7
yüksək səviyyə barədə ən yeni məlumatlarla onu tanış etməkdir. Ən doğru qiyməti hörmətli oxucu özü
versin. Son 10 ildə bizim qazandıqlarımızla yanaşı, itirdiklərimiz də az olmamışdır və çox təəssüf ki,
həmin itkilərə 1991-1993-cü illərdə - ölkədə hakimiyyət boşluğu hökm sürdüyü dövrdə yol verilmişdir və
indi də bəzi problemlərin həllinə nail olunmaması məhz həmin dövrdə buraxılmış kobud səhv və
nöqsanların nəticəsidir. Respublikanın indiki rəhbərliyi, şəxsən Prezident Heydər Əliyev bu problemləri
həll etmək üçün öz səylərini bir an olsun azaltmasa da, hətta beynəlxalq səviyyədə ədalətli mövqeyimizə
dəstək qazansa belə, işi axıra çatdırmaq yolunda hər dəfə yaradılan süni maneələr son anda əldə olunmuş
razılıqların təxirə salınmasına səbəb olmuşdur. Kitabda oxucu bütün bunlar barədə ona lazım olan
obyektiv məlumatı ala biləcəkdir. Bir sözlə, kitabda müstəqil dövlətimizin son onillik tarixinin obyektiv
işıqlandırılması müəlliflərin daim diqqət mərkəzində olmuşdur.
Yubiley nəşrinin hazırlanmasında XX əsr Azərbaycan tarixinin mərhələləri barədə Heydər Əliyev
tövsiyələri əsas kimi götürülmüşdür.
Kitab 3 hissə və 12 fəsildən ibarətdir.
"Azərbaycanın dövlətçilik tarixindən" adlı birinci hissədə ən qədim zamanlardan Azərbaycan Xalq
Cümhuriyyətinin yarandığı 1918-ci ilin mayınadək olan dövr, Azərbaycan Xalq Cümhuriyyəti dövrü və
sovet hakimiyyəti illəri ayrıca fəsillər kimi verilmişdir.
"Azərbaycanın müstəqilliyinin bərpası və qorunub saxlanması uğrunda mübarizə" adlı ikinci
hissədə SSRİ-nin dağılması ərəfəsindən başlayaraq 1995-ci il mart dövlət çevrilişi cəhdinədək ölkəmizdə
baş verən ictimai-siyasi hadisələr üzərində geniş dayanılmışdır. Bu hissədə 1991-ci ilin oktyabrından
sonra ölkədə hökm sürən siyasi hərc-mərclik və hakimiyyət mübarizəsi şəraitində Milli Qurtuluş
hərəkatının başlanması, Heydər Əliyevin hakimiyyətə qayıdışı və həmin hadisənin dövlətçiliyimizin
qorunub saxlanmasında xilaskarlıq missiyası haqqında ətraflı bəhs olunmuşdur.
Üçüncü hissə
"Müstəqil dövlət quruculuğunun əsas istiqamətləri" adlanır və 6 fəsildən ibarətdir.
Bu hissədə hüquqi dövlət quruculuğu, iqtisadi və sosial inkişaf, Azərbaycanda vətəndaş cəmiyyətinin
qurulması, milli təhlükəsizlik və Azərbaycanın
xarici siyasət fəaliyyəti,
milli-mənəvi inkişaf, sağlamlıq və
ətraf mühitin mühafizəsi məsələləri ilə bağlı materiallar dərc edilmiş, həmin sahələrdə oxucuları
düşündürən suallara ətraflı cavablar verilmişdir.
Əminik ki, Azərbaycanın 10 illik dövlət müstəqilliyinin yubiley nəşri geniş oxucu kütləsi
tərəfindən razılıqla qarşılanacaq, ölkəmizin son 10 illik müstəqil inkişaf yolunun dinamikasına bələd
olmağa səy göstərən hər bir ziyalı və bütövlükdə Azərbaycan tarixini öyrənmək istəyənlər üçün dəyərli
vəsait rolunu uğurla yerinə yetirəcəkdir.