42
qərarı ilə Birləşmiş Ştatlara getmişdir. Rahat uçuş üçün lazım olan təyyarə tapmaq məsələsində rəsmi şəxs-
lərimiz Rusiya hökumətinə müraciət
etdilər və o, belə təyyarə verdi. Beləliklə, Prezident Türkiyədən ABŞ-a
Rusiya təyyarəsi ilə getdi. Bu fakt üç ölkənin necə birləşə bilməsini göstərir. Biz bu münasibətləri saxlamaq
istəyirik. Biz Azərbaycanın elə bir yer olmasını istərdik ki, burada ölkələr rəqabət etmək deyil, əməkdaşlıq edə
bilsinlər. Düşünürəm ki, biz buna nail ola bilərik.
S u a l: Siz Birləşmiş Ştatların Azərbaycana dəstəyini xatırladınız. Siz prezident Buş tərəfindən də
dəstək aldınız. Birləşmiş Ştatlar tərəfindən, Qərb tərəfindən bu kömək Azərbaycanda Sizin üçün nə
dərəcədə vacibdir?
C a v a b: Əlbəttə ki, vacibdir. Göndərdiyi məktuba görə mən prezident Buşa çox minnətdaram və bilirəm
ki, heç də hər bir Baş nazir belə şərəfə layiq görülmür. Mən bunu çox qiymətləndirirəm. ABŞ prezidenti ilə
1996-cı ildən, hələ Texas ştatının qubernatoru olduğu vaxtdan şəxsən tanışam və o vaxtdan bəri həm qubernator
kimi, həm də prezident vəzifəsində fəaliyyətinə çox böyük hörmət bəsləyirəm. ABŞ hökumətinin
digər üzvləri
ilə də çox yaxşı qarşılıqlı münasibətlərimiz var. Mən bu adamları çoxdan tanıyıram, eyni zamanda onlar da
İlham Əliyevin kim olduğunu, ölkələrimiz arasında münasibətlərin inkişafına verdiyi şəxsi töhfəni bilirlər. Bu
məktubu almaq şəxsən mənim üçün çox xoş idi. Mən bunu çox yüksək qiymətləndirirəm. Bu, Azərbaycanın
siyasətinə və bütün ölkəmizə göstərilən dəstəkdir və o, təkcə sözlə təsdiq və sübut olunmur – ABŞ çox etibarlı
müttəfiqdir. İraq müharibəsi zamanı Birləşmiş Ştatlar dəstək üçün müttəfiqlərinə və dostlarına müraciət etdi.
Azərbaycan ABŞ-ı dəstəkləyən ilk dövlətlərdən biri oldu. O vaxt buna 30-dan az ölkə qoşuldu. İndi bir çox
ölkələr deyirlər ki, onlar Birləşmiş Ştatları həmişə dəstəkləmişlər. Lakin indi, hadisələrin artıq arxada qaldığı
vaxtda bunu demək asandır. Bu, kimin əsl dost olduğunu, kiminsə dost olmadığını yoxlayan bir növ imtahan idi.
Ermənistan Birləşmiş Ştatları dəstəkləyən ölkələr sırasında olmadı, buna biganə qaldı. Özünü Birləşmiş Ştat-
ların əsl, etibarlı dostu olduğunu göstərən Azərbaycanın siyasəti isə Amerikada yüksək qiymətləndirilir. Mənə
göndərilən bu məktub da həmin siyasətin, ikitərəfli münasibətlərin nəticəsidir. Əlbəttə, şəxsiyyət məsələsinin də
rolu var. Mən çox razıyam, əminəm ki, münasibətlərimiz iki ölkənin rifahı naminə bütün sahələrdə inkişaf
edəcəkdir.
S u a l: Siz dediniz ki, prezident Buşla ilk dəfə o, hələ Texasın qubernatoru olarkən görüşmüşsünüz.
Bu barədə danışa bilərsinizmi?
C a v a b: Bu, neft şirkətində işlədiyim vaxtlarda olmuşdur. Görüşlərdə və konfranslarda iştirak etmək üçün
ildə iki dəfə ABŞ-a gedirdim. Texas Birləşmiş Ştatların neft sənayesinin vətənidir. Hyüstonda çox olmuşam.
Həmin dövrdə Texasın paytaxtında səfərdə olarkən qubernator məni qəbul etdi, çox səmərəli söhbətimiz oldu.
Xəzər regionunda Amerika şirkətləri ilə əməkdaşlığa töhfəmə görə o vaxt cənab Corc Buş məni fəxri texaslı
fərmanı ilə mükafatlandırdı.
S u a l: Xəzər dənizinin ehtiyatlarının bölüşdürülməsi barədə nə deyə bilərsiniz? Problem nədədir və
onun həllini kim ləngidir?
C a v a b: Hər şey 10 il bundan əvvəl, 1994-cü ildə “Əsrin müqaviləsi”ni imzaladığımız vaxtdan başlandı.
Xəzərin Azərbaycan sektorunda işləməyə tam haqqımız var və biz başqa sektorlara girmirik. Bu, düzgün mövqe
idi, artıq Rusiya və Qazaxıstan ilə sektor bölgüsünə əsaslanan ikitərəfli sazişlər imzalamışıq. Əlbəttə, problem
hələ axıradək həll edilməmişdir, bu, çox pisdir. Amma, eyni zamanda bu, xarici şirkətləri dayandırmadı və onlar
Xəzərin Azərbaycan sektoruna kapital qoydular. Artıq 5-6 milyard dollarlıq sərmayə qoyulmuşdur, bir-iki ildən
sonra bu rəqəm iki dəfə artacaqdır. Problem hələlik həll edilməsə də, bu, maneə deyildir. Əlbəttə ki, ölkələr
razılığa
gələ bilsəydilər, çox yaxşı olardı. Amma, təəssüflər olsun ki, hələlik belə deyildir.
Zənnimcə, biz bir
qərara gəlməliyik, amma, hətta gəlməsək də, məncə, bizim üçün böyük maneələr yaranmayacaqdır.
S u a l: Hər halda, problemin həllini kim ləngidir?
C a v a b: Müəyyən bir söz demək çətindir. Məsələn, dediyim kimi, biz başqa sektorlara girmirik. Sektor
bölgüsü hələ sovet dövründə tətbiq edilmişdi. Biz sovet dövründə qəbul edilmiş bölgünü əsas götürmüşük. İndi
Rusiya və Qazaxıstan ilə sazişlərimiz var. Prinsipcə, Türkmənistanla da aramızda ciddi fikir ayrılığı yoxdur.
Yeganə problem ondadır ki, Türkmənistan bəzi yataqların onlara məxsus olduğunu iddia edir. Bu, əslində,
düzgün deyildir. Hələ 1994-cü ildə biz müstəqil beynəlxalq tədqiqat apardıq və bu tədqiqat göstərdi ki,
sözügedən yataqlar bizə məxsusdur. İranla vəziyyət bir qədər başqa cürdür. Aramızda prinsipial fikir ayrılıqları
var, çünki İran sektor bölgüsünü, ümumiyyətlə, tanımır, öz sərhədlərini Sovet İttifaqının
dövründəki
hüdudlardan kənara çıxarmaq istəyir. Düşünürük ki, bizim mövqeyimiz ədalətlidir, çünki biz beynəlxalq dəstək
almışıq və beynəlxalq ekspertiza aparmışıq. Hər hansı beynəlxalq arbitrajda bizim mövqeyimiz ədalətli hesab
ediləcəkdir. Buna baxmayaraq, biz bütün əlaqədar ölkələri razılığa gəlməyə və fikir ayrılıqlarına son qoymağa
dəvət edirik.
S u a l: Yadımdadır, Xəzərdə İranla bir hadisə baş vermişdi. İran tərəfindən ölkənizə təhlükə varmı?
C a v a b: Düşünmürəm ki, baş vermiş hadisə ilə əlaqədar hər hansı təhlükə olsun. Biz onda bununla
əlaqədar öz etirazımızı bildirdik. Amma düşünmürəm ki, Azərbaycana qarşı təhlükə mövcuddur. Bizim ən
43
böyük sərhədimiz İranladır və onunla olduqca çox oxşar cəhətlərimiz var. Prezidentimizin İrana səfəri, –
sonuncu səfəri nəzərdə tuturam, – çox uğurlu oldu. Bu səfər iqtisadi əməkdaşlığın yeni yollarının axtarılmasına
kömək etdi və indi biz energetika layihələrini fəal həyata keçiririk. Kənd təsərrüfatı işləri ilə əlaqədar yayda
İranın, qışda isə bizim elektrik enerjisinə böyük ehtiyacımız olur. Ona görə də biz bir-birimizə elektrik enerjisi
veririk. İqtisadiyyatın müxtəlif sahələrində əməkdaşlıq edirik və İranla münasibətlərimizin yaxşı olmasına
çalışırıq. Aramızda hansısa fikir ayrılıqları olduğuna inanmıram.
S u a l: Siz dediniz ki, Azərbaycan Avropaya inteqrasiyada maraqlıdır. Ölkənizdə insan hüquqları, o
cümlədən mətbuat azadlığı, xüsusən də, azad seçkilərlə əlaqədar vəziyyət necədir?
C a v a b: Məncə, bizdə mətbuat çox azaddır. Qəzetlərimizə nəzər salsanız, heç bir senzura görməzsiniz,
onların üzərində hökumətin heç bir nəzarəti yoxdur. Bəzi müxalifət qəzetləri hökuməti təhqir edir və prezident
haqqında şayiələr yayır. Amma buna qarşı heç
nə edilmir, onların üzərində heç bir nəzarət və senzura yoxdur.
Bunu digər azadlıqlar barədə də demək olar. O ki qaldı seçkilərə, biz beynəlxalq müşahidəçilərin iştirakı ilə
azad və ədalətli seçkilər keçirmək əzmindəyik. Seçkiləri saxtalaşdırmağın hökumət üçün heç bir mənası yoxdur,
çünki yaxşı bilirik ki, əhali bizi dəstəkləyir. Seçkilər azad və ədalətli keçiriləcək, beynəlxalq birlik də bunun
şahidi olacaqdır. Lakin nə gizlətməli, bizdə heç də hər şey beynəlxalq standartlara uyğun deyildir. Odur ki,
müstəqilliyinin 12-ci ilini yaşayan, işğala, vətəndaş müharibəsinə, çevriliş cəhdlərinə məruz qalmış ölkədə, istər
daxildə, istərsə də kənarda hələ də düşmən qruplaşmalarının olduğu bir şəraitdə demokratik inkişafın
səviyyəsinin Qərb dövlətlərindəki kimi olduğunu söyləmək sadəlövhlük olardı. Ancaq ən başlıcası odur ki, biz
bu istiqamətdə irəliləyirik, bu bizim seçimimizdir. O, başqa cür də ola bilərdi, çünki ölkə üçün strateji seçim
etmək hökumətdən və prezidentdən asılı idi. Biz bu yolu seçdik, üç il əvvəl Avropa Şurasının üzvü olduq.
Qanunvericiliyimizi əhəmiyyətli dərəcədə təkmilləşdirərək Avropa standartlarına uyğunlaşdırmışıq. Avropa
Şurası qarşısında götürülmüş bütün öhdəliklər yerinə yetirilir. Biz bu istiqamətdə irəliləyirik. Lakin buna nə
qədər vaxt lazım olacağı hələ məlum deyildir. Zənnimcə, iqtisadiyyat və həyat standartları daha yüksək
səviyyədə olarsa, bu, demokratiyanın səviyyəsinə də təsir göstərəcəkdir.
S u a l: Seçkilər barədə. Seçkilər kimdən asılı olacaqdır? Çoxları iddia edir ki, seçkilər Sizdən və
Prezidentdən asılıdır?
C a v a b: Bəli, bu, hakimiyyətdə olanlardan asılıdır. Seçkilərin ədalətli və azad olması üçün biz mümkün
olan hər şeyi edəcəyik. Əminəm ki, beynəlxalq müşahidəçilər bunun şahidi olacaqlar.
S u a l: Potensial prezident kimi, Siz necə hesab edirsiniz, bunun sirri nədədir ki, çoxlarının fikrincə,
Sizin atanız tərəfdarlarının böyük bir qrupunu bir yerə toplamaq bacarığına malikdir. Onun çoxillik
təcrübəsi var, Siz necə, bunu edə biləcəksinizmi?
C a v a b: Bunun sirri onun şəxsiyyətində və xalq tərəfindən bütünlüklə dəstəklənməsindədir. Əgər lider öz
xalqı tərəfindən dəstəklənirsə, əlbəttə, müxtəlif qrupları,
bütövlükdə, vəziyyəti nəzarətdə saxlamaq onun üçün
çox asandır. Əgər gələcəkdə ölkə rəhbəri olsam, konkret nə baş verəcəyini indidən deyə bilmərəm. Hesab
edirəm ki, özüm haqqında, nə edəcəyim barədə, vəzifəmin öhdəsindən gələ bilib-bilməyəcəyim barədə
danışmaq təvazökarlıqdan uzaq olardı. Zaman göstərər. Bu gün mənim təyinatım hökumət tərəfindən də,
parlament tərəfindən də dəstəklənmişdir. Bütün rayonlardan mənim ünvanıma təbriklər göndərilir. Sadə insanlar
mənim təyinatımı dəstəkləyirlər, onu yüksək qiymətləndirirlər, çünki çoxları hakimiyyətdə boşluq
yaranacağından, sabitliyin pozulacağından qorxurdu. Mən isə gələcəkdə də sabitliyi təmin etmək və ölkəni
inkişaf etdirmək üçün əlimdən gələni etməyə çalışacağam.
S u a l: Yeni Azərbaycan Partiyasının idarə heyətində fikir ayrılığı varmı?
C a v a b: Heç bir fikir ayrılığı yoxdur. Bu, yalnız şayiələrdir. Müxalifətin mənim bu təyinatımdan
sarsılmasının səbəbi onun gündəlik təbliğatının səmərəsiz olmasındadır. Onlar müxtəlif qruplar və fikir
ayrılıqları barədə çox danışıblar. Guya, İlham Əliyevi bəziləri dəstəkləyir, bəziləri isə yox. Onlar bu barədə o
qədər danışmışdılar ki, artıq özləri öz dediklərinə inanmağa başlayırdılar. Amma mənim parlament
və hökumət
tərəfindən yekdilliklə dəstəkləndiyimi görəndə isə, əlbəttə, məyus olmuş, düşkünləşmişlər. İndi onların
vəziyyəti çox acınacaqlıdır, çünki onların bütün planları bir anın içində alt-üst oldu. Onlar ölkə daxilində
qarşıdurma baş verəcəyinə ümid edirdilər, bu, baş vermədi, hökumətdə dəyişikliklər gözləyirdilər, ümid
edirdilər ki, bundan istifadə edə biləcəklər, bu da olmadı, beynəlxalq təşkilatların etiraz edəcəyini gözləyirdilər,
lakin yenə də səhv etdilər. Bir çox beynəlxalq və Avropa təşkilatlarından, Birləşmiş Ştatlardan mənim ünvanıma
səmimi təbriklər daxil oldu. Onlar artıq nə etməlidirlər? Mən həmişə deyirəm, ölkə, xalq qarşısında xidmətlər
özünütəsdiqin ən yaxşı üsuludur. Azərbaycanda neft və qaz sektorunda, idmanda, Ermənistanın təcavüzkar kimi
tanındığı Avropa Şurasında, parlamentdə mənim iştirakımla hansı işlər görüldüyünü uzun-uzadı saya bilərəm.
Bəs müxalifətdən ölkə üçün nə etdiklərini soruşsanız, nə deyəcəklər? Bunun cavabında
onlar yenə də
boşboğazlıq edəcəklər. Onlar bizi təhqir edəcək, müxtəlif şayiələr yayacaqlar. Lakin seçkilərqabağı konkret
işlərdən danışmaq lazımdır. İşimizdə bəlkə də müəyyən səhvlər olmuşdur, çünki iş olan yerdə səhv də olar.
Ancaq məlumdur ki, tənqid etmək konkret işlə məşğul olmaqdan asandır. Bu bizim müxalifətə aiddir. Mən isə