Samfélag, atvinnulíf og íbúaþróun í byggðarlögum með langvarandi fólksfækkun
84
hugmynd um gagnaver aftast í kaflanum, í umfjöllun um tækifæri. Þessi atriði komu m.a. fram á
fundunum:
-
Á Blönduósi eru nokkur framleiðslufyrirtæki, matvælaframleiðslufyrirtækið Vilko, trésmiðjan
Stígandi sem gengur mjög vel á innréttingamarkaði. Léttitækni sinnir framleiðslu og þjónustu
og rekur verslun í Reykjavík. Ísgel framleiðir gelpoka, kælipoka, annars vegar er matvælalína
sem hefur verið nýtt í sjávarútvegi, hins vegar heilsulína sem nýtist sem bakstrr fyrir
íþróttamenn. Ullarþvottastöð Ístex var flutt frá Hveragerði til Blönduóss fyrir um 10 árum og
hefur gengið mjög vel, helst að vanti ull til að þvo. Þar vinna 10-12 manns á vöktum allan
sólarhringinn.
-
Á Blönduósi er tölvuþjónusta, pípulagningaþjónusta, verktakar á ýmsum sviðum, bifreiða- og
dekkjaverkstæði, tvær hárgreiðslustofur, bókhaldsstofur og innheimtufyrirtækið Mótus með
fimm stöðugildi.
-
Á vélaverkstæðinu á Skagaströnd starfa um sex starfsmenn, tveir starfa á rafmagnsverkstæði
og þessi verkstæði hafa sérhæft sig í þjónustu við sjávarútveg. Svo er þar trésmiðja með
nokkra starfsmenn.
-
Gámaþjónusta (sorphreinsun) fyrir Húnavatnssýslur er staðsett á Skagaströnd, endurvinnsla
er í þróun í nýju húsi, þar starfa fimm manns. Þjónusta þeirra nær víðar um Norðurland.
Sorpvinnslusvæði fyrir Norðurland vestra er staðsett í Austur-Húnavatnssýslu.
Rannsóknir, þróun og nýsköpun:
Tvö háskólasetur eru á þessu svæði: Háskólasetur frá háskólanum á Hólum sinnir textílfræði og
hafísfræðum og er staðsett við Kvennaskólann á Blönduósi, húsnæði sem hefur verið endurnýjað að
hluta. Á Skagaströnd er fræðasetur Háskóla Íslands, tengt sagnfræði. Á Skagaströnd er einnig
sjávarlíftæknisetrið Biopol með rannsóknir tengdar hafinu, en hjá Biopol eru fimm starfsmenn.
Velferðarmál og samfélag
Heilbrigðis- og félagsþjónusta og önnur opinber þjónusta:
Lögregla á Blönduósi þjónar allri Húnavatnssýslu. Heilbrigðisþjónusta er á Blönduósi og þjónar einnig
Skagaströnd með læknisþjónustu, en hjúkrunarfræðingur er til staðar á heilsugæslustöðinni á
Skagaströnd. Flestir íbúar Austur-Húnavatnssýslu sækja tannlæknaþjónustu á Sauðárkrók, þar sem
enginn tannlæknir er á svæðinu. Dvalarrými fyrir aldraða eru bæði á Blönduósi og Skagaströnd. Þessi
atriði komu fram á fundunum:
-
Samdráttur hefur orðið á fjárframlögum til heilbrigðisstofnunarinnar á Blönduósi sem veikir
starfsemi hennar.
-
Í tengslum við innheimtumiðstöð sektargreiðslna eru 12 störf á Blönduósi.
-
Hnitbjörg er kjarni átta íbúða í eigu Blönduóssbæjar. Það eru íbúðir fyrir aldraða með
sjálfstæða búsetu, án stuðnings. Sveitarfélögin í A-Hún. og Skagaströnd eiga þessar íbúðir
saman. Svo er öldrunardeild við heilbrigðisstofnunina á Blönduósi. Sveitarfélögin veita
heimilishjálp og heimsendingu á mat og styðja við félagsstarf aldraðra, en þessi þjónusta er
að tilstuðlan byggðasamlagsins.
-
Heilsugæslustöð á Skagaströnd er nýbyggð, þar er hjúkrunarfræðingur með fasta viðveru og
læknir kemur reglulega frá Blönduósi. Dvalar- og hjúkrunarheimili aldraðra, Sæborg, er
starfrækt á Skagaströnd. Þar eru níu búseturými og allt að 10 starfsmenn. Óttast er að
rýmum verði fækkað vegna niðurskurðar.
Húsnæði:
Á Blönduósi er hluti íbúðarhúsnæðis nýttur undir frístundabyggð, þ.e. í einkaeigu og ekki í
heilsársbúsetu. Bærinn á 35 leiguíbúðir og þær eru allar í leigu. Erfitt er að fá leigt. Húsnæðismál hafa
verið í jafnvægi á Skagaströnd. Nes listamiðstöð leigir félagslegar íbúðir af sveitarfélaginu en leigir
einnig íbúðir á almennum markaði.
Samfélag, atvinnulíf og íbúaþróun í byggðarlögum með langvarandi fólksfækkun
85
Umhverfi
Orku- og sorpmál:
Hitaveita er á Húnavöllum og á Blönduósi, að öðru leyti er rafmagn nýtt til húshitunar í
Húnavatnssýslum. Nú hefur verið ákveðið að leggja hitaveitulögn frá Reykjum á Húnavöllum og til
Skagastrandar og er það eitt af 11 samþykktum verkefnum sóknaráætlunar landshluta (fjárlög 2012).
Á fundunum kom einnig fram að hugsanlega verði Blönduvirkjun stækkuð á næstu árum og tengist
það mögulegri uppbyggingu gagnavers. Þá yrðu byggðar þrjár nýjar byggingar, sem m.a. myndi þýða
aukin fasteignagjöld fyrir Húnavatnshrepp.
Samgöngur:
Samgöngur voru mest ræddar í Húnavatnshreppi. Þar þarf að bæta vegi sem eru mikið til malarvegir.
Umræða um Svínavatnsleið heyrist af og til en samkvæmt ákvörðun samgönguráðherra stendur ekki
til að fara þá leið í bráð með þjóðveg eitt. Atriði sem rædd voru á fundunum:
-
Svínavatnsleið (Húnavallaleið) skiptir litlu fyrir Húnavatnshrepp, en gæti þó einfaldað skipulag
skólaaksturs. Ef þessi leiðin verður farin hefur það að ýmsu leyti neikvæð áhrif. Trúlega yrði
farið yfir nokkrar jarðir með tilheyrandi spjöllum. Mögulega er þetta verri leið veðurfarslega
séð. Hins vegar er líklegt að þessi vegur komi, en um hann eru skiptar skoðanir. Meðan
vegakerfið er í lélegu ástandi er þó skrítið að eigi að setja fleiri milljarða í þessa leið sem er
ekkert forgangsmál. Þetta eru ekki hagsmunir íbúa á svæðinu.
-
Helsta baráttumál í Húnavatnshreppi er að fá vegina innan sveitarfélagsins bætta, m.a. fyrir
vinnusókn út fyrir hreppinn. Vegur að Þingeyrum er varla akfær, en þangað fara margir
ferðamenn. Malbika á Reykjabraut frá þjóðvegi eitt og að Húnavöllum, því verki var frestað
en hófst að nýju á árinu 2011. Mokað er tvisvar í viku en yfirleitt er ekki mikill snjór.
-
Á Blönduósi er hörð barátta að halda þjóðvegi eitt í gegnum bæinn. Það er hagsmunamál, t.d.
varðandi ferðaþjónustu.
-
Það er of dýrt að ferðast með rútu og það dregur úr nýtingu slíkra samgangna. Hins vegar er
hækkun á eldsneyti líka skattur á landsbyggðina.
-
Hækkun bílprófsaldurs er ógnun við landsbyggðina. Ungmenni eru þá lengur háð foreldrum
um akstur.
-
Verið er að vinna að verkefni um almenningssamgöngur tengt sóknaráætlun, en þrýstingur er
á slíka lausn vegna skólaaksturs fyrir framhaldsskóla á Sauðárkrók, svo nemendur geti farið
daglega á milli. Hins vegar þarf að bæta Skagastrandarveg frá Þverárfjallsafleggjara að
Blönduósi, enda hefur orðið gífurleg aukning á umferð þar (það verkefni er á
samgönguáætlun, sjá framar).
-
Skagavegur hefur lengi verið á áætlun og verður samt aldrei af. Hann hefur verið bættur en
er alls ekki nógu góður. Margt er að sjá á þeirri leið sem er í raun ónumin, t.d. Kálfshamarsvík.
Vegabætur þarna eru hagsmunir fyrir bændur og ferðaþjónustu á öllu svæðinu.
Verslun og þjónusta
Íbúar Húnavatnshrepps sækja mest verslun á Blönduós, en einnig víðar. Þeir sækja t.d.
tannlæknaþjónustu á Sauðárkrók eða til Reykjavíkur. Ýmis þjónustufyrirtæki eru á Blönduósi, eins og
fyrr er nefnt. Í svörum við þjónustukönnuninni kom fram að bæði á Skagaströnd og Blönduósi eru
dagvöruverslanir, en íbúar Húnavatnshrepp sækja gjarnan verslun og aðra þjónustu á Blönduós. Þeir
fá þó þjónustu hárgreiðslukonu í Húnaver og yfir sumartímann er boðið upp á veitingar í skólanum á
Húnavöllum þar sem rekin er gistiþjónusta. Á Blönduósi eru tvær hárgreiðslustofur,
bókhaldsþjónusta, tölvuþjónusta, fleira en eitt veitingahús, áfengisverslun og á Skagaströnd eru allir
þessir þjónustuþættir nema áfengisverslun. Öll þjónusta iðnaðarmanna er til staðar á Blönduósi og
Skagaströnd, en íbúar Húnavatnshrepps sækja þjónustu á Blönduós, nema trésmiðja er í
sveitarfélaginu. Smárabær á Blönduósi selur raftæki, byggingarvörur og fleira. Tölvuþjónusta er sótt á
Samfélag, atvinnulíf og íbúaþróun í byggðarlögum með langvarandi fólksfækkun
86
Sauðárkrók. Matvöruverslun (Samkaup Úrval) á Skagaströnd er með svipað verð og í
nágrannabyggðum, auk þess er í bænum netverslun og lyfjaverslun.
Menntun
Fjarnámsver eru bæði á Skagaströnd og Blönduósi. Allar bekkjardeildir eru í grunnskólanum á
Húnavöllum. Tónlistarskóli er einn fyrir alla Austur-Húnavatnssýslu. Sundlaug er í öllum
sveitarfélögunum, en sundlaugin á Skagaströnd þó einungis opin á sumrin, annars er sótt á Blönduós.
Tölur um fjölda nemenda eru fyrir skólaárið 2010-2011. Þessi atriði komu fram:
-
Á Húnavöllum er grunn- og leikskóli, þar er einnig skrifstofa sveitarfélagsins og sumarhótel í
húsnæði skólans. Í grunnskólanum eru 63 börn og 12 í leikskóla. Skólinn er fyrir alla bekki.
Börnum fer fækkandi og þannig verður það áfram m.v. mannfjöldatölur. Lengsta fjarlægð í
skólaakstri er 50-60 km aðra leið. Nota þarf sjö skólabíla því það er búið innst í dölum, í
Svartárdal, Vatnsdal og víðar. Í grunnskólanum á Blönduósi eru 125 börn og tæplega 70 í
leikskóla, einnig börn úr dreifbýli. Leikskólinn tekur inn börn frá sex mánaða aldri. Hjá
skólanum starfa um 20 manns og svipað á leikskólanum. Svo er samstarf í íþróttum og um
félagsstarf af ýmsu tagi. Á Skagaströnd eru rúmlega 100 börn í grunnskóla og 35-40 í
leikskóla. Börn úr Skagabyggð eru bæði í skólanum á Skagaströnd og á Blönduósi.
-
Unglingar úr Húnavatnshreppi sækja sum hver framhaldsskóla á Sauðárkróki, en flest fara þó
til Akureyrar. Unglingar frá Blönduósi sækja einnig framhaldsskólann á Sauðárkróki, en fara
þó að meirihluta til Akureyrar. Um helmingur unglinga frá Skagaströnd sækja framhaldsskóla
á Sauðárkróki, aðrir fara á Akureyri eða annað. Skólaakstur myndi líklega auka sókn í
Fjölbrautaskólann á Sauðárkróki.
Menning
Í svörum við þjónustukönnuninni kom fram að aðkomnir menningarviðburðir séu nokkuð algengir á
svæðinu. Kvikmyndasýningar eru á Blönduósi og þar starfar leikfélag. Íbúar Húnavatnshrepps sækja
félagsstarf aldraðra til Blönduóss. Þessi atriði voru m.a. nefnd á fundunum:
-
Menningarsjóður Lárusar Ægis á Skagaströnd veitir styrki til menningarviðburða og það hefur
mikið að segja fyrir menningarlíf á svæðinu.
-
Mörg félög eru starfandi og félagsstarf einnig sótt út fyrir svæðið, t.d. á Sauðárkrók.
Skíðasvæðið í Tindastóli er vel sótt.
-
Margir viðburðir á Skagaströnd tengjast Nes listamiðstöð sem gefur bænum menningarlegt
yfirbragð.
-
Kántrídagar er íbúahátíð á Skagaströnd, haldin um miðjan ágúst. Í tengslum við þá er
skipulögð gönguferð á Spákonufell, Þórdísarganga, sem er tvisvar á sumri.
-
Tvö ungmennafélög starfa í Húnavatnshreppi, íþróttafélög eru á Skagaströnd og Blönduósi.
-
Karlakór Bólstaðahlíðarhrepps er skipaður félögum af svæðinu öllu (og úr Skagafirði) og aðrir
kórar eru einnig starfandi.
Sameining, samstarf
Eins og annars staðar á landinu er samstarf um ýmsa þætti milli sveitarfélaga á svæðinu, en einnig
víðar um Norðurland vestra. Samstarf við Skagfirðinga hefur vaxið með tilkomu vegar yfir Þverárfjall.
Þessi atriði voru rædd á fundum okkar:
-
Samstarf er mikið, byggðasamlög um margt og fer eftir málaflokkum. Svo er víðara samstarf
eins og SSNV. Málefni fatlaðra er á grunni NV. Félags- og skólaþjónusta er í A-Hún,
byggðasamlag er um menningu og atvinnumál og tónlistarskóli er starfræktur í gegnum
annað byggðasamlag. Á Blönduósi eru sorpmál á vegum gámaþjónustu úr Reykjavík.
Húnavatnshreppur er í byggðasamlagi með Blönduósi, Skagaströnd og Skagafirði, allt eftir
Samfélag, atvinnulíf og íbúaþróun í byggðarlögum með langvarandi fólksfækkun
87
málefnum. Samstarf er um tónlistarskóla, félags- og skólaþjónustu, brunamál með Blönduósi,
sorpmálin eru á sér samningi. Samlag er um menningarmál og atvinnumál, héraðsskjalasafn,
safn á Reykjum í samstarfi alls svæðisins og Stranda. Að Heimilisiðnaðarsafni standa öll
sveitarfélög í A-Hún. o.fl. aðilar.
-
Stór sameining varð á árunum 2005-2006. Það er mikið samstarf á Norðurlandi vestra og
kannski nóg eitt og sér. Það er ekki nóg að horfa á íbúafjölda, það þarf líka að horfa á
landsvæði og stærð þess. Það þarf að tryggja aðkomu jaðarbyggða að stjórnsýslu, að valdið
safnist ekki allt í miðstöðina. Smæðin getur líka verið þröskuldur í fámennu samfélagi. Svo
virðist sem endastöðvar eða jaðarsvæði eigi erfitt uppdráttar. Það aukast ekki tekjur við
sameiningu, hugsanlega má spara eitthvað, en þjónustuþörfin minnkar ekki. Þjónustustig
breytist, skilvirkni eykst kannski líka
-
Byggðasamlögin geta verið þung í vöfum. Það er annað samhengi í stærri einingum og oft
auðveldara að vinna að markmiðum í stærra samhengi.
-
Það er hálfpartinn verið að þvinga fólk til sameiningar gegnum framlög Jöfnunarsjóðs. En
fjármunir verða að fylgja auknum verkefnum. Það er sífellt verið að færa fleiri málaflokka til
sveitarfélaga, skóla, málefni aldraðra, fatlaðra o.fl.
það þarf stærri einingar til að taka við
því. Það koma kannski upp einskonar hverfasamtök, að svæðin myndi hópa til að hafa aukin
áhrif á stjórnsýsluna.
-
Það skiptir að frumkvæðið sé hjá sveitarfélögunum sjálfum, ekki stjórnvöldum. Þau
sveitarfélög sem eiga mest saman og starfa saman ættu að sameinast.
-
Skagaströnd-Blönduós-Húnavatnshreppur-Skagabyggð er eitt vinnusóknarsvæði. T.d. starfa
margir af þessu svæði á Vinnumálastofnun. Sjómenn koma líka víða að. Fólk úr
Húnavatnshreppi sækir vinnu á Blönduós. Hins vegar sækir fólk lítið vinnu í Skagafjörð. Fjallið
er hindrun, en samt vegur ferðakostnaður kannski þyngst. Eitthvað er þó um að fólk af
Skagaströnd sæki vinnu þangað.
-
Það þarf að skoða frekari sameiningu og kannski ætti að sameina Norðurland vestra í eitt
sveitarfélag.
-
Það ber að virða vilja íbúanna, það er lýðræði. Það er tilhneiging til miðstýringar, þ.e.
tilhneiging stærsta kjarnans að hygla sér. Stjórnsýslan er flókin og erfitt að hafa mannafla til
að sinna henni. Samt er kannski ekkert flókið að afgreiða mál þegar þau fara fyrst í gegnum
nefndir, eins og hjá stærri sveitarfélögum, eða hjá byggðasamlögum.
-
Mörg verkefni hafa notið stuðnings frá vaxtarsamningi. Mikið er reynt að fá söfn, setur og
handverksfólk til að vinna saman, en það getur tekið mjög langan tíma. Setrin fá smá aura frá
ríkinu; það eru alltof mörg setur og vantar stefnu og skipulag.
Stoðkerfi, byggðastefna
Ábendingar til ríkisvaldsins:
Eftirfarandi atriði komu fram á fundunum:
-
Með hækkandi eldsneytisverði verður staða dreifðra byggða erfiðari. Auknar álögur
stjórnvalda hafa mikið að segja.
-
Stærsta ógnunin er að öll stjórnsýsla og jafnvel grunnþjónusta er að færast til Reykjavíkur.
Niðurskurður hins opinbera sem snertir sjúkrahús, sýslumannsembætti og lögreglu og
heimamenn hafa ekkert um það að segja. Aukning er aldrei á útstöð, heldur hjá miðstöð.
-
Menn horfa framhjá sjálfsákvörðunarrétti sveitarfélaga, það er t.d. tónninn varðandi nýtingu
auðlinda.. Allur fréttaflutningur er á forsendum höfuðborgarsvæðisins. Það skortir þekkingu
og skilning, t.d. hjá fjölmiðlum.
-
Breytingar í sjávarútvegi eru áhyggjuefni og fyrirhugaðar breytingar á kvótakerfi eru ógnun
við landsbyggðina. Þessir fjármunir færu allir suður á höfuðborgarsvæðið.
Samfélag, atvinnulíf og íbúaþróun í byggðarlögum með langvarandi fólksfækkun
88
-
Á Skagaströnd eru áhyggjur af þeim opinberu störfum sem til staðar eru. Starfsemi
Vinnumálastofnunar eru tímabundin vegna atvinnuástandsins. En mögulega verður hægt að
halda ákveðnum fjölda starfa á staðnum.
Stoðkerfið:
Einnig er fjallað um stoðkerfið í kafla um Húnaþing vestra og sú umfjöllun á einnig við hér. Þessar
skoðanir komu m.a. fram á fundunum:
-
Það vantar sýn í stoðkerfinu, verkefni skarast, það er sambandsleysi milli aðila. Það ætti að
efla t.d. atvinnuþróunarstarfið og gera meira staðbundið. Nýsköpunarmiðstöð hefur t.d. ekki
verið sýnileg á þessu svæði og engin kynning á starfseminni. Vaxtarsamningurinn var ekki að
harmonera , en nú fer hann undir SSNV sem er gott. SSNV og atvinnuráðgjöfin hafa reynst
vel.
Tækifæri til eflingar
Á fundunum komu fram eftirtaldar hugmyndir:
Gagnaver er áhugavert tækifæri fyrir svæðið. Enn eru margir óvissuþættir og erfitt að segja
hvenær niðurstaða liggur fyrir. Gagnaver er tækniiðnaður og mögulegt að sprotafyrirtæki
myndu spretta í kringum það. Búið er að taka frá 270 hektara svæði rétt við Blönduós,
skipulagt fyrir þessa starfsemi. Húsið sem byggt yrði er upp á 160 þúsund fermetra. Í fyrstu
yrðu til 20 störf við fyrirtækið og yrði kannski allt að 100 störf, en það tæki samt 10-15 ár.
Þetta er 200 milljarða fjárfesting. Um er að ræða geymslu á rafrænum gögnum fyrir Morgan-
Stanley bankann sem er með höfuðstöðvar í Bandaríkjunum og útibú um allan heim. Þeir
ætla að loka og fækka gagnaverum og búa til stærra ver. Ísland er vel staðsett milli
Bandaríkjanna, Evrópu og Asíu og það er ástæðan fyrir því að það er horft hingað til lands.
Staðsetningin hér sparar tíma og svo er græn orka. Orkan er ekki vandamál til að byrja með,
en þarf að athuga í framtíðinni þegar á að stækka. Störfin eru sérhæfð. Störf yrðu fyrir smiði,
rafvirkja, húsverði, vaktmenn, fólk sem hefur eftirlit með tölvubúnaði o.fl. og svo afleidd
störf. Erfitt að segja hvenær þetta liggur fyrir. Sæstrengur til Bandaríkjanna yrði möguleiki ef
af þessu verður.
Það er vaxtarbroddur í ferðaþjónustu. Það eru miklir hagsmunir fólgnir í uppbyggingu
ferðaþjónustu á svæðinu, t.d. á Hveravöllum (t.d. heilsutengd ferðaþjónusta) og svo
skíðasvæðisins í Tindastóli. Þarna er sóknarfæri fyrir t.d. sumarhúsin á Blönduósi og hægt að
lengja ferðamannatímabilið. Veiði í rjúpu o.fl. gæti líka lengt ferðamannatímann.
Það væri hægt að búa til verkefni með samstarfi við kvennaskólann og Spákonuhof.
Dostları ilə paylaş: |