Dan ulduzunu görməyən
Öldü getdi, öldü yazıq,
Dan ulduzunu görməmiş.
Qızıl gülləyə tuş oldu
Qızıl gülləri dərməmiş.
Karvanqıran göz elədi
Karvanqırana allandı.
Yoruldu, bezdi azmaqdan,
Gedər-gəlməzə yollandı.
Gedər-gəlməzin yolları
Qızarmış üfüq kimidi.
Qızılı toz dirəkləri
Qan içmiş şəfəq kimidi.
Gedər-gəlməzin yolları
Yekə palıdlarla dolu.
Yolun üstündə göy üzü
Qara buludlarla dolu.
Göyə baxın, göyə baxın,
Yoxsa, vallah, şimşək çaxmaz.
Vallah, biz göyə baxmasaq,
Tanrı üzümüzə baxmaz...
Astanbəyli M. Dan ulduzunu görməyən : şeir // Ulduz. - 1991. - № 1. – S. 30.
Dostları ilə paylaş: |