“
Xalq cəbhəsi” -. 2009 – 22 oktyabr. - №192. - S. 11.
Urmiyada erməni terroru
II yazı
"Əhalinin kütləvi qətlindən sonra insan cəsədləri üç gün küçələrdə qaldı"
"Təcəddüd" qəzeti: "Urmiya və ətrafındakı kənd və qəsəbələrdə çox böyük və acınacaqlı faciələr baş
verib..."
Əli Dehqan: "Bu olaylar və onunla bağlı xatirələr o qədər dəhşətlidir ki, hələ də 80 il keçməsinə
baxmayaraq, həmin hadisələri unuda bilmirəm"
Ötən yazımızda ermənilərin Güney Azərbaycandakı təxribatlarını diqqətinizə çatdırmışdıq. Bu yazımızda isə
ötən əsrin əvvəllərində ermənilərin Urmiya şəhərində həyata keçirdiyi soyqırımı faktlarla sizlərə təqdim edirik.
Güney Azərbaycanın görkəmli tarixçisi, Azərbaycan Universitetinin fəxri doktoru Səməd Sərdariniya "Arazın
hər iki tayında müsəlmanların soyqırımı" kitabında yazır ki, 1918-ci il Arazın hər iki tayında yaşayan Azərbaycan
türkləri üçün daha dəhşətli və acınacaqlı keçdi: "I Dünya müharibəsinin üçüncü ilində (1917-ci il) Rusiyada baş
verən inqilab nəticəsində çar hakimiyyəti devrildi. Romanovlar sülaləsinin süqutu ilə daşnakların "Böyük
Ermənistan" yaratmaq xülyalarını həyata keçirmələrinə imkan yarandı. Həmin ildə Azərbaycanın bir sıra şəhərləri
erməni terrorunun qanlı həfədinə çevrildi. Ermənilər 1918-ci ilin yanvarında İrəvana və onun ətrafındakı 211
Azərbaycan kəndinə basqın çəkərək, burada yaşayan 300 min Azərbaycan türkünü qırıb, minlərlə soydaşımızı
yurd-yuvasından didərgin saldılar. Elə həmin ilin martında Bakıda, Şamaxıda və digər Azərbaycan şəhərlərində
yenidən öz cinayətlərini təkrarladılar. Beləliklə, dinc əhaliyə hücum çəkən ermənilər kütləvi qırğınlar törədərək,
çox sayda soydaşımızı amansızcasına qətlə yetirdilər. Bu dəhşətli faciələrdə yüz minlərlə Azərbaycan türkü
öldürüldü, öz ev-eşiklərindən didərgin salındı".
Erməni terroru Güney Azərbaycanda da qanlı izlər buraxdı. Silahlanmış erməni dəstələri Urmiyada,
Köhnəşəhərdə, Salmas və başqa ərazilərdə kütləvi qırğınlar törədərək, 130 mindən çox Azərbaycan türkünü faciəvi
şəkildə qətlə yetirdilər. Erməni terroruna hədəf olan şəhərlərdən biri də Urmiya oldu. Bu şəhər 1918-ci ilin fevral və
mart aylarında, yəni iki dəfə erməni terroruna məruz qalıb: "Fevralın 17-də ermənilər küçələrdə və bazarda
Azərbaycan türklərinin yolunu kəsir, soyğunçuluqla pullarını ələ keçirirdilər. Bir neçə gün sonra Urmiyanın
şəhərdən kənar məntəqələrində yüzə yaxın soydaşımızı ermənilər qətlə yetirdi. Həmin qanlı olaydan sonra fevralın
22-də Qardaş və Dadaş adlı iki nəfər urmiyalı öldürülənlərin cəsədini gətirmək üçün hadisə yerinə yollandı. Lakin
onlar şəhərdən çıxarkən bir qrup erməni ilə rastlaşdı və tərəflər arasında qarşıdurma yarandı. Həmin günün axşamı
yenidən münaqişə başladı. Ermənilər şəhərin yüzlərlə dinc sakinlərinin evinə basqın çəkərək, mənzillərdəki əşyaları
qarət edir, qarşılarına çıxan hər kəsi qətlə yetirir, evləri yandırırdılar. Azərbaycan türkləri var güclərilə özlərini
müdafiə etməyə çalışsalar da, azğınlaşmış ermənilər on min nəfərə yaxın dinc əhalini öldürdülər. Qətlə
yetirilənlərin əksəriyyəti qadın, uşaq, südəmər körpələr idi. Ölənlərin cəsədləri uzun müddət yerdə qalmışdı. Onları
yerdən götürüb dəfn etməyə kimsə cəsarət etmirdi. Bu ağır günlərdə Urmiya sakinlərinə Tehrandan yardım gəlmədi.
Təbriz əhalisi isə bu faciənin xəbərini çox gec eşitdi".
Həmin hadisələrin şahidi olan fars əsilli tarixçi alim və tədqiqatçı Əhməd Kəsrəvi bu haqda belə yazır:
"Ermənilər Urmiyada hərəkətə keçib üç gün qırğın törətdilər. Bu müddətdə Təbriz ilə Urmiya arasındakı telefon və
teleqraf simləri tamamilə kəsilmişdi (rabitəni ermənilərin kəsdiyi ehtimal olunur), elə buna görə də hadisələrlə bağlı
xəbərlər Təbrizə vaxtında yetişmədi".
Həmin il qanlı hadisələrlə bağlı Şeyx Məhəmməd Xiyabaninin orqanı olan "Təcəddüd" qəzetində silsilə
yazılar dərc olundu. Qəzetin 17 fevral - 2 mart 1918-ci il tarixli nömrələrində yazılırdı: "Oxucularımıza söz
vermişdik ki, Urmiyadakı qanlı faciələr barədə tədqiqat aparıb ictimaiyyətə çatdıraq. Böyük təəssüflə bildirməliyik
ki, əldə etdiyimiz məlumatlara görə, Urmiya və ətrafındakı kənd və qəsəbələrdə çox böyük və acınacaqlı faciələr
baş vermişdir... Xəbərlərə görə, silahlı ermənilər müxtəlif bəhanələrlə Urmiya bazarında dinc vətəndaşların üzərinə
atəş açıb, qarşıdurmalara səbəb olmuşdur. Polis məmurları qarşıdurmaya son qoymaq istəsələr də, ermənilər
silahdan atəş açaraq, iki mülki vətəndaşı öldürüblər. Ermənilər daha sonra əhalinin yaşadığı evləri, habelə
karvansarayları hədəf alaraq atəşə tutublar. Nəticədə bir çox günahsız dinc vətəndaş həlak olmuşdur... Urmiyadan
gələn bir müsafir deyir ki, o, yolda 300-dən artıq Azərbaycan türkünün cəsədini öz gözü ilə görüb..."
Hadisələrin canlı şahidi olmuş urmiyalı soydaşımız Əli Dehqan Urmiyadakı üçgünlük qırğından sonra şəhərin
durumunu belə təsvir edir: "Azərbaycan kəndləri qarət olunaraq əhalisi boşaldılırdı. Sanki buralarda heç vaxt həyat
izləri olmamış kimi qəbiristanlıq sükutu hər yerdə hakim olmuşdu. Kənd qaçqınlarının sığındığı əsas yerlər
şəhərdəki küçələr və məscidlər idi. Ermənilər Azərbaycan türklərinin evlərinə basqın çəkir, istədikləri ev əşyalarını
götürürdülər. Qaranlıq düşən kimi, şəhərin bir çox məhəllələrində nalə səsləri eşidilməyə başlayırdı. Evləri
ermənilərin hücumuna məruz qalan insanlar damlara çıxaraq uca səslə qışqırır, əhalidən yardım istəyirdilər. Lakin
heç kəs evindən bayıra çıxmağa cəsarət etmirdi. Qulaqları xalqın nalə və fəryadına alışmış dövlət məmurları isə
adamların ürəkyandırıcı etirazları qarşısında laqeydlik göstərirdilər. Soyğunçu ermənilər tam sərbəst şəkildə
istədikləri evlərə girir, insanları öldürür, evləri isə talan edərək yandırırdılar".
1918-ci ilin martında Urmiyada yaşayan Azərbaycan türkləri növbəti dəfə erməni terroruna məruz qalıblar:
"Ermənilər Novruz Bayramının ilk günü küçələrdə və bazarda əhaliyə atəş açır, qarşılarına çıxan hər kəsi
öldürürdülər. Bununla kifayətlənməyən erməni terrorçuları daha da azğınlaşaraq, Urmiyada 24 saatlıq qırğın
törədəcəkləri barədə bildiriş yayırlar. Bu qorxunc xəbər 1918-ci il martın 19-da (son çərşənbə axşamı) şəhərdə
dəhşətli bir qorxu ab-havası yaratdı. Həmin gecə heç kimin gözünə yuxu getmədi. Çünki ertəsi gün sübh tezdən
qətliam başlanacaqdı. Ermənilər həmin gecə törədəcəkləri qırğına görə şəhərdə nərə çəkir, şənlik edirdilər.
Əli Dehqan bu haqda yazır: "Sübh tezdən anam məni, məndən böyük iki qardaşımı və kiçik qardaşımı
götürüb evin damına apardı. Erməni təcavüzündən qorunmaq üçün qadınlar və uşaqlar damlara çıxırdılar. Axşama
qədər ac-susuz orada qalmalı olduq. Axşama yaxın xəbər yayıldı ki, qətliama son qoyulub. Biz aşağı düşərək evə
qayıtdıq. Lakin evdə heç nə qalmamışdı, hər şeyi aparmışdılar. Çıraqları belə sındırmışdılar. Evin görünüşü adamda
dəhşətli hisslər oyadırdı. Hələ özümüzə gəlməmişdik ki, birdən-birə evimizin qapısı çox möhkəm döyülməyə
başladı. Anam bizi (4 uşağı) çörək bişirmək üçün istifadə olunan təndirin içinə qoyub özü də təndirə girdi. Anam
deyirdi ki, ermənilər gəlsə, birinci məni, sonra uşaqlarımı öldürsünlər. Bu olaylar və onunla bağlı xatirələr o qədər
dəhşətlidir ki, hələ də 80 il keçməsinə baxmayaraq, həmin hadisələri unuda bilmirəm".
Həmin faciəvi günlərin şahidi olmuş digər urmiyalı soydaşımız Rəhmətulla Tofiq yazır: "1918-ci ilin son
çərşənbə axşamı 12 min azğınlaşmış erməni silahlısı Azərbaycan məhəllələrinə üz tutdular. Minlərlə tüfəngin
birdən-birə açdığı dəhşətli atəşin səsindən şəhər silkələnib lərzəyə gəlirdi. Ermənilər qapıları daş və balta ilə
sındırıb evlərə girir, hər tərəfə atəş açır, damlara sığınan qadınları və uşaqları yerindəcə öldürürdülər. İnsanların
qorxudan qopardığı şivən və nalə səsləri açılan tüfənglərin səsinə qarışırdı. Analar öz övladlarını quyularda və daş
sobaların içində gizlədirdilər. Ermənilər qarşılarına çıxan Azərbaycan türklərini atəşə tutub, var-yoxunu talayıb
özlərilə aparırdılar. Azərbaycan türklərinin yaşadığı məhəllələr sanki qəbiristanlığa çevrilmişdi. Evlərdə və
küçələrdə çox dəhşətli mənzərələr gözə çarpırdı. Bütün evlər qarət edilmiş, yerlər cəsədlərlə dolu idi".
Həmin qanlı hadisələrin başqa bir şahidi Rəhmətullaxan Mötəmidülvizarə yazır: "Urmiyada o gün olmur ki,
1-10 nəfər adam ermənilər tərəfindən öldürülməsin. Habelə şəhərdə qarət edilməmiş ev yoxdur. Tam əminliklə
demək olar ki, qanlı olaylarda 50 min nəfərdən artıq günahsız Azərbaycan türkü öldürülmüşdü. Urmiyanın əhalisi 4
aydır hər gün qətl və qarətə məruz qalır, hər gün ölümlə qarşılaşır".
Hətta ermənilər Urmiyadakı terrorda şəhərin ruhanilərini də öldürmüşdülər. Belə ki, qətliamın qarşısını almaq
istəyən bir çox məşhur din xadimləri də erməni gülləsinə tuş gəldi. Terrorçular məşhur ruhanilərdən Axund Molla
Əliqulunu və ailəsinin demək olar bütün üzvlərini qətlə yetiriblər. Onun 27-35 yaşlarında olan iki oğlunu - Mirzə
Abdullanı və Mirzə Mahmud ağanı öldürdükdən sonra Mirzə Mahmud ağanın arvadını da ərinin cəsədi üzərində
öldürüblər. Ailə üzvlərindən yalnız axundun üçüncü oğlu Mirzə Əli özünü quyuya atdığı üçün ölümdən qurtulub.
Erməni terrorunun qurbanı olan dövrünün tanınmış ruhanilərinin adları belədir:
- Qara Ağac məhəlləsindən Ağa Mirzə Sadıq, müctəhid Mirzə İbrahim və Səqətülislam;
- Əli Şəhid məhəlləsindən Sədrülüləma, Hacı Mirzəli Əsgər, Hacı Mirböyük;
- Qəbiristan məhəlləsindən Ağa Mircalal, qoca nökər adı ilə tanınan Əli (Ağa Mircalal Cəlaliyyə
mədrəsəsinin müdiri, Əli isə el içində məşhur olan mərsiyəxan mollası olub);
- Yurt məhəlləsindən Mirzə Əhməd (Bu ruhani carçıbaşı, bazarbaşı və məşhur mərsiyəxan idi;
- Ağdaş məhəlləsindən İsmayıl Əyalu və Ağa Mir Nurulla. Ermənilər Hacı Molla İsmayıl Əyalunun
qəddarcasına başını kəsib atmışdılar.
Ruhanilərlə yanaşı, Urmiyanın məşhur tacirləri də qətlə yetirilmişdi. Ermənilərin Urmiyada törətdikləri terror
sakinlərin yaddaşında dərin iz buraxdı. Həmin qətliamdan sonra insan cəsədləri üç gün küçələrdə qaldı. Sonra
onları Hacıxan Məscidi qəbiristanlığında ümumi məzarlıqda dəfn etdilər.
Urmiyadan sonra erməni terrorunun həfədi Salmas şəhərinə yönəldi. Orada da kütləvi qırğınlar törədən
ermənilər çox sayda soydaşımızı amansızcasına qətlə yetirdilər. Bu barədə daha ətraflı gələcək yazımızda bəhs
edəcəyik.
Hazırladı: Real CƏFƏRLİ