Platon və Platon Akademiyası
A.
Platon`un həyatı
Platon ([-428/7]-[-348/7]) Afinada kübar bir ailədə doğulmuş, yaxşı təhsil
almış, musiqi və poeziya ilə, idmanla (güləşən olub) yaxından
maraqlanmışdır. 20 yaşında Sokrateslə yaxından tanış olmaqla həyatının
dəyişdiyi, şeir və incəsənəti rədd edib (yazdığı şeirləri yandırıb) özünü elm
və fəlsəfəyə həsr etmişdi. Siyasi həyatda fəal rol oynamaq, heç olmazsa bir
hökmdar tərbiyə etmək üçün bir neçə cəhdi boşa çıxmışdır. Sokrates
öldürüldükdən sonra Afinanı tərk edib Meqara`ya Euklides`in yanına, sonra
bir müddət Misirə getdiyi, orada riyaziyyat öyrəndiyi deyilir. Dörd il sonra
yenidən Afina`da yaşamağa başlamışdır. “-387”-ci ildə Siciliya və İtaliyaya
(Magna Graecia) səfər etmiş, Sirakuz hökmdarı 1-ci Dionisios`un sarayında
yaşamış, lakin oradan geri göndərilmiş, Afina ilə savaşda olan Sparta
tərəfdarlarına əsir düşmüş, kölə kimi satılmış, onu tanıyan biri tərəfindən
azadlığa çıxarılmışdır.
Qədim Yunanıstanda Platon Akademiyası əslində Afinanın yaxınlığında
(şimalda) yerləşən, idman və müxtəlif festivallar keçirilən bağın adı ilə
bağlıdır. Əfsanəvi qəhrəman Akademus`un (və ya Hekademus adlı nüfuzlu
bir şəxsin, vətəndaşın) adı ilə adlandırılan bu bağın bir tərəfində b.e.ə. 388
və ya 387-ci ildən başlayaraq Platon`un ətrafında cəm olmuş cəmiyyətdə
riyaziyyat və fəlsəfi problemlər öyrədilirdi (2400 il əvvəl!). Pifaqor
məktəbindən fərqli olaraq Akademiya hər kəsə açıq idi. Akademiya ərazi
adı kimi Platon Akademiyasından xeyli əvvəl də vardı, orada gimnazium
fəaliyyət göstərirdi. Platon öz Akademiyasının adını ilk dəfə “Menon”
dialoqunda çəkir. “-366”-cı ildə Platon yenidən Magna Graecia`ya, 2-ci
Dionisios`un sarayına getmiş, siyasi oyunlar nəticəsində hökmdara müxalif
duruma düşərək oranı tərk etməli olmuşdu. “-361”-ci ildə artıq 3-cü dəfə
Dionisios sarayına getmiş, bu dəfə daha da ağır vəziyyətə düşmüş,
yaxınlıqdakı Tarento hökmdarı riyaziyyatçı və filosof Arxitas`ın köməyilə
canını qurtara bilmişdir.
Əslində Akademiyada dərs deyilmir və ya dərs üsulu, yəqin ki, az yer
tuturdu, əsas üsul ortaya məsələ, problem qoyub onu həll etməyə çalışmaq
və dialoq idi (Sokrat metodu); hər halda riyaziyyat kimi dərslərin daha
standart üsulla deyildiyi də şübhə doğurmamalıdır. Platonun əsərlərinin
dialoq şəkli (“Sokrates`in Apologiyası” istisnadır), görünür ki, onun
yazıçılıq istedadı ilə yanaşı (hər dialoq öz ideyası və dramatizmi, maraqlı və
güclü şəxsiyyətləri, ibrətamiz rəvayətləri ilə yadda qalır), həm də
Akademiyadakı müzakirələrlə bağlıdır.Yəqin ki, şifahi danışıqdan yazıya
keçmək üçün də dialoq daha maraqlı görünürdü (Sokrates dialoq aparır,
amma yazmırdı)...
Akademiyada məşğələlər məşq xarakteri daşıyırdı, ruhi çalışmalar əsas yer
tuturdu. Bu, açıq havada və örtülü yerdə baş verə bilirdi. Akademiya
üzvlərinə akademiklər deyirdilər. Platon buradakı intellektual fəaliyyəti
tənzimləyir və ilhamlandırırdı (40 ilə yaxın Akademiyada, yəqin ki, 5-7 il
də ondan əvvəl!?).
Platonun əsərləri küllisi onun bir çox müasirlərindən fərqli olaraq
zamanımıza gəlib çatmışdır. Bunu Platonun böyüklüyü ilə yanaşı, bəlkə
ondan da çox, Platon Akademiyası`nın fəaliyyəti ilə bağlamaq mümkündür.
Eyni fikir Aristoteles`in əsərləri və onun Liseum`una da aiddir.
Platon filosofdur və filosof olduğu qədər də usta yazıçıdır, şairanə dili olan
filosof-yazıçıdır. Zaman keçdikcə, yaşa dolduqca Platonun üslubu daha
nəzəri, daha dəqiq və quru olmuşdur. O, əsərlərinə bir daha nəzər salmış,
fikirlərini dəqiqlışdirmiş və müəyyən dərəcədə dəyişmişdir. “Sokratesin
müdafiəsi”, “Protaqoras”, “Dövlət”in birinci hissəsi kimi əsərlər gənclik
dövrünün, “Qorqias”, “Menon”, “Ziyafət/Simpozium”, “Faidon” və
“Dövlət”in (və ya başqa deyilişdə “Respublika”; yunanca:Πολιτεία/Politeia)
kimilər yetkin çağında, “Parmenides”, “Timaios”, “Qanunlar” kimi əsərləri
isə sonda, yaşlı dövründə yazılmışdır.
Platon fəlsəfənin, demək olar ki, bütün sahələrinə toxunmuş, özündən
əvvəlki filosofların ideyaları üzərində düşünmüş, sistemli nəzəriyyələr
yaratmışdır. Adı Aristokles olan, ancaq enlikürəkli (geniş omuzlu) və ya
geniş alınlı olduğuna görə “geniş” (πλατύς/platis) mənası verən Platon
ləqəbini almış (guya ona bu ləqəbi güləş müəllimi veribmiş) bu filosof
fəlsəfəni əhatə etmək baxımından da (xüsusilə) ən geniş və dərin bir
mütəfəkkirdir (Ad haqqında bu məlumat xeyli sonralar meydana çıxdığı
üçün əsl adın Platon olduğunu müdafiə edənlər də var; Platon yunanlarda
yayılmış bir ad imiş). A.N. Whitehead`ə görə “The safest general
characterization of the European philosophical tradition is that it consists of
a series of footnotes to Plato” (“Avropa fəlsəfi ənənəsinin ən etibarlı ümumi
səciyyəsi onun Platona haşiyələr silsiləsindən ibarət olmasıdır”)
(Alfred
North Whitehead. Process and Reality. N.Y. Free Press, 1979; p. 39).
B. Russell isə
“Həmişə Platonu tərifləmək düzgün hesab olunub, onu başa düşmək deyil”
deyir
(B. Russell, s.113).
O, başa düşmək (Platonun bəzi əsərləri çətin başa
düşüləndir) baxımından haqlı göründüyü halda, Platonun tənqidlərə məruz
qaldığını unutmuş kimi görünür; xüsusi halda Sovet marksist fəlsəfəsi
Platonu və onun carçısı olduğu idealizmi amansızcasına tənqid etmişlər.
Platon kainat haqqında fikirlərində daha çox, yəqin ki, Pifaqor və
Empedokl`dan, əxlaq nəzəriyyəsində Sokrat`dan, riyazi görüşlərində
Pifaqordan, metafizika və dialektikada Heraklit və Parmeniddən
bəhrələnmişdi (?!).
B.
Platonun idealizmi/ideyalar nəzəriyyəsi
Platon maddi dünyanın ikinci dərəcəli olduğunu, gerçəkliyi əks
etdirmədiyini, ideyaların isə əsas mövcudiyyət olduğunu, hər şeyi müəyyən
etdiyini irəli sürən idealizmin carçısıdır. Platon materiallar aləmini deyil,
ideyalar aləmini gerçək sayırdı. Əsas varlıq ruh və ruhun yüksək pilləsi olan
ağıldır. Bədən insanın təbiətini əks etdirmir, bədən ölür, ruh isə ölümsüzdür.
Herakleitos`un “sabit heç nə yoxdur, deməli varlıq da yoxdur” fikrinə qarşı
Sokrates əxlaqi və mənəvi dəyərləri maddi olmayan bir mövcudiyyət, varlıq
kimi təqdim etdi (ədalət, cəsarət, dindar kimi ümumi ideyalar var). Platon
bu baxışı genişləndirib ümumiləşdirdi. O, estetik dəyərləri (gözəllik,
yaxşılıq,..ideyaları), həmçinin elmi anlayışları, birinci növbədə də
riyaziyyatı əsl həqiqi varlıq kimi ortaya qoymuş, riyaziyyatçının
düşüncəsində olan həndəsi fiqur və ədədlərin sabit, dəyişməz və maddi
olmayan gerçək olduğunu irəli sürmüşdür. Gündəlik həyatda rast gəlinən
maddi həndəsi fiqurlar (dairəvi təkər,...) gerçək varlıq deyillər, onlar əsl
riyazi (mücərrəd) fiqurların surətidir (təhrif olunmuş). Çoxluğu təmsil edən
hər şeyin, hər adın (insan, daş, çiçək) ideyası (tək bir ideyası!) var (insan
ideyası, çiçək ideyası). Bu ideya birləşdiricidir. İdeyalar qeyri-maddi,
dəyişməz (əbədi) və hərəkətsizdir, insandan (və hər hansı fövqəlbəşər
gücdən) asılı olmadan mövcuddurlar, onlar insan tərəfindən kəşf edilə
bilərlər. Riyaziyyatçının əsas işi, ideyaları həndəsi fiqurlar və ədədlərdir
(mücərrəd dairə, mücərrəd düzbucaqlı üçbucaq, tək
ədədlər,...).Riyaziyyatçının taxta üzərində çızdığı həndəsi fiqur (çevrə,
üçbucaq) ümumiyyətlə çevrənin, üçbucağın, ideyanın surətidir... Platon
ideal axtarışında riyaziyyata müraciət etdi!
Platon ağılla duyğunu bir-birindən fərqləndirməyə deyil, ayırmağa girişdi!?
Sokrates anlamaq üçün, anlayışların mahiyyətinə varmaq üçün ümumi olana
müraciət edirdi, Platon ümumini daha da qabartdı və bunu xüsusinin
hesabına etdi. İdeyalar əsl, duyğu üzvlərimizlə qəbul etdiklərimiz
(gördüklərimiz,...) fərdi varlıqlar isə onların təhrif olunmuş surəti,
kölgələridir. Bir fərd ölümlüdür, insanlıq isə əbədidir; insanlıq əsl, fərd isə
onun surətidir, var olan insanlıqdır (ideyadır, formadır). Görünən şeylər yox
olacaq, görünməyənlər əbədidir (o cümlədən, bədən müvəqqəti, ruh
əbədidir). Ümumi ad ümumi ideyadır, onu Tanrı yaradıb
.
əslində isə bizim gördüklərimiz yalnız konkret olanlar-fərdlər,
əşyalar, xüsusi adlar deyilmi!?
Duyğularla qəbul etdiyimiz hər şey (məsələn, bir şəxsin gözəlliyi) dəyişir,
hətta yox olur, gözəllik (ideya) isə əbədi və dəyişməzdir. Duyğu üzvlərinin
qəbul etdiyi rəydir, görüntüdür, əsl olanı, yəni biliyi isə ancaq ağıl vasitəsilə
əldə etmək mümkündür (mümkün olsa!). Platon xüsusini ümumiyə qurban
verir –belə demək mümkündür.
Platonun məşhur “Mağara” misalı-əfsanəsini yada salaq (“Dövlət”).
Mağarada əli, qolu, ayağı bərk zincirlənmiş, geriyə və yana heç cür qanrıla
bilməyən, bir-birini də heç görə bilməyən, yalnız öz qabağındakı divarı
görən insanları (mənbusları deyə bilərik) təsəvvür edək. Onların başqa bir
dünyadan xəbərləri yoxdur. Mağaraya giriş uzundur və gündüz işığı
mağaranın içinə çatmır. Bu insanların arxasında –mağaranın ağzından bir
qədər aralıda hündür bir yerdə gur ocaq alovlanmaqdadır. Bu ocaqla
insanların arasından (insanların arxasından) keçən yolla başında müxtəlif
əşyalar daşıyan bir dəstə adam addımlayır. Mağaradakı insanlar öz
qarşılarındakı divarda nə görürlər? Ancaq ocağın işığının əmələ gətirdiyi
kölgələri - arxadakı yolla hərəkət edənlərin kölgələrini. Addımlayan
adamların səsi məhbusların qulağına qarşıdakı-gördükləri divardan əks-səda
olaraq çatır. Ömür boyu ancaq bu kölgələri görməyə və bu əks-sədanı
eşitməyə alışmış mağara sakinləri gözləri ilə gördüklərini-kölgələri, təbii ki,
gerçək şey, əks-sədanı da gerçək səs hesab edirlər. Əslində isə onlar gerçək
varlıqları deyil, ancaq gerçək varlıqların – yolla gedən adamların təhrif
olunmuş əksini-kölgələri görürlər. Əgər bu məhbuslardan biri zəncirdən
azad olsa, geriyə dönüb baxsa, alovdan gözləri qamaşacaq və ağrıyacaq,
özünü itirəcək, heç nə başa düşməyəcək, əvvəlki-alışdığı-anladığı vəziyyətə
qayıtmaq istəyəcək. Onu bayıra çıxarsalar, işıqdan gözü tutulacaq, yenə heç
nə başa düşməyəcək. Uzun müddət Yer üzündə qalsa, ona yad olan bu
dünyanı müəyyən dərəcədə anlasa və mağaraya qayıtsa (ilk əvvəl qaranlıqda
gözü tutulacaq), o, vəziyyəti heç dəyişməmiş məhbuslara nə danışacaq? Yer
üzündə gördüklərini...və məhbuslardan heç kim onu başa düşməyəcək,
məhbuslar görüntü olaraq ancaq kölgələri və səs olaraq əks-sədanı qəbul
edirlər. Beləliklə, insanların başına gələnlər, onların təcrübəsi əsl, yəni
gerçək deyil, onların düşündükləri, anladıqlarıdır.
Platon Pifaqorçu idi. Yaradıcılığının son dövründə ədədlərin hər şeyin
kökündə dayanması, hətta hər şeyin ədədlərdən ibarət olması görüşü özünü
göstərmişdi. Platon Pifaqorçuların hər şey ədəddir və ya fiziki əşyalar
ədədlərin “təqlid”idir kimi fikirlərini fiziki əşyalar ədədlərdən “pay
almışdır” kimi özününküləşdirmişdi.
C.
Yaradıcı Demiorqos (Tanrı!?) və Kainat
İdeyalar və kainatı (İdeyalara baxıb) yaradan ağıllı sənətkar, memar, usta
(Demiurq/Demiorqos) həmişə var olmuşlar, duyğularla dərk edilən
“yaradılmış şeylər arasında onların ən gözəli” olan Kainat, göründüyü kimi,
əbədi deyil, bir zaman yaradılmışdır. Demiorqos, yəni Tanrı xeyrxahdır.
insan bunu necə bilir? xeyrxahlığı kim müəyyən edir? insanlar
xoşlarına gələni və ya faydalı olanı xeyir/yaxşı saymırlarmı?! elmi
həqiqəti isə, xoşa gəlinməsə də, qəbul etməli olurlar, çünki ortada
təcrübə və nəzəri sübut var.
Demiorqos kainata ağıl və ruh vermişdir (əvvəl ruhu yaratmış, ona ağıl
vermiş, sonra bədəni yaratmış, bədənə ruh vermişdir). Tək bir dünya var
(Kainat vahid və əbədidir!), Demiorqos “bütün canlı varlıqları içinə alan
gözlə görünən tək bir canlı varlıq yaratmışdır”. Bu halda Platon, deyəsən,
yunan ənənəsinə uyğun olaraq, kainatın bir (həmişə var olan) xaosdan
nizamlı hala gəlməsini nəzərdə tutur, Demiurq qaydasız, qarışıq dünyanı
nizama salır (yəni heçdən yaratmır). Kainat müəyyən nisbətdə götürülmüş 4
ünsürdən yaradılmışdır (bu fikir Platon`da dumanlıdır, 4 element heç də ilk,
başlanğıc elementlər deyillər!? Bax: Platon və riyaziyyat). Kainat
mərkəzində Yer dayanan kürə (ən mükəmməl fiqur) şəklindədir, sonludur.
Kainat hərəkət edir, bu, öz oxu ətrafında müntəzəm fırlanmaqdan ibarətdir.
Beləliklə, Platon öz tələbəsi Aristoteldən fərqli olaraq kainatı tərkib və
xassə etibarilə iki fərqli hissəyə ayırmır; o, sadəcə, səma cisimlərinin oddan
yaradılmış olduğunu deyir. Göylər və zaman eyni vaxtda yaradılmış,
Günəşin yaradılması gecə və gündüzün əmələ gəlməsi və növbələşməsinə
gətirib çıxarmış, bu isə saylara (hesaba) və son nəticədə fəlsəfənin
yaranmasına səbəb olmuşdur.
Planetlər sferalara bərkidilib və bu sferalar öz planetləri ilə eyni rəngdədir.
Sferalar arasındakı məsafə bir oktavadır, hər sfera üzərində bir sirena
əyləşib və o “öz” musiqisini, öz havasını çalır. Ay ən sürətlə, Günəş, Venera
və Merkuri eyni sürətlə fırlanırlar (digər planetlər müxtəlif sürətlə, Yerdən
uzaq olduqca daha yavaş sürətlə dövr edirlər), amma Venera və Merkuri
Günəşin tərsi istiqamətində fırlanırlar və bu səbəbdən də ona çatır və onu
ötürlər (“Timaeus”). Bütün səma cisimləri (onların ruhu var) müntəzəm
dairəvi hərəkət edirlər. Onların Yerdən olan məsafəyə görə düzülüşü belədir
(yaxından uzağa): Ay, Günəş, Venera/Afrodita, Merkuri/Hermes, Mars/Ares,
Yupiter/Zevs, Saturn/Kronos və ulduzlar sferası (“Dövlət”, sonuncu fəsil;
yunan adlarına sonrakı Roma adlarını əlavə etmişik – H.İ.).
Şəkil.
Platonda
planetlər Babillərdə olan adların tərcüməsidir, yəni uyğun allahların adını
daşıyırlar.
Demiorqos əvvəlcə insanın başını (ağlın yeri olduğu üçün yuxarıdadır və
kürəşəkillidir!), sonra gövdə, əl, qol və ayaqlarını, sonda üzündəki duyğu
orqanlarını yaratmışdır. Qeyd edək ki, Platon da Empedokles kimi görməni
gözdən çıxan şüaların baxılan obyektə çatması ilə izah edirdi (Platon:
Timaios)
Platon`un din anlayışı dövlətin nəzarət etməli olduğu cəmiyyətin inancı ilə
bağlıdır. Dinsizlik dövlətə qarşı günah, xəyanət kimi qiymətləndirilməlidir.
Tanrılar var, xeyrxah və ədalətlidirlər – doğru inanc budur, vətəndaş bunu
tam qəbul etməlidir. Fizik filosoflar hər şeyin əsasında təməl maddə və ya
maddələr qoyduqları üçün tanrılara xüsusi yer və rol qalmır. Sofistlər əxlaqı
təbii olmayan, süni bir şey kimi şərh etdiklərinə görə mənəviyyat aləmində
tanrılara yer saxlamamışlr. Bu qədər bir-birinə uymuş hissələrdən ibarət
olan, nizamı, agəngi olan Kainat bir təsadüfün nəticəsi ola bilməz, burada
ağıllı bir fövqəlgüc işə qarışıb, gözəl bir əsər ortaya qoyub (teleoloji sübut;
filosoflar kosmoloji və ontoloji sübutlar da irəli sürmüşlər). Hərəkət hər
şeyin təməlində dayanır, hər cür hərəkət ruha aiddir, deməli ruh maddi
olandan əvvəldir. Pis ruhlar da var (ruh ağılsızlıqla birləşə bilir). Lakin
bütövlükdə kainata xas olan mükəmməllik yaxşı/xeyir ruhla (ən yüksək
ruhla-Tanrı ilə) bağlıdır. Platon təktanrıçı deyil, amma ən mükəmməl ruhun
sahibi olan bir Tanrıdan da bəhs edir. Bəs ədalətsiz görünənlər nədir, niyə
onlar mövcuddur (Tanrı xeyrxahdırsa)? Platon bütün olanın öz bəzi
hissələrində fərqli görünə biləcəyini iddia edir, yəni ayrılıqda yaxşı
görünməyən şey fərdi duyğudur, bütün isə yaxşıdır (yağış bəzi yerlərə və
insanlara zərər vura bilər, bütövlükdə isə yağış zəruridir, yaxşıdır).
D.
Bilgi və ruh
Platon bilginin tərifi üzərində düşünərkən bilginin həmişə var olan, insandan
daha uzunömürlü təbiətə malik olmasına çalışmalıydı (Heraklitos`un hər şey
dəyişir və sabit heç nə yoxdur fikrinə qarşı). Bilgi ruh və ya ağılda
üstüörtülü, gizli mövcud olan şeylərin xatırlanmasıdır. Bilgi insanda
(ruhunda) var olan, ancaq bilincində, şüurunda olmayan bilginin
xatırlanmasıdır. Ruh ölümsüzdür və yenidən doğulur (dəfələrlə). Sokrates
ruhun ölümsüzlüyü məsələsinin və ümumiyyətlə, ruhun təbiətini anlamağın
çox çətin olduğunu qeyd edir – “Phaidon”. Başqa sözlə desək, insan
bilmədiyi sandığı şeyləri əslində bilir, yəni insan doğulanda onda bilgi var
və öyrənmə bu bilginin xatırlanmasıdır.
Platon əvvəlki “bədən ruh üçün zindandır” fikrini sonralar xeyli
yumşaltmışdı, bədəni müəyyən dərəcədə ruhun tabeçiliyinə vermişdi
(Timaios). Bədənin ölməsi ruhu azad edir (Faidros). İlahi varlıqlar olan
səma cisimlərinin, kainatın özünün də ruhu və ağlı var (sonuncuya “aləm
ruhu” deyir). Platon “Timaios” dialoqunda daha bir qəribə fikir irəli sürür
(bu dialoqda nəyin ciddi, nəyin rəvayət olduğu yaxşı aydın olmur): insanın
iki ruhu var, biri ölməzdir və insanın başında yerləşir, digəri ölümlüdür və
sinədə (ürəkdə?) yer alır.
Platon eşqi, bu ilahi və ya mistik həyəcanı sevilənin üstün və xoşbəxt
olması, sevənin isə yoxsul, qeyri-xoşbəxt, o üstün və xoşbəxt olana
qovuşmaq, yoxsulluğu atıb zənginliyə qovuşmaq istəyi, gözəlliyə çatmaq
arzusu ilə tərif və izah edir.Yəni eşq gözəl olanı əldə etmək və ya yaratmaq
və bu yolla xoşbəxt olmaq arzusudur. Eşq ölümsüzlük istəyidir, uşağın
doğulması ata və ana ömrünün uşağın timsalında uzanmasıdır, davam
etməsidir. Bilik sevgisi, elmdəki möcüzəli gözəlliyə qovuşmaq bəlkə daha
güclü eşqdir; bu, ölümsüzlük gətirə bilir (Platon: “Simpozium”/Ziyafət).
Platon Sokrates`in dili ilə belə bir fikir irəli sürür: əsl biliyə qovuşmaq üçün
ağıl bədəndən ayrılmalıdır, bədən öz istəkləri ilə mane olur (“Fedon”).
Deməli əsl biliyə ancaq öləndən sonra çatmaq mümkündür. Bu, həmçinin
təmizlənmə, saflaşmadır. Əsl filosofun ruhu ölümdən sonra azad olub
gözəgörünməz dünyaya, tanrıların yanına yollanır. Digər insanların ruhları
heyvanların bədəninə daxil olur (yaxşı ruhlar yaxşı heyvanların-arı, qarışqa
kimi, pis ruhlar canavar, eşşək kimi heyvanların bədəninə daxil olurlar).
Platon ruhları ölümdən sonra fərqli yerlərə də göndərir, uyğun olaraq
göylərə, təmizləyici yerə və cəhənnəmə (“Fedon”). Tənbəl və pis kişilərin
ruhu qadınlara, astronomiyanı riyaziyyatsız öyrənməyə çalışanların ruhu
quşlara, fəlsəfədən uzaq düşənlərin ruhları yer üzərindəki vəhşi heyvanlara,
ən səfehlərin ruhu balıqlara keçəcək (“Timaeus”).
E.
Platon`un siyasət fəlsəfəsi və ya ideal dövləti/utopiyası
Platon böyük, nəhəng siyasət filosofudur. Pelopennes savaşının,
cəmiyyətdəki qarşıdurmaların, sofist təliminin nəticəsində “dövlət siyasəti
necə olmalı”, “hökmdar necə olmalı” kimi suallar Platonu hərtərəfli bir
siyasət fəlfəfəsi və onun nəticəsi ola bilən ideal dövlət nəzəriyyəsi üzərində
düşündürürdü, bu iş əslində onun həyat məsələsinə çevrilmişdi. “Platon`un
öz Akademiyasını qurmasının mühüm bir səbəbi məhz onun siyasət
adamları yetişdirmək proqramı ilə bağlı idi.
Tək siyasi deyil, bir çox fəlsəfi (o cümlədən əxlaqa aid) problemlərin yer
tutduğu “Dövlət” əsərində, eləcə də sonra gələn “Dövlət adamı” və
fikirlərini yenidən təftiş edib nizama saldığı “Qanunlar”da öz siyasət
fəlsəfəsini sistemli şəkildə inkişaf etdirmişdir. “Timaeus” adlı qarışıq və
mürəkkəb dialoqunda “Dövlət” əsərinin bir hissəsinin xülasəsini verir.
Platon öz siyasət fəlsəfəsində açıq-aşkar şəkildə Sparta`nın dövlət
sistemindən ilham almışdı. Ümumiyyətlə, yunanların çoxu Sparta`nı qayda-
qanunu yerində olan, sabit, əski zamanların dəyərlərini qoruyub saxlayan
dövlət-şəhər kimi görürdülər. Vətəndaşlarının əsas məşğuliyyəti savaş
sayılan Sparta aşağı-təhkimli təbəqəni (ilotları) istismar edir, bəzən cismani
cəhətdən məhvə qədər hərəkət edə bilirdi. Qızıl-gümüş qadağan olunmuşdu,
dəmir puldan istifadə olunurdu. Sparta idarəetmə sistemi demokratik
ünsürlərlə tamamlanmış dörd pilləli aristokratlıqdan ibarətdi (1. müxtəlif
nəsillərə mənsub olan iki hökmdar; 2. kübarlardan ömürboyu seçilmiş
Ağsaqqallar Şurası –hökmdarlarla birlikdə 30 nəfərlik; 3. Xalq Toplantısı
(bütün vətəndaşların iştirakı!) – qanunlara səs vermə; və nəhayət, 4.
hökmdarlara nəzarət edən çağdaş konstitusiya məhkəməsinə bənzər 5
nəfərlik qurum-eforlar vardı). Evlənmə və ailə, uşaqların tərbiyəsi, dövlətin
idarəedilməsi kimi məsələlərdə Platon Sparta misalından bəhrələnmişdi.
Spartada uşaq və gənclərin tərbiyəsi və xüsusi məktəblərdə təhsili əsasən
sağlam savaşçı yetişdirməkdən ibarət idi. Qız-qadınların vəziyyəti və
hüquqları da oğlan və kişilərə bənzəyir, digər yunan şəhər-dövlətlərindən
kəskin dərəcədə fərqlənirdi. Plutarx da Spartanı tərənnüm edir, onun
kommuna tipli ümumyaşayış qaydalarını təsvir edirdi. Aristotel (“Politika”)
Sparta`ya düşmən münasibətdə idi, Sparta`nın böyük qüsurlarından,
görünəndən qat-qat pis olduğundan (qadınlara çox hüquq verildiyindən?!)
bəhs edirdi.
Platon`a görə (“Dövlət”) dövlət əməyin ictimai bölgüsünə, ixtisaslaşmağa
ehtiyacdan yaranıb. İlk cəmiyyətlər pozulmamışdı, qanunlar və dövlət
yoxdu. Amma get-gedə insanların istəkləri artmış, ixtisaslaşma da artmış,
anlaşılmazlıqlar, narazılıqlar artmış, savaşlar başlamışdı. Savaşanlara,
idarəedənlərə ehtiyac artmışdı. Cəmiyyətə kənardan dan hücum təhlükəsi
olduğuna görə qorunmaq da həyati vacib işə çevrilir. Demokratiya çoxluğun
ağılsızlığıdır, ata uşaqlarından, müəllim şagirdlərdən, kişilər qadınlardan
qorxurlar (Platon`un sevimli müəllimi Sokrates`i demokratiya öldürmüşdü).
Tək demokratiya deyil, tiraniya, eləcə də zənginlərin və ya hərbçilərin
hakimiyyətinə əsaslanan dövlət tipləri insanların təbii bərabərsizliklərinə
əsaslanmadığı üçün təbii deyillər.
İdeal dövlət üç zümrədən ibarət olmalıdır: filosoflar idarə etməli, hərbçilər
qorumalı, sənətkarlar və əkinçilər maddi nemətlər yaratmalıdırlar. Bu halda
hərə öz işi ilə məşğul olub başqasının işinə qarışmır – bu, ədalət deməkdir
(?!). Tanrı idarəedənlərin ruhunu qızıldan, hərbçilərinkini gümüşdən,
sənətkarlar və əkinçilərinkini isə mis və dəmirdən düzəltmişdir – insanlara
bunu daim aşılamaq lazımdır, onlar əvvəl-axı buna inanacaqlar. Platon ideal
dövlətdə qızıl və gümüşün işlənməsini qadağan edir. Filosoflara hörmət
edilməməsini Platon cəmiyyətin müdrik olmamasında görür (Sokrates`in
dili ilə “Dövlət”də).
Bu dövlət incəsənət və ədəbiyyatı təftiş etməli, pedaqoji cəhətdən ziyanlı
olanları qadağan etməli, öz incəsənətini yaratmalıdır. Uşaqlara bədən təlimi
və ruh təhsili (ədəbiyyat, musiqi və incəsənət – yəni geniş mənada
mədəniyyət) verilməlidir. Musiqi cəsurluğa səsləyən olmalıdır.
İdarəedənlərin təhsilində isə riyaziyyat və fəlsəfə əsas yer tutmalıdır.
Tanrılar və qəhrəmanları zəif və qüsurlu göstərmək olmaz. Bu baxımdan
hamını, bütün şairləri, o cümlədən Homeri təftiş etmək, senzuradan
keçirmək və ya qadağan etmək lazım gəlir; uşağın tərbiyəsini pozan, onda
qorxu hissi yaradan və ya onu sentimental edən hər şey yaramazdır, hər
şeydə ölçünü gözləmək lazımdır. “Dövlətimizə Homer muza`sını buraxsaq,
qanun və loqos əvəzinə həzz və əzab meydan alar”. Aristokratları
aşağılayan əsərləri oxumaq və ya tamaşaya qoymaq olmaz.
İdarəedənlər/filosoflar və hərbçilər üçün özəl mülkiyyət yoxdur, özəl
mülkiyyət həsəd və düşmənçilik hissi yaradır. Onlar bir yerdə yaşamalı, bir
yerdə yeməlidirlər. Maddi nemət yaradanların mülkiyyəti ola bilər, amma
onların həddindən çox zənginləşməsinə və yoxsullaşmasına yol vermək
olmaz. Bəzi fikirlərin təkcə idarəedənlərə, yoxsa hərbşilərədəmi aid olduğu
qaranlıq qalır.
Ailənin təşkili də (gərək ki, idarəedənlərdə; hərbçilərdə bir sıra məsələlər
aydın deyil) daxil olmaqla hər şey dövlətin əlində olmalıdır. Kişi-qadın
əlaqələri də tənzim olunmalıdır - yaxşılar yaxşılarla, zəiflər zəiflərlə
(hökumətin tövsiyəsinə etiraz etmək olmaz). İdarəedən kişi və qadınlar ailə
qurmamalıdırlar, qadınlar bir kişiyə məxsus ola bilməzlər. Qızlar da oğlanlar
kimi tərbiyə olunmalıdırlar. Qadınlar idarəetmədə kişilərlə eyni hüquqa
malikdir, qadınlar idarəedən də, hərbçi də ola bilərlər. Valideyn uşağını,
uşaq valideynini tanımamalıdır. Özəl mülkiyyət kimi özəl ailə də insanlar
arasında qısqanclıq hissi və hirsi yaradır, cəmiyyəti parçalayır. Uşaqlar
ümumidir. Dövlət vətəndaşların tərbiyəsi ilə məşğul olmalıdır, uşaqlar
xüsusi təhsil-tərbiyə sistemi ilə yetişdirilir, istedadından asılı olaraq uşaq bir
zümrədən digərinə (aşağı və ya yuxarı) keçirilə bilər. Zəif doğulmuş uşaqlar
cəmiyyətə lazım deyil (gizlədilsin, yox edilsin). Qadınlar 20-40, kişilər 25-
55 yaş arasında evlənəndə qanuni sayılır, uşaqları ola bilər. Əks halda onlar
azaddırlar, amma uşaq olmamalıdır.
Platon sonra yazdığı “Qanunlar” əsərində bu “mükəmməl dövlət
nümunəsini”, ideal dövlət utopiyasının mütləqliyini xeyli yumşaltmışdı.
Məsələn, mülkiyyət və qadın ortaqlığını aradan qaldırmış, mülkiyyətin
istifadə üçün xalqa paylanmasını, filosof olmayan dövlət başçısının filosof
müşavirə ehtiyacını irəli sürmüş, yaxşı dövləti səciyyələndirən kəmiyyət
analizləri aparmış, çoxsaylı bürokratik işlərin təsvirini və təsnifatını
verməyə çalışmış, sənət adamlarına qarşı senzuranı tövsiyələrlə əvəzləməyi
mümkün saymışdı. Insanlar ilk cəmiyyəti əmələ gətirmələrində tək ehtiyac
deyil, insanların bir-birinə olan sevgisi də rol oynamışdı (xüsusilə sayları az
olanda). Xüsusi mülkiyyət və sərbəst ailə siyasəti, siyasi hüquqların zümrə
üzrə deyil, əmlakın dəyərinə uyğunlaşdırılması, əkinçiliyin qullara aid
edilməsi, fərqli-qarışıq siyasi quruluşların mümkünlüyü qeyd və qəbul
edilmişdi. Platon ədədlərə sevgisini ideal dövlətdə/şəhərdə əhalinin sayı
5040 (=1∙2∙3∙4∙5∙6∙7) olmalıdır deyə bildirmişdi (“Qanunlar”).
Platon öz ideal dövlətinin bir utopiya olduğunu anlasa da, keçmişdə və ya
gələcəkdə “gerçək filosoflar dövlət başına gəlmişlərsə və ya gələcəklərsə”,
”belə bir şeyin olması imkansız deyildir”. İdarəedən filosof çox ciddi təhsil
almış, sağlam bədən və sağlam ruha sahib, ağıl, xarakter və əxlaq cəhətdən
yüksək olmalıdır.
Platonun ideal dövləti Sovet İttifaqındakı vəziyyətdən qat-qat çox
mərkəzçi olmaqla, faşist elementləri olan bir quruluşa daha çox
bənzəyir.
İdeal olmayan, yəni nöqsanlı, qüsurlu dövlətlər dörd növdür (yaxşıdan pisə
doğru): şərəf dövləti, zənginlik dövləti (oliqarxlıq və ya plutokratlıq), xalq
dövləti (demokratlıq) və zorbalıq dövləti (tiranlıq).
Şərəf dövləti savaşa, ruh deyil, bədən tərbiyəsinə, şan-şöhrətə önəm verən
dövlətdir, aristokratik dövlətin bir qədər pozulmuş şəklidir. İdarəedən siniflə
çalışanlar arasındakı ziddiyyətlər (çalışanlar üsyan edər, idarəedənlər üsyanı
yatırdar), idarəedənlərin çalışanların hesabına zənginləşməsi nəticəsində
şərəf dövləti zənginlik dövlətinə çevrilər. Böyük sərvətə sahib kiçik azlığın
dövlətində “doğruluğun və doğru insanların şərəfi azalır”. Bu dövlətdə
əksəriyyət çox yoxsuldur, dilənçi kökündədir. Bu əksəriyyətin zənginlərə
nifrəti inqilabla nəticələnəcək və xalq dövləti qurulacaq. Hər kəs azaddır, nə
istəsə danışır, qabiliyyəti olmayan da dövlət işinə girə bilir, filosoflar dövlət
işindən kənarda qalırlar, qarşıda fəlakətlər durur. Bu başsız azadlıq, hərc-
mərclik, əxlaqın pozulması böyük nizamsızlığa, xaosa səbəb olur. Bir tiran
meydana çıxıb “xalqımı xilas edəcəm” deyir, etibar qazanır, silahlı güc əldə
edir (xalqı qorumaq üçün), xoşuna gəlməyən hər kəsin axırına çıxır, zorbalıq
dövləti yaranır.
Qanunlar cəmiyyətdəki dəyişmələri özündə əks etdirə bilmir, ona görə
başçı-filosofun qanunları hər zaman dəyişdirmək haqqı olmalıdır. Lakin
hakimiyyət başında hər zaman yanılmaz filosof olmur (olsa, ideal olardı), bu
səbəbdən yazılı qanunlara əsaslanmaq lazım gəlir. Ümumiyyətlə, qanunlara
əsaslanan pis hökumət belə qanunlara əsaslanmayan hər hansı hökumətdən
daha yaxşıdır. Məsələn, bir başçı dövləti qanunlar əsasında idarə edirsə
(monarxiya), bu, tək adamın qanunsuz idarə sistemindən (tiranlıq) yaxşıdır;
eynilə, azlığın qanunlarla idarə etdiyi aristokratlıq sistemi azlığın
qanunlarsız idarəetdiyi oliqarx sistemindən yaxşıdır. Qanunlara uymayan
rejimlərin içində yaxşısı (nisbətən) demokratik olandır (“Dövlət adamı”).
Əsl müdrikləri tapmaq və hakimiyyəti onlara vermək praktik olaraq
mümkün deyil, B. Russell bunu demokratiyanın digər quruluşlardan üstün
olduğunun sübutu olaraq qəbul edir (səh. 115).
Platonun fərd cəmiyyətin üzvi parçasıdır deməsi, insanın öz hissələrinin
üzvi birləşməsindən ibarət olması kimi bənzərliyə baş vurması mühafizəkar
və hətta təhlükəli görünür. Əslində fərd cəmiyyətin tam üzvi parçası deyil,
fərdin öz dünyası, düşüncələri, hətta var olduğu cəmiyyətdən başqa, fərqli
cəmiyyətə keçmək imkanı və hüququ var...
Platondan sonra ideal dövlət haqqında çoxsaylı utopik əsərlər
yazılmış, proqramlar irəli sürülmüşdür. Bu maraqlı görünsə də,
ədəbiyyata göndərməklə kifayətlənirik.
(Bax: 1. Игорь Шафаревич.
Социализм как явление мировой истории. Москва, “Эксмо», 2003. 2.
Утопический социализм. Хрестоматия. Москва, Издательство
политической литературы, 1982. 3. İbn Tufeylin və Nizami Gəncəvinin
uyğun əsərləri)
F.
Platon və riyaziyyat
Platon Akademiyasının qapısı üzərində “həndəsəçi olmayan girə bilməz”
(“həndəsədən başı çıxmayanlara giriş qadağandır”) yazılmışdı. Əslində bu
fikir Platonun akademiyaya başçılıq etməyə başladığı zamandan təqribən
yeddi əsr yarım keçdikdən sonra ortaya atılmışdır (Diogenes Laertius); bunu
tam təsdiqləmək olmur. O, ideal dövlət başçısının hesab, həndəsə və
astronomiyanı öyrənməsini zəruri sayırdı (“Dövlət”). Platon Sokratesin dili
ilə həndəsənin vacibliyindən söhbət açır, ona heç cür biganə qalmaq olmaz
deyir (həyati nəticəsi çox böyük olmasa da); “gəlin astronomiyanı,
həndəsədə olduğu kimi, məsələ həlli vasitəsilə öyrənək, göyləri isə öz
başına rahat buraxaq”.
Platon mücərrəd təfəkkürün, nəzəriyyənin vacibliyini nümayiş etdirməklə
təbiətşünaslığı riyaziləşdirmək proqramının həyata keçirilməsində böyük rol
oynadı (ənənəyə görə Pifaqordan sonra). O, müşahidəni, sınaqları deyil,
riyazi modelləri əsas araşdırma mövzusu sayırdı. Əsl astronomiya müşahidə
ilə deyil (görünən və müşahidə olunanlar mükəmməl deyil), müşahidə
olunanların arxasında dayanan gözəl və mükəmməl riyazi səmanın riyazi
öyrənilməsi ilə məşğul olmalıdır. Paradoksal olan budur ki, Platon özü
kainata poetik nəzərlə baxmışdır, onun kainata tətbiq etdiyi riyazi model
əslində mif səviyyəsinə qalxır (“Dövlət”, “Timaeus”).
Platon riyaziyyatçılara ilham (və ideya?) verirdi. Beş düzgün çoxüzlülər və
ya requlyar cisimlər Platonun şərəfinə Platon cisimləri adlandırılır.
Platon yaşlı vaxtında yazdığı və Pifaqorçu baxışlar üzərində qurulan məşhur
“Timaeus”in sonuncu hissəsində- kosmoloji, fiziki, riyazi, bioloji hissədə
kainatın əsasında duran dörd təməl elementlərlə düzgün çoxbucaqlılar
arasında əlaqə yaratmağa çalışmışdır (“onun içində, başqa əsərləri ilə
müqayisədə, əlbəttə ki, sadəcə daha çox səfeh şeylər var”. B. Russell, səh.
148). Platona görə dörd təməl elementin hər biri özünəməxsus formaya
malik hissəciklərdən təşkil olunub, biz o hissəcikləri çox kiçik olduqları
üçün görmürük. Torpaq kublardan təşkil olunub; kub beş düzgün çoxüzlülər
içində ən dayanıqlı olanıdır, ələ alanda yapışıb qalır, hər üzü kvadratdır və
Yerdə asan oturur, rahat yan-yana düzmək/döşəmək mümkündür. Su, hava
və od hərəkətlidirlər, müqayisədə alov ən hərəkətcil, hava orta hərəkətcil, su
onlardan az hərəkətcildir. Od tetraedrlərdən, hava oktaedrlərdən, su
ikosaedrlərdən təşkil olunub. Tetraedr-od ən itibucaqlı, itiuclu (deşir,
yandırır), oktaedr-hava orta itiuclu, ikosaedr-su az itiucludur. Od hissəcikləri
ən kiçik, havanın hissəcikləri orta böyüklükdə, su hissəcikləri ən
böyükdürlər. Platon 5-ci düzgün çoxbucaqlını-dodekaedr`i Tanrı seçimi ilə
şərəfləndirir, nümunə sayır, göyləri təşkil edən hissəciklərin mükəmməlliyə-
sferaya ən yaxın olan dodelkaedrlərdən ibarət olduğunu deyir. Platon
burada, müəyyən mənada, öz atomçu nəzəriyyəsini irəli sürür, bu beş
düzgün çoxüzlülərin səthlərinin bəlli sayda düzbucaqlı üçbucaqlardan təşkil
olunduğunu xüsusi qeyd edir (məsələn, kubun səthi 24 düzbucaqlı
üçbucaqdan ibarətdir); yəni, Platon`un atomları əslində düzbucaqlı
üçbucaqlardır. Platon burada sanki riyaziləşmiş Homer və Hesioddur!
Platon Kainatı və bioloji/fizioloji prosesləri Platon üçbucaqların
bioloji/fizioloji xassələri ilə izah edir...Platon`un mifik xarakter daşıyan bu
və buna bənzər fikirləri birqiymətli deyil və müxtəlif cür şərh olunur.
od torpaq hava göy su
tapılır: x=b(1+√5)/2. “Ən gözəl nisbət” isə x:b, yəni (1+√5)/2 -ə bərabərdir.
Platonun “ən gözəl” (fairest) nisbəti sonralar “qızıl nisbət” və ya “qızıl orta”
adını aldı, riyaziyyatdan daha çox incəsənətdə işlənildi.
Platon cisimləri/Platonic Solids
V + F – E = 2 . V-vertex, F-face, E-edge
od torpaq hava göylər su
Dostları ilə paylaş: |