AzTU-nun nəzdində «Maşınşünaslıq»
Elmi-Tədqiqat Mərkəzinin
STRUKTURU
1. ETM-in strukturu və ştat cədvəli direktor tərəfindən hazırlanaraq, ETM-in Elmi Şurasında
müzakirə edilir və AzTU-nun rektoru tərəfindən təsdiq edilir.
2. ETM-in əsas strukturu rəhbər-idarəedici heyətdən, şöbə, laboratoriya və bölmələrdən
ibarətdir.
3. Rəhbər-idarəedici heyət aşağıdakılardan ibarətdir: - direktor; - direktor müavini.
4. Maşınşünaslıq elmi-tədqiqat mərkəzi hazırda dövlət büdcəsindən maliyyələşdirilən
aşağıdakı laboratoriyalardan ibarətdir: - «
Müasir maşin və qurğular
» ETL; - «
Robot və
manipulyatorlar
» ETL; - «Tribotexnika» ETL.
5. Mühüm xalq təsərrüfatı əhəmiyyətli problemlərin, qrandların, dövlətin sifarişi ilə olan
təsərrüfat hesablı müqavilələrin yerinə yetirilməsi üçün ETM-də müqavilə müddətinə və
müqavilənin maliyyə vəsaiti hesabına rektorun əmri ilə şöbə, sahə laboratoriyası və qrup
təşkil oluna bilər.
6. Şöbə, laboratoriya və qruplar ETM-nin struktur vahidləridir. Onlar bu Nizamnaməyə
uyğun olaraq fəaliyyət göstərirlər: - Şöbə, laboratoriya və qrupların tərkibi ştatda olan
rəhbərdən, elmi işçilərdən şöbə müdiri, laboratoriya müdiri, baş elmi işçi, aparıcı elmi işçi,
böyük elmi işçi, elmi işçi, kiçik elmi işçi) və texniki işçilərdən (baş laborant, laborant, baş
mühəndis, mühəndis-proqramçı,), ştat əvəzçiliyi şərti ilə əvəz edilən vəzifənin 0,25 və 0,5 şt.
vahidi həcmində əmək haqqı ödənilməklə əsas iş vaxtı daxilində ali məktəbin professor-
müəllim və tədris üzrə köməkçi heyətindən ibarətdir; - Şöbə, laboratoriya və qrupların işində
tələbələrin, maqistrantların, doktorantların və gənc tədqiqatçıların iştirakı nəzərdə tutulur,
elmi-tədqiqat mərkəzinin elmi axtarışlarına uyğun mövzuda dissertasiya üzərində işləyən
aspirantlar, elmi-tədqiqat, kurs, diplom işləri və layihələri yerinə yetirən zaman universitetin
tələbələri, həm əlavə haqq ödənilmədən, həm də təhsildən azad vaxtda elmi-tədqiqat
mərkəzində tutulan vəzifənin 0,25 və 0,5 şt. vahidi həcmində əmək haqqı ödənilməklə; -
Şöbə, laboratoriya və qrupların yaradılması, yenidən təşkili və ləğvi bu Nizamnaməyə uyğun
olaraq ETM-nin Elmi Şurasının qərarı əsasında həyata keçirilir; - Laboratoriya və qrupların
elmi fəaliyyəti ümumuniversitet seminar və iclaslarında müzakirə olunur. Lazım gəldikdə
laboratoriya və qrupların elmi fəaliyyəti ETM-in seminar və iclaslarında müzakirə olunur; -
Şöbə, laboratoriya və qrupların işinə ümumi rəhbərliyi şöbə müdiri həyata keçirir, onların
fəaliyyətinə dair məsələləri direktorun nəzərinə çatdırır və ETM-in Elmi Şurasının
müzakirəsinə çıxarır.
7. Müdirlər və qrup rəhbəri rəhbərlik etdikləri qurumda elmi-tədqiqat işlərinin vaxtında və
yüksək keyfiyyətlə yerinə yetirilməsinə məsuliyyət daşıyırlar. Şöbə və laboratoriya müdirləri -
vəzifələrinə müvafiq sahələrdə çalışan görkəmli alimlər (bir qayda olaraq elmlər doktorları)
müsabiqə yolu ilə yaxud içtimai əsaslarla rəhbərlik edəcəkləri qurumların rəyi nəzərə
alınmaqla ETM-in Elmi Şurası tərəfindən seçilir və hər 5 ildən bir Elmi Şura tərəfindən yeni
müddətə seçilə bilər.
8. Laboratoriya müdiri şöbə müdiri qarşısında, şöbə müdiri isə ETM-in direktoru qarşısında
müvafiq qurumlardakı fəaliyyətlərinə görə məsuliyyət daşıyırlar.
9. Şöbə və laboratoriya xaricində fəaliyyət göstərən qrup rəhbəri birbaşa, şöbədə fəaliyyət
göstərən qrup rəhbəri isə şöbə müdirinin təqdimatı ilə ETM-nin direktoru tərəfindən təyin
olunur. Qrup rəhbəri qrupun fəaliyyəti üzrə bilavasitə tabe olduğu qurum qarşısında
məsuliyyət daşıyır.