Guliston davlat universiteti b. A. Xasanov, A. A. Xashimov, A. B. Muxametov, A. A. Abduvohidov buxgalteriya hisobi

1.10. Buxgalteriya hisobining usullari
Metod (usul, yunoncha – metodos) tushunchasi ikki ma’noni bildiradi:

– ayrim voqealarni bilish va o’rganish usuli;

– alohida usul, harakat usuli yoki ko’rinishi.

Har qanday fanning predmeti va ob’ektlarining mohiyatini bilishga mazkur fan metodining mazmunini bilish orqali erishiladi.

Oldingi paragrafda ta’riflanganidek, buxgalteriya hisobining predmeti deganda, mablag’lar, manbalar va xo’jalik jarayonlari hamda faoliyat natijalari tushunilsa, uning metodi predmetni qanday usullar va amallar yordamida o’rganish zarurligini ko’rsatadi.

Demak, buxgalteriya hisobining metodi deb mazkur fan predmetini o’rganish uchun qo’llaniladigan usul (element)larning ilmiy asoslangan tizimiga aytiladi.

Iqtisodiy fanlar qatorida buxgalteriya hisobining metodi faqat uning o’ziga xos usullardan iborat bo’lib, ular fan predmetining mohiyati va uning oldiga qo’yilgan vazifalar hamda talablardan kelib chiqadi.

Buxgalteriya hisobi metodini tashkil etuvchi asosiy usullar (elementlar) quyidagilardan iborat: hujjatlashtirish va inventarizatsiya; baholash va kalkulyatsiya; hisobvaraqlar va ikki yoqlama yozuv; buxgalteriya balansi va moliyaviy hisobot.

Buxgalteriya hisobi sodir bo’layotgan xo’jalik muomalalarini hujjatlarda uzluksiz va yoppasiga aks ettirishdan boshlanadi. Hujjatlashtirish - bu sodir bo’lgan muomalani dastlabki ro’yxatga olish usulidir. Hujjatlarda xo’jalik muomalalarining mazmuni, ularning miqdori va sifati to’g’risidagi ma’lumotlar aks ettiriladi. Hujjatlarda aks ettirilgan xo’jalik muomalalarining to’g’riligi mas’ul shaxslar imzolari bilan tasdiqlanib, ularning dalillovchi kuchi ta’minlanadi.

Hujjatlashtirish - buxgalteriya hisobi ma’lumotlarining aniqligi va ishonchliligini ta’minlay turib, mulklarning saqlanishini qat’iy nazorat qilish, tejamkorlikka rioya qilish va xo’jalik faoliyati jarayonida mablag’lardan maqsadli foydalanishning muhim shartidir. Buxgalteriya hisobi ma’lumotlari mavjud mablag’lar bilan bir xil bo’lmog’i kerak. Bunday bir xillikni ta’minlash uchun vaqti-vaqti bilan inventarizatsiya o’tkazib turish kerak.

Inventarizatsiya - bu sanash, tortish, o’lchash va boshqa yo’llar bilan korxona mol-mulkini ro’yxat qilish, olingan ma’lumotlarni buxgalteriya ma’lumotlari bilan solishtirish, aniqlangan kamomad, ortiqcha chiqish, nobudgarchilik va hokazolar tarzidagi farqlarni hujjatlar asosida rasmiylashtirish, bu farqlarning sabablarini va aybdorlarini aniqlashdan iborat.

Buxgalteriya hisobida korxona mablag’larini aks ettirish uchun hujjatlarda qayd qilingan xo’jalik muomalalarining natura va mehnat o’lchovi ko’rsatkichlarini pul ifodasida baholash kerak. Baholash – bu hujjatlarda ko’rsatilgan xo’jalik muomalalarini pulda ifodalash usulidir. U har xil narsalardan tarkib topgan xo’jalik mablag’larini yagona pul ifodasida ko’rsatish imkonini beradi. Korxonalar mablag’larini baholashda ularning haqiqiy ishlab chiqarish yoki sotib olish tannarxi asos bo’ladi. Hujjatlarda aks ettirilgan va pulda baholangan barcha xo’jalik muomalalari buxgalteriya hisobi hisobvaraqlariga yoziladi.

Buxgalteriya hisobi hisobvaraqlari - bu korxona mablag’lari, ularning tashkil topish manbalari va xo’jalik jarayonlarini guruhlash, joriy tartibda aks ettirish va nazorat qilish usulidir.

Xo’jalik mablag’lari, ularning tashkil topish manbalari va xo’jalik jarayonlarining har bir guruhi bo’yicha yig’ma ma’lumotlar olish uchun iqtisodiy mazmuniga ko’ra bir xil bo’lgan xo’jalik muomalalarini guruhlashda hisobvaraqlardan foydalaniladi.

Xo’jalik muomalasini buxgalteriya hisobvaraqlarida aks ettirish ikkiyoqlama yozuv usuli yordamida amalga oshiriladi. Bu usul xo’jalik muomalalarining ikki taraflamalik xususiyatidan kelib chiqadi. Masalan, moddiy boyliklar sotib olish bilan bog’liq bo’lgan xo’jalik muomalasi bir tomondan moddiy boyliklar zahirasini ko’paytirsa, ikkinchi tomondan pul mablag’larining kamayishiga olib keladi. Xaridorda bu muomala aks ettirilganda sotib olingan materiallarning kirimi va mol etkazib beruvchiga to’langan pul mablag’larining chiqimi bo’yicha ko’rsatkichlar o’zaro bog’lanadi. Mol etkazib beruvchi bu muomalani aks ettirganda, xaridordan kelgan pulning ko’payishi va unga sotilgan materialning kamayishini o’zaro bog’liqlikda ko’rsatadi.

Materiallarni tayyorlash, mahsulot ishlab chiqarish, ish bajarish va xizmat ko’rsatish bilan bog’liq xarajatlar buxgalteriya hisobining alohida hisobvaraqlarida joriy tartibda guruhlanadi. Tayyorlangan materiallar, ishlab chiqarilgan mahsulotlar, bajarilgan ish va ko’rsatilgan xizmatning tannarxini aniqlash buxgalteriya hisobida kalkulyatsiya deyiladi. Kalkulyatsiyaning rejadagi, normativ, kutilayotgan (provizor) va hisobot kabiturlari mavjud. Hisobot kalkulyatsiyalari buxgalteriya hisobi hisobvaraqlaridagi yozuvlar asosida tuziladi. Kalkulyatsiyalash qoidalarini yuqori organlar belgilaydi va ular barcha korxonalar uchun majburiydir.

Buxgalteriya hisobi hisobvaraqlarida aks ettirilgan korxona mablag’lari, mablag’lar manbalari, xo’jalik jarayonlari va ularning natijalari to’g’risidagi ma’lumotlar vaqti-vaqti bilan balans tarzida umumlashtirilishi zarur. Balansda xo’jalik mablag’lari to’g’risida ma’lumotlar aks ettirilib, unda xo’jalikda qanday mablag’lar mavjudligi va ular qaysi manbalar hisobidan tashkil topganligi hamda maqsadli tayinlanishi ko’rsatiladi. Balans mavjud mablag’lar bilan ularning tashkil topish manbalarini taqqoslab, xo’jalik ahvolini o’rganish imkonini beradi.

Xo’jalik yurituvchi sub’ektlarning moliya-xo’jalik faoliyati haqida xulosa chiqarish uchun xo’jalik mablag’lari, ularning tarkibi va tashkil topish manbalarini ko’rsatuvchi ma’lumotlarga ega bo’lgan balansdan tashqari, korxonadagi ayrim bo’limlar xo’jalik faoliyatining umumiy ko’rsatkichlari, xo’jalik faoliyatining maxsus tomonlarini tavsiflaydigan ko’rsatkichlar ham zarur bo’ladi. Bunday ko’rsatkichlarga ega bo’lish buxgalteriya hisobi metodining muhim usullaridan bo’lgan hisobot yordamida erishiladi. Ma’lum davr uchun xo’jalik faoliyatini aks ettiruvchi umumlashtirilgan va o’zaro aloqadorlikni ta’minlaydigan ko’rsatkichlarni aks ettiruvchi shakllar yig’indisi hisobot deyiladi.

Yuqorida ko’rib chiqilgan buxgalteriya hisobi metodini tashkil etuvchi usullar (elementlar)ning har biri ma’lum darajada mustaqil bo’lishi bilan birga, boshqalarining amal qilishlari uchun birlamchi muhim shart-sharoit ham hisoblanadi. Bu esa fanning predmeti hisoblangan: mablag’lar, manbalar va xo’jalik jarayonlari hamda unda sodir bo’ladigan xo’jalik muomalalari o’rtasida sabab-oqibatli dialektik bog’liqlik mavjudligi bilan izohlanadi. Shu bilan birga ularni buxgalteriya hisobi tizimida to’liq, uzluksiz va ob’ektiv aks ettirishga erishiladi.

Shunday qilib, buxgalteriya hisobi predmeti va metodi o’rtasida ham sabab-oqibatli dialektik bog’liqlik mavjud (1.5-chizma).