Microsoft Word Ramiq Muxtar doc
Yüklə 397,15 Kb. Pdf görüntüsü
|
- Bu səhifədəki naviqasiya:
- Nəğməkar şair
- Bakı-2012
- “Yedək Qayıq”
- İstifadə olunan ədəbiyyat
| AZƏRBAYCAN RESPUBLİKASI MƏDƏNİYYƏT VƏ TURİZM NAZİRLİYİ F.KÖÇƏRLİ ADINA RESPUBLİKA UŞAQ KİTABXANASI ELMİ-METODİKA ŞÖBƏSİ
Şair-dramaturq Ramiq Muxtarın anadan olmasının 70 illik yubileyi münasibətilə
Nəğməkar şair (metodiki vəsait)
Bakı-2012
I. Həyat və yaradıcılığı
Bir işıqlı yolum vardır. O yol böyük Vətən dərdim, Azadlığın şüarıdır.
Şairin böyüklüyünü təmin edən əsas cəhətlərindən biri də onun xalqa bağlılığındadır. Xalqın əsrlərdən bəri yaratdığı qiymətli sənət incilərindən istifadə etməyən, xalq yaradıcılığından qidalanmayan şair və yazıçının heç bir əsəri, şeiri uzun ömürlü ola bilməz. Sevimli şairimiz Ramiq Muxtarı insanlara sevdirən əsas cəhətlərdən biri də məhz onun xalq həyatını dərindən öyrənməsi, onun arzu və istəklərini öz əsərlərində əks etdirməsidir. Şeirimizin ağsaçlı ağsaqqalı Ramiq Muxtarın poeziyasının beşiyi Naxçıvan torpağıdır. Ramiq Muxtar ( Nağıyev) 1942-ci il sentyabrın 5-də ziyalı ailəsində Azərbaycanın dilbər guşəsi Naxçıvan şəhərində dünyaya göz açdı. Ü.Hacıbəyov adına 1 saylı Naxçıvan şəhər orta məktəbini bitirdikdən sonra sənədlərini M.A.Əliyev adına Azərbaycan Dövlət İncəsənət İnstitutunun mədəni-maarif fakültəsində təhsilini davam etdirmişdir. Təhsilini bitirdikdən sonra “Şərq qapısı” qəzetində ədəbi işçi, Şahbuz rayonundakı uşaq musiqi məktəbinin direktoru, Naxçıvan Nazirlər Soveti yanında bədən tərbiyəsi və idman komitəsinin sədri, Bakıda Nəsimi rayonundakı şahmat məktəbinin müdiri və bir çox vəzifələrdə çalışmışdır. Ramiq Muxtar şair olmaqla yanaşı həm də dama üzrə SSRİ idman ustasıdır. 1984-1986 illərə qədər olan bir dövrdə Ramiq Muxtar Naxçıvan şəhər Dövlət filarmoniyasının direktoru vəzifəsində də işləmişdir.
Ramiq Muxtar yaradıcılığa hələ uşaq yaşlarından başlamışdır. 11 yaşında olarkən, bədii yaradıcılıqla məşğul olan Ramiq Muxtarın şeirləri dövrü mətbuatda tez-tez çap olunmağa başlamışdır. Onun qələmə aldığı “Üfüqlər qızaranda”, “Əgər sevirsənsə” adlı pyesləri C.Məmmədquluzadə adına Naxçıvan Dövlət Musiqili Dram Teatrında tamaşaya qoyulmuşdur. Naxçıvan Dövlət Dram Teatrında tamaşaya qoyulmuş bu pyeslər həmçinin Bakı, İrəvan, Ağdam, Qazax Dövlət Dram Teatrlarında da uğurla tamaşaya qoyuldu. Ramiq Muxtar həm də nəğməkar şairdir. Onun sözlərinə yazılmış 120-dən çox mahnı bəstələnmişdir. Son dövrlərdə respublikada keçirilən bir çox müsabiqələrdə onun sözlərinə bəstələnmiş mahnılar 8 dəfə birincilik mükafatına layiq görülmüşdür. Bir çox tanınmış müğənnilər, xalq artistləri şairin sözlərinə bəstələnmiş mahnıları sevə-sevə ifa etmiş və bu mahnılar onların ifasında çox uğurlu alınmışdır. Yaradıcılığı həmişə yüksək qiymətləndirilən Ramiq Muxtar 1980-cı ildən SSRİ Yazıçılar İttifaqının üzvü, “Rəsul Rza” Beynəlxalq mükafatının laureatı və hal-hazırda prezident təqaüdçüsüdür. Həmçinin, Gürcü-Azərbaycan xalqlarının dostluğundan bəhs edən “Şəhərli kürəkən” pyesinə görə Gürcüstanın ali ordeni olan “Şərəf” ordeninə layiq görülmüşdür.
II. Keçiriləcək tədbirlər
Bu gün yaradıcılığından söz açdığımız ziyalılığı yaradıcılığına, yaradıcılığı ziyalılığına bəzək olan qələm sahiblərindən biri də Ramiq Muxtardır. Ramiq Muxtar günü-gündən püxtələşən, üslubunu sabitləşdirən, təkrarolunmaz obrazlar yaradan şairlərdəndir. Çağdaş poeziyamızda tanınan şairlər sırasında Ramiq Muxtarın adı tez-tez çəkilir. Ramiq Muxtar öz dəsti-xətti ilə seçilən, oxucuların sevimlisinə çevrilən şairlərimizdəndir. Ömrünün ən gözəl çağını, yəni 70 yaşını qeyd edən şairin yubileyi bu gün respublikamızın bir çox yerlərində məktəblərdə, gimnaziyalarda, kitabxanalarda və bir çox təhsil müəssisələrində qeyd olunur. F.Köçərli adına Respublika Uşaq Kitabxanasında Ramiq Muxtarın 70 illik yubileyi münasibətilə bir çox silsilə tədbirlər planı hazırlanmışdır. Belə tədbirlərin hazırlanmasında məqsədimiz Ramiq Muxtar yaradıcılığını yaxından izləmək, onu bir daha oxuculara sevdirməkdən ibarətdir. F.Köçərli adına Respublika Uşaq Kitabxanasında Ramiq Muxtarın yaradıcılığını yaxından izləmək üçün “Ramiq Muxtar-70” adlı foto sərgi hazırlanmışdır. Foto sərgidə Ramiq Muxtarın həyat və fəaliyyəti haqqında bir sıra maraqlı fotolar öz əksini tapmışdır.
Ramiq Muxtarın yubileyi ilə bağlı keçirilən tədbirlər sırasında oxucuların ən çox sevdiyi və maraq doğurduğu tədbirlərdən biri də şairlə görüşdür. Bu görüş oxucuların nəinki maraq doğurduğu bir görüş, hətta, qeyd etmək yerinə düşərdi ki, şairin özü ilə canlı ünsiyyətdə olmaq onun qələmindən süzülüb gələn şeirlərinə qulaq asmaq üçün bir vasitədir. Kitabxanada təşkil olunan görüşə kitabxanaçı bir çox qonaqları- ədəbiyyat müəllimlərini, şair və yazıçıları dəvət edə bilər. İlk əvvəl kitabxanaçı şairin həyat və yaradıcılığından gələn qonaqlara ətraflı məlumat verir. Sonra söz məktəblilərə verilir. Məktəblilər şairin “Ana durnanın ölümü”, “Məsləkim”, “Borclu qaldım” adlı şeirlərini söyləyir, pyeslərindən tamaşalar göstərirlər. Görüşdə oxucuları maraqlandıran suallar cavablandırılır. Çıxışlardan sonra söz şair Ramiq Muxtara verilir. Ramiq Muxtar da öz növbəsində yaradıcılığından və gələcək planlarından oxuculara məlumat verir. Şair-dramaturq, prezident təqaüdçüsü Ramiq Muxtar yaradıcılığını yaxından izləmək üçün keçiriləcək tədbirlərdən biri də kitab müzakirəsidir. Kitab müzakirəsində ilk olaraq Ramiq Muxtarın həyat və yaradıcılığından bəhs edən film nümayiş olunur. Daha sonra şairin “Azərbaycan” nəşriyyatı tərəfindən 2007-ci ildə nəşr olunmuş “Seçilmiş əsərlər” adlı kitabının müzakirəsinə başlanılır. Bu cilddə müəllifin altmışa yaxın şeiri və mahnı mətnləri, bir poeması, üç pyesi daxil edilmişdir. Onun kitabdakı pyesləri Bakı, İrəvan, Naxçıvan, Ağdam, Qazax teatrlarında tamaşaya qoyulmuş və ciddi marağa səbəb olmuşdur. “Üfüqlər qızaranda”, “Müdirin aqibəti”, “Əlvida, köhnə dünya”, “Əgər sevirsənsə”, “Şəhərli kürəkən”, “Doğma səmanın ulduzları”, “Qıl körpü” pyesləri dramaturji ustalıq, konfliktlərin gərginliyi, qəhrəmanların daxili mübarizəsi, hadisələrin dərinliyi baxımından nəzər-diqqəti cəlb etmiş, müəllifin yaradıcılıq uğurları kimi dəyərləndirilmişdir. Ramiq Muxtar öz pyeslərində duyub-dərk etdiyi mənəvi aləmin dərinliklərinə üz tutmuş, sanki tamaşaçını bu aləmin təmizliyini, zərifliyini kobudluqlardan, namərdliklərdən qorumağa çalışmışdır. Bu əsərlərdə ötəri hisslərə yer yoxdur, mənəvi narahatlığın həyəcan siqnalı var. Dramaturq öz qəlbindəki mənəvi ağrıları ustalıqla qəhrəmanlarının həyatına, taleyinə köçürmüşdür. Kitabdakı "Şəhərli kürəkən" adlı iki hissəli psixoloji pyesdə isə hadisələr Gürcüstanda cərəyan edir. Maraqlıdır ki, gürcülərə məxsus şən, şux söhbətlər, duzlu-məzəli zarafatlar əsər boyu bir-birini əvəz edir. Ancaq şən söhbətlərin nüvəsində dərin bir kədər, zarafatların daxilində həyatın ciddi ironiyası var. Sandro və Maryanın təyyarə qəzasında ölmüş oğlanlarının yadigarı olan Nona Moskvada təhsil alır. Nənə-babanın canlarından artıq sevdikləri Nona şəhərdə tanış olub
adaxlandığı Zurabla kəndə gəlir. Məlum olur ki, Zurabın atası Quram nazir müavini, anası Yelena iş adamıdır. Onların yeganə arzuları övladlarının xoşbəxtliyini görməkdir. İlk baxışdan hər şey çox sadə və gözəldir. Amma məlum olur ki, təlatüm arxadadır. Nona qonşuları Nəbi kişinin oğlu Qədirə də söz veribmiş ki, təhsilini bitirəndən sonra ona ərə gedəcəkdir. Nəbi kişi qonşusu və cəbhə dostu Sandrodan üz döndərir, ancaq Qədir şəhərli kürəkənə ərə gedib Tiflisdə yaşayan Nonanın yalqız qoyduğu qocaları tez-tez yoluxur, onlara hər cür köməklik edir. Sandro Tiflisə, təzə qohumlarıgilə gedəndən sonra vəziyyət daha da gərginləşir: məlum olur ki, Nona zahiri parıltıya - Zurabın şirin dilinə, yalançı vədlərinə aldanıb. Var-dövləti hər şeydən uca tutan nazir müavini hər cür alçaqlığa qol qoyur. Yelena da əxlaqca təmiz deyil. Sandro Quramı görən kimi tanıyır: onlar bir cəbhədə döyüşmüşlər. İndiki nazir müavini cəbhədə də alçaqlıq etmiş, həbs olunmuş, həbsdən qaçmışdır. Adını dəyişərək nazir müavini pilləsinə qədər yüksəlmiş, indi də öz nalayiq əməllərini davam etdirir. Hadisələrin sonu aydınlıqla bitir. Nona doğma kəndə - öz əvvəlki saflığına, zərifliyinə, təmiz adamların arasına qayıdır. İki hissəli "Qıl körpü" pyesinin qəhrəmanı Qulam Gözəloviç də sabiq nazirdir. O, da pozğun bir həyat yaşamış, vəzifəsindən sui-istifadə edərək çoxlarının bədbəxtliyinə səbəb olmuşdur. Pozğun həyat keçirdiyi katibəsi Nazanı ərə verməklə öz günahını ört-basdır etməyə çalışan Qulam Gözəloviç özü kimi nadürüst əməllər sahibi Hacı Zərdüşt, qayınları Əlağa, Vəlağa, müharibə veteranı Tağı müəllim, Zəki doktor kimiləri başına toplayıb. Qulamın hər sözü onlar üçün qanundur. Lakin sürücüsü Rasim onun təklifi ilə razılaşmır, Naza ilə evlənmək müqabilində Qulamın ona vəd etdiyi firavan həyatı qəbul etmir. Müəllif pyesdə maraqlı bir üsuldan istifadə edir: əsər Qulamın son günlərinin təsviri ilə başlayır və bu vəziyyətdə də davam edir. Qulamı ittiham edən qəhrəmanlar səhnədə yox, zalda, tamaşaçıların arasındadırlar. Onlar hadisələrə fəal müdaxilə edir, dinamikanı gücləndirirlər. Əsərdə Qəşəng xanım, Gülya, Lətif, Əbil kimi maraqlı və yaddaqalan obrazlar vardır. Bu əsərlərdə müəllifin niyyəti çox saf və təmizdir: o, həyatı öz nuruna bələyən işığın, ürəkləri riqqətə gətirən saflığın, təmizliyin, mərdliyin tərəfindədir. Müzakirədə şairin qələm dostlarının da çıxışı daha maraqlı olar. Məsələn, şairin yaxın dostularından biri olan Yavuz Axundlu öz çıxışı ilə şairin keçdiyi həyat yolundan oxuculara maraqlı məlumatlar verə bilər. Kitabxanalarda oxucular tərəfindən sevilən tədbirlərdən biri də ədəbi-bədii gecədir. Ədəbi-bədii gecənin I hissəsi Ramiq Muxtarın keşməkeşli həyat yoluna həsr olunmalı, II hissə isə bədii hissə olmalıdır. Tədbirdə ədəbiyyat müəllimləri, bir çox şair və yazıçıların iştirak etməsi məqsədəuyğundur. “Ramiq Muxtar-70” adlı ədəbi-bədii gecənin ssenarisini təqdim edirik:
nəğməsi ilə başlayır. Musiqi sədaları altında aparıcılar səhnəyə daxil olur. I Aparıcı: Sülh xalqın azadlığı
Sevinci, vüqarıdır.
Sülh səadət dünyası
Ömrün xoş bahırıdır.
Sülh insan əməyinin
Ürəyidir, gözüdür.
Sülh sadə insanların
Ən sevimli sözüdür.
II aparıcı: Əziz və hörmətli qonaqlar! Sizin hər birinizi salamlayır və xoş gəlmisiniz deyirik! Bildiyiniz kimi, bu il şair- dramaturq Ramiq Muxtarın 70 yaşı tamam olur. Gəlin hamılıqla birlikdə Ramiq Muxtarı yubiley münasibətilə təbrik edək və ona yaradıcılıq uğurlarında müvəffəqiyyətlər arzulayaq. (Alqışlar) I aparıcı: 1942-ci il, sentyabrın 5-də Naxçıvan şəhərində ziyalı ailəsində bir uşaq dünyaya göz açdı. Gəlişi ilə ailəyə sevinc gətirən şair lap erkən yaşlarından yaradıcılıqla maraqlanmağa başladı. 11 yaşından bədii yaradıclıqla məşğul olan şairin şeirləri, dövri mətbuatda tez-tez çap olundu. “Üfüqlər qızaranda”, “Əlvida, köhnə dünya”, “Doğma səmanın ulduzları” və digər pyesləri Bakı, İrəvan, Naxçıvan, Qazax Dövlət Dram teatrlarında uğurla tamaşaya qoyuldu. II aparıcı: Qeyd etdiyimiz kimi, nəğməkar şair Ramiq Muxtarın sözlərinə 120-dən artıq mahnı bəstələnib. Son 15 il ərzində respublikada keçirilən hərbi vətənpərvərlik mövzusundakı müsabiqələrdə onun sözlərinə bəstələnən mahnılar 8 dəfə birinci mükafata layiq görülüb.
I Oxucu:
Azərbaycan! Qoca Şərqə ey açılan nur pəncərə, Zaman-zaman sən boy atdın, gəlib çatdın əsrlərə.
Sən yadlara baş əymədin, hər zülümə gətirdin tab. Öz sinəni sipər etdin azadlığın yollarında,
Əyəmmədi qamətini qan püskürən yağı düşmən, And yerimiz
tək sən oldun, Azərbaycan-Ana Vətən! Ulduz
olub səpələndi övladların yer üzünə, Bayraq etdik
ədaləti haqq işinə, haqq sözünə. Unutmadıq Dədə Qorqud, şah Xətai öyüdünü,
N ə q ə r a t: II
oxucu: Qürbət eldə, qərib yurdda yaşasaq da,
Gözlərindən çox uzaqda biz olsaq da,
Ürəyimiz səninlədi bizim hər an,
Ey müstəqil Vətənimiz Azərbaycan,
Azərbaycan! I aparıcı: Dünya Azərbaycanlılarının I qurultayında əbədiyaşar prezidentimiz Heydər Əliyevin şəxsi göstərişi ilə Ramiq Muxtar bu şeiri xalq artisti Nəriman Məmmədovla birgə yazmış, bu şeir böyük uğur qazanaraq “Respublika”qəzetində çap olunmuş, qurultayın açılışı günü qonaqlara paylanmışdır.
II aparıcı: Ramiq Muxtar
nəğməkar şair kimi populyardır. Onun sevə-sevə qələmə aldığı “Sənsən Xilaskarım” adlı şeiri də mahnı müsabiqəsində mükafata layiq görülmüş, bir çox tanınmış müğənnilərin ifasında səslənmişdir. Gəlin oxucuların ifasında “Sənsən Xilaskarım” adlı şeiri dinləyək. Oxucu səhnəyə daxil olur.
I Oxucu: Nurlu bir aləmsən günəşə bənzər, Şöhrətin ağızda dillərdə gəzər. Qoşa addımlayır səninlə zəfər. Hünərin yerlərə, göylərə sığmaz, Övladı sən olan Vətən basılmaz.
Təzədən gül açdı Vətən torpağı, Yandı ürəklərdə ümid çırağı, Müqəddəs bir anddır dövlət bayrağı Bu bayraq altında olağın bir can Ucalsın səninlə qoy Azərbaycan.
Çıxdın hər sınaqdan mətin üzü ağ, Həyat amalındır qurub yaratmaq. Tarixdə əbədi izin qalacaq Güləcək səninlə ilk baharımız, Sənsən Heydər Ata xilaskarımız. I Aparıcı: 1980-cı ildən Yazıçılar İttifaqının üzvü olan Ramiq Muxtar həmçinin “Rəsul Rza” Beynəlxalq mükafatı laureatıdır. O, gürcü-Azərbaycan xalqlarının dostluğundan bəhs edən “Şəhərli kürəkən” pyesinə görə Gürcüstan Respublikasının ali mükafatı olan "Şərəf' ordeninə layiq görülüb. İndi isə Ramiq Muxtarın iki hissəli “Şəhərli kürəkən” adlı pyesindən bir parçaya qulaq asaq.
1990-cı ildən bəri Gürcüstanın gürcülər və azərbaycanlılar yaşayan kəndlərinin birində cərəyan edir. Qoca Sandronun həyəti. Sandro həyətdə oturub səbət toxuyur. Bu vaxt Mariya nənə sevincək gəlir. I Oxucu (Mariya): Aman Allah, nə gözəl gün, nə gözəl xəbər! Ay onun özünə də, adaxlısına da Mariya nənəsi qurban olsun! II Oxucu (Sandro): Sənə nə olub, qarı, yoxsa cavanlığın yadına düşüb? I Oxucu (Mariya): Durub mənimlə oynamasan deməyəcəyəm. II Oxucu (Sandro): Yaxşı de, görək, bağrımı yarma. I Oxucu (Mariya): Gözün aydın olsun, Sandro, Nona balamız adaxlısı ilə bu gün Tiflisdən kəndimizə gəlir. Bax, bu da məktub.
Sən nə danışırsan qarı, kim ona məndən xəbərsiz nişan taxa bilər?
Şadlan, Sandro, arzumuza çatmışıq. Ulu tanrı, mən səndən dünyalar qədər razıyam. II Oxucu (Sandro): Heç yaxşı olmadı, axı, mən Nəbi kişiyə söz vermişəm. Kişinin yanında xəcalətli etdi. Eşitsə, narahat olacaq. I Oxucu (Mariya): Nə etmək olar, Sandro, biz qocaların bu işdə heç bir təqsiri olmayıb. Nəbi kişi ilə oturub əməlli-başlı danışarsan. Zəmənə uşaqları belədir də, öz bildiklərini heç kəsə verməzlər. II Oxucu (Sandro): Ay şeytan balası, bir gəl səni də, o şəhərdən tapıb gətirdiyin adaxlını da bir kökə salım ki, gəl görəsən. I Oxucu (Mariya): Zarafat edirsən, Sandro, sən məndən də çox sevinirsən. Hirsini ye, adam da bu xoş gündə tənbəki sümürər. Sandro bu gün çox şərab içməlisən, bildinmi, çoxlu şərab. II Oxucu (Sandro): Deyirəm Nona, gərək şəhərliyə ərə getməyəydi. I Oxucu (Mariya): Şəhərli, kəndli nə fərqi var. Təki özünün ürəyincə olsun, xoşbəxt yaşasınlar. II Oxucu (Sandro): Nə bilirik, necə adamdır, kimdir, nəçidir? Nəbi kişinin oğlu Qədir bizə yaxşı kürəkən olardı, Mariya...heyif...çox heyif... I Oxucu (Mariya): Boş-boş danışırsan Sandro, qız adaxlısı ilə gəlhagəldədir, sən isə oturub ona adaxlı gəzirsən. Hər halda Nona ağıllı qızdır, nənəsi kimi yüz seçməsə bir sevməz. Elə mən də sənə gələndə çox götür-qoy elədim ki, bu avaradan görən mənə ər olar, ya yox? Görürsən, düz əlli ildir bir balınca baş qoyuruq, hələ də bir-birimizdən bezməmişik. II Oxucu (Sandro): Onu düz deyirsən, Mariya, sən meymunu mən avaradan başqa heç kim almazdı. Yaxşı məni toruna saldın. I Oxucu (Mariya): Özünə yığış ha, vallah sənə bir toy tutaram ki, bütün kənd yığışıb bura gələr. Tora bax, bir buna bax. Yekəburun. II Oxucu (Sandro): Ona, inanıram, qarı, o iş əlindən gələr. I Oxucu (Mariya): Yaxşı, məni cin atına mindirmə, dur süfrəni bəzəyək, indi harda olsa, gəlib çıxarlar. II Aparici: Hörmətli qonaqlar, gördüyünüz kimi, məhəbbətin, sevginin sərhəddi olmur. İnsan sevəndə onun milliyyəti də o qədər əhəmiyyət kəsb etmir. Sevgi həmişə hər şeyə qalib gəlir. Pyesin sonu maraqlı bir epiloqla başa çatır. İstərdim ki, bu epiloqla da tədbirimizi başa vuraq.
II Oxucu (Sandro): Nona, mənim balam, bu sənsən, heş gözlərimə inana bilmirəm. I Oxucu (Mariya): Nonadır, özüdür. II Oxucu (Sandro): Ürəyimə dammışdı ki, sən əvvəl-axır kəndimizə öz evimizə qayıdacaqsan, mənim ağıllı, gözəl balam. Çünki bu təmiz, halal ocaq heç vaxt səni bağışlamazdı. I Oxucu (Mariya): Mən səni bir daha gözümdən kənara qoymayacağam, Nona. II Oxucu (Sandro): Şükür o böyük Tanrıya, biz yenə də bir yerdəyik. Bu gün nə gözəl gündür. Çiskin yağış yağır, quşlar öz nəğmələrini oxuyurlar. Ağaclar da həmişəkindən daha gözəl görünür. Gedək evimizə qızım, bu ev, bu ocaq sənsiz yaman qəribsəyib. III Oxucu (Nona): Yox baba, mən bu günahlarımla ismət ocağı olan evə girə bilmərəm. Qoy bu yağış mənim bütün günahlarımı yuyub aparsın, sonra... II Oxucu (Sandro): Yox, mənim Nonam, bu sevgi yağışıdır. Bu yağış sənin qəlbinə sevgi, məhəbbət gətirəcəkdir. Bir səmaya bax. Sənin gəlişinlə günəş qara buludları təzədən qovmağa başladı. Sabah kəndimizdə Nonalı yeni səhər açılacaqdır. Nonalı günəşli səhər. Hamı axışıb sənin görüşünə gələcək. Bütün kəndimiz gəlişinə sevinəcəkdir.
Ey yeri, göyü yaradan ulu Tanrı. Mən qoca Sandro ilə Mariya qarının sənə uçan dualarını qəbul et. Sən bizi öz sevimli balamıza qovuşdurdun. Bizə qol-qanad, təzədən yaşamaq həvəsi verdin. Varlığın qarşısında baş əyirəm.
(İştirakçılar səhnəni tərk edir.Sözləri şairin, musiqisi Nəriman Məmmədova aid olan “Bağışla”musiqisi səslənir. ) I Aparıcı: Ömrünün kamillik zirvəsinə qədəm qoyan Ramiq Muxtar indi yaradıcılığının çiçəklənmə dövrünü yaşayır. Yubiley münasıbətilə xalqımızın çınar vüqarlı yenilməz şairi Ramiq Muxtarı səmimi qəlbdən təbrik edir, ona cansağlığı və yeni-yeni yaradıcılıq uğurları arzulayırıq.
Sonda şairin “Yedək Qayıq” adlı şeiri oxucuların ifasında səslənir. Məndə düz iki əsr
yedək ömrü yaşadım.
Bu zülmü, əzabı
kürəyimdə daşıdım.
Sarı, göygöz div oldu
yol göstərən”qardaşım”
Nələr görmədi gözüm,
nələr çəkmədi başım.
Qanımı, iliyimi “nuş” eləyib
içdi o,
Varımın, dövlətimin
arxasına keçdi o,
Mənə təzə ad qoyub türklüyümü dandı o, Böyük Turan elini
qatı düşmən sandı o.
Qaçdım haqqın dalınca, Haqdan hömək dilədim.
Haqq öz dərdin söylədi
Yaddan çıxdı öz dərdim. Güc toplayıb özümdə Qalxdım, durdum, dikəldim
Özümü şəhidliyə mən
Ölümə köklədim. Azad olub
qurtuldum
Bu ac divin əlindən.
İnanmıram ay qayıq
mənim etdiyim hünər
gələ sənin əlindən.
S O N
İstifadə olunan ədəbiyyat: 1.
Muxtar R. “Seçilmiş əsərləri”.- B.: Azərnəşr, 2007.- 264s.
www.google.az www.wikipedia.org
Tərtib edəni: Könül Səmədzadə - F.Köçərli adına Respublika Uşaq Kitabxanası elmi-metodika şöbəsinin baş kiatbxanaçısı
Redaktoru: Füzurə Quliyeva - F.Köçərli adına Respublika Uşaq Kitabxanasının direktoru
Yüklə 397,15 Kb. Dostları ilə paylaş:
|