100
ÜMUMDÜNYA GÖMRÜK TƏŞKİLATI AVROPA
REGİONU GÖMRÜK XİDMƏTİ RƏHBƏRLƏRİ
BEYNƏLXALQ KONFRANSININ İŞTİRAKÇILARI
İLƏ GÖRÜŞ
Prezident sarayı
2 fevral 2006-cı il
Azərbaycan Respublikasının Prezidenti İlham Əliyev fev-
ralın 2-də Prezident sarayında Ümumdünya Gömrük Təşkilatı
Avropa regionu gömrük xidməti rəhbərlərinin Bakıda keçirilən
beynəlxalq konfransının iştirakçılarını qəbul etmişdir.
Prezident İlham Əliyev Avropa regionu gömrük xidməti
rəhbərlərinin konfransının Bakıda keçirilməsini əlamətdar
hadisə kimi səciyyələndirdi, bunu Azərbaycanın beynəlxalq
aləmdə qazandığı nüfuzla və ölkəmizin gömrük orqanlarının
kifayət qədər təcrübə toplaması ilə əlaqələndirdi.
Prezident İlham Əliyev qonaqlara Azərbaycanın sosial-iqtisadi
inkişaf dinamikası barədə məlumat verərək dedi ki, təkcə ötən il
ümumi daxili məhsulun həcmi 26 faizdən çox, sənaye məhsulu
istehsalı isə 33 faizdən çox artmışdır. Bazar iqtisadiyyatının
qanunlarına uyğun olaraq, sahibkarlığın inkişafına dövlət
qayğısının səmərəli nəticələrindən söhbət açan Azərbaycan
prezidenti ötən il ümumi daxili məhsulda özəl bölmənin payının 75
faiz olduğunu bildirdi. Bu iqtisadi nailiyyətlərin 2006-cı ildə də
davam etdiriləcəyini vurğulayan prezident İlham Əliyev dedi ki,
iqtisadiyyatın belə sürətli inkişafı gömrük orqanlarının işinin daha
da gücləndirilməsini həyati zərurətə çeviribdir. Bu mənada
gömrük orqanları öz işlərini daha yüksək səviyyədə qurmalıdır.
Bundan əlavə, ölkəmiz keçid dövrünü yaşayır və sosial
problemlərin heç də hamısı öz həllini tapmayıbdır. Bu isə gömrük
orqanlarının öz işinə daha məsuliyyətli və yaradıcılıqla yanaş-
101
masını tələb edir. Prezident İlham Əliyev ölkəmizdə uğurla həyata
keçirilən neft və qaz layihələri reallaşdıqca, xüsusilə Bakı–Tbilisi–
Ceyhan neft və Bakı–Tbilisi–Ərzurum qaz kəmərləri istismara
verildikdən sonra gömrük orqanlarının üzərinə düşən vəzifələrdən
də danışdı.
Prezident İlham Əliyev Azərbaycanın gömrük orqanlarının
tarixini də xatırladaraq bildirdi ki, müstəqillik əldə etdikdən sonra
Azərbaycanda gömrük sistemi öz işinə sıfırdan başlayıbdır.
Müstəqillik dövründə dövlət üçün yeni olan bu qurum qısa vaxtda
kifayət qədər təcrübə toplayıb və Ümumdünya Gömrük Təşkilatı
ailəsində özünəməxsus yer tutubdur. Prezident İlham Əliyev bu
irəliləyişdə Ümumdünya Gömrük Təşkilatının müntəzəm olaraq
verdiyi məsləhət və tövsiyələrə, habelə gömrük orqanlarına xidmət
edən infrastrukturların qurulmasına göstərdiyi yardımlara görə
Ümumdünya Gömrük Təşkilatına və onun Baş katibi Mişel Daneyə
təşəkkürünü bildirdi.
Prezident İlham Əliyev konfransın işinə uğurlar arzuladı.
Ümumdünya Gömrük Təşkilatının Baş katibi Mişel Dane vaxt
tapıb konfrans iştirakçılarını qəbul etdiyinə və xoş sözlərə görə
Azərbaycan prezidentinə minnətdarlıq etdi. 40 ölkədən
nümayəndənin, o cümlədən 25 ölkənin gömrük xidməti rəhbərinin
iştirak etdiyi Bakı konfransının çox böyük əhəmiyyəti olduğunu
vurğulayan cənab Mişel Dane dedi ki, konfrans iki mövzu ətra-
fında davam etdirilir. Birincisi, kommersiya mübadilələrinin
təhlükəsizlik şəraitində aparılması, ikincisi isə, gömrük orqan-
larının mövcud imkanlarını genişləndirməklə onların əlaqələrini
daha da fəallaşdırmaqdan ibarətdir. Avropa Komissiyasının və
İnterpolun nümayəndələrinin konfransda iştirakı bu tədbirə verilən
əhəmiyyətin daha bir nümunəsidir.
Ümumdünya Gömrük Təşkilatının Baş katibi Azərbaycanda
gömrük orqanlarının yaranması və formalaşmasında dünya
şöhrətli siyasi xadim Heydər Əliyevin əvəzsiz xidmətlərini xüsusi
vurğuladı, sonrakı illərdə Azərbaycanın gömrük orqanlarının
işinin daha da təkmilləşməsinə prezident İlham Əliyevin göstərdiyi
diqqət və qayğını yüksək dəyərləndirdi. Cənab Mişel Dane indiki
102
konfransın Azərbaycanda keçirilməsini dəstəklədiyinə və tədbirin
yüksək səviyyədə təşkilinə görə prezident İlham Əliyevə iştirakçılar
adından minnətdarlığını çatdırdı, Azərbaycan prezidentinə xatirə
hədiyyəsi təqdim etdi.
Macarıstanın gömrük xidmətinin rəhbəri Yanoş Nac Avropa
ölkələrindən olan həmkarları ilə təcrübə mübadiləsi aparmaq,
qabaqcıl təcrübəni öyrənmək baxımından Bakıda keçirilən tədbirin
əhəmiyyətli cəhətlərindən danışdı. Rusiya Federal Gömrük
Xidmətinin rəhbəri Aleksandr Jerixov Azərbaycan prezidentinə
məlumat verdi ki, iki həftə əvvəl Sankt-Peterburqda MDB ölkələri
gömrük xidməti rəhbərlərinin görüşü olmuşdur. Həmin görüşdə
Ümumdünya Gömrük Təşkilatının ötən il keçirilmiş sessiyasında
bazar iqtisadiyyatı şəraitində gömrük işinin təhlükəsizliyi və
səmərəli təşkili ilə bağlı qəbul olunmuş qərar müzakirə edilmişdir.
Bakı konfransında həmin müzakirələr ümumiləşdiriləcəkdir.
Aleksandr Jerixov Azərbaycanla Rusiya arasında əməkdaşlığın
bütün sahələrdə genişləndiyini xatırlatdı, prezidentlər İlham
Əliyevin və Vladimir Putinin ölkələrimizin əlaqələrinin
möhkəmlənməsinə verdiyi töhfələrdən danışdı. Eyni zamanda,
gömrük orqanlarının bu əlaqələrin inkişafına yardım etməyə
borclu olduğunu vurğuladı.
Prezident İlham Əliyev ölkəmizdə gömrük işinin təkmilləş-
dirilməsində və Dövlət Gömrük Komitəsinin beynəlxalq əlaqələri-
nin inkişaf etdirilməsində Ümumdünya Gömrük Təşkilatının
rolunu nəzərə alaraq təşkilatın Baş katibi Mişel Danenin «Şöhrət»
ordeni ilə təltif edilməsi barədə Sərəncam imzaladığını bildirdi və
Azərbaycanın yüksək mükafatını ona təqdim etdi.
Azərbaycan Dövlət Gömrük Komitəsinin sədri Kəmaləddin
Heydərov prezident İlham Əliyevə «Gömrükdə beynəlxalq əmək-
daşlığa görə» döş nişanını təqdim etdi.
Prezident İlham Əliyev görüş iştirakçıları ilə xatirə şəkli
çəkdirdi.
Dostları ilə paylaş: |