Salatın Əhmədli
243
– Ana, bilirsən… sabah 9 May günüdür…
Müharibə iştirakçılarını təbrik etməliyik… – Nəzakət
anasının dinmədiyini görüb ürəkləndi. – Uşaqlar gül
alacaqlar. Biz qırmızı qərənfil almalıyıq. Sən də mənə
gül alarsan?
Anasının susmağı ona çox uzun gəldi. Eşidəcəyi
«yox» sözünə cavab axtarırdı. Anasını inandırmalı idi
ki, gülü olmasa məktəbə gedə bilməz.
Ana əlini cibinə atdı. Cibində həmişə xırda pullar
olurdu. «Nəzakət, al bu pulu, tez qaç, çörək al».
«Nəzakət, al bu xırdanı, get duz al gətir, ağ duz olsun
ha…» Nəzakət elə bildi ki, anası indi də onu dükana
göndərəcək. Ana əlini xeyli cibində saxladı. O isə
gözlərini anasının cibindən çəkmirdi. Ana cibindən
çıxartdığı xırda pulları ovcunda bərk-bərk sıxmışdı.
Qızının yalvarıcı baxışlarını görüb ovcunu açdı.
Nəzakətin üstündən sanki dağ götürüldü. Tez anasının
əlindəki qəpikləri götürüb baxdı: bir dənə on qəpiklik,
iki dənə iyirmi qəpiklik. Ana qızının ürəyindən
keçənləri oxuyurmuş kimi dilləndi:
– Biz qərənfil ala bilmərik, qızım… Get qonşuya,
Səttar müəllimin yaxşı qızılgülləri var. Ona de ki, sənə
gül lazımdır. Pulunu ver, güllərini götür gəl.
Salatın Əhmədli
244
Nəzakət yerində donmuşdu. Axı, bu qəpiklərə gül
düşmürdü. Bunu Səttar müəllimə necə deyəcəkdi?
Gülsüz məktəbə gedə bilməzdi axı...
Nəzakət qəpikləri bərk-bərk ovcuna sıxmışdı.
Səttar müəllimgilə nə vaxt çatdığını hiss etmədi.
Alaqapını döydü. Ürəyi şiddətlə vururdu. «Birdən
Səttar müəllim evdə olmaz, onda mən neyləyərəm?»
Qapını ikinci dəfə döydü. Həyətin o başından zəhmli
səs eşidildi:
– A bala, kimsən orda, qapını nöşün sındırırsan?
Gəlirəm, bir səbrin olsun!
Bu acıqlı səsdən vahiməyə düşdü. «Yəqin mənə
acığı tutdu, o, mənə gül verməyəcək…» Yaxınlaşan
ayaq səsindən hiss etdi ki, gələn ev sahibi Səttar
müəllimdir.
Səttar müəllim təqaüdə çıxandan sonra balaca
həyətində cənnət yaratmışdı. Sıra ilə əkdiyi gül kolları
göz oxşayırdı. Quşlar da bu cənnət məkanda yuva
qurmuşdu.
Səttar müəllim qapını açanda balaca bir qızın
boynunu büküb durduğunu gördü. Kişinin cingiltili
səsini eşidəndə Nəzakət daha da büzüşdü.
Salatın Əhmədli
245
– Ay qız, dillən görüm niyə gəlmisən? Nə
istəyirsən günün bu qızmar çağında?
Nəzakətin yol boyu əzbərlədiyi söz bir anlıq yad-
ından çıxdı. Kəkələyə-kəkələyə dilləndi:
– Bilirsiz… anam dedi ki, mənə gül verəsiniz,
sabah şənliyə getməliyəm… Özümün də 50 qəpiyim
var…
Səttar müəllim qızın sözünü yarımçıq kəsdi:
– Neçə qəpiyin var dedin? – deyə gülümsədi.
– 50 qəpiyim…
– Aç göstər görüm!
Ovcunda tutduğu qəpikləri göstərdi.
– Ay qız, niyə yalan danışırsan?! Müəllimə yalan
danışmaq hardan ağlına gəldi?
– Mənim üç dənə qəpiyim var idi… 20 qəpiyim
yox olub. Yəqin itirmişəm…
– Bu necə olur, pulunu itirirsən?
– Anam mənə 50 qəpik vermişdi… İndi 20 qəpiyi
yoxdur. Düz deyirəm, inanın...
Nəzakətin gözündə yaş gilələnmişdi. Səttar
müəllim başı ilə gəl işarəsi verib, gül kollarına sarı
getdi. Nə fikirləşdisə dünəndən açılmış qızılgül kol-
larına yaxınlaşdı. Böyürdəki ağacdan asılmış qayçını
Salatın Əhmədli
246
götürdü. İri ləçəkli qızılgüllərdən dəstə bağladı.
Qəzetə bükülmüş buketi qıza uzatdı. Nəzakət utana-
utana qəpikləri Səttar müəllimin ovcuna qoydu. Kişi
eynəyinin altından qəpiklərə baxa-baxa:
– Bu nədir, ay qız?! – dedi. – Bəs deyirdin 20
qəpiyin itib? Burda isə cəmi 20 qəpik var.
Nəzakətin dili tutulmuşdu. Gözlərindən damla-
damla yaş axırdı. Donub yerində qalmışdı. Səttar
müəllimin səsi qulaqlarında cingildədi:
– Ay qız, nə quruyub qalmısan, gülünü də götür,
çıx get!
Nəzakət yerindən tərpəndi, qapıya sarı getdi.
Əlini qapıya uzadanda Səttar müəllimin zəhmli səsini
yenidən eşitdi:
– Ancaq yaman diribaş qızsan ha! Özünə yol aça-
caqsan.
Nəzakət ötüb keçənlərdən utanmasaydı, bərkdən
hönkürüb ağlayardı. Haray salıb hamıya bildirərdi ki,
yalançı deyil, o, heç kimi aldatmayıb. Anası ona üç
dənə qəpik vermişdi, ikisi iyirmi, biri on qəpiklik. Bəs
onlar necə oldu? Axı, mən ovcumu bərk-bərk sıxmış-
dım. Yəqin barmağımın arasından sürüşüb düşüb yerə,
hiss etməmişəm.
Salatın Əhmədli
247
Nəzakət yolu bir də qayıtdı. Gözləri itirdiyi
qəpikləri axtarırdı.
Onun gec qayıtması ananı narahat etməyə ba-
şladı. Qızcığaz əlini itirdiyi qəpiklərdən üzüb kor-
peşman evlərinə sarı döndü. O, sinəsinə sıxdığı qızıl-
gül dəstəsinə baxırdı. Güllər isə qızmar günün
istisindən solurdu. Nəzakət indi də solmuş ləçəklərin
dərdini çəkməyə başladı: «Belə getsə səhərəcən bu
güllər qalmaz ki, solub saralar».
Nəzakət istəmirdi ki, anası onun ağlamağını bil-
sin. Ona görə də qonşuları Məsmə xalagilə getdi, əl-
üzünü yudu, bir az toxtayandan sonra həyətlərinə
keçdi. Ana qızını görüb acıqlı səslə soruşdu:
– Demədimmi tez qayıt. Bəs güllərin hanı?
Nəzakət dalğın-dalğın:
– Ana, bayaqdan gəlmişəm, – dedi. – İncigildə
məşq edirdik. Gülləri də İnci qoydu suya, dedi ki,
bizdə qalsın, anam yaxşı buket bağlayır, sənin də
güllərini bağlayar.
Ana daha heç nə demədi. Nəzakət gecəni çox na-
rahat yatdı. Səhər lap tezdən durub deyəcəyi şeiri bir
də təkrarladı. Səhər yeməyindən sonra İncigilə keçdi.
Vazada gülləri görməyəndə ürəyi qopdu.
Salatın Əhmədli
248
– İnci, hanı mənim güllərim?
– Qorxma, Nəzakət, anam sənə heç kəsdə olma-
yan gözəl bir buket düzəldib. Elə gözəldir ki…
Özünün də xoşuna gələcək.
İnci anasının düzəltdiyi buketləri gətirdi. Birini
Nəzakətə verdi, o birini özü götürdü. Buketə baxanda
gözlərinə inanmadı. Nəzakət ağlamsınaraq dedi:
– Məsmə xala, bu nə güllərdi? Bəs hanı mənim
güllərim?
Məsmə xala:
– Qızım, narahat olma, – dedi. – Sənin güllərinin
ləçəkləri çox tez töküldü. Deyim, bil: bu heyva
çiçəyidir. Bundan heç kimdə olmayacaq. Bu, ruzi,
bərəkət rəmzidir. Sən məktəbə ruzi aparırsan…
Məsmə xala onun saçlarını iki yerə ayırdı, yux-
arıdan yığaraq İncinin bantları ilə bağladı, sığalladı.
Hər ikisinin üzündən öpüb məktəbə yola saldı.
Nəzakət başqaları kimi qərənfil dəstəsi gətirmə-
diyindən sıxılırdı, ona görə də arxa cərgəyə çəkildi.
Sinif rəhbəri Əsmər müəllim əlaçı şagirdinin gözlərini
yerə dikərək dayandığını görəndə yaxınlaşıb soruşdu:
– Nəzakət, sənin yerin birinci sıradır, bəs niyə
arxaya çəkilmisən?
Dostları ilə paylaş: |