1
Azərbaycan Respublikası Mərkəzi Bankının 2011-ci il üçün pul və maliyyə
sabitliyi siyasətinin əsas istiqamətləri barədə
B Ə Y A N A T I
2010-cu ildə qlobal iqtisadiyyat resessiyadan tədricən çıxmağa başlamış, iqtisadi
canlanma meylləri yaranmışdır. Lakin, böhrandan sonra dünya iqtisadiyyatında yenicə
başlamış “tarazlaşma”, aparıcı iqtisadi mərkəzlərdə struktur və makroiqtisadi problemlər, o
cümlədən büdcə dayanıqsızlığı qlobal artımın qeyri-bərabər getməsinə və sabit olmamasına
gətirib çıxarmışdır. Eyni zamanda dünya maliyyə sistemində əhəmiyyətli risklərin hələ də
qalması maliyyə bazarlarında yüksək volatilliyin yaranmasına səbəb olmuşdur.
Bu mürəkkəb qlobal fonda Azərbaycan iqtisadiyyatında cari ildə də artım və inkişaf
prosesləri davam etmiş, dayanıqlı makroiqtisadi sabitlik hökm sürmüşdür. Bütövlükdə, qlobal
böhranın təsirləri aradan qaldırılmışdır. Ölkə iqtisadiyyatının maliyyə dayanıqlığı daha da
güclənmiş, valyuta ehtiyatlarının əhəmiyyətli artımı baş vermişdir.
2010-cu ildə Mərkəzi Bank pul siyasətinin bəyan olunmuş başlıca istiqamətlərinə uyğun
olaraq öz fəaliyyətini inflyasiyanın məqbul səviyyədə saxlanmasına, manatın məzənnəsinin
sabitliyinin qorunmasına, bank-maliyyə sektorunda sabit inkişafın və dayanıqlığın təmin
olunmasına yönəltmişdir. Bu hədəflərin realizasiyası çərçivəsində Mərkəzi Bank il ərzində öz
siyasətinə çevik korreksiyalar etməklə makroiqtisadi və maliyyə sabitliyini qorumuş, habelə
iqtisadi artıma zəruri dəstək vermişdir.
Mərkəzi Bankın 2011-cu il və strateji dövr üçün fəaliyyətinin əsas istiqamətləri son
qlobal meyllərə və milli iqtisadiyyatın yeni inkişaf çağırışlarına əsaslanır. Pul siyasətinin
başlıca hədəfini makroiqtisadi sabitliyin təmin olunması təşkil edəcəkdir. Bank sektorunda
maliyyə sabitliyinin təmin olunması Mərkəzi Bankın digər hədəfi olacaqdır. Bu hədəflərə nail
olmaq üçün Mərkəzi Bank pul siyasətinin və bank nəzarətinin strateji çərçivəsinin davamlı
təkmilləşməsini həyata keçirəcəkdir. Eyni zamanda makroiqtisadi koordinasiyanın daha da
güclənməsinə və bank sektorunun maliyyə dərinliyinin artırılmasına zəruri dəstək veriləcəkdir.
1. 2010-cu ildə iqtisadi vəziyyət və Mərkəzi Bankın siyasəti
1.1. Qlobal iqtisadiyyatda vəziyyət
2010-cu ildə dünya iqtisadiyyatında artım meyli yaranmış, lakin, bununla belə,
qlobal bazarlarda yüksək volatillik müşahidə edilmişdir. Beynəlxalq Valyuta Fondunun son
proqnozuna görə, 2010-cu ildə qlobal iqtisadi artımın 4.8% olacağı gözlənilir. Dünya
iqtisadiyyatında artım başlasa da, bu, özünün sektorial assimmetrikliyi və regional qeyri-
2
bərabərliyi ilə səciyyələnir. Əsasən inkişaf etməkdə olan ölkələr hesabına baş verən canlanma
maliyyə sektoru ilə müqayisədə korporativ sektorda daha qabarıq olmuşdur. Makroiqtisadi
tarazsızlığın və struktur problemlərin kəskinləşməsi fonunda yaranmış qeyri-müəyyənliklər
bazarlarda volatilliyi artırmışdır. Belə ki, əmtəə qiymətlərinin əhəmiyyətli artması, maliyyə
bazarlarında isə aparıcı valyutların məzənnələrində və fond indekslərində yüksək dəyişkənlik
müşahidə edilmişdir. Xüsusilə neftin qiymətində əhəmiyyətli artım baş vermiş, ərzağın
bahalaşması isə əsasən buğda ixrac edən ölkələrdə məhsuldarlığın azalması ilə əlaqədar
olmuşdur.
Qlobal böhran dövründə ABŞ və Avrozonada dövlət borcu əhəmiyyətli artaraq
iqtisadiyyata fiskal dəstək imkanlarını məhdudlaşdırmışdır. İnkişaf etmiş ölkələrdə büdcə
kəsirləri orta hesabla Ümumi Daxili Məhsulun 9%-nə çatmış, dövlət borcu isə Ümumi Daxili
Məhsulun həcminə yaxınlaşmışdır. Bu şəraitdə bir sıra ölkələr fiskal konsolidasiya, o cümlədən
sosial xərclərin dondurulması planlarını elan etmişlər. Pensiya islahatlarının da mühüm yer
tutduğu bu planların əsasən xərclərin azaldılması yolu ilə aparılacağı gözlənilir. Konsolidasiya
tədbirləri qısamüddətli dövrdə aktivliyə neqativ təsir etsə də, uzunmüddətli dövrdə onun iqtisadi
artımı yüksəldəcəyi gözlənilir.
Resessiya başa çatdıqca, mərkəzi banklar tədricən öz başlıca mandatına - inflyasiya
hədəfinə prioritet verməyə başlamışlar. İl ərzində ABŞ-da monetar siyasət yumşaldıldığı
halda, Çində sərtləşmə, Avropada isə neytral siyasətə üstünlük verilmişdir. Eyni zamanda
iqtisadi artımı dəstəkləmək məqsədilə milli valyutaların qarşılıqlı dəyərsizləşməsinə qarşı
qlobal koordinasiya səyləri gücləndirilmişdir. İqtisadi artımın stimullaşdırılması vəzifəsinin
başqa vasitələrlə, əsasən struktur islahatlarla həyata keçirilməsi məqsədəuyğun sayılmışdır.
1.2. Azərbaycan iqtisadiyyatında proseslər
Qlobal böhranın neqativ təsirlərinin neytrallaşdırılması şəraitində iqtisadi artımın
mənbələri daha da canlanmağa başlamışdır. Ötən 11 ayda iqtisadi artım 4.5% olmuş, o
cümlədən qeyri-neft sektoru 5.9% artmışdır. Sənayedə faktiki istehsal indeksinin və istehsal
güclərindən istifadə səviyyəsinin yüksəlməsi müşahidə olunmuşdur. Mikroiqtisadi
monitorinqlərə görə istehsalı və dövriyyəsi çoxalan müəssisələrin sayı ötən illə müqayisədə
artmışdır. Qeyri-neft sənayesində artım 5.9% olmuş, sənaye, xidmət və ticarət üzrə Biznes İnam
İndeksi ötən ilə nəzərən yaxşılaşmışdır. Bu şəraitdə iqtisadiyyatda məşğul olanların sayı artmış,
sənaye, xidmət, ticarətdə məşğulluq gözləntiləri ötən illə müqayisədə yaxşılaşmışdır.
Cari ilin ötən 11 ayında əhalinin nominal pul gəlirlərinin 12%, ev təsərrüfatlarına bank
kreditlərinin isə 14.7% artımı daxili tələbin artmasına müsbət təsir etmişdir. Son aylar ticarət
şəbəkəsində uzunmüddətli istifadə əşyaları üzrə yığılmış ehtiyatların azalması müşahidə
3
olunmuşdur. Ticarətdə faktiki satış, xidmətdə isə tələb indeksinin yüksəlməsi baş vermişdir.
Ötən 11 ayda investisiya qoyuluşları 15.2%, o cümlədən qeyri-neft sektorunda 7.7% artmışdır.
Qlobal böhranın təsirlərinin sovuşması fonunda ölkənin xarici mövqeyində
yaxşılaşma davam etmişdir. Cari ildə tədiyə balansına ixrac qiymətlərinin yüksəlməsi,
bankların xaricdən kredit cəlb etmək imkanlarının tədricən bərpası, xarici maliyyə axınlarının
artması pozitiv təsir etmişdir. 2010-cu ilin 9 ayında cari əməliyyatlar hesabının profisiti ötən ilin
eyni dövrünə nəzərən 69% yüksələrək 12 mlrd. $-a yaxınlaşmışdır ki, bu da kapital hesabının
kəsirini örtərək valyuta ehtiyatlarını 9.7 mlrd. $-dan çox artırmışdır. Strateji valyuta ehtiyatları
1 dekabr 2010-ci il tarixinə 30 mlrd. $-a çatmış və 3 illik mal və xidmət idxalına kifayət
etmişdir.
1.3. Pul siyasəti və makroiqtisadi sabitlik
2010-cu ildə Mərkəzi Bank makroiqtisadi sabitliyə təsir edən amilləri nəzarətdə
saxlayaraq adekvat siyasət həyata keçirmişdir. Pul siyasəti qarşısında qoyulmuş son və
aralıq hədəflərə nail olunmuş, pul kütləsi optimal səviyyədə tənzimlənmiş, manatın
məzənnəsinin sabitliyi qorunmuşdur. Nəticədə əsas hədəf olan inflyasiya təkrəqəmli səviyyədə
qalmışdır.
Mərkəzi Bank məzənnə siyasətini valyuta bazarında təklif kanallarının genişlənməsi
şəraitində həyata keçirmişdir. Ötən 11 ayda Mərkəzi Bank valyuta bazarında 1 mlrd. $-dan
çox həcmdə xarici valyuta alışı həyata keçirmişdir. Manatın ABŞ dollarına qarşı nominal
məzənnəsi sabit qalaraq 0.4% möhkəmlənmişdir. Qeyri-neft sektoru üzrə real effektiv məzənnə
demək olar ki, neytral qalmış, Azərbaycanın qeyri-neft ixracının çox hissəsinin getdiyi yaxın
xarici ölkələr üzrə isə ucuzlaşmışdır ki, bu da rəqabət qabiliyyətinə müsbət təsir etmişdir.
İqtisadi tsikldəki meylləri nəzərə alaraq 2010-cu ildə Mərkəzi Bank yumşaq pul
siyasətini davam etdirmiş, lakin, dəqiqləşmiş proqnozları nəzərə alaraq noyabr ayında pul
siyasətinin “neytrallığı” istiqamətində qərarlar qəbul etmişdir. İşgüzar aktivliyi
dəstəkləmək üçün cari ilin oktyabr ayının sonunadək Mərkəzi Bank pul siyasətini dəyişməmiş,
uçot dərəcəsi 2%, məcburi ehtiyat norması 0.5% səviyyəsində qalmış, likvidlik pəncərəsi isə
açıq saxlanmışdır. Mərkəzi Bankın əməliyyatları hesabına cari ilin 11 ayında manatla geniş pul
kütləsi 20.2% artmışdır. Bu, faiz dərəcələrinə azaldıcı təsir etmişdir. Lakin, ilin II yarısının
sonlarında Mərkəzi Bank tərəfindən daim təhlil olunan tsikl göstəriciləri arasında pul
siyasətinin korreksiyası lehinə olan göstəricilərin sayı artmağa başlamışdır. Məcmu tələbin
canlanması, inflyasiya amillərini və tədiyə balansının proqnozlarını nəzərə alaraq Mərkəzi Bank
noyabr ayının 1-dən uçot dərəcəsinin 3%-ə qaldırılmasına dair qərar qəbul etmişdir. Eyni
4
zamanda pul kütləsinin xarici amillərini tənzimləmək məqsədilə bankların xarici öhdəliklərinə
0.5% məcburi ehtiyat norması tətbiq edilmişdir.
Dövr ərzində inflyasiya təkrəqəmli səviyyədə qalmış, cari ilin 11 ayının yekunu üzrə
orta illik inflyasiya 5.5%, son bir ildə isə 7.4% təşkil etmişdir. Partnyor ölkələrdə
inflyasiyanın sürətlənməsi, xüsusən də ərzaq istehsalının azalması inflyasiyaya artırıcı təsir
göstərən önəmli faktor olmuşdur. Əlverişsiz təbii mühit kənd təsərrüfatı istehsalının azalmasına
səbəb olmuş, nəticədə kənd təsərrüfatında istehsalçı qiyməti indeksi 11 ayda 3.7% yüksəlmişdir.
Bütün bunlara baxmayaraq, cari ilin sonuna inflyasiyanın təkrəqəmli səviyyədə qalacağı
gözlənilir. Daşınmaz əmlak bazarında isə qiymətlərin azalması prosesi davam etmişdir.
1.4. Bank sektorunda inkişaf və maliyyə sabitliyi siyasəti
2010-cu ildə Azərbaycan bank sisteminin göstəriciləri artmaqda davam etmişdir.
İlin əvvəlindən bankların məcmu kapitalının artımı 7.9% təşkil etmişdir. Ötən 11 ayda əhalinin
əmanətləri 22.8%, kredit qoyuluşları 8.1%, bank aktivləri isə 8,8% artmışdır. Dövr ərzində
müddətli depozitlərin 30.2% artması bank sisteminə inamın yüksəlməsini xarakterizə edir.
Qlobal maliyyə bazarlarında canlanma bank sektorunun daxili mənbələrlə yanaşı xarici
maliyyələşmə mənbələrinə çıxışını bərpa etmişdir.
Bank nəzarəti üzrə formalaşan Bazel-III standartlarını nəzərə alaraq Mərkəzi Bank
özünün makroprudensial çərçivəsini təkmilləşdirmişdir. Prudensial tədbirlər sistem
risklərnin minimallaşdırılması, bankların sabit fəaliyyətinin təmin edilməsi və etimadın
saxlanılmasına yönəldilmişdir. Kapital, likvidlik və makroprudensial nəzarət alətləri üzrə yeni
Bazel-III konsepsiyasına əsasən maliyyə sektoruna yeni dayanıqlıq normativlərinin tətbiqi
tövsiyə olunmuşdur. Bu normativlər bütövlükdə, bank sektorunun protsiklik davranışlarını
məhdudlaşdıraraq onları iqtisadi şokların mənfi təsirlərindən daha etibarlı şəkildə qorumalıdır.
Bunları nəzərə alaraq, Azərbaycan Mərkəzi Bankı aşağıdakı tədbirləri həyata keçirmişdir:
Bankların idarəetmə potensialı və risk menecment sistemləri gücləndirilmişdir;
Maliyyə ehtiyatlanması səviyyəsi daha da artırılmışdır;
Aktivlərin sağlamlaşdırılması tədbirləri davam etdirilmişdir;
Kapitalizasiya proqramları qəbul edilmiş və həyata keçirilməyə başlanmışdır;
Likvidliyin idarə edilməsinin yeni çərçivəsi qəbul edilmiş, yeni normativlərin tətbiqi
üçün hazırlıq işlərinə başlanılmışdır.
Mərkəzi Bank tərəfindən həyata keçirilən tədbirlər nəticəsində Azərbaycan bank
sistemi maliyyə dayanıqlığını qorumuşdur. Bank aktivlərinin keyfiyyət göstəriciləri dayanıqlı
həddlərdə qorunaraq stabilləşmiş, real sektorun və əhalinin bank sisteminə vaxtı keçmiş
borclarının xüsusi çəkisi 5%-i keçməmişdir. Potensial risklərin çox hissəsi özəl banklar
5
tərəfindən tanınmış və onlar üzrə zəruri ehtiyatlar yaradılmışdır. Bank sistemi optimal
gəlirliyini qorumuş və investisiya cəlbediciliyini saxlamışdır. Hazırda ümumi likvidlik
səviyyəsi yüksəkdir. Bank sektoru potensial risklərin örtülməsi və aktivliyin dəstəklənməsi
üçün zəruri kapital səviyyəsinə malikdir. Kapitalın adekvatlıq göstəricisi 12%-lik normaya qarşı
16.8% təşkil edir. Stress-testlər göstərir ki, bank sistemi makroiqtisadi şoklara dözmək və
itkiləri örtmək qabiliyyətinə malikdir.
Bank sektorunun regional şəbəkəsi və regionlarda iqtisadi subyektlərin bank
xidmətlərinə çıxış imkanları genişlənmişdir. Regionlara kredit qoyuluşları 12%-dən çox
artmış, bank filiallarının sayı 316-ə çatmışdır. “Azərpoçt” layihəsi uğurla başa çatdırılmış, poçt
şöbələri məhdud bank əməliyyatları aparmağa başlamışlar. Poçt-bank sisteminin fəaliyyətə
başlması regionlarda maliyyə xidmətləri şəbəkəsinin genişlənməsinə və rəqabət mühitinin
yaxşılaşmasına imkan yaratmışdır.
İpoteka kreditləşməsi cari ildə də iqtisadi aktivliyin dəstəklənməsində mühüm rol
oynamışdır. İpoteka kreditləşməsi üçün dövr ərzində bazar resurslarının cəlb olunması
praktikası davam etdirilmişdir. Ötən 11 ayda İpoteka Fondu vasitəsilə müvəkkil kredit
təşkilatları tərəfindən ümumilikdə 2213 nəfərə 87.3 mln. manat məbləğində ipoteka krediti, o
cümlədən 453 nəfərə 15 mln.manat məbləğində sosial ipoteka verilmişdir. Eyni zamanda, son
qlobal maliyyə böhranı nəzərə alınmaqla ipoteka mexanizmində adekvat təshihlər aparılmışdır.
İpoteka kreditləri üzrə portfel yüksək dərəcədə sağlam olmuş və kreditlər üzrə ödənişlərdə
gecikmələr müşahidə edilməmişdir.
2. 2011-cu il üçün pul və maliyyə sabitliyi siyasətinin əsas istiqamətləri
2.1. Qlobal iqtisadi proqnozlar və makroiqtisadi siyasət çağırışları
2011-ci ildə dünya iqtisadiyyatının artımı proqnozlaşdırılsa da, bu artımın qeyri-
sabitliyin və əhəmiyyətli risklərin tam aradan qalxmaması fonunda baş verəcəyi
gözlənilir. Belə ki, Beynəlxaq Valyuta Fondunun son proqnozlarına görə 2011-cu ildə qlobal
artımın 2010-cu illə müqayisədə 0.8% bəndi az olacağı (4.2%) gözlənilir. Ərzaq istehsalının
azalması ilə bağlı dünyada inflyasiyanın güclənməsi gözləntiləri yaranmışdır.
Dünya iqtisadiyyatının tarazsızlığı, bununla bağlı yaranmış qeyri-müəyyənliklər
qlobal tələbin, əmtəə bazarlarının və maliyyə axınlarının qeyri-sabitliyini artırır. Fiskal
konsolidasiya planlarının reallaşması və maliyyə sektorunda risklərin qalması şəraitində
qısamüddətli dövrdə işsizlik probleminin hələ də qalacağı gözlənilir. Bu şəraitdə beynəlxalq
institutlar xarici ticarətdə defisitli ölkələrlə profisitli ölkələr arasında tarazlaşmanın qlobal
sabitlik üçün önəmli amil olacağı qənaətindədirlər. Birincilər, fiskal intizamı gücləndirmək və
6
yeni struktur islahatlarla xarici tələbin artmasına nail olmalı, ikincilər isə məzənnə rejimlərini
sərbəstləşdirməklə daxili tələbi stimullaşdırmalı, habelə inflyasiyanın artması şəraitində pul
siyasətinin sərtləşdirilməsi imkanlarını da diqqətdə saxlamalıdırlar. Təbii resurs ixrac edən
ölkələr isə xammal ixracından topladıqları maliyyə aktivlərini daxili tələbin stimullaşdırılması
məqsədlərinə istifadə edərkən fiskal dayanıqlıq meyarlarını gözləməlidirlər. Eyni zamanda milli
iqtisadiyyatın tsiklik həssaslığını azaltmaq və iqtisadi artımın daha dayanıqlı, uzunmüddətli
mənbələrini təmin etmək üçün diversifikasiya siyasətini həyata keçirməlidirlər.
Beynəlxalq maliyyə institutları inflyasiyaya, iqtisadi artıma və maliyyə köpüklərinə
ayrı-ayrılıqda təsir edilməsində fərdi makroiqtisadi vasitələrin tətbiqini tövsiyə edirlər.
Qiymətlərin sabitliyi pul siyasətinin başlıca hədəfi olaraq qalmalı, bununla belə “kontrtsiklik”
makroprudensial siyasətlə tamamlanmalıdır. Prudensial alətlər “ünvanlı” olduğundan onlar
iqtisadi volatilliyə səbəb olmadan köpükləri effektiv idarə etmək imkanlarını artırır. Qlobal
iqtisadi tarazlaşmanın qısa zamanda baş verməsi üçün əsas vasitə isə struktur siyasətinin həyata
keçirilməsidir. Xüsusilə inkişaf etməkdə olan ölkələrdə bazar mexanizmlərində olan boşluqları
aradan qaldırmaq üçün geniş derequlyasiya tədbirləri mühüm rol oynaya bilər.
2.2. Azərbaycan iqtisadiyyatının proqnozları və strateji çağırışlar
Makroiqtisadi proqnozlar 2011-ci ildə Azərbaycanın xarici iqtisadi mövqeyinin
əhəmiyyətli güclənəcəyini göstərir. Qlobal iqtisadi artım şəraitində 2011-ci ildə əsas ixrac
məhsulları qiymətlərinin əlverişli qalacağı və neft gəlirlərinin artacağı, xaricdən ölkəyə
maliyyə-investisiya axınının güclənəcəyi gözlənilir. Tədiyə balansının cari hesabında
əhəmiyyətli profisitin qalacağı, strateji valyuta ehtiyatlarının isə daha da artacağı
proqnozlaşdırılır. Ölkənin kredit reytinqinin yüksəlməsi isə iqtisadiyyata xarici kapital
axınlarının artması üçün əlverişli şərait yaradır. Bütün bunlar 2011-ci ildə manatın məzənnəsinə
və pul kütləsinə təsir edəcək fundamental amillərdir.
2011-ci ildə daxili tələbin “təmkinli” artımı, xarici tələbin isə tədrici yüksəlməsi
şəraitində iqtisadi artımın davam edəcəyi proqnozlaşdırılır. Ölkənin sosial-iqtisadi inkişaf
proqnozlarına uyğun olaraq neft sektorunun stabilləşməsi şəraitində iqtisadi artımın başlıca
olaraq qeyri-neft sektoru hesabına olacağı gözlənilir. Bunun da əsasən daxili tələbdən
qaynaqlanacağı ehtimal olunur. Dövlət xərclərinin və özəl tələbin təkrəqəmli templə artması,
qeyri-xammal ixracının tədrici genişlənməsi qeyri-neft sektorunda artım templərini
formalaşdıran başlıca amillərdir. Bu şəraitdə 2011-ci ildə Ümumi Daxili Məhsulun potensial və
faktiki səviyyəsi arasındakı fərqin azalacağı gözlənilir.
2011-ci ildə dövlət xərclərinin konservativ artımı fiskal dayanıqlıq istiqamətində
mühüm addımdır. Fiziki və sosial infrastrukturun modernizasiyası istiqamətində əldə edilən
7
yüksək nəticələri nəzərə alaraq daxili fiskal konsolidasiyanın gücləndirilməsi, dövlət xərclərinin
yeni inkişaf prioritetlərinə – iqtisadiyyatın diversifikasiyası, ixrac potensialının yüksəldilməsi,
insan kapitalının inkişafı istiqamətlərinə yönəldilməsi vəzifəsi aktuallaşır.
Bütövlükdə, neft gəlirlərinin həcmini nəzərə alaraq inflyasiyanın monetar amillərinə
koordinasiya olunmuş nəzarətin gücləndirilməsi zərurəti artır. 2011-ci ildə inflyasiya
səviyyəsinə daxili tələblə yanaşı, partnyor ölkələrdə, habelə dünya ərzaq bazarlarında
qiymətlərin qalxması da təsir edə bilər. Bütün bunlar növbəti ildə makroiqtisadi sabitlik
hədəflərinin əsas prioritetə çevrilməsini şərtləndirir.
2.3. Pul siyasətinin hədəfləri və strateji çərçivəsi
Qlobal böhranın neqativ təsirlərinin artıq neytrallaşdığını nəzərə alaraq, növbəti ildə
Mərkəzi Bank öz mandatına uyğun olaraq pul siyasətini makroiqtisadi sabitliyin təmin
olunmasına yönəldəcəkdir.
Makroiqtisadi proqnozları, o cümlədən xarici iqtisadi amilləri və neft gəlirlərinin
artmasını nəzərə alaraq Mərkəzi Bank 2011-ci ildə pul siyasəti qarşısında aşağıdakı
hədəfləri məqsədəuyğun hesab edir:
İllik (12 aylıq) inflyasiyanın təkrəqəmli səviyyədə saxlanması və inflyasiyanın yüksək
volatilliyinin qarşısının alınması.
Bu hədəfin realizasiyasında digər iqtisadi qurumların da fəaliyyətinin koordinasiyası mühüm
rol oynayacaqdır.
Bu hədəflərin realizasiyası üçün manatın məzənnəsinin valyuta təklifi və tələbi
əsasında dəyişməsi vacib şərtlərdəndir, lakin, maliyyə sabitliyi prioritetlərini də nəzərə
alaraq məzənnənin kəskin volatilliyinə yol verilməyəcəkdir. Uzunmüddətli dövrdə Mərkəzi
Bank inflyasiyanın daha effektiv hədəflənməsini təmin etmək üçün çevik məzənnə rejimlərinə
keçid prosesini davam etdirəcəkdir. Belə ki, dünya təcrübəsində çevik məzənnə rejimləri pul
kütləsinə nəzarətin gücləndirilməsinin başlıca şərti hesab olunurlar. Bu və ya digər rejimə
tədrici keçid valyuta gəlirlərinin diversifikasiya səviyyəsi, valyuta risklərini sığortalayan
maliyyə alətlərinin inkişafı, dollarlaşmanın azaldılması, maliyyə bazarının dərinliyi, habelə,
manatın ixrac sektorunun rəqabət qabiliyyətinə real təsir səviyyəsindən asılı olaraq mümkün
olacaqdır.
Mərkəzi Bank pul siyasəti hədəflərini yerinə yetirmək üçün bazar alətlərindən çevik
istifadə edəcəkdir. Faiz dəhlizinin parametrləri, o cümlədən uçot dərəcəsi inflyasiya səviyyəsi,
iqtisadi tsikl və maliyyə bazarlarındakı vəziyyətdən asılı olaraq tənzimlənəcəkdir. Bank
sisteminin likvidliyi əsasən qısamüddətli əməliyyatlar vasitəsilə idarə olunacaqdır. Nisbətən
8
uzunmüddətli yenidən maliyyələşmə əməliyyatları isə yalnız xüsusi zərurət kəsb edən hallarda
tətbiq olunacaqdır. Məcburi ehtiyat normalarının tətbiqi mexanizmi daha da təkmilləşdiriləcək,
normanın səviyyəsi bank sektoruna “qaynar kapital” axınının miqyasından asılı olaraq müəyyən
olunacaqdır. Pul siyasəti alətlərinin makroiqtisadi effektivliyini artırmaq üçün banklararası pul
bazarında aktivliyin təşviqi davam edəcəkdir.
Pul siyasətinin institusional bazasının inkişafı diqqətdə saxlanacaq, iqtisadi
diaqnostika, tədqiqat və proqnozlaşdırma bazası gücləndiriləcəkdir. İqtisadi tsiklin
izlənilməsi sisteminin tam formalaşması, bunun üçün makroiqtisadi və mikroiqtisadi
statistikanın analitik dərinliyinin təmin olunması (aidiyyatı qurumlar ilə birlikdə), “tarazlı
məzənnə”nin qiymətləndirilməsi, əmlak bazarında “köpüyün” ölçülməsi, inflyasiyanın
proqnozlaşdırılmasında yeni modellərin tətbiqi işləri davam etdiriləcəkdir.
Müxtəlif iqtisadi şokların dinamik tədqiqi məqsədilə yerli xüsusiyyətlər, habelə
postböhran dövrünün metodoloji çağırışları nəzərə alınmaqla ümumi tarazlıq modelinin nəzəri
bazasında yeni makroekonomik modelin işlənməsi nəzərdə tutulur. Bu model Mərkəzi Banka
pul siyasətinin müxtəlif rejimlərində simulyasiyalar aparmağa və daha keyfiyyətli
proqnozlaşdırmaya imkan verəcək.
2.4. Bank sektorunda maliyyə sabitliyi siyasəti
Postböhran çağırışlarını nəzərə alaraq 2011-ci ildə Mərkəzi Bank öz fəaliyyətini bank
sektorunda maliyyə sabitliyini daha da gücləndirməyə yönəldəcəkdir. Uzunmüddətli dövrdə
strateji hədəf iqtisadiyyatın diversifikasiyasında maliyyə sisteminin aktiv rolunu təmin etməkdən
ibarətdir.
2011-ci ildə Mərkəzi Bankın bank sektorunda maliyyə sabitliyi siyasəti aşağıdakı
hədəflərin realizasiyasına yönələcəkdir:
Kapital adekvatlığının qorunması;
Optimal likvidlik səviyyəsinin saxlanması;
Restrukturizasiyanın həyata keçirilməsi.
2011-ci ildə tənzimləmə və nəzarət tədbirləri artım və dayanıqlıq arasında optimal
nisbətin təminatına yönəldiləcəkdir. Postböhran dövründə bank sektorunun daha stabil və
dayanıqlı artım mənbələrinə söykənməsi vacib şərtdir. Bu, başlıca olaraq, maliyyə
vasitəçiliyinin sağlam və uzunmüddətli iqtisadi artıma yönəlməsi zərurətini şərtləndirir. Bunun
üçün bankların resurs bazasında uzunmüddətli yığım mənbələrinin, o cümlədən kapital
bazarının rolunun artırılması zəruridir.
9
Bank sisteminin stabil və təhlükəsiz inkişafının təmin edilməsi üçün tənzimlənmə və
prudensial nəzarət çərçivəsinin yeni qlobal çağırışlara adaptasiyası davam etdiriləcəkdir.
Bu məqsədlə mikro-prudensial (institutlar üzərində fərdi nəzarət) nəzarətlə əhatə olunmuş
riskləri daha effektiv tənzimləmək üçün bank nəzarəti üzrə Bazel Komitəsinin platformasında
tövsiyə edilmiş yeni alətlərin istifadəsi imkanlarının qiymətləndirilməsinə başlanacaqdır. Bank
tənzimlənməsi və nəzarətinin təkmilləşdirilməsi üçün makroprudensial yanaşmanın
gücləndirilməsi başlıca vəzifə kimi müəyyənləşdirilmişdir.
Bank aktivləri üzrə ehtiyatlanma siyasətinin yeni kontrtsiklik fəlsəfə əsasında
formalaşması son qlobal böhrandan sonra xüsusilə aktuallaşmışdır. Ənənəvi olaraq banklar
fəaliyyətlərində “protsiklik” davranışa (iqtisadi artım dinamikasının arxasınca getmək meyli)
meylli olurlar ki, bu da böhran zamanı zəruri ehtiyat portfelinin olmaması ilə nəticələnir.
Kontrtsiklik yanaşmanın inkişafı bankların iqtisadi artım dövründə ehtiyatlı davranışını, böhran
dövründə isə daha dayanıqlı olmalarını şərtləndirəcək. Bunu nəzərə alaraq “kontrtsiklik-
dinamik ehtiyatlanma” mexanizmləri tətbiq olunacaqdır.
Banklarda kapital, likvidlik və kredit risklərinin təhlükəsiz həddə idarə edilməsi
üçün Mərkəzi Bank aşağıdakı tədbirlərin realizasiyasını diqqətdə saxlayacaqdır:
Növbəti ildən “leverec” (aktivlərin artımını kapitalın artımına bağlayan alət) normativinin
tətbiqi, bu normativin kapitalizasiyaya əlavə təkan verməsi;
Bank nəzarəti tərəfindən Bazel III çərcivəsində tövsiyə edilmiş kapitalın keyfiyyət
parametrlərinə dair daha konservativ yanaşmanın tətbiqi, kapitalın daha stabil mənbələr
hesabına formalaşdırılması;
Bazel III platformasında tövsiyə edilmiş qısamüddətli likvidliyinin idarə edilməsi
alətlərinin tətbiqi üçün hazırlıq işlərinə başlanılması;
Bankların maliyyə risklərinə qarşı davamlılığını artıran daxili institusional potensialın
gücləndirilməsi.
Bank sektorunun restrukturizasiyası və dövlətsizləşdirilməsi, sektorda rəqabətin
stimullaşdırılması əsas prioritetlətindən biri olacaqdır. Rəqabət şərtlərinin tam realizasiyası
sektorun maliyyə vasitəçiliyi funksiyasının dərinləşməsi və bank-maliyyə xidmətlərinin
keyfiyyətinin yüksəldilməsinin vacib amillərindən biridir. Bank sektorunun restrukturizasiyası,
korporativ idarəetməyə olan keyfiyyətcə yüksək tələb bazarda rəqabət mühitinin
gücləndirilməsinə imkan yaradacaqdır.
Növbəti il və strateji dövrdə Mərkəzi Bank başlıca vəzifəsini makroiqtisadi və maliyyə
sabitliyinin qorunmasında və bu məqsədlə pul və maliyyə sabitliyi siyasəti strategiyalarının
təkmilləşməsində görür. Bu, uzunmüddətli dövrdə dayanıqlı və dinamik iqtisadi artımın başlıca
şərtlərindən biridir. Dayanıqlı iqtisadi artıma nail olunmasında ölkənin ixrac potensialının tam
reallaşması və diversifikasiya başlıca vasitədir. Bunun əsas şərtləri birbaşa xarici
10
investisiyaların həcminin artırılması, kapital bazarının dərinləşməsi, institutların və insan
kapitalının inkişafıdır.
Dostları ilə paylaş: |