Matematikani o`qitish tamoyillari,shakllari va uslublari

1-ma’ruza. Matematika o‘qitish metodikasining predmeti, maqsadi va vazifasi

Reja

1. Matematika – fan va o‘quv predmeti sifatida.

2. Matematika o‘qitish meodikasi fani maqsad va vazifalari.

3. Maktabda matematika o‘qitish mazmuni va vazifalari

4. Matematika o‘qitish metodikasining boshqa fanlar bilan aloqasi.

Tayanch iboralar: matematika, matematika o‘qitish uslubiyati, davlat ta’lim standarti, o‘quv dasturi, o‘quv rejasi.

1. Matematika - fan va o‘quv predmeti sifatida

“Matematika” so‘zi grekcha “bilish, fan” so‘zidan olingan bo‘lib, bu fan o‘z rivojlanish davri mobaynida quyidagi davrlarni bosib o‘tgan:

1) Matematikaning paydo bo‘lish davri – amaliy hisoblashlar va o‘lchashlar, son va figura tushunchalari shakllanishi bilan belgilanadi. Bu davrda arifmetika va geometriya kabi matematikaning bo‘limlari o‘z boshlang‘ich asoslariga ega bo‘ldi.

2) O‘zgarmas miqdorlar davri – eramizgacha VI-V asrlardan boshlanib, bu davrda matematika fani tadqiqot tushunchalariga (son va shakl), usullariga ega bo‘lgan mustaqil fan sifatida shakllandi. Bu davrda matematikaning yangi sohasi – algebra fani paydo bo‘ldi va rivojlandi.