müavini istisna olmaqla) barəsində
həvəsləndirmə və intizam tənbehi tədbirləri görür;
13.6. Nazirliyin rəhbərliyinin etibarnaməsi (vəkalətnaməsi) əsasında
məhkəmələrdə Nazirliyi təmsil edir;
13.7. İdarəyə daxil olan məktub, ərizə, şikayət və təkliflərə
qanunvericiliyə uyğun qaydada baxılmasını təşkil edir;
13.8. İdarədə kargüzarlıq işlərinin aparılmasını və məxfilik rejimini təmin
edir;
13.9. İdarəni rayonun (şəhərin) dövlət və yerli özünüidarəetmə
qurumlarında, habelə hüquqi və fiziki şəxslərlə münasibətlərdə və
məhkəmələrdə etibarnaməsiz təmsil edir.
13.10. İdarədə çalışan işçilər tərəfindən icrası məcburi olan əmrlər və
göstərişlər verir, onların icrasına nəzarəti həyata keçirir;
14. İdarənin əməkdaşları bu Əsasnamənin tələblərinin pozulmasına
görə Azərbaycan Respublikasının qanunvericiliyinə müvafiq olaraq
məsuliyyət daşıyırlar.
Dostları ilə paylaş: |