MALİYYƏ SAVADLILIĞI LAYİHƏSİ
Maliyyə savadlılığı maliyyə istehlakçılarının öz rifah hallarını yaxşılaşdıra bilmək üçün maliyyə
məhsulları və konsepsiyalarını başa düşmək, maliyyə risklərini və imkanlarını qiymətləndirmək,
məlumatlı seçimlər etmək və digər səmərəli addımlar atmaq üzrə bacarıqlar toplusudur (İƏİT).
İnkişaf etmiş və etməkdə olan ölkələrin əksəriyyətində Maliyyə Savadlılığı (MS) üzrə müxtəlif
hədəf qrupları üçün orta məktəblərdə bu mövzuya həsr olunmuş müxtəlif formatlarda dərslər keçirilir,
MS-ə həsr olunmuş internet portalları yaradılır, KİV-də geniş miqyaslı kampaniyalar, bu sahədə təlimçilər
üçün treninqlər, konfranslar, dəyirmi masalar və s. aidiyyatı tədbirlər həyata keçirilir. Bütün bu işlər
dövlət qurumları, özəl sektor və vətəndaş cəmiyyətləri tərəfindən yerinə yetirilir.
Beynəlxalq təcrübədən görə bilərik ki, bir çox ölkələrdə MS üzrə dövlət proqramları və ya
strategiyalar mövcuddur və eyni zmanda MS-in təhsil proqramına əlavə edilməsi üzrə işlər aparılır.
Mərkəzi Banklar və kommersiya bankları fərqli hədəf qrupları üçün maarifləndirmə kampaniyaları
aparırlar. Bəzi ölkələrdə hətta MS üzrə məsləhət mərkəzləri də mövcuddur. MS-ə dair ictimaiyyət üçün
məlumatlandırıcı tədbirlər, təbliğat kampaniyaları, KİV-də verilişlər və digər müvafiq fəaliyyətlər icra
edilir. Müxtəlif hədəf qrupları üçün müxtəlif növ resurslarla zəngin portallardan istifadə edilir.
Bank əməkdaşları məktəblərə səfərlər edir və ya şagirdləri banklara dəvət edirlər, onlara qələm,
bloknot, şokolad, pul daxılları kimi kiçik hədiyyələr və ya əyani dərs vəsaitləri və maraqlı kitabçalar
verirlər. Həmçinin əsas dərs fənlərində istifadə oluna biləcək interaktiv oyunlar, quizlər, krossvordlar və
s. keçirirlər. Bundan başqa banklar tərəfindən rəsm və ya inşa müsabiqələrinin keçirilməsi tədbirlərin
daha da yaddaqalan olmasına xidmət edir. Sadaladığımız bütün bu tədbirlər maliyyə savadlılığı
məsələsinin vacibliyini bir daha vurğulayır.
Bankların bu işdə məqsədini (a) maliyyə və iqtisadi baxımdan daha savadlı və bacarıqlı
müştərilərin yetişdirilməsi, (b) uşaqların vasitəsilə valideynlərin də maarifləndirilməsi, (c) insanların
maliyyə davranışlarında dəyişikliyin edilməsi, (d) korporativ sosial məsuliyyət və (e) risklərin azaldılması
kimi icmallaşdırmaq olar.
Bütün bunları nəzərə alaraq Azərbaycan Respublikası Mərkəzi Bankı özünün təşkilati missiyasına
əassən 2010-cu ildən Maliyyə Savadlılığı üzrə layihənin icrasına start vermişdir. Əsas məqsədlərdən biri
kimi maliyyə və iqtisadi savadlılığın ictimai dəyər kimi tanıdılmasını qeyd etmək olar.
MB adından bu sahədəki işləri Tədqiqatlar və İnkişaf Mərkəzinin İnkişaf Departamenti həyata
keçirir. MS Layihəsinin əsas hədəf qrupları məktəblilər, geniş ictimaiyyət, iqtisadiyyat üzrə ixtisaslaşan
jurnalistlər və MB-ın əməkdaşları, bank işçiləri, bank işi üzrə təhsil alan tələbələri göstərmək olar.
İndiyə kimi İD tərəfindən MS sahəsində görülmüş işlərə beynəlxalq təcrübənin öyrənilməsi,
donor təşkilatlarla münasibət yaradılması, tələbə və jurnalistlər üçün maarifləndirici tədbirlərin
aparılması, Təhsil Nazirliyi ilə birgə məktəblərdə görüşlərin keçirilməsi, kurrikulum üçün tövsiyələrin
hazırlanması, “Banklar məktəblərə, məktəblilər banklara” adlı silsilə tədbirlərin keçirilməsi, VISA
təşkilatı və Vergilər Nazirliyi ilə birgə “İqtisadi futbol” interaktiv oyununun təşkil olunması, və ötən ilin
sonlarında Beynəlxalq Əmanət Günü adlı tədbirin keçirilməsini göstərmək olar.
MS sahəsində gələcək fəaliyyət istiqamətlərinə ölkənin sosial-iqtisadi inkişafının gücləndirilməsi,
Azərbaycanda bankçılıq sisteminin inkişafına dəstək, ölkədə iqtisadi və maliyyə savadlılığının artması,
maliyyə savadlılığının ictimai dəyər kimi tanınması və insanların davranışlarında dəyişikliyi vurğulamaq
olar. Bu fəaliyyət istiqamətlərinə uyğun olaraq hazırlanmış tədbirlər planına MS-ın qiymətləndirilməsi
üçün əhali arasında sorğu keçirilməsi, MS üzrə Strategiyanın hazırlanması, orta məktəblərdə maliyyə-
iqtisadiyyat sahəsində tədrisin təkmilləşdirilməsi, IV–VIII siniflər üçün maliyyə təhsili və maliyyə
bacarıqlarının gücləndirilməsinə dair fakültativ proqramların hazırlanması və “Banklar məktəblərə,
məktəblər banklara” silsilə tədbirlərinin davam etdirilməsini qeyd etmək olar.
Maliyyə Savadlılığı sahəsindəki İnkişaf Departamenin tərədaşları kimi Azərbaycan Kitabxana
Konfederasiyası (AKK), İqtisadi Əməkdaşlıq və İnkişaf Təşkilatı (OECD), Beynəlxalq Kitabxana
Assosiasiyaları Federasiyası (IFLA), Amerika Resurs Mərkəzi (ARC), Almaniya Beynəlxalq Əməkdaşlıq
Cəmiyyəti (GİZ), PricewaterhouseCoopers (PWC), Dünya Bankı (WB), Almaniya Əmanət Banklarının
Beynəlxalq Əməkdaşlıq Fondu (SBFIC) və Təhsil Nazirliyini (TN) vurğulamaq olar.
30.11.2012: Mərkəzi Bankın təşəbbüsü ilə Beynəlxalq Əmanət Günü keçirildi
Azərbaycan Respublikası Mərkəzi Bankının Tədqiqatlar və İnkişaf Mərkəzinin təşəbbüsü ilə
Almaniya Əmanət Banklarının Beynəlxalq Əməkdaşlıq Fondu (AƏBBƏF), Əmanətlərin Sığortalanması
Fondu və bir sıra kommersiya bankları (Access Bank, UniBank, Dəmir Bank və Bank Respublika)
“Maliyyə savadlılığı” layihəsi çərçivəsində Azərbaycanda ilk dəfə olaraq 31 oktyabr 2012-ci il tarixindən
“Beynəlxalq Əmanət Günü” ilə əlaqədar tədbirlərin keçirilməsinə başlanılmışdır.
30 noyabr 2012-ci il tarixində tədbirlərin nəticələrinə dair keçirilən mətbuat konfransında İnkişaf
departamentinin direktor müavini Natəvan Məmmədova bildirdi ki, noyabrın 8-dək keçirilmiş tədbirlərin
məqsədi əhalinin maliyyə savadlılığının artırılmasına xidmət etməkdir. Əmanət yığımları üçün qənaət
mədəniyyətinin aşılanması kiçik yaşlardan başlanıldığı üçün bu layihə əsasən məktəb şagirdlərinə
yönəlmişdir.
Tədbir çərçivəsində bank filiallarında, məktəblərdə uşaqlar üçün müxtəlif yarışlar, müsabiqələr,
maarifləndirici görüşlər keçirilmiş, promo materiallar paylanılmış, iştirakçı bankların ATM-lərində
videoçarxlar yayımlanmışdır. Ümumilikdə 40-dan çox məktəbdə və digər tədris ocaqlarında 6000-dən
artıq məktəblinin əhatə olunduğu tədbirlər keçirilmişdir.
Azərbaycan Respublikasının “Beynəlxalq Əmanət Günü”nün simvolik rəmzi əlində qəpiklə dolu
küpə tutan dələ, sloqanı isə “Toplayaraq böyü” devizi seçilmişdir. Dələyə adın verilməsi isə məktəblilərin
ixtiyarına buraxılmış və bununla bağlı müsabiqə elan edilmişdir. Bakı məktəblisi Tural Kərimov və
Sumqayıt məktəblisi Elnur Abdalov müsabiqənin qalibləri olmuşlar. Qaliblər müxtəlif hədiyyələrlə
mükafatlandırılmışdır.
Qeyd edək ki, Beynəlxalq Əmanət Günü ilk dəfə 1924-cü ilin oktyabr ayında İtaliyanın Milan
şəhərində 29 ölkənin nümayəndələrinin Beynəlxalq Konqresində qeyd olunmuşdur. Bundan sonra,
Azərbaycanda da bunun ənənə halını alacağı və bu günün hər il qeyd olunması planlaşdırılır.
20.09.2012:VISA, Azərbaycan Respublikası Mərkəzi Bankı və Azərbaycan
Respublikası Vergilər Nazirliyi ilə birgə “İqtisadi futbol” layihəsini həyata keçirir
VISA, FİFA-nın rəsmi sponsoru olaraq Azərbaycanda “İqtisadi futbol” adlı yeni öyrədici
interaktiv oyunu istifadəyə vermişdir. “İqtisadi futbol” oyunu gənclərin maliyyə savadlılığının artırılması
istiqamətində VISA-nın qlobal təşəbbüsünün tərkib hissəsidir. Bu dinamik və heyrətamiz oyun maliyyə
biliklərini artırır, məsuliyyətli və şüurlu büdcə yığımını öyrədir və vergilərin ödənilməsinin əhəmiyyətini
və qaydalarını izah edir. Layihə Azərbaycan Respublikası Mərkəzi Bankı və Azərbaycan Respublikası
Vergilər Nazirliyi ilə birgə həyata keçirilir.
“İqtisadi futbol” oyunu, dünyanın ən məşhur idman növü olan futbolu VISA-nın maliyyə
savadlılığı sahəsində ən son texnologiyaları ilə əlaqələndirir. Təqdim olunan oyun, oyunçuların pulun
idarə olunması sahəsində biliklərini müəyyən etməyə imkan verir. Oyun iştirakçıları təqdim olunan bir
neçə variant arasından düzgün olanını seçərək sualları cavablandırır və FİFA Dünya Çempionatının
virtual meydançasında istənilən futbol komandası ilə oynaya bilir. VISA-nın FİFA ilə tərəfdaşlığı
sayəsində bu oyun sadəcə bir neçə il ərzində bütün dünyada populyarlıq qazanmış və Rusiya, Ukrayna və
Belarusiya kimi qonşu dövlətlər də daxil olmaqla 20-dən artıq ölkədə həyata keçirilmişdir.
“Biz müəyyən etdik ki, maliyyə sahəsində savadlı cəmiyyət ölkənin sosial və iqtisadi inkişafının
əsasıdır. VISA, nağdsız ödənişlər sahəsində bir lider kimi, 10 ildən artıqdır ki, bütün dünyada insanların
öz maliyyələrini daha yaxşı idarə etməsi və nəticə etibarilə həyat standartlarını artırması üçün onların
bilik və bacarıqlarının inkişaf etdirilməsi istiqamətində maliyyə savadlılığı proqramları hazırlamaqdadır.
Azərbaycan MDB ölkələri arasında VISA-nın ən əsas bazarlarından biridir və biz partnyorlarımız olan
Azərbaycan Mərkəzi Bankı və Vergilər Nazirliyinə dərin minnətdarlığımızı bildiririk. Bu qurumların
dəstəyi sayəsində bu gün Azərbaycanda VISA-nın ilk maliyyə təhsili layihəsi – “İqtisadi futbol”-u təqdim
etməyə nail olmuşuq.” – deyə Visa şirkətinin MDB və Cənub Şərqi Avropa üzrə başdirektoru Jean-Marc
Tonti bildirib.
“Ölkə əhalisinin maliyyə savadlılığının artırılması Azərbaycan Respublikası Mərkəzi Bankının
əsas prioritetlərindən biridir. Biz, maliyyə məhsulları haqqında məlumatlılığı artırmaq, iqtisadi təhsili
olmayan yetkin yaşlı insanların öz büdcələrini planlaşdırmalarına yardım etmək, bankçılıq və maliyyənin
əsaslarını məktəb şagirdlərinə və tələbələrə öyrətmək, iqtisadiyyat və maliyyə haqqında xəbərləri düzgün
və professional səviyyədə paylaşmaları üçün KİV nümayəndələrinə təlimlər keçmək məqsədilə böyük
miqdarda maliyyə və intellektual resurslar ayıraraq müxtəlif layihələr həyata keçiririk. VISA şirkəti ilə
birgə həyata keçirilən bu layihə də belə layihələrin tərkib hissəsidir və biz ümid edirik ki, bu layihə
şagirdlər və tələbələr, oğlanlar və qızlar, həmçinin yetkin yaşlı nəsil arasında böyük marağa səbəb
olacaqdır.” deyə Mərkəzi Bankın İnkişaf departamentinin direktor müavini Natəvan xanım Məmmədova
bildirib.
“Vergilər Nazirliyinin qarşısında duran vəzifələrdən biri də informasiya texnologoyalarından
istifadə etməklə əhali arasında vergi biliklərini artırmaqdır ki, VİSA şirkəti ilə birgə həyata keçirilən
“İqtisadi futbol” layihəsinin məqsədi də oyun janrında əhaliyə, əsasən gənc nəslə iqtisadi biliklər, o
cümlədən vergilər barədə bilikləri təqdim etməkdir.
Vergilər Nazirliyinin Vergi ödəyicilərinə Xidmət Departamentinin Direktoru Elçin Məmmədov
isə bildirib ki, Vergilər Nazirliyi tərəfindən vergilərin tədrisi ilə əlaqədar şagird və tələbələr üçün bir neçə
dərslik nəşr edilmiş, ümumtəhsil məktəblərində vergiləri tədris etmək üçün 50-dən çox metodiki kabinet
təşkil edilmiş, Azərbaycan Dövlət İqtisad Universitetində “Vergi və vergiqoyma” kafedrası yaradılmışdır.
Hər il “Vergilər uşaqların gözü ilə” uşaq rəsm müsabiqəsi, orta və ali təhsil müəssisələrində vergilərə aid
bilik yarışları keçirilir.
“Əminəm ki, “İqtisadi futbol” bu tipli tədbirlər sırasında öz layiqli yerini tutacaq, gənclərimizin
böyük marağına səbəb olacaq və onlar arasında vergi mədəniyyətinin artırılmasına kömək edəcək“- deyə
Vergilər Nazirliyinin Vergi ödəyicilərinə Xidmət Departamentinin Direktoru Elçin Məmmədov
vurğulayıb.
Qeyd edək ki, “İqtisadi futbol” yeniyetmələrə, orta məktəb şagirdlərinə və yetkin yaşlı insanlara
istiqamətlənmiş üç çətin mərhələdən ibarətdir. Suallar və mövzular yığım və büdcə, vergilər, kredit və
digər bank xidmətlərindən səmərəli istifadə olunmasını əhatə edir. Oyun həmçinin özü-özünə öyrənmə
variantını da təklif edir. 4 təlim modulunu bitirdikdən sonra oyunçular yığım və büdcənin əsaslarını,
vergilərin nə üçün ödənildiyini, etibarlı borcalan olmağın nə demək olduğunu və ödəniş kartını necə
seçməyi öyrənirlər. Oyunçuların biliyini qiymətləndirmək məqsədilə hər bir modula testlər və çalışmalar
daxildir. “İqtisadi futbol”-un Azərbaycan və rus dilində versiyaları mövcuddur. “İqtisadi futbol” oyunu
Azərbaycanda əhali arasında maliyyə savadlılığının artırılması məqsədilə yaradılıb. Tezliklə oyunu
onlayn şəkildə Azərbaycan və rus dillərində oynamaq mümkün olacaqdır.
12.06.2012:“Uşaqlar üçün Maliyyə Təhsili və Maliyyə Savadlılığı:
Gələcək Naminə
Bərabər İmkanlar” mövzusunda Milli Konfrans keçirilib
Azərbaycan Respublikasının Mərkəzi Bankı və Təhsil Nazirliyi Ümidli Gələcək Gənclər
Təşkilatı, UNİCEF-in Azərbaycan nümayəndəliyi, Almaniyanın Beynəlxalq Əməkdaşlıq üzrə Əmanət
Kassaları Fondu, “Əflatun” – Uşaq Sosial və Maliyyə Təhsili Şəbəkəsi ilə birgə əməkdaşlıq çərçivəsində
“Uşaqlar üçün Maliyyə Təhsili və Maliyyə Savadlılığı: Gələcək Naminə Bərabər İmkanlar” mövzusunda
Milli Konfrans keçirib.
“Hilton Baku” otelində keçirilən Konfransın əsas məqsədi uşaqlara erkən yaşlarından maliyyə
bacarıqlarını, düzgün maliyyə davranışını aşılamaqla onların və bəşəriyyətin gələcək rifahının
yüksəldilməsidir.
Konfransda xüsusi olaraq vurğulanıb ki, son zamanlar bütün dünyada əhalinin maliyyə
savadlılığının aşağı səviyyədə olması ilə bağlı narahatlıqlar getdikcə artmaqdadır. Davam etməkdə olan
maliyyə böhranı şəraitində dünya ictimaiyyəti tərəfindən maliyyə savadlılığı əsas həyat bacarıqlarından
biri kimi dəyərləndirilir, maliyyə və iqtisadi sabitliyin və inkişafın vacib elementi kimi qəbul edilir.
Tədbirdə Mərkəzi Bankın və Təhsil Nazirliyinin məsul əməkdaşları, UNİCEF-in Azərbaycan
ofisinin rəhbəri, “Əflatun” – Beynəlxalq Uşaq Sosial və Maliyyə Təhsili Şəbəkəsinin Şərqi Avropa və
Mərkəzi Asiya regionu üzrə proqram rəhbəri, Almaniyanın Beynəlxalq Əməkdaşlıq üzrə Əmanət
Kassaları Fondunun nümayəndəsi, eləcə də, müxtəlif dövlət qurumlarının, ölkədə fəaliyyət göstərən yerli
və beynəlxalq təşkilatların, bank və digər maliyyə institutlarının nümayəndələri iştirak ediblər.
18.04.2012:Mərkəzi Bank maliyyə savadlılığı mövzusunda treninq keçirdi
Mərkəzi Bankın Tədqiqatlar və İnkişaf Mərkəzi Almaniya Əmanət Banklarının Beynəlxalq
Əməkdaşlıq Fondu (AƏBBƏF) ilə birgə “Maliyyə savadlılığı” layihəsi çərçivəsində Milli Qəhrəman
Mübariz İbrahimov adına Biləsuvar Liseyinin bazasında “Banklar məktəblərə-məktəblər banklara”
mövzusunda seminar keçirib. 7-14 aprel 2012-ci il tarixlərində keçirilən seminarın əsas məqsədi
gələcəkdə məktəb kurikulumlarında maliyyə maarifləndirilməsi aspektinin gücləndirilməsi, bankların bu
işə marağının artırılması, onların təkliflərinin öyrənilməsi olub.
Seminar tədbirlərində Respublika Təhsil Nazirliyi və Təhsil Problemləri İnstitutunun məsul
işçiləri, habelə kommersiya banklarının əməkdaşları və Biləsuvar Liseyinin müəllimləri iştirak ediblər.
Almaniyadan dəvət olunmuş ekspert, fəlsəfə doktoru Knut Boykun məşğələləri seminar iştirakçıları
tərəfindən maraqla qarşılanıb.
Seminarda maliyyə savadlılığı, cib xərcliyi, büdcə planlaşdırılması, əmanətlər, bank məhsulları,
sahibkarlıq və sair mövzular üzrə məlumatların müxtəlif fənlərin tədrisi prosesində istifadəsi, həmin
mövzuların müxtəlif fənn kurikulumları və tədris proqramlarına inteqrasiyası barədə təqdimatlar
keçirilmiş, interaktiv müzakirələr aparılıb.
Lisey müəllimlərindən və kommersiya banklarının əməkdaşlarından ibarət yaradılan işçi qrupları
tərəfindən cari ilin avqust ayına qədər əhalinin maliyyə savadlılığının artırılmasında istifadə oluna biləcək
müxətlif alətlərin hazırlanması nəzərdə tutulub.
Seminarın yekununda iştirakçılara Mərkəzi Bankın strateji fəaliyyət istiqamətlərindən biri olan
“Maliyyə savadlılığı” layihəsi barədə qısa məlumat verildi. İştirakçılar seminarda əldə olunmuş uğurlu
nəticələri yüksək qiymətləndirərək məktəb şagirdlərinin maliyyə maarifləndirilməsi işinin gücləndirilməsi
üçün banklar və təhsil orqanlarının birgə fəaliyyətinin əhəmiyyətini xüsusi qeyd ediblər.
13.12.2011:Mərkəzi Bank və “Junior Achievement” təşkilatı tələbələrin maliyyə savadının
artırılmasına dair növbəti treninqlərə başlayır
Azərbaycan Respublikasının Mərkəzi Bankı və “Junior Achievement Azərbaycan” (JAA )
təşkilatı ölkə məktəblərində iqtisadiyyatın tədrisi proqramı çərçivəsində “Banklar fəaliyyətdə” adlı
layihəsini uğurla davam etdirir. “Bankçılığın əsasları və Mərkəzi Bankın bank sistemində rolu”
mövzusunda olan treninqlər 2011-ci ilin 12-16 dekabr tarixlərində Mərkəzi Bankın Tədqiqatlar və İnkişaf
Mərkəzində (TİM) keçiriləcəkdir.
Mərkəzi Bankın Kommunikasiya departamenti, TİM və JAA-nın təşkilatçılığı ilə keçirilən bu
treninqlərin məqsədi ali məktəb tələbələrinin bank sahəsi üzrə biliklərinin artırılmasıdır. Treninqlərdə
Azərbaycan Dövlət İqtisad Universiteti, eləcə də, Bakı Dövlət və Qafqaz Universitetlərinin iqtisadiyyat
fakultələrinin müsabiqə yolu ilə seçilmiş 25 tələbəsi iştirak edəcəkdir.
Mərkəzi Bankın mütəxəssisləri tərəfindən keçiriləcək 5 günlük treninqlərdə tələbələrə mərkəzi
bankçılıq, bank sisteminin strukturu, bankların iqtisadiyyatda rolu, bank tənzimlənməsi və s. məsələlər
haqqında ətraflı məlumatlar veriləcəkdir. Qeyd edək ki, “Banklar Fəaliyyətdə” adlı layihə Azərbaycan
Məktəblərində İqtisadiyyatın Tədrisi Proqramı çərçivəsində keçirilir və hazırki təlim bu çərçivədə həyata
keçirilən artıq 3-cü tədbirdir.
Treninq proqramının sonunda iştirakçılara sertifikatlar təqdim olunub.
14.09.2011:Mərkəzi Bank maliyyə savadlılığı üzrə Almaniyanın SBFIC Fondu ilə əməkdaşlıq
barədə razılıq əldə edib
Mərkəzi Bankın Tədqiqatlar və İnkişaf Mərkəzi maliyyə savadlılığı üzrə Almaniya Əmanət
Banklarının Beynəlxalq Əməkdaşlıq Fondu (SBFIC) ilə əməkdaşlıq barədə razılıq əldə edib. Fondun
Azərbaycanda maliyyə savadlılığının artırılması tədbirlərində iştirak etməyə və Almaniya hökumətinin bu
məqsədlə maliyyə vəsaiti ayırmağa hazır olduğu bildirilib. Bu əməkdaşlığın məqsədlərindən biri əhalinin
əsassız borclanmasının qarşısını almaq üçün gənc yaşlarından maliyyə savadının aşılanmasından
ibarətdir.
Əməkdaşlıq proqramına uyğun olaraq, Fondun dəstəyi ilə 2011/2012-ci və növbəti tədris illərində
ölkənin seçilmiş (pilot) məktəblərində şagirdlərin maliyyə savadlılığının artırılması üzrə tədbirlər nəzərdə
tutulur. Bununla əlaqədar Azərbaycanın orta məktəblərində şagirdlərin maliyyə savadlılığının artırılması
üzrə Təhsil Nazirliyi ilə birlikdə xüsusi layihə üzərində iş aparılır.
Almaniyanın SBFIC Fondu ilə əməkdaşlıq ölkəmizin gələcək nəslinin erkən yaşlarda iqtisadiyyat
və maliyyə biliklərinə yiyələnməsinə və ölkə əhalisinin maliyyə savadlılığının səviyyəsinin
yüksəldilməsinə xidmət edəcəkdir
26.08.2011:KİV nümayəndələri üçün “Mərkəzi Bankçılıq” mövzusunda təlim kursu başa
çatıb
Azərbaycan Mərkəzi Bankında (AMB) kütləvi informasiya vasitələrinin (KİV) nümayəndələrinin
iqtisadi biliklərinin artırılması məqsədilə keçirilən “Mərkəzi Bankçılıq” mövzusunda təlim kursu başa
çatıb.
AMB-nin Kommunikasiya Strategiyası çərçivəsində ilk dəfə keçirilən və iki ay davam edən on
sessiyadan ibarət təlim proqramında 20-yə yaxın media nümayəndəsi pul-kredit siyasəti, bank nəzarəti
kimi mərkəzi bankçılığa aid başlıca mövzular haqqında biliklərini artırıblar.
Treninqlər Mərkəzi Bankın mütəxəssisləri tərəfindən AMB-nin Tədqiqatlar və İnkişaf
Mərkəzində keçirilib. Jurnalistlər pul siyasətinin məqsədləri, çərçivəsi, iqtisadiyyata təsir mexanizmi,
valyuta ehtiyatlarının və nağd pul dövriyyəsinin idarə olunması, bank nəzarəti kimi mərkəzi bankçılığa
aid başlıca mövzular haqqında ətraflı məlumatlar əldə ediblər. KİV nümayəndələri 2 aylıq treninqlərin
sonunda xüsusi sertifikatlarla təltif ediliblər.
Tam kursu başa vuran jurnalistlərə sertifikatları təqdim edərkən Mərkəzi Bankın sədr müavini
Aftandil Babayev bildirdi ki, Mərkəzi Bankın uğuru onun effektiv kommunikasiyasından çox asılıdır.
“Treninqlər jurnalistlərin Mərkəzi Bankın fəaliyyəti barədə daha dərindən maarifləndirilməsi məqsədi ilə
keçirilib. Mərkəzi Bank pul-məzənnə və bank quruculuğu siyasətinin kommunikasiya hədəflərinə effektiv
çatdırılmasında medianın roluna çox böyük önəm verərək bu tipli tədbirlərin keçirilməsini bundan sonra
da davam etdirəcəkdir”- deyə A.Babayev qeyd etdi.
AMB-nin Tədqiqatlar və İnkişaf Mərkəzinin direktoru Emin Hüseynov isə öz çıxışı zamanı
maliyyə və iqtisadiyyat sahəsində çalışan jurnalistlərin öz iqtisadi biliklərini artırmaqla Azərbaycan
iqtisadiyyatının inkişafinda daha fəal rol oynayacaqlarına əminliyini ifadə etdi.
08.06.2011: Mərkəzi Bank KİV nümayəndələrinin maliyyə savadlılığının
artırılmasına dair treninq
keçirilib.
Azərbaycan Respublikasının Mərkəzi Bankı qəbul etdiyi Kommunikasiya strategiyası
çərçivəsində jurnalistlər üçün “Mərkəzi Bankçılıq” mövzusunda treninqlərə başlayır.
İki ay davam edəcək treninqlərin keçirilməsinin əsas məqsədi jurnalistlərin iqtisadiyyat, maliyyə,
bank işi sahəsində biliklərinin artırılmasına yardım etməkdir. On sessiyadan ibarət treninqlərdə media
nümayəndələrinə pul-kredit siyasəti, bank nəzarəti kimi mərkəzi bankçılığa aid başlıca mövzular
haqqında ətraflı məlumat veriləcək və hər treninqin sonunda sual-cavab sessiyası təşkil ediləcək.
İlk treninqi giriş sözü ilə açan Mərkəzi Bankın Tədqiqatlar və İnkişaf Mərkəzinin İnkişaf
departamentinin direktoru Asif Cahangirov iştirakçıları salamlayaraq qeyd etdi ki, treninqdə Mərkəzi
Bankın Azərbaycan iqtisadiyyatındakı rolu barədə məlumat verilməklə yanaşı KİV nümayəndələri başlıca
makroiqtisadi və monetar terminlər, makroiqtisadi diaqnostika sistemi, pul siyasətinin məqsədləri və
çərçivəsi, ödəniş sisteminin iqtisadi rolu, Mərkəzi Bankın kommunikasiya strategiyası haqqında da
məlumatlar əldə etmək imkanı qazanacaqlar.
Açılışda Kommunikasiya departamentinin direktoru Rüfət Abbasov da çıxış edərək bildirdi ki,
iqtisadi sahədə yazan jurnalistlərin bank-maliyyə işi barədə biliklərinin artırılması nəinki Mərkəzi Bank,
ümumilikdə Azərbaycan iqtisadiyyatı haqqında materialların daha peşəkar hazırlanmasında media
mənsublarına kömək edəcəkdir.
Treninqlərin sonunda iştirakçılara sertifikatlar təqdim edilib.
04.05.2011:“Banklar fəaliyyətdə” layihəsi çərçivəsində keçirilən təlimlərin ilkin
mərhələsi başa çatib
Azərbaycan Mərkəzi Bankının (AMB) “Junior Achievement Azərbaycan” (JAA) təşkilatı ilə
birgə keçirilən “Banklar Fəaliyyətdə” adlı layihəsi çərçivəsində qırxa yaxın tələbə-iqtisadçı mərkəzi
bankçılıq və bank sisteminin quruluşu haqqında biliklərini artırıblar.
Azərbaycan Dövlət İqtisad Universiteti, eləcə də, Bakı Dövlət və Qafqaz Universitetlərinin
iqtisadiyyat fakültələrinin tələbələri 5 günlük treninqin sonunda xüsusi sertifikatlarla təltif ediliblər.
“Fərəhli haldır ki, biz Azərbaycanın maliyyə və iqtisadiyyat sahəsində təhsil alan və müsabiqə
yolu ilə seçilmiş ən istedadlı tələbələri üçün treninq keçiririk” – deyə AMB-nin Baş direktoru Emin
Hüseynov qeyd edib. O bildirib ki, treninq proqramı üzərində çoxlu hazırlıq işləri aparılıb və bank
sistemindəki yeni ideyaları və tendensiyaları əks etdirir.
Treninqlər AMB-nin Tədqiqatlar və İnkişaf Mərkəzinin mütəxəssisləri tərəfindən keçirilib.
Tələbələr pul siyasətinin hədəfləri, məzənnə sabitliyi, Mərkəzi Bankın vəzifə, funksiyaları və onun milli
iqtisadiyyatdakı rolu haqqında ətraflı məlumatlar əldə ediblər. Tələbələr bank sisteminin quruluşu, onun
müxtəlif iştirakçıları, bankların üzləşdiyi risklər, risk idarəetməsi mexanizmləri, müxtəlif maliyyə
alətlərinin mahiyyəti, onları müqayisə etmək üsulları ilə tanış olublar. Həmçinin tələbələrə Mərkəzi
Bankda işə qəbul prosesi, o cümlədən AMB-nin internatura proqramı barədə ətraflı məlumat verilib.
Tədbirdə çıxış edən AMB-nin Kommunikasiya departamentinin direktoru Rüfət Abbasov
vurğulayıb ki, AMB maliyyə savadlığına çox böyük önəm verir və bu tipli tədbirlərin keçirilməsi
tələbələri daha çox motivə etməklə onları Azərbaycan iqtisadiyyatının inkişafinda daha aktiv rol
oynamağa sövq edəcək.
Qeyd edək ki, “Banklar Fəaliyyətdə” adlı layihə Azərbaycan Məktəblərində İqtisadiyyatın Tədrisi
Proqramı çərçivəsində keçirilib. Proqramın əsas məqsədi iqtisadi və sahibkarlıq biliklərini gənclərə nəzəri
və tətbiqi yollarla tədris edərək, gələcəyin biznes liderlərini və hazırlıqlı kadrlarını yetişdirməkdir.
25.04.2011:Mərkəzi Bank və “Junior Achievement” təşkilatı tələbələrin maliyyə
savadının artırılmasına dair treninqlərə başlayır
Azərbaycan Respublikasının Mərkəzi Bankı və “Junior Achievement Azərbaycan” (JAA)
təşkilatı ölkə məktəblərində iqtisadiyyatın tədrisi proqramı çərçivəsində “Banklar fəaliyyətdə” adlı
layihəyə başladı. Layihənin tərkib hissəsi olan treninqlər 2011-ci ilin 25-29 aprel tarixlərində Mərkəzi
Bankda keçiriləcəkdir.
Mərkəzi Bankın Kommunikasiya departamenti, Tədqiqatlar və İnkişaf Mərkəzinin və JAA-nın
təşkilatçılığı ilə keçirilən bu treninqlər ali məktəb tələbələri üçün nəzərdə tutulur. Treninqlərdə
Azərbaycan Dövlət İqtisad Universiteti, eləcə də, Bakı Dövlət və Qafqaz Universitetlərinin iqtisadiyyat
fakultələrinin 40-a yaxın tələbəsi iştirak edəcəkdir.
JAA tərəfindən 2003-cü ildən etibarən uğurlu şəkildə həyata keçirilən bu proqramın əsas məqsədi
iqtisadi və sahibkarlıq biliklərini gənclərə nəzəri və tətbiqi yollarla tədris edərək gələcəyin biznes
liderlərini və hazırlıqlı kadrlarını yetişdirməkdir. Treninq proqramı çərçivəsində nəzərdə tutulan modullar
iştirakçıların maliyyə savadının artmasına və gələcək karyera seçiminə imkan yaradacaqdır.
Tələbələr bank sisteminin quruluşu, onun müxtəlif iştirakçıları, Mərkəzi Bankın vəzifə və
funksiyaları, onun milli iqtisadiyyatdakı rolu haqqında ətraflı məlumat əldə edəcəklər. Tələbələr həmçinin
bankların üzləşdiyi risklər, risk idarəetməsi mexanizmləri, müxtəlif maliyyə alətlərinin mahiyyəti, onları
müqayisə etmək üsulları ilə tanış olacaqlar.
Treninq proqramının sonunda iştirakçılara sertifikatlar təqdim olunub.
27.01.2011:Mərkəzi Bankın Tədqiqatlar və İnkişaf Mərkəzi Maliyyə Savadlılığı üzrə
Beynəlxalq Şəbəkəyə üzv olub
Azərbaycan Respublikası Mərkəzi Bankının Tədqiqatlar və İnkişaf Mərkəzi (TİM) İqtisadi
Əməkdaşlıq və İnkişaf Təşkilatının Maliyyə Savadlılığı üzrə Beynəlxalq Şəbəkəsinə üzv olub. Bu
şəbəkədə hazırda 74 ölkədən əksəriyyəti mərkəzi banklar olan 135-dən artıq dövlət təşkilatı təmsil
olunmaqdadır. ABŞ, Kanada, Almaniya, Fransa kimi dünyanın aparıcı dövlətlərinin xüsusi aktivlik
göstərdiyi şəbəkəyə MDB ölkələrindən Azərbaycan üçüncü ölkə olaraq qoşulur.
Maliyyə Savadlılığı üzrə Beynəlxalq Şəbəkənin qarşıya qoyduğu əsas məqsədi üzv ölkələrin
aparıcı qurumları arasında iqtisadi və maliyyə savadlılığı üzrə informasiya və fikir mübadiləsinin təmin
edilməsi, habelə beynəlxalq aləmdə bu sahədə mövcud olan qabaqcıl təcrübənin təbliğidir. Bu şəbəkəyə
üzvlük həmçinin İƏİT-in zəngin elektron kitabxanasından istifadə imkanı verir.
TİM geniş ictimaiyyətin, jurnalistlərin, tələbələrin maliyyə savadlılığının yüksəldilməsi, eləcə də
bank-maliyyə sahəsində işləyən mütəxəssislərin bilik və bacarıqlarının artırılması istiqamətində bir sıra
layihələrin həyata keçirilməsinə başlamışdır. Bu layihələrin həyata keçirilməsi nəticəsində yaradılacaq
inkişaf resursları ölkədə iqtisadiyyat və maliyyə savadlılığının səviyyəsinin yüksəldilməsinə xidmət
edəcəkdir.
Dostları ilə paylaş: |