1
AZƏRBAYCAN RESPUBLİKASI MƏDƏNİYYƏT VƏ TURİZM
NAZİRLİYİ
F. KÖÇƏRLİ ADINA RESPUBLİKA UŞAQ KİTABXANASI
ELMİ-METODİKA ŞÖBƏSİ
Məhsəti Gəncəvinin 900 illik yubileyi
münasibəti ilə
Dünya şöhrətli rübailər ustası Məhsəti Gəncəvi
metodiki vəsait
B A K I – 2 0 1 3
2
Tərtib edəni:
Ruhiyyə Məmmədli – F.Köçərli adına Respublika Uşaq
Kitabxanası elmi-metodika şöbəsinin baş kitabxanaçısı
Redaktor:
Fizurə Quliyeva – F.Köçərli adına Respublika Uşaq
Kitabxanasının direktoru
3
Tərtibçidən
Azərbaycan poeziyasının tanınmış nümayəndəsi Məhsəti Gəncəvinin
ədəbiyyatımız tarixində özünəməxsus yeri vardır. Şairənin ədəbi şəxsiyyəti Şərq
qadınının fikir və mənəvi azadlığının parlaq təcəssümü kimi Qərb şərqşünaslarının
əsərlərində çox yüksək dəyərləndirilmişdir. Məhsəti Gəncəvinin yaradıcılığının
900 illik yubileyi YUNESKO-nun görkəmli şəxsiyyətlərin və əlamətdar
hadisələrin qeyd olunması proqramına daxil edilmişdir. 9 əsrdir Məhsətinin hər biri
çiçək kimi sevimli, həyat şövqü ilə dolu rübailəri nəsil-nəsil insanlarımızın
zövqünü oxşayır, ruhunu təzələyir. O, şeirləri, xüsusilə fəlsəfi dərinliyi ilə seçilən
rübailəri ilə oxucularda həyata məhəbbət oyadır, onları nikbinliyə, dünyanın
gözəlliklərindən ilham almağa çağırır. Azərbaycan poeziyasının inkişafına töhfələr
vermiş şairə Məhsəti Gəncəvinin yaradıcılığının 900 illik yubileyi Azərbaycan
Respublikasının Prezidenti İlham Əliyevin sərəncamına əsasən kitabxanalarda və
məktəblərdə bu münasibətlə tədbirlər keçirilir, metodik vəsaitlər hazırlanır.
Bu vəsaiti Məhsəti Gəncəvinin 900 illiyi münasibətilə sizə təqdim edirik.
Vəsaiti sizə təqdim etməkdə əsas məqsədimiz oxucuların Məhsəti Gəncəvi
haqqında olan məlumatlarını daha da artırmaqdır. “Dünya şöhrətli rübailər
ustası Məhsəti Gəncəvi” adlanan metodik vəsait “Giriş” və “Keçiriləcək
tədbirlər” hissəsindən ibarətdir. Vəsaitin “Giriş” hissəsində Məhsəti Gəncəvinin
həyat və yaradıcılığından söhbət açılır. Vəsaitin ikinci hissəsində kitabxanalarda
keçiriləcək tədbirlərdən bəhs olunur.
4
Məhsəti Gəncəvinin yaradıcılığının 900 illik yubileyinin keçirilməsi haqqında
Azərbaycan Respublikası Prezidentinin Sərəncamı
Zəngin ənənələrə malik çoxəsrlik Azərbaycan poeziyasının tanınmış
nümayəndəsi Məhsəti Gəncəvinin ədəbiyyatımız tarixində özünəməxsus yeri
vardır. Onun yaratdığı söz sənəti nümunələri insanı ucaldan yüksək bəşəri
duyğular, nikbin ruh və dərin lirizmlə səciyyələnərək geniş şöhrət tapmış, sonrakı
dövrlərdə bədii zövqün formalaşmasına mühüm təsir göstərmişdir. Şairənin ədəbi
şəxsiyyəti yaradıcı Şərq qadınının fikir və mənəvi azadlığının parlaq təcəssümü
kimi Qərb şərqşünaslarının əsərlərində çox yüksək dəyərləndirilmişdir. Məhsəti
Gəncəvinin yaradıcılığının 900 illik yubileyi YUNESKO-nun görkəmli
şəxsiyyətlərin və əlamətdar hadisələrin qeyd olunması proqramına daxil edilmişdir.
Azərbaycan poeziyasının inkişafına töhfələr vermiş şairə Məhsəti
Gəncəvinin yaradıcılığının 900 illik yubileyinin qeyd olunmasını təmin etmək
məqsədi ilə, Azərbaycan Respublikası Konstitusiyasının 109-cu maddəsinin 32-ci
bəndini rəhbər tutaraq qərara alıram:
1.
Azərbaycan Respublikasının Mədəniyyət və Turizm Nazirliyi, Azərbaycan
Respublikasının Təhsil Nazirliyi və Azərbaycan Milli Elmlər Akademiyası
Gəncə Şəhər İcra Hakimiyyəti ilə birlikdə, Azərbaycan Yazıçılar Birliyinin
təkliflərini nəzərə almaqla, Məhsəti Gəncəvinin yaradıcılığının 900 illik
yubileyinə həsr olunmuş tədbirlər planını hazırlayıb həyata keçirsin.
2.
Azərbaycan Respublikasının Nazirlər Kabineti bu sərəncamdan irəli gələn
məsələləri həll etsin.
İlham Əliyev
Azərbaycan Respublikasının Prezidenti
Bakı şəhəri, 16 yanvar 2013 – cü il