Meşə fondunun mühafizəsi, qorunması və meşələrin bərpası Qaydalarının təsdiq
edilməsi haqqında
AZƏRBAYCAN RESPUBLİKASI NAZİRLƏR KABİNETİNİN QƏRARI
Azərbaycan Respublikası Meşə Məcəlləsinin 27-ci maddəsinə uyğun olaraq Azərbaycan
Respublikasının Nazirlər Kabineti qərara alır:
1. "Meşə fondunun mühafizəsi, qorunması və meşələrin bərpası Qaydaları" təsdiq edilsin
(əlavə olunur).
2. Bu qərar imzalandığı gündən qüvvəyə minir.
Azərbaycan Respublikasının Baş naziri A. RASİZADƏ
Bakı şəhəri, 1 may 2000-ci il
№ 78
Azərbaycan Respublikası Nazirlər Kabinetinin
2000-ci il 1 may tarixli, 78 nömrəli qərarı ilə
TƏSDİQ EDİLMİŞDİR
Meşə fondunun mühafizəsi, qorunması və meşələrin bərpası
QAYDALARI
I. ÜMUMİ MÜDDƏALAR
1.1. Bu Qaydalar meşə fondunun mühafizəsi, qorunması və meşələrin bərpasını
tənzimləyir.
1.2. Meşələrin mühafizəsi və qorunması onların bioloji və digər xüsusiyyətlərini nəzərə
almaqla həyata keçirilir, meşə fondundan səmərəli istifadə, meşələrin məhv olmaqdan,
zədələnmədən, zəifləmədən, çirklənmədən və digər mənfi təsirlərdən mühafizəsi və
qorunması sahəsində təşkilati, hüquqi və başqa tədbirlər sistemindən ibarətdir.
1.3. Meşə fondunun mühafizəsi və qorunmasında məqsəd meşələrin yanğından,
qanunsuz qırmalardan, meşə fondundan istifadənin müəyyən edilmiş qaydalarının
pozulması hallarından və meşələrə zərər vuran digər hərəkətlərdən, zərərvericilərdən,
xəstəliklərdən mühafizə etmək və qorumaqdır.
1.4. Meşələrin bərpasının məqsədi meşə ilə örtülü olmayan torpaqlarda meşələrin
vaxtında bərpa olunmasını, onların cins tərkibinin yaxşılaşdırılmasını, məhsuldarlığının
artırılmasını və meşə fondu torpaqlarından səmərəli istifadəni təmin etməkdən ibarətdir.
1.5. Meşə fondunun mühafizəsi, qorunması və meşələrin bərpası Azərbaycan
Respublikasının Meşə Məcəlləsinə, bu sahə ilə əlaqədar digər qanunvericilik və normativ
hüquqi aktların tələblərinə müvafiq olaraq həyata keçirilir.
II. MEŞƏ FONDUNUN MÜHAFİZƏSİ VƏ QORUNMASI
2.1. Meşələrin mühafizəsi aşağıdakı tədbirləri nəzərdə tutur:
meşə fondunun vəziyyətinə, istifadəsinə, mühafizəsinə, qorunmasına, meşələrin
bərpasına dövlət nəzarətinin təşkili;
meşə fondundan istifadə edilməsi, onun mühafizəsi, qorunması, bərpası sahəsində
hüquq pozuntularının qarşısının alınması, onların aradan qaldırılması;
təqsirkar fiziki və hüquqi şəxslərin qanunvericilikdə müəyyən edilmiş qaydada
məsuliyyətə cəlb edilməsi;
meşə fonduna zərər vuran təsərrüfat və başqa fəaliyyət növlərinin məhdudlaşdırılması,
dayandırılması, qadağan edilməsi;
Azərbaycan Respublikasının qanunvericiliyi ilə nəzərdə tutulmuş digər tədbirlərin
həyata keçirilməsi.
2.2. Meşələrin mühafizəsi və qorunması məqsədi ilə Azərbaycan Respublikasının
Ekologiya və Təbii Sərvətlər Nazirliyi, onun yerli təşkilatları aidiyyəti orqanlarla birlikdə:
meşə qanunvericiliyinə riayət edilməsini, meşə fondunun səmərəli istifadəsini, meşələrin
qanunsuz qırılmasından qorunmasını təmin etmək üçün müəyyən olunmuş qaydada dövlət
nəzarətini həyata keçirirlər;
yerüstü vasitələrdən və müəyyən olunmuş qaydada aviasiyadan istifadə etməklə
meşələrin yanğından qorunması üçün profilaktiki tədbirlər görürlər;
meşə fondunda yanğın əmələ gəlməməsi üçün meşədə əhalinin daha çox olduğu
yerlərdə müvafiq elanlar və plakatlar asıb, papiros çəkmək üçün yerlər düzəldir, meşənin
əhəmiyyətini və meşə yanğınlarının nəticəsində vurulan ziyanı izah edən sərgilər təşkil edir,
kütləvi informasiya vasitələrindən — radio və televiziyadan geniş istifadə edərək xüsusi
filmlər göstərir, ekskursiyalar təşkil edirlər. Meşə yanğınlarını vaxtında aşkar edərək onların
ləğv edilməsi üçün müvafiq tədbirlər görürlər;
meşə fondunda zərərvericilərin və xəstəliklərin mənbələrini aşkara çıxarır, onların
yayılmasının qarşısını almaq üçün müvafiq fitosanitar tədbirləri həyata keçirir, meşə
fondunun vəziyyəti üzərində müntəzəm müşahidə aparırlar.
2.2-1. Meşə qanunvericiliyinə riayət edilməsini, meşə fondunun səmərəli istifadəsini,
meşələrin qanunsuz qırılmadan qorunmasını təmin etmək üçün müəyyən olunmuş qaydada
dövlət nəzarətini Azərbaycan Respublikasının Ekologiya və Təbii Sərvətlər Nazirliyi həyata
keçirir.
[1]
2.3. Meşə fondunun mühafizəsini və qorunmasını həyata keçirən vəzifəli şəxslər öz
səlahiyyətləri hüdudlarında aşağıdakı hüquqlara malikdirlər:
meşə fondu ərazisində meşə qanunvericiliyinə riayət olunmasına nəzarət etmək;
meşələrin istifadəsi, mühafizəsi, qorunması və bərpasında inzibati xətaları və cinayət
törədilməsi hallarını aşkar etmək, müvafiq qaydada rəsmiləşdirmək, hüquq-mühafizə və
məhkəmə orqanlarına göndərmək;
[2]
meşə fonduna, əhalinin sağlamlığına və ətraf mühitə ziyan vuran təsərrüfat və başqa
fəaliyyət növlərini, torpaq eroziyasına səbəb olan, meşənin vəziyyətinə və bərpasına, habelə
suyun və digər təbii obyektlərin vəziyyətinə mənfi təsir göstərən üsulların istifadə edilməsini
məhdudlaşdırmaq, dayandırmaq, qadağan etmək; istifadəyə verilmiş meşə fondu
sahələrində meşə yanğını təhlükəsizliyi qaydalarına riayət edilməməsi ilə əlaqədar fiziki və
hüquqi şəxslərin ayrı-ayrı təsərrüfat fəaliyyətinin, mədəni-kütləvi və sair tədbirlərin
dayandırılması və ya qadağan olunması barədə qərar qəbul etmək;
meşə istifadəçilərinə meşə fondunun mühafizəsinə, qorunmasına və bərpasına dair rəsmi
göstərişlər vermək;
fiziki və hüquqi şəxsləri meşə yanğınlarının söndürülməsinə cəlb etmək;
meşə fondunun zərərvericilərdən və xəstəliklərdən mühafizəsini təşkil etmək;
meşə fondunda meşələrin qanunsuz qırılmasından qorunmasını təmin etmək.
III. MEŞƏLƏRİN BƏRPASI
3.1. Meşələrin bərpası zonal-tipoloji əsaslarla aparılır.
3.2. Azərbaycan Respublikasının Ekologiya və Təbii Sərvətlər Nazirliyi, onun yerli
təşkilatlarının meşələrin bərpası sahəsində əsas vəzifələri:
meşə fondu torpaqlarında meşəbərpa işlərinin aparılmasının uçotunu aparmaq;
meşəquruluşu materiallarını və meşə fondunda dəyişiklikləri nəzərə alaraq ayrı-ayrı
torpaq kateqoriyalarında meşəbərpa işlərinin həcmini, növbəliliyini, vaxtını, qaydasını və
üsullarını müəyyənləşdirmək;
meşə ağac cinslərinin seleksiyasını, meşə toxumçuluğunu və sınaq işlərini təmin etmək;
qiymətli cinslərdən ibarət yüksək məhsuldarlıqlı, mühit əmələ gətirici və qoruyucu
funksiyalara malik yeni meşə sahələrinin salınmasını təmin etmək;
meşə fondu torpaqlarının məhsuldarlığının artırılmasını, su və külək eroziyasından
qorunmasını təmin edən tədbirləri həyata keçirmək;
meşə istifadəçiləri tərəfindən aparılan işlər meşələrin inkişafına mənfi təsir göstərdiyi
hallarda, müəyyən olunmuş qaydada müvafiq istifadə növlərini dayandırmaq və ya
məhdudlaşdırmaq;
meşələrin bərpası və inkişafı ilə bağlı olan işlərə nəzarət etmək.
3.3. Meşələrin bərpası meşə tiplərindən, ərazilərin meşəbitmə şəraitindən, ağac və kol
cinslərinin meşəçilik xüsusiyyətlərindən və meşə yetişdirilməsinin məqsədindən asılı olaraq
aşağıdakı şərtləri təmin etməlidir:
meşə sərvətlərinin meşəçilik, ekoloji və iqtisadi cəhətdən ən qısa müddətdə daha
səmərəli üsullarla bərpa olunmasını;
meşə fondu torpaqlarından səmərəli istifadə edilməsini;
meşələrin məhsuldarlığının və ağaclarının keyfiyyətinin yaxşılaşdırılmasını;
ərazinin optimal meşəlik faizinin təmin edilməsini;
meşələrin suqoruyucu, sanitar-gigiyena, mühit əmələ gətirən və sair qoruyucu
funksiyalarının artırılmasını.
3.4. Meşələrin bərpası meşə fondunda baş vermiş dəyişiklikləri nəzərə almaqla meşə
quruluşu layihələri əsasında hazırlanmış və müəyyən olunmuş qaydada təsdiq edilmiş
dövlət proqramlarına uyğun aparılır. Bu proqramlar meşəbərpa işlərinin həcmini, onların
aparılma üsullarını və bərpa olunacaq ağac cinslərini, həmçinin meşəbərpa tədbirlərini, meşə
toxumlarının tədarükü və əkin materiallarının yetişdirilməsi işlərinin aparılmasını
müəyyənləşdirir.
3.5. Meşə fondunda meşələrin bərpası məqsədi ilə meşə əkinlərinin salınması və
meşələrin təbii bərpasına kömək tədbirlərinin həyata keçirilməsi üçün meşəbərpa fondu
yaradılır.
Bu fond aşağıdakı kateqoriyalara bölünür:
meşə əkini fondu;
meşələrin təbii bərpası üçün torpaq fondu;
meşə yetişdirilməsi üçün torpaq fondu.
3.6. Meşə əkini fonduna daxildir:
təbii yolla meşələşməmiş qırma sahələri, yanğın yerləri, seyrəkliklər, talalar, qurumuş
ağaclıqlar;
batmış və müəyyən olunmuş qaydada silinmiş meşə əkini və qurudulmuş bataqlıq
sahələri;
kənd təsərrüfatı istifadəsi üçün yararsız, lakin meşə bərpası üçün yararlı olan torpaq
sahələri;
meşələrin bərpası üçün yararlı olan qumluqlar, dərə və yarğanlar və qeyri-meşə
torpaqları. Bu sahələr torpaq və aqrokimyəvi tədqiqatlar aparıldıqdan sonra meşə əkini
fonduna daxil edilir;
meşə əkini və səpini üsulu ilə bərpa olunmalı azqiymətli meşə sahələri və doluluğu 0,6-
dan aşağı olan pozulmuş meşə sahələri.
3.7. Meşə əkini fondundan ilk növbədə istifadə olunan sahələr:
su və külək eroziyasına məruz qalmış sahələr;
şəhərlərin (qəsəbələrin) yaşıl zonalarında, çayların və ya digər su obyektlərinin qadağan
olunmuş zolaqlarında yerləşən sahələr;
yüksək bonitetli ağaclıqların yetişdirilməsi üçün yararlı olan, meşə ilə örtülü olmayan
sahələrin yüksək məhsuldar torpaqları;
qiymətli ağac cinslərinin yetişdirilməsi üçün bərpa olunması (qırılması nəzərdə tutulmuş
azqiymətli meşələr) sahələr;
tikinti və mədən işlərinin aparılması nəticəsində pozulan və meşə yetişdirilməsi üçün
yararlı hala salınmış (rekultivasiya olunmuş)
torpaqlar.
3.8. Meşə əkinləri üçün sahələrin hazırlanmasında, meşə əkinlərində aparılacaq
əməliyyatların keyfiyyətlə yerinə yetirilməsi, onların yanğın təhlükəsinə məruz qalma
ehtimalının azaldılması və sanitar vəziyyətinin yaxşılaşdırılması sahəsində aşağıdakı işlər
nəzərdə tutulur:
sahənin müayinə edilməsi;
meşə əkini üçün sahənin ayrılması;
meşə əkini üçün maşın və mexanizmlərin hərəkətinə maneçilik törədən sahələrin
nişanlanması;
sahənin tör-töküntülərdən, daşlardan, arzu olunmaz ağac bitkilərindən, xırda
kötüklərdən və s. başdan-başa və ya zolaqlarla təmizlənməsi;
sahənin hamarlanması, meliorasiyası, yamaclarda terrasların kəsilməsi;
sahədə zərərverici həşəratlarla qabaqcadan mübarizə tədbirlərinin aparılması.
3.9. Meşə əkini üçün torpaq hazırlığı üsulu meşəbitmə şəraitindən, meşə tiplərindən,
sahənin hazırlanması qaydasından, torpaq hazırlığının aqrotexniki tələblərindən və digər
amillərdən asılı olaraq meşə təsərrüfatı müəssisəsi tərəfindən seçilir.
3.10. Meşə əkini üçün torpaq hazırlığı mexaniki üsulla başdan-başa və ya hissə-hissə
zolaqlarla aparılır.
3.11. Külək və su eroziyasına məruz qalmayan, mailliyi 6 dərəcəyə qədər olan və
mexanizmlərin işləməsi üçün maneçilik törətməyən sahələrdə başdan-başa şumlama
üsulundan istifadə olunur.
3.12. Mexaniki üsulla hissə-hissə torpaq hazırlığı zolaqlarla, tranşeylər açılmaqla və
çalalar qazılmaqla aparılır.
3.13. Hərəkətdə olan qumluqlarda meşə əkinləri aparılmasından əvvəl həmin sahələrdə
kollardan, ot örtüyündən, qamışdan, qarğıdan, mexaniki çəpərlərdən və s. istifadə
olunmaqla zolaqlar yaradılır. Bu halda əvvəldən əkilmiş kollar əsas cins əkilənə qədər meşə
əkininin həcminə daxil edilmir.
3.14. Dağ və dağətəyi sahələrdə meşə əkini üçün torpaq hazırlığı üsulu sahələrin coğrafi
zonalığından, ərazinin mailliyindən, torpağın daşlılığından, su hopdurma qabiliyyətindən,
sahənin böyüklüyündən və istifadəsinin mümkünlüyündən, ərazidə eroziya başlaması və
artması təhlükəsindən asılı olaraq seçilir.
3.15. Dağlıq ərazilərdə, yamacların maillik dərəcəsindən, torpaq şəraitindən və digər
göstəricilərindən asılı olaraq torpaq hazırlığı aşağıdakı üsullarla aparılır:
mailliyi 6 dərəcəyə qədər olan, az daşlı güclü torpaqlarda başdan-başa şumlama;
mailliyi 12 dərəcəyə qədər az daşlı torpaqlarda zolaqlarla şumlama və ya terras açmaqla;
mailliyi 12—40 dərəcəyə qədər və ana qatın su hopdurma qabiliyyəti normal olan
torpaqlarda eni 2,5 metrdən 4,5 metrə qədər ölçüdə qazıb tökmə torpaq üsulu ilə, kiçik
sahələrdə isə xırda zolaqlarla, çala və tranşeylər qazmaqla.
3.16. Meşə əkinləri tərkibinə görə bir əsas ağac cinsindən (bir cinsli əkin) və ya bir neçə
əsas və köməkçi ağac cinslərindən (qarışıq əkin) ibarət yaradıla bilər. Bu zaman seçilən
cinsləri meşəbitmə şəraitindən asılı olaraq meşə təsərrüfatının inkişaf etdirilməsi məqsədinə
uyğun olmalıdır.
Köməkçi ağac və kol cinsləri seçildikdə onların əsas cinslə qarşılıqlı təsir əlaqələri nəzərə
alınmalıdır.
3.17. Meşə əkinlərinin sıxlığı və qarışdırma sxemləri davamlı, yüksək məhsuldarlıqlı
ağaclığın formalaşmasını təmin etməlidir. Ziyanvericilər və xəstəliklər yayılmış sahələrdə
meşə əkinlərinin ilkin sıxlığı və cins tərkibi meşələrin mühafizəsi haqqında verilmiş təkliflərə
uyğun müəyyənləşdirilir.
3.18. Səpin üsulu ilə meşə əkinləri salındıqda səpin qaydası, ilkin sıxlıq norması və digər
texnoloji tələblər, yolverilən cərgə aralarının eni və əkin (səpin) yerlərinin arası, meşəbitmə
zonası Azərbaycan Respublikasının Ekologiya və Təbii Sərvətlər Nazirliyi tərəfindən
müəyyənləşdirilir.
3.19. Meşə əkinlərinin yaradılmasında əsas üsul olan əkin, müxtəlif növ əkin materialları
(ting, toxmacar və qələm) ilə həyata keçirilir. Su və külək eroziyalarına məruz qalmış,
rütubətliyi çox olan torpaqlarda, əkin yerlərini tez alaq bitkiləri basan sahələrdə, kifayət
qədər nəmliyi olmayan rayonlarda əkin üsuluna üstünlük verilir. Bu zaman yalnız seleksiya
əsasında seçilmiş əkin materiallarından istifadə olunur.
3.20. Meşə əkinlərinin etibarlılığını, aqrotexniki xidmətə olan tələblərinin azaldılmasını
və meşə ilə örtülü sahəyə keçirilməsinin tezləşdirilməsini təmin etmək məqsədi ilə, əkin
üçün davamlı, tezböyüyən yüksək məhsuldarlıqlı ağac cinslərinin tinglərindən,
toxmacarlarından və qələmlərindən istifadə edilir.
3.21. Səpin üsulu ilə meşə əkininin yaradılmasında bu sahədə müsbət təcrübəsi olan,
gəmiricilər tərəfindən qorxusu olmayan və torpaq örtüyü zəif inkişaf etmiş sahələrdə
aparılır. Bu zaman palıd, şabalıd, qoz ağacı cinslərinin toxumlarından istifadə olunur.
3.22. Əkin və səpinin aparılma müddətləri torpaq, iqlim şəraitindən və ağac cinslərindən
asılı olaraq erkən yazda və ya payızda aparılır.
3.23. Plantasiya tipli meşə əkinləri, onların yetişdirilməsinin bütün dövrlərində mövcud
təkliflərin və standartların tələblərinə müvafiq hazırlanmış xüsusi layihələr və texnologiyalar
üzrə oduncağın və digər meşə məhsullarının alınmasını tezləşdirmək məqsədi ilə salınır.
3.24. Meşələrin təbii bərpası üçün təbii yeniyetmələri olmayan və ya çox az olan
sahələrdə bərabər yayılmayan, lakin təbii bərpaya kömək tədbirləri aparmaqla qiymətli
cinslər hesabına bərpası mümkün olan yüksək keyfiyyətli məhsuldar meşə torpaqları
daxildir.
3.25. Təbii bərpaya kömək tədbirləri aparılan meşə sahələri:
qalın ölü örtüyə malik, yüksək doluluğu olan, təbii bərpası zəif gedən meşə sahələri;
mal-qara otarılmasına məruz qalmış, kifayət qədər qiymətli cinsləri, yeniyetmələri və
cücərtiləri olan meşə sahələri;
toxumluq ağaclar qeyri bərabər yayılmış meşə sahələri;
meşəbitmə şəraitinə görə məhsuldar meşə yetişdirilməsi mümkün olan, lakin meşələrin
doluluğuna, yaşına və ərazinin relyefinə görə yeniyetmələri və cücərtiləri zəif olan və qeyri-
bərabər yayılan meşə sahələri.
3.26. Təbii bərpaya kömək etmək məqsədi ilə aşağıdakı tədbirlər həyata keçirilir:
qalın ölü örtüyə və kifayət qədər toxumluq ağaclar olan meşə sahələrində çürüməmiş
xəzəl qatının torpaq qatına qədər dırmıxla aşılanması;
əlverişli meşəbitmə şəraiti olan, doluluğu 0,4—0,6 və az toxumluq ağac olan sahələrdə
(ərazinin relyefindən asılı olaraq) torpağın üst qatını dırmıxlanmaqla ağac toxumlarının
səpilməsi.
3.27. Meşə yetişdirilməsi üçün torpaq fondu, meşə fondunun məhsuldar olmayan torpaq
sahələrini minimuma endirmək, meşə fonduna daxil olmayan torpaqlarda qoruyucu meşə
əkinləri yaratmaq, ərazinin meşəlik faizini artırmaq, ekoloji mühiti yaxşılaşdırmaq,
torpaqları külək və su eroziyalarından qorumaq məqsədi ilə yaradılır.
Buraya daxildir:
dağ yamaclarında və dərə yarğanlarında salınmış, su eroziyasını, su axımını tənzimləyən
meşə əkinləri;
torpaqların münbitliyini qoruyan, hidroloji və mikroiqlim şəraitini yaxşılaşdıran dövlət
meşə zolaqları;
təbii su mənbələrini, çay kənarlarını və sahil boyu qoruyucu meşələri, xırda çayları və
digər su mənbələrini lilləşmədən, kimyəvi maddələrlə çirklənmədən qoruyan və su rejimini
yaxşılaşdıran meşə əkmələri;
qumluqların bərkidilməsi üçün külək eroziyasına qarşı salınmış yaşıllıq zolaqları;
örüş və otlaqların yem bazasının yaxşılaşdırılması, ərazilərin sərt küləklərdən və qar
çovğunlarından, günəş radiasiyasından qorumaq
məqsədi ilə yaradılmış meşə zolaqları və massivləri.
3.28. Meşə yetişdirilməsi meşəhidromeliorativ tədbirlər nəzərə alınmaqla ərazi texnoloji
xəritələri əsasında aparılır.
3.29. Meşələrin bərpasını tənzimləyən sənədlərin nümunələri, onların doldurulması və
uçota alınması barədə təlimatlar və tövsiyələr Azərbaycan Respublikasının Ekologiya və
Təbii Sərvətlər Nazirliyitərəfindən təsdiq olunur.
[3]
İSTİFADƏ OLUNMUŞ MƏNBƏ SƏNƏDLƏRİNİN SİYAHISI
1.
01 oktyabr 2005-ci il tarixli 164 nömrəli Azərbaycan Respublikası Nazirlər Kabinetinin Qərarı
(Azərbaycan Respublikasının Qanunvericilik Toplusu, 2005-ci il, № 9, maddə 855)
2.
5 fevral 2008-ci il tarixli 27 nömrəli Azərbaycan Respublikası Nazirlər Kabinetinin Qərarı
(Azərbaycan Respublikasının Qanunvericilik Toplusu, 2008-ci il, № 2, maddə 108)
3.
26 yanvar 2015-ci il tarixli 15 nömrəli
Azərbaycan Respublikası Nazirlər Kabinetinin
Qərarı (“Azərbaycan” qəzeti, 29 yanvar 2015-ci il, № 21, Azərbaycan Respublikasının
Qanunvericilik Toplusu, 2015-ci il, № 1, maddə 67)
QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI
[1]
26 yanvar 2015-ci il tarixli 15 nömrəli
Azərbaycan Respublikası Nazirlər Kabinetinin
Qərarı (“Azərbaycan” qəzeti, 29 yanvar 2015-ci il, № 21, Azərbaycan Respublikasının
Qanunvericilik Toplusu, 2015-ci il, № 1, maddə 67) ilə “Meşə fondunun mühafizəsi, qorunması və
meşələrin bərpası Qaydaları”nın 2.2-ci bəndinin ikinci abzası çıxarılmışdır və yeni məzmunda 2.2-1-ci
bənd əlavə edilmişdir.
[2]
01 oktyabr 2005-ci il tarixli 164 nömrəli Azərbaycan Respublikası Nazirlər Kabinetinin
Qərarı (Azərbaycan Respublikasının Qanunvericilik Toplusu, 2005-ci il, № 9, maddə 855) ilə “Meşə
fondunun mühafizəsi, qorunması və meşələrin bərpası Qaydaları”nın 2.3-cü bəndinin üçüncü
abzasında “hüquqpozmaları” sözü “xətaları” sözü ilə əvəz edilmişdir.
[3]
5 fevral 2008-ci il tarixli 27 nömrəli Azərbaycan Respublikası Nazirlər Kabinetinin Qərarı
(Azərbaycan Respublikasının Qanunvericilik Toplusu, 2008-ci il, № 2, maddə 108) ilə Meşə
fondunun Mühafizəsi, qorunması və meşələrin bərpası Qaydaları"nın 2.2-ci, 3.2-ci, 3.18-ci və 3.29-cu
bəndlərində ismin müvafiq hallarında "Azərbmeşə" İstehsalat Birliyi" sözləri ismin müvafiq
hallarında "Azərbaycan Respublikasının Ekologiya və Təbii Sərvətlər Nazirliyi" sözləri ilə əvəz
edilmişdir.
Dostları ilə paylaş: |