ZəLİmxan yaqub seçİLMİŞ ƏSƏRLƏRİ

___________________Milli Kitabxana__________________
"Dəniz kimi dalğalan, çaylar kimi coş", - dedi,
Haqqın eşqi, əsəri məni şair elədi!
Bir yaxşılıq görəndə yumşaldım, mehə döndüm,
Bir gözəllik görəndə duruldum, şehə döndüm,
Bir xəyanət görəndə polad zirehə döndüm,
Sözün hökmü, kəsəri məni şair elədi!
Dağlar üçün qəlbimin titrəməsi, əsməsi,
Yüz bilənin başını bir bilənin kəsməsi,
Səhər-səhər ruhumun çöllərə tələsməsi,
Ömrün neçə səfəri məni şair elədi!
Ünü göylərdən gəlir qəlbə daman səslərin,
Qarşısına haqq çıxar haqq axtaran kəslərin.
Əqidə cəfakeşi əsil müqəddəslərin
Haqdan gələn xəbəri məni şair elədi!
Min illik kədər yatır hər havanın bəmində,
Dünyaların dərdi var bir insanın qəmində.
Hönkürüb ağlamışam yasında, matəmində,
Elin dərdi, kədəri məni şair elədi!
Sazdan qopan haraydı, tardan qalxan nalədi,
Göz yaşlarım könlümə tökülən şəlalədi.
Solan hər insan ömrü bağrı yanmış lalədi,
Könüllərin qəhəri məni şair elədi!
Alçağın, kəmfürsətin həzər, əlindən həzər,
Addımbaşı susdurub, vurmağa fürsət gəzər.
Didərdi pəncəsində, parçalardı bəd nəzər,
Tanrının xoş nəzəri məni şair elədi!

---

___________________Milli Kitabxana__________________
MƏN HARDAN BİLƏRDİM
ŞAİRLİK NƏDİR
Keçilməz dərələr keçilməsəydi,
Aşılmaz zirvələr aşılmasaydı,
Yeldən qanad alıb, seldən güc alıb,
Ruhum küləklərə qoşulmasaydı
Mən hardan bilərdim şairlik nədir?
Torpaqdan, toxumdan, dəndən gəlməsəm,
Qurandan, kitabdan, dindən gəlməsəm,
Dərdi çoxalanda yerdəkilərin
Göylərə saldığı gündən gəlməsəm,
Mən hardan bilərdim şairlik nədir?
Minadan gəlməsəm, Turdan gəlməsəm,
Allahın verdiyi nurdan gəlməsəm,
Sinəmi saz edib, əlimi mizrab,
Qopuzdan, Qorquddan, qordan gəlməsəm,
Mən hardan bilərdim şairlik nədir?
Gedir qismətinə, bəxtinə sarı,
Yorulmur qarışqa, dincəlmir arı.
Qəlbimi riqqətə gətirməsəydi
Ana təbiətin yaratdıqları,
Mən hardan bilərdim şairlik nədir?
Fələklər sirdaşı, mələklər yarı,
Hər misra şairin sərvəti, varı.
Qulaq eşitməsə, könül duymasa
Göylərdən süzülən pıçıltıları,
Mən hardan bilərdim şairlik nədir?!

---

___________________Milli Kitabxana__________________
MƏN SÖZÜN ANASI
Tanrının sözünə dirsəklənmişəm,
Söz - yaşıl yamacım, söz - talam mənim.
Yeddidən yetmişə rəngi gözümdə,
Söz - gülüm, gülşənim, söz - lalam mənim.
Dilimdə ilk kəlmə dinəndən bəri,
Söz oldu ömrümün sərvəti, zəri.
Mənəm sərkərdəsi, mənəm əsgəri,
Söz - daşım, divarım, söz - qalam mənim.
Yoğurdum, başımda ağıl elədim,
Dastana çevirdim, nağıl elədim.
Böyütdüm, bəslədim, oğul elədim,
Mən sözün anası, söz - balam mənim.
28 yanvur 2005
ŞAİR QƏLƏMİYLƏ İŞİN OLMASIN
Bir nadanın atdığı daşa cavab
Mənə o qələmi nə sənin dədən,
Nə vəzir, nə vəkil, nə də şah verib.
Ona söz atmasın hər gəlib gedən,
Onu Zəlimxana bir Allah verib.
Yaz deyib sevinci, yaz deyib qəmi,
Fitnəyə verməyib, fəndə verməyib.
Allahdan almışam mən o qələmi,
Mənə o qələmi bəndə verməyib.
Qələm sındırmağa yaranmamışam,
Hünərin çatırsa, gəl, sındır onu.
Əgər bacarırsan, tək bircə axşam
Yazmaq həvəsindən daşındır onu.

---

___________________Milli Kitabxana__________________
Qələmin dünyası ocaqdı, pirdi,
Qələm sındıranlar şümürdü, bala.
Bu nifrət nə zaman qəlbinə girdi,
İçini nə zaman gəmirdi, bala?
Baxdım bostanıma atılan daşa,
Əl sənin əlindi, daş sənin deyil.
Gülməli səhnədi, qəmli tamaşa,
Ağıl özgənindi, baş sənin deyil.
Sən daş at, mən sənə pambıq atacam,
Yaralı canımı daş ağrıtsa da.
Boş dedi-qodular gəldi-gedərdi,
Könüllər sındırıb, baş ağrıtsa da.
Səni kim bu yola çəkib, aparıb,
At getsin, fırlansın, daş ona dəysin.
Sonradan başıma qaxınc etdiyin
Əvvəlki sevgin də başına dəysin.
Haqqın qəzəbinə gələrsən, bala,
Bu qələm "Saz" yazıb, "Ələsgər" yazıb.
İmrələr sözüylə çatıb vüsala,
Hər ulu kişiyə bir əsər yazıb.
Hər sevgi, hər barış bir yeni dastan,
Nifrət qəzəblərə, nifrət kinlərə.
Bu qələm dərs alıb Dərviş Yunusdan,
Bu qələm yas tutub "Didərginlər"ə.
Ey qələm sındırmaq istəyən naşı,
Allahın danışan dilidir qələm.
Şairin əlində od parçasıdı,
Cahilin əlində ölüdür qələm.
Fərhad külüngüdü Şirin yolunda,
Hasardı, qaladı şərin yolunda.
Can verib ocağın, pirin yolunda,
Ulu ustadların yoludur qələm.

---

___________________Milli Kitabxana__________________
Göydə bir mələkdi, yerdə pəridi,
Yanan üfüqlərin parlaq zəridi.
Coşanda Koroğlu dəliləridi,
Sevəndə Məcnuntək dəlidir qələm.
Dərvişdi, ozandı, eldi, aşıqdı,
Yaradan əllərə bir yaraşıqdı.
Harda qaranlıq var, orda işıqdı,
İnsanın xilaskar əlidir qələm.
DADALOĞLUNA
Qalxdı köç eylədi əfşar elləri,
Ağır-ağır gedən ellər bizimdi.
Dadaloğlu
Yerindən oynadı Oğuz elləri,
Qismətin köç oldu, ay Dadaloğlu!
Barxanan dağıldı, barın talandı,
Yurd-yuvan heç oldu, ay Dadaloğlu!
Cığırlar qızardı, izlər qanadı,
Qanlı yoxuşlarda dizlər qanadı.
Dırnaqlar qanatdı, üzlər qanadı,
Yolunan saç oldu, ay Dadaloğlu!
Çar qılınc oynatdı, fərman verdi şah,
Gülmədi üzlərə açılan sabah.
Nə səndə taqsir var, nə məndə günah,
Şeytanda suç oldu, ay Dadaloğlu!
Cağırsam, Tanrı da gəlməz karıma,
Allah da inanmır beh-bazarıma.
Heyif ümidimə, arzularıma,
Hamısı puç oldu, ay Dadaloğlu!

---