57
LEV QUMİLYOV ADINA QAZAXISTAN
DÖVLƏT AVRASİYA UNİVERSİTETİNDƏ GÖRÜŞ
1 mart 2004-cü il
Azərbaycan prezidenti İlham Əliyevi universitetin binası önündə bu ali məktəbin rəhbərləri səmimiyyətlə
və mehribanlıqla qarşıladılar. İlham Əliyev universitetdə türkdilli xalqların mədəniyyəti və əlyazmaları muzeyi
ilə ətraflı tanış oldu. Azərbaycan prezidentinə məlumat verildi ki, muzeydə mədəniyyət nümunələri, o cümlədən
əlyazmaları, qədim Türk Xaqanlığının abidələri toplanmışdır. Muzeyin eksponatları bu mədəniyyət ocağına
gələn bir çox dövlətlərin rəhbərlərində böyük maraq doğurur. Belə bir məlumat da verildi ki, Xaqanlığın
banilərinin abidəsinin üçüncü nüsxəsini Qazaxıstan prezidenti Nursultan Nazarbayevin təşəbbüsü ilə Yaponiya
heykəltəraşları yaratmışlar. Bu muzeydə XI əsrin məşhur filoloq-türkoloqu Mahmud Kaşqarinin "Divani-lüğət-
it-türk", orta əsrin filosof şairi Yunus Balasaqunlunun əsərləri, habelə müxtəlif dövr əlifbalarının ilkin
variantları saxlanılır.
Azərbaycan dövlətinin başçısı bu maraqlı muzeylə tanışlıqdan məmnunluğunu bildirərək qeyd etdi ki, bu
qədim ərazilər türk tayfalarının ilk yurdları olmuşdur.
S a r s e n q a l i A b d e m a n a p o v: Hörmətli İlham Heydər oğlu!
Axşamınız xeyir, əziz qonaqlar!
Avrasiya Milli Universitetinin kollektivi adından Azərbaycan Respublikasının prezidentini bu tarixi salonda
salamlayıram. Burada bir çox dövlət xadimləri və ictimai xadimlər çıxış etmişlər. Biz çox şadıq ki, bu gün
qonağımız Sizsiniz – dost və qardaş Azərbaycanın prezidenti İlham Heydər oğludur. Xoş gəlmisiniz!
Hörmətli İlham Heydər oğlu, Siz universitetlə qısa tanış oldunuz və artıq
bilirsiniz ki, Avrasiya Universiteti
Qazaxıstan elitasının yeni nəslini hazırlamaq üçün prezident Nursultan Nazarbayevin fərmanı ilə yaradılmışdır.
Universitetimiz bu gün aparıcı ali məktəbdir və burada ölkənin müxtəlif regionlarından istedadlı gənclər təhsil
alırlar. Qazaxıstan məktəblərini qızıl medalla bitirənlərin dörddə bir hissəsi Avrasiya Universitetinin tələbəsi
olmuşdur. Kollektivimiz bununla fəxr edir. Universitetin fəaliyyətinin əsasını elə əvvəldən Avrasiya ideyası,
inteqrasiya ideyası təşkil etmişdir. Prezident universitetimizə Avrasiyanı öyrənən
görkəmli alim, tarixçi-
türkoloq Lev Nikolayeviç Qumilyovun adını vermişdir. Bu il universitetin 8 yaşı tamam olur. İndi olduğumuz
korpus 2000-ci ildə ölkə prezidentinin iştirakı ilə açılmışdır. Bir il bundan əvvəl yenə də prezident Nazarbayevin
iştirakı ilə daha bir müasir tədris və laboratoriya korpusu istifadəyə verilmişdir. Qazaxıstan hökuməti
universi-
tetin maddi-texniki bazasının beynəlxalq standartlara uyğun olmasına çalışır. Bizim üçün hər cür şərait yaradılır.
Hörmətli İlham Heydəroviç, Sizin zəngin tərcümeyi-halınızda ali məktəbdə – yüksək nüfuzlu Moskva Dövlət
Beynəlxalq Münasibətlər İnstitutunda iş dövrü də var. Ona görə də müasir təhsil problemləri Sizə tanışdır.
Azərbaycan Respublikasının prezidenti kimi,
Siz mədəniyyətin, elm və təhsilin inkişafına böyük diqqət
yetirirsiniz. 2003-cü il oktyabrın 15-də prezident seçkilərində qazandığınız qələbə bütün qardaş Azərbaycan
xalqının qələbəsidir.
Möhtərəm Prezident, icazə verin, xoş bir vəzifəni yerinə yetirim və universitetin Elmi Şurası adından Sizin
L.Qumilyov adına Avrasiya Universitetinin fəxri professoru adına layiq görüldüyünüzü elan edim.
(Universitetin rektoru Sarsenqali Abdemanapov görüş iştirakçılarının alqışları altında fəxri professor
diplomunu və mantiyanı dövlətimizin başçısına təqdim etdi.)