“Musiqi dünyası ”.-2010.-№1-2.-S.152-156.
KULTUROLOGİYA ELMİ VƏ ONUN TARİXİ KÖKLƏRİ
İlqar HÜSEYNOV
Cəmiyyətimizin müasir inkişaf mərhələsində dünya mədəniyyətinin kulturoloji fikir tarixi kontekstində
öyrənilməsi və tədqiqi mövcud sivilizasiyalar və insan cəmiyyətləri üçün aktuallıq kəsb edir. Bu baxımdan qədim
dünya mədəniyyətinin kulturologiya tarixinin tədqiqat obyekti kimi ön plana çəkilməsi məhz dövrün zəruri tələbi
kimi əsas prioritetə çevrilir. Müasir cəmiyyətin inkişafında insanın hərtərəfli və kamil bir şəxsiyyət kimi
formalaşmasında kulturologiya elminin çox böyük tarixi əhəmiyyəti vardır.
Kulturologiya tarixi və nəzəriyyəsinin araşdırılması bu gün bəşəriyyətin min illərlə yığıb saxladığı,
zənginləşdirdiyi, bir-birinə ötürdüyü və gələcək nəsillərə çatdırdığı mənəvi sərvətlərin və əxlaqi dəyərlərin vahid bir
toplum şəklində öyrənilməsi üçün əlverişli zəmin yaradır. Dünya xalqlarının öz milli adət və ənənələrinə,
soy-kökünə, mənəvi əxlaqi dəyərlərinə qayıdış meylinin güclənməsi kulturologiya elmi qarşısında yeni vəzifələr
müəyyənləşdirir.
Bu gün Azərbaycan xalqı məhz özünün milli oyanış, milli özünüdərk dövrünü yaşayır. Bu dövr hər bir kəsin
öz milli mənsubiyyətini dərk etməsi, soy-kökünə qayıdış, keçmişin ibrət dərslərindən nəticə çıxarmaq, kulturoloji
fikir tariximizi böyüməkdə olan nəsillərə hərtərəfli və düzgün çatdırmaq və s. məsələlərlə səciyyələnir. Belə ki,
başımıza gələn bəlaların əsas səbəbi də məhz elə öz tariximizə, dilimizə, soy-kökümüzə olan etinasız və biganə
münasibətimiz və bir də unutqanlığımız olubdur. Görkəmli Azərbaycan maarifçisi Həsən bəy Zərdabinin sözləri ilə
desək: "Bir xalq ki, öz dilini, tarixini, adət və ənənəsini unudursa, bu həmin xalqın "belinin sındırılması"
deməkdir". Mustafa Kamal Atatürkün (1881-1938) sözləri ilə desək, "Öz milli mənliyini dərk etməyən bir xalq,
başqa bir xalqın şikarına, ovuna çevrilir".
Kulturologiya tarixi onu yaradan xalqın özü qədər qədimdir. Minilliklər boyu yaşayan xalqlar zaman-zaman
nəsildən-nəslə ötürülən böyük bir ədəbi xəzinə, zəngin bir kulturoloji dəyərlər toplusu yarada bilmişlər. Bu
kulturoloji dəyərlər isə bu gün yetişməkdə olan gənc nəslin formalaşmasında önəmli rol oynayır.
Kulturologiya - ümumbəşəri və milli mədəni proseslərin obyektiv qanunauyğunluqlarını, insanların maddi
və mənəvi həyatının mühüm hadisələrini özündə ehtiva edir. Bu elm insanların maddi maraq və tələbatlarının
yaranıb formalaşdığı ilkin şərtləri və amilləri öyrənir, mədəni dəyərlərin yaradılması, artırılması, qorunub gələcək
nəsillərə ötürülməsini həyata keçirir. Bu elmi zamanın özü yaratmışdır. Tarix, fəlsəfə, sosiologiya, etnoqrafiya,
arxeologiya, etika, estetika kimi bir çox dünyəvi elmləri özündə birləşdirən kulturologiya təbii ki, bu elmləri
zaman-zaman öz "süzgəcindən" keçirmiş və onlardan lazımınca faydalanmışdır.
Kulturologiya özündə çox mühüm olan həyat layihələrini açıqlayan, eyni zamanda mədəni cəmiyyətin əsas
komponentlərini özündə əks etdirən və insanşünaslığa xidmət edən nəhəng bir elmdir. Bu elm öz predmeti, məqsəd
və vəzifəsinə, spesifik xüsusiyyətlərinə görə cəmiyyəti öyrənən digər sosial-humanitar elmlərdən əsaslı şəkildə
fərqlənir.
Kulturologiya elminə həm dünyəvi, həm də Azərbaycanlılıq məfkurəsi kontekstində yanaşılmalıdır. Bu elm
cəmiyyətdə daim inkişafda və gündəmdə olan bir elmdir. Bu elmin inkişafının yekununa "1 nöqtə yox, 3 nöqtə
qoyulmalıdır".
Dünya sivilizasiya tarixinin müasir mərhələsində insan və şəxsiyyət, cəmiyyət və dövlətin mənəvi həyatında
məhz insanşünaslığa xidmət edən kulturologiya elminin əhəmiyyəti və rolu durmadan artmaqdadır. Bu gün
kulturologiyanın cəmiyyət həyatında yazılmış və yazılmamış qanunları mövcuddur.
Kulturologiya ideyaların, baxışların, abstrakt nəzəriyyələrin, həqiqətlərin, təhrif və mübahisələrin görünən
və görünməyən tərəflərinin mücərrəd bir toplusudur. Bu toplum isə layiqincə qorunmalı və mənəvi irs şəklində
gələcək nəsillərə düzgün və obyektiv gerçəklikdə, real həqiqətlər kontekstində ötürülməlidir.
Kulturologiya elmi mədəniyyət nəzəriyyəsindən daha geniş və əhatəli bir elmdir. Bu elmin subyekti insan
və şəxsiyyət, obyekti isə cəmiyyət, müxtəlif ictimai-iqtisadi formasiyalar və sivilizasiyalardır. Daha geniş mənada
götürsək, kulturologiya insan və bəşəriyyət haqqında elmdir. Azərbaycan Milli Ensiklopediyasının ilk
"Azərbaycan" cildində deyilir: "Kulturologiya bir elm kimi humanitar elmlər və biliklər bölməsinə daxil edilmişdir.
Kulturologiya insanın və bəşəriyyətin qurucu həyatı və fəaliyyəti haqqında elmdir". insanın həyat
fəaliyyətinin təkmilləşməsi, qloballaşma və mədəni inteqrasiya proseslərindən yaranan yeni tələblər, dövlət və
cəmiyyətin texnogen inkişafı, yeni rəqəmsal texnologiyalardan düzgün istifadə üçün şəxsiyyət və liderlərin
hazırlanmasına olan ehtiyac siyasi, sosial-iqtisadi və beynəlxalq mədəni proseslərin sistemli kulturoloji təhlilinə
xüsusi maraq yaratmış, bu da ilk növbədə humanitar elmlərin qovşağında yaranan kulturologiya elminin
əhəmiyyətinin xeyli dərəcədə artmasına və formalaşmasına səbəb olmuşdur.
Bu gün dünyada kulturologiya elmi haqqında olan fikirlər və nəzəriyyələr olduqca mübahisəli və
ziddiyyətlidir. İstər Şərqdə, istərsə də Qərbdə müxtəlif alim və tədqiqatçılar arasında bu elm haqqında yekdil bir
fikir və ideya mövcud deyil. Mübahisəli və müqayisəli nəzəriyyələr və kulturoloji baxışlar bu elmi daha dərindən və
hərtərəfli anlamağa imkan yaradır.
Kulturologiyada xalqın etnik, mifoloji, dini və elmi dünyagörüşü, mənəvi-əxlaqi təsəvvürləri, adət-ənənələri
daha əhatəli şəkildə qorunaraq gələcək nəsillərə layiqincə ötürülür.
Kulturologiya tarixi nə qədər millidirsə, bir o qədər də bəşəri və beynəlmiləldir. Müxtəlif xalqların özlərinə
məxsus həyat tərzi, etnoqrafiyası, psixologiyası geniş bir şəkildə əks olunmaqla yanaşı, dünyanın, bəşəriyyətin,
milli varlığın sərhəd tanımayan ideyaları da kulturologiya tarixində bir mənəvi irs toplusu kimi öz ifadəsini və həlli
yollarını tapır.
Kulturologiya onu yaradan xalqın tarixini, keçdiyi inkişaf dövrlərini və mərhələlərini hərtərəfli şəkildə
öyrənən bir elmdir. Məhz qədim mifoloji əfsanələr, xalqın əski dünyagörüşü, düşüncə tərzi, arzu və istəkləri, həyat
və məişəti də bu elmdə öz dərin ifadəsini tapır.
Üst paleolit dövründən yəni, "homo sapiyens" in ("ağıllı insan"ın) meydana gəlməsindən başlayaraq, ta
bugünkü günə qədər insanlar böyük bir kulturoloji mənəvi-əxlaqi dəyərlər məcmusu yaratmış və bu toplum mənəvi
irs şəklində nəsildən nəslə ötürülərək kulturologiya tarixini daha da zənginləşdirmişdir. İbtidai dövrü psixoloji və
fəlsəfi baxımdan hərtərəfli xarakterizə edən görkəmli Avstriya alimi Ziqmund Freyd (1856-1939) əqli-insanın
xilaskarı, kütləni isə ibtidai cəmiyyətin ordusu adlandırırdı.
Şifahi ənənədən gələn qədim türk mif, əfsanə, rəvayət və nağılları, dastanları, mövsüm və mərasim
nəğmələri, "Oğuznamə"lər, "Kitabi-Dədə Qorqud", "Manas", "Gilqameş", "Altunyarıq", "Maday Kara" sırasından
olan bahadırlıq dastanları; həmçinin, "Tomiris", "Astiaq", "Günəşlə Ay", "Apardı sellər Saranı", "Turac", "Qız
qalası", "Oğuz", "Bayat", "Xatın arxı", "Qarı dağı", "Məlikməmməd", "Şahzadə Mütalib" və s. kimi əfsanə, nağıl və
rəvayətlər; habelə yazılı təcrübənin "Divani lüğatit-turk" (Mahmud Qaşğarlı), "Qutadğu bilik" (Balasaqunlu Yusif
Has Xacib), "Ətabətül-həqayir" (Əhməd Yuğnəki), "Divani-Hikmət" (Əhməd Yəsəvi) və s. kimi mükəmməl
örnəkləri kulturologiya elminin zəngin ənənəyə və tarixi köklərə malik olmasını bir daha təsdiqləyir. Bu janrlar
xalqın əski dünyagörüşü, düşüncə tərzi, arzu və istəkləri ilə bağlı olaraq yaranmışdır. Həmçinin, bu janrlarda həm
real zəmin, həm də real zəmindən kənar, müasir ağlın, düşüncənin uydurma, fantastika kimi qəbul etdiyi qeyri-adi,
fövqəltəbii əhvalat və hadisələr üstünlük təşkil etmişdir.
Homer, Firdovsi, Nizami, Füzuli, Nəvai, Şekspir, Molyer, Höte, Rembrand, L.Tolstoy, N. Hikmət,
M.F.Axundov, H.Cavid, C.Cabbarlı, İ.Əfəndiyev, Ü.Hacıbəyov, S.Bəhlulzadə və sairlərin yaratdıqları əsərlər yalnız
mənsub olduğu xalqların deyil, əsrlər boyu yaşayan və yaşayacaq xalqların böyük bir mənəvi irs toplusudur. "Ən
qiymətli milli sərvət olan istedadla yaradılmış sənət əsəri yalnız bir millətə yox, bütün millətlərə məxsusdur.
Homer, Firdovsi, Nizami, Şekspir, Bethoven, Bax, Ü.Hacıbəyov, Mikelancelo hər biri öz millətlərinin və bütün
bəşəriyyətindir".
Hər bir xalq dünya kulturoloji irsinə böyük töhfələr vermişdir. Dünya kulturoloji irsin ən gözəl nümunələri
zaman-zaman tərcümə edilərək, müxtəlif millətlərin, ümumilikdə bəşəriyyətin mənəvi inkişafına güclü təkan vermiş
və onların mədəni sərvətinə çevrilmişdir.
Mifoloji dünyadan mədəni dünyaya - yazı mədəniyyətinin çiçəkləndiyi zamana keçid qədim dünya insanı
üçün təbii inkişaf idi - sadədən mürəkkəbə, yekrənglikdən çoxrəngliliyə, psixoloji yüklənmələrə doğru gedən bir
inkişaf! Amma bu keçid prosesini bir nöqtə kimi qəbul etmək da doğru deyil, yəni mif qurtardı, avtomatik şəkildə
mədəniyyət başladı... Mif və yazı arasındakı münasibətlər təkcə şifahi və yazılı başlanğıclar arasındakı münasibətlər
deyildi. Bu münasibətlər insan ağzı ilə insan beyni arasındakı münasibətlər, deyim və düşüncə, seyrçilik və analiz,
kortəbii inam və təcrübədən gələn şübhə arasındakı münasibətlər idi.
Qeyd edək ki, yer üzündə yaşayan insanlar zaman-zaman müxtəlif ictimai - iqtisadi formasiyalarda öz
həyat, məişət və davranış tərzləri ilə bağlı olaraq zəngin bir tarixi - kulturoloji irs qoyub getmişlər. Tarixi
keçmişimizi əks etdirən məhz bu maddi mənbələr və yazılı qaynaqlar vahid bir küll halında cəmləşərək mədəni
sərvət toplusu kimi tariximizi kulturoloji baxımdan öyrənməyə və dərk etməyə əsas verir. Bizə miras qalan
kitabələr, yazılı qaynaqlar, qayalar, daşlar, sümük və gil lövhələr və s. məhz bu gün tarixi - kulturoloji mənbələr
kimi xüsusi əhəmiyyətə malikdir.
Maddi mədəniyyət abidələri (yaşayış yerləri, qəbir abidələri, qayaüstü təsvirlər və s.) və elmi tədqiqat
nəticəsində əldə edilmiş materiallar (əmək alətləri, silahlar, bəzək əşyaları və s.) məhz qədim keçmişimizi öyrənmək
üçün son dərəcə əhəmiyyətli tarixi-kulturoloji yazılı mənbələr hesab edilir. Bu abidələr vasitəsilə qədim insanların
yaşayış tərzi, istifadə etdikləri əmək alətləri, adət-ənənələri, dini görüşləri haqqında məlumatlar əldə edilir, onların
davranış və məişət həyatı, məşğuliyyəti və ictimai münasibətləri kulturoloji baxımdan öyrənilir və tədqiqat
obyektinə çevrilir.
Müxtəlif tipli qəbir abidələri: daş qutu qəbirlər, torpaq qəbirlər, kurqanlar, küp qəbirlər, taxta qutu,
katakomba və onlardan əldə edilmiş materiallar məhz bizə qədim insanların adət və ənənələri, etiqadları,
dünyagörüşləri, dini inancları və s. haqqında geniş kulturoloji bilgilər verir. "Doğru deyiblər ki, "keçmişini
bilməyən, bu gününü başa düşməz".
Milyon il əvvəl ölkəmizin ərazisində hansı tayfanın, hansı qövmün, hansı xalqın yaşaması Adəmin və
Həvvanın hansı millətdən olması əbədi bir mübahisədir. Amma mübahisəsizi budur ki, o zaman da, indi də
yaşadığımız torpaq-Vətən-Azərbaycan olub. Bu mənada Azərbaycançılıq türkçülükdən də, şumerçilikdən də,
millilik və islamçılıqdan da qədim və əzəli fikir formasıdır.
Görəsən dünyanın ən qədim yaşayış məskəni-Azıx mağarasından tapılan çənə sümüyünün sahibi hansı
millətdən olub?! Bu sual gülməlidir. Amma "Azıx mağarası harada yerləşir?" - bu isə ciddi və həqiqi sualdır.
Cavabı isə dünyanın bütün dillərində birdir: Azərbaycanda!
Bu gün qədim insanların həyat izlərini tapmaq bir o qədər də asan məsələ deyildir. Min il ərzində qədim
insanların qoyub getdiyi əşyaların, sümüklərin, yaşayış yerlərinin, müdafiə divarlarının, qalaların, qəbir abidələrinin
və s. izlərin üzərini qalın torpaq, qum təbəqəsi örtmüşdür. Qədim abidələri örtən qalın torpaq təbəqə üzərində ot
bitmiş, meşə əmələ gəlmiş, kənd və şəhərlər salınmışdır.
Maraqlıdır ki, qədim daş dövründə meydana gəlmiş ənənəvi xüsusiyyətlər bütün sonrakı dövrlərdə də bu və
ya digər formada özünü büruzə vermişdir. Bu da ondan irəli gəlir ki, insan heç zaman öz yaratdığını unutmamış,
onun qayğısına qalaraq yaratdığını yaşatmaq və gələcək nəsillərə çatdırmaq üçün layiqli varislər yetişdirmişdir.
Xüsusilə, mənəvi sərvətlərin qorunmasında tarixi varislik prinsipi daha böyük rol oynamışdır. Məsələn, xalqımızın
ən qədim və zəngin, möhtəşəm kulturoloji abidələrindən sayılan Qobustan qaya abidəsi üzərindəki təsvirlərin çoxu,
eramızın əvvəlki dövrlərinə (e.ə.XII-VIII əsrlər) aiddir. Bu abidə üzərində qədim tariximizi əks etdirən və yaşadan
çoxlu sayda şəkillər və kulturoloji əhəmiyyət kəsb edən təsvirlər vardır. 1947-ci ildə arxeoloq İshaq Cəfərzadə
Qobustanda ilk dəfə olaraq 10-12 min il bundan əvvəl, mezolit dövrünə (orta daş dövrü) aid real həyat tərzini əks
etdirən qayaüstü rəsmlər aşkar etmişdir. Daş dövrünün bu təcrübəsindən isə bütün dövrün insanları lazımınca
bəhrələnmiş, bu sərvətləri layiqincə nəsildən nəslə ötürərək zəngin bir kulturoloji irs toplumunu yarada bilmişlər.
Bu toplum isə bizə bu gün kulturologiya tarixini daha dərindən dərk etməyə və əsaslandırmağa imkan verir.
Kulturologiya tarixi müxtəlif cəmiyyətlərdə və ictimai - iqtisadi formasiyalarda mədəni həyatı öyrənir və
bununla da əsas mədəni-tarixi tiplərin nailiyyətlərini və xüsusiyyətlərini aydınlaşdırmağa səy edir. Kulturoloqların
mühüm vəzifəsi isə ən uzaq keçmişdə yaşamış insanların mədəni həyatını və qloballaşan müasir dövrün
sosial-mədəni tendensiya və proseslərini düzgün və hərtərəfli təhlil etməkdir. Qeyd edək ki, kulturologiyanın
obyektləri canlı insanlar, mədəniyyətin yaradıcı və daşıyıcıları, həmçinin mədəni hadisələr, proseslər, münasibətlər
və müəssisələrdir.
Kulturologiya - mədəniyyəti, sivilizasiyanı, onun tarixini, insanla mədəniyyətin qarşılıqlı əlaqəsini və
qarşılıqlı təsirini öyrənir, insanın həyatda öz yerini tapmasında səmərəli rol oynayır. Kulturologiya bir tərəfdən
mədəniyyəti, mədəniyyət tarixini, insanla mədəniyyətin qarşılıqlı əlaqəsini, digər tərəfdən isə insanın ona təsirini və
əks-təsirini öyrənir.
Məşhur alman filosofu Hegel (1770-1831) qeyd etmişdir ki, "Ən mühüm tələbat həqiqəti dərk etmək
tələbatıdır". Həqiqətən də insan yaranışından dünyasını dəyişənədək həmin həqiqətin axtarışında olur, dünyanın,
təbiətin, cəmiyyətin sirlərini açır, bəşəriyyətin, insanlığın inkişaf qanunlarını kəşf edir. İnsan daim axtaran varlıqdır.
O, axtarışları dayandıran kimi sanki sahib olduğu ülviliklər zirvəsindən aşağı, adi canlıqlar səviyyəsinə doğru enir.
Tapanda da axtarmaq, tapmayanda da axtarmaq, getdikcə daha dərinliklərə enmək, öz zəka nuru ilə zülməti
işıqlandırmaq - insana nəsib olan yeganə yol budur. Bu təbiidir. Bəşəriyyət durduqca onun varlığı ilə əlaqədar olan
bəzi problemlər də öz aktuallığını saxlayır və zaman keçdikcə yenidən dəyişilmiş şəraitə uyğun surətdə həll
olunması tələb olunur. Bu cəhət isə kulturoloji proseslərdən heç də yan keçmir. Kulturologiya insan mənəviyyatını
və əxlaqını, şəxsiyyətin mənəvi keyfiyyətlərini əsas götürərək, dövrün çoxlu açılmamış qaranlıq tərəflərinə aydınlıq
gətirir.
Kulturologiya bir elm kimi XX əsrin əvvəllərində meydana gəlmişdir. Oksford lüğətində qeyd edilir ki,
"kulturologiya" sözündən ilk dəfə alman alimi, Nobel mükafatı laureatı Vilhelm Ostvald (1853-1932) 1913-cü ildə
istifadə etmişdir. "Elmlər sistemi" və "Təhsil nəzəriyyəsi prinsipləri" məqalələrində o, kulturologiyanı
"sivilizasiyalar haqqında elm" adlandırmışdır. Oksford lüğətində eyni zamanda göstərilir ki, "kulturologiya"
terminini ilk dəfə tam əsaslandırılmış şəkildə 1949-cu ildə (tam əsaslandırılmamış şəkildə isə 1937-ci ildə
işlətmişdir) Amerika kulturantropoloqu və kulturoloqu Lesli Alvin Uayt (1900-1975) elmə tətbiq etmişdir. O,
kulturologiyanı sərbəst bir elm sahəsi kimi təqdim etmiş, elmin əsas problemlərini, qanunlarını, mahiyyətini,
metodlarını, məqsəd və vəzifələrini inkişaf dinamikasını və sosial funksiyalarını müəyyənləşdirmişdir.
Lesli Alvin Uayt öz nəzəriyyəsini "Kulturologiya" adlandırmışdır. Lesli Alvin Uaytın bu elmi tədqiqatı
"insan və kulturologiya" anlayışlarını əhatə etdiyindən kulturologiya elmi dünya ictimaiyyətinin diqqət mərkəzinə
çevrilmişdir
Lesli Alvin Uayt eyni zamanda, mədəniyyəti də rəmzlərin cəmi kimi müəyyən edirdi. O, ideyaları, hissləri,
hərəkətləri, inancları, münasibətləri, davranış normalarını, qanunları, təsisatları, incəsənət əsərlərini, dili, əmək
alətlərini, hətta naxış və bütləri də rəmzlər siyahısına daxil edərək, onları kulturoloji dəyərlər kontekstində
qiymətləndirirdi.
Lesli Alvin Uaytın öz əsərlərində iºlətdiyi "kulturologiya" termini o vaxtlar həmkarları arasında çox böyük
mübahisələrə səbəb olmuşdu. Müasirləri Lesli Alvin Uaytın bu yeni terminini hətta "barbarlıq" adlandırırdılar.
Çünki bu söz latın və yunan sözlərinin birləşməsindən əmələ gəlmişdi. L.A.Uaytın həmkarları iddia edirdilər ki, bu
termin elmə heç bir yenilik gətirməyəcəkdir. L A. Uayt isə sübut edirdi ki, kulturologiya real gerçəkliyi özündə əks
etdirməklə bərabər, yeni və insanşünaslığa xidmət edən mütərəqqi bir elmi müəyyənləşdirir.
Lesli Alvin Uayt hesab edirdi ki, kulturologiya sosiologiya və psixologiyanın başlıca hüquqlarına qəsd
edərək, onları mənimsəyir. O, deyirdi ki, insanla bağlı olan problemlər öz əməli həlli yollarını sosiologiya və
psixologiya sahəsində yox, məhz kulturoloji çərçivədə tapmalıdır. Bu mənada L.A.Uayt bu yolla yeni terminə olan
iradları dəf edir və onun cəmiyyətdə yaşamaq hüququnu müdafiə edirdi. O, qeyd edirdi ki, əgər yeni keyfiyyətin
aşkar edilməsi üçün yeni söz yaratmaq lazım gələrsə, bu yaradıcı söz olmalıdır. "Kulturologiya" sözü də yaradıcı
sözdür və tarixi reallıqları özündə təcəssüm etdirir. Bu mənada Lesli Alvin Uayt kulturologiya elminin inkişafına və
gələcəyinə tam əmin idi.
Kulturologiya dünyaya, sosial reallığa, mədəni-mənəvi aləmə, insanın oradakı yeri və roluna bir küll
halında baxır. Bu elm eyni zamanda universal dəyərləri, keçmişin mənəvi irsini, cəmiyyətin mövcud bədii-mənəvi
komponentlərini real gerçəklik baxımından təhlil edir. Kulturologiyanın elmi mənası bundan ibarətdir ki, o,
mədəniyyətləri və sivilizasiyaları dərindən və hərtərəfli şəkildə öyrənır, onun məzmun və mahiyyətini üzə çıxarır,
hansı səviyyələrdə və formalarda mövcud olduğunu müəyyən edir.
Kulturologiya dünyada gedən qlobal prosesləri, həm də xalqımızın mənəvi-əxlaqi dəyərlərinin qorunub
saxlanılmasını, inkişaf etdirilməsini və gələcək nəsillərə çatdırılmasını öz qarşısına bir məqsəd və vəzifə kimi
qoyur. Kulturologiya həm də müxtəlif sivilizasiyaların biri-birinə münasibətini, insan faktorunun təbiətə, istehsala,
ətraf mühitə və s. amillərlə qarşılıqlı əlaqəsini araşdırır və onun inkişaf meyllərini öyrənir. Bu baxımdan
informasiya-kommunikasiya və rəqəmsal texnologiyaların tətbiqi, iqtisadi cəhətdən inkişaf etmiş ölkələrdəki
mədəniyyət sənayesinin təşəkkülü kulturoloji prosesləri qloballaşan dünyada ön plana çəkir. Dünyada gedən bu
tendensiyalardan və mürəkkəb qlobal proseslərdən baş çıxara bilən kulturoloq kadrların hazırlanması isə bu gün
ölkəmiz üçün böyük əhəmiyyətə malikdir.
Tanınmış kulturoloq alim, professor Timuçin Əfəndiyev yazır: "Bu gün qloballaşan dünyada milli mənəvi
dəyərlərimizin mühafizəsi, mədəni inteqrasiyanın optimal yollarının aranması və müəyyənləşdirilməsi baxımından
mövcud baxışların konseptual bir şəklə gətirilməsinə, xalqlarımızın mənəvi ünsiyyətinin intensivləşməsinə, mənəvi
yaxınlaşma prosesinin sürətlənməsinə və nəticədə mükəmməl bir birliyə qovuşmasına böyük ehtiyac
duyulmaqdadır. Mədəni müxtəlifliyə tərəfdar olan müasir dünya artıq çoxdan dərk etmişdir ki, texnogen inkişaf
mənəvi inkişafla vəhdət təşkil etməyəndə, harmonik tamlıq pozulur. Bu səbəbdən də gələcəyə milli-mənəvi
bütövlük halında getmək üçün keçmişin, milli-tarixi təcrübənin nailiyyətlərinin bir araya gətirilməsi, elmi
süzgəcdən keçirilməsi və gələcək nəsillərə transformasiyası biz nəsillər qarşısında duran ən müqəddəs
vəzifələrdəndir".
Kulturologiya insanın ictimai şüuru və yaradıcılığı əsasında formalaşan bir anlam olsa da o, həm də hər bir
yaradıcı fərdin meydana gətirdiyi yenilikləri, oxşar yaradıcılıqların daima təkrarlanan mənəvi mühitidir. Bu mühit
həm yaradıcılığa, həm də milli mentalitetin inkişafına təsir edən müxtəlif amillərlə zəngindir. Məhz bu zənginliklər
isə bu gün cəmiyyətdə mübahisə doğuran "mədəniyyətşünaslıq" və ya "kulturologiya" kimi anlamların yaranmasına,
onların ictimai şüurda möhkəm yer tutmasına zəmin yaradır.
"Mədəniyyət" və "kültür" anlayışlarına tarixən cəmiyyətlərdə müxtəlif mövqelərdən yanaşılmışdır. XX
əsrin əvvəllərində yaşamış türk alimi Ziya Göyalpa (1876-1924) görə "kültürlə mədəniyyət" bir-biri ilə tam şəkildə
fərqlənən
anlayışlardandır.
Ziya
Göyalpın
fikrincə
"kültür
milli
olduğu
halda,
mədəniyyət
uluslararasıdır-beynəlmiləldir. Kültür yalnız bir millətin din, əxlaq, hüquq, ağıl, estetik, dil, iqtisadiyyat və texnika
ilə bağlı yaşayışlarının duyumlu-ahəngdar bir bütündür. Mədəniyyət isə eyni inkişaf səviyyəsində olan bir çox
millətlərin toplumsal ictimai həyatlarının ortaq bir bütündür"...
Ziya Göyalp XX əsrin əvvəllərində yaşamasına baxmayaraq kültür anlamını izah edərkən kulturologiyanın
əhatə dairəsinin rəngarəng olması arzusunda da olmuşdur. O, qeyd edirdi ki, Avropa və Amerika mədəniyyət
dairəsində bütün Avropada yaşayan millətlərin ortaq bir Qərb mədəniyyəti vardır. Bu mədəniyyətin içində
bir-birindən ayrı və baxımsız-müstəqil bir ingilis kültürü, bir alman kültürü, bir fransız kültürü və s. mövcuddur.
XX əsrin böyük kulturoloq alimi Əhməd bəy Ağaoğlunun (1869-1939) yaradıcılığında məxsusi əhəmiyyətə
malik olan "Üç mədəniyyət" əsəri də bu gün kulturologiya tarixinin və türk kulturoloji fikrinin və ümum-türk
məfkurəsinin öyrənilməsində xüsusi önəm kəsb edir. Əhməd bəy Ağaoğlu "kültür" və "mədəniyyət" anlamlarını
fərqləndirərək onları daha geniş və müqayisəli mənaları özündə əks etdirən real "həyat tərzi" kimi təqdim edirdi.
"Kultura" sözünün ilk dəfə kimin işlətməsi mübahisəlidir. Bu termini ilk dəfə Roma senatının sədri tarixçi,
yazar Mark Porsi Katon (e.ə. 234-149) işlətmişdir. Mark Tilli Siseron (e.ə. 106-43) isə bu istilahı insanların əqli
fəaliyyətinə şamil etmişdir.
Romalı filosof, natiq, yazar və görkəmli dövlət xadimi Mark Tulli Siseron b.e.ə. 45-ci ildə "Tuskulan
disputları" əsərində "kultura" sözünün etimoloji mənasını "becərmək", "torpağı hazırlamaq" kimi izah etmişdir.
Digər yayılmış variant "kult" sözünün etimoloji tarixi ilə bağlıdır ki, bu söz latın dilindən "kult" - "sitayiş",
"pərəstiş", "ehtiram" kimi tərcümə olunur. Əlbəttə ki, burada söhbət dini sitayiş və pərəstişdən gedir ki, bu da ilahi
qüvvələrin diqqətini cəlb etmək məqsədini daşıyırdı. Daha sonrakı dövrlərdə isə latın sözü olan "kultura" sözü,
məhz XVIII əsrdən etibarən Avropa məkanına geniş şəkildə daxil olmuşdur.
"Kultura" sözünün tarixi mənşəyinə dair digər mübahisəli ehtimallar, baxışlar və yanaşmalar da mövcud
olmuşdur. Belə fərziyyələrdən biri "kultura" sözü, "kult" sözünə latın "ur" şəkilçisinin birləşməsi nəticəsində əmələ
gəlməsidir. Digər ehtimala görə "kultura" sözü qədim Mesopotamiyanın Şumer şəhəri olan Ura sitayişlə bağlı
olmuşdur. Yüksək səviyyədə inkişaf edən Ur şəhərinə çox güman ki, qədim Şumerlər hörmət edib, ehtiramla
yanaşırdılar. "Kultura" sözünün digər, bizə daha yaxın olan mənası tərbiyə və təhsildir. Aydındır ki, tərbiyəli, ağıllı
insan mədəni olur və bu dəyərlər mədəniyyətin məzmununu təşkil edir. Qədim Yunanıstanda "kultura"ya yaxın
termin və həmin mənanı verən "paydeye" (pis-uşaq) istilalı mövcud idi. Çin dilində "jen", hind dilində "dharma"
anlayışlarına müvafiq olan "cultura" məfhumu ellinlərdə «paydeye» kimi səslənirdi. "Paydeye" təkcə tərbiyə və
təhsil yox, həmçinin, təlim, maariflənmə, mədəni olmaq mənalarını da birləşdirirdi. Qədim polislərdə isə, "kultura"
bu sözün üç əsas mənasını-becərmə". "dini kult" və "tərbiyə"ni ifadə edirdi. Əbəs yerə deyil ki, məşhur ellinist
Maks Polens zahidliklə polis (şəhər-dövlət) təəssübçülüyünü eyniləşdirirdi. Lakin zaman keçdikcə "kultura"
sözünün mənası dəyişmiş, ictimai-sosial və mədəni həyatın bir çox sahələrinə şamil edilmişdir.
Belə ki, "kultura" sözü daha çox yeni məzmun və etimoloji mənalar kəsb etməyə başladı. Bu söz keyfiyyət
baxımından cəmiyyətdə "təbiətin fövqündə duran", "insanın yaratdığı mənəvi məhsul", "insan əxlaqı və davranış
tərzi", "insan mənəviyyatı " və s. kimi dərk edilməyə başladı. Yəni allahın yaratdıqları yox, məhz insanların
fəaliyyət məhsulu kimi başa düşülürdü. Buna müvafiq olaraq insanın özü də müəyyən dərəcədə özü-özünün
yaradıcısı, allahın verdiyi təbiət materialından yaranan bir varlıq kimi kultur dairəsinə daxil olur və "təhsil",
"tərbiyə" mənalarını özündə əks etdirirdi. Lakin qeyd etmək lazımdır ki, qədim romalıların işlətdiyi "kultura" sözü
elə bir hadisəni ifadə edirdi ki, bəşəriyyət bununla çoxdan tanış idi. Qədim yunanların "texne" sözü (sənət, ustalıq,
incəsənət, daha sonralar isə texnika və s. mənalarda dərk olunmuşdur) romalıların "kultura" sözünün ümumiləşdirici
funksiyasına malik olmasa da, bu söz bəzən elə həmin mənada da dərk edilirdi. "Kultura", yaxud "texne" dedikdə
maddi dünyanı dəyişən, təbii predmetliyin formasını dəyişdirən insan fəaliyyəti nəzərdə tutulurdu. Bunun da əsas
mənası insanın dünyada fəal iştirakı, insanın təbii dünyaya müdaxiləsi, nəhayət, mədəni olanı naturadan ayırmaq
demək idi. Bu baxımdan natura və kulturanın bir-birindən fərqləndirilməsi bəşəriyyətin özünüdərki, özünü
qiymətləndirmə yolunda atılmış birinci addımı hesab olunmalıdır. Həqiqətən, kulturologiya insanın mədəni
mövcudluğunun müxtəlif formalarını əsaslı şəkildə əlaqələndirən və cəmiyyətdə şəxsiyyətin əxlaqi keyfiyyətlərini
hərtərəfli tədqiq edib öyrənən bir elmdir. insanın mədəni mövcudluq formalarının nəzərdən keçirilməsinin tarixi və
nəzəri üsulları kulturologiyada özünün əməli həlli yollarını tapır.
Kulturoloji problemlərin tədqiqində ilk yanaşmalardan biri məhz kulturantropoloji yanaşma olmuşdur.
Onun formalaşması Q.Spenser, E.Taylor, D.Morqan kimi ilk təkamülçülərin nəzəriyyələri ilə başlanmışdır. Həmin
nəzəriyyələrdə tarixi prosesin fasiləsizliyi prinsipinin mütləqləşdirilməsi aparıcı yer tuturdu. Lakin sonralar zaman
keçdikcə mənəvi kulturantropoloji yanaşma metodları formalaşmağa və təkmilləşməyə başladı. Bu kulturantropoloji
yanaşmalar V.Malinovski, K.Levi-Stross, E.Fromm, A.Kreber, F.KIakhon və başqalarının əsərlərində geniş səpkidə
öz əməli həlli yolunu tapdı. Yanaşmalar çərçivəsində bir çox əhəmiyyətli kulturoloji məktəblər və maraq doğuran
müqayisəli və mübahisəli nəzəriyyələr və baxışlar sistemi yaranmağa başladı. (Məsələn, funksionalizm,
strukturalizm və s.) V.Malinovski Radkliff-Braun ilə birlikdə funksionalizmi, kulturoloji fikirdə strukturalist
yanaşmanı isə K.Levi-Stross və M.Fuko inkişaf etdirdilər. Onlar eyni zamanda funksionalizmin də 3 əsas cəhətini
aşağıdakı şəkildə göstərirdilər:
I. Hər bir mədəniyyət bütövdür, tamdır;
2. Hər bir cəmiyyət, yaxud sivilizasiya tipi, hər bir adət, ənənə, yaxud mərasim, sitayiş və yaxud etiqad
mədəniyyət üçün müəyyən həyati cəhətdən vacib tarixi funksiyanı yerinə yetirir;
3. Mədəniyyətin bütövlüyünün saxlanılmasında, onun hər bir elementi əvəzedilməzdir.
Müasir Qərb kulturologiyasında insanların maraq və həyat tərzlərinin öyrənilməsində sosioloji yanaşma və
sosioloji tədqiqat metodları daha geniş yayılmışdır. Görkəmli alimlərdən P.Sorokin, M.Horkheymer, Q. Adorno,
Q.Markuze, Y.Habermas və s. mədəni-tarixi prosesə dair çox mühüm kulturoloji konsepsiyalar irəli sürmüşlər. Bu
cur yanaşmalar sonrakı dövrlərdə də müxtəlif kulturoloq alimlər tərəfindən geniş şəkildə işıqlandırılmış və
kulturologiya elminə yeni-yeni töhfələr vermişdir.
Məlumdur ki, bəşər tarixinin hər bir əsri özünəməxsus, xarakterik və spesifik xüsusiyyətləri ilə
fərqlənmişdir. Bu cəhətlər isə kulturologiya elminə yeni prizmadan və yeni bir müstəvidə baxmağı tələb edir.
İbtidai mədəniyyətin tədqiqatçısı, etnologiyada təkamül cərəyanının banisi, ingilis kulturantropoloqu
Eduard Taylor (1832-1917) öz apardığı sosioloji tədqiqatlarını insan, cəmiyyət və sivilizasiya problemlərinin
öyrənilməsinə həsr etmişdir. Digər xalqların həyatını tədqiq edərkən, o, ilk dəfə olaraq, vəhşilik, barbarlıq və
sivilizasiya pillələri ilə irəliləyən insan mədəniyyətinin obyektiv tarixi inkişaf qanunauyğunluqlarını dərk edib
araşdırmağa çalışmışdır. E. Taylor tarixi prosesin təhlili üçün tipoloji müqayisə və "qalıqlar metodun"dan istifadə
edərək, kulturoloji fikrin inkişafında səbəb və nəticə əlaqələrinin qarşılıqlı təsirini aşkar etmişdir.
Eduard Bernet Taylor öz elmi tədqiqatlarında qeyd edirdi ki, "Mədəniyyətin müxtəlif pillələri tədrici
təkamülün mərhələləri hesab edilə bilər. Onların hər biri keçmişin bəhrəsi olduğu kimi, həm də gələcəyin
formalaşmasında mühüm rol oynayır". E.B.Taylorun bu fikirləri sonralar kulturoloji fikrin inkişafında çox
əhəmiyyətli və önəmli rol oynamışdır.
E. B. Taylor özünün "ibtidai mədəniyyət" (1871) əsərində bəşəriyyətin ilk pillələrində mədəni inkişafı
izləmiş, əldə etdiyi külli miqdarda sənədlər vasitəsi ilə bir çox xalqların mənşəyi, oyun və mərasimləri və bədii xalq
yaradıcılığı elementlərindən geniş istifadə edərək, belə bir məntiqi nəticəyə gəlmişdir ki, bütün xalqlar məişətdə,
adət və ənənədə, dini və poetik yaradıcılıqlarında bir-birlərinə daha çox bənzəyirlər.
Kulturologiya yeni mütərəqqi norma və dəyərlərin formalaşmasına, mədəni varisliyin, mədəni irsin qorunub
saxlanmasına, siyasi plüralizm, fikir azadlığı, hüquqi dövlət və demokratik vətəndaş cəmiyyətinin qurulmasına
kömək edir. Bu elm insanın həyat və fəaliyyətinin təşəkkül tapmasının, inkişafının və qanunauyğunluqlarının
təcrübəsini, onun ideologiyasını vəhşilik, barbarlıq və sivilizasiya dövrlərini keçən, minilliklər boyu insanın əldə
etdikləri nailiyyətləri əks etdirən müxtəlif xüsusi, tarixi və nəzəri biliklərin məcmusudur. Bu gün kulturologiya
elminin ən mühüm problemlərindən biri məhz dünya kulturoloji fikrinin öyrənilməsi, tədqiqi və tətbiqi məsələsidir.
Tarixi tiplər, qanunauyğunluqlar, funksiyalar, nəzəriyyələr, baxışlar və müqayisəli yanaşmalar, sivilizasiya və
mentalitet haqqında məlumatlar kulturologiya elminin əsas istiqamətlərini müəyyənləşdirir. Lakin kulturologiya bu
sosial elmlərdən əsaslı şəkildə fərqli olaraq - insanın və şəxsiyyətin mənəvi tərəflərinin öyrənilməsinə, eyni
zamanda bədii dəyərlərlə elmi təfəkkürün qarşılıqlı əlaqəsinə üstünlük verir, problemin əməli həlli yollarını konkret
olaraq göstərir və cəmiyyətin həyatına tətbiq edir. Bu baxımdan kulturologiya insanın mədəni həyatının və
mövcudluğunun müxtəlif formalarını öyrənən və əlaqələndirən mürəkkəb biliklər sistemidir.
Kulturologiya insanın və bəşəri biliklərin tarixi mövcudluğunun müxtəlif mərhələlərində mədəni davranış
və baxışları öyrənən bütöv elmlər sistemini əhatə edir.
Kulturologiya insanşünaslığa xidmət edən və qloballaşan dünyada cəmiyyətimizin gələcək inkişafı üçün son
dərəcə aktual olan sosial-humanitar elmlərdən ən vacibidir. Bu elm bəşəriyyətin min illərlə yığıb saxladığı,
zənginləşdirdiyi, bir-birinə verdiyi və gələcək nəsillərə çatdırdığı mənəvi sərvətlərin və dəyərlərin öyrənilməsi və
mənimsənilməsi üsulları haqqında bir elm olub, bu mənəvi dəyərlərin quruluşu, ondan istifadə olunması, inkişafı,
fəaliyyəti və s. məsələləri öyrənir. Bu gün insan tərəfindən mədəniyyət fenomeninin kəşfi, onun mexanizminin
açılması, cəmiyyətin intellektual səviyyəsinin daima yüksəldilməsini tələb edir. Bu həm də insanın özünün
cəmiyyətdəki yerinin və rolunun müəyyən edilməsinə, bir mədəniyyətin digərindən fərqlənməsinə kömək edir.
Kulturologiya insanın mənəvi aləmini, şəxsiyyətin müəyyən sosio-kultur rolunu, insanın mədəni
təkmilləşməsi, həyat tərzini, mentalitetini, əxlaqi-mənəvi keyfiyyətlərini və dəyərlərini, insanla elmin qarşılıqlı
münasibətini və s. öyrənir. Bu elm həm də, insanın mədəni varlığı çərçivəsində insan mənəviyyatını öyrənir, bu
aləmin insan üçün hansı rol oynadığını və hansı mahiyyət və məzmun daşıdığını üzə çıxarır. Bu mənada qloballaşan
dünyada kulturologiya Azərbaycan cəmiyyəti üçün olduqca vacibli və zəruri bir elmdir. Bu elm mövcud cəmiyyətdə
yeridilən mədəniyyət siyasətinin əsas prioritetlərini müəyyən edir. Mədəniyyət üçün prioritet olan kulturologiya
elmi bu gün bəşəriyyətin min illərlə yığıb saxladığı, zənginləşdirdiyi və gələcək nəsillərə layiqli səviyyədə
çatdırdığı elə bir mənəvi sərvətlər toplusudur ki, bu toplunu qorumağa isə biz hamımız borcluyuq.
Dostları ilə paylaş: |