6-cı mühazirə
Platon`un müasirləri
A.
Arxitas
Görkəmli Pifaqorçular arasında məşhur riyaziyyatçı, musiqiçi və mexanik,
Magna Graecia`nın (Tarentum doğumlu) dövlət adamı Arxit/Arxitas (“-
435/410” - “-365/350) xüsusi qeyd olunmalıdır. O, Filolaos`un tələbəsi, Evdoks
və Menaexmus`un müəllimi olmuşdur. Platon`un Arxit`lə tanış (dost) olduğu,
ideal dövlətdə ancaq filosofların dövlət başçısı ola bilməsi haqqında yazarkən
Arxit`i nəzərdə tutduğunu deyənlər var. Platon dəfələrlə Siciliyaya gəlmiş və bir
dəfə (“-361”-də) onun Sirakuz hökmdarı 2-ci Dionisiusun qəzəbindən Arxit
xilas etmişdi (arxasınca gəmi göndərib onu qaçırtmışdı). Qanuna görə ancaq bir
illik müddətə strateqos (general) seçilə bilərdi, lakin Arxit 7 il bu vəzifəyə
seçilmiş, həmin dövrdə Tarentum inkişaf etmiş, o, bir savaşda belə
uduzmamışdı.
Evklidin “Elementlər”inin 8-ci kitabının əsasən Arxitin riyazi nəticələri
əsasında yazıldığı deyilir. Pifaqorçu olan Arxit riyaziyyatın həndəsə (durmuş,
hərəkətsiz kəmiyyətlər), hesab (durmuş ədədlər), astronomiya (hərəkətdə olan
kəmiyyətlər) və musiqi (hərəkətdə olan ədədlər) kimi dörd bölmədən ibarət
olduğunu deyən ilk insanlardan biridir (orta əsrlərin “quadrivium”u); Arxit
təhsil məsələləri ilə yaxından maraqlanmış, musiqi təhsilinin vacibliyini
vurğulamışdı.
Yeri gəlmişkən orta əsrlərdə əvvəlcə hazırlıq olaraq Trivium`un, ondan
sonra quadrivium`un öyrədildiyini qeyd edə bilərik. Qramatika,
məntiq, və ritorikadan ibarət olan bu üçlük “liberal arts” deyilən
ümumi təhsil bacarıqlarının mərkəzində dayanırdı. Trivium latıncada
üç yol (quadrivium – dörd yol) mənasını verir. “Trivial” (çox sadə,
bəsit) sözü triviumdan törəyən sifətdir (adjective)!
O, məlum kubdan həcmcə iki dəfə böyük olan kub haqqında məşhur məsələnin
(x³=2a³) təqribi həllini verən ilk riyaziyyatçı sayılır. Arxit musiqi şkalası və
musiqi harmoniyası və bəzi digər sahələrdə də ciddi tədqiqatlar aparmışdır. K.
Ptolomey “Musiqi nəzəriyyəsi” kitabında Arxitin harmoniya haqqında
təlimindən söz açır, onu ən böyük musiqi nəzəriyyəçisi hesab edir. Arxitin ədədi
(a+b)/2, həndəsi √ab və harmonik 2ab/(a+b) nisbətləri tədqiq etdiyi və musiqi
ilə əlaqələndirdiyi güman olunur.
Bu məsələnin mənşəi haqqında maraqlı rəvayət mövcuddur. Afinada kütləvi
qırğına səbəb olmuş taun xəstəliyindən (Perikl də o qırğında ölmüşdü) xilas
olmaq yolu axtaran Afinalılar Delos`dakı Apollon falçı kahinə (orakul`a)
müraciət etmişlər. Kahin kub şəkilli Apollon qurbangahının iki dəfə
böyüdülməsini lazım bilmişdi. Əsas qurma alətləri düz xətt çəkmək üçün xətkeş
və çevrə çəkmək üçün pərgar olduğundan bu Delos məsələsi “pərgar və xətkeş
vasitəsilə məlum kubdan həcmcə iki dəfə böyük kub qurmaq” kimi ortaya
atılmış və antik dövr riyaziyyatının üç məşhur məsələsindən birinə çevrilmişdi.
Burada antik dövrün digər iki məşhur məsələsini də yada salmaq olar: pərgar və
xətkeş vasitəsilə məlum bucağı üç bərabər hissəyə ayırmaq (bucağın
triseksiyası), pərgar və xətkeş vasitəsilə sahəsi məlum dairənin sahəsinə
bərabər olan kvadrat qurmaq. Bu üç məsələnin həlli üçün çalışan
riyaziyyatçılar riyaziyyata yeni anlayışlar daxil etmiş, yeni üsullar daxil etmiş,
maraqlı nəticələr almış, yeni nəzəriyyələr qurmuşlar.
Прасолов В. В. Три
классические задачи на построение. Удвоение куба, трисекция угла, квадратура круга.
М.: Наука, 1992 (Серия «Популярные лекции по математике», выпуск 62).
http://math.ru/lib/plm/62
Demokritos._Demokritos`un_həyatı_və_fizikası'> B.
Abdera Atom məktəbi/Demokritos. Demokritos`un həyatı və fizikası
Şimali Yunanıstan (Pelopennes) Abdera məntəqəsində (Thrace`də -Frakiya`da,
ticarətin çiçəkləndiyi bir yer) Atom nəzəriyyəsi yarandı. Levkipp`in
(Leukippos) həyatı və yaradıcılığı haqqında məlumat yox dərəcəsindədir
(Aristotelin ondan danışması və alıntılar etməsi hər halda onun real şəxs
olduğunu təsdiq edir; buna etiraz edənlər də var). Miletus`da doğulmuş (? “-
490”), yetkin çağında Elea`ya (Magna Gracia, Cənubi İtaliya) köçmüş,
Zenon`un tələbəsi olmuş, sonra Abdera şəhərinə köçmüşdü. Leukippos təsadüf
deyilən şeyin olmadığını, hər şeyin bir zəruriyyətdən doğduğunu söyləyib
(Demokrit də bunu təkrar edib). Demokritos (?“-460” - ?”-370/360”) Levkippin
yanına gəlmiş, onun tələbəsi olmuş, ömrünü Abdera`da da başa vurmuşdur.
Onun 90 il yaşadığı güman olunur, yüzü keçdiyini iddia edənlər də olub.
Demokritos uzun səyahətə çıxmış, çox gəzmiş, alim insanlarla görüşmüş,
Misir`ə və Persiya`ya, deyilənə görə Hindistana gedibmiş. “Müasirlərim
arasında məndən çox gəzən olmayıb”, “Afinaya gəldim, gördüm ki, heç kimin
məndən xəbəri yoxdur”. Atasından qalan və onun payına düşən zəngin mirası
səyahətlərdə xərcləmiş və elmi həyat keçirmək üçün sərf edib. Sonra qardaşı da
ona kömək edibmiş. Belə bir rəvayət də var: bu mirası boş-boşuna xərclədiyi
üçün geri qayıdanda yerlilərinin qəzəbinə düçar olmuş (ata malını dağıtmaq
cinayətmiş) və gözəl bir mühazirə-söhbətlə onları heyran etmiş, təbiət
hadisələrini şərh etmək və bəzən də öngörməklə (hava haqqında məlumatı)
onların böyük hörmət və məhəbbətini qazanmışdır (deyilənə görə ona heykəl də
qoyublarmış).
Demokritos müəllimi Levkipp`dən nə öyrənib, hansı baxışlar müəlliminə,
hansılar özünə məxsusdur –bu, məlum deyil. Lakin məhz Demokritos`un
sistemli bir nəzəriyyə qurduğu şübhə doğurmamalıdır (görünür ki, əsas ideyalar
Demokrit tərəfindən inkişaf etdirildiyi üçün Levkipp kölgədə qalmışdır). O,
Platon`un və məşhur həkim Hippokrates`in müasiri olub (sonuncu ilə dostluq
edib). Demokritos`un yaradıcı maraq dairəsi çox geniş olmuş (fizika, riyaziyyat,
fəlsəfə, biologiya və tibb, kosmologiya, antropologiya,...), əsərlərindən cüzi
fraqmentlər qalmışdır (Platon onun adını çəkmir, Aristotel onun atomizmindən
söhbət açır; Cicero (Siseron) onun əsərlərini gözəl bədii dillə yazdığını deyir).
Demokrites`i qədim yunan dünyasında ən uzağa baxa bilmiş, çağdaş elmin
ünsürlərini görə bilmiş bir mütəfəkkir saymaq olar. Demokritos`un Abderada
məktəbi olub-olmadığı məlum deyil.
Parmenides və Zenon varlığın bir bütöv olduğunu, bölünməzliyini və
hərəkətsizliyini irəli sürmüşdülər. Zenon`a görə varlıq bölünərsə, sonsuza qədər
bölünməli, deməli, yoxa çıxmalı idi. Elea məktəbi`nə görə boşluq var
olmayandır, yoxdur (boşluğun olması təsəvvüredilməzdir), deməli, varlığın
bölünməsi üçün yol yoxdur. Anaksaqoras və Empedokles də boşluğu qəbul
etmir, lakin Anaksaqoras maddənin sonsuz bölünə biləcəyini və sonsuz sayda
varlıqların mövcud olduğunu irəli sürmüşdü.
Levkipp və Demokrit hər şeyin bölünəbildiyini, amma bu bölünmənin sonsuz
davam etmədiyini, hər şeyin ən kiçik, dəyişməz (ancaq yer dəyişdirə bilən) və
bölünməz zərrəciklərdən-atomlardan təşkil olunduğunu irəli sürdülər. “
A
tom”
(“
a
tomos”) sözünü Demokrites daxil etmişdir. “A” inkar bildirir, məsələn,
normal və anormal, “temno” mən kəsirəm, mən bölürəm deməkdir. Beləliklə
atom - bölünə bilməyən, kəsilə bilməyən mənası verir. Atom və boşluqdan
başqa heç nə yoxdur (yəni, kainat iki şeydən-atomlar və boşluqdan ibarətdir).
Atom içində boşluq yoxdur, “atom doludur” (bu səbəbdən də bölünməzdir,
bölünməyə yer yoxdur), amma atomlar arasında atomla dolu olmayan boşluq
var (yazı hərflər və onlararası boşluqlar üzərində qurulduğu kimi)! Atomlar
yaranmayıb, həmişə var olub və yox olmur (yəni kainatın başlanğıcı yoxdur, o,
sonsuzdur və heç kim tərəfindən yaradılmayıb). Heçdən heç nə yaranmaz və var
olan yoxa çıxmaz; dəyişmə hissələrin birləşməsi və ayrılmasından ibarətdir
(Saxlanma qanunu!). Beləliklə, atomlar Elea məktəbinin Tək/Bir/Vahid
dediyinə uyğun gəlir, hərçənd ki, atomların isti, soyuq, quru, yaş kimi heç bir
xassəsi yoxdur.
Atomların sonsuz birləşmələri sonsuz sayda dünyaların varlığını göstərir.
Boşluqda yüngül atomlar yavaş, ağır atomlar isə tez hərəkət edirlər. Yer
atomların daimi toqquşmalarından doğan tufanda dünyanın mərkəzində
atomların bir-birinə qovuşması nəticəsində əmələ gəlib. Yer əvvəl yüngül olub
hərəkətdə idi, sonra böyük və ağır oldu. Buna görə də hərəkəti dayandı
(Anaksaqor da belə hesab edirdi). Kəhkəşan (Saman yolu, Süd yolu) ulduzlar
toplusudur. Ulduzlar uzaq günəşlərdir, Ay isə yerə bənzəyir – dağları, vadiləri
var. Ayın işıqlanmasının səbəbi Günəş şüalarının Ay səthindən əks olunmasıdır.
Kainat sonsuz sayda müxtəlif dünyalardan ibarətdir, bu dünyaların öz günəş və
ayları ola da, olmaya da bilər, onların bəzilərində həyat var, digərlərində
yoxdur. Qədim insanlar şimşək, ildırım, günəş və ayın tutulması, ulduzların
yaxınlaşması kimi hadisələrdən dəhşətə gəlir, bunların səbəbini tanrılarda
görürdülər.Əslində tanrılar da atomlardan təşkil olunub (onlar atomların çox
dayanıqlı, çox fərqli, bənzərsiz birləşmələridir).
Maddələrin atomlardan təşkil olunması fikrinə hind fəlsəfəsində də
(b.e.ə 6-cı əsr) rast gəlinmişdir.19-cu əsrdə Dalton və başqaları
tərəfindən inkişaf etdirilən atom nəzəriyyəsi 19-cu əsrin sonlarında və
20-ci əsrin ilk üçdə birində atomun bölünəbilir olması ilə kökündən
dəyişdi (amma atom kəlməsi saxlanıldı).
Cisimlərin mövcudluğu və müxtəlifliyi məhz atomların arasıkəsilməz hərəkəti
və toqquşmaları nəticəsindədir. Atomların şəklində/biçimində (Demokrites`də:
formalar`ında), sayında və boşluqların ölçüsündə heç bir məhdudiyyət yoxdur;
bu saysız və çox müxtəlif dünyaların (arasında da bizim kosmosun) varlığı
deməkdir. Düzülüş və duruşları fərqli olan atomlar digər cəhətlərdən eyni
olsalar da, fərqli atom sayılırlar. Cisimlərin dad, rəng, qoxu, isti-soyuq kimi
xassələri bizim zənnimizdir, hər şey atomların müxtəlifliyi ilə, atomlar
arasındakı təmasla müəyyən olunur. Demokrites`ə görə başlanğıcda xaotik
hərəkət edən atomların bənzər olanları bir-birinə yaxınlaşmış, ağır atomlar Yeri,
atəş atomları kimi yüngül atomlar səma cisimlərini, ulduzları əmələ gətirmişlər
(indi mövcud olan atomlar haqqında ağır-yüngül xassələrindən söhbət açmır).
Demokrites ruhun da atomlardan, amma daha zərif, dairəvi (alov atomlarına
bənzər) atomlardan ibarət olduğunu deyir (yəni ruh da maddədir); ruh, hava və
atəş bu cür gözəl atomlardan təşkil olunduqları üçün yaxınlıq edirlər.
Levkipp və Demokrit,bu iki atomçu ilk hərəkəti heç bir qeyri-adi düşüncəyə,
teleoloji fikrə və ilahi varlığa bağlamamışlar! (Aristoteldən fərqli olaraq). Bu
baxımdan onlar çağdaş dünyaya digərlərindən daha yaxın görünürlər.
Atomçular`ın keyfiyyəti kəmiyyətə bağlamaları da onların güclü tərəfidir.
Demokrites`in dünyasının, canlı və cansız aləmin mahiyyəti və qanunları
materialist və mexanikdir.
C.
Demokritos`un riyazi, antropoloji, bioloji və psixoloji görüşləri
Demokritos`un hesab və həndəsəyə aid əsərləri olmuş (bu əsərlərin adları
anılmışdır), lakin digər yazıları kimi qalmamışdır. Arximed oturacaqları və
hündürlükləri eyni olan piramida və prizmanın həcmlərinə aid Demokrites`in
teoremi haqqında məlumat verir (belə piramidanın həcmi uyğun prizmanın
həcminin üçdə birinə bərabərdir); eyni nəticə piramidanı konusla və prizmanı
silindrlə əvəz etdikdə də doğrudur. Arximed Demokrites bunların dəqiq isbatını
verməyib deyir. Bu həcm hesablamaları Misirlilərə məlum idi. “Hətta
yanlarında bir qərib kimi tam beş il yaşadığım Misirli həndəsəçilər belə
mühakimə və isbat etməkdə məni keçə bilmədilər”
(Friedrich Albert Lange.
Materializmin tarixi və günümüzdəki anlamının eleştirisi. 1-ci cild, Sosyal yayınlar, 1998;
səh. 38)
. Bunu, yəqin ki, həndəsədə deduktiv metodun, riyazi isbatın tətbiqi kimi
başa düşmək lazımdır. Bu halda Demokritesin Misirlilərə məlum olan nəticəni
isbat etməyə çalışması, bu isbatın Arximedesə gəlib çatmaması və ya isbatın
tam dəqiq olmaması ehtimalı da nəzərə alına bilər. “Atomçu” Demokrites`ə,
yəqin ki, həndəsi atomizm yad deyildi və o, konus və silindr halını uyğun olaraq
piramida və prizmalarla sonsuz yaxınlaşmaq yolu ilə isbata çalışa bilərdi
(sonralar Evdoks etdiyi kimi).
Demokrites insanların heyvansayağı həyatdan mədəni həyata doğru irəliləmə
prosesini təsvir etməyə çalışmışdır (Hesiodun keçmiş “qızıl çağ” fikrinə zidd
olaraq). İnsanlar ehtiyaca uyğun olaraq (təhlükələr qarşısında) müəyyən
birliklər əmələ gətirir, anlaşma ehtiyacı dilin meydana çıxmasına səbəb olur,
oddan istifadə etməyə başlanılır, sənət və təsərrüfat həyatı, bir sözlə insan
cəmiyyəti təşəkkül tapır.
Heyvanların “qanlı” (onurğalı) və “qansız” (onurğasız) kimi iki sinfindən bəhs
etmişdi (Aristotel bunu davam etdirmişdi). Bütün, o cümlədən ən bəsit
heyvanların duyğu orqanlarına malik olduqlarını irəli sürmüş, təbii saymışdı.
Canlılarda əvvəl duyğu, sonra həzm orqanları əmələ gəlib. Hörümçək öz torunu
öz içində düzəldib üzə çıxarır (!). Aristotel isə səhv olaraq hörümçək torunun
qurumuş dəri olduğunu iddia edirdi. Demokrites`in “orqanlaşma” görüşü belə
idi: beyin-düşüncə mərkəzi, ürək- cəsarət/rəşadət mərkəzi və qara ciyər hiss
mərkəzidir (Aristotel`də beyin qanı soyutma mərkəzidir). Demokrites`in bir
fərziyyəsi də maraqlıdır: cisimlərdən “incə/zərif” atomlar şüalanıb gözə dəyir və
o cisimlər görünür, hiss olunur. Yeni/tazə ruh atomlarının bədənə daxil olması
dayananda insan ölür. Ruh atomlarının itkisi (çox azalması?!) yuxuya səbəb
olur. Nəfəsalma atomları (içəri) alma, nəfəsvermə atomların (kənara)
verilməsidir
(Anthony Serafini. The Epic History of Biology. Perseus Publishing, 1993; p.
26-27)
.
Demokrites duyğuların aldadıcı olduğunu deməklə yanaşı ağlın duyğulara
möhtac olduğunu da vurğulayırdı (duyğuların bizi aldatdığını da duyğuların
köməyilə dərk edirik). Demokrites insan həyatında ölçülü olmağı (arzuda,
həzzdə“nə bolluq, nə də kəsir/ehtiyac”), təbiətə yaxın olmağı ən mühüm şey
hesab edir. “Faydalı olmayan həzzdən imtina etməli”. İnsanlar daha çox öz
təbiətlərinə görə deyil, təlimə, məşğələ və tərbiyə almalarına görə yaxşı olurlar.
“Səhvin səbəbi yaxşı olanı bilməməkdəndir”. O, insanın əsas keyfiyyətini
müdriklikdə, müdrikliyə gedən yolda görür. “Müdriklik üç meyvə verir: yaxşı
düşünmək, yaxşı danışmaq (“söz əməlin kölgəsidir”) və yaxşı əməl (hərəkət
etmək) qabiliyyəti”. Xoşbəxtlik ruh rahatlığından ibarətdir; ruh rahatlığı ən
davamlı yaxşıdır. Cinsi həyat yaxşı deyil, çünki şüuru həzzə tabe edir. Onun
qadın və qul haqlarına münasibəti mənfi idi (yunan filosoflarının çoxu kimi;
dövr!?).
Demokritos`un digər yunan filosoflarının əksəriyyətindən fərqli olaraq
demokratiya`ya rəğbəti vardı. “Azadlıq qul olmaqdan necə üstündürsə,
demokratiyada kasıblıq da hökmdarlar yanında firavanlıqdan o qədər üstündür”.
İnsanların cahilliyinə filosof öz davranışı ilə necə münasibət bildirməlidir?
Rəvayətə görə Heraklit ətrafdakı cahilliyi görüb ağlayarmış, Demokrites isə
gülərmiş. Demokrites`in “güləyən filosof” ləqəbi vardı. Demokrites`lə bağlı
rəvayətlərdən biri: hökmdar Dara ölən qızının dərdinə dözə bilmirmiş, onun
dirilməsini istəyirmiş; Demokrites “mən onu dirildərəm, bu şərtlə ki, mənə üç
adam göstər ki, onlar heç vaxt qəm, kədər görməyiblər” deməklə onun qəmə
qatlaşmasına kömək edibmiş. Romalı filosof, yazıçı və siyasi xadim Mark T.
Siseron (Cicero) (m.ö. 106-43) “görmənin əyləncəsi və gözün sədlərindən azad
olub ağılla fikrə getməyi və düşünməyi” daha doğru hesab etdiyi üçün
Demokritin öz-özünü kor etdiyini yazır (?).
Deyilənə görə Platon Demokritos`a nifrət edirmiş, öz tələbələrinə
Demokritos`un əsərlərini yığıb məhv etməyi tapşırıbmış (hərçənd ki, o,
əsərlərində Demokritin adını çəkməyib). Aristotel Demokritosun nəzəriyyəsini
səhv və ziyanlı sayırdı. O, boşluq olsa bütün cisimlər eyni (sonsuz?) sürətlə
düşərdilər, çünki sürət sıxlığa görədir deyirdi.
D.
Kos Hippokrates məktəbi
Kos adasında (Bodrum yaxınlığında yunan adası) b.e.ə 460-da doğulmuş
sayılan Hippokrates uzun ömür sürmüş, onun 83 və 107 il arasında yaşadığı
deyilir. Yaxşı təhsil almış, müəllimləri arasında Demokritos və Sokrates öncəsi
sofist və ustad-natiq Qorqias (Afina`da) da olmuşlar. Hippokrates müəyyən
səyahət və yerdəyişmələrdən sonra Thessalia`da məskən salmışdır. Hippokrates
özü və çoxsaylı ardıcılları ilə nəzəri və praktik tibbi müalicə üzrə əsərlər
meydana gətirən bir (zehni) məktəbdir-belə demək mümkündür (Platon onun
pul verənləri öyrətdiyini deyir – Roy Porter, p. 55). Əslində isə, onun atası və
babası həkim olmuş (həkimliyi öncə onlardan öyrənmişdir), öz uşaqları, qızının
əri, nəvəsi də həkim olub, bu özü bir ailə həkim məktəbi deməkdir, təbii ki, bu
məktəbə həkimlik həvəsi olan başqaları da qoşulmuşlar. Şöhrəti onun
geneologiyasını da əfsanələşdirmişdir: ata tərəfdən - Yunan tibb allahı
Asklepius, ana tərəfdən - Herakles!
Asklepiusun əsası - üzərinə ilan dolaşmış əsa tibbin rəmzidir; əsası ilana
çevrilmiş, Asklepius onu öldürmüş, ağzında ot olan bir ilan ölmüş ilanı
cana gətirmiş, Asklepius o otla müalicə etmişdir! Əfsanəyə görə
Asklepius Apollon tanrı ilə insan-qadının oğlu imiş. Asklepius`un iki
qızı da səhiyyə ilə bağlı olublarmış – Hygeia (gigiyena) və Panacea
(bütün dərdlərin dərmanı/cure-all).
Onu şəxsiyyətinə, Hippokrat korpusu adlandırılan əsərlərin nə dərəcədə özünə
və ardıcıllarına aid olmasında (təqribən 60-80 əsər; dərslik, mühazirə mətnləri!,
esselər, xəstəlik tarixçələri (kliniki müşahidələr)/case notes, fəlsəfi mətnlər...),
adının əfsanələşməsində, eləcə də özündən sonrakı dövrlərə təsirinə görə
Pifaqorla müqayisə etmək olar. Əsərlərin sistemsizliyi, ziddiyyətləri uzun ömür
sürmüş Hippokratesin həm gəncliyində, həm də yaşlı vaxtlarında yazması,
xüsusilə də çoxsaylı müəlliflər tərəfindən müxtəlif əsrlər ərzində yazılması ilə
izah edirlər. Bu korpusun əsas hissəsi 3-cü əsrin ortalarında Aleksandriyada
toplanılıb! Tibbi etikanın devizi sayılan Hippokrates andı`nın çağdaş şəkli bu
gün də işlədilməkdədir.
Hippokrates `in nəzəriyyəsinə görə (humorizm) insan bədənində müxtəlif dörd
növ maye (chymoi, yəni humor/həyat şirələri) cərəyan edir: sarı (öd?!/bile),
qırmızı-qan, qara (qara öd?!), fleqm adlı maye/şirə (bəlğəm, selik); sarı
mayenin qaraciyərdə, qara mayenin dalaqda hazırlandığını iddia edirdi. Bu
mayelərin birinin çoxluğu insanın temperamentini müəyyən edir, mayelər
arasında tarazlığın, harmoniyanın pozulması xəstəliyə səbəb olur. Bu dörd maye
ilə ilin dörd fəsli, dörd element (su, topraq, hava, od), maddələrin dörd xassəsi
(quru, yaş, isti, soyuq), insanın dörd yaş dövrü (körpəlik/uşaqlıq, gənclik,
yetkinlik, ahıllıq) və dörd temperament arasında əlaqələrin şərhi də Hippokratın
və onun ardıcıllarının əsərlərində yer almışdır.
Şəkil
Sarı mayenin çoxluğu xolerik temperamenti, qırmızının çoxluğu sanqvinik,
qaranın çoxluğu melanxolik, fleqmanın çoxluğu fleqmatik temperamenti
müəyyən edir. Hippokrat, eyni zamanda, xəstəliklərin səbəbi və müalicəsində
ehkamlara uymamağı məsləhət görürdü. Mayelər cərəyanı kimi fikir bu gün
sadəlövh görünsə də, saysız-hesabsız insan tipləri arasında insanın dörd
temperamentə ayrılması məsələsini Hippokrat dühasının parlaq məhsulu
saymaq olar (bu ideyanı gələcəkdə Qalen təkmilləşdirəcəkdi).
Anatomiya və fiziologiya təsəvvürü xeyli aşağı olsa da (Yunanlarda
meyityarma qadağan olunmuşdu; onun heyvanları yarıb öyrəndiyi deyilir),
müalicə üsulları passiv olsa da, Hippokrates məktəbi tibbin inkişafında
müstəsna rol oynadı. Skelet və böyük əzələləri daha yaxşı başa bilir, qan
damarları haqqında bilikləri çox səthi olub (qədimdə, Aristotel də daxil olmaqla,
arteriya və vena arasındakı fərqi bilmirdilər). Cərrahi əməliyyatlardan nisbətən
az istifadə etməyə çalışılırdı (ziyan verməmək – bu, Hippokrates`in mühüm
prinsipi idi). Qidalanma və idman sağlamlıq üçün ən mühüm vasitə sayılırdılar.
Xəstəlik Allahların verdiyi cəza deyil (o cümlədən epilepsiya kimi xəstəliklər;
Hippokrates`ə görə fleqma nəfəs yolunu tutur və bədən azad olmağa çalışır?!),
həyat şəraitindən, qidalanmadan, su və havadan, ətraf mühitdən qaynaqlanır.
Demokratiya və monarxiyadan da qaynaqlanır!; demokratiyada insan özünə
tabedir, sağlamlıq və xaraktercə daha möhkəm olmaq imkanı var!? Asiyada
xalq savaşa hazırlaşmaq deyil, savaşa getməmək yollarını axtarır?! Bütün bunlar
və xəstəliyi müşahidə və sənədləşmə məsələlərinə, bir sıra xəstəliklərin ilk dəfə
təsvirinə görə Hippokrates “Tibbin atası” sayılır (və ya “Qərb tibbinin atası”).
Hippokrates İslam aləmində İbukrat və ya Bukrat adı ilə tanınmışdı.
Hippokratesin haqqında Platon, Aristotel və Galen qısa məlumat vermişlər,
Efesli (Romalı) həkim Soranus (?98-?138) onun bioqrafiyasını yazmışdır. Həyat
tarixçəsi əfsanə və ziddiyyətlərlə doludur.
E.
“Sokratesçi Kiçik Məktəblər”
Sokrates`dən sonra onun ideyalarını bu və ya digər istiqamətə yönəldən xüsusi
baxışlar, dünyagörüşü sistemi və məktəb quranlar olub. Onlar “Sokratesçi Kiçik
Məktəblər” adı ilə də tanınırlar. Onlardan bəziləri ilə qısa tanış olaq.
Kinik adı alan məktəbin qurucusu Sokrates`in (əvvəlcə sofist Qorqias`ın)
tələbəsi Antisfenes (“-445”?-“-360”?) olsa da (Platonun yaşca böyük müasiri),
onu şöhrətləndirən Sinop`lu Diogenes (“-412”?-“-323”?) olub. Antisfenes
(ləqəbi Paradoksoloqos) Ritorika ustası Qorqiy`in, sonra Sokrates`in tələbəsi
olmuş (Sokrates`ə qulaq asmaq üçün hər gün böyük məsafə (təqribən 8 km) yol
qət edirdi) və Afinada Kinosargues (Kinosarqes; ağ it) gimnaziyasında öz
məktəbini qurmuşdu
(xəritə: 4 məktəb+. Bax: Antoloqiya Kinizma, səh. 365).
O, artıq yaşlı vaxtında, Sokrates`in ölümündən sonra yaxın olduğu kübar
dairələrdən uzaqlaşıb xalq arasına daxil oldu, sadə (çox sadə, dərvişşayağı)
geyinir, mücərrəd fəlsəfədən uzaq durub sadə sözlərlə “təbiətə qayıdış”ı təbliğ
edirdi. Hökumət, özəl mülkiyyət, din və nikahı lazımsız hesab edirdi, bunlar
insanı təbiətdən uzaqlaşdırır. Antisfen “adi it” ləqəbi almışdı. İnsan xoşbəxt
ölüm arzu etməlidir, “fəzilətin nə sözçülüyə, nə də elmə ehtiyacı yoxdur, fəzilət
əməldədir”, “düşmənlərinlə hesablaş: onlar sənin səhvlərini hamıdan tez
görürlər”. Məhsuldar yazar-filosof olub (10 cild). Antisfenes anlayışların
(qavramların) yoxluğunu vurğulayırdı: bir at görürəm, amma atı görmürəm.
Ayrı-ayrı varlıqları yalnız bir-biri ilə müqayisə edə bilərik. Aristotel
(Metafizika) onu tənqid edir: “...onlara görə gümüşün nə olduğunu deyil, sadəcə
qalaya bənzər olduğunu demək mümkündür”. Antisfen də Elea`lı Zenon`un
təsiri altında olub.
Aristotel varlığı çoxanlamlı və çoxdərəcəli (çoxölçülü, çoxkateqoriyalı)
bir anlayış kimi qəbul etməklə (qırmızı olanlar müxtəlif qırmızılığa
malikdirlər!) Antisfenin görüş və paradokslarının təməlini tənqid edir
(məsələn insan adları 1-ci, insanlıq, insan olmaq – 2-ci dərəcəli, canlılar
– 3-cü dərəcəli...).
Gənc Diogenes (həbsdən çıxmış pul dəyişən, pulu saxtalaşdıran bir şəxsin oğlu
olmuş, deyilənə görə atası ilə birlikdə Sinopdan qovulubmuş) Afinaya gəlmiş və
Antisfenin arxasınca düşmüşdü; Antisfen onu qovdu, çubuqla vurdu, amma o
tərpənmədi, əl çəkmədi, Antisfen`in tələbəsi oldu. Diogenes`in mədəni
mühitdən uzaq, təbii, hətta heyvansayağı, həzzə düşmən (Sokrates ölçülü həzzi
və digər duyğuları qəbul edirdi) həyat tərzi ona və bu məktəbə şöhrət
qazandırmışdır. Məktəbin adının da bu “itsayağı” (“kinikos”) həyat tərzindən
əmələ gəldiyi deyilir (gimnaziyanın adından alınması da istisna olunmur).
Diogenes mütləq/radikal azadlıq üçün hər şeydən, borc və mənəvi dəyərlərdən
belə uzaq durmaq lazım gəldiyini irəli sürürdü. Onun 21 əsərinin adı çəkilir.
Həyatı ilə ümumi və ya şablon dəyərlərə, şərtiliklərə qarşı üsyan etmiş, hətta
təcavüzkar şəkil almış, adi təmizlik, nəzakət və abır-həyanı unudurmuş.
Kiniklər özlərini cəmiyyətə qarşı, qəbul olunmuş qayda və dəyərlərə qarşı
qoyurdular.
Diogenes həzzə düşmən idi, rəvayətə görə çəlləkdə (və ya böyük gil qabda),
çalışmadan, maddi nemətlərsiz, dilənçi payları ilə, ailəsiz,...yaşamağa çalışırdı.
İti və oynaq ağlı ilə seçilirmiş. Gündüz vaxtı əlində çıraq aqorada (bazarda)
“adam axtarıram” deyə gəzirmiş (Sinoplu Diogenes H.İsaxanlı`nın “Köhnə
çıraq” poemasının baş qəhrəmanıdır; bax: “Bu da bir həyatdı”). Bir rəvayətə
görə dəniz quldurlarının əlinə düşmüş, qul kimi satılmış, qul alverçisinin onun
hansı qabiliyyəti olduğunu soruşanda “insanları idarə edə bilirəm. Kimsə özünə
ağa almaq istəyirmi? Məni alsın” deyibmiş və Korinfli zəngin bir şəxs
(Kseniades) onu almış, öz uşaqlarına müəllim təyin edibmiş. Korinfdə
Makedoniyalı Aleksandr onun yanına gəlmiş, sərkərdənin “Mən Aleksandram –
böyük hökmdar” sözünə “Mən isə Diogenes`əm – it” deyə cavab vermiş,
Aleksandrın “məndən nə xahişin var, de” sözünə isə “Günəşin qabağını kəsib
üstümə kölgə salma” deyərək cavab veribmiş. Guya onun həyat tərzinə və
cəsarətinə heyran qalan İskəndər “Əgər İskəndər olmasaydım, Diogenes olmaq
istərdim” deyibmiş.
Platonun “insan tüksüz ikiayaqlı məxluqdur” tərifinə cavab olaraq “tükü
yolunmuş bir xoruz” hazırlamış, onu “Platonun adamı” adlandırmış, nəticə
etibarilə Platon öz tərifini dəqiqləşdirməyə məcbur olubmuş (və yastı dırnaqlı).
Platon onu “dəliləşmiş Sokrat” adlandırıbmış, xalq arasında isə sadəcə “kyon”
(it) ləqəbi ilə çağrılarmış. Diogenes`in həyatı əfsanələşmiş, o, demək olar ki,
folklor qəhrəmanına çevrilmiş, onunla bağlı rəvayətlər və lətifələr yayılmışdır;
nəyin doğru, nəyin uydurulmuş olduğunu demək çətindir. Qaçan qulunun geri
qaytarılmasını istəməyibmiş: qul mənsiz yaşaya bilirsə, mən qulsuz yaşaya
bilmərəmmi?! “Sinoplular səni sürgün etdilər” deyənə “mən də onları öz
yerlərində qalmağa məhkum etdim” deyə cavab veribmiş. Özünü Dünya
vətəndaşı sayırmış. “Nə vaxt evlənmək yaxşıdır?” sualına “gənclikdə hələ
tezdir, qocalanda isə gecdir” deyə cavab veribmiş. “Afinalılar onu
sevirdilər...Diogenesin danışığında sehrli qüvvə vardı”. Harada ölməsi məlum
deyil, öğlümü haqqında da bir neçə rəvayət var - öz nəfəsini saxlamaqla ölməsi
də daxil olmaqla...
Sokrates`in tələbəsi Kirenli (Afrika) Aristippos (?”-435”-?”-356”) da
Sokratesin ölümündən sonra Afinanı tərk etmiş, bir çox yerlərdə olmuş, sonda
Kirene`yə qayıdıb orada öz məktəbini qurmuşdu. Aristippos zəngin ailədə
doğulmuş, zəngin həyat keçirməyə öyrəşmiş, lakin Sokrates`in adını eşidib
onun yanına getmiş, öz qabiliyyəti və davranışı ilə hörmət qazanmışdı. O,
əsasən, əxlaq fəlsəfəsi lə məşğul olmuşdur. Aristippos Antisfenesin tam əksinə
hər şeyin dəyişməkdə olduğunu, yumşaq (hansı ki, həzz verir) və sərt (hansı ki,
acı çəkdirir) hərəkətlərin yanaşı olduğunu (insan bədənində olduğu kimi)
vurğulamış, xoşbəxtliyin həzzdən (yunanca: hedon) ibarət olduğunu irəli
sürmüşdü, onu ilk hedonist filosof saymaq olar. Hedonist baxışlara görə
gələcəyin qeyri-müəyyənliyi, gələcəyə inamın olmaması indiki anı yaşa, indi
həzz al fikrini əsaslandırır. Üstəlik, Aristippos bədən/cismani həzzə üstünlük
verirdi, həzzləri doğru və doğru olmayana ayırmırdı. Təbii olandan utanmaq
lazım deyil. Bilgi də faydalıdır. İnsan özünə hakim olsa, ağılla hərəkət etsə daha
qalıcı zövq ala bilər. Aristippos`u sofist sayanlar da var (o cümlədən Aristotel).
Dostları ilə paylaş: |