VİDADİ MURADOV
“Azərxalça” Açıq Səhmdar
Cəmiyyətinin İdarə Heyəti
vidadimuradov@gmail.com
NAXÇIVAN DİYARINDA TİCARƏT-SƏNƏTKARLIQ OBYEKTLƏRİNİN TİKİNTİSİ
(XVIII-XX ƏSRİN ƏVVƏLLƏRİ)
Naxçıvan diyarı hələ çox qədim zamanlardan ticarət yolları üzərində çox əlverişli mövqeyə
malik olmuşdur. Şərq ölkələri ilə Avropa arasında ticarət əlaqələrinin inkişafında uzan müddət
mühüm rol oynamış Böyük İpək Yolunun bir neçə qolunun Naxçıvan ərazisindən keçməsi bütün
orta əsrlər dövründə diyarda ticarətin, sənətkarlığın və kənd təsərrüfatının inkişafına ciddi təkan
vermişdir. Heç də təsadüfi deyildir ki, müxtəlif dövrlərdə diyarda olmuş tacirlər, səyyahlar,
diplomatlar və digərləri Naxçıvan diyarında yerləşən şəhərləri mühüm ticarət və sənətkarlıq
mərkəzləri kimi xarakterizə edirlər. XIII əsrin əvvəllərində tərtib edilmiş mənbələrdən birində
göstərilir ki, Naxçıvan şəhərində yaşayan əhali “bədii oyma sənətində, xörəklərin bişirilməsində
fərqlənirlər, ağacdan (xüsusilə əl-xələnc ağacından) müxtəlif əşyaların hazırlanmasında mahirdirlər
və həmin əşyaların əksəriyyəti müxtəlif ölkələrə ixrac olunur”[15,s.208].
XVII əsrin ortalarında
Azərbaycanda olmuş türk səyyahı Övliya Çələbi Naxçıvan şəhərində gördüyü istər ticarət-
sənətkarlıq obyektlərindən, istərsə də burada istehsal edilən sənətkarlıq məhsullarından böyük
heyranlıqla danışır [9,s.13].
Sənət istehsalının və ticarətin inkişafı bu işlərin həyata keçirilməsi üçün tələb olunan
tikililərin inşaasını zəruri edirdi. Bir qədər qəribə görünsə də, tikinti sənətinin digər sahələri kimi,
ticarət-sənətkarlıq obyektlərinin tikintisində müharibələr də az rol oynamırdı. Vaxtaşırı təkrar
olunan Səfəvi-Osmanlı müharibələri ticarət-sənətkarlıq obyektlərinin də yerlə yeksan edilməsinə
gətirib çıxardığından hərbi əməliyyatlar başa çatdıqdan sonra onları yenidən tikmək və yaxud bərpa
etmək zərurəti yaranırdı. Bu məsələ haqqında 1673-cü ildə Naxçıvanda olmuş fransız səyyahı
J.Şardenin məlumatları daha aydın təsəvvür yaradır: “Naxçıvan səksən faiz dağıdılmış böyük bir
şəhərdir. Bu şəhər yavaş-yavaş məskunlaşır və bərpa olunur. Şəhərin mərkəzi hal-hazırda yenidən
qurulmuş və əhali ilə məskunlaşdırılmışdır. Orada böyük bazarlar və hər tərəfdə hər cür mal və
yeyinti məhsulları satılan dükanlarla dolu örtülü küçələrdən ibarətdir. Naxçıvanda beş karvansara,
hamamlar, bazar meydanları, tütün və qəhvə verən iri mehmanxanalar və təxminən iki min ev
var”[10,s.63]. Heç şübhəsiz ki, fransız səyyahının sadaladığı ticarət-sənətkarlıq obyektlərinin böyük
əksəriyyəti 1639-cu ildə Səfəvi-Osmanlı müharibələri başa çatdıqdan sonra inşa edilmişdi.
Naxçıvan diyarında tikinti sənətinin bir çox sahələrinin, o cümlədən ticarət-sənətkarlıq
obyektlərinin inşaasına ciddi təsir göstərən amillərdən biri də bu sahədə istifadə edilən tikinti
materiallarının bolluğu idi. Doğrudur, bu sözləri Azərbaycanın əksər bölgələrində geniş istifadə
edilən daş və ağac materialları haqqında söyləmək olmaz. Naxçıvan diyarında meşə örtüyü hədsiz
dərəcədə yoxsul olduğundan tikinti işlərində ağac materiallarından olduqca az istifadə edilirdi.
Əsasən yaşayış evlərinin tikintisi zamanı ağac materiallarına olan tələbat əhalinin bu məqsədlə öz
həyətlərində yetişdirdikləri qovaq ağacları və Türkiyənin Qars vilayətindən idxal hesabına
ödənilirdi[13,s.5-6].
Əldə olan materiallar göstərir ki, Naxçıvan diyarında tikinti işlərində, o cümlədən ticarət-
sənaye obyektlərinin inşaası zamanı daha çox çiy və bişmiş kərpicdən istifadə olunurdu. Yerli
torpağın tərkibinin gillə zəngin olması kərpic istehsalı üçün daha əlverişli şərait yaradırdı. Bu
sahənin inkişafına mənfi təsir göstərən əsas amil müharibələrin yaratdığı qeyri-sabit hərbi-siyasi
şəraut olurdu. Müharibələr zamanı tikinti işlərinin həcminin azalması kərpicə olan tələbatı
azaltdığından onun istehsalında da geriləmə müşahidə edilirdi. Rusiya-İran müharibələrinin
gedişində diyarda cəmisi 3 kərpickəsmə müəssisəsinin fəaliyyət göstərməsi[1,v.1-125] də bu fikri
təsdiq edir. Müharibədən sonra başlanmış dinc dövr kərpic istehsalının inkişafına müsbət təsir
göstərmişdi. XIX əsrin ortalarından başlayaraq Naxçıvan diyarının hər iki şəhərində - Naxçıvanda
və Ordubadda kərpic istehsal edən müəssisələrin sayı bir neçə dəfə artaraq müvafiq olaraq 13 və 15-
ə çatmışdı[17,s.189].
Kərpickəsmə müəssisələri, bir qayda olaraq şəhərlərin kənarında, xammal ehtiyatlarının
yaxınlığında yerləşirdi. Olduqca ağır zəhmət tələb edən bu iş bir neçə mərhələdən keçirdi. Əvvəlcə
gilli torpaq istehsal yerinə daşınır, sonra isə su ilə qarışdırılaraq palçıq halına salınırdı. Kərpicin
möhkəmliyini təmin etmək üçün palçığın tərkibinə doğranmış saman və xırda daşlar
qatılırdı[13,s.44]. Bundan sonra hazır palçıq xüsusi qəliblərə dolduralaraq kərpic formasına
salınırdı. Hazır vəziyyətə gətirilmiş kərpic bir neçə gün günəş şüaları altında qurudulduqdan sonra
tikinti işləri üçün yararlı hesab edilird. Tədqiq edilən dövrdə Naxçıvan diyarında inşa edilmiş
ticarət-sənətkarlıq obyektlərinin əksəriyyətində əsas tikinti materialı kimi məhz bu üsulla
hazırlanmış kərpicdən istifadə edilirdi.
Tədqiq edilən dövrdə Naxçıvan diyarında ticarət-sənətkarlıq obyektlərinin tikintisində bişmiş
kərpicdən də istifadə edilirdi. Belə kərpiclər, adətən çiy kərpiclərin iri həcmli sobalarda bir neçə gün
fasiləsiz bişirilməsi yolu ilə hazırlanırdı[6,s.192; 12,s.258-259]. Bu yolla istehsal edilən kərpic
gözəl görkəmə malik olmaqla yanaşı tikinti üçün daha davamlı hesab edilirdi.
Göründüyü kimi, XVIII əsrin ikinci yarısı-XX əsrin əvvəllərində Naxçıvan diyarında ticarət
və sənətkarlıq obyeklərinin inşasını zəruri edən bütün səbəblər mövcud idi. Bir tərəfdən diyarın
beynəlxalq ticarət yolları üzərində mühüm mövqe tutması, digər tərəfdən isə daxili ticarətin
Naxçıvan əhalisinin təsərrüfat fəaliyyətində mühüm yer tutması burada bazarların, karvansaraların,
sənətkar emalatxanalarının, ticarət dükanlarının, körpü və hamamların tikintisini zəruri edirdi. Belə
obyektlərin şəhər hakimlərinin mühüm gəlir mənbələrindən birini təşkil etmələri də onların tikintisi
üçün əlverişli şərait yaradırdı[6,s.146-147].
İstər Naxçıvan, istərsə də Ordubad şəhərlərində ticarət və sənətkarlıq obyektlərinin inşa
edildiyi əsas mərkəz bazar meydanları idi. Azərbaycanın əksər şəhərlərində iç qala və bazar
meydanı ayrıca kompleks təşkil etdikləri halda Naxçıvan şəhərində bunlar vahid memarlıq
kompleksində birləşmişdilər. “Naxçıvan sancağının müfəssəl dəftəri”ndə verilən məlumatlardan
aydın olur ki, XVIII əsrin əvvəllərində Naxçıvan şəhərində bir neçə bazar var idi ki, onlardan biri
“Xətib çarşısı” adlandırılırdı[8,s.31]. Bu dövrdə şəhərdə qeydə alınmış 93 ticarət dükanı və sənətkar
emalatxanasının əksəriyyəti “Xətib çarşısı”nda tikilmişdi. Bu obyektlərdən 24-ü Keçə Hüseyn, 44-ü
Məlik Kəşa adlı şəxslərə məxsus idi. Onların hər biri ayda 10 ağca hesabı ilə icarəyə
verilirdi[8,s.31].
Naxçıvanla müqayisədə kiçik olmasına baxmayaraq Ordubad şəhərində tikilmiş ticarət və
sənətkarlıq obyektlərinin sayı daha çox idi. 1727-ci ildə şəhərdə ancaq Sultan Muradın vəqflərinə
aid olan 150 dükan qeydə alınmışdı ki, onlardan da hər birinin aylıq icarə haqqı 40 ağça təşkil
edirdi. Ordubadda tikilmiş ticarət və sənətkarlıq obyektlərinin daha bir xüsusiyyəti onların yalnız
bazar meydanında deyil, ayrı-ayrı məhəllələrə səpələnməsi idi. “Naxçıvan sancağının müfəssəl
dəftəri”ndə Ordubadın adı göstərilməyən məhəllələrindən birində 1 karvansara, 11 dükan və
emalatxana, Anbaras məhəlləsində isə 3 karvansara, 19 dükan və emalatxana qeydə
alınmışdı[8,s.126-133].
Əldə olan məlumatların müqayisəsi göstərir ki, XVIII əsrin əvvəllərində olmuş türk
istilasından yüz il sonra, daha doğrusu Rusiya işğalının başlanğıcında Naxçıvan diyarında ticarət və
sənətkarlıq obyektlərinin tikintisində müəyyən artım baş vermişdi. Əgər 1727-ci ildə Naxçıvan
bazarında, yuxarıda qeyd edildiyi kimi, cəmi 93 dükan və emalatxana qeydə alınmışdısa, 1831-ci
ildə burada tikilmiş ancaq sənətkar emalatxanalarının sayı 279-a çatırdı ki, bunların da 31-i
karvansaralarda, 248-i isə bazar meydanında yerləşirdi[2,v.11].
Göründüyü kimi, yüz il ərzində Naxçıvan şəhərində onlarla ticarət və sənətkarlıq obyekti
tikilib istifadəyə verilmişdi. Siyasi sabitliyin daimi pozulduğu bu yüz il ərzində Naxçıvanda ticarət
və sənətkarlıq obyektlərinin tikintisində baş vermiş bu artım qəribə görünə bilər. Lakin nəzərə alsaq
ki, şəhər əhalisinin yaşayışı daha çox bu obyektlərin fəaliyyətindən asılı idi, onda belə qənaətə
gəlmək olar ki, Naxçıvan diyarının şəhərlərində müharibələr nəticəsində dağıdılan obyektlər nəinki
tezliklə bərpa edilir, hətta yeniləri də inşa olunurdu. Görünür, elə bunun nəticəsi idi ki, bütün XIX
əsr ərzində cəmi 3-4 min nəfər əhalinin yaşadığı Ordubad şəhərində, 1859-cu il məlumatına görə,
308 dükan və emalatxana fəaliyyət göstərirdi [16,s.50]. Ehtimal etmək olar ki, bu obyektlərin
əksəriyyəti XVIII-XIX əsrlərdə tikilib istifadəyə verilmişdi.
Naxçıvan diyarında inşa edilmiş ticarət-sənətkarlıq obyektləri arasında öz memarlıq üslubuna
və say çoxluğuna görə karvansaralar xüsusilə seçilirdilər. Diyarın əsrlər boyu tranzit ticarət yolları
üzərində yerləşməsi burada karvansara tikintisini şərtləndirən əsas amillərdən idi. Dövrümüzədək
gəlib çatmış abidələrin sayına və yazılı mənbələrin məlumatlarına əsaslanan M.X.Heydərov göstərir
ki, Azərbaycanda karvansara tikintisi orta əsrlərin heç bir dövründə XVII əsrdə olduğu kimi geniş
yayılmamışdı[12,s.254]. Bu dövrdə Azərbaycanda tikilmiş karvansaraların xeyli hissəsi Naxçıvanın
payına düşürdü. XVII əsrin ortalarında Naxçıvanda olmuş Övliya Çələbinin məlumatları da bunu
təsdiq edir. Türk səyyahı Naxçıvan şəhərində tikilmiş çoxsaylı tikililər arasında 20
“mehmanxana”nın- karvansaranın olduğunu göstərir [9,s.13].
Ordubad şəhərində də karvansara tikintisi geniş miqyas almışdı. “Naxçıvan sancağının
müfəssəl dəftəri”ndə 1727-ci ildə Ordubad şəhərində 5 karvansaranın olması haqqında məlumat
verilir. Bu karvansaralardan üçü Anbaras məhəlləsində tikilmişdi. Sadıq Qasım oğlu və Ağa Mirzə
oğlu adlı şəxslərə məxsus karvansaralar isə, çox güman ki, bazar meydanında yerləşirdi[8,s.126-
133]. “Naxçıvan əyalətinin statistik təsviri”ndə də Ordubad karvansaraları haqqında maraqlı
məlumatlar verilir. Həmin məlumatlardan aydın olur ki, “əvvəllər Ordubadda 6 karvansara və
böyük bazar var idi; hazırda bazarın çox kiçik hissəsi (cəmisi 80 dükan) salamat qalmışdır, 6
karvansaradan isə ancaq ikisi salamatdır” [13,s.194].
Azərbaycanın digər bölgələrində olduğu kimi, Naxçıvan diyarının şəhərlərində də
karvansaralar adətən ya şəhərin mərkəzi meydanında, ya da meydana bitişik məhəllələrdə tikilirdi.
Bu karvansaralarda tacirlərin istirahəti və ticarət əməliyyatları aparmaları üçün bütün şərait
yaradılırdı. Hələ XVII əsrdə Azərbaycanda olmuş bir çox xarici ölkə səyyahları bu karvansaraları
bütün Şərqin ən rahat və təhlükəsiz karvansaraları kimi qiymətləndirirdilər. Fransız səyyahı
J.Şardenin verdiyi məlumata görə, karvansaralar, adətən hündürlüyü 20 metrə çatan kvadrat formalı
böyük tikililər olurdu. Hər bir tacir üçün ayrıca tikilmiş otaqların uzunluğu 4-5 addım olur və
onların hamısında ocaq (kamin) quraşdırılırdı. Burada ticarət karvanlarındakı yük heyvanları
tövlələr və qulluqçular üçün ayrıca otaqlar da inşa olunmuşdu. Karvansaraların xüsusi bir guşəsi
yemək hazırlamaq üçün nəzərdə tutulurdu [12,s.253]. Daha böyük karvansaraların birinci
mərtəbəsində tacir dükanları ilə yanaşı, sənətkar emalatxanaları da yerləşirdi [18,s.610].
Naxçıvan diyarında şəhər karvansaraları ilə yanaşı, xeyli sayda yolüstü karvansaralar da
tikilirdi. XVIII əsrin sonlarında Azərbaycanda olmuş səyyahlardan biri ticarət yolları üstündə
tikilmiş karvansaraların təyinatı və quruluşu haqqında xeyli maraqlı məlumat verərək yazır: “Yol
boyunca bir-birindən müəyyən məsafələrdə yerləşən karvansaralar böyük olur və yonulmuş
daşlardan tikilir. Onların daşları yastı, otaqları tağlıdır. Karvansaraların dörd tərəfində bürclər
tikilmişdir ki, bunlar da onları karvanlar üçün təkcə sığınacaq deyil, həm də quldurlardan qorunmaq
üçün bir vasitəyə çevirir” [11,s.15].
Əksər hallarda həm şəhər, həm də yolüstü karvansaralar yerli hakimlər tərəfindən tikdirilərək
ayrı-ayrı şəxslərə icarəyə verilirdi. Bəzən yolüstü karvansaralar varlı adamlar tərəfindən xeyriyyə
məqsədilə də tikdirilirdi. XVIII əsrin sonlarında Azərbaycanda olmuş səyyahlardan biri belə
karvansaraların tikintisindən bəhs edərək yazırdı: “Asiyada insanlıq üçün belə bir gözəl adət vardır
ki, varlı adamlar yollar üzərində zəruri olan yerlərdə tacirlər üçün karvansaralar
tikdirirdilər”[14,s.145].
Fransız səyyahı J.Şardenin məlumatına əsaslanan M.X.Heydərov göstərir ki, yolüstü
karvansaraları şəhər karvansaralarından fərqləndirən yeganə cəhət onların birmərtəbəli
tikilməsindədir [12,s.253]. Lakin son orta əsrlərdə Azərbaycanda ikimərtəbəli tikilmiş yolüstü
karvansaralara da rast gəlmək mümkündür. Belə karvansaralardan biri haqqında 1796-1797-ci
illərdə rus ordusunun Azərbaycana yürüşünün iştirakçısı olmuş A.Araratski məlumat verir. Bakı-
Salyan karvan yolunun üzərində yerləşən bu karvansara qala şəklində ikimərtəbəli tikilmişdi
[14,s.144-145].
Tədqiq edilən dövrdə Naxçıvan diyarında tikilmiş yolüstü karvansaralar haqqında mənbələrdə
xeyli məlumata rast gəlmək mümkündür. Belə karvansaralardan biri Naxçıvandan Gürcüstana
gedən yolun üstündə, Qarabağlar kəndindən 4 verst cənubda yerləşirdi. V.Qriqoryevin XIX əsrin
30-cu illərinə aid olan təsvirindən aydın olur ki, artıq dağıdılmış vəziyyətdə olan bu karvansara
yonulmuş gilli-qumlu daşlardan tikilmişdi. Karvansara tacirlərin rahat və təhlükəsiz yaşamaları
üçün bütün tələblərə cavab verirdi. Burada malların saxlanılması, tacirlərin dincəlməsi və yük
heyvanlarının qorunması üçün ayrıca otaqlar tikilmişdi. Əslində böyük bir kompleks olan
karvansaranın ətrafına ümumi uzunluğu 50 sajenə çatan hündür müdafiə divarı çəkilmişdi [13,s.78].
Tacirlərin qısa müddətə dayanması və istirahəti üçün kiçik ölçülü yolüstü karvansaralar da
tikilirdi. Belə karvansaralardan biri Şahbuz rayonunun Biçənək kəndinin şimalında, meşənin
işərisində tikilmişdi. Tikilmə tarixi XVII-XVIII əsrlərə aid olan bu karvansara iri qaya
parçalarından dördkünc formada inşa edilmişdi və iki otaqdan ibarət idi. Karvansaranın ölçülərinin
çox kiçik olması tacirlərin ondan ancaq qısamüddətli dayanacaq kimi istifadə etdiklərini göstərir
[7,s.37].
Naxçıvan diyarının Hindistanı və Çini Qara dəniz sahilləri və Avropa ölkələri ilə birləşdirən
tranzit ticarət yolları üzərində yerləşməsi körpü tikintisini də zəruri edirdi. Əksər hallarda daşdan və
kərpicdən, nadir hallarda isə ağacdan tikilən körpülər daxili ticarətin inkişafı ilə yanaşı, Naxçıvan
diyarının Azərbaycanın digər bölgələri ilə, İran, Türkiyə, Gürcüstan və s. ölkələrlə ticarət əlaqələri
saxlamasında mühüm rol oynayırdı. Bununla belə, körpülər həm də hərbi əməliyyatlar zamanı
orduların hərəkəti üçün də istifadə olunduğundan mühüm strateji əhəmiyyətə malik olur və elə bu
səbəbdən də tez-tez dağıdılırdılar. Naxçıvan diyarında hələ orta əsrlərin əvvəlki dövrlərində tikilmiş
körpülərin xeyli hissəsi XVI-XVII əsrlərdə baş vermiş Səfəvi-Osmanlı müharibələri zamanı
yararsız hala salınmışdı. Hələ XII-XIII əsrlərdə Culfa yaxınlığında Araz çayı üzərində tikilmiş
böyük körpü XVII əsrin əvvəllərində Səfəvi şahı I Abbasın əmri ilə uçurdulmuşdu[12,s.255]. Orta
əsr Azərbaycan memarlığının incilərindən hesab edilən Araz çayı üzərindəki Xudafərin körpüsü
1797-ci ildə Qarabağ hakimi İbrahimxəlil xanın əmri ilə dağıdılmışdı [3,s.434; 6,s.150].
Vaxtaşırı baş verən dağıntılara baxmayaraq, Naxçıvan diyarından axan çayların üzərində son
orta əsrlərdə, az miqdarda da olsa yeni körpülər tikilmişdi. Belə körpülərdən biri Ordubad
rayonunun Aza kəndində, Gilançayın üzərində XVII əsrin əvvəllərində tikilmişdir. Qırmızımtıl
rəngli, yonulmuş yerli daşlardan tikilmiş Aza körpüsü beşaşırımlıdır. 1997-ci ildə aparılmış əsaslı
tikinti-bərpa işlərindən sonra əvvəlki görkəminə qaytarılan körpü hazırda işlək vəziyyətdədir
[7,s.31-32].
Tədqiq olunan dövrdə Naxçıvan diyarında tikilmiş körpülərin xarakterik nümunəsi kimi
Ordubad rayonunun Biləv kəndinin cənubunda, Gülançayın üzərində tikilmiş körpünü göstərmək
olar. Tikilmə tarixi XVIII əsrə aid edilən beşaşırımlı bu körpü əhəng məhlulu ilə bərkidilmiş iri çay
daşlarından və qaya parçalarından hörülmüşdür. Uzunluğu 55, eni isə 3,3 metr olan körpünün
tağabənzər aşırımları dördkünc dayaq sütunları üzərində tikilmişdir. Bu günümüzə qədər körpünün
yalnız bir hissəsinin qalıqları gəlib çatmışdır [7,s.43-44].
Ordubad rayonunun ərazisindən axan Ələhi çayı üzərində tikilmiş Bist və Ələhi körpüləri də
orijinal memarlıq xüsusiyyətlərinə malikdir. Hər iki körpü Böyük İpək Yolunun qolları ilə hərəkət
edən ticarət karvanlarına xidmət etmək üçün inşa edilmişdi. Tikildiyi ərazinin relyefi hər iki
körpünün ölçülərinin müəyyənləşməsində əsas rol oynamışdır. Belə ki, ikitağlı tikilmiş Bist
körpüsünün uzunluğu 21, hündürlüyü 10, eni isə 3,8 metrdir[7,s.46]. Tağlarının sayı elə bu qədər
olan Ələhi körpüsü daha böyük ölçülü idi. Onun uzunluğu 30, eni 3, hündürlüyü isə 6,5 metr təşkil
edirdi. Qərb oturacağı qaya üzərində hörülmüş bu körpü hazırda yaxınlıqda yeləşən Ələhi kənd
əhalisi tərəfindən istifadə edilir [7,s.46].
Naxçıvan diyarında tikinti sənətinin geniş yayılıb inkişaf etmiş ənənəvi sahələrindən biri də
hamam tikintisi olmuşdur. Burada tikilmiş hamamlar özlərinin orijinal memarlıq üslublarına və
bəzək elementlərinə görə Övliya Çələbini heyran qoymuşdu. Türk səyyahı yazır ki, Naxçıvan
şəhərində fəaliyyət göstərən 7 hamamın hər birinin divarları, tavanları və qapıları çini kaşılarla
bəzədilmişdir. Zal Paşa hamamının təsvirini verən Ö.Çələbi göstərirdi ki, onun “bütün qapı və
divarları kaşılarla, döşəməsi isə boz, sumağı və tünd-qırmızı mərmər daşlarla örtülmüşdür. Elə işıqlı
hamamdır ki, onun bütün pəncərələri büllurdandır. Həyətin ortasında böyük bir hovuz vardır. Gözəl
havası olan bu hamamın tərifini, təmizliyini və gözəlliyini şərh və təsvir etməkdə qələm belə
acizdir” [9,s.13].
Əldə olan materiallar göstərir ki, Naxçıvan diyarında əvvəlki əsrlərdə geniş miqyas almış
hamam tikintisi tədqiq etdiyimiz XVIII-XIX əsrlərdə də davam etdirilmişdir. Maraqlı burasıdır ki,
hamam tikintisi yalnız Naxçıvan və Ordubad şəhərlərində deyil, əhalisi nisbətən çox olan kəndlərdə
də aparılmışdır. Yazılı mənbələrin məlumatları və müasir dövrümüzədək gəlib çatmış hamamların
memarlıq xüsusiyyətləri göstərir ki, XVIII-XIX əsrlərdə Naxçıvan diyarında hamam tikintisi üzrə
ixtisaslaşmış peşəkar sənətkarlar çalışmışlar. Təəssüf ki, onların adları dövrümüzədək gəlib
çatmamışdır. Hamamların tikintisi zamanı kvadrat formasında yonulan dağ daşlarından, bişmiş
kərpicdən və əhəng məhlulundan istifadə edilmişdir.
XVIII-XIX əsrlərdə Naxçıvan və Ordubad şəhərlərində tikilmiş hamamlar həm özlərinin daha
əzəmətli görkəminə, həm də kifayət qədər möhkəm tikilmələrinə görə fərqlənirdilər. Bu baxımdan
XVIII əsrin ortalarında Naxçıvan şəhərində inşa edilmiş “İsmayıl xan” hamamı xüsusilə seçilirdi.
“Naxçıvan abidələri ensiklopediyası”nda hamamın tikintisi Naxçıvan xanlarından biri olması iddia
edilən İsmayıl xanın adı ilə bağlanılır [7,s.211-212]. Lakin, “Naxçıvan xanlığı” adlı əsərdə bu
xanlığı idarəetmiş hakimlər arasında belə bir xanın adı çəkilmir [4,s.48-106]. Lakin tədqiqatlardan
məlum olur ki, hamam Naxçıvanın “xan” rütbəsi daşıyan general İsmayıl xan Naxçıvanskinin adı
ilə bağlıdır və XX əsrin əvvəllərində onun tərəfindən tikdirilmişdir.
“İsmayı xan”hamamı bütünlükdə bişmiş kərpicdən inşa edilmişdir. Ümumi sahəsi 526 m
2
olan hamam giriş, xidmət zalı, çarhovuz, xəzinə və ocaqxanadan ibarətdir. Hamamın bəzi
hissələrinin bəzədilməsində, çox güman ki, yerli istehsalın məhsulu olan kaşılardan da istifadə
edilmişdir. Son dövrdə əsaslı şəkildə təmir və bərpa edilmiş hamam yaxşı vəziyyətdədir və tarixi
abidə kimi qorunur [7,s.212].
Tikintisi XVIII-XIX əsrlərə aid edilən Ordubad hamamının da inşası zamanı ancaq bişmiş
kərpicdən istifadə edilmişdir. Özünün dördbucaqlı forması ilə digər hamamlardan fərqlənən
Ordubad hamamının əsas hissələrini vestübül, soyunma və yuyunma otaqları təşkil edirdi.
Hamamdan istifadə edənlərin rahatlığını təmin etmək üçün soyunma və yuyunma zallarının
divarları taxçalarla təmin olunmuşdu. Hamama su yaxınlıqdakı Qarahovuz çeşməsindən saxsı
borular vasitəsilə daxil olurdu [7,s.387-388].
Tədqiq edilən dövrdə Naxçıvan diyarında xeyli sayda kənd hamamları da tikilmişdir. Buna
misal olaraq, XVIII əsrin ortalarında Babək rayonunun Nehrəm kəndində Əsədulla Kərim bəy adlı
şəxs tərəfindən tikdirilmiş Nehrəm hamamını, XVIII əsrin sonunda Şərur rayonunun Yenicə
kəndində Tovuz xanım adlı şəxs tərəfindən tikdirilmiş Yenicə hamamını, XVII-XVIII əsrlərə aid
edilən Yuxarı Əylis hamamını, XIX əsrin ikinci yarısında Kəngərli rayoununun Şahtaxtı kəndində
İsa Sultan tərəfindən tikdirilmiş Şahtaxtı hamamını göstərmək olar[7,s.373,435-436,469,471].
Naxçıvan diyarında inşa edilmiş kənd hamamları özlərinin bir sıra xüsusiyyətlərinə görə
şəhər hamamlarından fərqlənirdi. Şəhər hamamları ilə müqayisədə daha kiçik ölçülü olduğundan,
bu hamamların əksəriyyəti düzbucaqlı şəkildə tikilmişlər. Bununla belə, ümumi sahəsi, hətta şəhər
hamamlarından böyük olan kənd hamamları da inşa olunurdu. Məsələn, haqqında yuxarıda bəhs
olunan Ordubad şəhər hamamının ümumi sahəsi 413 m
2
təşkil etdiyi halda, Yenicə hamamının
ümumi sahəsi 650 m
2
-ə çatırdı[5]. Hamam səkkizbucaqlı zaldan, iki köməkçi otaqdan və
ocaqxanadan ibarət olmuşdur. Hamamın qızdırılması üçün döşəmənin altına yerləşdirilmiş saxsı
hava borularından istifadə edilmişdir. Hamam günbəzlərinin mərkəzində yerləşdirilmiş baca və
divarlardakı kiçik pəncərələr vasitəsilə işıqlandırılırdı [5].
ƏDƏBİYYAT
1. Azərbaycan DTA, f.24, siy.1, iş 1
2. Azərbaycan DTA, f. 24, siy.1, iş 353
3. Azərbaycan tarixi. 7 cilddə, III c., Bakı: Elm, 1999
4. Əliyev F., Əliyev M. Naxçıvan xanlığı. Bakı: Azərnəşr, 1996
5.Qənbərova G.Q. Yengicə kəndində hamam. //AMEA Naxçıvan Bölməsinin
“Xəbərləri”, №1, 2007
6.Mustafayev C.M. Xanlıqlar dövründə Azğrbaycanda sənətkarlıq. Bakı: Elm, 2002
7.Naxçıvan abidələri ensiklopediyası.Naxçıvan, 2008
8.Naxçıvan sancağının müfəssəl dəftəri.Tərcümə edənlər: Z.Bünyadov, H.
Məmmədov. Araşdırma, qeyd və şərhlərin müəllifi H.Məmmədov. Bakı: Elm, 2002
9.Övliya Çələbi. Səyahətnamə. Türk dilindən işləyəni və şərhlərin müəllifi
S.Onullahi. Bakı: Azərnəşr, 1997
10.Şarden J. Səyahətnamə. (Tərcümə edəni V.Aslanov). Bakı: 1994
11.Биберштейн М.Ф. Описание провинций, расположенных на левом берегу
Каспийского моря, лежащего между реками Терек и Куры. Перевод
С.Саламова. //НА ИИ НАН Азербайджана, инв. 466
12.Гейдаров М.Х. Города и городское ремесло Азербайджана XIII-XVII вв.
Баку: Элм, 1982
13.Григорьев В. Статистическое описание Нахичеванской провинции. Санкт-
Петербург: 1833
14.Жизнь Артемия Араратского. Москва: 1981
15.Миклухо- Маклай Н.Д. Географическое сочинение XIII века на
Персидском языке. //Ученые записки ИВ АН СССР, т. IX, 1954
16.Сборник статистических сведений о Кавказа. т.I, Тифлис: 1869
17.Сумбатзаде А.С. Промышленность Азербайджана в XIX в. Баку: Изд-во
АН Азерб. ССР, 1964
18.Чулков М. Историческое описание российской коммерции. т.II, кн. II, Москва, 1875
Dostları ilə paylaş: |