İnformasiya cəmiyyəti problemləri, 2017, №1, 35–40
www.jpis.az 35
UOT 001:004.7
Fətəliyev T.X.
AMEA İnformasiya Texnologiyaları İnstitutu, Bakı, Azərbaycan
depart3@iit.ab.az
E-ELM VƏ E-TƏHSİLİN FORMALAŞMASINDA
E-KİTABXANALARIN
ROLU HAQQINDA
Məqalədə e-elm və e-təhsilin formalaşmasında əsas informasiya vasitəsi kimi
e-kitabxanaların
roluna baxılmışdır. Web 2.0-in e-kitabxanaların, e-elmin və e-təhsilin inkişafına təsiri
araşdırılmışdır. Elm və təhsil kitabxanaları şəbəkələrinin inteqrasiyasının verdiyi imkanlar
göstərilmişdir.
Açar sözlər: e-kitabxana, e-elm, e-təhsil, Web 2.0, Science 2.0, Education 2.0, Library 2.0, e-
kitabxana şəbəkələri.
Giriş
Azərbaycan Respublikasında iqtisadiyyatın inkişafı, biliklərə əsaslanan informasiya
cəmiyyətinin formalaşması, innovativ texnologiyaların tətbiqi elm və təhsil sahələrində inkişafı
sürətləndirmişdir. Bu baxımdan müvafiq sahələrin fəaliyyətlərinin səmərəliliyinin yüksəldilməsi,
əlaqələndirilməsi və istiqamətləndirilməsi, ümumdünya elektron informasiya məkanına
inteqrasiyasının daha da sürətləndirilməsi üçün müasir tələblərə uyğun təkmilləşdirilməsi aktual
məsələ kimi qarşıda durur. İnformasiya cəmiyyəti üzrə Ümumdünya Sammitində (World Summit
on the Information Society - WSIS) İC quruculuğunda informasiya-kommunikasiya
texnologiyalarından (İKT) istifadə əsas məqsəd və inkişafın hərəkətverici qüvvəsi kimi qəbul
edilmişdir. Ölkəmizdə ötən illər ərzində İKT-nin müxtəlif fəaliyyət sahələrində, o cümlədən elm
və təhsildə tətbiqi və inkişaf etdirilməsi sosial-iqtisadi yüksəlişin, davamlı inkişafın
sürətləndirilməsində, şəffaflıq və hesabatlılığın artırılmasında gündəlik həyatın ayrılmaz hissəsinə
çevrilmişdir. Bu məsələ WSIS-in Fəaliyyət Planının C7 fəaliyyət istiqamətinə uyğun olaraq
respublikamızda e-elm və e-təhsilin uğurla həyata keçirilməsini sürətləndirmişdir. Belə ki, müasir
dövrdə həmin qurumlarda İKT-nin inkişaf səviyyəsi və problemləri informasiyalaşdırma ilə
yanaşı, onların hər birinin strukturlarının istifadəsi üçün
vahid informasiya fəzasının
formalaşdırılması, informasiya resursları və infrastrukturlarının inkişaf etdirilməsi siyasətinə
keçməyi zəruri etmişdir. Beləliklə, reallaşdırılan hər iki layihənin məqsədi informasiya-
kommunikasiya infrastrukturuna malik, yüksəksürətli İnternet şəbəkəsi vasitəsi ilə elmi, texniki,
təhsil üzrə informasiya və hesablama resurslarına çıxışı olan elmi və təhsil qurumları
kollektivlərinin, həmçinin elmi araşdırmalarla və təhsil prosesi ilə məşğul olan ayrı-ayrı fərdlərin
virtual məkanda birgə fəaliyyətini təmin etməkdir [1]. Layihələr üzrə müxtəlif istiqamətlərdə işlər
görülür. Onlardan biri də yeni innovativ texnologiyalar əsasında informasiya təminatlarının
yaradılmasıdır ki, bu da müasir dövr üçün ən zəruri və aktual məsələlərdən hesab olunur.
E-kitabxanalar məhz həmin informasiya təminatlarının əsas və ayrılmaz tərkib hissəsini təşkil edir.
Məlumdur ki, elektron informasiya resurslarından istifadə etmədən informasiya
cəmiyyətinin formalaşması mümkün deyildir. Müasir informasiya texnologiyalarının böyük
miqyasda kağız formasında toplanmış məlumatların rəqəmsallaşdırılması və bununla da, yeni növ
informasiya resurslarının yaradılması imkanları e-kitabxanaların layihələndirilməsinə şərait
yaratmışdır. E-kitabxana müxtəlif təyinatlı informasiyanın yaradılmasının, saxlanmasının təşkili
və yayılmasının yeni keyfiyyətdə təqdim edilməsi imkanlarına malikdir.
E-kitabxanaya, eyni
zamanda, müxtəlif tipli elektron sənədlərin (mətn, qrafik, audio, video və s.) saxlanmasını və
şəbəkə vasitəsi ilə səmərəli istifadə olunmasını təmin edən informasiya sistemi kimi baxıla bilər.
O, qeyri-məhdud sayda oxucuya məkan və zamandan asılı olmadan keyfiyyətli və daha dolğun
informasiya xidməti göstərən açıq onlayn sistemdir. Bu gün e-kitabxanaların ən yeni kompüter və
şəbəkə avadanlıqları, qeyri-ənənəvi məlumat daşıyıcıları, yüksək effektli avtomatlaşdırılmış
İnformasiya cəmiyyəti problemləri, 2017, №1, 35–40
36 www.jpis.az
texnologiyalar ilə təchiz edilməsi onları informasiya sənayesinin ən güclü və vacib sahələrinə
çevirmişdir [2,3].
Beləliklə, qloballaşma və inteqrasiya prosesləri ilə xarakterizə olunan
müasir dövrdə elm və
təhsildə fəaliyyətin inkişafı, kompleks təhlili, idarə olunması və proqnozlaşdırılması mükəmməl
informasiya təminatı əsasında reallaşdırıla bilər. İnformasiya təminatının əsas tərkib hissəsi kimi
e-kitabxanalar bu məsələlərin həllində mühüm əhəmiyyət daşıyır.
Qeyd olunanlar araşdırılan
məsələnin aktullağını bir daha təsdiq edir.
E-kitabxanalar elm və təhsil sistemlərinin əsas informasiya təminatı kimi
İnsanın yaradıcı, sosial və intellektual fəaliyyətinin əsas nəticələrindən biri informasiya
resurslarının yaradılması və toplanmasıdır. İnformasiyanın toplanması texnologiyasının inkişaf
səviyyəsi və toplanmış informasiyanın effektli istifadəsi, bütün tarix boyu istehsal gücünün inkişaf
səviyyəsinə əhəmiyyətli dərəcədə təsir etmişdir. Bu baxımdan, kitabxanalar xalqın yaratdığı
qiymətli tarixi-mədəni, ədəbi-bədii və elmi-fəlsəfi irsin toplanıb-saxlanmasında, bəşər
mədəniyyətinin qazandığı nailiyyətlərin nəsildən-nəslə çatdırılmasında və cəmiyyətin intellektual-
mənəvi potensialının qorunmasında və artırılmasında əvəzsiz rol oynayır.
Hazırki dövr informasiya axınlarının həcminin artması, informasiya texnologiyalarının
mürəkkəbləşməsi və imkanlarının genişlənməsi ilə müşayiət olunur. Bu baxımdan, İnternet
texnologiyası müstəsna rola malikdir. İnternet şəbəkəsində kitablar, dövri və mütəmadi çap olunan
nəşrlər, məqalələr, məlumat bazaları haqqında biblioqrafik informasiyanı özündə saxlayan çox
böyük həcmdə elektron resurslar cəmləşmiş, nəhəng informasiya fəzası formalaşmışdır. Belə
nəhəng informasiya fəzasının formalaşmasında e-kitabxanaların və informasiya xidməti
sistemlərinin mühüm yeri vardır. E-kitabxanaların yaradılmasında əsas məqsəd oxuculara
göstərilən xidmətlərin təkmilləşdirilməsi, operativliyin və səmərəliliyin artırılması, kitabxana
fondunu təşkil edən mədəni və elmi irsin saxlanılmasının yeni üsullarının tətbiqi, nadir fiziki
nüsxələrin qorunması, yeni mənbələrin cəlb olunması ilə kitabxana fondunun genişləndirilməsi,
elmi-tədqiqat fəaliyyətini yeni keyfiyyətli informasiya ilə təmin etməkdir. Dünyada e-kitabxana və
müvafiq informasiya infrastrukturunun yaradılması işləri sürətlə baş verir. Bu istiqamətdə işlər
Böyük Britaniyada keçən əsrin 80-cı illərində, ABŞ-da isə 90-cı illərdə başlanmışdır. İlkin olaraq
bu layihələrin kiçik işçi qruplar tərəfindən həyata keçirilməsinə baxmayaraq, bir neçə il ərzində
onlar milli proqramlar və beynəlxalq layihələr statusunu əldə etmişlər. Misal olaraq, Böyük
Britaniyanın “eLib” [4], ABŞ-ın “NDLP” [5] proqramlarını, Almaniyanın “Global-Info” [6] və
Yaponiyanın [7] e-kitabxana layihələrini göstərmək olar. Qeyd etmək lazımdır ki, bu layihələr
əhəmiyyətli dövlət maliyyə dəstəyinə malikdirlər. Rusiyada 1995-ci ildən [8], Belarusda 1996-cı
ildən [9] dövlət dəstəyi ilə bu istiqamətdə ardıcıl işlər aparılır. Şimal qonşumuzun “Elmi elektron
kitabxana” layihəsi uğurla fəaliyyət göstərir [10]. Müəlliflərin, elmi jurnalların və elmi təşkilatların
fəaliyyətlərinin biblioqrafik və elmmetrik təhlillər əsasında qiymətləndirilməsi üçün onun
bazasında “Rusiya Milli İstinad İndeksi” analitik-informasiya sistemi yaradılmışdır [8]. Bu sistem
elmi fəaliyyətin qiymətləndirilməsi, ölkədə elmin inkişafına dəstək verən imkanlara malikdir.
Azərbaycanda
kitabxanaların maddi-texniki bazalarının inkişaf etdirilməsi və
fəaliyyətlərinin təkmilləşdirilməsinə daim dövlət qayğısı göstərilir. 1996-cı ildə Azərbaycan
hökuməti “Azərbaycan Respublikasında kitabxana işinin vəziyyəti və onu yaxşılaşdırmaq
tədbirləri haqqında” qərar qəbul etmişdir [11]. 1999-cu ildə “Kitabxana işi haqqında” Azərbaycan
Respublikasının Qanunu qüvvəyə minmişdir [12]. Azərbaycan Respublikası Prezidentinin
2007-ci il 20 aprel tarixli “Azərbaycanda kitabxanaların fəaliyyətinin yaxşılaşdırılması haqqında”
Sərəncamı bu məsələlərin həllində dönüş yaratmışdır [12]. Həmin sərəncamın nəticəsi olaraq
AMEA Mərkəzi Elmi Kitabxanasının (MEK) istifadəyə verilməsini buna misal göstərmək olar.
Dünya təcrübəsi əsasında AMEA MEK-in maddi-texniki bazasının, İKT infrastrukturunun müasir
səviyyədə qurulması, e-kitabxana sisteminin yaradılması və fəaliyyətinin dünya standartları
səviyyəsinə qaldırılmasına nail olmaq üçün aşağıdakı məsələlərin həlli nəzərdə tutulmuş və
İnformasiya cəmiyyəti problemləri, 2017, №1, 35–40
www.jpis.az 37
hazırda həyata keçirilir:
kitabxana fondunu təşkil edən çap əsərlərinin rəqəmsal formaya çevrilməsi;
kənar mənbələrdən elektron elmi resursların alınması;
elektron nəşrlərin kataloqlaşdırılması;
informasiyanin saxlanılması işinin təşkili;
informasiya axtarışının və əldə edilməsi işinin təşkili;
informasiya təhlükəsizliyi məsələləri və s.
AMEA MEK-in e-kitabxanasının yaradılmasında əsas məqsəd beynəlxalq təcrübənin nəzərə
alınması və müasir texnologiyaların tətbiqi ilə kitabxana işinin təşkilini səmərələşdirmək, oxucu-
kitabxana münasibətlərini sadələşdirmək, son texnologiya və avadanlıqların tətbiqi ilə AMEA-nın
elmi müəssisə və təşkilatlarının, ölkənin digər qurumlarının kitabxanaları və dünya kitabxana
sistemləri ilə inteqrasiya edə biləcək vahid mərkəzləşdirilmiş kitabxana sistemini yaratmaq və
nəticə etibarilə tam müasir və dünya standartlarına cavab verən intellektual mühiti
formalaşdırmaqdır.
Onu da xüsusi ilə qeyd etmək lazımdır ki, ölkəmizdə informasiya cəmiyyətinin inkişafı
şəraitində milli kontentin genişləndirilməsinə, ölkəmizin milli-mədəni irsinin qorunub
saxlanılmasına və inkişafına, əhalinin ondan müasir texnologiyalar vasitəsilə istifadəsinə və bilik
səviyyəsinin artırılmasına böyük diqqət yetirilir [13]. Kitabxana, arxiv və muzeylərdə İKT-nin
tətbiqinin, elektron kitabxana şəbəkəsinin genişləndirilməsi bu sahədə əsas fəaliyyət
istiqamətlərindəndir.
Web 2.0-ın təsir dairəsi
Dünyada İKT-nin, xüsusilə, İnternet və veb texnologiyalarının inkişafı, davam etməkdə olan
rəqəmsallaşma fenomeni müxtəlif, o cümlədən Elm 2.0 (Science 2.0), Açıq elm (Open sciense),
Təhsil 2.0 (Education 2.0), Kitabxana 2.0 (Library 2.0) və s. kimi yeni anlayışlar yaratmışdır. Onlar
İKT-nin, məhz Web 2.0 texnologiyasının tətbiqi ilə elmi mübadilə və əməkdaşlıq prinsiplərinə
əsaslanan fəaliyyət növləri ilə xarakterizə olunur. İdeya, məlumat və ya elmi nəticələri bölüşmək
üçün viki, bloq və video-jurnal kimi əməkdaşlıq texnologiyalarından istifadə burada mühüm
əhəmiyyət kəsb edir. Bu anlayışların əhatə dairəsinin ümumi cəhəti daha çox “açıqlığa” (yəni açıq
əlyetənliyə), daha qısa nəşr dövrlərinə (məsələn, elmi viki səhifələr vasitəsilə), sürətli əks əlaqəyə
(məsələn, sosial şəbəkələrdən istifadə etməklə) və ya iştirakın və əməkdaşlığın daha yüksək
dərəcəsinə (məsələn, virtual tədqiqat mühitlərinə) nail olmaqdır. Qeyd olunan terminlər hər bir
tədqiqat strukturunun diqqət mərkəzində olanları əks etdirir.
Açıq elm mümkün dərəcədə açıq tədqiqatlar istiqamətində fəaliyyəti tənzimləyir və bu
mühitdə birgə iş, tədqiqatların nəticələrinin “açıq” istifadəsi və hər kəs tərəfindən ixtiyari məqsədlə
paylaşılması sərbəst fəaliyyət kimi başa düşülür [14]. Bu konsepsiya açıq proqram təminatı,
əlyetərli nəşrlər və ya açıq tədqiqat proseslərini birləşdirərək tədqiqat layihələrinin bütün fazalarının
ictimaiyyət üçün açıq olmasını təmin edir. Elm 2.0 və Təhsil 2.0 isə, xüsusən, sosial medianın
tədqiqat, təhsil və nəşr proseslərinə təsirini genişləndirir. Elm 2.0 və Təhsil 2.0-ın təyinatı yeni
İnternet texnologiyalarının, o cümlədən sosial medianın tədqiqatının və təhsilin bütün fazalarında
tətbiqinin yeni üsullarının tədqiqi ilə bağlıdır. Elm 2.0, öz növbəsində, Açıq elmə imkan yaradır,
özü isə açıq olmaya da bilər. Məsələn, bir tədqiqat qrupu hər hansı bir nəşr üzərində sosial media
şəbəkəsi mühitində birgə işləyə, yekun nəşri isə lisenziyalı jurnalda çap etdirə bilər. Əksinə, Açıq
elm heç bir Elm 2.0 alətini istifadə etmədən meydana gələ bilər. Bununla belə, açıq (sosial) veb-
bazalı elmi kommunikasiya və Elm 2.0-ın meydana gəlməsi ilə biz paradoksal vəziyyətlə üzləşirik:
bir tərəfdən, artıq tədqiqat üçün çox sayda əlyetərli (və adətən, pulsuz) olan informasiya vardır,
digər tərəfdən isə, tədqiqatçılar informasiyanın həddindən artıq yüklənməsindən və keyfiyyətə
nəzarəti təmin edən filtrlərin azlığından şikayət edirlər. Bu problem Təhsil 2.0 üçün də
xarakterikdir. Buna baxmayaraq, yaranmış bu informasiya bolluğunun idarə edilməsi isə ayrıca bir
problem kimi paralel olaraq həll edilir.
İnformasiya cəmiyyəti problemləri, 2017, №1, 35–40
38 www.jpis.az
Kitabxana 2.0 konsepsiyası Web 2.0 vasitəsilə əsas diqqət istifadəçilərin iştirakına və onlar
arasında əməkdaşlığa yönəldilmiş kitabxana xidmətlərinin yeni yanaşmasıdır [15]. Onun vasitəsi
ilə kitabxana xidmətləri yenidən qiymətləndirilir və istifadəçilərin dəyişən tələblərinə vaxtında
uyğunlaşdırılması üçün yenilənir. Aktiv və səriştəli istifadəçi onun mühüm tərkib hissəsidir.
Kitabxanadan oxucuya və əks istiqamətdə dövr edən informasiya və ideyalar sayəsində kitabxana
xidmətləri daimi, sürətli və dinamik inkişaf etmək və təkmilləşmək imkanı əldə edir. Xidmətin
virtuallığından asılı olmayaraq, istifadəçi həm iştirakçı, həm yaradıcı, həm də məsləhətçiyə çevrilir.
Elmi kitabxanaların (Kitabxana 2.0) gələcək rolu iki əsas aspektdən ibarətdir: 1) elmi kontentlərin
yayılması üçün xidmət və mübadilənin, həmçinin tədqiqatçıların diqqətini cəlb etməklə uyğun elmi
nəticələrin əldə olunmasının yeni üsullarının tətbiqi; 2) artan informasiya yükünün emalının
öhdəsindən gəlmək, kitabxana daxilində və kitabxanalararası müxtəlif kontent mənbələrinin
inteqrasiya olunması və tədqiqat məhsullarının keyfiyyətinin qiymətləndirilməsi bacarığının
dəstəklənməsi.
Hal-hazırda kitabxanalar və rəqəmsal informasiya infrastrukturları alimləri milli səviyyədə
subyektyönümlü informasiya ilə təmin edir. Gələcək kitabxanalarda (Kitabxana 2.0) isə Elm 2.0-ın
alətləri ilə tədqiqatçılar arasında onlayn istifadə edilə bilən informasiyanın ani təchizatına imkan
yaranacaqdır. Elmi kitabxanalar vacib informasiya texnologiyaları infrastrukturunu yaradacaq,
İnternetdə olan mövcud informasiya qovşaqları, o cümlədən vikilər, bloqlar, virtual tədqiqat
mühitləri və ya sosial şəbəkələrdəki profillər vasitəsi ilə yeni keyfiyyətli xidmətlər təqdim
edəcəklər. Bunların da hamısı paylanmış informasiya təminatına olan mühüm dəstəyi təmin etmək
üçün zəruridir. Belə alətlərə ScholarLib-i misal gətirmək olar [16]. ScholarLib-in məqsədi
akademik informasiyanın elmi kitabxanaların portalları tərəfindən sosial şəbəkə saytları və s.
vasitəsilə əlyetərli olmasını təmin etməkdir. Kitabxanalar artıq təkcə informasiya provayderi kimi
fəaliyyət göstərmirlər. Onlar həmçinin tədqiqatçılara Elm 2.0-da olduğu kimi, nəşr proseslərində
dəstəklənən və bütün tədqiqat məhsulları üçün davamlı mühitlər təklif edə bilən əlavə xidmətlər
göstərirlər. Eyni zamanda, ədəbiyyat axtarışı üçün yeni paradiqmalara imkan yaradan Elm 2.0
texnologiyalarının mənimsənilməsi və tətbiqi kitabxanaların inkişafında mühüm rol oynayacaqdır.
E-kitabxanaların e-elm və e-təhsilin inteqrasiyasında rolu
Elmi tədqiqatların müasir nəzəri və metodoloji üstünlükləri onların tətbiqi imkanları və
təhsillə əlaqəsi ilə müəyyənləşdirilir. İnformasiya cəmiyyətində də mükəmməl bir sistemin tərkib
hissələri kimi elmin, təhsilin və istehsalatın inteqrasiyasının mərkəzində bilik dayanır.
Azərbaycanın bu sahədə aparıcı ölkəyə çevrilməsi prosesinin mərhələli şəkildə həyata keçirilməsi
və ilk növbədə, mövcud elmi, metodoloji, tədris və istehsal bazası əsasında inteqrasiyanın əldə
olunması planlaşdırılır. Elm və təhsilin inteqrasiyası problemi, prinsipcə, yeni deyildir və onun
həlli yolları dünyada həmişə diqqət mərkəzində olub. Çoxməqsədli inteqrasiyanın əsas
istiqamətlərindən biri də alimlərin tədrisdə, müəllim və tələbələrin isə elmi tədqiqatlarda iştirakını
gücləndirməyə xidmət edir. Bunun da nəticəsində 1) tədqiqatların səmərəliliyinin artmasına; 2)
təhsilin və elmi-texniki kadr hazırlığının keyfiyyətinin yaxşılaşdırılmasına, büdcə vəsaitlərinin
səmərəli istifadə edilməsinə; 3) tədqiqat və layihələndirmə sahəsinə gənclərin axınının
gücləndirilməsinə və s. nail olunur. Ənənəvi kitabxanaların, e-kitabxanaların, e-kitabxana
şəbəkələri və onların inteqrasiyası nəticəsində yaradılan daha irihəcmli informasiya təminatının
bu prosesdə rolu mühüm əhəmiyyət kəsb edir. E-elm və e-təhsilin hər biri, öz növbəsində, bu
məsələlərin həllini reallaşdırır, digər tərəfdən isə, həmin proses onların inteqrasiyasını daha da
sürətləndirir. Şəkil 1-də ölkə və beynəlxalq elm və təhsil kitabxanalar şəbəkələrinin qarşılıqlı
inteqrasiyasının struktur sxemi verilmişdir. Şəkildən göründüyü kimi, e-elmin AzScienceNet və
e-təhsilin isə AzEdunet şəbəkə platformaları bu inteqrasiya prosesinin formalaşmasının əsas
bazalarıdır.
İnformasiya cəmiyyəti problemləri, 2017, №1, 35–40
www.jpis.az 39
Şəkil 1. E-kitabxana şəbəkələrinin inteqrasiyası sxemi
Elm və təhsil qurumlarının kitabxanalar şəbəkələrinin inteqrasiyası elm və təhsil
informasiyalarının sürətlə artmasına, onlardan asan istifadəyə, operativ yayılmasına və
Azərbaycan elm və təhsil sistemlərinin beynəlxalq mühitdə daha sürətlə tanınmasına imkan
yaradır.
Eyni zamanda, bu inteqrasiya nəticəsində onların informasiya təminatının yaxşılaşması
hesabına idarəetmə qərarlarının qəbulunda səmərəli nəticələr əldə oluna bilər. Həmçinin burada
toplanmış böyük həcmli elmi verilənlərə bibliometriya, elmmetriya və vebometriyanın tətbiqi ilə
elmi fəaliyyətin milli, regional və institut (həmçinin ayrı-ayrı tədqiqatçılar) səviyyələrində
qiymətləndirilməsi məsələləri asan həllini tapa bilər.
Nəticə
Müasir dövrdə e-kitabxanaların yaradılması məsələsi informasiya cəmiyyətinin
formalaşmasında mühüm yer tutur. Elm və təhsil sistemlərinin e-kitabxanalarının, kitabxana
şəbəkələrinin yaradılması və onların bir-biri və beynəlxalq şəbəkələrlə inteqrasiyası ölkədə e-elm
və e-təhsilin inkişafını və inteqrasiyasını sürətləndirəcəkdir. Nəticədə kitabxana xidmətinin
keyfiyyətinin və operativliyinin təmin edilməsi ilə ölkənin elm və təhsil qurumlarında aparılan
elmi-tədqiqat və tədris işlərinin, kadr hazırlığının səmərəliliyinin yüksəldilməsinə, elm və təhsilin
müasir dünya standartları səviyyəsində inkişafına, dünya elm və təhsil məkanına sürətlə
inteqrasiyasına nail olunacaqdır.
Bu iş Azərbaycan Respublikasının Prezidenti yanında Elmin İnkişafı Fondunun maliyyə
yardımı ilə yerinə yetirilmişdir – Qrant № EİF-2014-9(24)-KETPL-14/02/1
İnformasiya cəmiyyəti problemləri, 2017, №1, 35–40
40 www.jpis.az
Ədəbiyyat
1.
Əliquliyev R. M., Ələkbərov R. Q., Fətəliyev T. X. Elektron elm: cari vəziyyəti, problemləri
və perspektivləri // İnformasiya Texnologiyaları Problemləri, 2015, №2, s. 4-15.
2.
Армс В. Электронные библиотеки (перевод с англ.). М.: ПИК ВИНИТИ, 2001, 274 с.
3.
Багрова И.Ю. Электронная библиотека (по материалам англоязычной печати 2000 – 2004
гг.) // Библиотековедение, 2005, № 4, c.50–57.
4.
Breaks M. The UK Electronic Libraries Programme // Proceedings of the IATUL
Conferences, p. 4, http://docs.lib .purdue edu/iatul/1998/papers/4
5.
National Digital Library Program, http://memory.loc.gov-/ammem/dli2/html/lcndlp.html
6.
http://www.dlib.org/dlib/april99/04rusch-feja.html
7.
Matsumura
T. The digital library in Japan,
http://www.ukoln.ac.uk/-services/papers/bl/blri078/content/repor~17.htm#39
8.
http://www.elibrary.ru
9.
Григянец
Р.Б., Лаужель Г.О., Степанцова
Е.В. Корпоративные системы и технологии
автоматизации библиотек в Беларуси // Информатика, 2013, №2(238), c. 123–131.
10.
http://www.library.by
11.
http://www.cabmin.gov.az
12.
http://www.president.az
13.
“Azərbaycan Respublikasında informasiya cəmiyyətinin inkişafına dair 2014-2020-ci illər
üçün Milli Strategiya”nın təsdiq edilməsi haqqında Azərbaycan Respublikası Prezidentinin
Sərəncamı, 02.04.2014-cü il, http://www.president.az
14.
Open Definition, http://www.opendefinition.org
15.
Miller
P. Web 2.0: Building the New Library // Ariadne 45, October 2005,
http://www.ariadne.ac.uk/issue45/miller
16.
ScholarLib, https://www.scholar.lib.vt.edu
УДК 001:004.7
Фаталиев Tахмасиб X.
Институт Информационных Технологий НАНА, Баку, Азербайджан
depart3@iit.ab.az
О роли э-библиотек в формировании э-науки и э-образования
В статье рассмотрена роль э-библиотек как составной части информационного обеспечения
в формировании э-науки и э-образования. Исследовано влияние Web 2.0 на развитие э-
библиотек, э-науки и э-образования. Показаны возможности интеграции сетей библиотек
науки и образования.
Ключевые слова: э-библиотека, э-наука, э-образование, Web 2.0, наука 2.0, образование 2.0,
библиотека 2.0, сети э-библиотек.
Tahmasib Kh.Fataliyev
Institute of Information Technology of ANAS, Baku, Azerbaijan
depart3@iit.ab.az
About a role e-libraries in the formation of e-science and e-education
This article reviews the role of e-libraries as the main information tool in formation of e-science
and e-education. The impact of Web 2.0 on the development of e-libraries, e-science and e-
education is investigated. The opportunities provided by integration of scientific and educational
library networks are shown.
Keywords: e-library, e-science, e-education, Web 2.0, Science 2.0, Education 2.0, Library 2.0,
e-library networks.
Dostları ilə paylaş: |