REGOLAMENT TAL-KUMMISSJONI (UE) Nru .../...
ta’ XXX
li jemenda l-Anness II tar-Regolament (KE) Nru 1333/2008 tal-Parlament Ewropew u tal-Kunsill fir-rigward tal-użu tax-xama' tan-naħal (E 901), ix-xama' tal-karnawba (E 903), ix-xellak (E 904) u x-xama' mikrokristallina (E 905) fuq ċerti frott
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 1333/2008 tal-Parlament Ewropew u tal-Kunsill tas-16 ta’ Diċembru 2008 dwar l-addittivi tal-ikel1, u b’mod partikolari l-Artikolu 10(3), u l-Artikolu 30(5) tiegħu,
Billi:
-
L-Anness II tar-Regolament (KE) Nru 1333/2008 jistabbilixxi lista tal-Unjoni ta' addittivi tal-ikel approvati għall-użu fl-ikel u l-kundizzjonijiet tal-użu tagħhom.
-
Din il-lista tista' tiġi emendata skont il-proċedura msemmija fir-Regolament (KE) Nru 1331/2008 tal-Parlament Ewropew u tal-Kunsill tas-16 ta’ Diċembru 2008 li jistabbilixxi proċedura ta’ awtorizzazzjoni komuni għall-addittivi tal-ikel, l-enżimi tal-ikel u l-aromatizzanti tal-ikel2.
-
Skont l-Artikolu 3(1) tar-Regolament (KE) Nru 1331/2008, il-lista ta' addittivi tal-ikel tal-Unjoni tista' tiġi aġġornata jew fuq inizjattiva tal-Kummissjoni jew wara li ssir applikazzjoni.
-
Il-Kummissjoni rċeviet diversi applikazzjonijiet għall-awtorizzazzjoni tal-użu tax-xama’ tan-naħal (E 901) fuq il-bżar, it-tadam, il-ħjar, il-banana, il-mang u l-avokado, fuq ir-rummien u fuq il-frott kollu, l-użu ta' xama' tal-karnawba (E 903) u x-xellak (E 904) fuq ir-rummien u fuq il-mang, l-avokado u l-papaj u l-użu ta' xama' mikrokristallina (E 905) fuq l-ananas. Dawn l-applikazzjonijiet ġew magħmula disponibbli għall-Istati Membri.
-
Ix-xama’ tan-naħal (E 901), ix-xama' tal-karnawba (E 903), ix-xellak (E 904) u x-xama' mikrokristallina (E 905) intalbu biex jintużaw bħala aġenti għall-igglejżjar biex jiġi ttrattat il-wiċċ ta' dawn il-frott jew ta' dawn il-ħxejjex li qishom frott sabiex jiġu preservati aħjar. It-trattament jipproteġi l-frott kontra d-deidratazzjoni u l-ossidazzjoni u jżomm il-moffa u ċerti mikroorganiżmi milli jikbru. Hemm il-ħtieġa teknoloġika b'mod partikolari għal frott impurtat minn pajjiżi bi klima triopikali. Dan il-frott jeħtieġ ukoll protezzjoni matul vjaġġi twal.
-
Dawn l-addittivi tal-ikel huma maħsuba biex jintużaw bħala trattament estern u mhumiex mistennija jidħlu fil-parti ta' ġewwa tal-frott li tittiekel. Għal dik ir-raġuni, it-trattament fuq frott li l-qxur tiegħu ma jittikilx mhux mistenni li jkollu effett fuq is-saħħa tal-bniedem. Huwa għalhekk xieraq li jingħata l-permess għall-użu tax-xama' tan-naħal (E 901), ix-xama' tal-karnawba (E 903), ix-xellak (E 904) u x-xama' mikrokristallina (E 905) fuq frott bħal dan li huwa impurtat minn pajjiżi bi klima tropikali, jiġifieri l-banana, il-mang, l-avokado, ir-rummien, il-papaj u l-ananas.
-
Skont l-Artikolu 3(2) tar-Regolament (KE) Nru 1331/2008, il-Kummissjoni għandha tfittex l-opinjoni tal-Awtorità Ewropea dwar is-Sigurtà fl-Ikel ("l-Awtorità") sabiex taġġorna l-lista tal-Unjoni tal-addittivi tal-ikel stipulata fl-Anness II għar-Regolament (KE) Nru 1333/2008, ħlief meta l-aġġornament inkwistjoni ma jkunx mistenni li jħalli effett fuq is-saħħa tal-bniedem. Billi l-awtorizzazzjoni għall-użu tax-xama’ tan-naħal (E 901) fuq il-banana, il-mang u r-rummien, l-użu tax-xama' tal-karnawba (E 903) u x-xellak (E 904) fuq ir-rummien, il-mang, l-avokado u l-papaj u l-użu tax-xama' mikrokristallina (E 905) fuq l-ananas tikkostitwixxi aġġornament ta' dik il-lista li mhux mistenni li jkollu effett fuq is-saħħa tal-bniedem, l-opinjoni tal-Awtorità mhix meħtieġa.
-
Il-Kummissjoni se tkompli tikkunsidra t-talbiet għall-użu tax-xama' fuq frott u ħaxix ieħor filwaqt li tikkunsidra s-sikurezza tal-konsumatur meta l-partijiet esterni jkunu mistennija li jittieklu, il-ġustifikazzjoni teknoloġika u l-possibbiltà li l-konsumatur jitqarraq, inklużi r-rekwiżiti tat-tikkettar.
-
Skont id-dispożizzjonijiet transitorji tar-Regolament tal-Kummissjoni (UE) Nru 1129/20113 il-lista tal-addittivi tal-ikel stabbilita fl-Anness II għar-Regolament (KE) Nru 1333/2008 tapplika fil-prinċipju mill-1 ta’ Ġunju 2013. Sabiex jiġu permessi l-użi ġodda ta' addittivi tal-ikel awtorizzati fis-suq qabel dik id-data, huwa meħtieġ li wieħed jispeċifika data aktar bikrija tal-applikazzjoni fir-rigward ta' dawn l-użi.
-
Għaldaqstant, l-Anness II għar-Regolament (KE) Nru 1333/2008 għandu jiġi emendat skont dan.
-
Il-miżuri stipulati f'dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali u la l-Parlament Ewropew u lanqas il-Kunsill ma opponewhom,
ADOTTAT DAN IR-REGOLAMENT:
Artikolu 1
Emenda għar-Regolament (KE) Nru 1333/2008
L-Anness II tar-Regolament (KE) Nru 1333/2008 huwa emendat skont l-Anness ta’ dan ir-Regolament.
Artikolu 2
Dan ir-Regolament għandu jidħol fis-seħħ fl-20 jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell,
Għall-Kummissjoni
Il-President
José Manuel BARROSO
ANNESS
Fil-Parti E tal-Anness II għar-Regolament (KE) Nru 1333/2008, l-annotazzjonijiet għal E 901, E 903, E 904 u E 905 fil-kategorija tal-ikel 04.1.1 "Il-frott u ħaxix sħiħ frisk kollu" jinbidlu b'dan li ġej:
"
|
E 901
|
Xama' tan-naħal, bajda u safra
|
quantum satis
|
|
għat-trattament tal-wiċċ tal-frott biss: frott taċ-ċitru, bettieħ, tuffieħ, lanġas, ħawħ, ananas, banana, mang, avokado, rummien u bħala aġent tal-igglejżjar fuq il-ġewż
|
Perjodu ta’ applikazzjoni fir-rigward tal-banana, il-mang, l-avokado, ir-rummien:
Minn [id-data tad-dħul fis-seħħ ta' dan ir-Regolament]
|
|
E 903
|
Xama' tal-Karnawba
|
200
|
|
għat-trattament tal-wiċċ tal-frott biss: frott taċ-ċitru, bettieħ, tuffieħ, lanġas, ħawħ, ananas, banana, mang, avokado, rummien u bħala aġent tal-igglejżjar fuq il-ġewż
|
Perjodu ta’ applikazzjoni fir-rigward tar-rummien, mang, avokado u papaj:
Minn [id-data tad-dħul fis-seħħ ta' dan ir-Regolament]
|
|
E 904
|
Xellak
|
quantum satis
|
|
għat-trattament tal-wiċċ tal-frott biss: frott taċ-ċitru, bettieħ, tuffieħ, lanġas, ħawħ, ananas, banana, mangu, avokado, rummien u bħala aġent tal-igglejżjar fuq il-ġewż
|
Perjodu ta’ applikazzjoni fir-rigward tar-rummien, mang, avokado u papaj:
Minn [id-data tad-dħul fis-seħħ ta' dan ir-Regolament]
|
|
E 905
|
Xama’ mikrokristallina
|
quantum satis
|
|
għat-trattament tal-wiċċ tal-frott biss: bettieħ, papaj, mang, avokado u ananas
|
Perjodu tal-applikazzjoni ananas:
Minn [id-data tad-dħul fis-seħħ ta' dan ir-Regolament]
|
"
MT MT
Dostları ilə paylaş: |