“DÖVLƏT QEYDİYYATINA
ALINMIŞDIR”
“TƏSDİQ EDİLMİŞDİR”
Azərbaycan Respublikasının Vergilər
Nazirliyi Bakı şəhər Vergilər
Departamentinin Kommersiya hüquqi
şəxslərinin dövlət qeydiyyatı İdarəsi
“Amrahbank” Açıq Səhmdar Cəmiyyəti
QEYDİYYAT № 1400064171
Rəis: __________ _____________
“___” ____________ 200_-cu il
21 avqust 2009-cu il 06/09 saylı iclas
protokoluna əsasən
Ümumi Yığıncağın sədri
İldırımzadə Y.Ə. _________________
____ ______ ________200_-cu il
Amrahbank
Açıq Səhmdar Cəmiyyətinin
Nizamnaməsi
2
ÜMUMİ MÜDDƏALAR
1.1.
Bundan sonra “Bank” adlanacaq “Amrahbank” Açıq Səhmdar Cəmiyyəti
Azərbaycan Respublikası Milli Bankında 28 dekabr 1993-cü il tarixdə, 171 № ilə qeydə
alınmış “Əmrahbank” Kommersiya Bankının 15 iyul 2004-cü ildə “Əmrahbank”
Səhmdar Bankı Açıq Səhmdar Cəmiyyətinə çevrilməsi nəticəsində Azərbaycan
Respublikasının Mülki Məcəlləsi, Azərbaycan Respublikasının “Banklar haqqında”
qanunu, habelə Azərbaycan Respublikasının Mərkəzi Bankının normativ xarakterli
aktlarına və bu Nizamnaməyə uyğun olaraq yaradılmış və onun hüquqi varisi qismində
fəaliyyət göstərmişdir. Bu Nizamnamə Cəmiyyətin adının “Amrahbank” Açıq Səhmdar
Cəmiyyətinə dəyişməsi nəticəsində bankın Nizamnaməsinin üçüncü redaksiyasıdır
1.2.
Bank açıq səhmdar cəmiyyət formasında yaradılır, hüquqi şəxsdir, müstəqil
balansa malikdir, kommersiya prinsipləri əsasında fəaliyyət göstərir. Bank Azərbaycan
Respublikasının ərazisində və xaricdə filiallarını, şöbələrini Azərbaycan Respublikası
Mərkəzi Bankının icazəsi ilə aça bilər. Filial, şöbə və nümayəndəliklər Bankın təsdiq
etdiyi əsasnamə əsasında fəaliyyət göstərirlər. Bank öz fəaliyyətində Azərbaycan
Respublikasının Mülki Məcəlləsi, Azərbaycan Respublikasının “Banklar haqqında”
qanunu, habelə Azərbaycan Respublikasının Mərkəzi Bankının normativ xarakterli
aktları, digər mövcud qanunvericilik aktlarını, habelə bu Nizamnaməni rəhbər tutur. Bank
öz adı və emblemi təsvir olunmuş möhürə malikdir.
1.3.
Bank öz öhdəlikləri üzrə ona məxsus bütün əmlakla məsuliyyət daşıyır. Bankın
səhmdarları Bankın öhdəlikləri üçün cavabdeh deyillər və Bankın fəaliyyəti ilə bağlı
zərər üçün onlara mənsub səhmlərin dəyəri həddində risk daşıyırlar. Bank səhmdarların
öhdəlikləri üçün məsuliyyət daşımır.
1.4.
Bankın tam adı – Azərbaycan dilində - “Amrahbank” Açıq Səhmdar Cəmiyyəti,
İngilis dilində isə - Amrahbank Open Joint-Stock Company olur.
1.5.
Bankın qısa adı – Azərbaycan dilində - “Amrahbank” ASC, ingilis dilində isə -
Amrahbank OJSC olur.
1.6.
Bankın yerləşdiyi ünvan: Azərbaycan Respublikası, Bakı şəhəri Yusif Səfərov
küç. 10.
2.
BANKIN FƏALİYYƏT NÖVLƏRİ, ƏQDLƏRİ VƏ HÜQUQLARI
2.1.
Bank, verilmiş lisenziyalarda müəyyən edilən məhdudiyyət və şərtlərə riayət
etmək şərti ilə, aşağıdakı fəaliyyət növləri ilə məşğul ola bilər:
2.1.1.
Tələbli və müddətli depozitlərin, əmanətlərin və digər qaytarılan
vəsaitləri cəlb etmək;
2.1.2.
Təminatlı və ya təminatsız kreditlərin verilməsi, o cümlədən, istehlak və
ipoteka kreditləşdirilməsi, reqres hüququ ilə və ya belə hüquq olmadan
faktorinq, forfeytinq, lizinq xidmətləri və digər kreditləşdirmə növləri;
2.1.3.
Fiziki və hüquqi şəxslərin hesablarını, o cümlədən bankların müxbir
hesablarının açmaq və aparmaq;
3
2.1.4.
Klirinq, hesablaşma-kassa xidmətləri pul vəsaitlərinin, qiymətli
kağızların və ödəniş vəsaitlərinin köçürülməsi üzrə xidmətlər göstərmək;
2.1.5.
Ödəniş vəsaitlərinin (o cümlədən kredit və debet kartları, yol çekləri və
bank köçürmə vekselləri ) buraxmaq;
2.1.6.
Qiymətli metalları əmanətə cəlb etmək və yerləşdirmək;
2.1.7.
Öhdəliklərin icrasına təminatların, o cümlədən qarantiyaların verilməsi
və müştərilərin hesabına akkreditivləri açmaq;
2.1.8.
Qiymətli kağızlar bazarında peşəkar fəaliyyət;
2.1.9.
Maliyyə müşaviri, maliyyə agenti və ya məsləhətçi xidmətləri
göstərmək;
2.1.10.
Kreditlərə və kredit qabiliyyətinin yoxlanılmasına dair informasiya
vermək və xidmətlər göstərmək;
2.1.11.
Sənədləri və qiymətliləri, o cümlədən pul vəsaitlərinin saxlanca qəbul
etmək (xüsusi otaqlarda və ya seyf qutularında saxlamaq);
2.1.12.
Qiymətlilərin, o cümlədən banknotların və sikkələrin inkassasiya
edilməsi və göndərilməsi;
2.1.13.
Öz hesabına və ya müştərilərin hesabına maliyyə vasitələrinin, o
cümlədən çeklərin, köçürmə veksellərinin, borc öhdəliklərinin və
depozit sertifikatlarının, qiymətli metalların və qiymətli daşların, valyuta
və faiz vasitələrinin, səhmlərin və digər qiymətli kağızların, habelə
forvard kontraktlarının, svoplara dair sazişlərin, fyuçerslərin, opsionların
və valyutalara, səhmlərə, istiqrazlara, qiymətli metallara və ya faiz
dərəcələrinə aid törəmə vasitələri satın almaq və satmaq.
2.2.
Qanunla banklar tərəfindən həyata keçirilməyən fəaliyyət növləri istisna olmaqla,
Bank 2.1 bəndində sadalanan fəaliyyət növlərindən başqa Azərbaycan Respublikasının
qanunvericiliyi ilə nəzərdə tutulmuş hər hansı digər fəaliyyət növlərini də həyata keçirə
bilər.
2.3.
Hər hansı fəaliyyət növü üçün Azərbaycan Respublikasının qanunvericiliyinə
əsasən xüsusi razılıq (lisenziya) tələb edildikdə, Bank həmin fəaliyyəti yalnız müvafiq
xüsusi razılıq (lisenziya) aldıqdan sonra həyata keçirə bilər.
2.4.
Bank Azərbaycan Respublikası qanunvericilik aktları ilə nəzərdə tutulmuş
şərtlərlə və qaydada assosiasiyalarda və digər birliklərdə iştirak edə bilər.
2.5.
Bank Azərbaycan Respublikası qanunvericiliyi ilə nəzərdə tutulmuş digər əmlak
və şəxsi qeyri-əmlak hüquqlarına malikdir, o cümlədən də, daşınar və daşınmaz əmlak
almaq, satmaq və icarəyə vermək, zəmanət və iltizam vermək, məhkəmədə iddiaçı və
cavabdeh kimi çıxış etmək hüquqlarına sahib olur.
3.
BANKIN NİZAMNAMƏ KAPİTALI
3.1.
Bankın nizamnamə kapitalı səhmdarlar tərəfindən əldə edilmiş səhmlərin nominal
dəyəri hesabına yaradılır. Bankın nizamnamə kapitalına qoyuluşlar pul vəsaitləri ilə
həyata keçirilməlidir.
3.2.
Bankın
nizamnamə kapitalı 39 844 400 (otuz doqquz milyon səkkiz yüz qırx dörd
min dörd yüz) manata bərabərdir və hər birinin nominal dəyəri 100 (bir yüz) manat olan
398444 (üç yüz doxsan səkkiz min dörd yüz qırx dörd) ədəd adi adlı səhmlərdən ibarətdir.
4
3.3.
Bankın nizamnamə kapitalının artırılması Səhmdarların Ümumi Yığıncağının
qərarına əsasən səhmlərin nominal dəyərinin artırılması və ya əlavə səhmlərin
buraxılması yolu ilə həyata keçirilir.
3.4.
Azərbaycan Respublikası Mərkəzi Bankının yazılı icazəsi olduqda Bankın
nizamnamə kapitalının azaldılması Səhmdarların Ümumi Yığıncağının qərarına əsasən
səhmlərin nominal dəyərinin azaldılması və ya yerləşdirilmiş səhmlərin bir hissəsinin geri
satın alınıb onların miqdarının azaldılması yolu ilə həyata keçirilir. Bankın nizamnamə
kapitalının azaldılması haqqında qərar qəbul edildikdə, Bank 15 (on beş) təqvim günü
müddətində kreditorlara bu barədə yazılı surətdə məlumat verir. Bu zaman, Bankın
kreditorları deyilən məlumatı aldıqdan sonra 30 (otuz) təqvim günü ərzində Bankın
müvafiq öhdəliklərinin vaxtından əvvəl icrasını və ya onlara xitam verilməsini və
düşdükləri zərərin əvəzinin ödənilməsini tələb edə bilərlər.
3.5.
Bank buraxdığı səhmlərin yerləşdirilməsini açıq və yaxud konvertasiya yolu ilə
həyata keçirir. Bankın digər qiymətli kağızlarının yerləşdirilməsi qaydası onların
buraxılışı haqqında qərarla müəyyən edilir.
3.6.
Bankın adlı qiymətli kağızlarının sahiblərinin reyestri qanunvericiliyə uyğun
olaraq Bankın özü (adlı səhmlərin sahiblərinin sayı iyirmidən çox olmadıqda) və ya
müvafiq lisenziyaya malik olan qiymətli kağızlar bazarının peşəkar iştirakçısı tərəfindən
aparıla bilər.
4. BANKIN FONDLARI VƏ MƏNFƏƏTİN BÖLÜŞDÜRÜLMƏSİ.
4.1.
Bank Azərbaycan Respublikası Mərkəzi Bankının müəyyən etdiyi normativ
qaydalara uyğun surətdə aktivləri üzrə ehtimal olunan itkilər üçün xərclərə aid edilməklə
xüsusi ehtiyat fondu yaradır.
4.2.
Vergilər və qanunvericilikdə nəzərdə tutulan başqa icbari ödənişlər aparıldıqdan
sonra qalan Bankın xalis mənfəəti onun sərəncamında qalır və səhmdarların müəyyən
etdiyi qaydada bölüşdürülür.
5.
BANKIN KREDİT RESURSLARI
5.1.
Bankın kredit resursları aşağıdakı mənbələr hesabına formalaşır:
5.1.1 Bankın öz kapitalı;
5.1.2 Bankın müştərilərinin, o cümlədən əmanətçi fiziki şəxslərin bank
hesablarındakı vəsaiti;
5.1.3 Başqa banklardan, o cümlədən beynəlxalq maliyyə qurumlarından alınan
kreditlər;
5.1.4 Qiymətli kağızların emissiyası hesabına;
5.1.5 Azərbaycan Respublikası Mərkəzi Bankının mərkəzləşdirilmiş kredit
resursları;
5.1.6 Azərbaycan Respublikasının qanunvericiliyi ilə qadağan edilməmiş digər
vəsaitlər.
5.2.
Bank verdiyi kreditləri bir qayda olaraq borcalanın və ya üçüncü şəxsə məxsus
əmlakın girov qoyulması yaxud ipoteka götürülməsi ilə və ümumilikdə bank təcrübəsində
qəbul edilmiş digər formada öhdəliklərin icrasını təmin edən təminatlar, zəmanətlər,
ipoteka və girovlar hesabına, habelə digər üsullar ilə təmin edir.
5
5.3.
Bank təminatsız kreditlər də verə bilər. Təminatsız kreditlərin verilməsi hədlərini
Müşahidə Şurası müəyyən edir.
6. BANKIN İDARƏETMƏ ORQANLARI
6.1
Bankın idarəetmə orqanlarına aşağıdakılar aiddir:
Səhmdarların Ümumi Yığıncağı;
Müşahidə Şurası;
İdarə Heyəti;
Audit Komitəsi.
6.2.
Bankın ali idarəetmə orqanı Səhmdarların Ümumi Yığıncağıdır və Səhmdarların
Ümumi Yığıncağının müstəsna səlahiyyətlərinə aşağıdakılar aiddir:
6.2.1.
Bankın nizamnaməsini qəbul etmək, nizamnaməyə əlavə və dəyişikliklər
etmək;
6.2.2.
Bankın Müşahidə Şurasının və Audit Komitəsinin üzvlərini təyin və
azad etmək, həmin idarəetmə orqanlarının əsasnaməsini təsdiq etmək;
6.2.3.
Müşahidə Şurası üzvlərinin səlahiyyətləri istisna olmaqla, Bankın
inzibatçılarının Bank adından və Bank hesabına öhdəliklər qəbul etmək
səlahiyyətlərini və həmin səlahiyyətlərin Bankın digər əməkdaşlarına
verilməsi hüququnun hədlərini müəyyənləşdirmək;
6.2.4.
Bank inzibatçılarının kommersiya maraqlarını açıqlaması haqqında
qaydaları və həmin qaydalara dəyişiklik və əlavələri qəbul etmək;
6.2.5.
Bankın törəmə təsərrüfat cəmiyyətlərini yaratmaq və fəaliyyətlərinə
xitam vermək, başqa bankın satın alınması barədə qərarlar qəbul etmək;
6.2.6.
nizamnamə kapitalının artırılması və azaldılması barədə qərarlar qəbul
etmək,
Bank
səhmlərinin
buraxılması müddəa və şərtlərini
müəyyənləşdirmək, habelə bankda mühüm iştirak payının əldə
edilməsinə razılıq vermək;
6.2.7.
Bankın kənar auditor tərəfindən təsdiqlənmiş və Audit Komitəsi
tərəfindən tövsiyə edilmiş illik maliyyə hesabatlarını təsdiq etmək,
habelə xalis mənfəət hesabına ehtiyatların yaradılması və dividendlərin
ödənilməsi barədə qərar qəbul etmək;
6.2.8.
Bankın satılması, yenidən təşkili və ləğvi barəsində qərarlar qəbul
etmək;
6.2.9.
Bankın inzibatçılarının işə götürülməsi müddəa,və şərtlərini müəyyən
etmək;
6.2.10.
Xüsusi əhəmiyyətli əqdin bağlanılması barədə qərar qəbul etmək və bu
barədə məlumatın açıqlanması qaydasını müəyyənləşdirmək;
6.2.11.
Bankın nizamnaməsi və Azərbaycan Respublikasının qanunvericiliyi ilə
Səhmdarların Ümumi Yığıncağının səlahiyyətinə aid edilmiş digər
məsələləri həll etmək.
6
6.3.
Səhmdarlarının Ümumi Yığıncaqları bütün səsvermə hüququ olan səhmlərin azı
60 (altmış) faizinin sahibi olan səhmdarlar iştirak etdikdə səlahiyyətli sayılır. Aşağıdakı
məsələlər barədə qərarlar, yığıncaqda iştirak edən səhmdarların üçdə iki səs çoxluğu ilə
qəbul edilir:
6.3.1
Nizamnaməyə əlavə və dəyişikliklər edilməsi;
6.3.2
Müşahidə Şurası üzvlərinin təyin və azad edilməsi;
6.3.3
Bankın satılması, yenidən təşkili, başqa bankın alınması və Bankın
fəaliyyətinə xitam verilməsi.
Qalan məsələlər barədə qərarlar yığıncaqda iştirak edən səhmdarların adi səs çoxluğu ilə
qəbul edilir.
6.4. Səhmdarların növbəti və növbədənkənar yığıncaqları keçirilə bilər:
6.4.1.
Səhmdarların hər bir ümumi yığıncağının keçirilməsi günü, yeri, vaxtı,
gündəliyi və gündəlik üzrə materiallarla tanış olma qaydası barəsində
bildirişlər, həmin yığıncağın keçirilməsi gününə ən azı 45 (qırx beş)
təqvim günü qalmış səhmdarlara göndərilir və bu barədə kütləvi
informasiya vasitələrində məlumat dərc etdirilir.
6.4.2.
Növbəti yığıncaqlar ildə bir dəfədən az olmayaraq keçirilir. Növbəti
yığıncaqlar Bankın hər il üçün maliyyə hesabatı tərtib edildikdən və
kənar auditor yoxlamasından keçdikdən sonra ən gec iki ay ərzində
keçirilir.
6.4.3.
Növbədənkənar yığıncaqlar səsvermə hüququ olan səhmlərin azı 5 (beş)
faizinin sahibləri olan səhmdarların, Müşahidə Şurasının, Audit
Komitəsinin və İdarə Heyətinin tələbi ilə çağırıla bilər. Növbədənkənar
yığıncaqların çağırılması qaydası Azərbaycan Respublikasının Mülki
Məcəlləsi ilə tənzimlənir. Növbədənkənar yığıncağın çağırılması
tələbində gündəliyə təklif olunan məsələlər göstərilməlidir. Həmin
məsələlər növbədənkənar yığıncağın gündəliyinə mütləq salınmalıdır.
6.4.4.
Növbədənkənar yığıncağın çağırılması haqqında tələbin (təşəbbüsün)
daxil olduğu gündən etibarən Müşahidə Şurası aşağıdakıları yerinə
yetirməlidir:
3 (üç) iş günü müddətində növbədənkənar yığıncağın vaxtını və
yerini təyin edib, bu barədə özünün müəyyən etdiyi kütləvi
informasiya vasitəsində elan verməlidir;
5 (beş) iş günü müddətində yığıncağın çağırılması barədə bildirişləri
səhmdarlara göndərməlidir;
30 (otuz) gündən tez, 45 (qırx beş) gündən gec olmayaraq,
səhmdarların
növbədənkənar yığıncağın keçirilməsini təmin
etməlidir.
Təxirəsalınmaz məsələlərin müzakirəsi üçün 30 (otuz) gün gözlənilmədən də yığıncaq
çağırıla bilər, bir şərtlə ki, həmin qaydada keçirilən yığıncaq yalnız Bankın bütün
səhmdarları orada iştirak etdiyi halda səlahiyyətli sayılır.
7
6.4.5
Səhmdarların yığıncağında səsvermə hüququna malik olan bütün
səhmdarlar təmsil olunmuşdursa, yığıncaq onun çağırılması vaxtından
və üsulundan asılı olmayaraq səlahiyyətli sayılır. Səsvermə hüququna
malik olan səhmdarların hamısı yekdilliklə razılıq verərsə, bu yığıncaq
gündəliyə daxil edilməmiş məsələləri də müzakirə edə və onlara dair
qərarlar qəbul edə bilər.
6.4.6
Səhmdarların
Ümumi Yığıncağının nəticələrinə dair protokol
Azərbaycan Respublikasının Mülki Məcəlləsinə müvafiq qaydada tərtib
edilir. Səhmdarların Ümumi Yığıncağının protokolu Səhmdarların
Ümumi Yığıncağının sədri və katibi tərəfindən imzalanır və icra üçün
müvafiq olaraq Müşahidə Şurası, Audit Komitəsi və İdarə Heyətinə
verilir.
6.5.
Müşahidə Şurası aşağıdakı səlahiyyətlərə malikdir:
6.5.1.
Bankın daxili reqlamentini (siyasət, prosedura, əsasnamə, təlimat və
digər normativ xarakterli sənədlər) qəbul etmək, ona əlavə və
dəyişikliklər etmək;
6.5.2.
Bank tərəfindən istiqrazların və digər qiymətli kağızların (səhmlər
istisna olmaqla ) buraxılışı şərtlərini müəyyən və təsdiq etmək;
6.5.3.
Bankın səhmdarlarının reyestrini aparan təşkilatı müəyyən etmək və
seçmək;
6.5.4.
Bankın faiz dərəcələri, aktivlərin yerləşdirilməsi və kateqoriyaları
barəsində siyasətini, habelə Bankın ümumi maliyyə, uçot, inzibati və
kadr siyasətini müəyyənləşdirmək;
6.5.5.
Bankın strateji baxışı və missiya hesabatını təsdiq etmək;
6.5.6.
Bankın fəaliyyətinin əsas istiqamətlərini və inkişaf strategiyasını
müəyyənləşdirmək, Bankın biznes planını təsdiq etmək;
6.5.7.
Bankın təşkilatı strukturunu müəyyənləşdirmək;
6.5.8.
digər hüquqi şəxslərin kapitalında Bankın iştirakı barədə qərarlar qəbul
etmək, bankın filiallarını, şöbələrini və nümayəndəliklərini açmaq
barədə qərar vermək, onların əsasnamələrini təsdiq etmək və
fəaliyyətlərinə xitam vermək;
6.5.9.
Növbəti və tələb olunduğu hallarda, növbədənkənar auditin keçirilməsi
barədə qərar qəbul etmək və bu məqsədlə kənar auditoru təyin etmək;
6.5.10.
Bankın büdcəsini qəbul və təsdiq etmək;
6.5.11.
Bankın idarə edilməsinə və fəaliyyətinə nəzarəti həyata keçirmək, o
cümlədən Bankın İdarə Heyətindən hesabat almaq;
6.5.12.
Səhmdarların Ümumi Yığıncağı və İdarə Heyəti üçün tövsiyələr vermək;
6.5.13.
Bank tərəfindən qüvvədə olan qanunvericiliyin pozulması faktını
müəyyən etdikdə bu pozuntu barəsində Səhmdarların Ümumi
Yığıncağını, Audit Komitəsini və İdarə Heyətini xəbərdar etmək,
Azərbaycan Respublikası Mərkəzi Bankına isə bank qanunvericiliyinin
pozulması faktları barədə bildiriş göndərmək;
8
6.5.14.
Azərbaycan Respublikasında mövcud olan bank qanunvericiliyinə
müvafiq olaraq İdarə Heyəti üzvlərini vəzifədən kənarlaşdırmaq, onları
müvəqqəti olaraq başqa şəxslərlə əvəz etmək;
6.5.15.
Bank ilə İdarə Heyətinin bir və ya bir neçə üzvü arasında mənafelər
toqquşması olduğu hallarda qabaqcadan Azərbaycan Respublikası
Mərkəzi Bankına əsasları göstərməklə, yazılı bildiriş göndərmək və
Səhmdarların Ümumi Yığıncağının növbədənkənar iclasını çağırmaq
şərti ilə Bankı idarə və təmsil etmək;
6.5.16.
Bankın İdarə Heyətinin üzvlərini təyin və azad etmək, «İdarə Heyəti
haqqında Əsasnaməni» təsdiq etmək;
6.5.17.
Azərbaycan Respublikası Mərkəzi Bankının normativ xarakterli
aktlarında nəzərdə tutulan hallarda, Bankın etibarlı və prudensial idarə
olunmasını təmin etmək üçün zəruri olan qaydaları və daxili
əsasnamələri qəbul etmək;
6.5.18.
Bankın kapital ehtiyatları yaradılması haqqında qərar qəbul etmək;
6.5.19.
Bankın nizamnamə kapitalının 50 (əlli) faizindən artıq məbləğdə Bank
adından müvafiq əqdlərin bağlanmasına icazə vermək;
6.5.20.
Banka aidiyyatı şəxslər və aidiyyatı şəxs adından hərəkət edən şəxslər
ilə əqdlər bağlanmasını təsdiq etmək;
6.5.21.
Bankın fəaliyyətinin kompleks və ya ayrı-ayrı sahələrinin yoxlanması
barədə qərar qəbul etmək;
6.5.22.
Kənar və daxili auditorların, habelə Azərbaycan Respublikası Mərkəzi
Bankının yoxlamalarının nəticələrini nəzərdən keçirmək və bu
yoxlamaların yekunlarına dair tədbirlər görmək;
6.5.23. 500.000 (beş yüz min) ABŞ Dollarına ekvivalent məbləğdən artıq olan
aşağıdakı əqdləri təsdiq və onlara hər hansı düzəlişlər etmək :
-sərmayə qoyuluşu;
-kredit verilməsi;
-kredit muqavilələrinin prolonqasiyası və restruktizasiyası;
-bank qarantiyaları verilməsi ;
6.5.24. Azərbaycan Respublikasının qanunvericiliyi ilə nəzərdə tutulmuş digər
səlahiyyətləri həyata keçirmək.
6.6. Müşahidə Şurası aşağıdakı əsas vəzifələri həyata keçirir:
6.6.1. Səhmdarların növbəti və növbədənkənar Yığıncaqlarını çağırır. Bu zaman
Səhmdarların Ümumi Yığıncağı iştirakçılarının siyahısını müəyyənləşdirir, Yığıncağın
gündəliyini, gündəlikdə nəzərdə tutulan məsələlərə aid materialların hazırlanması və
onların Səhmdarların Ümumi Yığıncağının tarixinə ən azı 45 (qırx) gün qalmış
səhmdarlara çatdırılmasını təşkil edir;
6.6.2. Aşağıdakı məsələlər barədə təkliflər hazırlayır və Səhmdarların Ümumi
Yığıncağının müzakirəsinə təqdim edir:
Nizamnaməyə dəyişiklik və əlavələr və ya yeni məzmunda
nizamnamə layihəsi;
Bankın yenidən təşkili, satılması;
9
Nizamnamə kapitalının artırılması və azaldılması;
Səhmin nominal dəyərinin dəyişdirilməsi;
mənfəətin bölüşdürülməsi;
Audit Komitəsinin tərkibi;
6.6.3. Bankın sərəncamında qalan bölüşdürülməmiş mənfəətin istifadə qaydalarını
müəyyənləşdirir;
6.6.4. Audit Komitəsinin köməyi ilə bank qanunvericiliyinə riayət olunması və
mühasibat uçotunun vəziyyətinin yaxşılaşdırılması üzrə qərarlar qəbul edir;
6.6.5. İdarə Heyəti üzvlərinin vəzifə təlimatlarını müəyyənləşdirir və təsdiq edir;
6.6.6. Qanunvericiliyin müəyyən etdiyi digər vəzifələri həyata keçirir.
6.7.
Bankın Müşahidə Şurası 5 (beş) nəfərdən ibarətdir. Şuranın üzvləri Bankın
Səhmdarlarının Ümumi Yığıncağı tərəfindən “Müşahidə Şurası haqqında Əsasnamə”nin
müddəaları nəzərə alınmaqla, səhmdarlardan və/və ya kənar şəxslərdən 4 (dörd) ildən çox
olmayan müddətə təyin edilən fiziki şəxslərdir. Səhmdarların Ümumi Yığıncağı
Müşahidə Şurasının üzvləri sırasından Müşahidə Şurasının sədrini təyin edir.
Müşahidə Şurasının sədri aşağıdakı səlahiyyətlərə malikdir:
Audit Komitəsi və İdarə Heyətinin Sədr və üzvləri, habelə Müşahidə
Şurasının üzvləri ilə əmək müqaviləsi bağlamaq, onların vəzifə təlimatlarını
təsdiq etmək;
Müşahidə Şurasının iclaslarında qəbul olunmuş sənədləri imzalamaq;
Müşahidə Şurasının iclaslarını çağırmaq və iclasları idarə etmək;
ona verilmiş səlahiyyətlər daxilində səhmdarların adından Bankı təmsil etmək;
ehtiyac olduqda Müşahidə Şurasının icra aparatını formalaşdırmaq, işçiləri işə
qəbul etmək, onlarla müqavilə bağlamaq və vəzifə təlimatlarını təsdiq etmək;
Şura üzvlərinə bonus, mükafat verilməsi üçün Səhmdarların Ümumi
Yığıncağına təkliflər vermək;
Səhmdarların Ümumi Yığıncağının ona vermiş olduğu səlahiyyətlər
çərçivəsində digər qərarlar qəbul etmək.
6.8.
Müvafiq qanunvericiliyin tələblərinə uyğun gəlməyən fiziki şəxslər Müşahidə
Şurasının üzvü ola bilməz və Səhmdarların Ümumi Yığıncağının qərarı ilə Müşahidə
Şurasının üzvləri vəzifəsindən azad edilməlidirlər.
6.9.
Müşahidə Şurası onun iclasında üzvlərinin yarısından çoxu iştirak etdikdə
səlahiyyətlidir. İclasların keçirilməsi qaydası Bankın Nizamnaməsində və «Müşahidə
Şurası haqqında Əsasnamədə» müəyyən edilir.
6.10. Müşahidə Şurasının iclasları ən azı üç (3) ayda bir dəfə keçirilir. Müşahidə
Şurasının növbədənkənar iclasları onun sədrinin təşəbbüsü, Müşahidə Şurası üzvlərinin,
Audit Komitəsi, kənar auditor təşkilatı, Bank nəzarəti orqanı və İdarə Heyətinin müraciəti
ilə çağırıla bilər. İclasların nəticələrinə dair protokol Azərbaycan Respublikasının Mülki
Məcəlləsinə müvafiq qaydada tərtib edilir.
6.11. Müşahidə Şurasının qərarları yığıncaqda iştirak edən üzvlərinin sadə səs çoxluğu
ilə qəbul edilir. Hər bir üzv bir səs hüququna malikdir. Üzvlərin səsvermə zamanı bitərəf
10
qalmasına icazə verilmir. Səslər bərabər olduqda Müşahidə Şurası sədrinin səsi həlledici
sayılır.
6.12. Bankda İdarə Heyəti yaradılır və İdarə Heyəti Bankın kollegial icra orqanı olub,
onun fəaliyyəti üçün məsuliyyət daşıyır və aşağıda qeyd olunan səlahiyyətlərə malikdir:
6.12.1. Səlahiyyəti daxilində Bankın cari fəaliyyəti barədə qərarlar qəbul etmək;
6.12.2. Bankın daşınan və daşınmaz əmlakını yenidən qiymətləndirilməsi üzrə qərar
qəbul etmək;
6.12.3. Bankı tərəfdaşlar qarşısında təmsil etmək.
6.12.4.Qanunvericilikdə nəzərdə tutulmuş digər səlahiyyətləri həyata keçirmək.
6.13. İdarə Heyəti sədrinin səlahiyyətlərinə aşağıdakılar daxildir:
6.13.1etibarnaməsiz Bankın adından çıxış etmək, onun mənafelərini istənilən şəxs,
təşkilat, qurum və ya orqanlarda müdafiə eləmək;
6.13.2. İdarə Heyətinin, Müşahidə Şurasının və Səhmdarların Ümumi Yığıncağının
qərarlarının icrasını təmin etmək;
6.13.3. İdarə Heyətinin iclaslarını çağırmaq və həmin iclaslarda sədirlik etmək;
6.13.4. İdarə Heyətinin təsdiq etdiyi və səlahiyyətlərinə aid olan sənədləri imzalamaq;
6.13.5. İdarə Heyəti sədrinin müavinləri arasında vəzifə bölgüsü aparmaq;
6.13.6. İdarə Heyətinin təsdiq etdiyi şəxsləri və mərkəzi aparatın digər işçilərini
vəzifəyə təyin etmək, vəzifədən azad etmək və onlar arasında vəzifə bölgüsü
aparmaq;
6.13.7. Müqavilələr, o cümlədən əmək, tam maddi məsuliyyət haqqında müqavilələr
bağlamaq, etibarnamələr vermək;
6.13.8. Səlahiyyəti daxilində bankın fəaliyyəti ilə əlaqədar mülki-hüquqi əqdlər
bağlamaq;
6.13.9. Mərkəzi aparatın, filial və nümayəndəliklərin, şöbə və bölmələrin ştat
cədvəllərini təsdiq etmək;
6.13.10. Bütün işçilər üçün icrası məcburi olan əmr, sərəncam və göstərişlər vermək;
6.13.11. İşçilərin əmək haqqına əlavələri müəyyənləşdirmək;
6.13.12. Qanunvericilik ilə müəyyən edilmiş digər səlahiyyətləri həyata keçirmək.
6.14. İdarə Heyəti 5 (beş) nəfərdən ibarət olur. İdarə Heyəti üzvləri Müşahidə Şurası
tərəfindən 4 (dörd) ildən çox olmayan müddətə təyin edilirlər. Onlar növbəti müddətlərə
yenidən seçilə bilərlər. Müşahidə Şurası İdarə Heyətinin üzvlərindən birini İdarə
Heyətinin sədri təyin edir.
6.15. İdarə Heyəti onun iclasında üzvlərinin yarısından çoxu iştirak etdikdə
səlahiyyətlidir. İdarə Heyətinin qərarları yığıncaqda iştirak edən üzvlərin sadə səs
çoxluğu ilə qəbul edilir. Hər bir üzv bir səs hüququna malikdir, üzvlərin səsvermə zamanı
bitərəf qalmasına icazə verilmir. Səslər bərabər olduqda İdarə Heyətinin sədrinin səsi
həlledici sayılır.
6.16. Bankın Audit Komitəsi müvafiq əsasnaməyə əsasən fəaliyyət göstərir və aşağıda
qeyd olunan səlahiyyətlərə malikdir:
6.16.1. Bankın audit strategiyasını müəyyən etmək;
11
6.16.2. daxili audit planlarını təsdiq etmək və audit bölməsinin fəaliyyətinə
nəzarəti həyata keçirmək;
6.16.3. kənar auditin təyin edilməsi ilə əlaqədar bankın səlahiyyətli idarəetmə
oqranlarına təkliflər vermək;
6.16.4. kənar auditlə birgə işi təşkil etmək, auditin nəticə və tövsiyələrinin
həyata keçirilməsinə yardım etmək;
6.16.5. Bankın idarəetmə orqanları, kənar auditorlar, habelə nəzarət orqanları ilə
əlaqələr yaratmaq;
6.16.6. daxili nəzarət sistemlərinin təkmilləşdirilməsinə dair Səhmdarların
Ümumi Yığıncağına və Müşahidə Şurasına təkliflər vermək;
6.16.7. Səhmdarların Ümumi Yığıncağının, Müşahidə Şurasının və İdarə
Heyətinin qəbul etdiyi bankın fəaliyyəti ilə bağlı bütün qərarlarla tanış olmaq;
6.16.8. Bankın bütün daxili qaydaları və strategiyası ilə tanış olmaq;
6.16.9. İdarə Heyətindən Komitənin öz funksiyalarını həyata keçirmək üçün
bütün məlumatları almaq;
6.16.10. bank qanunvericiliyinə, Bankın nizamnaməsinə və Azərbaycan
Respublikası Mərkəzi Bankının normativ sənədləri tələblərinin yerinə
yetirilməsini İdarə Heyətindən tələb etmək;
6.16.11. Bankın illik hesabatına rəy vermək;
6.16.12. kənar və daxili auditorların nümayəndələri ilə görüşlər keçirmək;
6.16.13. Bankın struktur bölmələri üzrə xüsusi audit yoxlamaları və təftişlər
keçirilməsini sifariş vermək;
6.16.14. Bankın fəaliyyətinə və əməkdaşlara aid olan hər hansı məlumatlar üzrə
sorğu vermək;
6.16.15. fəaliyyət məqsədləri üçün ehtiyac olduqda müstəqil ekspertləri cəlb
etmək;
6.16.16. ehtiyac olduqda öz iclaslarına Bankın əməkdaşlarını, kənar auditorları
və müstəqil ekspertləri dəvət etmək;
6.16.17. İdarə Heyətinin iclaslarında səs hüququna malik olmadan iştirak etmək;
6.16.18. Müşahidə Şurasının iclaslarında səs hüququna malik olmadan iştirak
etmək;
6.16.19. Müşahidə Şurasının növbədənkənar iclasının keçirilməsini tələb etmək;
6. 16.20. Səhmdarların növbədənkənar Ümumi Yığıncağının çağırılmasını tələb
etmək;
6.16.21. Nəzarət sistemlərinin yaradılması və tətbiq edilməsi, daxili nəzarətin
əhəmiyyətliyinə, risklərin idarə edilməsinə, əməliyyat riskləri daxil olmaqla
onların
minimallaşdırılmasına
önəm
verməklə,
nəzarət
sistemlərinin
təkmilləşdirilməsi üzrə tövsiyələrin hazırlanması;
6.16.22. Kompüter sisteminin mühafizəsi üçün və məlumat sistemində yarana
biləcək nasazlıqlar zamanı maliyyə məlumatlarının təhlilini təmin edəcək
fövqəladə tədbirlər planlarının yoxlanması və nə dərəcədə effektiv olmasının
qiymətləndirilməsi;
12
6.16.23. Daxili və Kənar auditorlar tərəfindən irəli sürülmüş daxili nəzarət üzrə
tövsiyələrin İdarə Heyəti tərəfindən icra olunub olunmamasına nəzarət;
6.16.24. Mühüm maliyyə risklərinin cari sahələrinə və icra strukturları
tərəfindən onların səmərəli idarə edilməsinə nəzarət;
6.16.25. Maliyyə hesabatlarına əhəmiyyətli dərəcədə təsir edə biləcək hər
hansı hüquqi məsələləri nəzərdən keçirmək;
6.16.26. Bankın illik və cari maliyyə hesabatlarının hazırlanma prosesinə və
nəticələrinə nəzarət;
6.16.27. Daxili Audit Departamentinin Əsasnaməsini təsdiq etmək və onun
fəaliyyətinə nəzarət;
6.16.28. Daxili Audit Departamentinin müdiri və əməkdaşlarının vəzifə
təlimatlarını, Departamentin illik iş planı və proqramlarını, daxili auditin
hesabatlarını, nəzarət sisteminin təkmilləşdirilməsi üzrə tövsiyələr vermək;
6.16.29. Daxili Audit Departamentinin əməkdaşlarının səmərəliyini və peşə
yararlığını nəzərdən keçirmək;
6.16.30. Daxili Auditorlar tərəfindən təqdim edilmiş mühüm nəticələrin və
tövsiyələrin müntəzəm əsasda müzakirəsini təmin etmək;
6.16.31. Kənar auditorların fəaliyyətini nəzərdən keçirmək, onların
müstəqilliyini təmin etmək;
6.16.32. Kənar auditorlar tərəfindən təqdim olunmuş mühüm nəticələrin və
tövsiyələrin müzakirəsini təşkil etmək;
6.16.33. Bank qanunvericiliyinə, bankın nizamnaməsinə və Mərkəzi Bankın
normativ sənədləri tələblərinin yerinə yetirilməsini İdarə Heyətindən tələb
etmək;
6.16.34.
Maliyyə
hesabatlarının
hazırlanması
prosesində
bütün
qanunvericilik və Azərbaycan Mərkəzi Bankının normativ aktlarının
tələblərinə riayət olunmasına nəzarət etmək;
6.16.35.
Tənzimləyici
orqanlar
tərəfindən
aparılmış yoxlamaların
nəticələrini nəzərdən keçirir və onların audit xidmətinin təkmilləşdirilməsi
üzrə tövsiyələrini icra etmək;
6.16.36. Müntəzəm olaraq Komitənin fəaliyyəti haqqında (azı ildə bir dəfə)
Müşahidə Şurasına və Səhmdarların Ümumi Yığıncağına hesabat vermək və
müvafiq tövsiyələri təqdim etmək;
6.16.37. Bankın ümumi fəaliyyətində mövcud olan və yarana biləcək risklər
üzrə daima Müşahidə Şurasını məlumatlandırmaq;
6.16.38. Səhmdarların Ümumi Yığıncağı müəyyən etdiyi tezlikdə
Yığıncağa aşağıdakı məlumat və hesabatları təqdim etmək:
bankda qanunvericiliyə riayət olunması barədə hesabat;
bankdan maliyyə uçotu və hesabatlar barədə hesabat;
audit fəaliyyəti barədə hesabat;
bankda risklərin idarə edilməsi və nəzarət sistemlərinin vəziyyəti
barədə hesabat;
13
bankın kənar auditor tərəfindən təsdiq olunmuş balans, mənfəət
və zərərlər hesabatı, habelə maliyyə əmsalları barədə hesabat;
bankda
risklərin
və
nəzarət
sistemlərinin,
uçot və
qanunvericiliyin təkmilləşdirilməsi barədə təkliflər;
«Audit Komitəsi haqqında Əsasnamə» üzrə Audit Komitəsinin
vəzifələrinə aid olan digər məsələlər üzrə hesabatlar.
6.16.39. Qanunvericilik və «Audit Komitəsi haqqında Əsasnamə» ilə
nəzərdə tutulmuş digər səlahiyyətləri həyata keçirmək.
6.17. Bankın Audit Komitəsi 3 (üç) nəfərdən ibarət olur. Komitənin üzvləri
Səhmdarların Ümumi Yığıncağı tərəfindən 4 (dörd) ildən çox olmayan müddətə təyin
edilir. Komitənin üzvləri növbəti müddətlərə yenidən seçilə bilərlər. Səhmdarların
Ümumi Yığıncağı Komitənin üzvlərindən birini Komitənin sədri təyin edir. Audit
Komitəsinin üzvlərinin əmək haqqı formasında muzdu Səhmdarların Ümumi Yığıncağı
tərəfindən təyin edilir.
6.18. Audit Komitəsi onun iclasında üzvlərinin yarısından çoxu iştirak etdikdə
səlahiyyətlidir. İclasın keçirilməsi qaydası Səhmdarların Ümumi Yığıncağı tərəfindən
təsdiq edilən “Audit Komitəsi haqqında Əsasnamədə” müəyyən edilir. Audit Komitəsinin
qərarları yığıncaqda iştirak edən üzvlərin sadə səs çoxluğu ilə qəbul edilir. Hər bir üzv bir
səs hüququna malikdir, üzvlərin səsvermə zamanı bitərəf qalmasına icazə verilir. Səslər
bərabər olduqda Audit Komitəsi sədrinin səsi həlledici sayılır.
6.19. Daxili Audit Departamentinin rəhbəri və əməkdaşları Audit Komitəsinin
təqdimatı ilə Bankın Müşahidə Şurası tərəfindən vəzifəyə təyin və azad olunur.
7. Səhmdarların hüquq və vəzifələri
7.1.
Bankın səhmdarları aşağıdakı hüquqlara malikdir:
7.1.1.
səhmlərin özgəninkiləşdirilməsini qanunvericiliyə müvafiq qaydada
həyata keçirmək;
7.1.2.
Bankın ləğvindən sonra qanunvericiliyə uyğun olaraq qalan əmlakın bir
hissəsini almaq;
7.1.3.
Bankın idarəetmə orqanlarına seçmək və seçilmək;
7.1.4.
Bankın idarəetmə orqanları tərəfindən qəbul edilmiş qərarlardan
məhkəməyə şikayət etmək;
7.1.5.
Bankdan yaxud da ki, müvafiq hallarda, Bankın səhmdarlarının reyestrini
aparan təşkilatdan özünün mülkiyyətində olan səhmlərə mülkiyyət
hüququnu təsdiq edən sənədi tələb etmək və almaq;
7.1.6.
Səhmdarların Ümumi Yığıncağında Nizamnamə kapitalındakı paylarına
mütənasib səs hüququ ilə iştirak etmək;
7.1.7.
mövcud qanunvericiliklə və Bankın daxili sənədləri ilə nəzərdə tutulmuş
digər hüquqlardan istifadə eləmək.
7.2. Səhmdarlar aşağıdakıları yerinə yetirməyə borcludurlar:
7.2.1. qanuna və bu Nizamnaməyə əsasən kommersiya sirri və ya məxfi sayılan
digər məlumatları üçüncü şəxslərə açıqlamamaq;
14
7.2.2. səhmdarların reyestrində onlara dair daxil edilmiş məlumatların
dəyişdirilməsi barədə səhmdarların reyestrsaxlayıcısına 10 (on) təqvim günü
ərzində yazılı bildiriş vermək;
7.2.3. qanunvericilikdə nəzərdə tutulmuş digər vəzifələri yerinə yetirmək.
8. BANKIN MÜŞTƏRİLƏRLƏ MÜNASİBƏTİ
8.1.
Bank ilə onun müştəriləri arasında münasibətlər Azərbaycan Respublikasının
Mülki Məcəlləsi, Azərbaycan Respublikası Mərkəzi Bankı tərəfindən qəbul edilmiş
normativ xarakterli aktlar və müqavilə əsasında həyata keçirilir.
8.2.
Bank müştərilərlə bağladığı müqavilədə xidmət şərtlərini, o cümlədən faiz
dərəcələrini, komisyon haqqlarını və göstərilən bank xidmətləri üçün digər ödənişləri,
habelə bank tərəfindən verilmiş kreditlərin ödənişi şərtlərini və qaydalarını sərbəst
müəyyən edir.
8.3.
Bank öz müştərilərinin əməliyyatlarının, hesablarının və əmanətlərinin sirrini
saxlayır və yalnız Azərbaycan Respublikasının qanunvericiliyində müəyyən edilmiş
hallarda və qaydada həmin məlumatların açıqlanmasına yol verir.
9. BANKDA MÜHASİBAT UÇOTU VƏ MALİYYƏ HESABATI
9.1.
Bank Azərbaycan Respublikası Mərkəzi Bankının müəyyən etdiyi mühasibat
uçotu və hesabatı qaydalarına müvafiq surətdə öz uçotu və hesabat işini təşkil edir.
Bankın fəaliyyəti aylıq və illik balanslarda, mənfəət və zərər haqqında hesabatlarda əks
olunur.
9.2.
Bankın hesabat ili yanvarın birinci günü başlanır və dekabr ayının axırıncı günü
qurtarır.
9.3.
Bankın illik maliyyə-təsərrüfat fəaliyyəti özünün seçdiyi kənar auditor tərəfindən
yoxlanılır. Bank kənar auditor tərəfindən təsdiqlənmiş konsolidasiya əsasında hazırlanmış
maliyyə hesabatını auditor rəyi ilə birlikdə Azərbaycan Respublikası Mərkəzi Bankına və
maliyyə ilinin qurtarmasından ən geci 5 (beş) ay müddətindən Bankın səhmdarlarına,
habelə müştərilərin tələbi ilə onlara təqdim edir. Bu bənddə göstərilən maliyyə hesabatı
və kənar auditorun rəyi kütləvi informasiya vasitələrində Bank tərəfindən dərc edilir.
Dərc olunan hesabatın forması, məzmunu və müddətləri Azərbaycan Respublikası
Mərkəzi Bankı tərəfindən müəyyən edilir.
10. BANKIN FƏALİYYƏTİNƏ XİTAM VERİLMƏSİ.
10.1. Bank aşağıdakı hallarda ləğv edilə bilər:
10.1.1. Bankın səhmdarlarının qərarı əsasında;
10.1.2 Məhkəmə qərarına əsasən;
10.2. Bankın fəaliyyətinə xitam verilməsi, onun yenidən təşkili (birləşməsi, qoşulması,
bölünməsi, ayrılması, çevrilməsi) və ya ləğvi yolu ilə həyata keçirilir. Bankın yenidən
təşkilinə yalnız Azərbaycan Respublikası Mərkəzi Bankının icazəsi ilə yol verilir.
10.3. Bankın ləğvi Azərbaycan Respublikasının qanunvericiliyinə müvafiq qaydada
həyata keçirilir.
15
11. BANKDA ÇİRKLİ PULLARIN YUYULMASINA QARŞI
MÜBARİZƏ İŞİNİN TƏŞKİLİ
11.1. Bank çirkli pulların yuyulmasına qarşı mübarizə ilə əlaqədar öz fəaliyyətində
Azərbaycan Respublikasının “Banklar Haqqında” Qanununu, “Cinayət yolu ilə əldə
edilmiş pul vəsaitlərinin və ya digər əmlakın leqallaşdırılmasına və terrorçuluğun
maliyyələşdirilməsinə qarşı mübarizə haqqında” Azərbaycan Respublikasının Qanununu,
habelə Azərbaycan Respublikasının qoşulmuş olduğu beynəlxalq saziş və muqavilələri,
rəhbər tutur.
11.2. Bank kimliyini təyin etmədən muştərilərə bank xidmətləri göstərmir.
11.3. Bank ödənişləri həyata keçirərkən müştərilərindən vəsaiti alanı (benefisiarı)
göstərməyi tələb edir.
11.4. Bank anonim hesablar, o cümlədən anonim əmanət hesabları açmır və çirkli
pulların yuyulmasına gətirib çixara biləcək əməliyyatlar aparmır.
11.5. Bankda çirkli pulların yuyulmasına qarşı mübarizə Müşahidə Şurası tərəfindən
təsdiq olunmuş bankdaxili normativ sənədlərlə tənzimlənir.
12. DİGƏR ŞƏRTLƏR.
12.1. Bankın fəaliyyəti ilə əlaqədar olan, lakin bu Nizamnamə ilə tənzimlənməyən
məsələlər Azərbaycan Respublikasının qanunvericiliyi ilə tənzimlənir.
12.2. Bu Nizamnamə dövlət qeydiyyatından keçdiyi andan qüvvəyə minir.
12.3. Bu Nizamnaməyə Səhmdarların Ümumi Yığıncağının qərarı əsasında Azərbaycan
Respublikası Mərkəzi Bankının qabaqcadan alınan yazılı icazəsi ilə əlavə və dəyişikliklər
edilə bilər.
12.4. Nizamnaməyə edilmiş əlavə və dəyişikliklər onun dövlət qeydiyyatından keçdiyi
andan qüvvəyə minir.
12.5. Gələcəkdə bu Nizamnamənin hər hansı müddəası qanunvericiliklə ziddiyyət təşkil
edərsə, qanunvericiliyin müddəası tətbiq edilir.
Dostları ilə paylaş: |