1
İş № 2-1(105)-146/2017
AZƏRBAYCAN RESPUBLİKASI ADINDAN
Q Ə R A R
03 mart 2017-ci il
Sumqayıt şəhəri
Sumqayıt Apelyasiya Məhkəməsinin İnzibati - İqtisadi Kollegiyası
Sədrlik edən və məruzəçi-hakim Bəktaşi Səadət İnayət qızı,
hakimlər Quliyev Telman Osman oğlu və Tağızadə Gülnarə Fikrət qızından ibarət
tərkibdə, Əhmədov Vüqar Əhməd oğlunun katibliyi,
Cavabdehin nümayəndəsi Rzayev Elşən Əkrəm oğlunun iştirakı ilə,
İddiaçı Əliyev Savalan Mahmud oğlunun cavabdeh Azərbaycan Respublikası Əmək
və Əhalinin Sosial Müdafiəsi Nazirliyi yanında Dövlət Sosial Müdafiə Fondunun
Sumqayıt şəhər şöbəsinə qarşı 50 yaşdan, yəni 13 oktyabr 2008-ci il tarixdən güzəştli
şərtlərlə əmək pensiyasının təyin edilməsi, güzəştli şərtlərlə təyin edilmiş əmək pensiyası
məbləğinin həmin vaxt qüvvədə olmuş “Əmək pensiyaları haqqında” Azərbaycan
Respublikası Qanununun 27-ci maddəsinin tələbinə uyğun orta aylıq əmək haqqı ilə
hesablanması və yaranacaq məbləğ fərqinin hesablanaraq, birdəfəlik ödənilməsi
öhdəliyinin cavabdehin üzərinə qoyulması tələbinə dair Sumqayıt İnzibati-İqtisadi
Məhkəməsinin 30 yanvar 2017-ci il tarixli 2-1(85)-827/2017 saylı qərarından cavabdeh
tərəfindən verilmiş apelyasiya şikayətinə Sumqayıt Apelyasiya Məhkəməsinin binasında
şifahi məhkəmə iclasında baxaraq,
müəyyən etdi:
İddiaçı Əliyev Savalan Mahmud oğlu cavabdeh Azərbaycan Respublikası Əmək və
Əhalinin Sosial Müdafiəsi Nazirliyi yanında Dövlət Sosial Müdafiə Fondunun Sumqayıt
şəhər şöbəsinə qarşı 50 yaşdan, yəni 13 oktyabr 2008-ci il tarixdən güzəştli şərtlərlə əmək
pensiyasının təyin edilməsi, güzəştli şərtlərlə təyin edilmiş əmək pensiyası məbləğinin
həmin vaxt qüvvədə olmuş “Əmək pensiyaları haqqında” Azərbaycan Respublikası
Qanununun 27-ci maddəsinin tələbinə uyğun orta aylıq əmək haqqı ilə hesablanması və
yaranacaq məbləğ fərqinin hesablanaraq, birdəfəlik ödənilməsi öhdəliyinin cavabdehin
üzərinə qoyulması barədə iddia ərizəsi ilə məhkəməyə müraciət etmişdir.
Sumqayıt İnzibati-İqtisadi Məhkəməsinin (hakim Z.Məmmədov) 30 yanvar 2017-ci
il tarixli qərarı ilə iddia təmin edilmişdir.
Həmin qərardan cavabdeh apelyasiya şikayəti verərək birinci instansiya
məhkəməsinin qərarının ləğv edilməsini xahiş etmişdir.
Cavabdeh apelyasiya şikayətində qeyd etmişdir ki, 01 yanvar 2006-cı il tarixdən
qüvvədə olan Azərbaycan Respublikası “Əmək pensiyaları haqqında” Qanunun 9.8-ci
maddəsinə görə bu Qanunun 9-cu maddəsində göstərilən işlərdə güzəştli şərtlərlə pensiya
hüququ verən istehsalatların, peşələrin, vəzifələrin və göstəricilərin siyahısında göstərilən
işlərdə güzəştli şərtlərlə pensiya hüququ verən tam əmək stajı olan şəxslərə pensiyalar yaşa
və staja görə əvvəllər qüvvədə olmuş qanunvericiliklə müəyyən edilmiş tələblərə müvafiq
surətdə təyin edilir. 01 yanvar 2006-cı il tarixədək qüvvədə olmuş “Vətəndaşların pensiya
təminatı haqqında” Azərbaycan Respublikası Qanununun 13-cü maddəsində yeraltı və ağır
olan işlərdə çalışan işçilər, dənizdə çalışan neftçilər-istehsalatların, peşələrin, vəzifələrin
və göstəricilərin Azərbaycan Respublikası Nazirlər Kabineti tərəfindən təsdiq olunan 1
2
nömrəli siyahısı üzrə kişilər 52 yaşına çatdıqda və azı 20 il iş stajı olduqda bu müddətin
azı 10 ilini həmin işlərdə çalışdıqda güzəştli şərtlərlə yaşa görə pensiya təminatı hüququ
qazanırlar. Vətəndaşların əmək pensiyası hüquqlarının yaranması əsasları, bu hüquqların
həyata keçirilməsi qaydaları və əmək pensiyasının təminatı sistemi 01 yanvar 2006-cı il
tarixdən “Əmək pensiyaları haqqında” Azərbaycan Respublikası Qanununun 27.01-ci
maddəsinə əsasən bu qanunun qüvvəyə mindiyi günədək sığorta olunanların qazanılmış
olduqları pensiya hüquqları pensiya kapitalına çevrilməklə onların fərdi hesablarında
nəzərə alınır. Bu zaman həmin dövrə aid olan ümumi iş stajının hər ili üçün 170 manat (il
olaraq hesablanmaqla) pensiya kapitalı hesablanır və sığorta olunanların fərdi hesablarının
sığorta hissəsində 2006-cı ilin 01 yanvar tarixinə qeydə alınır.
Apelyasiya baxışı zamanı cavabdehin nümayəndəsi Səmədov Elxan Vaqif oğlu
apelyasiya şikayətində qeyd etdiklərinə uyğun izahat verərək onun təmin edilməsini,
birinci instansiya məhkəməsinin qərarının ləğv edilməsini məhkəmə kollegiyasından xahiş
etdi.
İşə apelyasiya qaydasında baxılarkən iddiaçı məhkəmə iclasının vaxtı və yeri
barədə lazımı qaydada məlumatlandırılmaqla çağırılmasına baxmayaraq, məhkəmə
iclasına gəlməmiş, gəlməməsinin üzürlü səbəbləri barədə məlumat verməmişdir. Bu
səbəbdən məhkəmə kollegiyası İPM-nin 62.3-cü maddəsinə əsasən işə iddiaçının iştirakı
olmadan baxılmasını mümkün hesab etmişdir.
Məhkəmə kollegiyası iş materiallarını və apelyasiya şikayətinin dəlillərini
araşdıraraq, cavabdehin nümayəndəsinin izahatını dinləyərək və işdə olan sübutlara hüquqi
qiymət verərək belə hesab edir ki, apelyasiya şikayəti təmin edilməməli və birinci
instansiya məhkəməsinin qərarı dəyişdirilmədən saxlanılmalıdır.
Azərbaycan Respublikasının İnzibati Prosessual Məcəlləsinin 82-ci maddəsinə
əsasən apelyasiya instansiyası məhkəməsi mübahisə ilə bağlı işə şikayət həddində və
hüquqi məsələlər, habelə sübutlar və faktlar (faktiki hallar) əsasında mahiyyəti üzrə tam
həcmdə baxır.
İş materiallarında olan AZE seriyalı 08393963 saylı şəxsiyyət vəsiqəsindən görünür
ki, Əliyev Savalan Mahmud oğlu 13 oktyabr 1958-ci il tarixdə anadan olmuşdur.
İş materiallarında olan NZ, 3363261 saylı hərbi biletin təsdiqlənmiş sürətindən
görünür ki, Əliyev Savalan Mahmud oğlu 1977-1979-cu illərdə hərbi xidmətdə olmuşdur.
İş materiallarında olan Əliyev Savalan Mahmud oğluna məxsus əmək kitabçasının
təsdiqlənmiş surətindən görünür ki, iddiaçı əmək fəaliyyətinə 1974-cü ildə başlamış, 1979-
1982-ci illər üzrə təhsil almış, müəyyən fasilələrlə müxtəlif idarələrdə müxtəlif vəzifələrdə
08 iyul 2014-cü ilədək işləmişdir.
İş materiallarında olan “Azərikimya” İB “Etilen-Polietilen” zavodu tərəfindən
verilmiş 15 sentyabr 2015-ci il tarixli, 515 saylı arayışdan görünür ki, Əliyev Savalan
Mahmud oğlu 07 iyul 1982-ci ildən 31 dekabr 2005-ci ilə kimi tam iş günü “Azərikimya”
İB “Etilen-Polietilen” zavodunun izopropil spirti sexində aparatçı, növbə rəisi, şöbə rəisi
vəzifələrində; 516 saylı arayışdan görünür ki, 01 yanvar 2006-cı ildən 08 iyul 2014-cü ilə
kimi tam iş günü “Azərikimya” İB “Etilen-Polietilen” zavodunun izopropil spirti sexində
texnoloq vəzifəsində işləmişdir; onun 31 dekabr 2005-ci ilə kimi işlədiyi göstərilən peşələr
(vəzifələr) Azərbaycan Respublikası Nazirlər Kabinetinin 1993-cü il 21 iyun tarixli, 320
N-li Qərarı ilə təsdiq edilmiş “Əmək şəraiti zərərli və ağır olan işlərdə çalışanlara yaşa,
qocalığa görə güzəştli şərtlərlə pensiya hüququ verən istehsalatların, işlərin, peşələrin,
vəzifələrin və göstərilənlərin 1 nömrəli Siyahısı”na; 01 yanvar 2006-cı ildən sonrakı vəzifə
3
(peşə) Azərbaycan Respublikası Nazirlər Kabinetinin 23 yanvar 2007-ci il tarixli, 12
saylı Qərarı ilə təsdiq olunan siyahıya əsasən güzəştli şərtlərlə pensiya çıxmaq hüququ
verən vəzifələrdir (peşələrdir).
İş materiallarında olan Azərbaycan Respublikası Əmək və Əhalinin Sosial
Müdafiəsi Nazirliyi yanında Dövlət Sosial Müdafiə Fondunun Sumqayıt şəhər şöbəsinin
12 yanvar 2017-ci il tarixli, 62/298 saylı məktubdan görünur ki, cavabdeh tərəfindən
iddiaçının 10 sentyabr 2015-ci il tarixli müraciətinin təmin olunmasından imtina
edilmişdir.
İşdən görünür ki, Əliyev Savalan Mahmud oğlu iddia ərizəsi ilə məhkəməyə
müraciət edərək ona güzəştli şərtlərlə yaşa görə əmək pensiyasının 13 oktyabr 2008-ci il
tarixdən təyin edilməsi, həmin tarixdə qüvvədə olmuş müvafiq normativ hüquqi aktların
normalarına uyğun olaraq əmək haqqı ilə hesablanması öhdəliyinin cavabdehin üzərinə
qoyulmasını xahiş etmişdir.
Birinci instansiya məhkəməsi iddia tələbini təmin etmiş və bu zaman ona istinad
olunmuşdur ki, iddiaçı Azərbaycan Respublikası Nazirlər Kabinetinin 21 iyun 1993-cü il
tarixli, 320 saylı qərarı ilə təsdiq olunan 1 nömrəli siyahısında göstərilən vəzifələrdə
çalışması ilə əlaqədar 10 noyabr 1997-ci il tarixədək 20 ildən artıq əmək stajına, o
cümlədən 10 ildən çox zərərli əmək sahəsində iş stajına malik olmuşdur. Yəni
“Vətəndaşların pensiya təminatı haqqında” Azərbaycan Respublikası Qanununun 13-cü
maddəsinə dəyişikliklər edilməsi barədə 13 iyun 1997-ci il tarixli, 321-İQD nömrəli
Qanun qüvvəyə minənə qədər iddiaçının əmək stajı 20 ildən çox və bu müddətin 10 ildən
çox hissəsi güzəştli olduğundan, onun güzəştli şərtlərlə əmək pensiyası hüququ 50 yaşdan,
yəni 13 oktyabr 2008-ci il tarixdən yaranmış olur.
Bundan başqa, məhkəmə qeyd etmişdir ki, “Əmək pensiyaları haqqında”
Azərbaycan Respublikasının Qanununun 9.8-ci maddəsində güzəştli şərtlərlə yaşa görə
əmək pensiyası, onun üçün tələb olunan yaş həddinin nə vaxt tamamlanmasından asılı
olmayaraq, yaşa və staja görə, bu Qanunun 9-cu maddəsində göstərilən işlərdə tam əmək
stajının toplandığı anda qüvvədə olmuş qanunvericiliklə müəyyən edilmiş tələblərə
müvafiq surətdə təyin edilməsi nəzərdə tutulmuşdur. İddiaçı da tələb olunan tam əmək
stajını “Vətəndaşların pensiya təminatı haqqında” Azərbaycan Respublikası Qanununun
13-cü maddəsinə edilmiş dəyişikliklər barədə 13 iyun 1997-ci il tarixli, 321-İQD nömrəli
Qanunun qüvvəyə mindiyi tarixədək topladığından məhkəmə hesab etmişdir ki, iddiaçıya
güzəştli şərtlərlə yaşa görə əmək pensiyası “Vətəndaşların pensiya təminatı haqqında”
Azərbaycan Respublikası Qanununun 10 noyabr 1997-ci il tarixədək qüvvədə olmuş
hüquq normalarına əsasən təyin edilməlidir.
Məhkəmə kollegiyası hesab edir ki, birinci instansiya məhkəməsi düzgün hüquqi
nəticəyə gəlmişdir.
Azərbaycan Respublikası Konstitusiyasının 38-ci maddəsinin III hissəsinin tələbinə
görə hər kəs qanunla müəyyən edilmiş yaş həddinə çatdıqda. xəstəliyinə, əlilliyinə, ailə
başçısını itirdiyinə, əmək qabiliyyətini itirdiyinə, işsizliyə görə və qanunla nəzərdə
tutulmuş digər hallarda sosial təminat hüququna malikdir.
Azərbaycan Respublikası Konstitusiyasının 149-cu maddəsinin VII-ci bəndinə
əsasən fiziki və hüquqi şəxslərin hüquqi vəziyyətini yaxşılaşdıran, hüquq məsuliyyətini
aradan qaldıran və ya yüngülləşdirən normativ hüquqi aktların qüvvəsi geriyə şamil edilir.
Başqa normativ hüquqi aktların qüvvəsi geriyə şamil edilmir.
“Əmək pensiyaları haqqında” Azərbaycan Respublikası Qanununun 3.1-ci
4
maddəsinə əsasən Azərbaycan Respublikasının vətəndaşları bu Qanunda göstərilən
hallarda əmək pensiyası hüququna malikdirlər.
Həmin Qanunun 9.8-ci maddəsinə əsasən “Əmək pensiyaları haqqında” Qanunun
qüvvəyə mindiyi günədək bu Qanunun 9-cu maddəsində göstərilən işlərdə güzəştli
şərtlərlə pensiya hüququ verən tam əmək stajı olan şəxslərə pensiyalar yaşa və staja görə
əvvəllər qüvvədə olmuş qanunvericiliklə müəyyən edilmiş tələblərə müvafiq surətdə təyin
edilir.
Qeyd olunan hüquq normasında “əvvəllər qüvvədə olmuş qanunvericiliklə”
müddəası ilə “Əmək pensiyaları haqqında” Azərbaycan Respublikası Qanununun qəbul
edildiyi vaxta qədər qüvvədə olmuş vətəndaşların pensiya təminatını tənzimləyən
normativ aktları, o cümlədən 2006-cı ilin yanvar ayının 1-dək qüvvədə olmuş
“Vətəndaşların pensiya təminatı haqqında” Azərbaycan Respublikası Qanunu nəzərdə
tutulmuşdur.
01 yanvar 2006-cı il tarixədək qüvvədə olmuş “Vətəndaşların pensiya təminatı
haqqında” Azərbaycan Respublikası Qanununun 13-cü maddəsinin 1-ci abzasının “a”
yarımbəndinə əsasən yeraltı işlərdə, əmək şəraiti xüsusilə zərərli və ağır olan işlərdə
çalışan işçilər, dənizdə çalışan neftçilər - istehsalatların, peşələrin, vəzifələrin və
göstəricilərin Azərbaycan Respublikası Nazirlər Kabinetinin 21 iyun 1993-cü il tarixli,
320 nömrəli qərarı ilə təsdiq olunmuş 1 nömrəli siyahısı üzrə kişilər-50 yaşına çatdıqda və
azı 20 il iş stajı olduqda bu müddətin azı 10 ilini həmin işlərdə çalışarsa axırıncı iş
yerindən asılı olmayaraq əmək şəraitinə görə güzəştli şərtlərlə yaşa görə pensiya hüququna
malikdirlər.
Həmin Qanunun 17-ci maddəsinin 1-ci abzasına əsasən yaşa görə pensiya, pensiya
üçün müraciət edənin orta aylıq əmək haqqının (72-ci maddə) 60 faizi, bu Qanunun 13-cü
maddəsinin “a” bəndində nəzərdə tutulan işlərdə çalışan işçilərə 70 faizi, lakin minimum
pensiyadan az olmayan məbləğdə təyin edilir.
“Əmək pensiyaları haqqında” Azərbaycan Respublikası Qanununun 21.2, 21.2.3 və
21.2.11-ci maddələrinə əsasən də müddətli həqiqi hərbi (alternativ) xidmət (1992-ci il
yanvarın 1-dək keçmiş SSRİ-nin ərazisində müddətli həqiqi hərbi xidmət dövrü daxil
olmaqla) və müvafiq icra hakimiyyəti orqanında qeydiyyatdan keçmiş özünümüdafiə
dəstələrində və birləşmələrində olduğu müddət, müvafiq icra hakimiyyəti orqanlarında
xidmət müddəti; hərbi xidmət müddəti (1992-ci il yanvarın 1-dək keçmiş SSRİ-nin
ərazisində hərbi xidmət dövrü daxil olmaqla) sığorta stajına daxil edilir.
“Vətəndaşların pensiya təminatı haqqında” Azərbaycan Respublikası Qanununun
13-cü maddəsinə 13 iyun 1997-ci il tarixli, 321-İQD nömrəli Qanunla edilmiş dəyişikliyə
əsasən isə həmin maddədə nəzərdə tutulan yaş həddi 16 sentyabr 1997-ci ildən başlayaraq
16 sentyabr 2000-ci ilədək hər il 6 ay artırılır.
Göründüyü kimi, iddiaçı Azərbaycan Respublikası Nazirlər Kabinetinin 21 iyun
1993-cü il tarixli, 320 saylı qərarı ilə təsdiq olunan 1 nömrəli siyahısında göstərilən
vəzifələrdə çalışması ilə əlaqədar 01 avqust 1997-ci il tarixədək 10 ildən çox zərərli əmək
sahəsində iş stajına malik olmuşdur.
“Əmək pensiyaları haqqında” Azərbaycan Respublikasının Qanununun 31-ci
maddəsinin 31.1 bəndinə əsasən əmək pensiyası hüququ olan şəxslər əmək pensiyası
hüququnun yarandığı gündən heç bir müddət məhdudiyyəti olmadan istənilən vaxt əmək
pensiyasının təyin olunması üçün müraciət edə bilərlər.
Həmin Qanunun 32-ci maddəsinin 32.1 bəndinə əsasən yaşa görə əmək pensiyası,
5
buna hüququ olan şəxsin müraciəti əsasında əmək pensiyasının yarandığı gündən, lakin bu
qanunun qüvvəyə mindiyi gündən tez olmayaraq ömürlük təyin edilir.
Həmin Qanunun 37.7-ci maddəsinə görə isə keçmiş müddət üçün alınmamış əmək
pensiyasının məbləği müddətindən asılı olmayaraq ödənilir.
Göründüyü kimi, iddiaçı əmək fəaliyyətinin ilk dövründən əmək şəraiti xüsusilə
zərərli və ağır olan işlərdə işləməklə müəyyən edilmiş yaşa çatdıqda gələcəkdə dövlət
tərəfindən ona güzəştli şərtlərlə pensiya verilməsinə ümid etmiş, həmçinin həmin işlərdə
işləməklə əmək haqqının müəyyən hissəsini məcburi sığorta haqqı kimi ödəməklə əmək
pensiyasının ödənilməsinə yönəldilən vəsaitlərin yaradılmasında iştirak etmiş və həmin
vəsaitlərin yaradılması üçün iddiaçı tərəfindən ödənilmiş məbləğ onun mülkiyyəti hesab
olunur.
“Andreyeva Latviyaya qarşı” məhkəmə işi üzrə İnsan Hüquqları üzrə Avropa
Məhkəməsinin 18 fevral 2009-cu il tarixli qərarında göstərilmişdir ki, dövlət pensiya
proqramını tətbiq etməyə başlayanda, ondan irəli gələn şəxsi hüquqlar və maraqlar,
pensiya ödənişləri etməsindən və pensiya proqramının maliyyələşmə vasitələrindən asılı
olmayaraq, 1 saylı Protokolun 1-ci maddəsi ilə əhatə edilmişdir.
Azərbaycan Respublikası İnzibati Prosessual Məcəlləsinin 2.2.2-ci maddəsinə görə
inzibati məhkəmə icraatı qaydasında inzibati orqanın üzərinə inzibati aktın qəbul edilməsi
ilə bağlı müvafiq öhdəliyin qoyulmasına dair iddialara və ya inzibati orqanın
hərəkətsizliyindən müdafiəyə dair iddialara (məcburetmə haqqında iddia) baxılır.
Həmin Məcəllənin12.1-ci maddəsinə əsasən məhkəmə proses iştirakçılarının
izahatlarını, ərizə və təklifləri ilə, onların təqdim etdikləri sübutlarla və işdə olan digər
materiallarla kifayətlənməyərək, mübahisənin düzgün həlli üçün əhəmiyyət kəsb edən
bütün faktiki halları xidməti vəzifəsinə görə araşdırmağa borcludur.
Həmin Məcəllənin 14.3-cü maddəsinə görə inzibati aktın qəbul edilməsi tələbinə
dair (məcburetmə haqqında) iddialar üzrə həmin aktın qəbul edilməsini zəruri edən faktiki
şərtlərin mövcudluğunu sübut etmək vəzifəsi iddiaçının üzərinə düşür. Lakin inzibati
orqan iddiaçının arzuladığı inzibati aktın qəbulunu konkret halda istisna edən faktiki
şərtlərin mövcudluğuna istinad etdiyi hallarda, belə şərtlərin mövcudluğunu sübut etmək
vəzifəsi həmin inzibati orqanın üzərinə düşür.
Həmin Məcəllənin 33.1-ci maddəsinə görə məcburetmə haqqında iddia vasitəsi ilə
iddiaçı onun arzuladığı inzibati aktı qəbul etmək vəzifəsini cavabdehin üzərinə qoymağı
məhkəmədən tələb edə bilər.
Həmin Məcəllənin 73.1-ci maddəsinə görə inzibati aktın qəbulundan imtina
olunmasının və ya cavabdehin hərəkətsizliyi nəticəsində inzibati aktın qəbul
edilməməsinin qanuna zidd olduğu və iddiaçının hüquqlarının pozulmasına səbəb olduğu
hallarda, məhkəmə inzibati orqanın üzərinə inzibati aktın qəbul edilməsi barədə öhdəlik
qoyur.
Göstərilənlərə əsasən məhkəmə kollegiyası belə nəticəyə gəlir ki, cavabdeh
apelyasiya şikayətində göstərdiyi dəlilləri sübut edə bilmədiyindən apelyasiya şikayəti
təmin edilməməli, birinci instansiya məhkəməsinin qərarı dəyişdirilmədən saxlanılmalıdır.
Şərh edilənlərə əsasən və Azərbaycan Respublikasının İnzibati Prosessual
Məcəlləsinin 69, 87.6, 89 və 94.1-ci maddələrini rəhbər tutaraq, məhkəmə kollegiyası
qərara aldı:
Azərbaycan Respublikası Əmək və Əhalinin Sosial Müdafiəsi Nazirliyi yanında
Dövlət Sosial Müdafiə Fondunun Sumqayıt şəhər şöbəsinin apelyasiya şikayəti təmin
6
edilməsin.
Sumqayıt
İnzibati-İqtisadi
Məhkəməsinin
30
yanvar
2017-ci
il
tarixli
2-1(85)-827/2017 saylı qərarı dəyişdirilmədən saxlanılsın.
Qərar təqdim olunduğu gündən 1 (bir) ay müddətində Sumqayıt Apelyasiya
Məhkəməsi vasitəsi ilə ondan Azərbaycan Respublikası Ali Məhkəməsinin inzibati-
iqtisadi kollegiyasına kassasiya şikayəti verilə bilər.
Əsli ilə düzdür,
Sədrlik edən
Səadət Bəktaşi
Dostları ilə paylaş: |