“Mədəniyyət dünyası”.-2009.-№18.-S.31-34.
HEYDƏR ƏLİYEV FONDUNUN
MƏDƏNİYYƏTİMİZƏ GÖSTƏRDİYİ QAYĞI
Pərvin Nəsirova,
Azərbaycan Dövlət Mədəniyyət
və İncəsənət Universitetinin dissertantı
Ayrı-ayrı həyat sahələrinə, xüsusilə də mədəniyyətimizə yabançı ünsürlərin nüfuzu bu istiqamətdə
təxirəsalınmaz tədbirlərin həyata keçirilməsini vacib etmişdi. Və bu işdə 2004-cü ildə yaradılmış Heydər Əliyev
Fondunun fəaliyyəti əvəzsiz rol oynadı.
Azərbaycanın ictimai-siyasi həyatına milli-mənəvi dəyərlərimizin müdafiəçisi, hamisi kimi daxil olan bu
fondun və onun prezidenti, millət vəkili Mehriban Əliyevanın qısa zaman kəsiyində apardığı çoxşaxəli fəaliyyəti
mədəniyyətimizin nəinki yad ünsürlərin təsirindən hifz etdi, həmçinin onu yenidən dünyanın ən inkişaf etmiş və
mükəmməl mədəniyyətləri sırasına daxil olmasına imkan yaratdı.
Azərbaycan mədəniyyətinin dirçəlişini və tərəqqisini istəyən hər bir vətəndaş təsdiq edə bilər ki, buna qədər
istər muğam sənətinə, istər tarixi abidələrimizə, istərsə də digər maddi-mənəvi sərvətlərimizə münasibət başqa idi.
2007-ci ildə Azərbaycan Mədəniyyətinin Dostları Fondunun təsisçiliyi ilə Heydər Əliyev Fondunda
"Muğam" jurnalının ilk nəşrinin və "Muğam-antologiya" layihəsi çərçivəsində bir sıra nəşrlərin, о cümlədən
Fətullah Şirvaninin "Musiqi məcəlləsi", Səfiəddin Urməvinin "Kitabül-ədvar" və "Şərəfiyyə risaləsi" adlı nəşrlərin
təqdimat mərasimi keçirildi. Mehriban Əliyevanın həmin mərasimdəki çıxışından məlum oldu ki, "Muğam" jurnalı
bütövlükdə muğama həsr olunmuş ilk nəşrdir.
Heydər Əliyev Fondunun dəstəyi ilə televiziyada "Muğam müsabiqəsi"nin keçirilməsi nəinki ölkəmizdə,
yaxın və uzaq ölkələrdə də rəğbətlə qarşılanır. Bu müsabiqə muğam sənətinin istedadların gənc nəsli tərəfindən
davam və inkişaf etdirilməsinə, eyni zamanda yüksək səviyyədə təbliğinə və nümayişinə hərtərəfli şərait
yaratmışdır.
2004-cü il mayın 10-dan fəaliyyətə başlayan Heydər Əliyev Fondu ulu öndərin həyat və fəaliyyət
fəlsəfəsinin, onun elmi-nəzəri irsinin, azərbaycançılıq ideologiyasının öyrənilməsi, təbliği, gələcək nəsillərə
çatdırılması yolunda üzərinə götürdüyü şərəfli missiyanın uğurla həyata keçirilməsi üçün səylə çalışmaqdadır.
İctimai təşkilat olan Heydər Əliyev Fondu qarşıya qoyduğu, reallaşdırdığı məqsəd və vəzifələrin
əhəmiyyətinə, miqyasına görə ölkəmizdə analoqu olmayan yeni tipli qurumdur. Bacarıqlı təşkilatçılığı, üzərinə
götürdüyü vəzifəyə sadiqliyi, iradəsi, ardıcıl və qətiyyətli fəaliyyəti nəticəsində Fond həm respublikamızda, həm də
xaricdə, nüfuzlu beynəlxalq qurumlarda böyük hörmət qazanmışdır.
Heydər Əliyev Fondunun çoxsaylı məqsədlərindən biri də milli-mənəvi dəyərlərimizin qorunması və
Azərbaycan mədəniyyətinin dünyada geniş təbliği ilə bağlıdır. 2005-ci ildə Azərbaycan milli musiqisinin
incilərindən olan muğamın inkişafı və təbliği ilə bağlı ciddi addımlar atılmışdır. Fondun prezidenti,
YUNESKO-nun xoşməramlı səfiri Mehriban xanım Əliyevanın təşəbbüsü ilə görkəmli muğam ustaları dəvət
olunmaqla "dəyirmi masa" keçirilmiş və Bakı şəhərində Beynəlxalq Muğam Mərkəzinin yaradılması qərara
alınmışdır. Muğam ustaları ilə mütəmadi görüşlərdən, məsləhətləşmələrdən sonra Beynəlxalq Muğam Mərkəzinin
layihəsi tərtib edilmiş və Fondda onun təqdimatı keçirilmişdir. Onun üçün münasib yer seçilmiş, Azərbaycan
Prezidenti İlham Əliyevin və YUNESKO-nun Baş direktoru cənab Koişiro Matsuuranın iştirakı ilə binanın təməli
qoyulmuşdur.
Dahi bəstəkarımız Üzeyir Hacıbəyovun 120 illik yubileyi münasibətilə Heydər Əliyev Fondunun və
Azərbaycan Mədəniyyətinin Dostları Fondunun "Space" televiziyası vasitəsilə həyata keçirdiyi, bir ilə yaxın davam
edən muğam müsabiqəsi, sözün əsil mənasında, ölkəmizin mədəni həyatında yaddaqalan hadisəyə çevrilmişdir. Bu
layihəni, onun gedişatını, son nəticəsini dünyanın bir çox ölkələrində də milyonlarla muğamsevər izləmişdir. Dövlət
Filarmoniyasında, sonra isə Heydər Əliyev adına Sarayda Azərbaycan Prezidentinin də təşrif buyurduğu yekun
konsertləri muğam sənətinin inkişafı və qorunması istiqamətində atılan mühüm tədbir olmuş, bu məsələyə həm də
dövlət himayəsinin əyani təzahürünə çevrilmişdir.
Tanınmış ifaçıların iştirakı ilə ardıcıl olaraq muğam axşamlarının təşkili də sənətsevərlər, milli musiqi
həvəskarları tərəfindən dərin razılıq hissi ilə qarşılanır, bu ənənə yüksək dəyərləndirilir.
Heydər Əliyev Fondunun köməyi ilə Azərbaycanın görkəmli yazıçı və pedaqoqu Abdulla Şaiqin ev
muzeyində əsaslı təmir-bərpa işləri aparılmış və muzey yenidən fəaliyyətini davam etdirmişdir.
2005-ci ildə Heydər Əliyev Fondunun dəstəyi ilə Bakıda və Parisdə dahi bəstəkarımız Üzeyir Hacıbəyovun
120 illik yubileyi keçirilmiş, dünya şöhrətli ifaçılar - xalqımızın böyük dostu Mstislav Rostropoviç və xanımı
Qalina Vişnevskayanın 50 illik birgə fəaliyyətinə həsr edilmiş albom və disklər hazırlanmışdır. Mstislav
Rostropoviçin, Şostakoviçin, Bülbülün yubileyinə həsr olunmuş beynəlxalq festivallar keçirilmişdir. Azərbaycan
mədəniyyətinin xaricdə təbliği istiqamətində daha bir uğurlu addım görkəmli bəstəkarımız Firəngiz Əlizadənin
Parisdə yaradıcılıq gecəsinin keçirilməsi olmuşdur.
Dahi Üzeyir Hacıbəyovun "Arşın mal alan" əsərinin səhnələşdirilməsi haqqında Vyana kamera teatrı ilə
razılığın əldə edilməsi də xalqımızın milli mədəniyyətinin dünyada təbliği yolunda mühüm hadisədir. Hazırda
"Hacıbəyov" şərti adı altında böyük layihə üzərində intensiv iş gedir. Bu layihədə Üzeyir bəyin bütün əsərlərinin, o
cümlədən klavirlərinin yenidən çap olunması ilə yanaşı, onların CD və DVD-də buraxılması da nəzərdə
tutulmuşdur.
2005-ci ilin martında Fondun təşkilatçılığı ilə Bakıda keçirilmiş "Fərqli mədəniyyətlərin qovuşuğu"
beynəlxalq sərgi-konfransı, apreldə təşkil edilmiş "Azərbaycan: keçmişin və bu günün sivilizasiyalararası dialoqu"
mövzusunda I Beynəlxalq konfrans respublikamızın mədəni həyatında diqqətəlayiq hadisəyə çevrildi. Bu
konfranslarda Mehriban xanımın, eləcə də Latın Mədəniyyəti Akademiyasının Baş katibinin, Roma Klubunun sədri
- İordaniya Haşimilər Krallığının şahzadəsinin, YUNESKO-nun Baş direktorunun müavininin, dünyadakı yəhudi
təşkilatlarının rəhbərlərinin çıxışları Şərqlə Qərbin, Avropa ilə Asiyanın qovuşuğunda yerləşən Azərbaycanın yeri
və roluna, mövqeyinə verilən yüksək qiymətlə də yadda qaldı.
Belə tədbirlər, dünyanın nüfuzlu təşkilatları ilə əlaqələri Fondun qazandığı nüfuzun, onun rəhbərinə
dünyada getdikcə artmaqda olan hörmət və ehtiramın göstəricisi olmaqla yanaşı, milli mədəni irsimizin təbliğində
də əvəzsiz rol oynayır.
Rusiyanın "Puşkin kitabxanası" Fondu ilə ötən ildən yaranmış əməkdaşlıq da ölkəmizdə elm, təhsil və
mədəniyyətin inkişafına, rus dili vasitəsilə dünya mənəvi-mədəni xəzinəsinə çıxış əldə edilməsinə yönəldilmiş çox
dəyərli hadisədir. Heç kəsə sirr deyil ki, Rusiya ilə 200 ildən çox davam etmiş birgə yaşayış xalqımızın
siyasi-ictimai, elmi-mədəni dünyagörüşünə böyük təsir göstərmiş, xalqımız rus dili vasitəsilə dünya mədəni irsi ilə
tanış olmuş, həm də öz dəyərli ədəbi-bədii fikir nümunələrini dünyaya tanıda bilmişdir. Müstəqillik qazanmış
ölkəmizin hazırkı mərhələdə Rusiyanın oxşar strukturları ilə belə münasibətləri olduqca təqdirəlayiq,
əhəmiyyətlidir. Keçmiş ittifaq dağıldıqdan sonra bu sahədə 15 ildən çox davam edən boşluğu məhz Heydər Əliyev
Fondu doldurmağa başlamışdır. Heydər Əliyev Fondunun ümdə məqsədlərindən biri ulu öndərimizin zəngin irsinin,
Vətən qarşısında misilsiz xidmətlərinin, milli dövlətçilik ideyalarının dərindən öyrənilməsi, təbliği, yeni nəsillərə
çatdırılmasıdır.
2005-ci ildə ümummilli liderimiz Heydər Əliyevin həyat və fəaliyyətinə həsr olunmuş, məlumatın həcmi və
geniş əhatə dairəsi ilə fərqlənən "heydar-aliyev.org" adlı domen internet portalı yaradılmışdır. Portalda ulu
öndərimizin Azərbaycana rəhbərlik etdiyi dövrdəki nitqləri, kütləvi informasiya vasitələrinə verdiyi müsahibələri
öz əksini tapmışdır. Azərbaycan, ingilis və rus dillərində təqdim olunan bu portal işçi qrupu tərəfindən mütəmadi
olaraq yeniləşdirilir.
Bu silsilədən növbəti layihə "heydar-aliyev-foundation.org" domeni olan, yüksək zövqlə tərtib edilmiş
Heydər Əliyev Fondunun internet səhifəsinin yaradılması olmuşdur. Zəngin internet səhifəsində Fondun yaranma
tarixi, fəaliyyəti, beynəlxalq əməkdaşlıq əlaqələri haqqında geniş materiallar yerləşdirilmişdir. Burada Fondun
mükafatları, fəxri qonaqlar, kitabxana, videoqalereya, fotoalbom bölmələri də maraqla oxunur.
Fondda Heydər Əliyevə həsr edilmiş ekspozisiya yeni eksponatlarla zənginləşdirilmiş, Fonda daxil olmuş
200-dən artıq müxtəlif hədiyyə, 600-dən çox kitab, 200-dən artıq jurnal və qəzet, çoxsaylı fotolar, disk və kasetlər
elmi əsaslar üzrə işlənmişdir. Belə bir davamlı iş gələcəkdə Heydər Əliyev Fondunda ulu öndərin fəaliyyətinin
bütün istiqamətlərini əks etdirən materialların toplanıb mərkəzləşdirilməsinə imkan verəcəkdir.
Ötən illərdə Fondun ekspozisiyası ilə bir neçə min qonaq tanış olmuşdur. Fondu ziyarət edən dövlət və
hökumət başçıları, görkəmli siyasətçilər, mədəniyyət, incəsənət, din xadimləri Heydər Əliyev haqqında, Fondun
fəaliyyəti barədə öz təəssüratlarını, ürək sözlərini bölüşmüşlər.
Fondun ən uğurlu layihələrindən hesab edilən "Qarabağ həqiqətləri" silsiləsi buna bariz nümunədir.
Beynəlxalq ictimaiyyətə ünvanlanan və ingilis dilində nəşr edilən, xaricdəki diplomatik nümayəndəliklərimiz,
diaspor təşkilatlarımız və digər kanallarla bütün dünyaya yayılmış "Qarabağ həqiqətləri" toplusu "Qarabağın tarixi
haqqında məlumat", "Qarabağ münaqişəsinin başlanması", "Xocalı soyqırımı", "Azərbaycana qarşı erməni
təcavüzünün nəticələri", "Erməni terror təşkilatlarının Azərbaycana qarşı fəaliyyəti" kitabçalarından ibarətdir.
Fondun Prezidenti Mehriban xanımın 2004-cü ilin avqustundan YUNESKO-nun xoşməramlı səfiri kimi
fəaliyyəti də xalqımız, dövlətimiz üçün, sözün əsil mənasında, dəyərli, faydalı olmuşdur. Qeyri-maddi irsin
qorunması sahəsində YUNESKO ilə Azərbaycanın əməkdaşlığı xüsusilə əhəmiyyətlidir. YUNESKO Azərbaycan
muğamını bəşəriyyətin şifahi və qeyri-maddi irsinin şah əsərləri siyahısına daxil etmişdir. İçərişəhər, Qız qalası isə
çox nadir memarlıq incisi kimi dünya mədəni irs siyahısına salınmışdır. Orta əsrlərdə yaşamış alimlərin
Azərbaycanda saxlanılan əlyazmalarından xüsusi əhəmiyyət daşıyan 3-ü Mehriban xanımın səyi ilə 2005-ci ildə
YUNESKO tərəfindən Dünya Yaddaşı Proqramının beynəlxalq registrinə daxil edilmişdir.
Парвин Насирова
Роль Фонда Гейдара Алиева
в развитии культуры Азербайджана
Резюме
Одна из главных целей Фонда Гейдара Алиева связана с защитой национально- духовных ценностей
и пропагандой культуры Азербайджана Фонд Гейдара Алиева, который был основан 10 мая 2004 года. Фонд