“Xalq qəzeti”. 013. 22 dekabr; 16 yanvar. N 283 S. Modernləşmə və ictimai şüur
Yüklə 92,14 Kb. Pdf görüntüsü
|
- Bu səhifədəki naviqasiya:
- Aydın ŞİRİNOV
| “Xalq qəzeti”.-2013.-22 dekabr; 16 yanvar.-N 283;8.-S.6;5.
Çünki bir tərəfdən elmi təfəkkürün inkişafı, digər tərəfdən isə insanların və onların həyatında baş verən dəyişikliklər istər şüurun mənbəyinin və istərsə də ictimai şüurun məzmun və strukturunda baş verən dəyişikliklərin səbəblərinin öyrənilməsini vacib tələb kimi elmin qarşısına qoyur. İnsan və cəmiyyət həyatında baş verən ictimai mahiyyətli hadisə dəyişikliklərinin əsasında istər şüur və istərsə də ictimai şüur amili dayandığına görə bu amili öyrənmədən, onun lokal və universal xassələrini açmadan nəyəsə nail olmaq mümkünsüzdür. Əgər şüur əvvəldən verilmiş, yaxud mövcud olan beyin potensialı və bu potensialın düzgün istiqamətlənməsi, yaxud istiqamətləndirilməsi ilə bağlıdırsa, ictimai şüur daha çox tərbiyə və cəmiyyət həyatında mövcud olan həyat tərzi ilə bağlıdır. Şüur real halda mövcud olanlar haqqında duyğu orqanlarının verdiyi informasiyaların təhlili ilə yanaşı, həm də özü-özünə referentlik edir. Bu referentlik beynin özünəməxsus olan xassədir və bu xassənin əmsalı müxtəlifdir. Yəni məşhur “ağ lövhə” nəzəriyyəsi beyin potensialının eyniliyinə yox, müxtəlif səviyyələrdə olan potensialın hərəkətə gətirilməsinə aid ola bilər. İstər təhsilin müxtəlif səviyyələrində, istərsə də elmin müxtəlif sahələrində qarşılaşdığımız faktlar bunu təsdiq edir. Əlbəttə, burada zəhmətkeşlik, iradə və məqsədyönlü fəaliyyət kimi amilləri də nəzərə almamaq olmaz. Şüur amili ictimai şüur üçün də əhəmiyyətli rol oynayır. Lakin ictimai şüur daha çox fərdin ictimailəşməsi, yaxud sosiallaşması ilə bağlıdır. Belə ki, sosiallaşmayan yüksək səviyyəli fərdi şüur daha çox zərər verə bilər. Sosiallaşmış, yaxud ictimailəşmiş şüur isə həm lokal, həm də universal əhəmiyyətli şüurdur. İctimai şüuru gündəlik həyatla, bu həyatın aşıladığı empirik, adi, yaxud kütlə şüurundan fərqləndirmək lazımdır. Bu baxımdan ictimai varlığın yaratdığı şüur heç də hələ ictimai şüur deyil. Adi, empirik, yaxud kütlə şüurudur. Bu şüurun tərkibində olan ictimailik elementləri isə adət-ənənə, arxetipiklik və mentalitetlə bağlıdır. Hərçənd bunlar heç də həmişəlik sabitliyə malik deyillər. Ya onların məzmununda tarixən bu və ya digər dəyişiklik əmələ gəlir, ya da bütövlükdə dəyişirlər. Buna görə nə adət-ənənəni, nə də mentaliteti və ona uyğun olaraq arxetipliyi mütləqləşdirmək, toxunulmaz bir şey kimi qəbul etmək olmaz. Əgər söhbət sosial genetikadan gedirsə, genetikanın özündə belə irsiliklə yanaşı, dəyişkənlik də vardır. Həm də seleksiya, irsən mövcud olanların müxtəlif cür cütləşdirilməsi yolu ilə ən yaxşı bir çeşidin alınması üsulları vardır. Deməli, insanın ağlı və praktik bacarığı hər şeyi dəyişdirmək, yeni olanı yaratmaq qabiliyyətinə malikdir. Lakin həmin yeni o zaman faydalı olur ki, bu, heç nəyə zərər vermədən bütövlükdə cəmiyyətə, insanlara xidmət edir. Bu isə ictimai şüurun qarşıya qoyduğu tələbdir. Burada biz adi, empirik kütlə şüuru səviyyəsindən daha yüksək şüur pilləsinə qalxırıq. Başqa sözlə, empirik şüurdan nəzəri şüur səviyyəsinə keçirik. Bu keçid ümumiyyətlə düşüncə, təfəkkür sahəsinə aid olduğu kimi, ictimai şüur səviyyəsinə də aiddir. Həm də ictimai şüur öz mahiyyəti etibarilə elmi şüur üçün də bir növ kamerton rolu oynayır. Elmi şüurla ictimai şüur müəyyən məsələlərdə hətta qarşı-qarşıya dururlar. Atom enerjisindən istifadə, biotexnologiyanın bəzi məsələlərində hələ bu gün də elmi şüurla ictimai şüur qarşı-qarşıya durur. Qloballaşma, beynəlmiləlçiliklə şovinizm, separatlılıq müasir dünyanın ciddi problemləridir. Mübahisələr davam etməkdədir. Yəqin ki, elm və texnologiyanın inkişafı ilə daha yeni məsələlər meydana çıxacaqdır. Əgər şüurun dəyişməsi bütövlükdə elmin texnika və texnologiyanın dəyişməsi, yeni paradiqmaların meydana gəlməsi və s. ilə bağlıdırsa, ictimai şüurun dəyişməsi, artıq deyildiyi kimi, insanların və cəmiyyətin həyatında baş verən dəyişikliklərlə bağlıdır. Bu dəyişikliklər köklü məzmuna malik olduqda ictimai şüurda baş verən dəyişikliklər də köklü, yaxud əsaslı olur. İctimai şüur cəmiyyət həyatının real gerçəkliyinə əsaslanan, lakin bu gerçəkliyin hamı üçün faydalı olan ümumi cəhətlərini əks etdirən abstrakt fenomendir. Lakin bu abstraksiya elə qurulmalıdır ki, o, gerçəklikdən uzaq düşməsin, gerçəkliyin əsas sütunları üzərində qurulsun, dünyagörüşünə, ümumi niyyətə çevrilərək yaşayış və fəaliyyətə istiqamət verə bilsin. Bu isə cəmiyyət həyatını, onun bütün tərəflərini, bu tərəflər arasındakı əlaqələri dərindən təhlil edə bilən nəzəriyyəçilərə aid olan məsələdir. Burada hansısa bir siyasi-ideoloji platformada deyil, vətəndaş mövqeyində dura bilmək vacibdir. Hər hansı siyasi-ideoloji platforma, yaxud platformalar isə buna uyğun, yaxud uyğun olmaya bilər. Buna görə də akademik R.Mehdiyevin dediyi kimi, əsas məsələ yeni təfəkkür, düşüncə tərzinin formalaşmasına xidmət edə biləcək yaradıcı ideya və şübhəsiz ki, əməli əhəmiyyəti olan tövsiyələr verməkdən ibarətdir. Burada siyasi ittihamlar, kimisə damğalamaq praktikası isə yanlış və zərərli praktikadır. İnsanların qarşılıqlı iqtisadi, siyasi, mədəni və s. münasibətləri əsasında yaranan və formalaşan cəmiyyətin mövcudluğunun əsası elədir ki, o, heç vaxt birdəfəlik verilmiş, yaxud müəyyənləşmiş alqoritmlərlə yaşamır və buna görə də o bu alqoritmləri tədrici, yaxud böyük sürətlə dəyişdirir. Həmişə eyni alqoritmlərlə yaşamaq darıxdırıcıdır, yerində saya-saya mürgüləməkdir. Müəyyənləşmiş, daşlaşmış ənənələr əsasında yaşamaqdır, yaxud ənənəvi cəmiyyətdə yaşamaqdır. Belə cəmiyyətlər inkişafdan geridə qalan cəmiyyətlərdir. Buna görə də ictimai şüurun daşıyıcıları olan insanlar mövcud ictimai mühitdə ya islahatlar aparmaq, hansısa yenilikləri gətirmək, ya da mövcud olanı köklü surətdə dəyişdirmək niyyəti ilə çıxış edirlər. Lakin bu elə prosesdir ki, burada bir nəfər deyil, böyük bir ictimailəşmiş fəal qüvvə iştirak edir. Bu ictimailəşmiş fəal qüvvə isə daha fəal, kreativ liderlərin ətrafına toplaşır. Deməli, ictimai varlıq heç də özü-özünə yox, insanların düşüncə və fəaliyyəti əsasında dəyişir. Lakin bu düşüncə və fəaliyyət son dərəcə ölçülüb-biçilmiş və planlı halda olmalıdır. Belə olmadıqda keçən əsrin 80-ci illərinin sonunda və 90-cı illərinin birinci yarısında baş verən dağılma halı meydana çıxa bilər. Təsadüfi deyil ki, tanınmış rus filosofu A.Zinovyev “perestroykanı” “katastroyka” (uçurub-dağıtma) adlandırırdı. Yəni bütün ziddiyyətlərinə, çatışmazlıqlarına baxmayaraq, böyük bir imperiya birdən-birə, heç kimin təsəvvürünə belə gətirə bilmədiyi bir sürətlə uçulub dağıldı. Tarixdə mövcud olan imperiyaların heç biri belə bir sürətlə dağılmamışdı. Bu dağıntı iqtisadi, siyasi, sosial həyatla birlikdə mənəvi sahədə, ictimai şüurda da bir boşluq, çaşqınlıq yaratdı. Nəyə inanmaq, kimə inanmaq, nəyi ideal saymaq məsələsi bütün kəskinliyi ilə meydana çıxdı. Axı insanın təbiəti elədir ki, o, həmişə hansısa bir ümidlə, nəyi isə gözləməklə, hansısa bir arzuya çatmaq ümidi ilə yaşayır. Bunlar həm ayrıca bir fərdə, həm də cəmiyyətə xas olan dəyərlərdir. Fərq isə şüur, dərketmə səviyyəsindən asılıdır. Kimi öz fərdi həyatı səviyyəsində, kimi isə bütövlükdə cəmiyyət səviyyəsində düşünür. Hətta dünya səviyyəsində düşünənlər də az deyil. Əlbəttə, bunlar daha çox filosoflardır. Çünki fəlsəfi düşüncənin mahiyyəti elədir ki, o, hər hansı konkret şey, hadisə və məkan çərçivəsindən kənara çıxır, universal olana doğru gedir. Cəmiyyət həyatında təsəvvürə belə gəlməyən sürətli dəyişiklik mənəvi sahədə də boşluq yaradır. Bu boşluğa hansısa bir ictimai ideal daxil ola bilməyəndə (belə ictimai idealı işləyib hazırlamaq, onu inanc formasına salmaq çox çətin və mürəkkəb məsələdir) oraya çox böyük sürətlə din daxil olmağa başlayır. Çünki din insana həm bu dünyada yaşamaq üçün, həm də ölümdən sonrakı əbədi dünya üçün ruha xoş gələn, onun rahatlığını təmin edən vədlər verir. Həm də bu, çox sadə və anlaşılan olduğu üçün əksəriyyətin ruhuna daxil ola bilər. Onun irrasional məqamlarına gəldikdə isə bu, heç sadə adamları maraqlandırmır da. Onlar dini doqmaları sadəcə olaraq inanc kimi qəbul edir və ona riayət etməyə başlayırlar. Din insanı öz həyatı ilə razılaşmağa, taleyi ilə barışmağa, yaşadığı kimi yaşamağa və Allaha dua edərək onun yardımına ümid etməyə çağırır. Təmkinlilik, dözümlülük dinin əsas pesfulatlarındandır. Lakin sadəcə olaraq dəb xatirinə, ümumi əhval-ruhiyyəyə uyğun olmaq xatirinə dinə tapınanlara da rast gəlinir. Hətta bir neçə surə və ayəni əzbərləyərək yeri gəldi-gəlmədi onları söyləyənlər və özləri başa düşdüyü səviyyədə şərh edənlərə də rast gəlmək mümkündür. Belə adamlar dinin tarixindən, onun əsas mahiyyəti, insan və cəmiyyət həyatındakı rolunu başa düşməkdən çox-çox uzaqdırlar. Onlar üçün əsas məsələ dəbə, mühitə uyğunlaşmaqdır. Belə adamlar dinə də öz maraqları çərçivəsində yanaşırlar. Din kimi müqəddəs bir inanc mənbəyindən də qazanmaq məqsədi ilə istifadə edirlər. Din isə özünün bütün mahiyyəti ilə belə şeylərin əleyhinədir və onu lənətləyir. Əslində elə akademik R.Mehdiyevin işlətdiyi “marginallaşmış ictimai şüur” anlayışı da belələrinə aiddir. Çünki bunlar öz həyat və yaşayışlarını hansısa bir ardıcıl pozitiv əhəmiyyətli fəaliyyətdə deyil, rəngdən-rəngə düşməkdə, buqələmluqda, hətta ən yaxşı halda belə ucuz konyuktura ilə məşğul olmaqda görürlər. Belə adamların hətta özləri üçün belə hansısa prinsipial dəyərləri olmur. Yəni bu qruplar nəinki hansısa bir ictimai idealdan, hətta fərdi idealdan belə məhrum olan qruplardır. Çünki hər hansı bir ictimai, ideal həyat və fəaliyyət üçün hansı prinsipləri isə üstün tutmaq, nələri isə etməmək lazımdır. Marginal ictimai şüur isə əsasən əvvəldən verilmiş olan kortəbii instinklərlə yaşamaq deməkdir. Əlbəttə, bu marginal qruplara məxsus olan düşüncə tərzi cəmiyyətə heç nə vermədən müxtəlif yollarla cəmiyyət hesabına yaşayan bütün tüfeyli ünsürlərin hamısına aiddir.
İctimai şüur problemini hamı üçün eyni olan hansısa universal qanunauyğunluqlar, yaxud prinsiplər sistemi hüdudunda həll etmək mümkün deyildir. Görünür, bu məsələyə sosial zaman və sosial məkan müstəvisində yanaşmaq lazımdır. Əlbəttə, sosial zaman və sosial məkan şüurun bir fenomen kimi necə meydana gəlməsini izah edə bilmir, onu sadəcə olaraq, mövcud fakt kimi götürür. Lakin ictimai şüura gəldikdə burada sosial zaman və sosial məkan başlıca geterminant rolunu oynayır. Burada sosial zaman və sosial məkan, bir tərəfdən mövcud ictimai şüurun törədicisi, digər tərəfdən isə ictimai şüurun özü sosial zaman və məkanın törədicisi kimi çıxış edir. Başqa sözlə, sosial zaman və sosial məkanla ictimai şüur dialektik əlaqəyə malikdirlər. Hətta elmi nəzəriyyələr və onların praktikada yoxlanılması və tətbiqi də sosial zaman və məkanla bağlıdır. Lakin burada həmin məsələni araşdırmaq qarşıya məqsəd qoyulmadığından onu kənara qoyuram. Qısaca olaraq qeyd edim ki, ümumiyyətlə, zaman və məkan vəhdətdə olduğu kimi, sosial zaman və sosial məkan da vəhdətdədir və bu, onların universal xassəsidir. Fərq isə bundadır ki, sosial zaman və sosial məkan əsasən lokal xassələrə malikdir. Yəni bunlar hər bir arealda, regionda, xalqda, ölkədə bir cür, başqalarında isə başqa cür olur. Bu isə təbii-coğrafi mühitlə, tarixiliklə, arxetipikliklə və mentalitetlə müəyyənləşir. Buna görə də zamanın və məkanın yalnız tarixə aid olduğunu gözləmək, onun elmə və fəlsəfəyə aid olmadığını iddia etmək son dərəcə mübahisəlidir. Bütövlükdə, elmin və fəlsəfənin inkişafı da həm ümumi zaman və məkanla, həm də sosial zaman və məkanla bağlıdır. Əgər belə olmasaydı, biz eradan əvvəlki elm və fəlsəfənin yaranma və inkişafının qədim Yunanıstanla bağlı olduğunu deyil, tutalım, qədim Keniya, yaxud Tanzaniya ilə bağlı olduğunu söyləyər və qəbul edərdik. Yaxud ABŞ, Avropa, Yaponiya və digər inkişaf etmiş ölkələr yeni nanotexnologiyaya keçdiyi bir dövrdə başqa ölkələr hələ əvvəlki sənaye dövrünə keçmək əzmindədirlər. Çünki sənaye dövrünü keçmədən, o dövrü yaşamadan, birdən-birə, hansısa bir mövcuzəli sıçrayışla post-sənaye dövrünə keçmək mümkün deyildir. Burada söhbət yalnız keçidin sürətindən gedə bilər ki, bu da elmi və texnoloji şüurun (ağlın) və praktikanın inkişafı ilə yanaşı həm də ictimai şüurun inkişafı ilə bağlıdır. Ölkədə, xalqda, millətdə ictimai şüurun formalaşması isə çox çətin bir problemdir. Bu ictimai şüuru nə hansısa bir və ya bir neçə partiya, nə bir və bir neçə qeyri-hökumət təşkilatı, nə də hansısa digər qurumlar ayrı-ayrılıqda formalaşdıra bilməz. Çünki bunların hər birinin öz məramnaməsi və nizamnaməsi var və buna görə də hər biri özü üçün işləyir və bu da təbiidir. İctimai şüurun formalaşmasında önəmli olan bilavasitə ölkədə mövcud olan Konstitusiyanın həmin ölkədəki ictimai iqtisadi və mədəni durumu obyektiv əks edilməsi və onun düzgün yerinə yetirilməsidir. Əgər qanunlar istisnasız olaraq yerinə yetirilərsə və hamı qanuna riayət edərsə, ayrı-seçkilik olmazsa, ölkə vətəndaşları bunu gördükdə həm qanunlara, həm də bu qanunların arxasında duraraq onun işləməsinə nəzarət edənlərə hörmətlə yanaşarlar və özləri də qanun çərçivəsindən çıxmazlar. Beləliklə, biz hansı tərəfə, hansı istiqamətə üz tutsaq, istər ictimai şüurda və istərsə də onun ideologiyasında konstitusiyanın mühüm rol oynadığını görürük. Çünki konstitusiya dövlət və cəmiyyət quruculuğunun və dövlətçiliyin əsasıdır. Təsadüfi deyil ki, Platon, Aristotel, Hobbs, Monteskye, Hegel, müasir dövrdə Pareto, Habermas və digər klassiklər özlərinin dövlət nəzəriyyələrinin əsasında mükəmməl konstitusiya və ona birmənalı olaraq riayət olunması məsələsini qoymuş və qoyurlar. Konstitusiya dövlət və dövlətçilik deməkdir. Dövlətçilik isə professional biliklə yanaşı, həm də nəinki dövrlə ayaqlaşan, həm də sabahı görə bilən yüksək səviyyəli ictimai şüur və ona uyğun olan praktika deməkdir. Əslində, demokratik prinsiplər üzrə qurulan konstitusiya və onun qanunlarının birmənalı olaraq yerinə yetirilməsi, vətəndaş cəmiyyəti, yaxud vətəndaş cəmiyyətinə aparan yol deməkdir. Vətəndaş cəmiyyəti isə o deməkdir ki, hamı qanun hüdudunda özünün seçdiyi həyat tərzi ilə, əldə etdiyi bilik və bacarıqla, işgüzarlığı, çalışqanlığı və s. ilə yaşayır və fəaliyyət göstərir. Demokratiya şəraitində hamı üçün eyni olan norma və qaydalar formalaşır. Bu isə o deməkdir ki, nəzəri məsələlərdən daha çox gündəlik hay-küylə və dəbdə olan ifadələri işlətməklə özünü gözə soxmağa çalışanların indi bizdə olan cəmiyyəti kapitalizm cəmiyyəti kimi təqdim etmələri və bununla da bəzi eybəcərliklər nə isə kapitalizmə xas olan təbii hal kimi təqdim etmələri elmi düşüncənin və elmi yanaşmanın zəifliyindən başqa bir şey deyil. Çünki inkişaf etmiş ölkələrdə, artıq klassik mənada başa düşülən kapitalizm yoxdur. Buna görə də onlar “rifah cəmiyyəti”, “postindusrial cəmiyyət”, “elektron cəmiyyət”, “bilik cəmiyyəti”, “vətəndaş cəmiyyəti” və s. kimi ifadələrdən istifadə edirlər. Bütün bunlar isə yeni, sosial kapitalizmdir. Başqa sözlə, bu cəmiyyətlərdə kapital ayrı-ayrı adamlar, ailələr, qruplar üçün deyil, bütövlükdə cəmiyyətin rifahı üçün işləyir və bu kapitaldan hərə öz qabiliyyət və bacarığına görə istifadə edir. Hamıda nəyi isə hasil etmək, ortaya çıxarmaq və bununla da fərqlənmək, özünü təqdim etmək meyili var. Burada istehlakçılıq şüuru istehsaldan və onun verdiyi imkandan yaranır, formalaşır. Öz bacarıq və qabiliyyəti ilə nəyi isə ortaya qoymadan yalnız istehlakçılıq və həm də izafi istehlakçılıq şüuru ilə yaşamaq isə parazitlik sayılır və ictimai qınağa səbəb olur. Demokratik cəmiyyət, yaxud vətəndaş cəmiyyəti heç də gəlirlərin bərabər olması deyildir. Burada gəlirlər biliyə, bacarığa, təşəbbüskarlığa, işgüzarlığa əsaslanır və bu prinsip klassik kapitalizmdən sonrakı dövrdə müxtəlif adlarla təqdim olunan bütün cəmiyyətlərə aid olan başlıca prinsipdir. Cəmiyyət yalnız bir ideyanın (məsələn marksizm-leninizm) və bir partiyanın diktəsi əsasında qurula bilməz. Belə cəmiyyətlər qapalı və qeyri-demokratikdir. Açıq və demokratik cəmiyyətlərdə ideyalar müxtəlif olur, siyasi partiyalar da bir-birinə opponentlik edirlər. Lakin bunların hamısı ölkənin və millətin mənafeyindən çıxış edərək həyatın keyfiyyətinin yaxşılaşmasına xidmət edir. Burada kim daha yaxşı, daha səmərəli layihə verirsə, o da xalqdan daha çox dəstək ala bilir və idarəetmədə üstünlük qazanır. Bu, vətəndaş cəmiyyətinin qurulması üçün ən vacib şərtdir. Çünki, hamı mövcud konstitusiya hüdudunda fəaliyyət göstərir və yaşayır. Əlbəttə, bütün bunlar fərdi və ictimai marağın gözlənilməsi, fərdi və ictimai şüurun vəhdəti fonunda mümkündür. İctimai şüur isə həm fərdi, həm kütləvi, həm də sürü (toplantı) şüurundan fərqlənir. İctimai şüur yaşanılan həyat tərzinə və fəaliyyətə görə məsuliyyəti başa düşmək və bu məsuliyyətə görə özünü nizamlamaqdır. İctimai şüurun bazası, çıxış nöqtəsi fərdi şüurdur. Başqa sözlə, ictimai şüur heç də nə isə insan ruhuna, düşüncə tərzinə kənardan daxil etdirilən, yaxud insana hansı bir təsir vasitəsilə qəbul etdirilən bir şey olmayıb, onun ruhi aləminin, düşüncə tərzinin formalaşması ilə bağlı olan bir hadisədir. Bu düşüncə tərzinin, ruhi aləmin formalaşması çoxtərəfli və mürəkkəb bir hadisədir. Burada uşağın sağlam doğulmasından tutmuş, ailə-təhsil-cəmiyyət üçlüyü mühüm əhəmiyyət kəsb edir. Bu üçlüyün hər birinin özünün funksiyası var. Bunlardan biri özünəməxsus olan funksiyanı yerinə yetirmədikdə natamamlıq alınır. Burada fərdi şüur dedikdə, heç də insanın hansısa bir istiqamətdə xüsusi qabiliyyətə, istedada malik olması deyil (bu, özlüyündə fərqli bir keyfiyyətdir), orta statistik bir adamın həyata, fəaliyyət tərzinə, insanlara və ətraf mühitə münasibətindən gedir. Fərdi şüurun əsasında həmişə fərdi maraq durur və bunsuz insanı təsəvvür etmək çətindir. Lakin bu fərdi maraq pozitiv əhəmiyyətli bilik və bacarığa əsaslanmadıqda özünü neqativ, antisosial keyfiyyətlərdə göstərməyə başlayır. Buna görə də düşüncə və fəaliyyətin pozitivliyi dedikdə, elə bir fəaliyyət nəzərdə tutulur ki, burada fərdin marağı həm fərdin özü üçün, həm də cəmiyyət üçün faydalıdır. Hər bir fərd öz işinin vaciblik dərəcəsi, məzmunu və çəkilən zəhmətin vaxt müddətinə görə gəlir əldə edir. Məsələn, alimin əməyinin gəliri ilə süpürgəçinin əməyi vacibliyinə görə eynidir. Çünki süpürgəçi küçəni süpürməzsə, şəhər zibil içində batar. Lakin məzmununa və çəkilən zəhmətin vaxtına görə eyni deyil, çünki alim həmişə şəxsi problemdən daha çox, bu və ya digər elmi problemin həlli haqqında fikirləşir, düşünür. Çox vaxt öz şəxsi problemlərini belə yaddan çıxarır və yaxud onlara o qədər də əhəmiyyət vermir. Təsadüfi deyildir ki, məşhur alimlərin bir qismi (Dekart, Nyüton, Kant və b.) hər bir adam üçün normal sayılan ailə də qurmamışlar. Bütün vaxt və enerjilərini yalnız elmə həsr etmişlər. Söhbət qətiyyən bunun yaxşı, ya pisliyindən deyil, sadəcə olaraq, həyati və tarixi fakt olmasından gedir. Süpürgəçinin əməyi cəmi bir neçə fiziki alqoritmə əsaslanır. Alimin əməyi isə sonu olmayan intellektual üsul və vasitələrə əsaslanır. Burada mövcud paradiqmalar yeniləri ilə dəyişdirilir və s. Lakin bir daha qeyd edək ki, süpürgəçinin əməyi də çox əhəmiyyətli və zəruri əməkdir və onu hörmətsiz əmək kimi qiymətləndirmək olmaz və süpürgəçi də öz əməyinə görə cəmiyyətin orta statistik həyat səviyyəsinə uyğun yaşamalı və bunun təmin olunması üçün ona müvafiq əmək haqqı ödənilməlidir. Fərdi şüurlar əsasında adi, yaxud kütləvi şüur yaranır. Bu kütləvi şüur ictimai həyatın, onun norma və dəyərlərinin qərarlaşması kimi çıxış edir. Əlbəttə, texnogen cəmiyyətlərdə olan norma və dəyərlər ənənəvi cəmiyyətlərdə olan norma və dəyərlərdən fərqlənir. Belə ki, birincilərdə dinamiklik, dəyişkənlik, ikincilərdə isə ənənəvilik və sabitlik vardır. Avropa mədəniyyəti sivilizasiyası ilə Şərq arasında olan mühüm fərq də burada meydana çıxır. Əlbəttə, bunların heç birini mütləqləşdirmək olmaz. Lakin fərq göz qabağındadır. Məhz dinamiklik və dəyişkənlik Avropa sivilizasiyasını tez-tez böhranlara sürükləyir. Burada böhranlar bir növ katersis, təmizlənmə səciyyəsi daşıyır və böhrandan sonra inkişafın yeni bir mərhələsi başlayır. Şərq isə sabitlikdə qaldığı üçün nə böhran keçirir, nə diqqəti cəlb edəcək inkişafa nail olur. Buradakı inkişaf özünüinkişafdan daha çox Avropadan yeni texnika və texnologiyaları götürməklə bağlıdır və nə qədər ki, texnika və texnologiyalar özü də dinamik məzmuna malikdir, buna görə Şərq Avropanın arxasınca getmək zorunda qalır. Çox təəssüf ki, müasir dövrün əsas xüsusiyyətlərinə o qədər də əhəmiyyət
verməyən bəzi tədqiqatçılar Şərqin mənəvi sabitliyini, dəyərlərinin əhəmiyyətini qoruyub saxlamaqla Qərb texnologiyasından istifadə etməyi irəli sürürlər ki, bu da son dərəcə mübahisəli və şübhəli məsələdir. Qərb texnologiyası bütövlükdə Qərb düşüncəsi və mədəniyyətinin məhsuludur. Əgər Şərq, o cümlədən də Azərbaycan özünə müvafiq olan texnika və texnologiyanı, yaxud onun bir neçə sahəsini yarada bilməyəcəksə və daha çox təbii sərvətləri satmaqla məşğul olacaqsa, onda o, Qərb texnologiyası ilə birlikdə, istər-istəməz, Qərbə məxsus olan mənəviyyatı da qəbul etmək zərurəti ilə qarşılaşmalı olacaq. Bu isə, bütövlükdə, yerli ənənəvi mentalitetə, psixologiyaya uyğun olmadığı üçün müxtəlif haqlı və haqsız söz-söhbətə, qarmaqarışıqlığa, mənəvi sarsıntılara səbəb olacaqdır. Çox vacibdir ki, bizim texniki və texnoloji ali məktəblərinin nəzdində xüsusi sənaye və digər təcrübə müəssisələri yaradılsın. Burada müvafiq kollec və texniki peşə məktəblərin şagird və tələbələri də təcrübə keçə bilərlər. Konstruktor büroları isə mütəxəssislər üçün yeni texniki layihələr hazırlamağa və onları təcrübədə sınamağa imkan verər. Beləliklə, biz sözçülükdən daha çox işgüzarlığa keçə bilərik. Kütlə şüuru, adi şüur, yaxud empirik şüur... bunlar eyni mənalı sinonim anlayışlardır. Hamısı gündəlik həyat və fəaliyyətlə, güzəranla bağlıdır, hamısı yaşayış və həyat təcrübəsi (empiriya) ilə bağlıdır. Yəni ayrı-ayrı fərdlərin gündəlik həyat, yaşayış və fəaliyyətləri əsasında gəldikləri ümumi dəyərləndirmə və normalardır. Buna görə də həm fərdi şüur və həm də və daha çox kütlə şüuru ictimai şüurun bazasını, yaxud çıxış nöqtəsini təşkil edir. Qeyd etmək lazımdır ki, hər hansı bir toplumun (bu və ya digər münasibətlə bir yerə yığılan adamların) şüuruna gəldikdə isə bunun sürü adlandırılması düzgün deyildir. Çünki: 1) sürü anlayışı heyvanların bir yerə toplanması olub, insana aid deyildir. 2) hətta, bir-birilə əvvəldən heç bir əlaqəsi, tanışlığı olmayan adamlar bir yerə toplanıbsa, deməli, onların buraya toplanmasına səbəb olan nə isə bir problem var. Əlbəttə, bu adamların toplanması kortəbii halda baş verir və planlı şəkildə əvvəlcədən düşünülmüş olmaya da bilər. Bu, daha çox emosional bir qüvvədir və onun təhlükəli olması da buradan irəli gəlir. Çünki hər hansı bir təxribatçı bu kortəbii qüvvəni hərəkətə gətirə bilər və onun qarşısını almaq çətinləşər. Belə qüvvə daha çox dağıdıcı, məhvedici qüvvədir və buna görə də təhlükəlidir. Müasir dövrdə istər cəmiyyəti idarə edənlər, istərsə də onlara xidmət edənlər çalışmalıdırlar ki, cəmiyyətdə, yaxud onun hər hansı bir sahəsində gedən prosesləri diqqətlə izləsinlər və baş verə biləcək kütləvi narazılıqların qarşısını almaq üçün bunları törədən səbəbləri vaxtında aradan qaldıra bilsinlər. Yerli orqanlar vaxtında problemi nəzərə almadıqda, onun həllini gecikdirdikdə, 2013-cü ilin əvvəllərində İsmayıllı rayonunda baş verən hadisələr törəyir. Hərçənd, dövlət çox çevik reaksiya verərək bu hadisələrin qarşısını aldı və onu törədən səbəbi aradan qaldırdı. İctimai şüur insan-insan, insan-cəmiyyət, insan-dövlət, cəmiyyət-dövlət, insan-təbiət və cəmiyyət- təbiət münasibətlərinin ali, yüksək səviyyəsidir. Əlbəttə, bu səviyyəyə yüksəlmək, onu dərk etmək o qədər də asan iş deyildir. Çünki insanlarda şəxsi maraq hissi o qədər güclüdür ki, bu hiss hər an insanı öz ardınca sürüməyə hazırdır. Lakin şəxsi marağı, arzusu, istəyi olmayan insan da yoxdur. Ancaq insan ictimai şüur səviyyəsinə qalxdıqda öz maraq və arzularını cilovlamağı, nizamlamağı, müəyyən bir məcraya yönəltməyi bacarır. O, başa düşür ki, bütövlükdə cəmiyyətin inkişafına, yüksəlişinə nail olmadan, yalnız özü üçün nələri isə etmək, nəyəsə nail olmaq müvəqqəti haldır və həm də, bununla o, ətrafdakı insanlardan təcrid olunur. Onların pis nəzərlərinə və ictimai qınaqlarına tuş gəlir. Bütövlükdə, cəmiyyət inkişaf etdikdə isə burada heç kim heç kimə pis nəzərlə baxmır. Hamı öz işinə, qabiliyyətinə, bacarığına, işgüzarlığına və seçdiyi həyat tərzinə uyğun olaraq yaşayır. Burada həm yüksək, həm də orta həyat səviyyəsinə uyğun olaraq yaşayanlar vardır. Hamı bir-birini qiymətləndirir. Müxtəlif gündəlik işlərlə məşğul olanlar bilirlər ki, cəmiyyətə onu idarə edənlər, elm, təhsil və mədəniyyətlə məşğul olan adamlar da lazımdır. Bunlar isə öz növbəsində başa düşürlər ki, cəmiyyətə tikib quranlar, əkib becərənlər, maldarlar, məişət xidməti göstərənlər və s. lazımdır. Bir sözlə, hər kəs öz işi ilə məşğul olur və hamı bir-birinin işinə hörmətlə yanaşır. Hamı öz işinə özünün fərdi marağı ilə yanaşı ictimai məsuliyyətlə yanaşır. Fizika elmi ilə yanaşı, həm də ictimai problemləri fəal surətdə müzakirə edən S.P.Kapitsa deyirdi ki, məsuliyyət anlayışı bu gün yaddan çıxmışdır. Bu fikir digər görkəmli elm və mədəniyyət xadimləri tərəfindən də tez-tez səsləndirilir. Hətta, maddi zənginliklə mənəvi zənginliyin uyğunsuzluğundan belə bəhs edirlər. Çünki, bəzi hallarda maddi sərvəti toplanmaq mənəvi yoxsulluqdan, cəmiyyət qarşısında heç bir məsuliyyət hiss etməməkdən irəli gəlir. Bu isə əslində açıq, yaxud gizli (üstüörtülü) halda etik və hüquqi normaların pozulması ilə müşayiət olunur. Buna görə də şüurun həddən artıq istehlakçılıq virusundan təmizlənməsi məsələsinə xüsusi diqqət yetirilir. İndi sosial fəlsəfənin qarşısında duran əsas məsələlərdən biri cəmiyyət həyatında baş verən, izafi istehlakçılığın və bu ehtirasın yaratdığı mənəvi boşluğun qarşısını almaqdır. Əgər nəinki indiki normal vətəndaş cəmiyyətinə keçid dövrünü yaşayan postsovet ölkələrində, hətta, bütün dünyada ictimai şüurun üstünlük təşkil etməsinə nail olunmazsa, onda bütövlükdə Yer üzərində mövcud olan insan dünyası özü sonsuz çaxnaşmalar, toqquşmalar nəticəsində daha bərbad hala düşə bilər. Çünki bir tərəfdən qloballaşmadan, multikulturalizmdən, humanizmdən, insan hüquqlarından və s. danışan güclülər, digər tərəfdən Asiya, Afrika və Cənubi Amerika ölkələrinə, bu ölkələrdə bir-birilə düşmənçilik edən müxtəlif qüvvələrə silah satıb pul qazanmaqla məşğuldurlar. Həmin ölkələrin bir-birini, yaxud bu ölkələr daxilindəki düşmənçilik edən qüvvələrin bir-birini qırması isə onları maraqlandırmır. Belə çıxır ki, qoy bir-birini nə qədər qırırlar-qırsınlar, təki biz pul qazanaq düşüncəsi ilə yaşayırlar. Bu, heç bir mənəviyyata, heç bir humanist sosial şüura uyğun olan yanaşma deyil. İndi artıq hamıya məlumdur ki, Yer kürəsi öz insanları ilə kosmosda hərəkət edən bir gəmidir. Güclü ölkələr isə öz yanaşmaları və hərəkətləri ilə bu gəmini öz içərisindən partlatmaq istəyirlər. Əslində, bu, Yer planeti miqyasında tədricən həyata keçirilən terrorizmdir. Bu terrorizm ekoloji problemlərdən tutmuş iqtisadi, siyasi və hərbi yollarla həyata keçirilir. Əslində isə, Yer kürəsini zənginləşdirmək, onun sərvətlərindən daha səmərəli istifadə etmək, təhsil və səhiyyənin hər yerdə səviyyəsini qaldırmaq və bunun üçün investisiyanı artırmaq lazımdır ki, insanlar sağlam və ağıllı, işgüzar olsunlar. Asiyada, Afrikada və Cənubi Amerikada ölkələr var ki, onlar nə sosial əsaslı dövlət yarada bilir, nə də öz sosial əsaslı müstəqil iqtisadiyyatlarını yarada bilirlər. Onlara müxtəlif yönümlü yardım etmək və xeyirli məsləhətlər vermək müasir dünyanın önündə gedənlərin mənəvi borcudur. Əgər onlar, doğrudan da, dünyamiqyaslı humanist və sosial düşüncəyə malikdirlərsə, iqtisadi cəhətdən zəif ölkələrin təbii sərvətini dəyər-dəyməzinə əlindən almaqla yox, bilməlidirlər ki, öz standartlarını diktə etməklə dünyanı onun mövcud problemlərindən xilas etmək mümkün deyil. Hətta, indi Asiya və Afrika ölkələrində ciddi narahatlıq doğuran əhalinin sürətli artımı problemini də tibbin və təhsilin köməyi olmadan həll etmək mümkün deyil. Çünki bu ölkələrdə əhalinin artım sayı heç də onların müasir texniki və texnoloji səviyyədə istehsal edə bilmək səviyyəsinə uyğun deyil. Nəticədə isə istehlak edənlərin sayı istehsal edənlərdən qat-qat artıq olur. Cəmiyyət yoxsulluq, səfalət və sosial sarsıntılar içərisində yaşamağa başlayır. Terrorizm, quldurluq, narkotik və s. kimi neqativ bizneslər də buradan irəli gəlir. İctimai şüurun bütün dünya üçün vahid olan cəhətləri ilə yanaşı, onun hər bir ölkə, hər bir xalq üçün xüsusi, spesifik əhəmiyyətə malik olan cəhətləri də var və bundan heç cür yan keçmək olmaz. Hətta universal dəyərlər belə hər bir ölkənin, xalqın öz tarixi, mentalileti, sosial-mədəni durumu əsasında həyata keçirilməlidir. Başqa cür olduqda anlaşılmazlıq və qarmaqarışıqlıq yaranır. Bu isə heç də tərəqqiyə, inkişafa xidmət etmir və burada idarəolunan xaos nəzəriyyəsi əksər hallarda özünü doğrultmur və xüsusi hal kimi qalır. Yeri gəlmişkən, qeyd etmək lazımdır ki, idarəolunan xaos nəzəriyyəsinin əksinə olan sabitlik nəzəriyyəsinin də çatışmayan cəhətləri var. Belə ki, dövlət cəmiyyəti bütün parametrlərdə buxovlayıbsa, sosial ədalət və demokratiya əvəzinə onların görüntüsünü yaradırsa, imitasiya və manipulyasiyalar ilə cəmiyyəti idarə etməyə çalışırsa, bu vəziyyətdə narazılığın gənginliyi artmaqda davam edir və müəyyən müddət keçdikdən sonra bu lafent vəziyyət oyanır və artıq heç cür idarə oluna bilməyən xaos yaranır. Buna görə də cəmiyyətin bütün vətəndaşları üçün, həm idarəedən elita, həm də intellektual elita üçün ictimai şüur ilk növbədə ölkə və xalq üçün, sonra isə bütün dünya üçün ən vacib olan şərtlərdən biridir. Formal demokratiya ilə həqiqi demokratiya arasındakı fərq də burada meydana çıxır. Əsl demokratiya isə yüksək vətəndaşlıq mədəniyyəti və maddi sərvətlərin ədalətli sosial bölgüsünü tələb edir.
professor Yüklə 92,14 Kb. Dostları ilə paylaş:
|